سُوْرَۃُ الْاِنْشِقَاقِ
تفسیر کبیر (جلد ۱۱), حصہ 3
کتاب فضائل اصحاب النبی باب فضائل اصحاب النبی ) یعنی میرے بعد تین صدیوں تک کا زمانہ تواچھا ہے لیکن پھر خرابیاں پھیل جائیں گی۔گویا آپ نے ابتدائی تین صدیوں کو خیر وبرکت والا قرار دیا ہے۔پس یہ تین صدیاں تھیں۔رسول کریم صلی اللہ علیہ وآلہٖ وسلم کے زمانہ کے سورج کی۔اِس کے بعدسورج غائب ہوا۔اور شفق کا زمانہ شروع ہوا۔یعنی وہ زمانہ جب نور اور ظلمت ابھی ملے ہوئے تھے۔پھر وہ زمانہ آیا۔جب رات نے اپنی ساری تاریکیوں کو جمع کر لیا۔اس جگہ ایک اورلطیفہ بھی یاد رکھنے والا ہے۔اور وہ یہ کہ جبکہ شفق کا وقت بہت کم ہوتا ہے۔اور وہ عام طور پر رات کا حصہ سمجھا جاتا ہے۔پھر اللہ تعالیٰ نے شفق کو الگ کیوں بیان کیا۔اسکی وجہ یہ ہے۔کہ اسلام میں شفق کے زمانہ کو ایک خصوصیت حاصل ہونے والی تھی۔اور وُہ یہ کہ عام طور پر شفق کا وقت چھوٹا ہوتا ہے۔اور رات کا لمبا۔لیکن رسول کریم صلی اللہ علیہ وآلہٖ وسلم کی امت سے خدا تعالیٰ کا یہ معاملہ مقدرتھا۔کہ ان کے لئے شفق کا زمانہ لمبا ہو اور رات کا چھوٹا اور اس طرح شفق کا وقت اپنی ذات میں ایک مستقل حیثیت اختیار کر لے۔چنانچہ رسول کریم صلی اللہ علیہ وآلہٖ وسلم کے زمانہ کے بعد ایسا ہی ہوا مسلمانوں میں ہمیشہ ایسے لوگ کھڑے ہوتے رہے جنہوں نے شفق کا کام کیا۔اور رسول کریم صلی اللہ علیہ وآلہٖ وسلم کے نور کو دنیا سے غائب ہونے نہیں دیا۔درحقیقت بارہویں اور تیرہویں صدی ہی اصل میں تاریک راتیں تھیں۔اگرچہ غور کرنے سے ان میں بھی کچھ نہ کچھ شفق کا زمانہ نظر آ جاتا ہے۔وَالَّیْلِ وَمَا وَسَقَ اور رات جب وہ وساق اختیار کر لے۔اس سے صاف پتہ لگتا ہے کہ شفق وسق تک چلی جائے گی۔اِس میں جہاں اس طرف اشارہ کیا گیا ہے کہ رسول کریم صلی اللہ علیہ وسلم کا نور نہیں مٹے گا بلکہ مسلمان اس نور سے مونہہ پھیر لیں گے۔وہاں اس طرف بھی اشارہ کیا گیا ہے۔کہ جب وہ رات آئے گی تو اتنی تاریک اور بھیانک ہو گی۔کہ وہ تمام چیزیں جو رات کو مکمل بناتی ہیں۔ان کو وہ اپنے اندر جمع کر لے گی۔جب رات کامل طور پر دنیا میں چھا جاتی ہَے۔تو اس میں چوریاں بھی ہوتی ہیں۔ڈاکے بھی پڑتے ہیں۔قتل بھی ہوتے ہیں سانپ بھی نکلتے ہیں۔بِچھو بھی باہر آجاتے ہیں۔اور اندھیرا بھی اس طرح چھا جاتا ہے۔کہ کوئی چیز نظر نہیں آتی۔پس وَالَّیْلِ وَمَا وَسَقَ میں بتایا کہ وہ فتنہ بڑا شدید ہو گا۔اور وُہ ساری چیزیں اس میں جمع ہو جائیں گی۔جو رات کو مکمل رات بنانے والی ہوتی ہیں۔شفق لیل اور قمر کو بطور شہادت پیش کرنے کا مطلب فَلَآ اُقْسِمُ بِالشَّفَقِ وَالَّیْلِ وَمَا وَسَقَ وَالْقَمَرَ اِذَااتَّسَقَ یہ تین آیات اپنے مطلب کو اس قدر واضح کر دیتی ہیں کہ مفسرین کا یہ نتیجہ نکالنا ان میں تدریج بتائی گئی ہے۔بالکل
