سُوْرَۃُ الْعَنْکَبُوْتِ
تفسیر کبیر (جلد ۱۰), حصہ 4
(۳ ) عذاب جس انسان پر نازل کیا جاتا ہے اس کے دل میں مایوسی اور گھبراہٹ ہوتی ہے۔مگرجس پر ابتلاء نازل ہوتاہے اس کے دل میں اطمینان او رتسلی ہوتی ہے۔جب عذاب نازل ہوتاہے تومغضوب کہتا ہے۔ہائے میں ہلاک ہوگیا۔یااگروہ اس سے گھبراتانہیں تو اس کے دل میں کبراورخودپسندی کے جذبات جوش مارنے لگتے ہیں اوروہ سمجھتاہے کہ مجھے کون ہلاک کرسکتاہے ؟ لیکن جب ابتلاء آتاہے توانسان کہتاہے کوئی پرواہ نہیں میں کمزور اوربے کس ہوں لیکن میرابچانے والاطاقت و رہے اوروہ خدا تعالیٰ پر یقین میں اوربھی ترقی کرجاتاہے اور خدا تعالیٰ پراس کی حسن ظنی بہت بڑھ جاتی ہے۔(۴) عذاب کے دو رکرنے کی انسان جب کوشش کرتاہے توٹھوکریں کھاتاہے۔مگرجس پر ابتلاء آتا ہے اس کا فہم رساہو جاتا ہے اوروہ بات کو خوب سمجھنے لگ جاتاہے۔رسول کریم صلی اللہ علیہ وسلم کو ہی دیکھ لو۔کفار آپ کا کھوج لگاتے لگاتے غار ثور تک پہنچ گئے اور وہاں جاکرکھوجی نے کہہ دیا کہ یاتووہ آسمان پر چلا گیا ہے اوریایہیں ہے۔ان میں کھوجی کی بات کا بڑالحاظ کیاجاتاتھا اس لئے رسول کریم صلی اللہ علیہ وسلم کی جان اس وقت سخت خطرہ میں تھی۔مگررسول کریم صلی اللہ علیہ وسلم کوذرابھی گھبراہٹ نہ ہوئی۔بلکہ آپؐ نے حضرت ابوبکررضی اللہ عنہ کوبھی تسلی دینی شروع کردی اورفرمایاکہ لَاتَحْزَنْ اِنَّ اللّٰہَ مَعَنَا۔غم نہ کرو۔اللہ تعالیٰ ہمارے ساتھ ہے۔اسی طرح ایک دفعہ آپؐ سوئے ہوئے تھے کہ ایک کافرنے آپؐ کی تلوار اٹھالی اورآپ کو قتل کرناچاہا۔لیکن آپ ذرابھی نہ گھبرائے۔اوراس کے اس سوال پر کہ اب آپؐ کو کون بچاسکتاہے آپؐ نے نہایت تسلی سے جواب دیا کہ ’’ اللہ‘‘۔ا س غیر معمولی حالت اطمینان کودیکھ کر اس کافرپراس قدر دہشت طاری ہوئی کہ اس کے ہاتھ سے تلوار گرپڑی۔(۵)پانچواں فرق یہ ہے کہ ابتلاء میں انسان کو احساسِ بلاء نہیں ہوتا۔جب ابتلاء آتاہے تو انسان ان تکالیف کو حقیر سمجھتاہے او ران میں لذت محسوس کرتاہے کیونکہ اس کے دل میں یقین ہوتاہے کہ میں ادنیٰ چیز کو اعلیٰ پر قربان کررہاہوں۔مثلاًاس کامال جا تاہے توکہتاہے خداکے لئے ہی گیا ہے اس لئے کیاپرواہ ہے۔یااگر اس کا بیٹا مرجاتا ہے توکہتاہے خدا نے ہی دیاتھا اگر اس نے واپس لے لیا ہے توکیاغم ہے۔حضرت مسیح موعود علیہ الصلوٰۃ والسلام کاہی واقعہ ہے۔مبارک احمد سے آپ کو بڑی محبت تھی اوراس کی بیمار ی میں آپ نے بڑی تیمار داری کی۔اس سے حضرت خلیفہ اول رضی اللہ عنہ تک کو بھی یہ خیال تھا کہ اگرمبارک احمد فوت ہوگیاتو حضرت مسیح موعود علیہ السلام کو بڑاصدمہ ہوگا۔آخری وقت حضرت خلیفہ اول رضی اللہ عنہ اس کی نبض دیکھ رہے تھے کہ حضرت مسیح موعود علیہ السلام کوانہوں نے کہا مُشک لائیں اور چونکہ اس کی نبض بندہورہی تھی۔آپ پراس خیال کاکہ اس کی وفات سے حضرت مسیح موعود علیہ
السلام کو بہت صدمہ ہوگا اس قدر اثر ہواکہ آپ کھڑے کھڑے زمین پرگرگئے۔مگرجب حضرت مسیح موعود علیہ السلام کومعلوم ہواکہ مبارک احمد فوت ہوگیا ہے۔تواسی وقت نہایت صبر کے ساتھ دوستوں کو خط لکھنے لگ گئے کہ مبارک احمد فوت ہوگیا ہے۔مگراس امر پر گھبرانا نہیں چاہیے یہ اللہ تعالیٰ کی ایک مشیئت تھی جس پر ہمیں صبر کرناچاہیے اورپھر باہر آکر مسکرامسکراکر تقریر کرنے لگ گئے کہ مبار ک احمد کے متعلق خدا تعالیٰ کاجو الہام تھا وہ پوراہوگیا۔چنانچہ آپ کاایک شعر بھی ہے کہ ؎ بلانے والا ہے سب سے پیار ا اسی پہ اے دل توجاں فداکر غرض ابتلاء میں دکھ کااثر قلب پر ہمت شکن نہیں ہوتاکیونکہ انسان سمجھتاہے کہ میں ادنیٰ کو اعلیٰ پر قربان کررہاہوں۔بعض اوقات سخت عذاب میں بھی احسا سِ تکلیف مٹ جاتاہے۔مگر یہ اختلال حواس کی وجہ سے ہوتاہے۔ایک دفعہ حضرت خلیفہ اول رضی اللہ عنہ نے ایک عورت دکھائی اوراس سے پوچھا تمہارے فلاں رشتہ دار کاکیاحال ہے ؟ اس نے ہنس کربتایا کہ وہ تو مرگیاہے۔اسی طرح ایک دواوررشتہ داروں کے متعلق پوچھااوروہ ہنس ہنس کر بتاتی رہی۔اب وہ معرفت کے لحاظ سے اس طرح نہیں کرتی تھی۔بلکہ اس کو بیماری تھی اور اس میں غم محسوس کرنے کی حس ہی باقی نہیں رہی تھی۔(۶)چھٹافرق یہ ہے کہ عذاب میں روحانیت کم ہوجاتی ہے مگرابتلاء میں زیادہ ہوجاتی ہے۔کیونکہ عذاب میں خدا تعالیٰ سے دوری ہوجاتی ہے مگرابتلاء میں خدا تعالیٰ کی طرف اور زیادہ توجہ ہوجاتی ہے۔ابتلاء اور عذاب میںیہ چھ موٹے موٹے فرق ہیں جن کو یاد رکھناچاہیے۔اَوَلَیْسَ اللّٰہُ بِاَعْلَمَ بِمَافِیْ صُدُوْرِ الْعٰلَمِیْنَ میں بتایاکہ و ہ بزد ل لوگ جو مشکلات کے دورمیں مومنوں کاساتھ نہیں دیتے لیکن جب مصائب کے بادل چھٹ جاتے ہیں اورفتوحات کادورآجاتاہے تومومنوںکوآآکرکہتے ہیں کہ ہم بھی تمہارے ساتھ ہیں ہمیں بھی انعامات میں شریک کیاجائے۔کیاانہیں اتنا بھی معلوم نہیں کہ ایمان کاانعام تو خدا نے دینا ہے مسلمانوں نے نہیں دینا اگرانہیں دنیوی مال و دولت یاحکومتی عہدوں میںسے کوئی عہدہ مل بھی گیاتوکیاہوااصل انعام تواللہ تعالیٰ نے دینا ہے اوروہ تمہاری اس دھوکابازی کو خو ب جانتاہے اس لئے یہ چالاکیاں تمہارے کسی کام نہیں آسکتیں۔بلکہ حقیقت تویہ ہے کہ دنیا میں بھی ابھی کئی جھٹکے ایسے لگیں گے جن سے تمہاری اس منافقت کا پر دہ چاک ہوجائے گا۔چنانچہ فرمایا وَلَیَعْلَمَنَّ اللّٰہُ الَّذِیْنَ اٰمَنُوْاوَلَیَعْلَمَنَّ الْمُنٰفِقِیْنَ۔اللہ تعالیٰ متواتر ایسے ابتلاء پیداکرتاچلاجائے گا جن سے دنیا پر بھی ظاہر ہوجائے گا کہ کون سچامومن تھا اورکون منافق۔اورخودان
منافقوں پر بھی اپنے دعوٰئے ایمان کی حقیقت ظاہرہوجائے گی۔وَ قَالَ الَّذِيْنَ كَفَرُوْا لِلَّذِيْنَ اٰمَنُوا اتَّبِعُوْا سَبِيْلَنَا اورکافرمومنوں سے کہتے ہیں تم ہمارے پیچھے چلو۔ہم تمہارے گناہ اٹھالیں گے۔حالانکہ وہ ان کے گناہ وَ لْنَحْمِلْ خَطٰيٰكُمْ١ؕ وَ مَا هُمْ بِحٰمِلِيْنَ مِنْ خَطٰيٰهُمْ مِّنْ (بالکل )نہیں اٹھاسکتے۔و ہ یقیناًجھوٹے ہیں۔حقیقت یہ ہے کہ وہ اپنے بوجھ بھی اٹھائیں گے اوراپنے بوجھوں کے شَيْءٍ١ؕ اِنَّهُمْ لَكٰذِبُوْنَ۰۰۱۳وَ لَيَحْمِلُنَّ اَثْقَالَهُمْ وَ اَثْقَالًا سوااورلوگوں کے بوجھ بھی اٹھائیں گے (جن کو وہ دھوکادیتے ہیں)اورقیامت کے دن ان سے ان کے مَّعَ اَثْقَالِهِمْ١ٞ وَ لَيُسْـَٔلُنَّ يَوْمَ الْقِيٰمَةِ عَمَّا كَانُوْا يَفْتَرُوْنَؒ۰۰۱۴ اس افتراء کے بارہ میں سوال کیاجائے گا۔تفسیر۔فرمایا۔ایسے موقعہ پرمسلمانوں سے مایوس ہوکر کافر کہہ دیاکرتے ہیں کہ تم ہمارے رستہ پر چلو ہم تمہارے بوجھ اٹھالیں گے۔حالانکہ وہ اپنے مخاطبین کاذراسابوجھ بھی نہیں اٹھاسکتے وہ بالکل جھوٹے ہیں۔ہاں ان کی اس بے ہودہ گوئی کا نتیجہ یہ ضرور نکلے گا کہ وہ اپنے بوجھ بھی اٹھائیں گے اوراس کے علاوہ مزید سزابھی حاصل کریں گے اورقیامت کے دن ان سے پوچھاجائے گا کہ تم اتنا جھوٹ کیوں بولتے رہے۔یہ آیت بتاتی ہے کہ کفر انسان کی عقل پر ایسا پردہ ڈال دیتاہے کہ بڑے بڑے عقل مندکہلانے والے آدمی بھی ایسی باتیں کہنے لگ جاتے ہیں جوایک بچہ کے نزدیک بھی قابل ہنسی ہوتی ہیں۔مثلاً ایک طرف اس طبعی طریق کو دیکھو جوقرآن کریم نے اوپر کی آیات میں بیان فرمایا ہے کہ گناہوں سے بچنے کاصحیح طریق یہ ہے کہ انسان توبہ کرے لقائِ الٰہی کے حصول کی کوشش کرے اوراللہ تعالیٰ کے راستہ میں جہاد سے کام لے اور دوسری طرف اس غیر طبعی طریق کودیکھو جس کادعویٰ کفار کیاکرتے تھے بلکہ اب بھی کرتے ہیں تومعلوم ہوجائے گاکہ قرآن کریم کی باتیں نہایت سچی اور صحیح ہیں اور اس کے مخالفوں کی باتیں نہایت بودی اورکچی ہیں۔کفار کا یہ دعویٰ کہ اگرمومن ان کی با ت مان کر کافرہوجائیں تو وہ ان کابوجھ اٹھالیں گے بالکل خلاف عقل ہے۔حقیقت یہ ہے کہ کوئی کسی کابوجھ نہیں اٹھاسکتا۔نہ
