سُوْرَۃُ النَّحْلِ

تفسیر کبیر (جلد ۶), حصہ 15

نیکی کے حصول اور بدی سے بچنے کا طبعی طریقہ اس کے علاوہ ان مختصر سے الفاظ میں یہ بھی بتادیا گیا ہے کہ بدی سے بچنے اورنیکی کے اختیارکرنے کاراستہ کون سا ہے۔چنانچہ نیکیا ں گناتے ہو ئے نیکی کے نچلے درجے کو پہلے بیان فرمایا ہے پھر اس کے اوپرکے درجہ کو پھر اُس کے اوپر کے درجہ کو۔اسی طرح بدیوں کے ذکر کو سب سے پہلے نچلے درجہ کی بدی سے شروع کیاہے پھر ا س سے اوپر کی بدی بیان کی ہے اورپھر اس سے اوپر کی اوراسی طرح انسان کو نیکیوں کے حصول اوربدیوں سے بچنے کاطبعی طریقہ بھی بتادیا ہے۔اوروہ یہ کہ جو انسان نیکی کے حصول کے لئے کوشش کرنی چاہے اسے پہلے عدل کا مقام اپنے اندرپیداکرناچاہیے پھر احسان کا پھر ایتاء ذی القربیٰ کا۔اسی طرح جو بدیوں سے بچنا چاہے اسے پہلے بغی سے بچناچاہیے پھر منکر سے بچنے کے قابل ہوسکے گااورپھر منکر سے بچنے کی جدوجہد کرنی چاہیے پھر کہیں جا کروہ فحشاء سے بچنے کے قابل ہوگا۔اس کے برخلاف اس ترتیب سے اس امر کی طرف بھی رہنمائی کی گئی ہے کہ نیکیوں میں تنزّل کی سیڑھی کون سی ہے۔جوانسان ایتاء ذی القربیٰ کے مقام پر ہے اسے اس پر مضبوطی سے قائم ہونا چاہیے ورنہ گر کر احسان کے مقا م پر آجائے گا۔اوراحسان پر جو کھڑا ہے اسے اپنے مقام کا خیال رکھنا چاہیے ورنہ عدل کے مقام پر آگرے گا۔اسی طرح اس پر خوش نہ ہونا چاہیے کہ مجھ میں صرف فحشاء پائی جاتی ہیں کیونکہ جو فحشاء کامرتکب ہوتاہے منکر کاارتکاب اس کے لئے آسان ہو جاتا ہے اورپھر بغی کا۔نیکی کرنے کے لئے سب سے پہلے چھوٹی بدی کو پھر بڑی کو چھوڑنا چاہیے غرض ا س بیان میں ترتیب کو مدنظر رکھ کر انسانی ذہن کو اس طرف منتقل کیا ہے کہ نیکی کرنے میں سب سے چھوٹی نیکی پہلے حاصل ہوتی ہے اوربدی کو ترک کرتے ہوئے سب سے بڑی بدی کو پہلے چھوڑاجاتاہے۔اس جدوجہد کی مثال سیڑھی کی ہے جو انسان نیکی کی عمارت پر چڑھنا چاہے وہ سب سے پہلے نچلے زینہ پر قدم رکھے گا اورپھر ایک ترتیب سے ترقی کرتا ہوا اوپر تک چڑھ جائے گا۔اورجو شخص بدیوں کے مکان پر چڑ ھ چکا ہے اورنیچے اترناچاہتا ہے اسے سب سے پہلا قدم اوپر کے زینہ پر رکھناہو گا۔اورپھر و ہ تدریجاً نیچے آتاجائے گا۔اسلامی تعلیم پر ہر درجہ کا آدمی عمل کرسکتاہے میں نے اوپر ذکر کیاتھا کہ تیسری خوبی جس کامکمل تعلیم میں پایاجاناضروری ہے یہ ہے کہ اس پر عمل کرنا سب انسانوں کے لئے ممکن ہو۔یہ خوبی بھی مذکورہ بالا تعلیم میں پائی جاتی ہے۔جہاں یہ تعلیم نہایت اعلیٰ درجہ کی ہے وہاں اس پر عمل بھی ہردرجہ اورطبقہ کے آدمیوں کے لئے ممکن ہے۔وہ نہ توادنیٰ اخلاق کی تعلیم دے کر خاموش ہوجاتی ہے کہ اعلیٰ ترقیا ت کے خواہش مند اس سے تسلی نہ پا سکیں اورنہ اعلیٰ اخلاق کے بیان پر بس کردیتی ہے کہ کمزورانسا ن نیکی سے محروم رہ جائیں۔بلکہ وہ نیکی اوربدی کے تمام مدارج کو