باطل نتیجہ ثابت ہوتا ہے۔پہلے شفق کا ذکر کیا گیا ہے۔اس کے بعد انتہائی تاریک رات کا اور اس کے بعد قمر کا جو اپنی منازل طے کر کے بدر بن جاتا ہے۔اور یہ تینوں چیزیں ایسی ہیں جو کبھی اکٹھی نہیں ہوتیں نہ شفق کے بعد لازمًا انتہائی تاریک رات آتی ہے۔اور نہ انتہائی تاریک کے بعد بدر نکلا کرتا ہے۔آخر کوئی مفسر مجھے بتائے کہ وہ کون سا بدر ہے۔جو وَالَّیْلِ وَمَا وَسَقَ کے بعد نکلتا ہے۔مگر یہاں وَالَّیْلِ وَمَا وَسَقَ کا پہلے ذکر کیا گیا ہے۔اور بدر کا بعد میں ذکر کیا گیا ہے پس یہاں تدریجی ترقی کا کوئی ذکر نہیں اور نہ جسمانیات کا کوئی قانون بیان ہو رہا ہے۔بلکہ رُوحانی نقطۂ نگاہ سے اسلام کے تنزل اور اس کی ترقی کے مختلف ادوار کا ذکر کیا جا رہا ہے۔پس لیل سے یہاں کوئی دنیوی رات مراد نہیں۔بلکہ روحانی رات مراد ہے۔اور دنیوی اور روحانی راتوں میں یہ فرق ہوتا ہے کہ دنیوی راتوں میں بدر سے پہلی راتیں تاریک نہیں ہوتیں۔بلکہ روشن ہوتی ہیں۔مثلاً ۱۴ سے پہلے ۱۲ یا ۱۳ تاریخ کی راتیں تاریک نہیں ہوں گی۔انتہائی تاریک راتیں ۲۸-۲۹ ہوں گی۔لیکن روحانی دنیا میں بدرِ کامل اس وقت ظاہر ہوتا ہے۔جب اس سے پہلے ایک سخت تاریک رات دنیا پر چھائی ہوئی ہوتی ہے پس وَالَّیْلِ وَمَا وَسَقَ کے بعد وَالْقَمَرِ اِذَااتَّسَقَ رکھ کر بتا دیا گیا ہے کہ یہاں جسمانی نہیں بلکہ روحانی شفق روحانی رات اور روحانی بدر کا ذکر کیا جا رہا ہے۔اِس لئے تدریج کا یہاں کوئی سوال ہی پیدا نہیں ہوتا۔فرماتا ہے وَالْقَمَرِ اِذَااتَّسَقَ ہم شہادت کے طور پر چاند کو پیش کرتے ہیں۔جب وہ بدر بن جاتا ہے۔یہ مسیح موعود کی بعثت کے متعلق اتنی واضح پیشگوئی ہے کہ اس کے بعد کسی کا یہ کہنا کہ قرآن میں مسیح موعود کا ذکر نہیں خطرناک ظلم ہے۔یہاں تین حالتیں بیان کی گئی ہیں۔اور بتایا گیا ہے۔کہ رسول کریم صلی اللہ علیہ وآلہٖ وسلم کے بعد شفق کا زمانہ بہت لمبا ہو گا۔اس کے بعد ایک چھوٹا سا تاریک زمانہ آئے گا۔مگر باوجود اس کے کہ وہ چھوٹا ہو گا اس قدر تاریک ہو گا کہ کس قدر تاریکی دنیا میں ممکن ہے۔سب اس میں جمع ہو جائے گی۔اس کے بعد یکدم رسول کریم صلی اللہ علیہ وآلہٖ وسلم سے روشنی لینے والے وجودوں میں سے ایک بدر بن جائے گا۔اور رات پر اس طرح چھا جائے گا۔کہ اسے شروع سے لے کر آخر تک منور کر دے گا۔بدر کا یہی کام ہوتا ہے کہ وہ رات کو شروع سے آخر تک روشن کر دیتا ہے۔وہ روحانی بدرِ کامل بھی اپنے نور کو دنیا میں اس طرح پھیلا دے گا کہ رسول کریم صلی اللہ علیہ وسلم کے زمانہ کا بُعد لوگوں کو محسوس نہیں ہو گا۔یہ نہایت ہی واضح اور مکمل نقشہ ان تغیرات کا کھینچا گیا ہے جو رسول کریم صلی اللہ علیہ وسلم کے زمانہ سے لے کر آخر تک رونما ہونے تھے۔اور جنہوں نے اسلام پر اثر انداز ہونا تھا۔(اقرب)