مومن کافر کا نہ کافرمومن کا۔بو جھ تو اللہ تعالیٰ معاف کرکے اٹھاتاہے اوراسی کے حقیقی ذریعہ کانام توبہ ہے۔غرض اسلام جو ایک فطرتی مذہب ہے و ہ گنہگارکے لئے توبہ کادروازہ کھو لتاہے اوراسے لقاء الٰہی کی امید دلاتاہے مگرغیر مذاہب اس فطری طریق کے خلاف قد م اٹھاتے ہیں۔مثلاً عیسائیت لوگوں کو یہ ترغیب دیتی ہے کہ اگروہ یسوع مسیح پر ایمان لے آئیں تومحض ا س ایمان کی برکت سے ہی ان کے تمام گناہ معاف ہوجائیں گے۔عیسائیت اس بارے میں یہ نظریہ پیش کرتی ہے کہ شیطان نے آدمؑ اوراس کی بیوی حواکو ورغلایااور گنہگار کردیا۔جس کانتیجہ یہ ہواکہ اب ہرشخص جودنیا میں پیدا ہوتاہے وہ گناہ کا ورثہ لے کر آتا ہے اور چونکہ خدا تعالیٰ عادل ہے اوراس کے عدل کاتقاضاہے کہ ہرگنہگار کوسزادے اس لئے آدمؑ و حواکے گناہ کی وجہ سے دنیا کاہرشخص سزاکا مستحق ہے۔مگردوسری طر ف خدا تعالیٰ کارحم تقاضاکرتاہے کہ وہ گنہگاروں کو معاف کردے سواس مشکل کے حل کے لئے اس نے اپنے اکلوتے بیٹے کو دنیا میں بھیجا تاکہ وہ بے گناہ ہو کرصلیب پرلٹکایاجائے اورسچاہوکر جھوٹاقرار پائے۔چنانچہ وہ مسیح کی شکل میں دنیامیں ظاہر ہوااوریہود نے اسے بلاکسی گناہ کے صلیب پر لٹکادیا اوروہ تما م ایمان لانے والوں کے گناہ اٹھاکر ان کی نجات کاموجب ہوا۔یہ نظریہ جوعیسائیت پیش کرتی ہے۔اس قد رخلافِ عقل ہے کہ اس پر جتنابھی غورکیاجائے اتنا ہی انسان حیران ہو جاتا ہے اور اسے تعجب آتاہے کہ یہ گناہوں کی معافی کی کونسی صورت ہے۔اگرگناہ گارکے گناہ کومعاف کرنا عدل کے خلاف ہے توبے گناہ کو سزادینا بھی توعدل کے خلاف ہے۔پھر یہ کس طرح ہواکہ خداکے بیٹے نے دوسروں کے گناہ اپنے سر پرلے لئے اورخدا نے اس بے گناہ کو پکڑ کر سزادے دی؟پھر عقلاً بھی یہ بالکل غلط بات ہے کہ باپ جوکچھ کرے بیٹے کو اس کا ضرورورثہ ملتاہے۔اگرایساہوتاتوجاہل ماں باپ کے لڑکے ہمیشہ جاہل رہتے اور عالموں کے عالم۔مسلول ماں باپ کے بچے ہمیشہ مسلول نہیں ہوتے نہ کوڑھیوں کے بچے ہمیشہ کوڑھی ہوتے ہیں۔بعض باتوں میں ورثہ ہے اوربعض میں نہیں۔اورجہاں ورثہ ہے وہاں بھی خدا تعالیٰ نے ورثہ سے بچنے کے سامان پیداکئے ہیں۔اگرورثہ سے بچنے کے سامان نہ ہوتے توتبلیغ اور تعلیم کامقصد کیارہ جاتا۔کافروں کے بچوں کاایمان لے آنابتاتاہے کہ ایمان کے معاملہ میں خدا تعالیٰ نے ورثہ کاقانون جاری نہیں کیا اگراس میں بھی ورثہ کاقانون جاری ہوتا تومسیح کی آمد ہی بے کار ہوجاتی۔اسلام کہتا ہے کہ خدا تعالیٰ نے انسان کونیک طاقتیں دےکر پیدا کیاہے۔پھر بعض انسان ان حالتوں کو ترقی دیتے ہیں اور کامیاب ہوجاتے ہیں۔اوربعض ان کو پائوں تلے روند دیتے ہیںاورنامراد ہوجاتے ہیں۔قانونِ شریعت بے شک سب کاسب قابل عمل ہے لیکن نجات کی بنیاد عمل پر نہیں بلکہ ایمان پر ہے جو فضل کو جذب کرتاہے۔عمل اس کی تکمیل کا ذریعہ ہے اورنہایت ضروری ہے۔لیکن پھر بھی وہ تکمیل
کاذریعہ ہے اورذریعہ کی کمی سے چیز کافقدان نہیں ہوتا۔بیج سے درخت پیدا ہوتاہے۔لیکن پانی سے وہ بڑھتاہے۔ایمان بیج ہے اور عمل پانی جو اسے اوپر اٹھاتاہے۔خالی پانی سے درخت نہیں اگ سکتا لیکن بیج ناقص ہو اورپانی میں کسی قد رکمی ہوجائے تب بھی کسی قدر درخت اگ آتاہے۔کسان ہمیشہ پانی دینے میں غلطیاں کرجاتے ہیں لیکن اس سے کھیت مارے نہیں جاتے جب تک بہت زیادہ غلطی نہ ہوجائے۔انسانی عمل ایمان کو تازہ کرتاہے۔اوراس کی کمی اس میں نقص پیداکرتی ہے۔لیکن اس کی ایسی کمی جوشرارت او ربغاوت کارنگ نہ رکھتی ہو اورحد سے بڑھنے والی نہ ہو ایمان کی کھیتی کوتباہ نہیں کرسکتی اوراگرشرارت اور بغاوت بھی ہو تو خدا کاعدل توبہ کے راستہ میں روک نہیں۔عدل اس کونہیں کہتے کہ ضرو ر سزادی جائے بلکہ اس کوکہتے ہیں کہ بے گناہ کوسزانہ دی جائے۔