از طرف تارک اسلام
نُورْ الدِّین بجواب تَرکِ اسلام, حصہ 9
حصہ اول قربانی کا مسئلہ بھی عجیب وغریب مسئلہ ہے تمام دنیا میں بسائط عالم سے لے کر اعلیٰ مرکبات تک کی قربانی ہور ہی ہے اور ایشیا کا مذہبی دارالعلوم مع یورپ وقدیم امریکہ افریقہ اور پولنشیا کے اس کا عامل ہے مگر آج کل کی دنیا انکار کی طرف مائل ہے۔اوکسیجن ہر متنفس میں انسانی آرام کے لئے قربان ہوتی ہے۔کاربن درختوں کے لئے قربا ن ہوتی ہے۔کروڑوں من لکڑی اور کوئلہ اگنی دیوتا کے لئے اسٹیمروں۔ریلوں اور ورک شاپوں میں قربان ہوتاہے۔تب انسان کے سامان اگنی جی کی پرستنا پرہمیں ملتا ہے اور کہنے والے کہے جاتے ہیں قربانی لغو حرکت ہے اور ہمارے نزدیک تو ہر ایک چیز میں روح ہوتی ہے اور آریہ بھی درختوں میں روح مانتے ہیں۔ستیارتھ میں بحوالہ منوجی لکھا ہے جو نہایت درجہ کے تموگنی ہیں وہ درخت کیڑے مکوڑے کا جنم پاتے ہیں۔اس لئے درختوں کا کاٹنا اور اپنے کام میں لانا ایسا ہی ہوا جیسا حیوان کامارنا۔پس درخت کیوں قربان کئے جاتے ہیں اور انسان کی خاطر ان کی قربانی کیو ں جائز ہے۔عذر کیا جاسکتا ہے کہ ان کی روح بے ہوشی کی حالت میں ہے پس یہ قربانی اس لئے جائز ہے جیسے ستیارتھ پرکاش صفحہ ۶۰۲میںہے۔اپنے مطالب حل کرنے کو خوب عذر ہے بھلا اس دعویٰ کا ثبوت کیاہے۔کند مول وغیرہ چیزوںمیں رہنے والے جیون کو سکھ دکھ محسوس نہیں ہوتا۔دیکھو صفحہ ۵۹۹ تو کیا پھر بے ہوش کرکے قربان کر لیں اور اسی طرح بے ہوشی کے بعد قربانی کا فتویٰ آریہ سماج کیا دے گی؟پھر جب ہم غور کرتے ہیں تو حیوانی قربانی کامسئلہ بھی وسیع نظر آتا ہے۔ایک انسان کو ویدان کا مرض ہوتا ہے تو الٰہی کارخانہ میں ہزاروں ہزار ایسی دوائیں ہیںجن کو استعمال کرکے ان جانوروں کی قربانی اس مریض کے لئے کی جاتی ہے اور ہزاروں ہزار جانور اس ایک جان کی خاطر ہلاک کئے جاتے ہیں تب وہ جانور ہلاک ہو کرمریض انسان کو اورحکیم کو راحت بخش ہوتے ہیں۔صرف تقریریں بنانا قوت رحم کو ضرور جوش دیتا ہے مگر عملی حالت بتاتی ہے کہ انسان اپنی ضرورت و آرام
کے لئے کس قدر جانوں کو قربان کرنا لابدسمجھتا ہے۔اس سے آگے چل کر دیکھیں تو سیاست مدن میں ادنیٰ آدمی اعلیٰ کے لئے ہمیشہ قربان ہوتا ہے۔سفر مینااور دیسی ادنیٰ سپاہی پہلے مارے جاتے ہیں پھر ادنیٰ افیسر اور اسی طرح درجہ بدرجہ اور بادشاہ کی نوبت نہیں آتی۔ہم نے ویدک احکام دکھائے ہیں ویدوں میں لکھا ہے کہ جس طرح بجلی بادلوں کو اور آگ بَن کے گھاس کو فنا کرتی ہے اسی طرح سپہ سالاروں کو چاہیے کہ مخالفوں کو ہلاک کر دیں۔دیکھو ہمار ا صفحہ ۱۰رگوید ۶۱۶۔