لَتَرْكَبُنَّ طَبَقًا عَنْ طَبَقٍؕ۰۰۲۰ تم ضرور درجہ بدرجہ ان حالتوں پر پہنچو گے۔حَلّ لُغَات۔اَلطَّبَقُ اَلطَّبَقُکے معنی ہیں اَلْقَرْنُ مِنَ الزَّمَانِ ایک صدی۔اَلنَّاسُ ایک زمانہ کے لوگ اَلْجَمَاعَۃُ جماعت۔اَلْحَالُ۔حال (اقرب) اَلطَّبَقُ۔اَلْمُطَابَقَۃُ (مفردات) تفسیر۔فرماتا ہے ہم اپنی ذات ہی کی قسم کھا کر کہتے ہیں کہ تم ضرور ایک درجہ کے بعد دوسرے درجہ پر جائو گے۔لَتَرْکَبُنَّ میں لام اور نون مشدّد لانے کی ضرورت ہی کیا تھی۔اگر یہ آیات اپنے اندر کوئی اہم پیشگوئی نہیں رکھتی تھیں۔اس آیت کی بناوٹ ہی واضح کر رہی ہے۔کہ ان آیات کو رسول کریم صلی اللہ علیہ وسلم کے زمانہ پر چسپاں کرنا کوئی معنی نہیں رکھتا۔بلکہ یہ واقعات آئندہ زمانہ کے متعلق بطور پیشگوئی بیان کئے گئے ہیں۔رسول کریم صلی اللہ علیہ وسلم کے زمانہ میں نہ شفق کا کوئی سوال پیدا ہو سکتا تھا۔نہ انتہائی تاریک رات کا اور نہ اس وقت کوئی قمر تھا جو اتساق اختیار کر کے بدر بن گیا ہو۔پس یہ آیات قطعی طور پر بعد کے زمانہ سے ہی تعلق رکھتی تھیں۔لَتَرْكَبُنَّ طَبَقًا عَنْ طَبَقٍ میں عن کے معنے بعد کے عَنْ کے عربی زبان میں بہت سے معنی ہوتے ہیں جن میں سے ایک یہ ہیں کہ عَنْ علاوہ اور معنوں کے بعد کے معنی بھی دیتا ہے جیسے کہتے ہیں عَنْ قَلِیْلٍ اَزُوْرُکَ اور مطلب یہ ہوتا ہے کہ بَعْدَ قَلِیْلٍ اَزُوْرُکَ اس جگہ بھی عَنْ کے معنی بعد کے ہی ہیں اور مراد یہ ہے کہ لَتَرْكَبُنَّ طَبَقًا بَعْدَ طَبَقٍ یعنی تم ایک درجہ کے بعد دوسرے درجہ تک پہنچو گے۔جیسا کہ حل لغات میں لکھا جا چکا ہے طبق کے معنی مطابق کے بھی ہوتے ہیں۔اور اس کے معنی حال کے بھی ہوتے ہیں۔اسی طرح طبق کےایک معنی جماعت کے بھی ہوتے ہیں۔یہاں حالت اور جماعت دونوں معنی لگ سکتے ہیں یعنی ہم اپنی ذات کی قسم کھا کر کہتے ہیں۔کہ تم ضرور ان چاروں حالتوں میں سے ایک کے بعد دوسری پر گزرتے ہوئے چلے جائو گے۔اور یہ معنی بھی ہو سکتے ہیں۔کہ تم ایک جماعت کے بعد دوسری جماعت پر سوار ہوتے جائو گے۔یعنی جس جس جماعت کے حالات بیان ہوئے ہیں۔اس جماعت کی حالت تم پر وارد ہوتی جائے گی۔اب دیکھ لو کس طرح خدا تعالیٰ نے ان تمام باتوں کو پورا کیا۔رسول کریم صلی اللہ علیہ وسلم کامہر منور تین صدیوں تک دنیا کو روشن کرتا رہا۔اس کے بعد شفق کا زمانہ آیا۔جو بہت لمبا عرصہ رہا۔سید عبدالقادر صاحب جیلانی۔حضرت معین الدین صاحب چشتی۔حضرت محی الدین صاحب ابن عربی اور دُوسرے کئی بزرگ اِ س زمانہ
شفق میں آئے۔اور انہوں نے رسول کریم صلی اللہ علیہ وآلہٖ وسلم کے نور اور آپ کی تعلیم کو قائم رکھا۔اس میں کوئی شبہ نہیں کہ اس وقت رات پڑ گئی تھی مگرپھر بھی کوئی شخص سورج کے وجود سے انکار نہیں کر سکتا تھا۔کیونکہ شفق کی سُرخی موجود تھی۔اِس کے بعد بارہویں اور تیرھویں صدی میں تاریکی آئی اور ایسی بھیانک اور خطرناک شکل میں کہ وَالَّیْلِ وَمَا وَسَقَ کا نظارہ نظر آنے لگ گیا۔رات اپنے اندر جس قدر بلائیں جمع کر سکتی ہے۔وہ تمام بلائیں۔اور تمام آفتیں اور تمام مصیبتیں اُس تاریک رات نے اپنے اندر جمع کر لی تھیں۔