سُوْرَۃُ الْعَنْکَبُوْتِ

تفسیر کبیر (جلد ۱۰), حصہ 3

سے اترآتاہے اوروہ اسی طرح ان کی تائید کرتاہے جس طرح پہلے انبیاء کی جماعتوں کی اس نے تائید کی۔مگرہر چیزکاایک وقت مقرر ہے۔ابتلائوں کابھی ایک دور ہوتاہے اورکامیابیوں اور فتوحات کا بھی ایک دورہوتاہے اورمومن کامل وہی ہوتاہے جو مصائب اورآفات میں اللہ تعالیٰ کی مدد پربھروسہ رکھتاہے۔جب اس کایقین اپنے کمال کو پہنچ جاتاہے تو اَلَآ اِنَّ نَصْرَ اللّٰہِ قَرِیْبٌ کااسے مژدہ سنایاجاتاہے اوراللہ تعالیٰ اس کے دشمن کو تباہ کردیتاہے۔اسی کی طرف آیت کے آخری حصہ میں یہ کہہ کراشارہ فرمایاکہ وَھُوَ السَّمِیْعُ الْعَلِیْمُ۔اللہ تعالیٰ مومنوں کی دعائوں کوسننے والا اوران کے حالات کو جاننے والا ہے۔یہ کیسے ہو سکتا ہے کہ وہ ان کی دعائوں کوقبول نہ کرے اوردشمن کے ظالمانہ رویہ کوروکتے ہوئے اسے سزانہ دے۔ایک مشہو رتاریخی واقعہ ہے کہ روس کا بادشاہ پیٹر ایک دفعہ کسی ضروری امر پرغور کرنے کے لئے اپنے بالاخانہ پر بیٹھ گیا۔اوراس نے حکم دے دیاکہ کسی شخص کو اند رآنے کی اجازت نہ دی جائے۔پرانے زمانہ میں دروازے نہیں ہوتے تھے۔صرف پردے لٹکالئے جاتے تھے۔اور عربی کتابوں سے پتہ لگتاہے کہ مسلمانوں کے مکانوں میں بھی دروازے نہیں ہوتے تھے۔اسی لئے حکم تھا کہ جب آئو تواجازت لے کر آئو۔بہرحال اس نے ڈیوڑھی پر ٹالسٹائے کو جواس کاچپڑاسی تھا۔بٹھادیا او راسے کہہ دیا کہ کسی کو اندر نہ آنے دینا۔میں ایک ضروری امر کے متعلق غور کررہاہوں۔اتفاقاً کوئی شہزادہ آگیا۔اس نے بادشاہ کے پاس کسی کام کے لئے جاناچاہا۔روس کے شاہی قانون کے مطابق شہزادہ کوکوئی شخص روک نہیں سکتا۔شہزادوں کویہ اجازت تھی کہ وہ بادشاہ کے پاس جب چاہیں چلے جائیں۔انہیں کسی اجازت کی ضرورت نہیں۔پھر یہ بھی روسی قانون تھاکہ کوئی غیر فوجی آدمی کسی فوجی کو نہیں مار سکتا۔کسی بڑے افسر کوچھوٹاافسر نہیں مارسکتا۔اور کسی شہزادہ کو کوئی غیرشہزادہ نہیں مارسکتا۔یاکسی نواب کوکوئی غیر نواب نہیں مار سکتا۔پس چونکہ قانون اجازت دیتاتھا کہ شہزادے بغیر کسی روک کے بادشاہ کے پاس چلے جایاکریں۔اس لئے شہزادے نے اند رداخل ہوناچاہامگرجونہی وہ اند رداخل ہونے لگا۔ٹالسٹائے نے آگے بڑھ کر کہا۔حضور شہزادہ صاحب بادشاہ کاحکم ہے کہ کسی کو اندر نہ آنے دیاجائے۔اس نے کہا ٹھیک ہے مگر تمہیں پتہ ہے میں شہزادہ ہوں۔اورشہزادوں کے متعلق یہ قانون ہے کہ وہ بغیر کسی روک کے بادشاہ کے پاس جاسکتے ہیں۔اس نے کہا پتہ ہے۔اس پر شہزادے کوغصہ آیا اوراس نے اسے دوچار کوڑے لگائے اور کہا باوجود اس قانون کے معلوم ہونے کے تم یہ جرأت کرتے ہوکہ مجھے اندر داخل نہیں ہونے دیتے۔اس نے مار کھالی اور شہزادے نے بھی دوچار ہنٹر مارنے کے بعد سمجھ لیا کہ اسے اب سبق آگیا ہوگا۔چنانچہ وہ پھر اندرداخل ہونے کے لئے آگے بڑھا۔مگرٹالسٹائے نے پھر اسے روک لیااورکہا حضور بادشا ہ