پس گنہگار کو رحم کرکے بخشنا اللہ تعالیٰ کی صفت عدل کے مخالف نہیں بلکہ عین مطابق ہے۔اگرعدل کے معنے یہ ہوں کہ ہر عمل کی عمل کے برابرجزاملے توبخشش اورنجات کے معنے کیا ہوئے؟کیونکہ عدل کے معنے برابر کے ہیں اوراگریہ صحیح ہوتوکسی شخص کو اس کی عمر کے برابر ایام کے لئے ہی نجات دی جاسکتی ہے اوروہ بھی اس کے اعمال کے وزن کے برابر۔مگراسے کوئی بھی تسلیم نہیں کرتا۔پھر نہ معلوم خدا تعالیٰ کی رحمت کو اس مسئلہ سے کیوں محدود کیا جاتا ہے۔اسلام بتاتاہے کہ خدا تعالیٰ مالک ہے اورمالک کے لئے انعام اوربخشش میں کوئی حدبندی نہیں۔و ہ بے شک وزن کرتاہے لیکن اس کاوزن اس لئے ہوتاہے کہ کسی کو اس کے حق سے کم نہ ملے۔نہ اس لئے کہ اس کے حق سے زیادہ نہ ملے۔مسیح بے شک بے گناہ انسان اور خدا کارسول تھا۔لیکن یہ کہنا درست نہیں کہ وہ دوسروں کابوجھ اٹھالے گا۔قیامت کے دن ہر شخص کو اپنی صلیب خود ہی اٹھانی ہو گی۔اورجو خود اپنی صلیب نہ اٹھاسکے گا وہ نجات بھی نہ پاسکے گا۔سوائے اس کے کہ خداکے فضل کے ماتحت اس کی بخشش ہو اورخدا تعالیٰ خود کسی کابو جھ اٹھالے۔حضرت مسیح ؑ نے بھی انجیل میں یہی نظر یہ پیش کیاہے چنانچہ آپ فرماتے ہیں:۔’’ جوکوئی اپنی صلیب اٹھا کر میرے پیچھے نہیں آتا میرے لائق نہیں ہے۔‘‘(متی باب ۱۰ آیت ۳۸) حضرت مسیح ؑ کے یہ الفاظ بتاتے ہیں کہ عیسائیوں کا یہ کہنا کہ مسیح نے گناہگاروں کابوجھ اٹھالیا ہے بالکل غلط ہے۔ہرشخص کو اپنا بوجھ خود اٹھاناپڑے گا اوراپنی صلیب آپ اٹھانی پڑے گی۔
وَ لَقَدْ اَرْسَلْنَا نُوْحًا اِلٰى قَوْمِهٖ فَلَبِثَ فِيْهِمْ اَلْفَ سَنَةٍ اورہم نے نوح کو اس کی قوم کی طرف بھیجاتھا۔پس وہ ا ن میں نوسوپچاس سا ل تک رہا۔سواس کی قو م اِلَّا خَمْسِيْنَ عَامًا١ؕ فَاَخَذَهُمُ الطُّوْفَانُ وَ هُمْ ظٰلِمُوْنَ۰۰۱۵ کے لوگوں کوطوفان نے آلیا اوروہ ظالم تھے۔تفسیر۔اس آیت میں حضرت نوح علیہ السلام کا ذکرکیاگیاہے حالانکہ پہلی آیات میں حضرت نوح علیہ السلام کی قوم کاکوئی ذکر نہیں بلکہ صرف مسلمانوں کا ذکر ہے اورکہا گیا ہے کہ کیا وہ خیال کرتے ہیں کہ ان کو کسی فتنہ میں نہیں ڈالاجائے گا اوریوں ہی چھوڑ دیاجائے گا۔پس سوال پیدا ہوتاہے کہ مسلمانوں کا ذکر کرنے کے بعد نوح ؑ کا ذکر کیوں کیاگیا۔سویاد رکھناچاہیے کہ نوح ؑ کی قوم کا اس لئے ذکر شروع کیا گیا ہے کہ اللہ تعالیٰ نے فرمایا تھا کہ فتنہ میں ڈالنے کاطریق قدیم سے چلاآتاہے۔اورنوح ؑ شرعی نبیوں میں سے سب سے پہلے نبی ہیں یاکم سے کم حضرت آدم ؑ کے بعد دوسرے۔پس اس وقت سے لے کر اگربعد کے چند نبیوں کا ذکر ہوجائے تومومنوں کوآزمائش میں ڈالنے کاجو ذکرتھااس کی تصدیق ہوجاتی ہے۔پس نوح ؑ کے ذکرسے مومنوں کے ابتلائو ںکی کڑ ی کا ذکر کیاگیاہے۔ا س آیت میں جو یہ ذکر آتاہے کہ لَبِثَ فِیْھِمْ اَلْفَ سَنَۃٍ اِلَّاخَمْسِیْنَ عَامًا نوح ؑ اپنی قو م میں ساڑھے نوسوسال رہے اس کے یہ معنے نہیں کہ حضرت نوح ؑ کی عمر ساڑھے نوسو سال تھی۔بلکہ اس رہنے کے معنے روحانی رہنے کے ہیں۔یعنی نوح ؑ کی تعلیم اپنی قوم میں ساڑھے نوسوسال تک رہی پھر مٹ گئی۔فَاَنْجَيْنٰهُ وَ اَصْحٰبَ السَّفِيْنَةِ وَ جَعَلْنٰهَاۤ پس ہم نے اس کواوراس کی کشتی میں بیٹھنے والے ساتھیوںکونجات دی اورہم نے اس واقعہ کو تمام جہان کے اٰيَةً لِّلْعٰلَمِيْنَ۰۰۱۶ لوگوں کے لئے ایک نشان بنادیا۔تفسیر۔اس جگہ ان ابتلائوںکا ذکر ہے جو حضرت نوح علیہ السلام کی جماعت کو پیش آئے۔اوربتایاگیا