بلکہ دیانندی خیال کے مطابق تو جانوروں اور مویشی بلکہ گائیوں اور آدمیوں کو بھوکا مار کر اپنی فتح واقبال کی خاطر قربان کرنا جائز ہے۔دیکھو ستیارتھ صفحہ ۲۱۱۔اور نوح کے وقت جل تھل کرنے پر اعتراض کہ بہت جیو اس وقت مارے گئے ہوں گے اور یہ ظلم ہے۔ایسے واقعات بیان کرنے والی کتاب خدا کی کتاب نہیں ہوسکتی۔کسی وقت مناسب سمجھے تو دشمن کوچاروں طرف محاصرہ کرکے روک رکھے اور اس کے ملک کو تکلیف پہنچا کر چارہ،خوراک،پانی اور ہیزم کو تلف وخراب کردے۔منو ۷۔۱۹۶۔دشمن کے تالاب شہر کی فصیل اور کھائی کو توڑپھوڑ دیوے۔رات کے وقت ان کو خوف دیوے اور فتح پانے کی تجویز کرے۔منو صفحہ۱۹۷ ذرہ ان الفاظ (ملک کو تکلیف پہنچاکر چارہ،خوراک،پانی،ہیزم کا تلف کرنا تالاب توڑ دینا)پر غور کرو۔کیانرم دل کے مناسب حال قواعد ہیں۔جیسے پال کا دل ہے۔آہ ! دوسرے مذہب کی تردید کے وقت کہنے کو انسان کو نرم دلی کا وعظ یاد آتا ہے مگر اپنے گھرکی ضرورتوں پر کیسے احکام جاری کئے جاتے ہیں اور جب اپنا نفع ونقصان ملحوظ ہو تو کن قوٰی سے کام لیا جاتاہے۔دھرم پال کا نرم رحیم دل اور جنگوں سے متنفر دیکھئے کیا تأویل گھڑتاہے یا ویدک مت کو ترک کرتا ہے مگر اغراض کے سامنے ایسے لوگ میری کیونکر سنیں گے!! انسائیکلو پیڈیا برٹانیکا کی جلد۲۱صفحہ ۱۳ اور انسائیکلو پیڈیا ببلیکا جلد۴صفحہ ۴۱۸۷تا۴۲۴۰میں ہے۔ایران۔انڈیا۔یونان۔روم۔عرب۔افریقہ۔قدیم امریکہ اور روما میں قربانی کا عام رواج
تھا اور قربانیاں رضا ئے الٰہی۔کفارہ معاصی۔ازالہ غضب اصنام کے لئے۔غریب کی غربت۔شاعر کی قوت بڑھانے۔بیمار کی شفا کے واسطے قربانی ہوا کرتی تھیں۔ایرانیوںمیں شکریہ۔کفارہ اور حمد الٰہی کے لئے لڑکے کے تولد۔ختنہ۔شادی پر اور مہمان کے آنے پر۔فتح مندی۔زمین کے جوتنے۔کنوئیں کی بنا۔بنیاد عمارت۔باہمی معاہدہ۔مردہ کی سالانہ رسم، شکار کے بعد اور جب کسی کا جانور پہلا بچہ دے تو قربانی ہوا کرتی تھی۔بابلی لوگ قیدیوں میں ایک انسان کی قربانی اور افریقہ میں حسین آدمی کی قربانی ہوتی تھی۔بابلیوں میں ہرن کی قربانی اور عبرانیوں میں بادشاہ اور رعایا کی طرف سے شاہی قربانی چھ لیلے اور ایک دنبہ ضروری تھا۔سوختنی قربانی بھی اگنی دیوتا کے لئے ہوتی تھی اور اس کو عولی کہتے تھے۔حضرت سلیمان نے جب ہیکل تیار کی تو قربانیوں کی نوبت لاکھوں تک پہنچی۔روما میں سور کی۔یونان میں شراب کی قربانی بھی معمول تھا۔میکسیکو میں تین منزلہ مندر میں سبز پتھر پر قربانی ہوتی تھی۔برٹانیکا جلد۱۶۔۲۲۰ضرور ملاحظہ ہو۔دعا اور قربانی لازم و ملزوم۔جلد ۲۴۔۳۰۰ ڈاہومی میں بادشاہ کی وفات پر دو ہزار آدمی کی قربانی ہوتی ہے۔جلد۱نمبر۵۱ انگلستان میں دوروایڈسن قوم میں قربانی تھی۔انڈیا کی تمام اقوام میں جلد ۲۹۔