نے اندر جانے سے منع فرمایا ہے۔اس پر اس نے پہلے سے بھی زیادہ اسے مارا۔اورخیال کیا کہ اب اسے سمجھ آگئی ہوگی۔مگر جب اس نے پھرمحل میں داخل ہونے کی کوشش کی۔توٹالسٹائے نے پھر اپنے ہاتھ پھیلادیئے اورکہا حضوربادشاہ کاحکم ہے کہ کوئی شخص اندر نہ آئے اس پر شہزادے نے پھر اسے تیسری بار مارا۔شہزادہ کے با ر بار مارنے او رپھر غصہ سے اس کی آواز کے بلند ہونے کی وجہ سے جب شور پیداہواتو قدرتی طور پر بادشاہ بھی اس طر ف متوجہ ہوگیا۔اوروہ تمام نظار ہ اوپر بیٹھ کر دیکھتارہا۔جب شہزادہ اسے تیسری دفعہ مارچکاتو بادشاہ نے غصہ والی آواز بنا کرکہا۔ٹالسٹائے! ادھر آئو۔ٹالسٹائے دوڑ کراندر گیا۔ساتھ ہی شہزادہ بھی جوش کی حالت میں داخل ہوگیا۔اوراس نے چاہاکہ وہ بادشاہ سے شکایت کرے۔جب ٹالسٹائے پہنچاتو بادشاہ نے کہا۔ٹالسٹائے یہ کیساشور تھا ؟ اس نے کہا حضورشہزادہ صاحب تشریف لائے تھے اوراند رآناچاہتے تھے مگر مجھے چونکہ حضور کاحکم تھا کہ کسی کواندر نہیں آنے دینا اس لئے میں نے عرض کر دیا کہ آپ کو اندر جانے کی اجازت نہیں۔اورجب یہ زبردستی اندرداخل ہونے لگے تومیں نے ان کوروکا۔بادشاہ نے کہا۔پھر۔اس نے کہا۔پھرانہوں نے مجھے مارا۔بادشاہ نے شہزادہ سے پوچھا۔کیا یہ ٹھیک ہے۔اس نے کہا۔ٹھیک ہے۔لیکن روس کاقانون یہ اجازت نہیں دیتاکہ شہزادہ کو اند رداخل ہونے سے روکاجائے۔بادشاہ نے کہا یہ درست ہے کہ روس کاقانو ن یہ اجازت نہیں دیتا کہ شہزادہ کو اند رآنے سے روکاجائے لیکن کیاتم اتنا بھی نہیں سمجھ سکتے کہ بادشاہ پراپنے ملک کی کئی قسم کی ذمہ داریاں ہوتی ہیں۔جن کے لئے بسا اوقات اسے غوراورفکر کی ضرورت ہوتی ہے اورغور و فکر کے لئے علیحدگی ضروری ہوتی ہے کیاتم یہ چاہتے ہوکہ حکومت کی ذمہ داریاں تواداہوں یانہ ہوں لیکن قانون کے محض الفاظ پورے ہوتے چلے جائیں۔میرے سامنے اس وقت ایک بہت بڑی مہم تھی جوحکومت سے تعلق رکھی تھی اورمیں چاہتاتھا کہ مجھے کچھ وقت ملے تومَیں اس کے متعلق سکیم سوچوں اورغور کروں کہ کس طرح اپنے ملک کو خطرہ سے بچایاجاسکتاہے۔کیاان حالات میں میرایہ حق نہ تھا کہ مَیں حکم دے دیتاکہ کوئی شخص اند رنہ آئے اورمیری توجہ کوکسی اورطرف نہ پھیرے۔ٹالسٹائے نے عقلمندی اور ادب سے کام لیا اور اس نے میرے حکم کی فرمانبردار ی کی۔مگرتم نے میرابیٹاہوتے ہوئے میرے حکم کی نافرمانی کی۔اور تم نے جو اس کو ماراتواس کے کسی جرم کی وجہ سے نہیں مارا بلکہ اس لئے مار اکہ اس نے میری فرمانبردار ی کیوں کی۔اس کے بعد بادشاہ نے ٹالسٹائے کے ہاتھ میں کوڑادے کر کہا ٹالسٹائے اٹھواور اس کوڑے سے شہزادے کومارو۔شہزادے نے کہا۔روس کا قانون اس بات کی اجازت نہیں دیتا کہ کوئی غیرفوجی کسی فوجی آدمی کومارے۔میں فوجی ہوں اور یہ غیر فوجی ہے اس لئے یہ مجھے مار نہیں سکتا۔بادشاہ نے کہا۔ٹالسٹائے میں تم کوفوجی عہدہ دیتاہوں تم اسے مار و۔گویابادشاہ نے بتایاکہ

اگر روس کاقانو ن یہ ہے کہ کوئی غیر فوجی کسی فوجی کونہیں مارسکتا توفوجی عہدے دینا بھی تو میرے اختیار میں ہے۔میں ٹالسٹائے کوفوجی عہدہ دے دیتاہوں۔اس پر پھر شہزادے نے کہا۔میں فوج میں کرنیل یاجرنیل ہوں۔مجھے میرے برابر کاآدمی ہی مار سکتاہے چھوٹانہیں۔بادشاہ نے کہا ٹالسٹائے میں تم کو بھی وہی عہدہ دیتاہوں۔اس پر شہزادہ نے کہا روس کاقانون یہ ہے کہ کسی نواب کوکوئی غیر نواب سزادینے پر مقر ر نہیں کیاجاسکتا۔بادشاہ نے کہا۔نواب بنانابھی میرے اختیار میں ہے اے نواب ٹالسٹائے میں تم کو حکم دیتاہوں کہ تم اس شہزادہ کومار و۔اوراس طرح بادشاہ نے شہزادہ کے ہرعذرکو توڑااورآخر ٹالسٹائے سے اس کو پٹوایا۔کیونکہ ٹالسٹائے نے بادشاہ کی خاطر مارکھائی تھی۔اسی طرح جو شخص ا س لئے پیٹاجائے گاکہ وہ خدا کی بات پرایمان لایا۔یاخدا کی آواز پر اس نے لبیک کہا۔دنیا کا چھوٹاہویابڑا جواس کو مارے گا اورسزادے گا خدااسے نہیں چھوڑے گا جب تک اسے سزانہ دے لے خدا تعالیٰ کے کوڑے کے مقابلہ میں کسی انسان کاکوڑانہیں چل سکتا۔لوگ اپنی کثرت پر گھمنڈ کرتے ہیں۔لوگ اپنے جتھے پر گھمنڈ کرتے ہیں۔لوگ اپنی حکومتوں پر گھمنڈ کرتے ہیں مگرہمارے خدا کی حکومت دنیا کی حکومتوں سے بہت بڑی ہے۔رسول کریم صلی اللہ علیہ وسلم کے متعلق نبیوں نے کہا کہ وہ کونے کاپتھر ہوگا۔جس پر وہ گرے گاوہ بھی چکنا چور ہوجائے گااور جوکوئی اس پر گرے گا وہ بھی چکناچور ہوجائے گا۔یعنی خواہ وہ کسی پر حملہ آورہو یاکوئی اس پر حملہ آور ہو دونوں صورتوںمیں وہ سزاپائے بغیر نہیں رہےگا۔اسی طرح آپ کے متبع بھی ظلی رنگ میں کونے کے پتھر ہیں۔پس جولوگ خدا پرتوکل رکھتے ہیں خداان کے دشمنوں کوسزادیئے بغیر نہیں رہتا۔وَ مَنْ جَاهَدَ فَاِنَّمَا يُجَاهِدُ لِنَفْسِهٖ١ؕ اِنَّ اللّٰهَ لَغَنِيٌّ اورجو شخص خدا(تعالیٰ )کے لئے کوشش کرتاہے درحقیقت وہ اپنی جان ہی کے لئے کرتاہے۔اللہ (تعالیٰ ) تمام عَنِ الْعٰلَمِيْنَ۰۰۷ جہانوں سے بے نیاز ہے (اوران کی عبادت کا محتاج نہیں)۔تفسیر۔اس آیت میں مومنوں کو اس طر ف توجہ دلائی گئی ہے کہ تمہاری تمام نیک کوششیں تمہارے اپنے لئے فائدہ بخش ہیں۔خدا تعالیٰ کو ان سے کوئی فائدہ نہیں۔کیونکہ اللہ تعالیٰ لوگوں کی عبادت یا ان کی قربانیوں سے بے نیاز ہے۔

