سُوْرَۃُ الْحِجْرِ
تفسیر کبیر (جلد ۵)
سُوْرَۃُ الْـحِجْرِ مَکِّیَّۃٌ سورۃ الحجر یہ سورۃمکی ہے وَھِیَ مَعَ الْبَسْمَلَۃِ مِائَۃُ اٰیَۃٍ وَّسِتَّۃُ رَکُوْعَاتٍ اوربسم اللہ سمیت اس کی ایک سو آیات ہیں ـ۔اورچھ رکوع ہیں یہ سورہ مکی ہے بحرِ محیط میں ہے۔ھٰذِہِ السُّوْرَۃُ مَکِّیَّۃٌ بِلَاخلَافٍ۔خدا کی قدرت ہے کہ اس سورۃ میں بہت سے مسائل ایسے ہیں۔جن کی شان ہی اس سورۃ کے مکی ہونے سے بڑھتی ہے۔اور اللہ تعالیٰ نے ایساتصرّف کیا کہ اسے مَکِّیَّةٌ بِلَاخِلَافٍ قرار دلوادیا۔اس سورۃ کا پہلی سورۃ سے تعلق اس سورۃ کا تعلق پہلی سورۃ سے یہ ہے۔کہ اس میں بتایاگیاتھاکہ پہلے انبیاء بھی بغیر ظاہری سامانوں کے خدا تعالیٰ کے کلام کی مد د سے فتح پاتے رہے ہیں اب بھی اس طرح ہوگا۔اب اس سورۃ میں بھی کلام الٰہی کی طاقت پر بحث کی گئی ہے۔اوربتایاگیاہے کہ کلام الٰہی ایسی زبردست طاقت ہے۔جس کے سامنے کوئی ٹھہر نہیں سکتااورجھوٹاکلام بناناآسان کام نہیں۔خدا تعالیٰ پرافتراکرنے والابچ نہیں سکتا۔پس یہ کلام سچا ہے اوراپناثبوت اپنے ساتھ لایا ہے۔سورۃ کے مضامین کا خلاصہ اس سورۃ کے مضامین کاخلاصہ یہ ہے کہ یہ ایساکلام ہے کہ اپنامشابہ آپ ہے۔یہاں تک کہ ایسے بہت سے مواقع پیش آتے ہیںاور آئیں گے۔کہ اس کی خوبیوں کو دیکھ کر دشمن بھی دل میں حسرت کرتے ہیں۔اورکریں گے کہ ایسا کلا م ان کے پاس کیوں نہ ہوا۔مگر اپنی خود غرضیوں کی وجہ سے اس کی طرف قدم نہیں اٹھاسکتے۔اورسمجھتے نہیں کہ اس قسم کی سستی کانتیجہ یہ ہوتا ہے کہ انسان صداقت سے محروم رہ جاتا ہے اورعذاب میں مبتلاہوجاتا ہے۔آخر جب ہم نے ایک کلام اتاراہے تویہ توہونہیں سکتا کہ وہ مٹ جائے۔وہ قائم رہے گا اوررکھاجائے گا۔پس جو اسے قبول کرنے میں سستی کریں گے وہ اپنانقصان خود کریں گے۔پہلے نبیوں کے کلام سے بھی تمسخر ہوا۔مگرلوگ یہ نہیں خیال کرتے کہ خدا تعالیٰ پر افتراکرنامعمولی بات نہیں۔خداخود اس امر کی حفاظت کرتا ہے کہ اس پر افترانہ کیاجائے۔اور سچے کلام کو خاص امتیازعطافرماتا ہے۔اس کی قبولیت کے سامان پیداکردیتا ہے اور جو اسے قبول کرتے ہیں۔انہیں ادنیٰ حالت سے اٹھاکر کمال تک پہنچادیتا ہے۔پس جس طرح پہلے انبیاء کے کلام ہی خزانے تھے جن کے ذریعہ سے دنیافتح ہوئی۔اسی طرح اب بھی
ہوگااگرمخالف پرواہ نہیں کرتے نہ کریں۔وہ اس کی سزاپائیں گے۔تُو اس خزانہ کو مومنوں میں تقسیم کر اورجواسےنہیں قبول کرتے اُنہیں سمجھاتا رہ۔اور خدا سے دعائیں کر۔کہ اسی ذریعہ سے تبلیغ کارستہ صاف ہوگا۔بِسْمِ اللّٰهِ الرَّحْمٰنِ الرَّحِيْمِ۰۰۱ (میں) اللہ( تعالیٰ) کا نام لے کر( شروع کرتا ہوں )جو بے حد کرم کرنے والا (اور)بار باررحم کرنے والا ہے الٓرٰ١۫ تِلْكَ اٰيٰتُ الْكِتٰبِ وَ قُرْاٰنٍ مُّبِيْنٍ۰۰۲ الٓرٰ۔یہ (ایک)کامل کتاب اور(اپنے مطالب کو خودہی)واضح کردینے والے قرآن کی آیات ہیں حلّ لُغَات۔تِلْکَ ،آیَاتُ ،الْکِتَابِ کی تشریح کے لئے دیکھیں سورۃ یونس آیت نمبر ۲ نیز دیکھیں الرعد آیت نمبر ۲۔مُبیْنٌ۔مُبِیْنٌ اَبَانَ سے اسم فاعل ہے اوراَبَان لازم اور متعدی دونوں طرح استعمال ہوتا ہے۔یعنی کبھی اس کے معنے ظاہرکرنے کے ہوتے ہیں۔اور کبھی ظاہرہونے کے۔چنانچہ اقرب الموارد میں ہے۔اَبَانَ الشَّیْءُ۔اِتَّضَحَ۔کوئی چیز ظاہر ہوگئی۔(لازم)وَفُلَانٌ الشَّیْءَ۔اَوْضَحَہُ کسی چیز کو واضح اور ظاہر کیا۔(متعدی) سورۃ یوسف میں الْمُبِیْن کے معنے ظاہر کرنے والی کتاب کے تھے۔اور اس جگہ خود ظاہرہونے کے ہیں۔