بیان کرتی ہے تاکہ بدوںکو بدی چھڑانے میں مدد دے اورنیکوں کی نیکی کے حصول میں اعانت کرے۔ایک بدی میں ڈو بے ہوئے انسان کو یہ کہنا کہ توایسانیک ہوجا کہ سب دنیا کاسہاراتوہی ہو اورتوسب کے لئے بمنزلہ ماں کے ہوجا۔ایسا ہی بے فائدہ ہوگا جیسے ایک الف،ب پڑھنے والے کوایم۔اے کاکورس شروع کرادینا۔اسی طرح ایک اعلیٰ درجہ کے نیک آدمی کویہ کہنا کہ دیکھو بغاوت اورسرکشی نہ کرو اورظلم نہ کروبالکل فضول بات ہوگی۔جو شرارت میں بڑھاہواہواس سے پہلے بڑی بدیا ں چھڑوائی جائیں تبھی اصلاح ممکن ہے۔اورجو نیکی میں ترقی کررہاہو اسے صرف باریک گناہوں سے ہوشیار رہنے کی تلقین کرنا کو ئی فائدہ نہیں دے سکتا۔کیونکہ بد ی کی عام راہوں کوتووہ پہلے ہی چھوڑ چکا ہے۔اوریہ سب خوبیاں اوپر کی تعلیم میں موجود ہیں۔وہ بڑی نیکی کی راہیں بھی بتاتی ہے اورچھوٹی نیکی کی بھی۔اوربڑی بدیوں سے بھی بچاتی ہے اورچھوٹیوں سے بھی۔اورہر شخص خواہ کسی درجہ کاہواس کو سمجھ سکتاہے اوراس پر عمل بھی کرسکتاہے۔ہر چیز کی تکمیل کے چھ درجے ہوتے ہیں اور ساتواں کمال کا یہ نکتہ بھی یاد رکھنے کے قابل ہے کہ اس آیت میں تین درجے بدی کے اورتین درجے نیکی کے بیان فرمائے گئے ہیں۔چونکہ نیچر میں ہمیں یہ قانون رائج معلوم ہوتاہے کہ تکمیل سے پہلے ہرشے کو چھ مدارج طے کرنے پڑتے ہیں۔اس آیت میں گویا روحانی تکمیل کاسب نصاب بیان کردیاگیا ہے جسے پڑھ کر انسان ساتواں درجہ یعنی کمال کا مقام حاصل کرسکتاہے۔بدی سے نیکی کی طرف آنے کے مدارج جوبدیوں میں ڈوبے ہوئے لوگ ہیں انہیں پہلی جدوجہد بغی سے بچنے کے لئے کرنی پڑتی ہے۔اس دلدل سے نکلتاہے تومنکر کاکیچڑ آجاتاہے اورجب منکر کے کیچڑ سے نکلتاہے توفحشاء کے گردوغبارمیں پھنس جاتا ہے۔جب اس سے نجات پاتاہے تو عدل کے مرغزارکی حدشروع ہوجاتی ہے۔اسے قطع کرلیتا ہے تواحسان کاچمن آجاتاہے۔اسے طے کرلیتا ہے توایتا ء ذی القربیٰ کاچشموں والا باغ آجاتاہے اوراس کے آگے جنت ہی جنت ہے۔اسی مناسبت سے رسول کریم صلی اللہ علیہ وسلم نے فرمایا ہے کہ ماں کے قدموں کے نیچے جنت ہے (کنز العمال باب الثامن فی بر الوالدین۔الأم)۔اس آیت میں بھی ایتاء ذی القربیٰ کو جوماں کے سے سلوک پردلالت کرتا ہے تکمیل کاآخری اورجنت سے پہلا مقام بتایاگیاہے۔اورجنت کا مقام ذا کر کا ہے جو خدا تعالیٰ میں محو ہوجاتا ہے اورخدا تعالیٰ اس کے دل میں ڈیراجمالیتا ہے اورمحب اورمحبوب دائمی اورنہ ٹوٹنے والے رشتہ میں پروئے جاتے ہیں۔اس آیت کی اہمیت ابتداء اسلام سے ہی مسلّم ہے یہ آیت ہرجمعہ میں خطبہ کے دوسرے حصہ میں پڑھی