پس قربانیاں کرتے وقت تم کبھی یہ خیال نہ کرو کہ تم خدااوراس کے رسول پرکوئی احسان کررہے ہو۔خدا تعالیٰ قربانیوں کا محتاج نہیں بلکہ تم اس کے فضل کے محتاج ہو اوراگرتمہیں کسی نیکی کی توفیق ملتی ہے توتم خدا پر یااس کے سلسلہ پرکوئی احسان نہیں کرتے بلکہ خو د اپنی جان پر احسان کرتے ہو۔جولوگ اس نکتہ کو نہیں سمجھتے وہ بعض دفعہ نیکیاں کرتے کرتے جنت کے دروازہ تک پہنچ جاتے ہیں اوران کاغرور ان کے راستہ میں دیوا ربن کر حائل ہو جاتا ہے۔اوروہ دوزخ میں جاگرتے ہیں۔پس نیکیوں کے بعد کبر یا خودپسندی کے جذبات کی بجائے ہمیشہ خدا تعالیٰ کاشکر اداکرناچاہیے جس نے ایمان کی توفیق دی۔اورمصائب و آفات میں ثباتِ قدم عطافرمایا۔وَ الَّذِيْنَ اٰمَنُوْا وَ عَمِلُوا الصّٰلِحٰتِ لَنُكَفِّرَنَّ عَنْهُمْ اورجولوگ ایمان لائے او رایمان کے مطابق انہوں نے عمل کئے ہم ان کی بدیوں کو سَيِّاٰتِهِمْ وَ لَنَجْزِيَنَّهُمْ اَحْسَنَ الَّذِيْ كَانُوْا ان سے دو رکردیں گے اورجوکام وہ کرتے تھے اس کے مطابق جو بہترین جزاء ان کومل سکتی ہوگی يَعْمَلُوْنَ۰۰۸ وہ ہم ان کودیں گے۔حلّ لُغَات۔لَنُکَفِّرَنَّ۔لَنُکَفِّرَنَّ کَفَّرَ سے جمع متکلم مؤکد بہ نونِ ثقیلہ کاصیغہ ہے اور کَفَّرَ اللّٰہُ لَہُ الذَّنْبَ کے معنے ہیں مَحَاہُ یعنی گناہ کے اثر اوراس کے نشان کو مٹادیا (اقرب)۔اسی طرح کَفَّرَ کے معنے بدلہ دینے کے بھی ہوتے ہیں۔قرآن کریم میں آتاہے۔ذٰلِکَ کَفَّارَۃُ اَیْمَانِکُمْ اِذَاحَلَفْتُمْ(المائدۃ: ۹۰) جب تم قسم کھاکراسے توڑ دو توا س کابدلہ وہ ہے جو اوپر بیان ہوچکا ہے وَالتَّکْفِیْرُ سَتْرُہٗ وَتَغْطِیَتُہٗ یَصِیْرَحَتّٰی بِمَنْزِلَۃِ مَالَمْ یَعْمَلْ۔اورتکفیر (جو کَفَّرَ کامصدر ہے جس سے کفارہ بناہے) کے معنے کسی عمل کو اس حد تک چھپادینے اورڈھانپ دینے کے ہوتے ہیں کہ گویا اس کاوجود ہی نہ تھا اوراس کے کرنے والے نے وہ عمل کیا ہی نہ تھا۔وَیَصِحُّ اَنْ یَّکُوْنَ اَصْلُہٗ اِزَالَۃَ الْکُفْرِ وَالْکُفْرَانِ نَحْوَ التَّمْرِیْضِ فِیْ کَوْنِہٖ اِزَالَۃً لِّلمَرَضِ وَتَقْذِیَۃِ الْعَیْنِ فِیْ اِزَالَۃِ الْقَذٰی عَنْہُ (مفردات ) اوریہ بھی ہو سکتا ہے کہ اس لفظ کی بنیاد بابِ تفعیل کے اس خاصہ پر ہو کہ وہ اصل مادہ