یعنی یہ بتانامقصود ہے کہ یہ کتاب اپنی آپ شاہد ہے۔قراٰن کی تنوین تفخیم(بڑائی کے اظہار )کے لئے ہے۔تفسیر۔کیا الْكِتٰبِ اور قرآن میں کوئی فرق ہے؟ اس جگہ لوگوں نے بحث کی ہے کہ کیا اَلکِتٰب اور قُرْاٰنٌ مُّبِیْنٌ میں کوئی فرق ہے ؟کیونکہ یہاں پر درمیان میں وائو عاطفہ لائی گئی ہے۔اور عطف بالعمو م مغائر اشیاء میں ہوتا ہے۔دراصل انہیں یہ غلطی اس بات سے پیداہوئی کہ انہوں نے اَلْکِتٰب سے کاغذوں میںلکھی ہوئی کتاب سمجھ لیا ہے۔الْكِتٰبِ اور قُرْاٰنٍ مُّبِيْنٍکے الفاظ کو مقابل پر رکھنے کی وجہ حالانکہ اللہ تعالیٰ نے اَلکِتٰبِ اور قُرْاٰنٌ مُّبِیْنٌ کے الفاظ کو مقابل پر رکھ کر اس بات کو پیش کیا ہے۔کہ قرآن مجید کی حفاظت تحریراوریاد دونوں ذریعوںسے کی جائے گی۔یہ لکھابھی جائے گا۔اور بکثرت پڑھابھی جائے گا۔گویا۔اِنَّا نَحْنُ نَزَّلْنَاالذِّکْرَ وَاِنَّالَہُ
لَحَافِظُوْنَ (الحجر:۱۰) والے مضمون پرزور دیاگیا ہے اور اس جگہ معنوی طور پر قرآ ن مجید کی دوصفات کی طرف اشارہ کیاگیا ہے۔الْكِتٰبِ میں قرآن مجید کے تحریر میں آنے کی طرف اشارہ ہے اور قُرْآنٍ میں پڑھے جانے کی طرف کِتٰبکے لفظ میں اس کے تحریر میں آنے کی طرف اشارہ ہے اور قُرْاٰنٍ کے لفظ میں اس کے بکثرت پڑھے جانے کی خبر دی گئی ہے۔گویایہ دونام نہیں۔بلکہ دوصفات ہیں۔جیسا کہ کبھی محمدؐ کالفظ بطورصفت کے یعنی بہت تعریف کیاگیا کے معنوں میں استعمال ہوتا ہے۔یہ دونوں صفات یکجائی طورپر صرف قرآن کریم میں پائی جاتی ہیں۔اس کے سوااور دنیا کی کسی الہامی کتاب میں یہ صفات جمع نہیں ہیں۔انجیل اورتورات کثرت سے پڑھی جاتی ہیں۔لیکن ان کو یاد کرنے والاکوئی نہیں۔ویدوں کویادکرنے والاچھوڑ۔ان کے معنے جاننے والے بھی شاذ ہیں۔اس زمانہ میں سناہے پچیس کروڑ ہندوئوں میں سے معارف تو الگ رہے۔صرف چار آدمی سارے ہندوستا ن میں ویدوں کاترجمہ سمجھ سکتے ہیں۔یہی حال ژنداوستا کا ہے۔صرف اور صرف قرآن کریم ہے جوکتابی صورت میں بھی پڑھاجاتا ہے اور حفظ بھی کیا جاتا ہے۔اوردونوں صورتوں میں لاکھوں کروڑوں آدمی اس سے فائدہ اُٹھارہے ہیں۔لفظ کتاب اور قرآن کو آگے پیچھے لانے کی وجہ اس جگہ ایک اور لطیفہ بھی یاد رکھنے کے قابل ہے اور وہ یہ کہ قرآن مجید کے متعلق دوجگہ پر کتاب اور قرآن کالفظ اکٹھاآتاہے ایک جگہ قرآن کالفظ پہلے ہے اورکتاب کابعدمیں (النمل: ۲)اورایک جگہ کتاب کالفظ پہلے اورقرآن کالفظ بعد میں استعمال ہواہے۔چنانچہ اس آیت میں کتاب کالفظ پہلے ہے اورقراٰن کابعد میں۔میرے نزدیک یہ فرق درجہ کے تفاوت کو مدّنظر رکھ کر کیاگیاہے۔سورہ حجر میں کتاب کی صفت سے زیادہ قرآن کی صفت کے اظہار پر زوردیاگیاہے۔اس لئے کتاب کو پہلے اورقرآن کو بعد میں بیان کیاگیاہے۔کیونکہ جب درجہ بیان کرناہوتوبڑی شے کو چھوٹی کے بعد بیا ن کیاجاتا ہے۔اورسورہ نمل میںچونکہ قرآن کریم کی زبانی تلاوت سے زیادہ اس کی تحریرکے اثرکونمایاںکرناتھا۔اس لئے اس میں قرآن کالفظ پہلے رکھا گیاہے اورکتاب کالفظ بعد میں رکھا گیا۔کتاب اور قرآن کے لفظ کے ساتھ مختلف طور پر مبین کا لفظ لانے کی وجہ ایک اور امر بھی یاد رکھنے کے قابل ہے کہ اس آیت میں اَلْکِتَابِ کے ساتھ مُبِیْنٍ کالفظ نہیں ہے۔مگر قرآن کے ساتھ مُبِیْنٍ کالفظ آیاہے اس کے برخلاف سورہ نمل کے پہلے رکوع میں اس آیت کے مضمون کو اُلٹ کربیان کیاہے۔اورکہا ہے۔
