سُوْرَۃُ النَّمْلِ
تفسیر کبیر (جلد ۱۰), حصہ 14
لَاشَرِیْکَ لَکَ لَبَّیْکَ۔یعنی اے میرے خدامیں حاضر ہوں۔جس طرح کہ ابراہیمؑ نے کہا تھا کہ میں حاضر ہوں۔تیراکوئی شریک نہیں۔تیرے سواکوئی معبود نہیں۔میں تیری توحید کو پھیلانے کے لئے حاضر ہواہوں۔اب اس واقعہ پر غورکرو اور سوچو کہ کیا بائیبل میں بیا ن کیاہواواقعہ قرآن کریم کے بیان کردہ واقعہ سے کوئی بھی مناسبت رکھتاہے۔بائیبل کاحکم تو ایک وحشیانہ اور ظالمانہ حکم معلوم ہوتاہے جس میں کوئی حکمت نہیں تھی۔اسحاق ؑ کے گلے پر چھری پھیرنے سے دنیا کو کیافائدہ ہوسکتاتھا یا خود اسحاق ؑ کوکیافائد ہ ہوسکتاتھا۔مگراسمٰعیل کومکہ میں چھوڑنے سے اسمٰعیلؑ کوبھی فائدہ ہوااوردنیاکوبھی فائدہ ہوا۔اسمٰعیلؑ توحید سکھانے کاایک بہت بڑااستاد بن گیا اوردنیا اس کے ذریعہ خدائے واحد کی عبادت کرنے میں کامیاب ہوگئی۔مکہ کو دنیا کے نقشہ سے الگ کردو توساری دنیا میں توحید کا کوئی مرکز باقی نہیں رہتا۔اوراسمٰعیلؑ کی قربانی کوحذف کردو تو خدا تعالیٰ کے لئے زندگیاں وقف کرنے والا ولولہ پیداکرنے کی کوئی صورت دنیا میں باقی نہیں رہتی۔پس قرآن کریم ہرقسم کے گردوغبار کوجو مرورِ زمانہ کی وجہ سے بائیبل کے واقعات پر چھاگیا تھا صاف کرکے سچے اوردرست واقعات دنیا کے سامنے پیش کرتا ہے اوراس بات کا ثبوت پیش کرتاہے کہ وَ مَا مِنْ غَآىِٕبَةٍ فِي السَّمَآءِ وَ الْاَرْضِ اِلَّا فِيْ كِتٰبٍ مُّبِيْنٍیعنی آسمان اورزمین کی ہر مخفی سے مخفی بات خدا تعالیٰ کے علم میں محفوظ ہے۔پھرقرآن کریم صرف انہی حقائق پر روشنی نہیں ڈالتاجن میں مسلمانوں اوربنی اسرائیل کا باہم اختلاف ہے بلکہ و ہ یہود اور نصاریٰ کے آپس کے اختلافات کو مدنظر رکھتے ہوئے بھی دنیا کے سامنے صحیح حقیقت کو پوری طرح واضح کرتاہے۔مثلاً پیدائش مسیح ؑ کے متعلق ہی تمام یہود اس بات پر متفق ہیں کہ حضرت مسیح ؑ کی ولادت نعوذ باللہ ناجائز تھی۔چنانچہ ان میں سے بعض تویہ کہتے ہیں کہ حضرت مسیح ؑ یوسف نجار کے نطفہ سے بغیر شادی کے پیداہوئے (انسائیکلوپیڈیا برٹینیکا جلد ۵ص ۱۰۲ نیز دیکھو جیوش لائف آف کرائسٹ ص ۱۳)۔اوربعض کہتے ہیں کہ پنتھیرا نامی ایک روسی سپاہی تھاجس کے حضرت مریم ک ساتھ ناجائز تعلقات تھے اورانہی تعلقات کے نتیجہ میں حضرت مسیح ؑ کی ولادت ہوئی (جیوش انسائیکلوپیڈیا جلد ۷ ص ۱۷۰ کالم اول)۔اس کے مقابلہ میں انجیل یہ بیان کرتی ہے کہ ’’ یسوع مسیح کی پیدائش اس طرح ہوئی کہ جب اس کی ماں مریم کی منگنی یو سف کے ساتھ ہوگئی توان کے اکٹھے ہونے سے پہلے و ہ روح القدس کی قدرت سے حاملہ پائی گئی۔‘‘ (متی باب ۱آیت ۱۸) غرض یہود اورنصاریٰ میں ولادتِ مسیح کے مسئلہ پر ہی عظیم الشان اختلاف پایا جاتاہے۔یہودآپ کی ولادت
کو ناجائز قراردیتے ہیں اورعیسائی اس ولادت کوروح القدس کا کرشمہ قرار دیتے ہیں۔قرآن کریم یہود اور نصاریٰ کے اس باہمی نزاع کافیصلہ کرتے ہوئے نہایت واضح الفاظ میں اعلان فرماتا ہے کہ وَ الَّتِيْۤ اَحْصَنَتْ فَرْجَهَا فَنَفَخْنَا فِيْهَا مِنْ رُّوْحِنَا وَ جَعَلْنٰهَا وَ ابْنَهَاۤ اٰيَةً لِّلْعٰلَمِيْنَ( الانبیاء :۹۲) یعنی حضرت مریم نے اپنے تمام سوراخوں کو گناہ سے محفوظ رکھاتھا۔پس ان پر بدکاری کاالزام لگاناایک شرمناک افتراء ہے۔ان کوجوحمل ہواتھا وہ درحقیقت ایک پاک روح تھی جو ہم نے خود اس کے اندر نفخ کی تھی۔اسی طرح حضرت مسیح ؑ کے دعویٰ مسیحیت کو لو۔تویہودی تو سرے سے ہی آپ کی رسالت کے منکر ہیں۔اور عیسائی آپ کو خدا تعالیٰ کارسول تسلیم کرنے کی بجائے خدا تعالیٰ کابیٹاتصورکرتے ہیں۔اسلام ان دونوں نظریات کے خلاف ایک صحیح اور درست عقیدہ دنیاکے سامنے پیش کرتاہے اوربتاتاہے کہ یہود بھی غلطی پر ہیں جوحضرت مسیح ؑ کے کلّی طورپر منکرہیں۔اورعیسائی بھی غلطی پر ہیں جو ان کو خداتسلیم کرتے ہیں۔