۲۸۱سے معلوم ہوتا ہے کہ قربانیاں ہوتی تھیں۔میں نے اپنی آنکھ سے جے پور کے پرانے محلات میں وہ مقام دیکھا ہے جس میں انسانی قربانی ہوتی تھی اور اب انگریزی امن کے باعث وہاں ہر روز ایک بکرے کی قربانی ہوتی ہے۔میں نے جب اس پیچ در پیچ مکان کو دیکھا تو مجھے انگریزی حکومت کی بعض برکتیں یاد آگئیں۔مہاراج کشمیر کی بیماری میں جس قدر قربانیاں چرند اور پرند کی ہمارے سامنے پنڈت لوگوں نے کرائی ہیں ان کی تعداد کو میں گن بھی نہیں سکتا اور مذہبی ناٹکوں میں ہم نے بچوں کی قربانی اور اس پر والدین کا منگل گانا ہماری آنکھ کے سامنے کا نظارہ ہے اور وہ ناٹک والے بھی پنڈت دیانند کے ملک کے ہی تھے۔
مسیحی دین میں مسیح نے قربانی کا بہت لحاظ رکھا ہے اور تمام انبیاء بنی اسرائیل قربانی کے موید رہے مگر مسیحی مذہب میں آپ کے ہم نام صاحب پال نے انکار کیا۔پھر بھی ابتدا میں مسیحی لوگ قربانیاں کرتے رہے اور برے کی اتباع اور نربلی میں خدا کی اقتداء ہوتی رہی۔اور سچ پوچھو تو عیسائیوں کی نجات ہی ایک انسانی قربانی یا خود کشی پر موقوف ہے۔جب دنیا طلبی غالب ہو گئی تو قربانیوں کا روپیہ قربانیوں کے قائم مقام ہو گیا اور اس بہار کے بدلہ اصل قربانی موقوف ہو گئی برائے نام یا حقیقت اب بھی مسیح کا لہو اور گوشت عشاء ربانی میں کھایا جاتا ہے۔پر جیسے آپ نے حق کا خون کرکے ہزاروں ہزار مسلمانوں کا دل دکھایا ہے کیا تمہارے دل اور نرم دل نے اسے جائز کر لیاہے دل سے پوچھو؟اگر ستیارتھ کے مصنف کو کوئی حقارت سے یاد کرے تو کس طرح آریہ سماج آگ ببولا ہوتی ہے مگر کیسی بے انصافی ہے کہ اللہ تعالیٰ کی ذات پاک اور قرآن اور بانی اسلام علیہ الصلوٰۃ والسلام کی تحقیر کرتے ہوئے آپ لوگ دل کی نرمی اور شیریں کلامی اختیار نہیں کر سکتے اور کروڑوں مسلمانوں کا اس سے زیادہ دل دکھاتے ہیں جتنا کہ مذبوح جانور اور اس کی ماں بہن کا دل دکھتا ہو کیا حیوانات کا دل دکھتا ہے۔برٹانیکا انسائیکلو پیڈیا کی جلد نمبر۱صفحہ نمبر۵۵میں لکھا ہے اسحاق کی قربانی کا باب اصلی نہیں اور نہ پرانا ہے اور سچ بھی ہے کیونکہ اسماعیل کے جیتے اس کی جوانی کے قریب زمانہ میں اسحاق کا ذبح کرنا کوئی عظیم الشان امر نہیں۔ایک تیرہ برس کا بچہ موجود ہے اس وقت ایک سالہ کا قربان کرنا ایسا خطرناک نہیں جیسے تیرہ سالہ اکلوتے کا قربان کرنا۔پھر اسی کے جلد نمبر۱صفحہ ۵۵میں لکھا ہے کہ کنعانیوں میں جو قدیم استثناء فلسطین کے تھے ان میں انسانی قربانی کا رواج تھا۔جناب ابراہیم علیہ السلام نے اپنی رؤیا کے مطابق جب بجائے لڑکے کے مینڈہا ذبح فرمایا تو اس طریق سے انسانی قربانی کا ازالہ فرما کر حیوانی قربانی اس کے قائم مقام کر دی۔ہا ں پال !یہ تو بتاؤکہ تمہارے یہاں اگنی کنڈ میں اگنی دیوتا کے لئے جو کچھ ڈالا جاتا ہے اور اسے تم لوگ ہب کہتے ہو اور ہب میں کیا ہوتا ہے دیکھو یجروید صفحہ ۴۶ تیسرا ادھیا منتر نمبر۱ کی تفسیر۔