وہ اسلام اور مسلمانوں کے لئے ایسا تباہی کا زمانہ تھاکہ جس کی نظیر پہلے کسی زمانہ میں نہیں ملتی۔پھرا س انتہائی تاریک رات کے معًا بعد وَالْقَمَرِ اِذَااتَّسَقَ کے مطابق ایک قمر بدر کی صورت اختیار کر گیا۔اور وُہ رسول کریم صلی اللہ علیہ وآلہٖ وسلم کا نُور دنیا تک پہنچانے لگ گیا۔حضرت مسیح موعود کا نور سہولویں صدی تک اِس پیشگوئی پر غور کرو اور دیکھو کہ یہ پیشگوئی نہ صرف معنًا پوری ہوئی بلکہ لفظًا لفظًا پوری ہوئی ہے۔چنانچہ اتساق کی تشریح کرتے ہوئے بتایا جا چکا ہے کہ تیرھویں رات سے سولہویں رات تک کے چاند کے لئے اتساق کا لفظ استعمال کرتے ہیں۔یہ بات بھی نمایاں طور پر پُوری ہوئی۔کیونکہ حضرت مسیح موعود علیہ الصلوٰۃ والسلام تیرھویں صدی میں پیدا ہوئے۔چودھویں صد ی میں آپ نے دعویٰ فرمایا۔اور پھر آپ نے بطور پیشگوئی اعلان فرمایا کہ مسیح موعود کا زمانہ تین سو سال تک ہے۔یعنی سولہویں صدی کے آخر تک۔چنانچہ آپ تحریر فرماتے ہیں۔’’مسیح موعود کا زمانہ اس حد تک ہے۔جس حد تک اس کے دیکھنے والے یا دیکھنے والوں کے دیکھنے والے اور یا پھر دیکھنے والوں کے دیکھنے والے دنیا میں پائے جائیں گے۔ا ور اس کی تعلیم پر قائم ہوں گے۔غرض قرونِ ثلاثہ کا ہونا برعائت منہاج نبوت ضروری ہے۔‘‘ (تریاق القلوب روحانی خزائن جلد ۱۵ صفحہ ۴۷۸ بقیہ حاشیہ) اسی طرح فرمایا: ’’ابھی تیسری صدی آج کے دن سے پُوری نہیں ہو گی کہ عیسٰی کے انتظار کرنے والے کیا مسلمان اور کیا عیسائی سخت نومید اور بدظن ہو کر اس جھوٹے عقیدہ کو چھوڑ یں گے۔اور دنیا میں ایک ہی مذہب ہو گا۔اور ایک ہی پیشوا مَیں تو ایک تخم ریزی کرنے کے لئے آیا ہوں۔سو میرے ہاتھ سے وہ تخم بویا گیا۔اور اب وہ بڑھے گا۔اور پھولے گا۔اور کوئی نہیں جو اس کو روک سکے‘‘۔( تذکرۃ الشہادتین روحانی خزائن جلد ۲۰ صفحہ ۶۷)
پھر آپ مخالفین کے انجام کا ذکر کرتے ہوئے فرماتے ہیں۔’’ مقدریوں ہے کہ وہ لوگ جو اِس جماعت سے باہر ہیں وہ دن بدن کم ہوتے جائیں گے۔اور تمام فرقے مسلمانوں کے جو اِس سلسلہ سے باہر ہیں۔وہ دن بدن کم ہو کر اس سلسلہ میں داخل ہوتےجائیںگے یا نابود ہوتے جائیں گے جیسا کہ یہودی گھٹتے گھٹتے یہاں تک کم ہو گئے۔کہ بہت ہی تھوڑے رہ گئے۔ایسا ہی اِس جماعت کے مخالفوں کا انجام ہو گا اور اِس جماعت کے لوگ اپنی تعداد اور قوتِ مذہب کے رو سے سب پر غالب ہو جائیں گے۔‘‘ (براہین احمدیہ حصہ پنجم روحانی خزائن جلد ۲۱ صفحہ ۹۵) غرض مسیح موعود کا زمانہ تیرہویں صدی سے شروع ہو کر سولہویں صدی کے آخر تک پہونچے گا۔اور یہی لغت والے کہتے ہیںکہ اتساق کے معنی یہ ہیں کہ وہ چاند جو تیرھویں سے سولہویں تک جاتا ہے۔اگر یہاں صرف بدر کا لفظ رکھ دیا جاتا۔تو مضمون میں وہ وسعت پیدا نہ ہوتی۔جو وَالْقَمَرِ اِذَااتَّسَقَ کے الفاظ سے پیدا ہوئی۔کیونکہ اتساق کا لفظ رکھ کر مسیح موعود کے زمانہ کی طرف بھی اشارہ کر دیا گیا ہے۔کہ تیرھویں صدی میں وہ پیدا ہو گا۔