سچی بات صرف یہی ہے کہ حضرت مسیح ؑ بنی اسرائیل کی طرف صرف رسول بناکربھیجے گئے تھے (آل عمران آیت ۵۰)۔اسی طرح یہودی حضرت مسیح ؑ کے متعلق کہتے ہیں کہ وہ مصلوب ہوکر لعنتی بنے (استثناء باب ۲۳ آیت ۲۱)۔اور عیسائی یہ کہتے ہیں کہ وہ موت کے بعد گناہگاروں کاکفار ہ اداکرنے کے لئے صرف تین دن جہنم میں رہے اور پھر دوبارہ زند ہ ہوکر خدا تعالیٰ کے داہنے ہاتھ جابیٹھے(پطرس کے نام خط نمبر ۱ باب ۳ آیت ۱۸)۔لیکن قرآن کریم کہتاہے کہ یہ دونوں باتیں غلط ہیں۔حضرت مسیح ؑ صلیب پر فوت نہیں ہوئے بلکہ صلیب پر لٹکائے جانے کے بعد ان کے بے ہوش ہوجانے کی وجہ سے بعض لوگوں نے یہ خیال کرلیا کہ وہ صلیب پر فوت ہوگئے ہیں ورنہ وہ صلیب پر سے زند ہ اترآئے تھے(النساء: ۱۵۸)۔اورپھر صلیب سے نجا ت پانے کے بعد وہ آسمان پر نہیں اٹھائے گئے بلکہ اللہ تعالیٰ انہیں کشمیر میں لایا (المومنون: ۵۱)۔اورانہوں نے ایک لمبے عر صہ تک اشاعتِ دین کے فرائض سرانجام دیئے۔غرض قرآن کریم یہود اور نصاریٰ کے باہمی اختلافات کوبھی دور کرتاہے اور ان امورپر بھی روشنی ڈالتا ہے جو مسلمانوں اور بنی اسرائیل میں مابہ النزاع ہیں اوراس طرح بنی نوع انسان کے لئے ہدایت اوررحمت کاسامان مہیاکرتاہے۔پھر فرماتا ہے اِنَّ رَبَّكَ يَقْضِيْ بَيْنَهُمْ بِحُكْمِهٖ١ۚ وَ هُوَ الْعَزِيْزُ الْعَلِيْمُ۔اللہ تعالیٰ قرآن کریم کے ذریعہ سے صرف بنی اسرائیل کے باہمی اختلافات کو ہی دور نہیںکرے گا بلکہ وہ چونکہ غالب اور علم والا ہے۔اس لئے وہ ان کی مختلف قوموں اورفرقوں کے درمیان فیصلہ بھی کردے گا اورسچوں کو غالب او رجھوٹوں کو مغلوب کردے گا۔چنانچہ اس آیت
کے نزول کے بعد عیسائی ہرجگہ غالب آگئے اوریہودی جو حضرت عیسیٰ علیہ السلام کے منکر تھے ہرجگہ مغلوب ہوگئے مگرعیسائیت کاغلبہ چونکہ اسلام کے لئے ایک مستقل خطرہ کا باعث تھااورمسلمانوں پر اشاعت اسلام کی بڑی بھاری ذمہ داریاں عائد ہونے والی تھیں اس لئے عیسائیت کے غلبہ کی خبر دیتے ہی اللہ تعالیٰ نے مسلمانوں کو نصیحت فرمائی کہ فَتَوَكَّلْ عَلَى اللّٰهِ١ؕ اِنَّكَ عَلَى الْحَقِّ الْمُبِيْنِ۔تمہاراکام یہ ہے کہ تم اللہ پر توکل کرتے ہوئے۔اپنے دین کی اشاعت کرتے چلے جائو کیونکہ گوعیسائیت اوریہودیت کے باہمی نزاع میں عیسائیت حق پر ہے مگرحقِ مبین صرف اسلام کے پاس ہی ہے اس لئے تمہار اکام یہ ہے کہ تم اسلام کی اشاعت کے لئے ہرقسم کی تدابیر کام میں لائو اوراللہ تعالیٰ پر یقین رکھو۔کہ وہ تمہیں ضرور کامیاب کرے گا۔اوراسلام کاجھنڈادنیا کے تمام جھنڈو ں سے اونچا لہرائے گا۔مگر افسوس ہے کہ اس زمانہ میں مسلمانوں نے توکل کانہایت غلط مفہوم سمجھ لیا ہے۔وہ خیال کرتے ہیں کہ توکل کامفہوم یہ ہے کہ انسان کسی تدبیر سے کام نہ لے اوراپنے تمام کاموں کی سرانجام دہی خدا تعالیٰ پر چھوڑ دے۔لیکن تعجب ہے کہ وہ دین کے معاملہ میں تو توکل ظاہر کرتے ہیں۔لیکن دنیا کے معاملہ میں کبھی توکل نہیں کرتے۔کبھی کسی کاعزیز بیمار ہوجائے توتم یہ نہیں دیکھو گے کہ وہ خاموش ہوکرگھر میں بیٹھ رہے اورکہے کہ میں اللہ تعالیٰ پر توکل کرتاہوں وہ خود اسے اچھا کردے گا۔بلکہ وہ فوراً دوائی لینے کے لئے ہسپتال کی طرف دوڑے گا۔وہ کبھی نہیں کہے گاکہ بھلا ملیریامیراکیابگاڑ سکتاہے یاہیضہ مجھے کیا کرسکتاہے یاطاعون مجھے کیانقصان پہنچاسکتی ہے و ہ فوراً علاج کرے گا۔اورڈاکٹروں کی فیسوں پرروپیہ بھی خرچ کرے گا۔اوراس معاملہ میں توکل سے کام لینے کی بجائے تدبیر سے کام لے گا اسی طرح کبھی تم نہیں دیکھو گے کہ کوئی لڑکاسکول میں داخل ہوتونہ کتابیں خریدے نہ پڑھائی کرے اور یہی کہتارہے کہ اللہ مجھے پاس کردے گا۔میں اس پر سچے طور پر توکل کرتاہوں۔یاکسی کو اپنے لئے مکان کی ضرورت ہوتو نہ اینٹیں مہیاکرے۔نہ چونا خریدے۔نہ گارابنوائے نہ مزدور اورمستر ی بلوائے اورکہے کہ مجھے کیا ضرورت ہے کہ میں یہ تردّدکروں۔