خوشبودار کیسرکستوری وغیرہ۔میٹھا گوڑ۔شکر وغیرہ پشت گھی دودھ وغیرہ روگ ناشک گورچ وغیرہ چار قسم کا ساکل۔اس پر غور کرو۔جب گھر گھر تمام دنیا میں ہر روز کستوری جلائی گئی تو اس قیمتی چیز کے طمع پر کس قدر کستوری کے ہرن مارے جائیں گے اور شکاری ان کے تباہ کرنے میں کس قدر کوشش کریں گے شہد کے لئے کس قدر مکھیوں کی خانہ ویرانی کرنی پڑے گی۔اب ہم اسلامی قربانی اور اس کے مقابل آریہ ورتی قربانیوں کا بھی ذکر کرتے ہیں۔انبیاء علیھم الصلوٰۃ والسلام قوموں کے مصلح ہو کر آتے ہیں وہ کل رسومات سابقہ کا استیصال کرنا نہیں چاہتے بلکہ ان میں جو رسم محض غلط اور توہم پرمبنی ہو اس کو تو باطل کردیتے ہیں اور جس رسم کی اصل صحیح ہو مگر اس کے ساتھ کچھ غلطی مل گئی ہو اس میں صرف غلطی کی اصلاح فرما دیتے ہیں۔اس نکتہ کو یاد رکھ کہ مضمون آئندہ پر نظر کرو۔دوسرا مضمون قربانی پر اسلام نے بعض قربانیوں کو قطعاً حرام اورنیست ونابود کر دیا ہے۔اول وہ قربانیاں جن میں بت پرستی اور شرک ہو کیونکہ شرک میں مبتلا انسان بحیثیت مشرک ہونے کے حقیقی اسباب کو ترک کرکے اپنی دیوی دیوتا سے امیدوار کامیابی کا ہوتا ہے اس لئے حقیقی کامیابی سے محروم رہتا ہے اور دوسرے ان مشرکوں اورپجاریوں کو اپنی اپنی دکان گرم کرنے کے لئے صدہا جھوٹے قصے بنانے پڑتے ہیں اس لئے توحید کی حامی شریعت نے ایسی تمام قربانیوں کو باطل کر دیا اور محرمات میں اس کو رکھ دیا اور فرمایا : (المائدۃ :۴) حرام کیا گیا تم پر مردار اورخون اور سور کا گوشت اور وہ چیز یں جن پر اللہ کے سوا کانام پکارا جاوے۔
اور ہمارے صوفیاء کرام نے تو یہاں تک احتیاط اور تاکید کو اختیارفرمایا ہے کہ وہ کہتے ہیں مَا کا لفظ جو مَااُھِلَّ میں آیاہے وہ عام اور وسیع ہے۔پھر حضرت شیخ ابن عربی نے فتوحات مکیہ میں لکھا ہے دیکھو فتوحات مکیہ جلد نمبر۳ صفحہ نمبر ۶۲۱ باب۳۹۸ وَالشِّعْرُ فِیْ غَیْرِ اللّٰہِ مَا اُھِلَّ لِغَیْرِ اللّٰہِ بِہٖ فَاِنَّہُ لِلنِّیَّۃِ بِہٖ اَثَر فی الاَشْیَاء واللّٰہ یقول (البینۃ :۶) غیر اللہ کے لئے شعر کہنا مَااُھِلَّ لِغَیْرِ اللّٰہِ سے ہے کیونکہ نیت کا اثر چیزوں میں ہواکرتاہے اور اللہ تعالیٰ فرماتا ہے اور نہیں حکم کئے گئے وہ لوگ مگر اس بات کا کہ عبادت و پرستش کریں اللہ کی صرف اس لئے خالص کرنے والے ہوں اپنے آپ کو۔