کے معنوں کودورکرنے پردلالت کرتاہے اور کَفَّرَ کے معنے ہوںکفریاکفران نعمت کودورکرنا۔جیسے عربی زبا ن میں تَمْرِیْض کے معنے مرض پیداکرنے کے نہیں بلکہ مرض کے دور کرنے کے ہوتے ہیں۔اسی طرح تَقْذِیَۃُ الْعَیْن کے معنے آنکھ میں قَذٰی یعنی تنکاڈالنے کے نہیں ہوتے بلکہ آنکھ سے تنکا دورکرنے کے ہوتے ہیں۔اوپرکے لغات کے حوالوں سے معلوم ہو سکتا ہے کہ کفارہ کے معنے مٹادینے کے بھی ہیں جس میں تین باتیں شامل ہیں (۱) گناہ کی خواہش اورعادت کومٹادینا۔(۲)گناہ کی سزا اورنتیجہ کو مٹادینا۔(۳) گناہ کی شہرت اور بدنامی کومٹادینا اسی طرح کفار ہ کے معنے بدلہ دینے یا گناہ کودورکرینے کے بھی ہیں۔تفسیر۔اس آیت میں جزائے نیک کے بار ہ میں اسلام کایہ اصول بیان کیاگیا ہے کہ جب کوئی شخص سچی توبہ کرتاہے تو خدا تعالیٰ صرف گناہ کوہی معاف نہیں کرتا بلکہ گناہ کی یاد بھی مٹادیتاہے۔یعنی جولوگ گناہ سے واقف ہوتے ہیں۔مثلاً خود گناہ گار کا اپنا وجود ہے اللہ تعالیٰ اس کے اوردوسروں کے ذہن سے اس گناہ کی یاد کومٹادیتاہے اوربدی کے نقش کو یاتودھندلاکردیتا ہے یااسے بالکل محو کردیتاہے تانفس میں شرمندگی نہ رہے اورنیکی کاجذبہ غالب آجائے۔چنانچہ فرماتا ہے۔وَ الَّذِيْنَ اٰمَنُوْا وَ عَمِلُوا الصّٰلِحٰتِ لَنُكَفِّرَنَّ عَنْهُمْ سَيِّاٰتِهِمْ وَ لَنَجْزِيَنَّهُمْ اَحْسَنَ الَّذِيْ كَانُوْا يَعْمَلُوْنَ۔یعنی وہ لوگ جو سچاایمان لائے ہیں اوراپنے ایمان کے مطابق انہوں نے عمل کئے ہیں ہم ان کے گناہوں کو مٹادیں گے اوران کے اعمال میں سے بہترین اعمال کے مطابق ا ن سے سلوک کریں گے۔اس جگہ مٹادینے سے مراد ان کا فراموش کردینا ہی ہے کیونکہ جب عمل صالح کرنے والے اور کامل ایمان والوں کا ذکر ہو۔تومٹادینے کے یہ معنے نہیں ہوسکتے کہ گناہ کی عادت چھٹ جائے گی۔کیونکہ ایسا شخص عمل نیک توپہلے ہی کرنے لگ گیا ہے۔پس اس جگہ مٹانے سے مراد ان کافراموش کردینا ہی ہے تاکہ ان کی عزت پرکوئی حرف باقی نہ رہے۔لَنَجْزِیَنَّھُمْ اَحْسَنَ الَّذِیْ کَانُوْایَعْمَلُوْنَ سے معلوم ہوتاہے کہ اللہ تعالیٰ انسانی اعمال کی جزادیتے وقت اس کی کمزوریوں پر انعام کی بنیاد نہیں رکھے گا بلکہ اس کی اعلیٰ سے اعلیٰ حالت پر اس کی بنیاد رکھے گا۔اس دنیا میں ہم دیکھتے ہیں کہ بدلہ دیتے وقت انسان کی کمزوریوں کاخیال رکھاجاتاہے۔یعنی یہ دیکھاجاتاہے کہ عام طور پر اس سے کس قسم کے اعمال کاظہو رہواہے۔جسے قاعدئہ اوسط کہاجاتاہے۔دنیا کی تمام جزاء اس اوسط کے قاعد ہ پر مبنی ہے۔حتیٰ کہ حکومتیں پنشن دیتے وقت بھی قاعدئہ اوسط سے کام لیتی ہیں اوریہ دیکھتی ہیں کہ تین سال کی تنخواہ کااوسط کیا ہے پھراس اوسط کے مطابق پنشن دیتی ہیں۔مثلاً اگر کوئی شخص پنشن کے وقت سے تین سال پہلے تین سوروپیہ تنخواہ لیتاتھا۔دوسال پہلے چارسوروپیہ اورآخری سال میں پانچسوتووہ اسے دوسوپنشن دے گی جوچار سوکانصف بنتاہے نہ کہ اڑھائی سوجو

اس کی آخری تنخواہ کانصف ہوتاہے۔لیکن اللہ تعالیٰ چونکہ مَالِکِ یَوْمِ الدِّیْن ہے۔اس کے انعام سے دوسروں کاحق نہیںماراجاتا اوروہ جوکچھ دیتا ہے اپنی ملکیت سے دیتاہے۔اس نے جزاء نیک کے بارہ میں دنیا کے ا س قاعدہ کے خلاف یہ قاعدہ مقررکررکھاہے کہ جوشخص مرتے ہوئے نیک ہواورایمان پرجان دے اس کا درجہ وہ نہیں سمجھاجائے گا جوموت کے وقت اسے حاصل تھا بلکہ اس کا وہ اعلیٰ سے اعلیٰ درجہ سمجھاجائے گا جو اس کی زندگی میں کسی وقت اسے حاصل ہواہو۔مثلاً فرض کرونیکی کے دس درجے ہیں۔اورایک شخص مرتے ہوئے ساتویں درجہ پر تھا لیکن دوچار سال پہلے اسے آٹھواں یانواں درجہ حاصل تھا پھرکسی جسمانی یا دماغی کمزور ی کی وجہ سے اس کی نیکی کادرجہ گرگیا۔اوردین کی خدمت کا اسے اس قدر موقعہ نہ ملا جو اس سے پہلے ملاکرتاتھا توایسے شخص کو اللہ تعالیٰ موت کے وقت کے درجہ پرفائز نہ کرے گا بلکہ اسے اس درجہ میں رکھے گا جواسے پہلے حاصل تھا اورجوسب سے اعلیٰ تھا۔غرض انسان کو جزاء دیتے وقت ا س امر کاخیال رکھاجائے گا کہ اپنی زندگی میں کس اعلیٰ سے اعلیٰ مقام کویہ پہنچ چکا ہے۔اوربعد کے تغیر ات کو نظر انداز کرکے اس اعلیٰ درجہ کے مطابق اس سے سلوک کیاجائے گا۔اس بارہ میں قرآن کریم کی متعدد آیات ہیں جن میں سے ایک یہ آیت بھی ہے۔ظاہر ہے کہ اس آیت کے یہ معنے توہونہیں سکتے کہ جو اچھے سے اچھا عمل ہوگااس کابدلہ مل جائے گا اور دوسرے چھوڑ دیئے جائیں گے کیونکہ اس سے توبندوں کافائدہ نہیں نقصان ہے کیونکہ چھوٹے اعمال بڑے عملوں سے مل کر بدلہ کو بڑھادیتے ہیں کم نہیں کرتے۔اورخالی بڑاعمل چھوٹے عملوں سے علیحد ہ رہ کر بڑانہیں چھوٹاہوتاہے۔کیونکہ ان سے الگ ہو کر اس کی طاقت کم ہو جاتی ہے۔دس کاعدد چھ اور سات سے بڑاہے لیکن ۱۰+۶+۷ سے بڑانہیں۔جمع کی صورت میں دس کواگرچھ اور سات سے الگ کر دیاجائے تو یہ چھوٹاہوجائے گا۔پس اللہ تعالیٰ کایہ مطلب ہرگز نہیں ہوسکتاکہ تمہارے ادنیٰ اعمال کوہم بغیر بدلہ کے چھوڑ دیں گے اور صرف بڑے عمل کا بدلہ دیں گے۔لازماً ماننا پڑتا ہے کہ اس جگہ عام جزاکا ذکر نہیں بلکہ خاص قسم کی جزاکا ذکر ہے۔عام جزامیں تو بے شک چھوٹے سے چھوٹے عمل کوبھی ضائع نہیں کیاجائے گا۔جیساکہ فرماتا ہے فَمَنْ یَّعْمَلْ مِثْقَالَ ذَرَّۃٍ خَیْرًایَّرَہٗ۔لیکن اس جگہ جس قسم کی جزاکا ذکر ہے اس میں صرف بڑے عمل کو الگ کرلینے سے انسان کافائد ہ زیادہ ہوتاہے اور دوسرے اعمال کے ساتھ شامل کردینے سے بڑے عمل کی طاقت بھی کم ہوجاتی ہے۔جیسے ایک مصورہزاروں تصویریں بناتاہے لیکن اس کی سب تصویر یں یکساں نہیں ہوتیں۔اس کی بہت سی تصویروں میں سے کوئی بہت اعلیٰ ہوتی ہے اور کوئی درمیانی اورکوئی ادنیٰ۔اعلیٰ تصویر جو اس کے کام کا منتہاء کہلاتی ہے اورجسے انگریزی محاورہ میں ’’ ماسٹر پیس ‘‘ کہتے ہیں اس کے لئے ضروری نہیں کہ وہ انسان کی آخری