جاتی ہے اوریہ رواج حضر ت عمر بن عبدالعزیز اموی خلیفہ کے عمل سے شروع ہواہے (تاریخ الخلفاء ذکر عمر بن عبد العزیز)۔اس امرسے ظاہر ہے کہ مسلمان ابتداہی سے ا س آیت کی اہمیت کو سمجھتے رہے ہیں۔عیسائی اس آیت پر بہت چڑتے ہیں اورویری نے تویہاںتک لکھ دیا ہے کہ مسلمان اس تعلیم کو اعلیٰ اعلیٰ کہہ کرپیش کرتے ہیں(تفسیر القرآن از وہیری) وہ ہمارے مسیح کی تعلیم سے تواس کامقابلہ کریں جو متی باب۲۲۔۳۷۔۳۹میں بیان ہے جہاں لکھا ہے ’’خداوند اپنے خدا سے سارے دل اوراپنی ساری جان اوراپنی ساری عقل سے محبت رکھ بڑااورپہلاحکم یہی ہے اوردوسرااس کی مانند یہ ہے کہ اپنے پڑوسی سے اپنے برابرمحبت رکھ۔‘‘حالانکہ مسیح کی اس تعلیم پر عیسائیوں کافخر بالکل بے جااورفضول ہے۔قرآن مجید کی تعلیم کے مقابلہ میں اس تعلیم کو پہلے قد م کی سی حیثیت حاصل ہے۔عیسائیت کی تعلیم کا مقابلہ اسلامی تعلیم سے بے شک مسیح نے کہا کہ ’’خدا سے اپنے سارے دل اورساری جان اورساری عقل سے محبت رکھ‘‘۔مگرسوال یہ ہے کہ دل کس نے دیا ؟جان کس نے دی ؟عقل کس نے عطافرمائی ؟ اللہ نے۔پس ان کے ساتھ جو بھی محبت کی جائے گی۔وہ عدل کے مقام سے اوپر نہیں جاسکتی ہاں عدل کالفظ اس فقرہ سے بہت زیادہ وسیع ہے کیونکہ ان چیز وں کے علاوہ اوربھی چیزیں ہیں جن کی قربانی ضروری ہوتی ہے مثلاً احساسات و جذبات۔جب تک انسان اپنی ہر ایک خواہش ہرایک ارادہ اوردنیا کی ہرچیز سے بڑھ کر خدا سے محبت نہ کرے گاتووہ عدل کرنے والا نہیں کہلاسکتا۔بے شک ساری جان سے محبت کرنا اچھی بات ہے مگر کئی لو گ ہیں جو اپنی جان سے بڑھ کر اپنی اولاد سے زیادہ محبت کرتے ہیں اور کئی ایسی طبائع ہیں جو اپنے دل اوراپنی جان کی نسبت مال سے زیادہ پیا رکرتے ہیں۔اور کئی اس فطرت کے ہوتے ہیں جواپنی عزت و ناموس کی خاطراپنی جان تک قربا ن کردینے سے دریغ نہیں کرتے۔توخالی ساری جان ،سارے دل اورساری عقل کے لفظ کے اند ر ہرقسم کی قربانی اورخدا تعالیٰ سے کامل محبت جس کو عدل کالفظ ظاہرکرتاہے نہیں آسکتی۔