ہے کہ نوح ؑ اوراس کے ماننے والوں کو لوگو ں نے بڑی تکلیف دی۔یہاں تک کہ ان سب کو ایک کشتی کے ذریعہ اپناملک چھوڑنا پڑا۔اوروہ کشتی آئندہ آنے والی نسلوں کے لئے خدا تعالیٰ کاایک نشان قرار پائی۔چنانچہ آج تک اس کشتی پر بحث ہورہی ہے۔اورمحکمہ آثارِ قدیمہ کے لوگ کبھی اس کشتی کے آثار آرمینیا میں دیکھتے ہیں۔اور کبھی روس میں۔حالانکہ بالکل ممکن ہے کہ چونکہ ہررسول کو دوسرے رسول کاقائمقام قرار دیاجاتاہے۔بہت سے نبیوں کے مخالفین پر نوح ؑ کے زمانہ کے سے عذاب آئے ہوںاور کئی نبیوں کو کشتی کے ذریعہ سے بچناپڑاہو۔جیساکہ حضرت یونسؑ کامشہورواقعہ ہے۔پس ممکن ہے ایک کشتی نہ ہوبلکہ بہت سی کشتیاں ہو ں جواپنے اپنے زمانہ میں خدا تعالیٰ کا نشان بنی ہوں۔جیساکہ حضرت موسیٰ علیہ السلام کو بھی مصر چھوڑنا پڑا اورمحمد رسول اللہ صلی اللہ علیہ وسلم کو بھی مکہ چھوڑ نا پڑا۔اسی طرح معلوم ہوتاہے مختلف ملک اور مختلف قومیں تھیں جن پر نوح ؑ کے زمانہ کے سے عذاب آئے۔مگربعد کے لوگوں نے غلطی سے سب کوایک سمجھ لیا۔وَ اِبْرٰهِيْمَ اِذْ قَالَ لِقَوْمِهِ اعْبُدُوا اللّٰهَ وَ اتَّقُوْهُ١ؕ ذٰلِكُمْ اور(ہم نے )ابراہیم(کوبھی رسول بناکر بھیجاتھا)جب ا س نے اپنی قوم سے کہا تھا کہ اللہ (تعالیٰ) کی عبادت کرو خَيْرٌ لَّكُمْ اِنْ كُنْتُمْ تَعْلَمُوْنَ۰۰۱۷ اوراس کا تقویٰ اختیار کرو۔اگرتم جانتے ہو تویہ تمہارے لئے بہت اچھا ہے۔تفسیر۔حضرت نوح علیہ السلام کے بعد اللہ تعالیٰ حضرت ابراہیم علیہ السلام کا ذکر فرماتا ہے کیونکہ حضرت ابراہیم علیہ السلام بھی حضرت نوح علیہ السلام کی امت میں سے ہی تھے۔چنانچہ اللہ تعالیٰ ایک دوسرے مقام پر اس حقیقت کاان الفاظ میںاظہار فرماتا ہے کہ وَاِنَّ مِنْ شِیْعَتِہٖ لَاِبْرَاھِیْمَ (الصفّٰت : ۸۴)یعنی حضرت ابراہیم علیہ السلام حضرت نوح علیہ السلام کے متبعین میں سے تھے۔پس اس مناسبت کی وجہ سے حضرت نوح علیہ السلام کے بعد حضرت ابراہیم علیہ السلام کا ذکرکیاگیا۔اس سے معلوم ہوتاہے کہ حضرت نوح علیہ السلام کا زمانہ حضرت ابراہیم علیہ السلام کے زمانہ تک ممتد ہوا۔پس حضرت نوح علیہ السلام کی ساڑھے نوسوسال کی عمر سے یہ مراد نہیں کہ ان کو ساڑھے نوسوسال کی جسمانی زندگی ملی۔بلکہ مراد یہ ہے کہ ساڑھے نوسوسال تک جوحضرت ابراہیمؑ او رحضرت موسیٰ ؑ تک ممتد ہوتے تھے حضرت نوح ؑ کی تعلیم اورتلقین لوگوں کے لئے مشعل راہ بنی رہی اوراس طرح و ہ روحانی رنگ میں
ساڑھے نوسوسال تک زندہ رہے۔اِنَّمَا تَعْبُدُوْنَ مِنْ دُوْنِ اللّٰهِ اَوْثَانًا وَّ تَخْلُقُوْنَ اِفْكًا١ؕ تم اللہ (تعالیٰ) کے سوا(دوسری ہستیوں کی )عبادت کرتے ہو۔اورمذہب کے بارے میں اِنَّ الَّذِيْنَ تَعْبُدُوْنَ مِنْ دُوْنِ اللّٰهِ لَا يَمْلِكُوْنَ لَكُمْ جھوٹی باتیں بناتے ہو۔وہ (ہستیاں )جن کی تم اللہ(تعالیٰ)کے سواپرستش کرتے ہو تمہیں رزق رِزْقًا فَابْتَغُوْا عِنْدَ اللّٰهِ الرِّزْقَ وَ اعْبُدُوْهُ وَ اشْكُرُوْا لَهٗ١ؕ نہیں دے سکتیں۔پس اللہ (تعالیٰ)سے اپنا رزق مانگو۔اوراس کی عبادت کرو۔اوراس کاشکراداکرو۔اِلَيْهِ تُرْجَعُوْنَ۰۰۱۸ تم کو اسی کی طرف لوٹاکرلے جایاجائے گا۔تفسیر۔حضرت ابراہیم علیہ السلام جس زمانہ میں مبعوث ہوئے اس زمانہ کے لوگوں میں بھی شرک پایاجاتاتھا۔جس کومٹانے کے لئے آپ کو بہت بڑاجہاد کرنا پڑا۔اس میں کوئی شبہ نہیں کہ حضرت نوح علیہ السلام کے زمانہ میں بھی شرک پیداہوچکاتھا۔لیکن چونکہ وہ دورصفات الٰہیہ کے احساس کاابتدائی دو رتھا اس لئے شرک بھی صرف بسیط شکل میں تھا۔یعنی بعض لوگ اپنے بزرگوں کے مجسمے پوجنے لگ گئے تھے یابعض نے کو ئی اورسادہ قسم کا شرک اختیار کرلیاتھا۔مگرحضرت ابراہیم علیہ السلام کے زمانہ میں شرک ایک فلسفیانہ مضمون بن گیا تھا۔اوراب عقلو ں پر فلسفہ کا غلبہ شروع ہوگیاتھا اوراس کے ساتھ ہی توحید کی باریک راہیں بھی نکل آئی تھیں جن پرعمل کرنا صرف توحید کے موٹے موٹے مسائل پرعمل کرنے سے بہت مشکل تھا۔اس کی ایسی ہی مثال ہے جیسے بت پرستی دنیا میں آج بھی موجود ہے مگرآج جب بت پرستوں کو کہا جاتاہے کہ تم کیوں بت پرستی کرتے ہو تووہ کہتے ہیں ہم توکوئی بت پر ستی نہیں کرتے ہم توصرف اپنی توجہ کے اجتماع کے لئے ایک بت سامنے رکھ لیتے ہیں۔گویاشرک تو وہی ہے جو پہلے تھا مگراب شرک کو ایک نیا رنگ دے دیاگیا ہے۔اسی طرح حضرت ابراہیم ؑ کے زمانہ میں شرک کو ایک نیا رنگ دے دیاگیاتھا۔