چودھویں صدی میں اس کا ظہور ہو گا۔اور سولہویںصدی کے آخر تک اس کا اثر ترقی کرتا جائے گا۔فَمَا لَهُمْ لَا يُؤْمِنُوْنَ۰۰۲۱ پھر ان (لوگوں )کو کیا ہوا ہے۔کہ ایمان نہیں لاتے۔تفسیر۔فَمَا لَھُمْ لَایُؤْمِنُوْنَ۔یعنی اس زمانہ کے لوگوں کو کیا ہو گیا۔یہ کہہ سکتے تھے کہ اتساق کے زمانہ کا ہم کو پتہ نہیں۔کہ وہ کب ہو گا۔یہ کہہ سکتے تھے کہ ہم نے تو بدر کامل کا ظہور نہیں دیکھا۔مگر یہ لوگ شفق اور لیل کو تو دیکھ چکے تھے۔اور اس پر قیاس کر کے سمجھ سکتے تھے۔کہ جب شفق بھی آچکی اور لیل بھی ظاہر ہو گئی۔تو وَالْقَمَرِ اِذَااتَّسَقَ کی پیشگوئی کے پُورا ہونے کا وقت بھی آ جائے گا۔مگر وہ تولیل کو دیکھ کر بالکل مایوس ہو کر بیٹھ گئے۔اور یہ خیال کرنے لگ گئے کہ اب اسلام کبھی ترقی نہیں کر سکتا۔پس تعجب ہے کہ ان لوگوں کو کیا ہو گیا۔انہوں نے شفق کو بھی دیکھا۔انہوں نے لیل کو بھی دیکھا۔مگر یہ نہ سمجھا۔کہ بدر کامل کا ظہور بھی مقدر ہے۔لَایُؤْمِنُوْنَ ایمان نہیں لاتے۔یعنی اِس بات پر ایمان نہیں لاتے کہ بدر اِس تاریک وتاررات پر چھا جائے
گا۔اور تمام ظلمات کو پھاڑ دے گا۔وَ اِذَا قُرِئَ عَلَيْهِمُ الْقُرْاٰنُ لَا يَسْجُدُوْنَؕؑ۰۰۲۲ اور جب ان کے سامنے قرآن پڑھا جائے۔تو سجدہ نہیں کرتے۔حَلّ لُغَات۔یَسْجُدُوْنَ یَسْجُدُونَ یَسْجُدُ سے جمع کا صیغہ ہے۔اور سَجَدَ یَسْجُدُ کے معنی ہوتے ہیں خَضَعَ وَاَغْنٰی عاجزی کی اورعجز کا اظہار جھکنے سے کیا نیز کہتے ہیں سَجَدَتِ السَّفِیْنَۃُ لِلرِّیَاحِ اور معنی ہوتے ہیں طَاعَتْھَا وَمَالَتْ بِمَیْلِھَا۔کہ کشتی نے ہوا کی اطاعت کی۔اور جدھر ہوا کا رخ تھا۔ادھرچل پڑی (اقرب) پس یَسْجُدُوْنَ کے معنی ہوں گے۔وہ فرمانبرداری کرتے ہیں۔اور لَایَسْجُدُوْنَ کے معنی ہوںگے فرمانبرداری نہیں کرتے۔تفسیر۔لَا یَسْجُدُوْنَ کے دو معنے یہاں سجدہ کے دو معنی ہیں اوّل یہ کہ وہ فرمانبرداری نہیں کرتے۔دوسرے یہ کہ جب قرآن کا دوبارہ نزول ہو رہا ہے۔تو وہ کیوں اس شکریہ میں سجدہ نہیں کرتے۔اس میں یہ پیشگوئی مخفی تھی۔کہ ایک زمانہ ایسا آئے گا۔جب قرآن دنیا سے مٹ جائے گا۔اور ایمان ثریا پر چلا جائے گا۔اس وقت ایک بدری وجود پھر قرآن کریم کو دنیا میں واپس لائے گا۔پھر اس قرآن کو پڑھا جائے گا پھر اس قرآن پر عمل شروع ہوگا۔پھر اس کے احکام کو تازہ کیا جائے گا۔فرماتا ہے۔یہ ہماری اتنی بڑی نعمت ہے۔کہ چاہیے تھا خدا تعالیٰ کے اس عظیم الشان فضل پر وہ سجدوں میں گر جاتے۔کہ انہیں ان کی کتاب واپس مل گئی۔ان کا روحانی خزانہ جو مدتوں سے ضائع ہو چکا تھا۔پھر ان کے گھروں میں واپس آ گیا۔مگر یہ لوگ ایسے ناشکر گزار ہیں کہ الٹا اس پر الزام لگاتے ہیں کہ وہ قرآن میں تحریف کر رہا ہے۔یا یہ معنی ہیں کہ وہ بدری وجود توقرآن پیش کرے گا مگر یہ لوگ بجائے قرآن کی فرمانبرداری کرنے کے اس کے سامنے حدیثوں یا ائمہ سلف کے اقوال کو پیش کریں گے۔قرآن کی طرف نہیں جائیں گے۔ہماری جماعت کے ایک دوست میاں نظام الدین صاحب کاایک مشہور واقعہ ہے۔جو میں نے بارہا سنایا ہے۔کہ وہ ابھی بیعت میں شامل نہیں تھے۔کہ حضرت مسیح موعود علیہ السلام کے پاس آئے اور کہنے لگے کہ اگر میں قرآن کریم کی سو آیتیں ایسی نکلوا کر لے آئوں۔جن سے حیات مسیح ثابت ہوتی ہو۔تو کیا آپ مان جائیں گے کہ