اللہ تعالیٰ خود مکان بنادے گا۔یامثلاً کھانے کی ضرورت ہوتو بیوی کھاناتیار نہ کرے اورشام کو جب خاوند گھر آئے اورپوچھے کہ کھاناتیار ہے تووہ کہے کہ مجھے کھانا تیار کرنے کی کیاضرورت ہے۔اللہ تعالیٰ کے ذمہ ہرجاندار کو روزی پہنچاناہے وہ خود ہمیں کھاناپہنچائے گا۔اب کیاتم سمجھتے ہوکہ خاوند اس کی بات سن کریہ کہے گاکہ میری بیوی نے بڑاتوکل کیا۔وہ یقیناًاس پر ناراضگی کااظہار کرے گا۔بلکہ ایک غیر تعلیم یافتہ گنوارتو کچھ تعجب نہیں کہ دوچار سونٹیاں بھی رسید کردے۔مگراس قسم کاتوکل لوگوں کودین کے معاملہ میں فوراً یادآجاتاہے۔ہم اپنی روٹی کے لئے توکل نہیں کرتے۔ہم اپنے مکان کے لئے توکل نہیں کرتے۔ہم اپنی ملازمت کے لئے توکل نہیں کرتے۔ہم اپنے دوسرے
کاموں کے لئے توکل نہیں کرتے بلکہ تمام و ہ تدابیر اختیار کرتے ہیں جو اللہ تعالیٰ نے اس عالم اسباب میں مقر رفرمائی ہیں۔باوجودا س کے کہ اللہ تعالیٰ فرماتا ہے کہ موت اورحیات میرے اختیار میں ہے۔ذلّت اور عزت میرے ہاتھ میں ہے۔رزق کی فراخی اور تنگی میرے ہاتھ میں ہے۔ہم موت سے بچنے کی بھی کوشش کرتے ہیں۔ہم حیات کے پیداکرنے کی بھی کوشش کرتے ہیں۔ہم ذلّت سے محفوظ رہنے کی بھی کوشش کرتے ہیں۔ہم عزت اور ترقی کے حصول کے لئے بھی کوشش کرتے ہیں۔ہم رز ق بڑھانے اور آمدنی کووسیع کرنے کی بھی کوشش کرتے ہیں۔گویاہم وہ ساری تدابیر اختیار کرتے ہیں جن تدابیر کااختیار کرنا دنیوی کاموں کی سرانجام دہی کے لئے ضروری ہے۔مگرجب دین کا سوال آجاتاہے ہم نہایت بے تکلفی سے کہہ دیتے ہیں اللہ تعالیٰ آپ کرے گا۔ہمیں اس میں فکر کرنے کی کیاضرورت ہے۔میں ایک دفعہ لاہورسے آرہاتھا۔یہ حضرت خلیفہ اول رضی اللہ عنہ کے زمانے کاواقعہ ہے۔جس کمرہ میں میں سوار ہوااسی کمرہ میںایک مشہور پیر صاحب بھی سوار ہوگئے۔انہیں مجھ سے کچھ کام تھا۔اوروہ مجھ سے ایک معاملہ میں مدد لیناچاہتے تھے۔دوران گفتگومیں انہوں نے مجھے ممنون کرنے کے لئے ایک رومال نکالا جس میں کچھ میوہ بندھاہواتھا۔اوررومال کھول کر میرے سامنے بچھادیا اورکہا کہ کھائیے۔وہ مجھ سے کسی احمدی کے پاس ایک معاملہ میں سفارش کراناچاہتے تھے۔مگراس سے پہلے وہ پیر صاحب یہ فتویٰ بھی شائع کرچکے تھے کہ احمدیوں سے ملنا جلنا اورگفتگوکرنا بالکل حرام ہے اوراگر کوئی ان سے ملے جلے یاگفتگوکرے یاان کے جلسہ میں شریک ہو تو اس کی بیوی پر طلاق واقع ہوجاتی ہے۔چنانچہ مجھے یاد ہے حضرت مسیح موعود علیہ الصلوٰ ۃ والسلام ایک دفعہ جب سیالکوٹ تشریف لے گئے اوروہاں ایک جلسہ ہواجس میں آپ نے تقریر فرمائی توراستہ میں بڑے بڑے مولوی ان پیر صاحب کے فتویٰ کے اشتہارات اٹھائے ہوئے لوگوں کوکہہ رہے تھے کہ جو مرزا صاحب کے لیکچر میں جائے گااس کی بیو ی کو طلاق ہوجائے گی۔جو احمدیوں سے ملے گا اس کی بیوی کوبھی طلاق ہوجائے گی۔اورجوان کے سلام کا جواب دے گا اس کی بیوی کو بھی طلاق ہوجائے گی مجھے یاد ہے جلسہ میں جب لوگ جاتے تو باہر بڑے بڑے مولوی کھڑے ہوکر لوگوں کوروکتے کہ اندرمت جانا۔ورنہ تمہارانکاح فسخ ہوجائے گا۔اس پر کئی جو ش میں آجاتے اور کہتے نکاح کاکیا ہے نکاح تو سواروپیہ دیکر پھر بھی پڑھا لیاجائے گا۔مرزا صاحب نے روز روز نہیں آنا۔اس لئے ان کا لیکچرضرور سنیں گے۔اوریہ کہہ کر وہ جلسہ میں شامل ہوجاتے۔توانہی پیرصاحب نے جن کایہ فتویٰ تھا کہ احمدیوں سے ملنے اور باتیں کرنے سے نکاح ٹو ٹ جاتاہے۔باوجود یہ معلوم ہونے کے کہ میں بانئے سلسلہ احمدیہ کالڑکا ہو ںرومال بچھا کر