تِلْکَ اٰیٰتُ الْقُرْاٰنِ وَکِتٰبٍ مُّبِیْنٍ یعنے قرآن کالفظ پہلے رکھ دیاگیاہے اور مبین کالفظ کتاب کے ساتھ لگادیا گیاہے۔مبین کی صفت کا الگ الگ استعمال ہونا سجع کی غرض سے نہیں ممکن ہے بعض ناواقف لوگ جو اسرارِقرآنیہ سے واقف نہیں یہ خیال کریں کہ سجع کی خاطر ایساکردیاگیاہے۔لیکن یہ درست نہیں کیونکہ اگر مبین سجع کی خاطر لگایاگیاتھا۔تو قرآن کو کتاب سے پہلے کیوں کیاگیا۔سورہ حجر والی ترتیب قائم رکھی جاتی او رکتاب کو پہلے اور قرآن کوبعد میں رکھاجاتا۔پس ان الفاظ کی ترتیب کو بدل دینے سے صاف ظاہر ہے کہ مُبین کالفظ سجع کی غرض سے کتاب کے ساتھ نہیں لگایاگیا۔بلکہ کسی اور حکمت کے ماتحت لگایاگیاہے مُبین کالفظ انہی دوسورتوں میںقرآن اورکتاب کے الفاظ کے ساتھ نہیں لگایاگیابلکہ اورسورتوں میں بھی ایساکیاگیاہے۔مبین کی صفت کے کتاب کے ساتھ آنے کے بارہ مقامات قرآن کےساتھ ایک تو اس سورۃ میں۔دوسرے سورۃ یٰس :۷۰ میںمبین کی صفت استعمال کی گئی ہے اور کتاب کے ساتھ ایک تو سورہ نمل کی مذکورہ بالاآیت میں اور دوسرے مندرجہ ذیل سورتوں میں یہ صفت بیان کی گئی ہے۔(المائدہ:۱۶) (ھود:۷) (الانعام:۶۰)(یونس:۶۲)(سبا:۴)(النمل:۷۶)(الشعراء:۳)(القصص:۳)(یوسف:۲)(الزخرف:۳) (الدخان:۳)گویابارہ جگہ کتاب کی صفت مبین آئی ہے اور دوجگہ قرآن کی۔پس سجع وغیرہ کاکوئی سوال نہیں۔یہ تغیّریقیناًکسی حکمت کے ماتحت ہے۔سورۃ نمل میں کتاب کے ساتھ مبین کی صفات آنے کی وجہ قرآن اورکتاب کے الفاظ اس قسم کے موقع پر دوہی جگہ جمع ہوئے ہیں۔ان میں سے ایک میں تو کتاب کو پہلے رکھا گیا ہے اور قرآن کو بعد میں اورقرآن کی صفت مبین بیان ہوئی ہے اوردوسری جگہ قرآن کو پہلے بیان کیاہے اورکتاب کو بعد میں اورکتاب کے ساتھ مبین کالفظ بیان ہواہے اوراصل مواقع یہی ہیں جوغورطلب ہیں۔کہ کیوں ایک جگہ قرآن کے ساتھ اور دوسری جگہ کتاب کے ساتھ مبین کالفظ استعمال کیاگیاہے۔سورئہ حجر اور نمل کے مضامین میں فرق اس کا جواب یہ ہے کہ سورئہ حجر اور سورہ نمل کے مضامین میں ایک فرق ہے سورئہ حجر میں ان انبیاء کا ذکر ہے۔اور ان کے حالات زندگی کو بطور تمثیل پیش کیاگیاہے جن میں کتابت کارواج کم تھااور علوم کو زبانی یاد رکھاجاتاتھا۔یعنے حضرت آدم ؑ حضرت ابراہیم ؑ۔ان کے رشتہ دار۔حضر ت لوط ؑ اور اصحاب ایکہ یعنے بَن والے لوگ اور قوم صالح ؑ۔
قرآن مبین کہنے سے وہ قومیں مخاطب ہیں جن میں تحریر کا رواج کم تھا حضرت آدم ؑ کا زمانہ ابتدائی تھا۔اورغالباًتحریرکافن ابھی شروع بھی نہ ہواتھا۔حضرت ابراہیم ؑاور حضرت لوط ؑ عربی قبائل میں سے تھے۔اور عراق ان کا مولد تھاان میں بھی تحریرکاروا ج کم تھا۔اصحاب الایکہ بھی عرب کا قبیلہ تھے اور قوم صالح ؑبھی اور ان سب میں تحریر کا رواج کم تھا پس ان مثالوں سے ثابت ہے۔کہ سورئہ حجر میں زیادہ ترخطاب ان اقوام سے ہے۔جن میں تحریرکارواج کم تھا۔اورجنھوں نے حفظ کے ذریعہ سے قرآنی علوم سے زیادہ فائدہ اٹھاناتھا۔پس اس سورۃ میںقرآن کےساتھ مبین کالفظ رکھا یہ بتانے کے لئے کہ ان اقوام میں اس کلام کی صفت قرآن لوگوں کوزیادہ فائدہ پہنچائے گی۔لیکن کتاب کی صفت بھی ساتھ بیان کی تاکہ مکمل حفاظت کااظہار ہو۔اس کے بالمقابل سورئہ نمل میں کتاب کے ساتھ مبین کالفظ لگایاگیاہے۔کیونکہ اس سورۃ میں حضرت موسیٰ علیہ لسلام اور حضرت دائود ؑکے واقعات پر زور دیاگیاہے جوبنی اسرائیل میں سے تھے۔جن میں لکھنے کارواج بہت تھااورزبانی یاد رکھنے کارواج کم تھا(The Illustrated Bible Dictionary underword WRITING)اوران انبیاء کے اتباع نے محمد رسول اللہ صلعم پر نازل ہونے والے کلام کی صفت کتاب سے زیادہ فائدہ اٹھاناتھابہ نسبت صفت قرآن کے۔