چنانچہ اللہ تعالیٰ نے قرآن مجید میں دوسری جگہ مختلف قسم کے جذبا ت کویوں بیان فرمایا ہے قُلْ اِنْ كَانَ اٰبَآؤُكُمْ وَ اَبْنَآؤُكُمْ وَ اِخْوَانُكُمْ وَ اَزْوَاجُكُمْ وَ عَشِيْرَتُكُمْ وَ اَمْوَالُ ا۟قْتَرَفْتُمُوْهَا وَ تِجَارَةٌ تَخْشَوْنَ كَسَادَهَا وَ مَسٰكِنُ تَرْضَوْنَهَاۤ اَحَبَّ اِلَيْكُمْ مِّنَ اللّٰهِ وَ رَسُوْلِهٖ وَ جِهَادٍ فِيْ سَبِيْلِهٖ فَتَرَبَّصُوْا حَتّٰى يَاْتِيَ اللّٰهُ بِاَمْرِهٖ١ؕ وَ اللّٰهُ لَا يَهْدِي الْقَوْمَ الْفٰسِقِيْنَ( التوبۃ :۲۴)کہہ دے کہ اگرتمہیں اپنے آباؤاجداد یااپنی اولاد یااپنے بھائی یااپنی بیویاں یااپنی قوم اورقبیلہ یااپنے اموال اورتجارتیں خدااوراس کے رسول سے اوراس کی راہ میں جہادسے پیارے ہیں توتم وہ چیز نہیں ہوجوقبول کئے جانے کے لائق ہوپس انتظارکرو یہاں تک کہ خدا تعالیٰ کافیصلہ آجائے۔اللہ تعالیٰ فاسق قوم کوکبھی کامیاب نہیں کرتا۔

فطرت انسانی کی محبوب ترین اشیاء کی تفصیل دیکھو اس میں ہرقسم کے انسانوں کے لئے خدا تعالیٰ سے محبت کامعیار بتادیاہے۔بعض لوگ جن میںاحسان کی قدر کامادہ زیادہ ہوتاہے انہیں اپنے ماں باپ سے زیادہ محبت ہوتی ہے۔قرآن مجید نے ان لوگوں کے لئے فرمایاکہ قُلْ اِنْ کَانَ اٰبَآؤُکُمْ اگرتم خداکے مقابلہ میں اپنے آباء سے زیادہ محبت کرتے ہو توتم ابھی تک مومن نہیں۔بعض لوگوں کے اندر بقائے نسل کاتقاضابہت نمایاں ہوتا ہے اوروہ اپنی اولاد کو سب سے زیادہ پیا رکرتے ہیں ایسے لوگوں کے لئے ’’ابناء کم ‘‘ کالفظ فرماکر اس طرف اشار ہ فرمایا کہ جب تک تم اپنی اولاد سے بھی بڑھ کر خدا سے محبت نہ کروگے اس وقت تک تمہاراایمان قبولیت کے مقام پر نہیں پہنچ سکتا۔پھر کئی لوگوں کو جتھا سب سے پیارالگتاہے۔ایسے لوگوں کے لئے’’اِخْوَانُكُمْ‘‘کالفظ رکھ کر فرمایاکہ جب تک تم اپنے بھائیوںسے بھی زیادہ خدا تعالیٰ سے محبت نہ کروتم اللہ تعالیٰ کاقرب حاصل نہیں کرسکتے۔کئی ایسے ہوتے ہیں کہ جن پر شہوت کاغلبہ ہوتاہے۔اورانہیں اپنی بیویاں دنیا میں سب سے زیادہ پیاری ہوتی ہیں۔ایسے لوگوں کے لئے ’’اَزْوَاجُكُمْ‘‘کالفظ رکھا گیا اوربتایاگیا کہ اس صورت میں جب تک تم اپنی بیویوں کی محبت کو اللہ تعالیٰ کی محبت کے تابع نہ کروگے تم اللہ تعالیٰ کی رضاحاصل نہیں کرسکتے۔بعض لوگ اپنے قبیلے اورخاندان کو سب چیزوں پر ترجیح دیتے ہیں ان کے لئے ’’عَشِيْرَتُكُمْ‘‘کالفظ فرماکرتوجہ دلائی کہ جب تک اللہ تعالیٰ کو اپنے قبیلہ سے بھی زیادہ نہ چاہوگے اللہ تعالیٰ کاقرب حاصل نہیں کرسکتے۔بعض ایسے بخیل ہوتے ہیں کہ جنہیں روپیہ اپنی اولاد اورجان سے زیادہ عزیزہوتاہے۔بیسیوں ایسے لوگ دیکھے گئے ہیں جنہوں نے باوجود مالدارہونے کے اپنی اولاد کے لئے کوئی دوائی تک منگاکرنہ دی اورو ہ ان کے سامنے تڑپ تڑپ کرمرگئی توایسے لوگوں کے لئے فرمایاکہ اپنے اموال کو بھی خدا تعالیٰ کی محبت پر مقدم نہ رکھو ورنہ کبھی نیکی کا اعلیٰ مقام نہ پاسکو گے۔