میرے سامنے میوہ رکھ دیا اور کہا کھائیے۔مجھے اس فتویٰ کی وجہ سے یوں بھی انقباض تھا۔مگراللہ تعالیٰ نے اس کاسامان بھی پیدا کیاہواتھا۔اوروہ یہ کہ اس روز مجھے کھانسی اور نزلہ کی شکایت تھی۔میوہ میں کشمش بھی تھی جس کاکھانا نزلہ کی حالت میں نزلہ کو اورزیادہ بڑھادیتاہے۔اس لئے میں نے معذرت کی کہ آپ مجھے معاف رکھیں۔مجھے نزلہ کی شکایت ہے میں میوہ نہیں کھاسکتا۔پیرصاحب فرمانے لگے کہ نہیں کچھ نہیں ہوتا۔آپ کھائیں توسہی۔میں نے پھر انکار کیا کہ مجھے اس حالت میں ذراسی بدپرہیزی سے بھی بہت تکلیف ہوجاتی ہے۔اس پر وہ کہنے لگے۔یہ توباتیں ہی ہیں۔کرناتوسب اللہ نے ہوتاہے اور وہی ہوتاہے جو اللہ کرتاہے۔میں نے کہا۔پیرصاحب آپ نے یہ بات بہت بعد میں بتائی۔اگرآپ لاہو ر میں ہی بتادیتے توآپ اور میں ایک نقصان سے بچ جاتے۔کہنے لگے وہ کیا۔میں نے کہا غلطی یہ ہوئی کہ آپ نے بھی ریل کاٹکٹ لے لیا اور میں نے بھی (وہ امرتسر آرہے تھے اورمیں بٹالہ آرہاتھا) اگراس مسئلہ کاپہلے علم ہوتا تونہ ہم ٹانگے پر کرایہ خرچ کرتے نہ ریل کاٹکٹ مول لیتے۔جب اللہ تعالیٰ نے ہمیں پہنچاناہی تھا تووہ آپ کو امرتسر پہنچادیتا اورمجھے قادیان پہنچادیتا۔ہمیں ٹکٹ پر روپیہ خرچ کرنے کی کیاضرورت تھی۔وہ کہنے لگے تدبیر بھی توہوتی ہے۔میں نے کہا۔بس اسی اسباب کی رعایت کی وجہ سے مجھے بھی میوہ کھانے میں عذر تھا۔توجب انسان کا ذاتی سوال ہوتو اس وقت اسےہزاروں تدبیریں یاد آجاتی ہیں مگرجب خدا تعالیٰ کے دین کامعاملہ ہو تو انسان نہایت بے تکلفی سے کہہ دیتاہے کہ مجھے تدبیر سے کام لینے کی کیاضرورت ہے اللہ خود کرے گا۔اس میں کوئی شبہ نہیں کہ دین کا کام اللہ تعالیٰ نے ہی کرناہے اورہمارے کام بھی دراصل وہی کرتاہے۔ہم ہزاروں کام جوکرتے اور کامیاب ہوجاتے ہیں یہ اللہ تعالیٰ کے فضل کاہی نتیجہ ہے۔ہماری کسی کوشش کاخالصۃً اس میں دخل نہیں ورنہ ہمیں ہرکام میں کامیابی ہو۔لیکن کامیابی ہربات میں نہیںہوتی کسی بات میں ہوجاتی ہے او ر کسی میں نہیںہوتی۔ہزاروں لڑکے محنت کرکے پاس ہوجاتے ہیں اور ہزاروں لڑکے محنت کرنے کے باوجود فیل ہوجاتے ہیں۔ہزاروں کوشش کرتے ہیں اورانہیں عزت مل جاتی ہے او رہزاروں عزت حاصل کرنے کی کوشش کرتے ہیں مگر وہ پہلے سے بھی زیادہ ذلیل ہوجاتے ہیں۔توتمام کام اللہ تعالیٰ ہی کرتاہے۔مگرا س میں بھی کوئی شبہ نہیں کہ جہاں تدبیر کا تعلق ہو وہاں اگر مومن تدبیر نہیں کرتا تو خدا تعالیٰ کی طرف سے سزانازل ہوتی ہےاوروہ اس کی گرفت اور عذاب میں مبتلا ہو جاتا ہے۔دیکھو قرآن کریم میں اللہ تعالیٰ نے اس کی ایک نہایت واضح مثال حضرت موسیٰ علیہ السلام کی قوم کی پیش کی ہے اللہ تعالیٰ نے اس قوم سے یہ وعدہ کیاتھا کہ کنعان کی سرزمین کاانہیں وارث بنادیاجائے گا۔جیسے ہمارے ساتھ اللہ تعالیٰ کاوعدہ ہے کہ وہ ہمیں دنیا کا حکمران اور بادشاہ بنائے گا۔مگرا س کاعلاج اللہ تعالیٰ نے یہ بتایاکہ جائواور جنگ
کرو۔اس جنگ کے نتیجہ میں اللہ تعالیٰ تمہیں فتح دے دے گا۔حضرت موسیٰ علیہ السلام نے جب اپنی قوم کوخدا تعالیٰ کا یہ حکم سنایاتوانہوں نے کہا اللہ تعالیٰ کاہم سے یہ وعدہ ہے کہ وہ ہمیں کنعان کی سرزمین دے گا وہ اپنے وعدہ کو آپ پوراکرے۔ہم اپنی جانوں کو کیوں ہلاکت میں ڈالیں۔موسیٰ ؑ اور اس کا خدادونوں جاکر دشمنوں سے لڑیں (المائدۃ: ۲۲ تا ۲۷) اورجب فتح ہوجائے تو ہمیںآکر بتادیاجائے ہم کنعان کی سرزمین میں داخل ہوجائیںگے۔پھر جانتے ہو اس کانتیجہ کیا ہوا۔باوجود وعدہ کے اللہ تعالیٰ فرماتا ہے کہ ہم نے وہ زمین ان پر چالیس سال تک حرام کردی اوران پر ایسی ذلّت نازل کی کہ وہ تمام لوگ جنہوں نے یہ اعتراض کیا تھا ایک ایک کرکے جنگلوں میں بھٹک کرمر گئے۔اورپھر ان کی نسلوں کے ذریعہ یہ الٰہی وعدہ پوراہوا۔توجہاں تدبیر کاتعلق ہووہاں باوجود وعدہ کے۔باوجود الٰہی فیصلہ کے۔باوجودالٰہی مشیت اور ارادہ کے اس وقت تک خدا تعالیٰ کی نصرت نازل نہیں ہوتی۔جب تک تمام کی تمام قوم قربانی کرنےکے لئے تیار نہیں ہوجاتی۔اور اگر کوئی قوم قربانی کے لئے تیار نہ ہو توجھوٹاتوکل اسے کامیاب نہیں کرسکتا۔حدیثوں میں آتاہے۔