تصویر ہی ہو۔کبھی وہ ابتدائی زمانہ کی تصویر ہوتی ہے کبھی درمیانی زمانہ کی او ر کبھی آخری زمانہ کی۔ا ب اگراس مصور کو ایک نئی زندگی دی جائے اوراس کی لیاقت کی اوسط نکال کر یااس کی آخری عمر کی حالت کے مطابق اسے اس کی نئی زندگی میں ذہانتِ مصور ی بخشی جائے تویقیناً اس کانقطہء مسابقت ادنیٰ ہوگا۔لیکن اگراس کے ذہن کو اس سطح پر رکھ دیاجائے جواسے اپنی چوٹی کی تصویر بناتے وقت میسر تھا تواس کانقطئہ مسابقت یقیناً بہت اعلیٰ درجہ کاہوگا۔گویاذہن کی عام قابلیت اگراعلیٰ سے اعلیٰ کام کے مطابق رکھی جائے تووہ یقیناً اعلیٰ ہوگی۔بہ نسبت تما م کام کی اوسط نکال کر اس کے مطابق رکھنے کے۔کیونکہ انسانی زندگی میں قبض اور بسط کے دورآتے رہتے ہیں اوران دونوں کی اوسط گوقبض کی گھڑیوں سے اعلیٰ ہوتی ہے لیکن بسط کی اعلیٰ گھڑیوں سے بہت اد نیٰ ہوتی ہے۔اسی قانون کی طرف اشارہ کرتے ہوئے اللہ تعالیٰ فرماتا ہے کہ دوسری زندگی میں ہم جو قوتِ عمل انسان کو بخشیں گے و ہ اس کی پہلی زندگی کی ترقیات کی اوسط کے مطابق نہ ہوگی بلکہ اس کی پہلی زندگی کی ان گھڑیوں کے مطابق ہوگی جن میں انسان نے اپنا انتہائی کمال ظاہر کیاہوگا خواہ وہ کمال زندگی کے کسی دو ر میں ظاہر ہواہواوراس طرح ہم اسے ایک ایسا اعلیٰ نقطئہ مسابقت بخشیں گے جس پر کھڑے ہوکر و ہ اعلیٰ مقامات کو بہت سرعت سے حاصل کرسکے گا۔اوران معنوں کے روسے اعلیٰ سے اعلیٰ عمل کے مطابق جزاء کاملنا ایک انعام ہے او رانعام بھی وہ جس کاخیال کرکے بھی دل خوشی سے اچھل پڑتا ہے۔فَتَبَارَکَ اللّٰہُ اَحْسَنُ الْخَالِقِیْنَ وَ وَصَّيْنَا الْاِنْسَانَ بِوَالِدَيْهِ حُسْنًا١ؕ وَ اِنْ جَاهَدٰكَ اورہم نے انسا ن کواپنے والدین سے اچھا سلوک کرنے کاحکم دیاہے اور(کہا ہے کہ) اگر و ہ دونوں تجھ سے اس لِتُشْرِكَ بِيْ مَا لَيْسَ لَكَ بِهٖ عِلْمٌ فَلَا تُطِعْهُمَا١ؕ اِلَيَّ بات میں بحث کریں کہ تُو کسی کومیراشریک قرار دے حالانکہ اس کاتجھے کوئی علم نہیں توتُوان دونوں کی فرمانبرداری نہ