اس لئے اس کی مناسبت سے سورئہ نمل میں قرآن کے لفظ پر زورکم دیااورکتاب پر زیادہ۔غرض سورئہ حجرمیں تویہ بتایاہے کہ قرآن کریم گو لکھابھی گیاہے مگربعض اقوام جوحافظہ سے زیادہ کام لینے والی ہیں۔اس کویادکرکے اورسن کر زیادہ فائدہ اٹھائیں گی۔اوراس سورۃ میں وہی ہماری بڑی مخاطب ہیں او رسورۃ نمل میں یہ بتایاگیاہے کہ قرآن کریم گوحفظ بھی کیاجائے گالیکن لکھا بھی جائے گا۔اوربعض قومیں جو تحریرسے زیادہ فائدہ اٹھانے والی ہیں۔وہ اسے کتاب سے پڑھ کرزیادہ فائدہ اٹھائیں گی اور ا س سورۃ میں وہی ہماری بڑی مخاطب ہیں۔قرآن مجید سے تمام قومیں فائدہ اٹھائیں گی حافظہ سے کام لینے والی بھی اور تحریر سے بھی خلاصہ یہ کہ قرآن کریم قرآن ہونے کے لحاظ سے بھی مبین ہے اور کتاب ہونے کے لحاظ سے بھی۔او رچونکہ وہ سب دنیا کی طرف ہے اس سے وہ قومیں بھی فائدہ اٹھائیں گی جوحافظہ سے زیادہ کام لیتی ہیں۔ان کے لئے وہ قرآن مبین ہوگااوروہ قومیں بھی فائدہ اٹھائیں گی جوتحریرسے وابستہ ہیں اور ان کے لئے وہ کتاب مبین ہوگا۔کتاب کے ساتھ مبین کی صفت کا کثرت استعمال جیساکہ میں نے بتایاہے۔قرآن مبین کالفظ دو دفعہ استعمال ہوا ہے۔اورکتاب مبین کا بارہ دفعہ۔اس میں اس امر کی طرف بھی اشارہ ہے کہ قرآن کریم کاکتاب ہونے کے لحاظ سےحلقہ وسیع ہوگا اور اکثر لوگ اس کے کتاب ہونے کے لحاظ سے فائدہ اٹھائیں گے۔یعنی
کثیرالتعداد اقوام میں وہ پھیل جائے گا۔جوکتابت سے علوم کو محفوظ کرتی ہیںمیرے نزدیک قرآن کریم میں دس جگہ کتاب کے ساتھ مبین کے لفظ کااستعمال کرنااوردوجگہ قرآن کے ساتھ مبین کےلفظ کااستعمال اس امر کی طرف اشارہ کرنے کے لئے ہے کہ کتاب سے فائدہ اٹھانے والے زیادہ ہوتے ہیںبہ نسبت حفظ سے فائدہ اٹھانے والوں کے۔اورمسلمانوں کو توجہ دلائی ہے کہ وہ مسلمانوں میں تعلیم کے رواج کو زیادہ کریں۔تاکہ مسلمان قرآنی فوائد سے محروم نہ رہ جائیں۔تحریر اور حفظ دونوں مل کر پوری حفاظت کر سکتے ہیں۔اس سورۃ میں تعلیم اسلام کی حفاظت کا ذکر ہے اس سورۃ میں تعلیم اسلام کی حفاظت کا ذکر ہے اس لئے اس کی دونوں صفات یعنے کتاب اورقرآن بیان کی گئی ہیں۔کسی مضمون کی حفاظت کبھی مکمل طور پرنہیں ہوسکتی۔جب تک وہ تحریر اور حفظ دونوں ذریعہ سے محفوظ نہ کیاجائے۔انسانی حافظہ بھی غلطی کرجاتاہے اورکاتب بھی بھول چوک جاتا ہے۔لیکن یہ دونوں مل کر ایک دوسرے کی غلطی کو نکال دیتے ہیں اوران دوسامانوں کے جمع ہونے کے بعد غلطی کاامکان باقی نہیں رہ سکتا۔قرآن کریم کویہ دونوںحفاظتیں حاصل ہیں۔یعنے وہ کتاب بھی ہے۔رسول کریم صلعم کی زندگی سے ہی اس کے الفاظ تحریر کرکے ضبط میں لائے جاتے رہے ہیں اور وہ قرآن بھی ہے۔یعنے نزول کے وقت سے آج تک سینکڑوں ہزاروں لوگ اسے حفظ کرتے اور اس کی تلاوت کرتے چلے آئے ہیں۔رُبَمَا يَوَدُّ الَّذِيْنَ كَفَرُوْا لَوْ كَانُوْا مُسْلِمِيْنَ۰۰۳ جن لوگوں نے(اس کا)انکارکیاہے۔وہ بسا اوقات آرزوکیاکرتے ہیں۔کہ کاش وہ (بھی اس کی)فرمانبرداری اختیارکرنے والے ہوتے۔حل لغات۔رُبَمَا۔رُبَ اور مَا کامرکب ہے رُبَ کبھی رُبَّ یعنی ب کی تشدید سے بھی استعمال ہوتا ہے اس کے متعلق یہ اختلاف ہےکہ یہ حرف ہے یااسم۔بصریوں کے نزدیک اورنیز اکثر ائمہ لغت و نحو کے نزدیک یہ حرف ہے لیکن کوفی نحوی اسے اسم بتاتے ہیں۔بصری کہتے ہیں کہ رُبَ کے بعد ما کا لفظ اس لئے لایاگیا ہے کہ یہ حرف تھاکیونکہ حرف جرّ فعل پرنہیں آسکتا۔رُبَ کے معنوں کے متعلق اختلاف رُبَ کے معنوں کے متعلق بھی اختلاف ہے۔اکثر لوگوں نے اسے