ایک دفعہ رسول کریم صلی اللہ علیہ وسلم سے ایک شخص نے سوال کیا کہ یارسول اللہ!کیا میں پہلے اپنے اونٹ کاگھٹنا باندھوں اور پھر توکل کروں یااسے آزاد رہنے دوں اورتوکل کروں۔آپ نے فرمایا اِعْقِلْھَا وَتَوَکَّلْ (ترمذی جلد ۲ابواب صفۃ القیامۃ)۔پہلے اونٹ کا گھٹنا باندھو اور پھر توکل کرو۔یعنی پہلے عمل کرو اور پھر خدا تعالیٰ پر نتیجہ چھوڑو۔یہی وجہ ہے کہ صحابہ کرام رضی اللہ تعالیٰ عنہم رات دن کام میں مشغول رہتے تھے۔خود رسول کریم صلی اللہ علیہ وآلہٖ وسلم اس قدر عبادت کرتے تھے کہ کھڑے کھڑ ے آپ کے پائو ںمتورم ہوجاتے۔ایک دفعہ حضرت عائشہ رضی اللہ عنہا نے کہا۔یارسول اللہ آپ اتنی عبادت کیوں کرتے ہیں۔کیا اللہ تعالیٰ نے آپ کے اگلے پچھلے سب گناہ معاف نہیں کردیئے۔آپؐ نے فرمایا۔کیا میں اللہ تعالیٰ کاشکر گذار بند ہ نہ بنوں (مشکوٰۃ کتاب الصلوٰۃ باب التحریض علی قیام اللیل)۔اگر توکل کے یہ معنے ہوتے کہ انسان ہاتھ پر ہاتھ رکھ کر بیٹھ جائے توسب سے زیادہ اس پر رسول اللہ صلی اللہ علیہ وآلہٖ وسلم کا عمل ہوناچاہیے تھا کیونکہ آپؐ سب سے بڑھ کر متوکل تھے۔مگرآپ سب سے زیادہ مشغول رہتے تھے۔پھر ان معنوں میں سب سے زیادہ توکل تو جنت میں ہو سکتا ہے۔مگرقرآن کریم سے معلوم ہوتاہے کہ وہاں بھی مشغولیت ہو گی جیسے فرمایا فِیْ شُغُلٍ فٰکِھُوْنَ (سورئہ یٰسٓ آیت ۵۶)۔اگرتوکل کا یہی مفہوم ہوتا توجب وہاں ہرچیز خدا تعالیٰ کی طرف سے ملنی ہے تومومنوںکوتوجنت میں ہاتھ پر ہاتھ رکھ کر بیٹھ جاناچاہیے تھا مگروہاں کے لئے بھی شغل کونکرہ کے طور پر استعمال کرکے بتایاکہ وہاں بڑاعظیم الشان کام
کرناہوگا۔فرق صرف یہ ہے کہ وہاں انسان کام سے تنگ نہیں آجائے گا اورتھکے گانہیں بلکہ خوشی محسوس کرے گا اورکام کرنے کے باوجود اس کے اندر بشاشت قائم رہے گی۔غرض آج کل لوگوں نے توکل کانہایت غلط مفہوم سمجھ رکھا ہے۔جوکام ان کی اپنی مرضی کے مطابق ہوتاہے اسے تووہ کرلیتے ہیں۔ا ورجوکام نہیں کرناچاہتے اس کے متعلق کہہ دیتے ہیں کہ ہم توکل سے کام لے رہے ہیں۔اگرتوکل کے یہ معنے ہوتے کہ عمل ترک کردیاجائے۔توپھر نماز اور روزہ اور حج اور زکوٰۃ وغیرہ کی کوئی ضرورت نہیں تھی۔صرف زبان سے ایمان کااظہار کرناہی انسان کو نجات دے دیتا۔پس توکل کاصحیح مفہوم یہ ہے کہ انسان اللہ تعالیٰ کے پیداکردہ سامانوں سے پوری طر ح کام لے اور پھر اللہ تعالیٰ کے حضور جھک جائے او راس سے کہے کہ اے خدا! جوسامان میرے اختیار میں تھے و ہ تو میں نے سب استعمال کرلئے ہیں اب کوئی کمی رہ گئی ہے توتُوخو د اپنے فضل سے اسے پورافرما اورمیری کوتاہیوں کو نظر انداز کرتے ہوئے اس کام کے نیک نتائج پیدافرما۔جب وہ ایسا کرے گاتب اسے اللہ تعالیٰ کی نصرت حاصل ہوگی اوروہ اپنے ہر کام میں کامیابی حاصل کرے گا۔لیکن جو شخص کام نہیں کرتا اور پھر اپنے آپ کو متوکل کہتاہے وہ توکل کے ساتھ تمسخر کرتااور اللہ تعالیٰ کی ناراضگی کامورد بنتاہے۔اِنَّكَ لَا تُسْمِعُ الْمَوْتٰى وَ لَا تُسْمِعُ الصُّمَّ الدُّعَآءَ اِذَا تُو (ہرگز) مُردوں کونہیں سنا سکتا۔اور نہ بہروں کو ہی (اپنی )آواز سناسکتاہے۔خصوصاًجبکہ وہ پیٹھ پھیر کرچلے وَلَّوْا مُدْبِرِيْنَ۰۰۸۱وَ مَاۤ اَنْتَ بِهٰدِي الْعُمْيِ عَنْ ضَلٰلَتِهِمْ١ؕ جاتے ہیں۔اورتُو اندھوں کو بھی ان کی گمراہی سے بچا کر ہدایت نہیں دے سکتا۔تُوتوصرف انہی کوسناتاہے اِنْ تُسْمِعُ اِلَّا مَنْ يُّؤْمِنُ بِاٰيٰتِنَا فَهُمْ مُّسْلِمُوْنَ۰۰۸۲ جوہماری آیتوں پر ایمان لاتے ہیں۔اوروہ (عملاًبھی)فرمانبردار ہوتے ہیں۔تفسیر۔چونکہ اوپر یہ کہاگیاتھا کہ اِنَّكَ عَلَى الْحَقِّ الْمُبِيْنِ تُوایک واضح اور روشن سچائی پر قائم ہے اس