بعض لوگ اس طبیعت کے ہوتے ہیں کہ و ہ اپنے ملک اوروطن کی خدمت کو اپنی ہرایک چیز پر مقدم سمجھتے ہیں اوران کانعرہ ہی حُبُّ الْوَطَنِ مِنَ الْاِیْمَانِ ہواکرتاہے۔جیساکہ ہمارے ملک میں ہجرت کے زمانہ میں ہزاروں لوگ اپنی اولاد،جائداد اوراموال چھوڑ کر ملک کی محبت کے نام پر ملک بدر ہوگئے۔ایسے لوگوں کے لئے فرمایاکہ اگرتمہیں اپنے وطن اورگھر خدا سے زیادہ پیارے ہیں توتم ابھی مومن نہیں ہو۔قرآن کریم نے عد ل کی یہ مختصرسی تشریح فرمائی ہے اب اس تعریف کے مقابلہ میں ’’سارے دل ساری عقل

اورساری جان‘‘والی بات کیا حقیقت رکھتی ہے ؟ متی کے اس حکم کادوسراحصہ یہ ہے۔’’دوسرااس کی مانند یہ ہے کہ اپنے پڑوسی سے اپنے برابر محبت رکھ۔‘‘اول تویہی خلاف عقل ہے کہ اس حکم کو پہلے کی مانند قرار دیاجائے بے شک یہ ضروری حکم ہے مگر اسے پہلے حکم کی مانند قرار نہیں دیاجاسکتا۔خدا تعالیٰ بہرحال مقدم ہے۔مانند ماننے کاتویہ مطلب ہے کہ اگر کبھی خدا تعالیٰ کاحکم اورپڑوسی کی خواہش ٹکراجائیں توہم ہاتھ پر ہاتھ رکھ کر بیٹھ جائیں اورکہیں کہ یہ دونوں پہلو برابر ہیں یہ بھی ویساہی پیاراہے اوروہ بھی۔ایک کودوسرے پر کس طرح ترجیح دی جائے۔عیسائیت کی تعلیم کا معیار صفت عدل سے بڑھ کر نہیں اورپھر یہ حکم بھی عدل سے اوپر نہیں جاتا۔کیونکہ اس میں ہرشخص کو یہ حکم دیاگیا ہے کہ وہ اپنے پڑوسی سے اپنے جیسی محبت کرے۔توگویایہ وہ پہلا مقام ہے جس کواسلام نے عدل قرار دیا ہے یازیادہ سے زیادہ احسان کا مقام ہے مگر اسلام اس مقام سے انسان کو اوپر لے جاتاہے اورفرماتا ہے کہ نہ صرف تم عدل کرو اورنہ صرف احسان کرو بلکہ تم بنی نوع انسان سے ایسا سلوک کرو جس میں کسی قسم کی ریاء یابدلے کی خواہش کاشائبہ بھی نہ ہو۔جس طرح ماں اپنے بچہ سے محبت کرتی ہے وہ اُسے اپنے برابرنہیں چاہتی بلکہ اپنے آپ کو اس کے آرام کے لئے قربان کردیتی ہے۔اس کے علاوہ قرآن کریم نے اس آیت میں نیکی اوربدی کے جومدارج بیان فرمائے ہیں اورپھر جو ان کی ترتیب بیان فرما کر ان سے بچنے کی راہنمائی کی ہے وہ انجیل میں کہا ں؟پھر قرآن مجید نے اس حکم میں مختلف فطرتوں کالحاظ رکھتے ہوئے ایک جامع تعلیم دی ہے۔مگرانجیل میں ان سب باتوں کو نظرانداز کردیاگیاہے۔پس قرآن کریم کی تعلیم ہی جامع۔کامل۔قابل عمل اوراعلیٰ ہے۔وَ اَوْفُوْا بِعَهْدِ اللّٰهِ اِذَا عٰهَدْتُّمْ وَ لَا تَنْقُضُوا الْاَيْمَانَ اور(چاہیے کہ )اللہ(تعالیٰ)کے (ساتھ کئے ہوئے اپنے )عہد کو جب تم نے (اس سے کو ئی )عہد کیا ہوپوراکر و بَعْدَ تَوْكِيْدِهَا وَ قَدْ جَعَلْتُمُ اللّٰهَ عَلَيْكُمْ كَفِيْلًا١ؕ اِنَّ اورقسمو ںکوانہیں پختہ کرنے کے بعد جبکہ تم نے اللہ(تعالیٰ)کو (اس کی قسم کھا کر )اپنا ضامن بنالیا ہے مت