یہی وجہ ہے کہ حضرت ابراہیم علیہ السلام نے اپنی قو م کو صرف یہی نصیحت نہیں فرمائی کہ اِنَّمَا تَعْبُدُوْنَ مِنْ دُوْنِ اللّٰہِ اَوْثَانًاوَّ تَخْلُقُوْنَ اِفْکًا کہ تم خدا کو چھوڑ کر بتوں کی پرستش کرتے ہو اورخدا تعالیٰ پر ان کے بارہ میں افتراء کرتے ہو۔بلکہ آپ نے یہ بھی فرمایا کہ اِنَّ الَّذِیْنَ تَعْبُدُوْنَ مِنْ دُوْنِ اللّٰہِ لَایَمْلِکُوْنَ لَکُمْ رِزْقًافَابْتَغُوْاعِنْدَ اللّٰہِ الرِّزْقَ وَاعْبُدُوْہُ وَاشْکُرُوْالَہٗ اِلَیْہِ تُرْجَعُوْنَ۔یعنی وہ ہستیاں جن کی تم اللہ تعالیٰ کے سواپرستش کرتے ہو تمہیں رزق نہیں دے سکتیں۔پس اللہ تعالیٰ سے اپنا رزق مانگو۔اوراس کی عبادت کرو اوراس کاشکراداکرو۔تم کو اسی کی طرف لوٹاکرلے جایا جائے گا۔اس سے ظاہر ہے کہ حضرت ابراہیم علیہ السلام نے انہیں پانچ امورکی طرف توجہ دلائی تھی۔اول اس امر کی طرف کہ معبودانِ باطلہ جن کی تم پرستش کرتے ہو ان کے متعلق تمہارایہ خیال بالکل غلط ہے کہ وہ تمہاری حاجت روائی کرتے یا مشکلات میں تمہارے کام آتے ہیں۔ان میں نہ توکسی کو ایک ذرّہ بھر نفع پہنچانے کی طاقت ہے اورنہ وہ کسی کو ایک ذرّہ بھر نقصان پہنچاسکتے ہیں۔دوم۔ہرقسم کارزق اللہ تعالی کے ہاتھ میں ہے۔اس لئے تم اسی سے مانگوجوتمام خیر و برکت کا منبع ہے۔اور جس کے ہاتھ میں تمام نعمتوں کے ذخائر ہیں۔سوم۔عبادت بھی اللہ تعالیٰ ہی کی بجالائو۔کسی اَور کو قابل پرستش نہ سمجھو۔چہارم۔ان نعمتوں پر جو خدا تعالیٰ کی طرف سے تمہیں عطا کی گئی ہیںاس کاشکر بجالائو۔اوران کی قدروقیمت کااحساس اپنے اندرپیداکرو۔پنجم۔تم مرنے کے بعد پھر زندہ ہوکر خدا تعالیٰ کے حضور حاضر ہونے والے ہو اس لئے ایسے اعمال بجالائو جوتمہیںخدا تعالیٰ کی خوشنودی کامستحق بناسکیں۔یہ امو ربتاتے ہیں کہ حضر ت ابراہیم علیہ السلام نے انہیں صرف بتوں کی پرستش سے نہیں روکا بلکہ اس فلسفہ کابھی ردّکیا ہے جو اس بت پرستی کے پیچھے اس زمانہ میں کام کررہاتھا۔اورانہیں بتایاہے کہ پتھرکے بے جان بتوںنے تمہیں کیاد یناہے۔تم اگرکچھ لینا چاہتے ہو تواللہ تعالیٰ سے مانگوجواپنے اندر تمام طاقتیں رکھتاہے۔پھر حضرت ابراہیم علیہ السلام نے اپنی قوم کوصرف یہ نصیحت ہی نہیں کی کہ فَابْتَغُوْا عِنْدَ اللّٰهِ الرِّزْقَ بلکہ آپ نے اپنا عملی نمونہ ان کے سامنے اس طرح پیش کیاکہ جب آپ کو خدا تعالیٰ نے کہا کہ جااوراپنے بچے اسمٰعیلؑ اوراس کی ماں ہاجرہؑ کوایک وادی غیرذی ذرع میں چھو ڑآتوانہوں نے یہ نہیں سوچاکہ وہاں ان کے کھانے پینے اوررہنے کاکیاانتظام ہوگا۔بلکہ وہ گئے اورہاجرہؑ اوراسمٰعیلؑ کوایک بے آب و گیاہ جنگل میں چھو ڑکرچلے آئے۔کیونکہ انہیں
یقین تھا کہ جو خداانہیں گھر پررزق دیتارہاہے وہ انہیں اس جنگل میں بھی رزق عطافرمائے گا۔پھر فَابْتَغُوْا عِنْدَ اللّٰهِ الرِّزْقَ فرماکر حضرت ابراہیم علیہ السلام نے انہیں اس امر کی طرف بھی توجہ دلائی کہ اللہ تعالیٰ نے جو تمہیں سامان عطاکئے ہوئے ہیںان سے کام لوپھر تم دیکھو گے کہ کس طرح تمہاری تمام ضرورتیں پوری ہوتی چلی جاتی ہیں۔حقیقت یہ ہے کہ دنیا میں انسان کچھ دولتیں کماتاہے اور کچھ دولتیں انسان کوخدا تعالیٰ کی طرف سے ملی ہوئی ہوتی ہیں۔جودولتیں انسان دنیا میں کماتاہے وہ کسی انسان کے پاس زیادہ ہوتی ہیں کسی کے پاس کم ہوتی ہیں اور کسی کے پاس ہوتی ہی نہیں۔مثلاً زمین بھی دولت ہے لیکن دنیا کے سب لوگ زمیندار نہیں۔کسی کے پاس زمین بہت زیادہ ہے کسی کے پاس بہت کم زمین ہے اور کسی کے پاس زمین ہے ہی نہیں۔تجارتیں ہیں ان کابھی یہی حال ہے۔کوئی پھیری کرکے گذار ہ کرتاہے اور کوئی بڑے بڑے کارخانوں کامالک ہے۔