لئے اب اللہ تعالیٰ یہ بتاتاہے کہ واضح سے واضح سچائی کاانکار کرنےوالے بھی دنیا میں پائے جاتے ہیں۔اس لئے محض کسی ہدایت کاکامل ہونااس بات کی دلیل نہیں ہوتاکہ اسے سب لوگ مان لیں گے۔چنانچہ فرماتا ہے اِنَّکَ لَا تُسْمِعُ الْمَوْتٰی جو مُردہ دل لوگ ہوں اوراللہ تعالیٰ کی خشیت اوراس کی محبت کے جذبات سے بالکل عاری ہوں تم ان کو خدا تعالیٰ کی باتیں نہیں منواسکتےوَ لَا تُسْمِعُ الصُّمَّ الدُّعَآءَ اِذَا وَلَّوْا مُدْبِرِيْنَ اورنہ تم بہروں کواپنی آواز سناسکتے ہو۔بالخصوص ایسی حالت میں جبکہ وہ پیٹھ پھیر کرچلے جائیں یعنی آواز تو وہ پہلے ہی نہیں سن سکتے۔پیٹھ پھیر کر چلے جانے کی وجہ سے وہ دوسروں کے اشارے دیکھنے سے بھی محروم ہوجاتے ہیں اور ان کی ہدایت کاکوئی ذریعہ باقی نہیں رہتا۔اسی طرح جو اندھا ہو اور بینا کے پیچھے چلنے کے لئے تیار نہ ہو اس کو بھی اس کی گمراہی سے کوئی نہیں بچا سکتا صرف اسی کو سچائی سنائی اور سمجھا ئی جا سکتی ہے جو ا للہ تعالیٰ کے نشانات پر ایمان رکھتے ہوں اور ایسے ہی لوگ آخر میں مسلمان ہوتے ہیں۔وَ اِذَا وَقَعَ الْقَوْلُ عَلَيْهِمْ اَخْرَجْنَا لَهُمْ دَآبَّةً مِّنَ اورجب ان کی تباہی کی پیشگوئی پور ی ہوجائے گی۔توہم ان کے لئے زمین سے ایک کیڑانکالیں گے جو ان الْاَرْضِ تُكَلِّمُهُمْ١ۙ اَنَّ النَّاسَ كَانُوْا بِاٰيٰتِنَا لَا يُوْقِنُوْنَؒ۰۰۸۳ کو کاٹے گا اس وجہ سے کہ لوگ ہمارے نشانات پر یقین نہیں رکھتے تھے۔حلّ لُغَات۔تُکَلِّمُھُمْ۔تُکَلِّمُھُمْ کَلَّمَ سے مضارع واحد مؤنث غائب کا صیغہ ہے اور کَلَّمَہٗ کے معنے ہیں حَدَّثَہٗ۔بات کی۔وَجَرَّحَہٗ اس کو زخمی کیا۔(اقرب) پس تُکَلِّمُھُمْ کے معنے ہوں گے ان کو زخمی کرے گا۔تفسیر۔اس میں بتایا کہ جب ان روحانی مردوں اور بہروں اور اندھوں کے خلاف خدا تعالیٰ کا فتویٰ جاری ہوجائے گا اور آسمان سے ان کی سزا کا فیصلہ نافذ ہو جائے گا۔تو اللہ تعالیٰ زمین میںسے ایک کیڑا نکالے گا۔جو ان کو کاٹے گا۔اور یہ عذاب ان پر اس لئے آئے گا کہ وہ لوگ ہمارے نشانات کی سچائی پر یقین نہیں رکھتے تھے۔اس آیت میں دَآبَّۃُ الْاَرْضَ کے خروج کی جو پیشگوئی کی گئی ہے اس کے متعلق رسول کریم صلی اللہ علیہ وسلم نے احادیث میں وضاحتًا فرمایا ہے کہ اس کا خروج آخری زمانہ میں ہوگا جو مسیح اور مہدی کا زمانہ ہے (تفسیر ابن کثیر برحاشیہ فتح البیان جلد ۷صفحہ ۲۳۱)۔اور پھر رسول کریم صلی اللہ علیہ وسلم نے یہ بھی فرمایا کہ جب آنے والے مسیح کی
مخالفت بڑھ جائے گی تو فیُرْسِلُ اللّٰہُ عَلَیْھِمُ النَّغَفَ فِی رِقَابِھِمْ (مسلم کتاب الفتن باب ذکر الدجال وصفتہٗ)۔اللہ تعالیٰ مخالفین کی گردنوں میںایک پھوڑا پیدا کرے گا جس سے ان کی ہلاکت واقعہ ہوگی۔ان دونوں حدیثوں کو ملا کر دیکھا جائے توا ن سے صاف طور پر یہ نتیجہ نکلتا ہے کہ دابۃ الارض جس کے خروج کی خبر دی گئی ہے وہ درحقیقت طاعون کا ہی مرض ہے جو حضرت بانی سلسلہ کے زمانہ میں پھیلا اور جس سے لاکھوں لوگ لقمئہ اجل بن گئے۔چونکہ یہ مرض ایک کیڑے سے پیدا ہوتا ہے جو زمین سے انسا ن کے جسم میں داخل ہوتا ہے اور اس کے ساتھ ہی گردن یا بُنِ ران میں ایک خطرناک قسم کا پھوڑا بھی نکلتا ہے جو مہلک ہوتا ہے اس لئے رسول کریم صلی اللہ علیہ وسلم نے اسے دابۃ الارض بھی قراردیا۔اور نغف کی بیماری بھی اس کا نا م رکھا۔اور چونکہ رسول کریم صلی اللہ علیہ وسلم نے دابۃ الارض کا خروج آخری زمانہ کی علامات میں سے قراردیا ہے اس لئے لازماًوَاِذَا وَقَعَ الْقَوْلُ عَلَیْھِمْ سے وہی لوگ مراد ہیں جو مسیح موعود کی تکذیب کرنے والے ہوںگے۔اور جو اپنی روحانی نابینائی کی وجہ سے نہ آسمانی نشانات کو دیکھیں گے۔نہ روحانی شنوائی کے فقدان کی وجہ سے خدا تعالیٰ کے کلام کو سنیں گے۔اور نہ روحانی حیات سے کلیۃً محروم ہونے کی وجہ سے نیکی کاکو ئی فعل ان سے سرزد ہو گا۔ایسے لوگ اپنی بداعمالیوں کی وجہ سے خدا تعالیٰ کی گرفت میں آجائیں گے۔اور ایک زمینی کیڑا ان کی ہلاکت کے لئے ان پر مسلط کیا جائے گا۔