تقلیل کے لئے قرار دیاہے یعنی جس واقعہ پر رُبَما داخل ہوتا ہے۔وہ کبھی کبھی او رشاذو نادرکے طورپرہوتاہے ابوعبداللہ رازی نے لکھا ہے کہ اس بات پر اجماع ہے کہ یہ تقلیل کے لئے آتا ہے۔زمخشری کابھی یہی خیال ہے مگرسیبویہ کی طرف ایک روایت منسوب ہے۔کہ یہ تکثیر کے معنوںمیں بھی آتاہے۔زجاج کابھی یہی قول ہے۔بعض علماء کا خیال ہے کہ رُبَمَا نہ تقلیل کے لئے آتا ہے نہ تکثیرکے لئے۔بلکہ سیاق وسباق کے ماتحت تکثیر یاتقلیل کے معنی دیتا ہے جب تقلیل کاموقع ہوتوتقلیل کے معنے دیتا ہے اوراگرتکثیرکاموقع ہو۔توتکثیر کے۔اس کے ذاتی معنے کوئی نہیں۔یہ صرف اس بات پردلالت کرتا ہے کہ مابعد کاواقعہ ضرور ہواہے ( لسان العرب۔والبحر المحیط و الکشاف ، و الرازی) اس آیت میں رُبَمَاکے معنے تکثیرکے ہی لئے جاتے ہیں جن لوگوں نے ربماکوتقلیل کے لئے قراردیا ہے انہوں نے بھی اس جگہ تاویل کر کے تکثیرہی کے معنی لئے ہیں۔( لسان العرب) رُبَمَا کے متعلق ایک اور بحث اسی طرح رُبَ کے متعلق ایک اوربحث ہے۔اکثرلوگوں کی رائے ہے کہ رُبَما ہمیشہ ماضی کے معنوں کے بیان کرنے کے لئے آتا ہے خواہ اس کے بعد فعل مضارع ہی کیوں نہ ہو۔ان لوگوں نے رُبَمَایَوَدُّ کے معنے رُبَماوَدّ کئے ہیں۔اورپھرکہا ہے کہ رُبَمَایَوَدُّ فعل جو قاعد ہ کے روسے ماضی کے معنے دیتا ہے۔رُبَمَا کا لفظ مستقبل کے معنے میںبھی آتا ہے اس جگہ مستقبل کے لئے اس لئے استعمال کیاگیا ہے۔تاکہ یقین کے معنوں پر دلالت کرے لیکن عربی زبان کاتفحّص کرنے سے معلوم ہوتا ہے کہ رُبَ کالفظ مستقبل کے معنے میں بھی آتا ہے۔ہندہ زوجہ ابوسفیان کہتی ہے ؎ یَا رُبَّ قَائِلَۃٍ غَدًا یَالَھْفَ اُمِّ مُعَاوِیَۃَ (البحر المحیط زیر آیت ھذا) اس میں یقیناً مستقبل کے معنے ہیں۔جیساکہ غَدًا کالفظ دلالت کرتا ہے۔پھر اسی طرح ایک شاعر سلیم القشیری کاشعر ہے ؎ وَمُعْتَصِمٍ بِالْجُبْنِ مِنْ خَشْیَۃِ الرَّدَی سیَرْدَی وَغَازٍ مُشْفِقٍ سَیَؤُوْبُ (البحر المحیط زیر آیت ھذا)
یعنی موت کے ڈر کی وجہ سے بزدلی کی پناہ لینے والا ہلاک ہوجائے گا۔لیکن جو ڈر کو دور پھینک دیتا ہے اور جنگ کے لئے نکل کھڑاہوتا ہے وہ زندہ سلامت واپس آئے گا۔اس جگہ پر رُبَ محذوف ہے۔جیسا کہ مُعْتَصِمٍ کی جَرّ سے ظاہر ہے اور شعر کے معنے یقیناً مضارع پردلالت کرتے ہیں۔کیونکہ سَیَـرْدٰی اور سَیَئُوْبُ مضارع کے صیغے ہیں۔غرض رُبَ مستقبل کے معنوں میں بھی آتا ہے اورتکثیر کے لئے بھی۔جیسا کہ سیبویہ اورزجاج کے قول سے اوپر ذکرہوچکا ہے۔اَسْلَمَ اَسْلَمَ سے اسم فاعل مُسْلِمٌ آتاہے۔اورمُسْلِمُوْنَ اس کی جمع ہے اَسْلَمَ الرَّجُلُ کے معنے ہیں تَدَیَّنَ بِالْاِسْلَامِ مذہب اسلام قبول کرلیا۔اوراَسْلَمَ اَمْرَہٗ اِلَی اللہ کے معنے ہیں سَلَّمَہٗ کہ اپنے معاملہ کو اللہ کے سپرد کردیا (اقرب) رُبَمَا يَوَدُّ الَّذِيْنَ كَفَرُوْا لَوْ كَانُوْا مُسْلِمِيْنَ کے معنے ہوںگے۔بسا اوقات منکریہ آرزوکرتے ہیں یاکریںگے کہ وہ اسلام کو قبول کرلیتے (۲)وہ اپنے معاملات کو اللہ کے سپردکردیتے۔تفسیر۔کفار کی خواہش کے متعلق مفسرین کی بحث کفارکی اس خواہش کے متعلق مفسرین نے بحث کی ہے کہ کب انہوں نے خواہش کی کہ وہ مسلمان ہوں؟بعض نے مجبورہوکرکہاکہ وہ اس وقت یہ خواہش کریں گے جب مسلمانوں کی فتح ہوگی۔