بینکنگ کابھی یہی حال ہے۔مالی لحاظ سے کسی کے پاس پانچ سات روپے ہوتے ہیں تو وہ اپنے آپ کومالدار سمجھتاہے اور کسی کے پاس کروڑوں روپے ہوتے ہیں اورپھر بھی وہ اورمال حاصل کرنے کی کوشش کرتارہتاہے امریکہ میں بعض لوگوں کی سالانہ آمد کروڑوں ڈالر ہے ان کوبھی مالدار کہتے ہیں۔اورغرباء کے علاقہ میں اگرکسی کے پاس سودوسوروپیہ آجاتاہے تولوگ کہتے ہیں یہ شخص بہت مالدارہے۔غرض وہ دولت جوانسان کماتاہے اورجو ظاہر میں نظر آتی ہے سب کو یکساں طور پر نہیں ملی۔کیونکہ اس کے لئے محنت اور جدوجہد کرنی پڑتی ہے۔اوراسی وجہ سے انسانوں میں بہت بڑا تفاوت پایا جاتا ہے۔یہ تفاوت کبھی قانون کے طور پر ہوتاہے جیسے جو شخص زیادہ محنت کرتاہے زیادہ کمالیتا ہے۔اور کبھی استثناء کے طورپر ہوتاہے۔جیسے ماں باپ مالدار ہوں توان کا بیٹابغیر کسی محنت کے مالدار بن جاتاہے۔لیکن ایک دوسری قسم کی دولت بھی انسان کو ملتی ہے جو حقیقتاً بہت زیاد ہ قیمتی ہوتی ہے۔مگرافسوس ہے کہ انسان اس کی قدر نہیں کرتے۔حالانکہ وہی دولت اصل دولت ہے۔اور پھر وہ ایسی دولت ہے جو تمام انسانوں کو یکساں طور پر اللہ تعالیٰ کی طرف سے عطا کی گئی ہےاور وہ دولت ہےحافظہ کی۔فکر کی۔ذہانت کی۔عقل کی۔تدبّر کی۔یہ دولت ہرایک انسان کوملی ہے سوائے پاگل اور فاترالعقل کے اوریہ چیز بطور استثناء کے ہے و رنہ جو انسان بھی اس دنیا میں پیدا ہوتا ہے۔اسے اللہ تعالیٰ کی طرف سے یہ خزانہ دے کر بھیجاجاتاہے۔اسے پیدائش کے ساتھ ہی حافظہ اورذہانت او رفکر اورتدبّر کی قوتیں عطا کی جاتی ہیں۔اگربعد میں وہ ان کی ناقدری کرتاہے تویہ قوتیں کلّی طور پر یاجزوی طور پرضائع ہوجاتی ہیں۔مثلاً اگروہ آنکھوںکواستعمال نہیں کرتا تووہ اندھاہو جاتا ہے۔پائوں سے نہیں چلتاتو پائوں شل ہوجاتے ہیں۔ہاتھ سے کام نہیں لیتا تو ہاتھ شل ہوجاتے ہیں۔اسی طرح اگر وہ جسم کے دوسرے اعضاء کو استعمال نہیں کرتا
تواس کی جسمانی طاقتیں ضائع ہوجاتی ہیں۔اورجوشخص ان کی قدرکرتاہے اس کی قوتیں بڑھ جاتی ہیں۔مثلاً اگر کوئی شخص محنت کرتاہے اوراپنے اسباق کویاد کرتا ہے توا س کاحافظہ تیز ہو جاتا ہے۔اورجومحنت نہیں کرتا اوراپنے اسباق کویاد نہیں کرتا اس کاحافظہ کمزورہو جاتا ہے۔پھر جولوگ بات کوسمجھنے کی کوشش کرتے ہیں ان کی استبناط کی قوت بڑھ جاتی ہے اورجولوگ بات کوسمجھنے کی کوشش نہیں کرتے ان کی استنباط کی قوت جاتی رہتی ہے۔جولوگ اپنے اردگرد کے ماحول پرغورکرنے کی عادت ڈال لیتے ہیں ان کی قوت فکر بڑھ جاتی ہے اور جنہیں اپنے ماحول پر غورکرنے کی عادت نہیں ہوتی ان کی قوت فکر جاتی رہتی ہے پھرجولوگ اپنے مختلف جذبات کو اپنی اپنی حد کے اندرقائم رکھنے کی کوشش کرتے ہیں ان کی عقل ترقی کرتی ہے اورجوایسانہیں کرتے۔ان کی عقل ماری جاتی ہے۔جولوگ خداداد سامانوں کو صحیح طور پر اورمناسب موقعہ پراستعمال کرنے کی سکیم بنالیتے ہیں ان کی قوتِ مدبّرہ ترقی کرتی ہے او رجواس قسم کی سکیم نہیں بناتے ان کی قوت مدبرہ جاتی رہتی ہے۔لیکن پیدائش کے وقت یہ سب قوتیں ہرانسان کو ملتی اور قریباً برابرملتی ہیں۔بعد میں ناقدری کی وجہ سے یہ قوتیں کم ہوجائیں تویہ اَوربات ہے۔یاماں باپ نے جس قسم کامعاملہ کیاہواس کے مطابق یہ قوتیں کم یازیاد ہ ہوجاتی ہیں۔مثلاً ایام طفولیت میں اگرماں باپ نے بچہ کی صحیح نگرانی نہیں کی۔یاماں نے حمل کے دوران میں پور ی احتیاط نہیں کی تواس سے بچہ کی قوتوں پر اثر پڑ سکتاہے لیکن اس امر کو مستثنٰی کرتے ہوئے اگرانسانوں کوبحیثیت مجموعی دیکھاجائے توکروڑوں کروڑ لوگ ایسے نکلیں گے جوان خداداد قوتوںسے مالامال ہوں گے۔لیکن ظاہری لحاظ سے یہ صورت نہیں۔اگرتمام انسانوں کی مالی حالت کااندازہ لگایاجائے توظاہری مالدار اس دنیا میں دس پندرہ لاکھ سے زیادہ نہ ہوںگے۔