چونکہ وہ بھی ایک رنگ میں زمینی کیڑے بن چکے ہوںگے۔اس لئے خدا تعالیٰ بھی ان کی سزا کے لئے ایک زمینی کیڑا ہی ان پر مسلط کرےگا اور انہیں آیاتِ الہٰیہ پر ایمان نہ لانے کی سزا دے گا۔غرض یہ ایک بڑی بھاری پیشگوئی ہے جو بانی سلسلہ احمدیہؐ کے زمانہ میں پوری ہوئی۔اور جس کی طرف خود بانی سلسلہ احمدؐیہ پیشگوئیاں بھی بڑی وضاحت سے اشارہ کررہی تھیں چنانچہ جب رسول کریم صلی اللہ علیہ وسلم کی پیشگوئی کے مطابق رمضان کی تیرہ تاریخ کو چاند گرہن اور اٹھائیس تاریخ کو سورج گرہن ہوا تو اس وقت حضرت مسیح موعود علیہ الصلوٰۃوالسلام کو بتایاگیا کہ اگر لوگوں نے ا س نشان سے فائدہ نہ اٹھایا اورتجھے قبول نہ کیا توان پرایک شدید عذاب نازل ہوگا۔چنانچہ اس بار ہ میں آپ نے اپنی کتاب ’’نور الحق ‘‘ میں پیشگوئی کرتے ہوئے فرمایا:۔’’وَحَاصِلُ الْکَلَامِ اَنَّ الْخَسُوْف وَالْکَسُوْفَ اٰیَتَانِ مُخَوِّفَتَانِ وَاِذَااجْتَمعَافَھُوَ تَھْدِیْدٌ شَدِیْدٌ مِنَ الرَّحْمٰنِ۔وَاِشَارَۃٌ اِلیٰ اَنَّ الْعَذَابَ قَدْتَقَرَّرَ وَاُکِّدَ مِنَ اللّٰہِ لِاَھْلِ الْعُدْوَانِ۔‘‘ (نورالحق روحانی خزائن جلد ۸ حصہ دوم ص۲۳۲) یعنی کسوف و خسوف خدا تعالیٰ کی طر ف سے دوڈرانے والے نشان ہیں۔اورجب یہ اس طرح جمع ہوجائیں
جس طرح اب جمع ہوئے ہیں تو خدا تعالیٰ کی طرف سے ایک تنبیہ ہوتی ہے اوراس بات کی طرف اشار ہ ہوتاہے کہ ان لو گوں کے لئے جو سرکشی سے باز نہ آئیں عذاب مقرر ہوچکا ہے۔اس کے بعد اللہ تعالیٰ نے اس پیشگوئی کو پوراکرنے کے لئے آپ کے دل میں تحریک کی کہ آپ ایک عام وباء کے لئے دعاکریں چنانچہ آپ اپنے ایک عربی قصیدہ میں جو ۱۸۹۴ء میں شائع ہوافرماتے ہیں ؎ فَلَمَّا طَغَی الْفِسْقُ الْمُبِیْدُ بِسَیْلِہٖ تَمَنَّیْتُ لَوْ کَانَ الْوَبَآئُ الْمُتَبِّرٗ فَاِنَّ ھَلَاکَ النَّاسِ عِنْدَ اُوْلِی النُّھٰی اَحَبُّ وَ اَوْلیٰ مِنْ ضَلَالٍ یُّخَسِّرٗ یعنی جب ہلاک کردینے والا فسق ایک طوفان کی طرح بڑھ گیاتو میں نے خدا سے چاہا کہ کاش ایک وباء پڑے جولوگوں کو ہلاک کردے۔کیونکہ عقلمندوں کے نزدیک لوگوں کامرجانا اس سے زیادہ پسندیدہ اورعمدہ سمجھاجاتاہے کہ وہ تباہ کردینے والی گمراہی میں مبتلاہوجائیں۔اس کے بعد ۱۸۹۷ء میں آپ نے اپنی کتا ب ’’سراج منیر‘‘ میں لکھا کہ ’’ اس عاجز کوالہام ہواہے یَامَسِیْحَ الْخَلْقِ عَدْوَانَا یعنی اے خلقت کے لئے مسیح!ہماری متعدی بیماریوں کے لئے توجہ کر۔‘‘ پھر فرماتے ہیں:۔’’ دیکھو یہ کس زمانے کی خبریں ہیں اورنہ معلوم کس وقت پور ی ہوں گی۔ایک وہ وقت ہے جو دعاسے مرتے ہیں اوردوسراوہ وقت آتاہے کہ دعاسے زندہ ہوں گے۔‘‘ (سراج منیرروحانی خزائن جلد ۱۲ صفحہ ۷۰،۷۱) جس وقت یہ آخر ی پیشگوئی شائع ہوئی اس وقت طاعون صرف بمبئی میں پڑی تھی اورایک سال رہ کر ہٹ گئی تھی۔اورلو گ خوش تھے کہ ڈاکٹروں نے اس کے پھیلنے کو روک دیا۔مگرخداتعالی کی خبریں اس کے خلاف تھیں چنانچہ جب لو گ اس مرض کے حملہ کو ایک عارضی حملہ خیال کررہے تھے اورپنجاب میں صرف ایک دوگائوں میں ہی یہ مرض نہایت قلیل طور پر پائی جاتی تھی باقی سب علاقہ محفوظ تھا او ربمبئی کی طاعون بھی بظاہر دبی ہوئی معلوم ہوتی تھی اس وقت آپ نے ایک اور اعلان کیااوراس میں بتایا کہ :
’’ایک ضروری امر ہے جس کے لکھنے پر میرے جوشِ ہمدر دی نے مجھے آمادہ کیاہے۔اورمیں خوب جانتاہو ں کہ جو لوگ روحانیت سے بے بہرہ ہیں اس کوہنسی اور ٹھٹھے سے دیکھیں گے مگر میرافرض ہے کہ میں اس کو نوع انسان کی ہمدردی کے لئے ظاہر کروں۔اور وہ یہ ہے کہ آج جو ۶؍فروری ۱۸۹۸ ء روز یک شنبہ ہے میں نے خواب میں دیکھا کہ خدا تعالیٰ کے ملائک پنجاب کے مختلف مقامات میں سیاہ رنگ کے پودے لگارہے ہیں۔اوروہ درخت نہایت بدشکل اور سیاہ رنگ اورخوفناک اورچھوٹے قد کے ہیں۔