حضرت عیسٰی زندہ ہیں۔حضرت مسیح موعود علیہ الصلوٰۃ والسلام نے فرمایا سو آیتوں کا کیاسوال ہے۔آپ ایک آیت ہی پیش کر دیں۔تومیں ماننے کے لئے تیار ہوں۔انہوں نے کہا کہ میں دس آیتیں تو ضرور لا کر آپ کو دکھائوں گا۔اور یہ کہہ کر خوش خوش مولوی محمد حسین صاحب بٹالوی کے پاس گئے۔تاکہ قرآن سے ایسی آیتیں نکلوا لائیں۔مولوی محمد حسین صاحب ان دنوں لاہور میں تھے۔حضرت خلیفہ اول رضی اللہ عنہ بھی جموں سے چھٹی پر وہاں تشریف لائے ہوئے تھے۔اور وفات و حیات مسیح پر بحث کے لئے آپس میں شرائط کا تصفیہ ہو رہا تھا۔حضرت خلیفہ اول ؓ فرماتے تھے۔کہ اس مسئلہ کا قرآن سے فیصلہ ہونا چاہیے۔اور مولوی محمد حسین صاحب یہ کہتے تھے کہ حدیثیں بھی شامل ہونی چاہئیں۔آخر بڑی بحث اور ردّو کد کے بعد حضرت خلیفۂ اولؓ نے مان لیاکہ بخاری بھی شامل کر لی جائے۔مولوی محمد حسین صاحب بٹالوی کو فخر کرنے کی بہت عادت تھی۔حضرت خلیفۂ اولؓ نے جب ان کی اتنی بات مان لی۔کہ بخاری سے بھی تائیدی رنگ میں ثبوت پیش کیا جا سکتا ہے۔تو ان کی خوشی کا کوئی ٹھکانا نہ رہا۔مسجد میں بیٹھ کر انہوں نے لاف زنی شروع کر دی کہ مولوی نورالدینؓ نے یوں دلیل دی۔اور مَیں نے اسے یوں پکڑا۔اس نے اس طرح کہا۔اور مَیں نے اسے اس طرح گرایا۔اتنے میںمیاں نظام الدین صاحب بھی وہاں جا پہونچے۔اور کہنے لگے مولوی صاحب ان بحثوں کو چھوڑئیے مَیں مرزا صاحب کو منوا کر آرہا ہوں۔کہ اگر مَیں قرآن سے دس آیتیں ایسی نکال کر لے آئوں۔جن سے حیات مسیح ثابت ہوتی ہو۔تو وہ اپنے عقیدہ کو ترک کر دیں گے۔آپ مہربانی فرما کر مجھے جلدی سے ایسی دس آیتیں قرآن سے لکھ دیں۔تاکہ مَیں مرزا صاحب کے سامنے پیش کروں۔مولوی صاحب جو فخر ومباہات سے کام لے رہے تھے۔اور بار بار کہہ رہے تھے۔کہ میں نے مولوی نورالدینؓ کویوں رگیدا۔اسے اس طرح پکڑا۔اور اس طرح گرایا۔ان کے تو یہ بات سنتے ہی حواس اڑ گئے۔اور جوش میں کہنے لگے تجھے کس پاگل اور جاہل نے کہا تھا۔کہ تو اس معاملہ میں دخل دیتا۔مَیں دو مہینے بحث کر کے مولوی نورالدینؓ کو حدیث کی طرف لایا تھا۔تو پھر اس مسئلہ کو قرآن کی طرف لے گیا ہے۔یہ اتنا گندہ فقرہ تھا کہ میاں نظام الدین صاحب جو اپنے دل میں اسلام کی محبت رکھتے تھے۔اسے برداشت نہ کر سکے۔تھوڑی دیر تک حیرت سے ان کا مونہہ دیکھتے رہے۔اور پھر کہنے لگے مولوی صاحب اگر یہی بات ہے۔تو پھر جدھر قرآن ہے ادھر ہی میں ہوں۔چنانچہ وہ وہاںسے واپس آئے اور حضرت مسیح موعود علیہ الصلوٰۃ والسلام کی بیعت میں شامل ہو گئے (حیات احمد از یعقوب علی عرفانی صفحہ ۱۴۳ تا۱۴۵ )پس اس آیت کے ایک یہ بھی معنی ہیں کہ وہ بدری وجود قرآن پیش کرے گا۔مگر وہ اُسے ضعیف حدیثوں اور لوگوں کے اقوال کی طرف لانے کی کوشش کریں گے۔اسی طرح اس کے