ہم نے اپنی کتاب میںایسے شعروں سے پرہیز کیا ہے جو کسی محبوب مجازی کے حق میں یا غیر اللہ کے لئے وہ شعر بولے گئے کیونکہ وہ مَااُھِلَّ لِغَیْرِ اللّٰہِ ہیں اور وہ حرام ہیں۔دوم ان تمام سوختنی قربانیوں سے روک دیا گیا ہے جو اشیاء آگ میں تباہ کی جاتی ہیں اور جن کا ذکر صدہا بلکہ ہزارہا بار یجر۔رگ۔سام ویدوں میں ہوا ہے تمہارے مشرک بھائیوں نے اس وقت بھی حضرت نبی کریم پر یہی اعتراض کیا جیسے ان کاقول خدا تعالیٰ نے نقل کیا ہے اور فرمایا ہے۔ (آل عمران:۱۸۲) اللہ نے سنی بات ان کی جنہوں نے کہا کہ اللہ محتاج ہے اور ہم دولت مند ہیں۔اور پھر یہ تمہارا اعتراض نقل کیا اور کہا ہے (آل عمران :۱۸۴) وہ جنہوں نے کہا کہ ہم رسول کی بات نہیں مانیں گے جب تک ہمارے پاس
ایسی قربانی نہ لائے جسے آگ کھاجاتی (سوختنی قربانی)تو کہہ مجھ سے پہلے رسول بینات لے کر اور تمہاری مانگی ہوئی چیز (سوختنی قربانی)کو بھی لے کر آئے پھر تم نے انھیں کیوں قتل کیا۔اگر تم صادق ہو۔تیسری وہ تمام قربانیاں موقوف کر دیں جن میں یہ خیال پیدا ہو سکے کہ وہ تراکیب ہمارے گناہوں۔بدکاریوں۔نافرمانیوں کا کفارہ ہوں گی ایسی ہی قربانیوں نے جو ایک برّے کی ہوئی یا نہ ہوئی تمام عیسائیوں کو دلیر وبے باک کر دیا ہے۔ایسی ہی قربانیاں بعض جگہ منوجی نے ویدوں سے بیان کی ہیں چونکہ منوجی ایسی معتبر کتاب ہے جس کے ذریعہ سے تمام ستیارتھ بھرا پڑا ہے۔ہمیں امید ہے کہ آریہ سماج اس کو تسلیم کرے گی والّا دکھائے گی کہ منو جی کے وہ اقوال کس ویدک منتر کے وردہ ہیں۔منوجی ادھیاتین شلوک نمبر ۶۸میں لکھتے ہیں۔گرستھ کے گھر میں چولہا۔سل بٹہ۔جھاڑو۔اوکھلی۔موسل۔پانی کاگھڑا ان سب سے کام لینے میں جئو مرتے ہیں۔شلوک نمبر ۶۹۔ان پانچوں کے پرائشپحت کے لئے پانچ مہان یگیہ کو گرستھ لوگ نتیہ ہی کریں۔شلوک نمبر۷۰۔پانچ مہایگہ یہ ہیں۔وید کا پڑھنا۔برہم یگیہ۔پترون کا ترپن۔پنر یگیہ۔ہون کرنا۔دیو یگیہ۔بل دینا۔اتتھ کا پوچن۔منشہ یگیہ۔شلوک نمبر ۷۱۔جو کوئی سامرتھ کے موافق ان مہا یگیہ کو کرتاہے وہ روزمرہ کی ہنسا(جان کشی) کے پاپ سے چھوٹا رہتا ہے۔قربانی کے مضمون کا آخری تیسر ابقیہ ہم نے اس مضمون کے پہلے حصہ میں بتایا ہے کہ قربانیاں کرنا انسانی فطرتوں کا مقتضی ہے اور اس کو واضح کر کے دکھایا ہے کہ قربانی کرنے میں شامیوں۔یافث اور عامیوں کی کوئی خصوصیت نہیں۔پھر دوسرے حصے میں یہ بھی بتایا ہے کہ اسلام نے قربانی میں کیا اصلاح فرمائی ہے اور کن