مَرْجِعُكُمْ فَاُنَبِّئُكُمْ بِمَا كُنْتُمْ تَعْمَلُوْنَ۰۰۹ کرکیونکہ تم سب نے میری طرف ہی لوٹ کر آنا ہے اورمیں تمہارے عمل (کی نیکی بدی) سے تم کوواقف کروں گا۔تفسیر۔فرماتا ہے۔ہم نے انسان کو اس کے ماں باپ کے متعلق بڑی تاکید کی ہے کہ ان سے نیک سلوک کیاجائے۔ہاںاگر وہ تم سے اس بات کے لئے جھگڑیں کہ تم کسی کومیراشریک قرار دے دو۔جس کاتمہیں کوئی علم نہیں تو پھران کی بات نہ مانو۔یعنی مومن کو جب اس کے ماں باپ سے اچھا معاملہ کرنے کا حکم دیاگیا ہے توپھر کس طرح ہو سکتا ہے کہ مومن خدا تعالیٰ سے جو ماں باپ سے بھی زیادہ محسن ہے اچھامعاملہ نہ کرے۔اورجب ماں باپ خدا تعالیٰ کے خلاف کوئی بات کہیں توان کی بات کو رد ّ نہ کرے۔بہرحال اس استثنا ء کے سواہرانسان کافرض ہے کہ و ہ اپنے ماں باپ کے ساتھ حسن سلوک کرے اور ان کے کسی حکم کی خلاف و رزی نہ کرے۔مجھے افسوس ہے کہ اس زمانہ میں بہت سے نوجوان ایسے دکھائی دیتے ہیں جو اپنے ماں باپ کامناسب احترام نہیں کرتے اورنہ ان کے حقوق کاخیال رکھتے ہیں بلکہ اولاد میں سے کسی کواگر کوئی اچھا عہدہ مل جائے تووہ اپنے غریب والدین سے ملنے میں بھی شرم محسوس کرتاہے۔حضرت مسیح موعود علیہ الصلوٰۃ والسلام سنایاکرتے تھے کہ کسی ہندونے بڑی تکلیف برداشت کر کے اپنے لڑکے کو بی۔اے یاایم۔اے کرایااوراس ڈگری کوحاصل کرنے کے بعد وہ ڈپٹی ہوگیا۔آجکل ڈپٹی ہوناکوئی بڑااعزاز نہیں سمجھاجاتا۔لیکن پہلے وقتوں میں ڈپٹی ہونا بھی بڑ ی بات تھی۔اس کے باپ کو خیال آیا کہ میرالڑکاڈپٹی ہوگیا ہے۔میں بھی اس سے مل آئو ں۔چنانچہ جس وقت وہ ہندو اپنے بیٹے کو ملنے کے لئے مجلس میں پہنچا تواس وقت اس کے پاس وکیل اوربیرسٹر وغیرہ بیٹھے ہوئے تھے۔یہ بھی اپنی غلیظ دھوتی کے ساتھ ایک طرف بیٹھ گیا۔باتیں ہوتی رہیں کسی شخص کواس غلیظ آدمی کابیٹھنا برامحسوس ہوااوراس نے پوچھا کہ ہماری مجلس میں یہ کون آبیٹھاہے۔ڈپٹی صاحب اس کی یہ بات سن کر کچھ جھینپ سے گئے اورشرمندگی سے بچنے کے لئے کہنے لگے یہ ہمارے ٹہلیا ہیں۔باپ اپنے بیٹے کی یہ بات سن کر غصے کے ساتھ جل گیا۔وہ اپنی چاد رسنبھالتے ہوئے اٹھ کھڑاہوا۔اورکہنے لگا۔جناب میں ان کا ٹہلیا نہیں ان کی ماں کاٹہلیا ہوں۔ساتھ والوں کو جب معلوم ہواکہ یہ ڈپٹی صاحب کے والد ہیں توانہوں نے اس کو بہت لعن طعن کی اورکہا کہ اگرآپ ہمیں بتاتے توہم ان کی مناسب تعظیم و تکریم کرتے۔اورادب کے ساتھ ان کو بٹھاتے۔بہرحال اس قسم کے نظارے روزانہ دیکھنے میں آتے ہیں کہ لوگ رشتہ داروں کے ساتھ ملنے سے جی چراتے ہیں تاکہ ان کی اعلیٰ پوزیشن میں کوئی کمی واقع نہ ہوجائے۔گویاماں باپ کانام روشن کرناتوالگ رہا ان کے

نام کو بٹہ لگانے والے بن جاتے ہیں۔اورسوائے ان لوگوں کے جو اس نقطہ نگاہ سے والدین کی عزت کرتے ہیں کہ اللہ تعالیٰ کاحکم ہے کہ والدین کی عزت کرو۔دنیاداروں میں سے بہت کم لو گ ایسے ہوتے ہیں جووالدین کی پورے طور پر عزت کرتے ہیں۔اورزمینداروں اورتعلیم یافتہ طبقہ دونوں میں یہی حالات نظر آتے ہیں۔اسی طرح بعض نوجوان اپنی مائوں کی خبرگیری ترک کردیتے ہیں اورجب پوچھاجاتاہے توان کا جواب یہ ہوتاہے کہ اماں جی کی طبیعت تیز ہے اورمیری بیوی سے ان کی بنتی نہیں۔حالانکہ بیوی کوماں سے کیانسبت۔بیوی نے اس کے فائدے کے لئے کیاکیاہوتاہے۔وہ نوجوانی کی حالت میںاس کی خدمت کرتی ہے لیکن ماں جس نے اپنی چھاتیوں سے دودھ پلایاہوتاہے اورجس نے اپنا خون دودھ کی شکل میں تبدیل کرکے اس کی پرورش کی ہوتی ہے اورمحنت و مشقت کرکے پڑھایاہوتاہے اس سے اس لئے اعراض کرلیاجاتاہے کہ بیوی سے اس کی بنتی نہیں۔پس اس خطرناک نقص کودور کرو۔اوراپنے والدین کی خدمت بجالائو۔ورنہ تم اس جنت سے محروم ہوجائو گے۔جوتمہارے ماں باپ کے قدموں کے نیچے رکھی گئی ہے۔آخرمیں فرمایا اِلَیَّ مَرْجِعُکُمْ۔آخر تم نے خدا تعالیٰ کی طرف ہی لوٹنا ہے اور تمام اعمال کا نتیجہ اسی نے ظاہر کرنا ہے اس لئے تمہاراکام یہی ہے کہ جب شرک کاسوال آئے تواپنے ماں باپ کی اطاعت کرنے سے انکار کردو۔مگراس استثناء کے علاوہ تمام دنیوی معاملات میں ان کے ساتھ حسن سلوک سے پیش آئو۔اوران کی کامل فرمانبردار ی کرو۔احادیث میں آتا ہے کہ ایک دفعہ حضرت ابو بکر رضی اللہ عنہ کی ایک لڑکی کے پاس جو رسول کریم صلی اللہ علیہ وسلم کی بیوی کی بہن تھیں ان کی والدہ آئیں۔انہوں نے رسول کریم صلی اللہ علیہ وآلہٖ وسلم سے عرض کیا کہ یارسول اللہ! میری ماں آئی ہے اورچاہتی ہے کہ میں اس سے کچھ سلوک کروں مگروہ کافرہ ہے۔کیامیں اس سے حسن سلوک کرسکتی ہوں؟ آپؐ نے فرمایا۔ہاں بیشک کرو۔یہ دنیوی معاملہ ہے۔اس میں کوئی حرج نہیں۔پھر حضرت عمر رضی اللہ عنہ کے متعلق آتاہے کہ رسول کریم صلی اللہ علیہ وسلم نے ان کوایک دفعہ ایک جبّہ دیا جو ریشمی تھا۔انہوں نے عرض کیا کہ یارسول اللہ! میں نے ایک دفعہ آپؐ کوایک ریشمی جبّہ پیش کیاتھا۔مگرآپؐ نے اس کو پسند نہ فرمایا۔اب آپ مجھے خود ریشمی جبّہ دے رہے ہیں۔کیامیں اس کو پہن لوں۔آپؐ نے فرمایا۔میں نے پہننے کے لئے نہیں دیا کسی کو تحفۃً دے دو یا بیچ ڈالو۔اس پر انہوں نے اپنے بھائی کوجو مکہ میں رہتاتھااورکافرتھادے دیا۔اس سے معلوم ہوتاہے کہ مذہبی اختلاف کی وجہ سے تعلقات منقطع نہیں ہوجاتے بلکہ مومن کافرض ہوتاہے کہ وہ ہرحالت میں اپنے والدین اور دوسرے رشتہ داروں کا احترام کرے اورہمیشہ ان سے حسن سلوک کرتارہے۔