بعض نے قیامت پرچسپاں کیا ہے کہ اس وقت کہیں گے کہ کاش ہم مسلمان ہوتے۔اور بعض نے اس سے ترقیات اسلامی مراد لی ہیں۔یعنی جب بھی ترقی ہوگی وہ یہ خواہش کریں گے۔(تفسیر فتح البیان تفسیر سورۃ حجر زیر آیت ھذا) آنحضرت ﷺ کی غیر معمولی ترقی سے کفار مسلمان ہونے کی خواہش کرتے ہیں یہ معنے بھی درست ہیں۔ان پر کوئی اعتراض نہیں۔کیونکہ جب دشمنی بلاوجہ ہوتی ہے جیسا کہ کفار عرب کو آنحضرت صلی اللہ علیہ وآلہ وسلم سے تھی تودشمن کی ترقی پر انسان کو اکثر یہ خیال آجاتاہے کہ میں اس کی دشمنی نہ کرتا۔تواچھاتھا۔آج فائدہ ہی اٹھالیتا۔آنحضرت صلی اللہ علیہ وآلہ وسلم کی دشمنی محض حسد کی وجہ سے تھی۔اورآپؐ کی غیر معمولی ترقیات سے وہ حسد کے مواقع ہی جاتے رہے۔اس لئے ان کو بارہاخیال آتاہوگاکہ کاش ہم مسلمان ہوتے۔اسی طرح جب وہ بدرکے مقام پر قتل ہورہے تھے توان کادل یہی چاہتاہوگاکہ کاش ہم مسلمان ہوتے۔غرض اسلام کی فتوحات دشمنوں کے دلوں میں یہ حسرتیں ضرورپیداکرتی ہوںگی۔کہ کاش ہم بھی ساتھ ہوتے۔منافقوں کاقول توقرآن مجید میں صریح طورپربیان ہواہے کافروں کی بھی یہی حالت ہوتی ہوگی۔یہ ایک طبعی بات ہے اس سے انکار نہیں ہوسکتا۔
اس آیت کے ایک اور معنے میرے نزدیک ان کے علاوہ آیت کے ایک اورمعنے بھی ہیں۔مفسّرین عام طور پر ظاہری لطافت۔فصاحت و بلاغت اورمعجزات پر بحث کرتے ہیں۔اورقرآن مجید کی تعلیمی خوبیوں پر بہت کم بحث کرتے ہیں۔میرے خیال میں سب سے بڑی چیز جس کے لئے قرآن کریم آیا ہے۔وہ اس کی کامل اور دلکش تعلیم ہے اور اسی کی طرف تِلْکَ اٰیٰتُ الْکِتٰبِ میں اشار ہ کیا ہے۔اورآیت رُبَمَا يَوَدُّ الَّذِيْنَ كَفَرُوْا میں انہی تعلیمی خوبیوں پر رشک کا ذکرکیاہے یعنی فرماتا ہے کہ اسلام کی تعلیمات کی خوبیوں کو دیکھ کر بارہاکافر کہہ اٹھتے ہیں اورکہہ اٹھیں گے۔کاش ہم بھی مسلمان ہوتے اوریہ ہمیشہ ہوتارہاہے اورہوتارہے گا۔حضرت عمر ؓسے ایک یہودی نے کہا کہ قرآن مجید میں ایک آیت ہے۔اگر وہ ہماری کتاب میں اترتی توہم اس دن عید مناتے۔حضرت عمرؓ نے کہا کہ وہ کون سی آیت ہے۔اس نے جواب دیا۔اَلْيَوْمَ اَكْمَلْتُ لَكُمْ دِيْنَكُمْ۔الآیہ۔آپ نے فرمایا۔وہ دن تو ہمارے لئے دوعیدوں کادن تھا۔یعنی جمعہ کا دن اورعرفہ کے دن یہ آیت نازل ہوئی تھی۔(بخاری کتاب الاعتصام بالکتاب والسنۃ)۔ایک یہودی کا اسلامی شریعت کے اعلیٰ ہونے کا اعتراف ایسا ہی ایک اور یہودی نے کہاکہ آپ کی شریعت میں ایک بات دیکھ کر حیرت ہوجاتی ہے کہ انسانی زندگی کاکوئی حصہ نہیں جس پر اس شریعت نے روشنی نہ ڈالی ہو(الترمذی ابواب الطہارۃ ،باب الاستنجاء بالحجارۃ)۔یہ خواہشات ہیں جو ہزاروں کے دلوں میں پیداہوئی ہوںگی۔مگر اظہار ان کادوایک کے منہ سے ہوا۔اورقرآن مجید نے بھی فرمایا ہے یَوَدُّ ُّ(ان کے دل چاہتے ہیں ) یقول نہیں فرمایا(کہ وہ منہ سے بھی اظہارکرتے ہیں)۔اس زمانہ میں اسلامی تعلیم کے قابل رشک مسائل اس زمانہ میں بھی طلاق کامسئلہ۔شراب کامسئلہ۔ورثہ کامسئلہ۔اورایسے ہی اور بہت سے مسائل ہیں کہ جن پر دنیارشک کررہی ہے۔جب ایک یورپین کے دل میں خیال آتاہے کہ ہمارے ہاں بھی طلاق کاقانون بنناچاہیے۔تودوسرے معنوں میں وہ یہی کہتا ہے کہ کاش میں مسلمان ہوتا۔ایسا ہی جب ایک امریکن کے دل میں یہ تحریک پیداہوتی ہے کہ شراب بندہونی چاہیے۔تووہ گویا رُبَمَا يَوَدُّ الَّذِيْنَ كَفَرُوْا لَوْ كَانُوْا مُسْلِمِيْنَ کی تصدیق کرتا ہے۔ایک ہندو کا اسلامی ازدواجی قانون پر رشک ابھی کچھ عرصہ ہوا ہندوستان کی لیجسلیٹو اسمبلی کے ایک ہندوممبر نے صغرسنی کی شادی کے متعلق مسودہ قانون پیش کیاتھا۔اس نے دورانِ تقریر میں کہا۔میں بڑی حسرت سے دیکھتا ہوں کہ جس طرح اسلام نے شادی کاقانون بناکر مسلم قوم کو محفوظ کردیاہے۔ویساقانون