قربانیوں سے روکا ہے۔اب ہم تیسرے حصہ کو جو اس مضمون کے متعلق ہے بیان کرتے ہیں اور دکھاتے ہیں کہ اسلام نے کن قربانیوں کو جائز رکھا ہے ؟ سو اول انسانی قربانی کا ذکر کرتے ہیں مگر قبل اس کے کہ اس کا بیان کریں قربان کے لفظ کی جس سے قربانی کا لفظ نکلا ہے تشریح کرتے ہیں۔سنو !اس لفظ قربان کے لغت عرب میں کیا معنی ہیں۔قرب الشی قرباناً۔خوب ہی نزدیک ہوئی یہ چیز۔القربان بالضم ماقرب الی اللہ۔قربان پیش کے ساتھ جو اللہ کی طرف نزدیک کرے۔وما تقربت بہ۔اور قربان وہ ہے جس کے ذریعہ تو اللہ کے نزدیک ہو۔والقربان جلیس الملک وخاصۃ۔قربان بادشاہ کا مجلسی اور اس کا ممتاز۔ومنہ الصلوٰۃ قربان کل تقی۔اسی محاورہ پرہے کہ نماز ہر ایک متقی کے لئے قربان ہے۔اور حدیث میں آیا ہے۔ما یزال عبدی یتقرب الی بالنوافل حتی احببتہ۔فاذا احببتہ کنت سمعہ الذی یسمع بہ و بصرہ الذی یبصر بہ و یدہ الذی یبطش بھا و رجلہ التی یمشی بھا۔(بخاری) میرابندہ نفلوںکے ذریعہ میرے قریب ہوتا ہے یہاں تک کہ میں اس سے پیار کرتا ہوں اس کے کان بن جاتا ہوں جس سے وہ سنتا ہے اور آنکھ بن جاتا ہوں جس سے وہ دیکھتا ہے اور ہاتھ جس سے وہ پکڑتاہے اور پاؤں جس سے چلتاہے۔پس قربان کے معنی ہوئے اللہ تعالیٰ کی رضا مندیوں میں اپنے آپ کو محو کر دینا اور اس ذریعہ سے اپنے آپ کو اس کے نزدیک کرنا اور اس کے خاصوں میں ہوجانا۔جب کوئی انسان ایسا ہوتا ہے کہ نہ اس کو کسی کے ساتھ مخلوق میں ذاتی رنج وغضب ہوتا ہے اور نہ کسی کے ساتھ مخلوق میں سے ذاتی محبت اور تعلق ہوتا ہے اس کی محبت خلق سے ہوتی ہے مگر للہ وباللہ وفی اللہ ہوتی ہے اور اس کا بغض بھی ہوتا ہے مگر للّٰہ وباللہ وفی اللہ ہوتا ہے وہ فانی باللہ اور باقی باللہ ہو جاتا ہے۔
اس لئے ہوتا ہے کہ اس کو پینے میں الٰہی ارشادہے وَاشْرَبُوْا اور اس کا بی بی سے محبت وپیار اسی واسطے ہوتا ہے کہ(النساء :۲۰) کا حکم ہے۔پس شہوت و غضب۔طمع و جزع۔عجز و کسل۔بے استقلالی وغیرہ رذائل اس میں نہیں رہتے۔وہ انعامات کے وقت اگر شکر کرتا ہے تو ارشاد الٰہی سے اگر مصائب پر صبر کرتا ہے تو رضا الٰہی کے لئے۔وہ اپنے اور دوسرے کے معاصی پر اس لئے ناراض ہوتاہے کہ اس کا مولیٰ ان باتوں پر ناراض ہے۔وہ مشرکوں بے ایمانوں۔شریروں پرتلوار اٹھاتاہے مگر الٰہی ہتھیار بن کر۔یہی قربانی ہے جس کے بارے ارشاد ہے۔(المائدۃ :۲۸) جب ان دونوں نے قربانی دی آخر ایک کی قبول ہوئی اور دوسرے کی رد ہوئی۔اس نے کہا میں تجھے مارڈالوں گا۔اس نے کہا اللہ متقیوں کی قربانی قبول کیا کرتا ہے۔دوسری انسانی قربانی جس کو اسلام نے جائز رکھا ہے۔جوانان قوم اور مدبران ملک کی قربانی ہے مگر اس وقت کی بڑے بڑے سیاسی بلاد یورپ وامریکہ ہاں عام بلاد کا ذکر کیوں کریں خود انگلستان نے میری ذرہ سی شخصی زندگی میں جہاں انڈیا، کابل، پنجاب، دہلی کے غدر۔سوڈان۔خرطوم۔