یہ بھی یاد رکھناچاہیے کہ ابتلائوں کے ذکر میں ماں باپ سے حسن سلوک کی تاکید اس لئے کی گئی ہے کہ نبیوں کے آنے پر بسا اوقات نوجوا ن طبقہ تو پرانے خیالات سے آزاد ہونے کی وجہ سے صداقت کوقبول کرلیتا ہے لیکن ان کے والدین اپنے پرانے عقائد پر ہی قائم رہتے ہیں اور چونکہ مذہبی عقائد کااختلاف ماں باپ اوران کی اولاد میں ایک وسیع خلیج حائل کردیتاہے۔اس لئے بعض دفعہ والدین ایسی سختی پر اترآتے ہیں کہ وہ اپنے بیٹوں کواپنے گھروں سے نکال دیتے یاانہیں اپنی جائیدادوں سے بے دخل کردیتے ہیں۔اللہ تعالیٰ مومنوںکوتوجہ دلاتاہے کہ بیشک تمہاراصداقت قبول کرنا ایک بڑی بھاری نیکی ہے لیکن اس کے یہ معنے نہیں کہ تم ان سختیوں کی وجہ سے اپنے ماں باپ سے حسن سلوک ترک کردو۔تمہاراکام یہی ہے کہ تم ہمیشہ ان کے ساتھ حسن سلوک کرو۔اوردنیوی معاملات میں ان سے محبت کے ساتھ پیش آئو۔ہاںاگر وہ تمہیں کبھی خدااوراس کے رسول سے برگشتہ کرنے کی کوشش کریں توتم فوراً کہہ دوکہ اس معاملہ میں ہم آپ کی اطاعت کرنے کے لئے تیار نہیں۔وَ الَّذِيْنَ اٰمَنُوْا وَ عَمِلُوا الصّٰلِحٰتِ لَنُدْخِلَنَّهُمْ فِي اورجولوگ ایمان لائے ہیں اور اس کے مطابق انہوں نے عمل بھی کیاہے ہم ان کو اچھے بندوں میں الصّٰلِحِيْنَ۰۰۱۰ داخل کریں گے۔تفسیر۔اس آیت میں بتایاگیا ہے کہ جولوگ محمدرسول اللہ صلی اللہ علیہ وسلم پرسچے دل سے ایمان لائے ہیں اورپھراس ایمان کے مطابق انہوں نے اعمال صالحہ بھی کئے ہیں ہم انہیں یقیناً صالحین میں داخل کریں گے یعنی ان صادق اورراستباز لوگوں میں شامل کریں گے جن کے متعلق زبو ر (زبور باب ۳۷ آیت ۲۹) میں ہم نے وعدہ کیاتھا کہ انہیں فسلطین کی بادشاہت دی جائے گی۔گویا وہ وعدہ جوبنی اسرائیل سے کیاگیا تھااب مسلمانوں کے ایمان اور عمل صالح کرنے کی وجہ سے ان کی طرف منتقل ہوجائے گا۔چنانچہ جب تک مسلمان صالح رہے فلسطین مسلمانوں کے پاس رہا۔اورجب ان میں بگاڑ پیداہوگیا فلسطین بھی ان سے چھن گیا۔مگرجیسا کہ قرآن کریم کی دوسری آیات سے ظاہر ہے یہ فلسطین کاچھننا عارضی ہے ایک دن اللہ تعالیٰ ان کو پھراس ملک میں لائے گا اور ان کی موجودہ پسپائی فتح سے بدل جائے گی۔انشاء اللہ تعالیٰ۔امریکن قوم بڑی ہوشیار ہے مگراس موقعہ پر اس نے سخت غلطی کی ہے اورایک