ہمارے ہاں کوئی نہیں۔آیت میں بھی رُبَمَا کالفظ رکھا گیا ہے۔جوکئی دفعہ پردلالت کرتاہے۔یعنی ان لوگوں کو بحیثیت مجموعی اسلام لانے کاخیال پیدانہ ہوگا۔بلکہ الگ الگ مسائل پر ان کے دل میںیہ خواہش پیداہوگی کہ کاش یہ مسئلہ بھی ہمارے پاس ہوتا۔یہ بھی ہوتا۔مسلم کے معنے سپرد کردینے والےکے مُسْلم کے معنے سپرد کردینے والے کے بھی ہیں۔جیسے فرمایا اَسْلَمْتُ لِرَبِّ الْعٰلَمِيْنَ (البقرة :۱۳۲) میں نے اپناسب کچھ اللہ کے سپردکردیا۔پس اس آیت کے یہ معنے بھی ہوسکتے ہیں۔کہ جب کفار اپنی دنیوی تدابیرکو بیکار جاتے دیکھتے ہیں اورمحمد رسول اللہ (صلی اللہ علیہ وسلم )کوجوصرف اللہ تعالیٰ پرتوکل کئے بیٹھے ہیں۔کامیاب ہوتے دیکھتے ہیں۔توان کاغرورایک وقت کے لئے کمزورپڑجاتاہے اوران کے دل میں خواہش پیداہوتی ہے کہ کاش ہم بھی اللہ تعالیٰ کے ساتھ تعلق رکھتے اوراپنے معاملات اس کے سپردکردیتے۔توان ذلّتوں اورشکستوںکامنہ نہ دیکھتے۔مسلم کے معنی امن دینے والے کے ہیں مسلم کے معنے امن دینے والے کے بھی ہوتے ہیں۔ان معنوں کو مدنظررکھتے ہوئے آیت کے یہ معنی بھی ہوسکتے ہیں۔کہ مسلمانوں کی ترقیات کو دیکھ کر کبھی کبھی کافروں کے دل میں یہ خیال آتاہے کہ کاش ہم اس قوم سے لڑائی نہ چھیڑتے اورصلح رکھتے اوریہ روزِ بدنہ دیکھتے۔جو اَب دیکھنانصیب ہوا۔ذَرْهُمْ يَاْكُلُوْا وَ يَتَمَتَّعُوْا وَ يُلْهِهِمُ الْاَمَلُ فَسَوْفَ توان کو(اپنے حال پر)چھوڑدے کہ وہ (بیٹھے کھانے )کھاتے رہیں۔اوروقتی سامانوں سے نفع اٹھاتے رہیں يَعْلَمُوْنَ۰۰۴ اور(انکی جھوٹی) امیدیں انہیں غافل کرتی رہیں۔کیونکہ وہ جلد(ہی حقیقت )معلوم کرلیںگے۔حلّ لُغَات۔اَلْاَمَلُ وَالْاَمْلُ اس کی جمع آمَالٌ ہے۔اوراَلْاَمْلُ کے معنے ہیں۔الرَّجَاءُ۔امید۔تَاَمَّلْتُ الشَّیْئَ اَیْ نَظَرْتُ اِلَیْہِ مُسْتَثْبِتًالَہٗ۔تَاَمَّلْتُ الشَّیءَ کے معنے ہیں۔اسے غورسے دیکھا۔ٹکٹکی لگا کر دیکھا (اقرب)
تفسیر۔اس آیت میں یہ بتلایاہے کہ یہ لوگ مختلف مسائل میں اسلام کی برتری توتسلیم کرتے ہیں۔اورکریں گے۔مگرپھر بھی اسلام کی طرف قدم اٹھانانصیب نہ ہوگا۔یورپ کے لوگ اسلامی مسائل کی برتری کومانتے ہیں مگراسلام لانے کے لئے طیار نہیں۔کیونکہ سوسائٹی کاسوال ہے۔فرمایاوہ اپنے اکل و شرب کی وجہ سے اپنی تجارتوںاورصنعتوں کی وجہ سے اوراپنی بعید آرزوئوں کی وجہ سے مسلمان نہیں ہوتے۔اس میں گویاپہلی آیت کے مفہوم پر جوسوال پیدا ہوتاتھا۔اس کا جواب دیاگیاہے۔یعنی جب وہ لوگ خواہش کرتے ہیںاورکریں گے ’کاش وہ مسلمان ہوتے‘ تووہ مسلمان ہوتے کیوں نہیں ؟فرمایا ان کی عیاشی دولت کی حرص اورطولِ امل ان کے راستہ میں روک بن رہے ہیں۔صداقت قبول کرنے کے لئے کھانے پینے میں سادگی ضروری ہے اس آیت سے یہ سبق حاصل ہوتا ہے کہ صداقت کو قبول کرنے کے لئے کھانے پینے میں سادگی دنیا کی حرص سے اجتناب اورطول امل سے بچنا ضروری امور ہیں جوشخص صداقت کاجویاہواس کے لئے ان سے بچنا ضروری ہے اگر کوئی ان تین باتوں سے نہیں بچتاتواس کاصداقت کی جستجو کرنافضول امر ہے۔