یہ بھی معنے ہیں کہ اس وقت قرآن آسمان پر جا چکا ہو گا۔تب ایک بدری وجود قرآن کو پھر واپس لائے گا۔مگر یہ لوگ ایسے ہیں کہ خدا تعالیٰ کا اس عظیم الشان نعمت کے واپس ملنے پر بھی کوئی شکر ادا نہیں کریں گے۔کہ اس نے ان پرکتنا بڑا رحم کیا۔کتنا بڑا انعام کیا۔کہ ان کے مذہب کو اس نے بچا لیا۔اور انہیں ہلاکت کے گڑھے میں گرتے گرتے تھام لیا۔اگر یہ معنی نہ کئے جائیں تو قُرِئَ عَلَيْهِمُ الْقُرْاٰنُکا وَالْقَمَرِ اِذَااتَّسَقَ کے ساتھ کوئی جوڑ ہی نہیں بنتا لیکن ہم حدیث صحیح سے اس کا جوڑ بتا سکتے ہیں۔جس میں رسول کریم صلی اللہ علیہ وآلہٖ وسلم نے یہ بیان فرمایا ہے کہ آخری زمانہ میں قرآن کی تعلیم مٹ جائے گی۔ایمان ثریا پر چلا جائے گا لَا یَبْقٰی مِنَ الْاِسْلَامِ اِلَّا اِسْمُہٗ وَلَا یَبْقٰی مِنَ الْقُرْاٰنِ اِلَّا رَسْمُہٗ (مشکوٰۃ المصابیح کتاب العلم) اسلام کا صرف نام اور قرآن کا صرف رسم الخط باقی رہ جائے گا۔معارف اور حقائق اور علوم سب آسمان پر اٹھ جائیں گے تب ایک فارسی الاصل انسان اللہ تعالیٰ کی طرف سے مبعوث ہو گا جو ایمان کو ثریا سے واپس لائے گا۔اور قرآنی علوم کو زندہ کر دے گا۔پس ہم اس آیت کے جو معنے کرتے ہیں وہ پورے طور پر یہاں چسپاں ہو جاتے ہیں۔لیکن اور لوگ اس کے کیا معنی کر سکتے ہیں۔وہ شفق اور لیلؔ اور قمرؔ کے ساتھ قرآن کا کوئی جوڑ بتا ہی نہیں سکتے۔بَلِ الَّذِيْنَ كَفَرُوْا يُكَذِّبُوْنَٞۖ۰۰۲۳ بلکہ (بات اتنی بڑھ گئی ہے کہ) جنہوں نے اس قرآن کا کفر کیا ہے۔وہ تو (اسے) جھٹلاتے ہیں۔تفسیر۔بَلْ کے معنی زیادتی کے ہیں یعنی صرف یہی بات نہیں کہ وہ قرآن کے دوبارہ نزول پر خدا تعالیٰ کے حضور سجدۂ شکر ادا نہیں کرتے۔اور اس کی فرمانبرداری نہیں کرتے۔بلکہ الٹے تکذیب کرنے لگ جاتے ہیں۔یعنی بجائے اطاعت شعاری سے کام لینے کے وہ اس موعود کی تکذیب کریں گے۔وہ قرآن کی آیتیں پیش کرے گا۔مگر یہ لوگ کہیں گے ہم ان آیتوں کو نہیں مانتے۔
وَ اللّٰهُ اَعْلَمُ بِمَا يُوْعُوْنَٞۖ۰۰۲۴ اور اللہ اسے جسے وہ (اپنے دلوں میں) چھپائے ہوئے ہیں۔خوب جانتا ہے۔حَلّ لُغَات۔یُوْعُوْنَ یُوْعُوْنَ اَوْعٰی سے جمع مذکر غائب کا صیغہ ہے۔اور اَوْعٰی الشَّیءَ وَالْکَلَامَ کے معنی ہوتے ہیں حَفِظَہٗ وَجَمَعَہٗ کسی کلام کو یاد کیا۔اور اکٹھا کیا۔اور جب اَوْعَی الزَّادَ وَالْمَتَاعَ کہیں تو معنی ہوتے ہیں جَعَلَہٗ فِی الْوِعَائِ وَجَمَعَہٗ فِیْہِ کہ سامان کو تھیلے میں رکھا اور محفوظ کیا۔(اقرب) پس یُوْعُوْنَ کے معنی ہوں گے (۱)حفظ کرتے ہیں اور جمع کرتے ہیں (۲)محفوظ کرتے ہیں۔تفسیر۔اللہ خوب جانتا ہے کہ ان کے دلوں میں کیا کچھ بھرا ہوا ہے۔