ٹرنسفال اور سمالی لینڈ وغیرہ جزائر میں صرف تجارت یا یوں کہو حکومت کے لئے لاکھوں نیئر اور ڈیر قربانی کئے ہیں تو وہاں ان تراشے گلوں نے اپنے ملک وقوم کو تو دنیا کے صراط پر سے کیا گزارا دنیاکی جنت میں پہنچا دیا ہے اور وید کی تعلیم نے تو ہزارہا منتروں میں اس نرمیدہ انسانی قربانی کی تاکید لکھی ہے میں کہاں تک گن کر دکھاؤں مشتے بطور نمونہ یادانہ از خروارے لکھتا ہوں۔اوّل دیکھو سوال نمبر ۴کو جہاں میں نے مفصل حوالے دئیے ہیں ستیارتھ صفحہ ۳۵۵رگوید بھاش
نمبر۶۶۱اور نمبر ۷۰۷ونمبر۶۱۶اور ا س کے علاوہ دیکھو یجروید ادہیائے نمبر۱ منتر ۵ حصول راج اور لکشمی کے لئے کیا شغل تجویز کیا ہے۔اور اسی ادھیاکے منتر نمبر ۶ومنتر۲۶میں جہاں دشمن کے باندھنے اور نہ چھوڑنے کا حکم ہے قابل غور ہے اور منتر ۲۸میں ہے بغیر لڑائی اور طاقت کے دشمن کبھی نہیں ڈرتے۔یجروید ادہیا پانچ منتر ۲۲میںہے جیسے میں ڈشٹ سبھاؤ شتروںکے شر کاٹتا ہوں توبھی کاٹ۔یجروید ادہیا نمبر ۶منتر۱ جیسے میں بداطوار وں کی گلوتراشی کرتا ہوں ویسی ہی آپ بھی کیجئے۔اسلام نے اس قربانی کو صرف دفاعی جنگوں میں منحصر اور محدود کر دیا ہے۔جب مخالف دشمن مسلمانوں کو قتل کریں اور اسلام کا استیصال کرنے لگیں تو اس وقت کے لئے فرمایا۔(الحج :۴۰)اجازت دی گئی ان لوگوں کو جن سے لڑائی کی گئی اس لئے کہ وہ مظلوم ہیں اور اللہ انہیں دشمن پر غالب کردینے پر قادر ہے۔اور فرمایا ہے۔(البقرۃ :۱۹۱) مقابلہ کرو اعلاء کلمۃ اللہ میں ان سے جو تم سے مقابلہ کرتے ہیں اور حد سے نہ بڑھنا۔اس کے معنی نبی کریم ﷺ اور آ پ کے جانشین نے یہ کئے ہیں کہ لڑکے ،عورتیں۔بڈھے۔فقیر اور تمام صلح جو نہ مارے جائیں۔اور فرمایا (البقرۃ:۱۹۴)مقابلہ کرو یہاں تک کہ فتنہ اور شرارت نہ رہے۔اسلام کا خدا تعالیٰ نے دونوں طرح کا غلبہ دکھانا چاہا ہے۔ایک وقت تھا جب دشمن نے اسلام کے استیصال کے لئے تلوار اٹھائی مسلمانوں کو قتل کرنا شروع کر دیا تو اسلام نے مسلمانوں کو
بغاوت سے روک دیا کہ غدر نہ کرنا۔اس ملک سے نکل جاؤجہاں تکلیف ہے اس لئے مکہ معظمہ کا ملک چھوڑ دیا گیا۔جب دشمن کو اس پر صبر نہ آیا اور اس نے تعاقب کیا تو آخر اسلام نے تلوار اٹھائی اور کامیاب ہوگیا۔پھر اس وقت چودہویں صدی میں صرف حجج کے اسلحہ سے اسلام سے جنگ شروع ہو گئی۔اسلام کے باعث کوئی قوم کسی مسلمان پر ہتھیاروں سے اب کام نہیں لیتی تو اسلام نے بھی براہین نیرّہ اور حجج ساطعہ اور دلائل واضحہ (ترک رشی)سے مقابلہ شروع کیا۔بت پرست قومیں اسلام کے مقابلہ سے ہار کر بت پرستی کے دعویٰ سے باز آرہی ہیں اور بالکل اس مسالہ میں صلح جو ہورہی ہیں کیونکہ انڈیا میں کچھ برہموں ہو گئے ہیں اور کچھ آریہ سماج۔