اس وقت دنیا کی آبادی اڑھائی ارب ہے اگر ظاہر ی دولت رکھنے والے پندر ہ لاکھ ہوں اوردنیا کی آبادی پندرہ کروڑ ہوتی توان کی نسبت کروڑ میں سے ایک لاکھ ہوتی۔لیکن دنیا کی آبادی اڑھائی ارب ہے جس کے معنے یہ ہیں کہ قریباًسترہ سو(۱۷۰۰)میں سے ایک شخص ایساہے جس کے پاس ظاہری دولت ہے۔لیکن حافظہ ذہانت تدبّر اور فکر کی دولت ۱۷۰۰میں سے ۱۶۸۰کے پاس ہوگی صرف بیس اشخاص ایسے نکلیں گے جن کی یہ طاقتیں مائو ف ہوںگی۔باقی سب لوگوں کے پاس یہ دولت موجود ہوگی۔ہاں عدمِ استعمال کی وجہ سے ان پر زنگ لگ جائے تواَوربات ہے۔جیسے اگر کوئی چاقو بارش میں پھینک دیاجائے تواس پر زنگ لگ جائے گا۔لیکن اگر اسے پانی میں سے اٹھا کر صاف کیا جائے تووہ ویساہی صاف نکل آئے گاجیسے پہلے تھا۔لیکن سب سے زیادہ بے قدر ی اسی دولت کی کی جاتی ہے جواللہ تعالیٰ کی طرف سے ہرانسان کو عطا کی گئی ہے اگرکسی شخص سے دریافت کیاجائے کہ تمہارے پاس کیاکیامال ہے تووہ کہے گا۔میرے پاس اتنی زمین
ہے۔مکان ہے۔بھینس ہے۔گھوڑاہے لیکن وہ دولت جو سب سے بڑی ہے یعنی ہواہے۔پانی ہے۔جواسے نہ ملے تومرجائے اس کا ذکر تک نہیں کرے گا۔بھینس اورگھوڑاضائع ہوجائے توانسان نہیں مرے گا۔کپڑوں کا ایک حصہ ضائع ہوجائے تووہ موسم کی برداشت کرلے گا۔لیکن اگر ہوانہ ملے تو چند منٹ میں ہی مرجائے اگرپانی نہ ملے تو وہ ایک دن یااس سے کچھ زائدعرصہ میں مرجائے گا۔غرض انسان سب سے بڑی دولت کو گنے گاہی نہیں حالانکہ اگریہ دولت اسے نہ ملے تو اس کازندہ رہنا ناممکن ہے۔وہ کبھی آنکھوں کانوں ناک اور زبان کانام نہیں لے گا۔حالانکہ وہ یہ نہیں جانتاکہ اگر وہ کہتاہے کہ میرے پاس گُڑ ہے تووہ گڑ کس کام کاجب زبان نہ ہوگی۔اگرزبان گڑ کونہ چکھتی توانسان کے نزدیک گڑ اور پھیکا برابر ہوتا یامثلاً وہ کہتاہے میری بیوی اور بچے خوبصورت ہیں لیکن اس کویہ خیال نہیں آئے گا کہ اگراس کی آنکھیں ہی نہ ہوں تواسے وہ خوبصورت کیسے معلوم ہوں۔غرض دولت کے جوحقیقی خزانے ہیں انسان ان کی قدر نہیں کرتا اور جودولتیں نسبتی ہیں اوربالواسطہ ملتی ہیں ان کے پیچھے ہروقت پڑارہتاہے۔مثلاً کپڑاہے۔اگرکپڑامیرے جسم کو نرم اور ملائم معلوم ہوتاہے تواس کی قیمت ہے لیکن اگر میراجسم کپڑے کی ملائمت محسوس نہیں کرتا تواس کی کوئی قیمت نہیں۔پھر اگر اس کی کوئی قیمت ہے تواس لئے کہ میرے ملنے والے دوستوںکو اچھا لگے۔اورانہیں لذت محسوس ہو۔اگرمیرے دوست کی آنکھیں ہی نہ ہوں اورمیری حس موجود نہ ہوتو چاہے وہ کپڑالاکھ روپے گزکاہو یاچند آنے کا مجھے اس کاکیافائدہ۔پھر زبان او رمعدہ ہیں۔یہ دونوں مل کر کھانے کی قیمت بناتے ہیں اگر کوئی دودھ پئے۔مکھن کھائے۔لسی پئیے یاپلائو اور زردہ کھائے۔لیکن اس کی زبان نہ ہوتویہ چیز یں کچھ بھی نہیں۔غرض ہمارے سب کپڑوں اورکھانوں کی قدر ان نعمتوں کی وجہ سے ہے جوخدا تعالیٰ نے عطا کی ہیں۔اگرتم اپنی آنکھیں نکال دو۔یاجسمانی حس ماردو توخوبصور ت اورردّی کپڑوں میں تمہیں کوئی فرق معلوم نہیں ہوگا۔چاہے کپڑالاکھ روپے گز ہو یا چارآنہ گز۔تمہارے لئے دونوں برابر ہوں گے۔پس اللہ تعالیٰ نے جونعمتیں دی ہیں وہ بہت زیادہ قیمتی ہیں مگرافسوس ہے کہ لوگ ان سے کام نہیں لیتے۔حضرت ابراہیم علیہ السلام نے اپنی قوم کواسی طرف توجہ دلائی ہے کہ تم اپنی طاقتوں کو کیوں ضائع کرتے ہو۔تم خدا تعالیٰ کی نعمتوں کی قدر کرو اوران سے فائدہ اٹھائو اوراللہ تعالیٰ کے بنائے ہوئے قانون کے مطابق رزق حاصل کرنے کی کوشش کرو۔ان معنوں کے لحاظ سے یہاں عِنْدَاللّٰہِ کے الفاظ کااستعمال ویساہی ہے جیسے سورئہ نور میں اللہ تعالیٰ فرماتا ہے کہ جو لوگ بدکاری کاالزام لگانے کے بعد چار عینی گواہ نہ لائیں فَاُولٰٓئِکَ عِنْدَ اللّٰہِ ھُمُ الْکَاذِبُوْنَ (النور: ۱۴) وہ اللہ تعالیٰ کے قانون کے مطابق جھوٹے ہیں۔اسی طرح حضرت ابراہیم علیہ السلام نے بھی