میں نے بعض لگانے والوں سے پوچھا کہ یہ کیسے درخت ہیں تو انہوں نے جواب دیاکہ یہ طاعون کے درخت ہیں جو عنقریب ملک میں پھیلنے والی ہے۔میرے پر یہ امر مشتبہ رہاکہ اس نے یہ کہا کہ آئندہ جاڑے میں یہ مرض پھیلے گا یایہ کہ اس کے بعدکے جاڑے میں پھیلے گا۔لیکن نہایت خوفناک نمونہ تھا جومیں نے دیکھا۔اورمجھے اس سے پہلے طاعون کے بارہ میں الہام بھی ہوااوروہ یہ ہے۔اِنَّ اللّٰهَ لَا يُغَيِّرُ مَا بِقَوْمٍ حَتّٰى يُغَيِّرُوْا مَا بِاَنْفُسِهِمْ۔اِنَّہٗ اٰوَی الْقَرْیَۃَ۔یعنی جب تک دلوں کی وبائے معصیت دور نہ ہوگی تب تک ظاہری وباء بھی دور نہیں ہوگی۔‘‘ (ایام الصلح روحانی خزائن جلد ۱۴ صفحہ ۳۶۰،۳۶۱) اس اشتہار کے آخر میں آپ نے اپنے چند فارسی اشعار بھی لکھے جویہ ہیں کہ ؎ گرآں چیزے کہ مے بینم عزیزاں نیز دیدندے ز دنیا توبہ کردندے بچشمِ زار وخوں بارے خورِ تاباں سیہ گشت است از بدکاری مردم زمیں طاعوں ہمے آرد پئے تخویف وانذارے بہ تشویش ِ قیامت ماند ایں تشویش گربینی علاجے نیست بہرِ دفع آں جز حسن کردارے من از ہمدردی ات گفتم توخود ہم فکر کن بارے خرد از بہرایں روز است اے داناو ہوشیارے (ایام الصلح روحانی خزائن جلد ۱۴ صفحہ ۳۶۳) یعنی اگروہ چیز جسے میں دیکھ رہاہوں اَور دوست بھی دیکھتے تو وہ دنیا سے روروکرتوبہ کرتے۔لوگوں کی
بدکاریوں کی وجہ سے چمکتاہواسورج بھی سیاہ ہوگیاہے۔اورزمین بھی ڈرانے اور دھمکانے کی خاطر طاعون پیداکررہی ہے۔اگر تم غور سے دیکھو تو یہ مصیبت قیامت کی مصیبت کی طرح ہے اور اس کودورکرنے کاعلاج سوائے نیک اعمال کے اَور کچھ نہیں۔میں نے صرف ہمدردی کی وجہ سے یہ بات کہی ہے۔اب اے دانا اور سمجھدار انسان توآپ بھی غور کرلے۔کیونکہ عقل اسی دن کے لئے ہواکرتی ہے۔ان پیشگوئیوں سے ظاہر ہے کہ آپ نے ۱۸۹۴ ء سے پہلے ایک خطر ناک عذاب اور پھر کھلے لفظوں میں وباء کی پیشگوئی کی۔اورپھر جبکہ ہندوستان میں ابھی طاعون نمودار ہی ہوئی تھی کہ آپ نے خصوصیت کے ساتھ پنجاب کی تباہی کی خبر دی اورآنے والی طاعون کو قیامت کا نمونہ قرار دیا۔اورفرمایاکہ یہ طاعون اس وقت تک نہیں جائے گی جب تک کہ لوگ دلوں کی اصلاح نہیں کریں گے۔اس کے بعد جوکچھ ہواالفاظ اسے ادانہیں کرسکتے۔طاعون کی ابتداء گو بمبئی سے ہوئی تھی اورقیا س چاہتاتھا کہ وہیں اس کادور ہ سخت ہوتا۔وہ تو پیچھے رہ گئی اورپنجاب میں طاعون نے اپنا ڈیرہ لگالیا۔اوراس سختی سے اس نے حملہ کیا کہ بعض دفعہ ایک ایک ہفتہ میں تیس تیس ہزار آدمیوں کی موت ہوئی۔اورایک ایک سال میں کئی کئی لاکھ آدمی مرگئے۔سینکڑوں ڈاکٹر مقررکئے گئے اور بیسیوں قسم کے علاج نکالے گئے مگرکچھ فائدہ نہ ہوا۔ہرسال طاعون مزید شدت او ر سختی کے ساتھ حملہ آورہوئی اورگورنمنٹ منہ دیکھتی کی دیکھتی رہ گئی اوربہت سے لوگوں کے دلوں نے محسوس کیا کہ یہ عذاب حضر ت مسیح موعود علیہ الصلوٰۃ والسلام کے انکار کی وجہ سے آیا ہے۔چنانچہ ہزاروں نہیں لاکھوں آدمیوں نے ا س قہری نشان کو دیکھ کر صداقت کو قبول کرلیا۔اوراللہ تعالیٰ کے مامور پرایمان لائے۔اوراس وقت تک طاعون کے زور میں کمی نہ ہوئی جب تک اللہ تعالیٰ نے اپنے مامور کو یہ نہ بتایاکہ ’’ طاعون توگئی مگر بخار رہ گیا ‘‘ )حاشیہ’’ تذکر ہ ‘‘ ایڈیشن دوم ص ۵۱۲تاریخ الہام ۲۸ ؍ اپریل ۱۹۰۴ء) اس کے بعد سے طاعون کازو رٹوٹنا شروع ہوگیا اور و ہ برابر کم ہوتی چلی گئی۔یہ پیشگوئی ایسی واضح او رمومن و کافر سے اپنی صداقت کااقرا رکرانے والی ہے کہ اس کے بعد بھی اگر کو ئی شخص ضد کرتاہے تواس کی حالت نہایت قابل رحم ہے۔جس کی آنکھیں ہو ںوہ دیکھ سکتاہے کہ (۱) طاعون کی خبر ایک لمباعرصہ پہلے دی گئی تھی۔اور کوئی طبّی طریق ایساایجاد نہیں ہواجس سے اتنا لمباعر صہ پہلے وبائوں کاپتہ دیاجاسکے۔(۲) طاعون کے نمودار ہونے پر یہ بتایاگیاکہ یہ عارضی دور ہ نہیں ہے۔بلکہ سال بسال یہ بیماری حملہ کرتی چلی جائے