ادھر یورپ وامریکہ میں یونی ٹیرین۔فری تھنکروں کا سمندر موج مار رہا ہے اور کیا خوب ہوا حضرت مسیح کی خدائی نیست ونابود ہورہی ہے۔(الحشر :۳) مخلوق اسلام کے مقدس مذہب میں آرہی ہے۔دھرم پال یا اور اس کے چند بھائی اس طرح اسلام سے نکل گئے جس طرح بال مکھن سے الگ ہوجاتا ہے توکہ مقدس مذہب اس وقت خس وخاشاک سے پاک ہو جاوے۔ہمارے مولوی علی العموم سمجھیں یا نہ سمجھیں اگر اس وقت وہ مہدی آنے والا ہوتا جس کو خونی جنگ کرنی ہے تو ایجاد اسلحہ اور اتحاد قومی وملکی اور عصبیت کا جلوہ مسلمانوں میں روز افزوں ہوتا نہ یورپ میں۔عصبیت کے سوائے جنگ کی وساطت سے دنیوی سلطنت کا ملنا خیالست ومحال ست و جنون۔میرے دیکھتے ایک طرف سلطنت اودہ۔دہلی۔زنجبار۔مراکش۔مسقط۔مصر اور دوسری طرف یارقند۔سمرقند۔خیوا۔بخارا۔سرویہ۔مانٹی نیگرو۔ہرز یگونیا وجزائر سائپرس۔کریٹ بلکہ اور حصص مملکت ترک بھی اور عرب کے حصہ ہائے کویت اور عدن ویمن بتدریج کچھ نکل گئے اور باقی نکل رہے ہیں اسی واسطے تو مہدی صادق علیہ السلام نے یہ نظم لکھی ہے۔
بسم اللہ الرحمن الرحیم دینی جہاد کی ممانعت کا فتویٰ مسیح موعود کی طرف سے اب چھوڑ دو جہاد کا اے دوستو خیال دیں کیلئے حرام ہے اب جنگ اور قتال اب آگیا مسیح جو دیں کا امام ہے دیں کی تمام جنگوں کا اب اختتام ہے اب آسماں سے نورِ خدا کا نزول ہے اب جنگ اور جہاد کا فتویٰ فضول ہے دشمن ہے وہ خدا کا جو کرتا ہے اب جہاد منکر نبی کا ہے جو یہ رکھتا ہے اعتقاد کیوں چھوڑتے ہو لوگو نبی کی حدیث کو جو چھوڑتا ہے چھوڑ دو تم اس خبیث کو کیوں بھولتے ہو تم یضع الحرب کی خبر کیا یہ نہیں بخاری میں دیکھو تو کھول کر فرما چکا ہے سید کونین مصطفٰے عیسیٰ مسیح جنگوں کا کردے گا التوا جب آئے گا تو صلح کو وہ ساتھ لائے گا جنگوں کے سِلسلہ کو وہ یکسر مٹائے گا پیویں گے ایک گھاٹ پہ شیر اور گوسپند کھیلیں گے بچے سانپوں سے بے خوف وبے گزند یعنی وہ وقت امن کا ہوگا نہ جنگ کا بُھولیں گے لوگ مشغلہ تیر و تفنگ کا یہ حکم سُن کے بھی جو لڑائی کو جائے گا وہ کافروں سے سخت ہزیمت اُٹھائے گا اِک معجزہ کے طور سے یہ پیشگوئی ہے کافی ہے سوچنے کو اگر اہل کوئی ہے القصہ یہ مسیح کے آنے کا ہے نشاں کردے گا ختم آکے وہ دیں کی لڑائیاں ظاہر ہیں خود نشاں کہ زماں وہ زماں نہیں اب قوم میں ہماری وہ تاب و تواں نہیں اب تم میں خود وہ قوت و طاقت نہیں رہی وہ سلطنت وہ رعب وہ شوکت نہیں رہی وہ نام وہ نمود وہ دولت نہیں رہی وہ عزمِ مقبلانہ وہ ہمت نہیں رہی وہ علم وہ صلاح وہ عفت نہیں رہی وہ نور اور وہ چاند سی طلعت نہیں رہی وہ ؔ درد وہ گداز وہ رقت نہیں رہی خلقِ خدا پہ شفقت و رحمت نہیں رہی