قرآن ان کے دلوں سے نکل جائے گا۔اور یہی باقی رہ جائے گا کہ فلاں نے یہ کہا ہے فلاں نے یہ لکھا ہے۔یُوْعُوْنَ کے ایک معنی حفظ کے بھی ہیں۔چنانچہ اَوْعٰی الشَّیءَ اَوِ الْکَلَامَ کے معنی ہوتے ہیں حَفِظَہٗ وَجَمَعَہٗ اس نے حفظ کیا۔اور جمع کیا۔پس وَاللّٰہُ اَعْلَمُ بِمَا یُوْعُوْنَ کے یہ معنی بھی ہو سکتے ہیں کہ انہوں نے دوسروں کے اقوال جو حفظ کر رکھے ہیں اللہ تعالیٰ ان کو خوب جانتا ہے۔یا ان کے دلوں میں جو کچھ بھرا ہے اسے وہ خوب جانتا ہے۔فَبَشِّرْهُمْ بِعَذَابٍ اَلِيْمٍۙ۰۰۲۵ پس (ان کے مخفی خیالات اور ظاہر اعمال کی وجہ سے)انہیںدردناک عذاب کی خبر دے دے۔تفسیر۔فرماتا ہے ہم نے تو ان کو فائدہ پہنچانے کے لئے یہ سب انتظام کیا تھا ہم چاہتے تھے کہ نور سے ان کو حصہ ملے۔اور خدا تعالیٰ کے قرب کی راہوں پر چلنا ان کے لئے آسان ہو۔مگر وہ تاریکی کے کونوں میں بیٹھے رہے۔انہوں نے خدا تعالیٰ کے نور سے مونہہ پھیر لیا۔اس کی برکات کو رد کر دیا۔اور خدا تعالیٰ کے احسان پر سجدۂ شکر ادا کرنے کی بجائے اس کی آیات کی تکذیب کی۔اس کا نتیجہ یہ ہو گا کہ وہ بہت بڑے دکھ میں مبتلا کئے جائیں گے۔
اِلَّا الَّذِيْنَ اٰمَنُوْا وَ عَمِلُوا الصّٰلِحٰتِ لَهُمْ اَجْرٌ مگر وہ (لوگ) جو ایمان لائے۔اور انہوں نے مناسب حال عمل کئے۔ا نہیں ایک نہ ختم ہونے والا (نیک) غَيْرُمَمْنُوْنٍؒ۰۰۲۶ اجر ملنے والا ہے۔حَلّ لُغَات۔اَلْمَمْنُوْنُ اَلْمَمْنُوْنُ کے معنی ہیں اَلمَقْطُوْعُ کٹا ہوا (اقرب) پس غَیْرُ مَمْنُوْنٍ کے معنی ہوں گے غیر مقطوع۔تفسیر۔حضرت مسیح موعود کی ماتحتی کے بغیر کوئی روحانی ترقی نہیں کر سکتا اِس آیت کے وہی معنی ہیں جن کی طرف حضرت مسیح موعود علیہ السلام نے اپنی کتب میں اشارہ فرمایا ہے کہ آیندہ کوئی شخص خدا تعالیٰ کے قرب اور اس کی ولایت کا مقام حاصل نہیں کر سکتا۔مگر وہی جو میری جماعت میں شامل ہو گا۔اور میری اقتدا اور متابعت کا دم بھرے گا۔آیندہ زمانہ میں اگر اللہ تعالیٰ کی طرف سے کوئی نبی بھی مبعوث ہو گا۔تو اس کے لئے ضروری ہو گا۔کہ وہ مسیح موعود کے دروازہ میں سے گزرے۔بے شک شکل میں تبدیلی آ جائے گی۔مگر اس کا تعلق مسیح موعود سے منقطع نہیں ہو گا۔جس طرح محمدی نور کبھی منقطع نہیں ہوسکتا اسی طرح اس نور کا سلسلہ اب قیامت تک منقطع نہیں ہوسکتا۔اس میں شک نہیں یہاں مومنوں کی جماعت کا ذکرکیا گیا ہے۔مگر جماعت درحقیقت نبی کے تابع ہوتی ہے۔اور چونکہ مسیح موعود اب قیامت تک آنے والے تمام لوگوں کے لئے مسیح موعود اور خدا کے رسول ہیں۔اس لئے اس آیت کے معنی یہ ہیں کہ آیندہ جو بھی محمد رسول اللہ صلی اللہ علیہ وسلم کا مقرب ہونا چاہے گا۔اس کے لئے ضروری ہو گا کہ وہ مسیح موعود کے واسطہ سے رسول کریم صلی اللہ علیہ وسلم تک پہنچے۔اور مسیح موعود کے واسطہ سے ہی خدا تعالیٰ تک پہنچے۔اس کے بغیر کوئی انسان الٰہی برکات کو حاصل نہیں کر سکتا۔خ خ خ خ