ایسی قوم کی حمایت کے لئے کھڑی ہوگئی ہے جس کوبائیبل بھی ملزم قرار دیتی ہے اورقرآن کریم بھی ملزم قرار دیتاہے۔یہودی اگر فلسطین میں مستقل طور پر رہنا چاہتے ہیں تواس کاایک ہی ذریعہ ہے کہ وہ صالحین میں شامل ہوجائیں۔خدا تعالیٰ کوان سے کوئی دشمنی نہیں۔وہ حضرت ابراہیم علیہ السلام کی اولاد میں سے ہیں۔اگروہ صالح بن جائیں تووہ اس ملک میں رہ سکتے ہیں۔لیکن قرآن کریم میں اللہ تعالیٰ صالح کی تشریح میں فرماتا ہے کہ جولوگ محمدرسول اللہ صلی اللہ علیہ وسلم کی اطاعت کریں وہ صالح اورشہید اور صدیق وغیرہ کا مقام پائیں گے۔پس صالح بننے کے لئے محمدرسول اللہ صلی اللہ علیہ وسلم کی سچی پیروی ضروی ہے۔اگر یہود محمدرسول اللہ صلی اللہ علیہ وسلم پرایمان لے آئیں۔تواللہ تعالیٰ ان کو اس ملک میں قائم رکھے گااوروہ اسی طرح مسلمانوں کے بھائی ہوں گے جس طرح اسحاق ؑ اسماعیل ؑ کابھائی تھا۔پس کوئی وجہ نہیں کہ وہ ہمت کرکے خدا تعالیٰ کے قانون کواپنی تائید میں نہ بنالیں۔وَ مِنَ النَّاسِ مَنْ يَّقُوْلُ اٰمَنَّا بِاللّٰهِ فَاِذَاۤ اُوْذِيَ فِي اللّٰهِ اورلوگوں میں سے (بعض ایسے بھی ہوتے ہیں)جو کہتے ہیں کہ ہم اللہ(تعالیٰ )پرایمان لے آئے ہیں پھرجب جَعَلَ فِتْنَةَ النَّاسِ كَعَذَابِ اللّٰهِ١ؕ وَ لَىِٕنْ جَآءَ نَصْرٌ مِّنْ اللہ (تعالیٰ )کی وجہ سے ان کو تکلیف دی جاتی ہے وہ لوگوں کے عذاب کو اللہ کے عذاب کی طرح سمجھ لیتے ہیں اور رَّبِّكَ لَيَقُوْلُنَّ اِنَّا كُنَّا مَعَكُمْ١ؕ اَوَ لَيْسَ اللّٰهُ بِاَعْلَمَ بِمَا اگرتیرے رب کی طرف سے مددآتی ہے تووہ کہتے ہیں(درحقیقت) ہم بھی تمہارے ساتھ تھے۔کیادنیا جہان کے فِيْ صُدُوْرِ الْعٰلَمِيْنَ۰۰۱۱وَ لَيَعْلَمَنَّ اللّٰهُ الَّذِيْنَ اٰمَنُوْا وَ لوگوں کے دلوں میں جو کچھ ہے اس کو اللہ(تعالیٰ ) اچھی طرح نہیں جانتا؟ اور اللہ(تعالیٰ )ضرو رظاہر کردے گا لَيَعْلَمَنَّ الْمُنٰفِقِيْنَ۰۰۱۲ ان کو بھی جو ایمان لائے اوران کو بھی جو منافق ہیں۔تفسیر۔اس آیت میں بتایاکہ جولوگ صرف منہ کے ایمانوں پر بھروسہ کرتے ہیں ان کی یہ حالت ہوتی

ہے کہ جب کبھی اللہ تعالیٰ کے راستہ میں ان کو کوئی تکلیف پہنچتی ہے تو لوگوںکے عذاب دینے کو وہ اللہ کے عذاب دینے کے برابر سمجھ لیتے ہیں۔اورجب کبھی تیرے رب کی طرف سے نصر ت آجائے توپھر اپنی اصل حالت کو چھپانے کے لئے مسلمانوں کے پاس آ آکر کہتے ہیں کہ ہم توتمہارے ساتھ تھے۔حالانکہ وہ صرف منہ سے ساتھ تھے دل سے ساتھ نہیں تھے۔مومنوں کو اس قسم کے بزدلانہ رویہ سے بچناچاہیے اورصداقت پرپوری مضبوطی سے قائم رہناچاہیے۔آج سب سے بڑی مصیبت سچ کی اشاعت میں یہی ہے کہ لوگ قوم اور ملک کی رسوم کا مقابلہ نہیں کرسکتے۔یورپ میں سےلاکھوں آدمی ایسے ہیں۔جن کے دلوں پر اسلام کی سچائی نے اثر کرلیا ہے مگروہ ملک کی اور قوم کی رسوم کامقابلہ کرنے اوراپنے ہمسائیوں کے تمسخر سے گھبراتے ہیں۔اگروہ دلیرہوجائیں تونہ صرف ان کو سچائی قبول کرنے کاموقعہ ملے بلکہ ان کو دیکھ کرہزاروں اورآدمی آگے آجائیں اورسچائی دنوں میں اتنی پھیل جائے جوپچھلی صدیوں میں نہیں پھیلی تھی۔کیونکہ اس زمانہ کی تمام خرابیوں کے باوجود اس میں اتنی خوبی موجود ہے کہ علوم کے خزانے باہر آگئے ہیں اورہرعلم کے متعلق اتنی کتابیں موجود ہیںکہ انسان آسانی سے ان علوم کو حاصل کرسکتاہے۔یہ بات پہلے لوگوں کو میسر نہ تھی۔پس مبارک ہے وہ جو اس سامان سے فائدہ اٹھاتاہے اورسچے مذہب کے قائم کرنے میں اپنی نیک مثال سے مدد دیتاہے۔یقیناً اللہ تعالیٰ کے فضل اس پر نازل ہوں گے۔اورآنے والی نسلیں ان کو دعائیں دیں گی۔ہم انتظار کررہے ہیں کہ یورپ اور امریکہ میں سے کون کون سے لوگ اس مقام کوحاصل کرتے ہیں۔جَعَلَ فِتْنَۃَ النَّاسِ کَعَذَابِ اللّٰہِ سے معلوم ہوتاہے کہ ابتلاء اورعذاب میں بہت بڑافرق ہوتاہے مگرلوگ اپنی نادانی سے اس فرق کو ملحوظ نہیں رکھتے اورخدا تعالیٰ کی راہ میں پیش آنے والی مشکلات کووہ اپنی تباہی کاموجب سمجھ لیتے ہیں۔حالانکہ وہ ان کی ترقی کاپیش خیمہ ہوتی ہیں۔ابتلاء او رعذاب میں فرق یہ ہوتاہے کہ (۱) عذاب کانتیجہ ہلاکت اورتباہی ہوتی ہے مگرابتلاء کا نتیجہ یہ نہیں ہوتا۔تکلیفیں تو دونوں طرح ہی آتی ہیں۔رسول کریم صلی اللہ علیہ وسلم کے متعلق ہی دیکھ لو۔بارہاایساہواہے کہ آپ دشمن کے نرغے میں اکیلے پھنس گئے۔مگرپھر اللہ تعالیٰ نے آپ کو بچالیا مگر ابوجہل ایک ہی دفعہ فوجوں سمیت پکڑا گیا اورہلاک ہوگیا۔(۲) عذاب کے نتیجہ میں نقصان کی زیادتی ہوتی ہے اورابتلاء میں نفع کی زیادتی ہوتی ہے۔ابتلاء کی مثال تو ایسی ہوتی ہے جیسے ربڑ کے گیند کو جتنے زور سے پھینکاجائے وہ اتنا ہی اچھلتاہے۔مگرعذاب میں گرکر انسان اوپر نہیں اٹھ سکتا۔

·

آج 10 میں سے 10 باقی