اگرحق اس پر کھل بھی جائے گا تب بھی وہ اس کے قبول کرنے سے محروم رہے گایہ اشارہ بھی اس آیت میں ہے کہ کفار لوگوں پر رعب جمانے کے لئے اپنے دسترخوان کوخوب وسیع کرتے دولت کماتے اورمحمد رسو ل اللہ صلی اللہ علیہ وسلم پر فتح پانے کے لئے دوردورکی تدابیراختیارکرتے تھے جبکہ محمد رسول اللہ صلعم ان سب باتوں سے خالی تھے مگرباوجود اس کے فرماتا ہے کہ محمد رسول اللہ صلی اللہ علیہ وسلم ہی جیتیں گےاورکفار کے دلوں میں آ پؐ کی کامیابی دیکھ کر حسرت پیداہوگی۔لَوْ کَانُوْا مُسْلِمِیْنَ کہناکفّار کاعارضی جذبہ ہے اس آیت سے اس طرف بھی اشارہ ہے کہ لَوْ کَانُوْا مُسْلِمِیْنَکفّار کاعارضی جذبہ ہے ورنہ اصل میں وہ کھانے پینے اوردولت کمانے میں لگے ہوئے ہیں اورعارضی جذبات انسان کو نفع نہیں دیتےبلکہ مستقل جذبات فائدہ دیتے ہیں مسلمانوں کامستقل جذبہ مسلم ہونے کاہے عارضی طورپر وہ کھاتے پیتے دولت کماتے اوربعض تدابیر بھی آئندہ کے لئے کرلیتے ہیں پس باوجود ان کاموں کے وہ ہدایت پارہے ہیں جبکہ کافرہدایت نہیں پاتے۔
وَ مَاۤ اَهْلَكْنَا مِنْ قَرْيَةٍ اِلَّا وَ لَهَا كِتَابٌ مَّعْلُوْمٌ۰۰۵ اورہم نے کبھی کسی بستی کوبغیراس کے کہ اس کے متعلق (پہلے سے )ایک معلوم فیصلہ ہوچکاہوہلاک نہیں کیا۔حلّ لُغَات۔اَلْقَرْیَۃ۔کے معنی بستی کے ہیں۔نیز قریہ بول کر اہل قریہ بھی مراد لیتے ہیں۔تفصیل کے لئے دیکھو حل لغات یوسف آیت نمبر ۸۳ نیز یونس آیت نمبر ۹۹۔القریۃ۔اَلْمِصْرُ اَلْجَامِعُ بڑا شہر۔کُلُّ مَکَانٍ اِتَّصَلَتْ بِہِ الْاَبْنِیَۃُ وَاتُّخِذَ قَرَارًا ہر آبادی کی جگہ خواہ شہر ہو یا گاؤں۔جَمْعُ النَّاسِ۔لوگوں کی جماعت۔(اقرب) اَلْقَرْیۃُ اِسْمٌ لِلْمَوْضَعِ الَّذِیْ یَجْتَمِعُ فِیْہِ النَّاسِ۔قَریة اس جگہ کو کہتے ہیں جہاں لوگ جمع ہوتے ہیں۔وَلِلنَّاسِ جَمِیْعًا اور جمع شدہ لوگوں کو بھی قریة کہتے ہیں۔وَیُسْتَعْمَلُ فِی کُلِّ وَاحِدٍ مِنْہُمَا۔اور قریہ ان ہر دو معنے میں استعمال ہوتا ہے۔قَالَ تَعَالٰی وَاسْأْلِ الْقَرْیَۃَ قَالَ کَثِیْرٌ مِّنَ الْمُفَسّرِیْنَ مَعْنَاہُ اَھْلَ الْقَرْیَۃِ مذکورہ بالا آیت میں وَاسْأَلِ الْقَرْیَۃَ کے معنے اکثر مفسرین نے اَھْلُ قَرْیَۃٍ ’’یعنی بستی کے رہنے والے‘‘ کئے ہیں۔وَقَالَ بَعْضُھُمْ بَلِ الْقَرْیَۃُ ھٰھُنَا الْقَوْمُ اَنْفُسُھُمْ اور بعض مفسرین نے یوں کہا ہے کہ قریہ سے مراد خود لوگ ہی ہیں اہل قریہ نہیں۔(مفردات) وَلَھَا میں وائو حالیہ ہے وَ مَاۤ اَهْلَكْنَا مِنْ قَرْيَةٍ اِلَّا وَ لَهَا كِتَابٌ مَّعْلُوْمٌ۔وَ لَهَا میں واؤ حالیہ ہے۔قاضی منذر نے لکھاہے کہ اس کامطلب یہ ہوتاہے کہ اس کے بعد کامذکور اس کے قبل کے مذکور سے زمانہ میں پہلے واقعہ ہوچکاہے۔جیساکہ آتاہے حَتّٰۤى اِذَا جَآءُوْهَا فُتِحَتْ اَبْوَابُهَا (الزمر:۷۴)(البحر المحیط تفسیر سورة الحجر زیر آیت ھٰذا) تفسیر۔قریة سے مراد نبی کے تمام مخاطب ہوتے ہیں یادرکھناچاہیے کہ قریہ سے مراد گائوں یابستی نہیں بلکہ وہ قوم مراد ہے جن کی طرف نبی آتاہے۔یہ قرآن مجید کامحاورہ ہے کہ وہ قریہ کالفظ بول کر مراد نبی کے تمام مخاطب لیتا ہے اوراس کی وجہ یہ ہے کہ پہلے مخاطب نبی کے گائوں یاشہر والے ہی ہوتے ہیں۔دوسروں کو ان کے تابع کردیاجاتاہے۔نبی کی بستی کو اُمّ القریٰ قراردیاجاتاہے جب ماں مرجائے توبچے آپ ہی بے غذامرجاتے ہیں۔اَهْلَكْنَا مِنْ قَرْيَةٍ سے مراد اَهْلَكْنَا مِنْ قَرْيَةٍ میں مراد وہی قریہ ہے جس میں نبی آتاہے دوسری بستیوںکا ذکر اس لئے چھوڑ دیا کہ وہ اس بستی کے تابع ہیںاس کامزیدثبوت اگلی آیت میں من امۃ کے لفظ