اللّٰهَ يَعْلَمُ مَا تَفْعَلُوْنَ۰۰۹۲ توڑو۔جوکچھ تم کرتے ہو اللہ(تعالیٰ اُسے )یقینا جانتاہے۔حلّ لُغَات۔کَفِیْلٌ: کَفَلَ الرَّجُلَ والصَّغِیرَ (کَفْلًا وَکَفَالَۃً)عَالَہٗ وَاَنْفَقَ عَلَیْہِ وَقَامَ بِہٖ۔کسی کی پرورش کی اوراس کے اخراجات کواٹھایا۔اس سے اسم فاعل کَافِلٌ ہے۔کَفَلَ بِالْمَالِ (کَفْلًا وَکُفُوْلًا)ضَمِنَہٗ۔کسی مال کاضامن ہو ا۔اوراس سے صیغہ صفت کَفِیْلٌ آتاہے کفیل کے معنے ضامن کے ہیں۔کَافِلٌ اورکَفِیْلٌ ایک ہی معنے رکھتے ہیں۔نیز لفظ کَفِیْلٌ مذکرومؤنث دونوںکے لئے استعمال ہوتاہے کہتے ہیں رَجُلٌ کَفِیْلٌ۔وَامْرَاَۃٌ کَفِیْلٌ۔اورلیثؔنے کَفِیْلٌ اورکَافِلٌ کے درمیان فرق کیا ہے۔کہتاہےکہ کَفِیْلٌ ضامن کو کہتے ہیں اورکَافِلٌ وہ شخص ہوتا ہے جو کسی کے اخراجات برداشت کرتاہے۔(اقرب) تفسیر۔عہد اللہ کی تشریح بِعَهْدِ اللّٰهِ۔عہداللہ سے کیا مراد ہے۔اس کی تشریح دوسری جگہ قرآن شریف میں آئی ہے (۱)اللہ تعالیٰ فرماتا ہے۔’’اِنَّ الَّذِیْنَ یُبَایِعُوْنَکَ اِنَّمَایُبَایِعُوْنَ اللّٰہَ یَدُاللّٰہِ فَوْقَ اَیْدِیْھِمْ فَمَنْ نَکَثَ فَاِنَّمَایَنْکُثُ عَلیٰ نَفْسِہٖ وَمَنْ اَوْفٰی بِمَاعَاھَدَ عَلَیْہُ اللّٰہَ فَسَیُؤْتِیْہِ اَجْرًاعَظِیْمًا ‘‘ (الفتح :۱۱) وہ لوگ جوتیری بیعت کرتے ہیں وہ یقیناً اللہ کی بیعت کرتے ہیں اوراللہ کی مدد ان کے ساتھ ہوتی ہے۔پھر جو شخص اس بیعت کوتوڑ دیتاہے وہ اپنے نفس کانقصان کرتاہے اورجواس ’عہداللہ‘ کوپوراکرتاہے تواس کو خدا تعالیٰ اجرعظیم دے گا۔عہد اللہ سے مراد اسلام قبول کرنا ہے اس آیت سے معلو م ہواکہ ’’عہداللہ ‘‘ سے مراد اسلام ہے۔آنحضرت صلی اللہ علیہ وآلہٖ وسلم کی زندگی میں آپ کی بیعت مراد ہوتی تھی اورآپ کے بعد اسلام میں داخل ہونا۔(۲)اللہ تعالیٰ کفار کاقول نقل کرتے ہوئے فرماتا ہے وَقَالَتْ طَّآئِفَۃٌ مِّنْ اَھْلِ الْکِتٰبِ اٰمِنُوْا بِالَّذِیْ اُنْزِلَ الآیہ(ال عمران:۷۳)۔کہ کفار کہاکرتے تھے کہ تم صبح کے وقت مسلمان بن جائو اورشام کو مرتد ہوجانا۔اسی تسلسل کے ضمن میں چند آیات کے بعد فرماتا ہے بَلٰى مَنْ اَوْفٰى بِعَهْدِهٖ وَ اتَّقٰى فَاِنَّ اللّٰهَ يُحِبُّ الْمُتَّقِيْنَ۔اِنَّ الَّذِيْنَ يَشْتَرُوْنَ بِعَهْدِ اللّٰهِ وَ اَيْمَانِهِمْ ثَمَنًا قَلِيْلًا اُولٰٓىِٕكَ لَا خَلَاقَ لَهُمْ فِي الْاٰخِرَةِ وَ لَا يُكَلِّمُهُمُ اللّٰهُ وَ لَا يَنْظُرُ اِلَيْهِمْ يَوْمَ الْقِيٰمَةِ وَ لَا يُزَكِّيْهِمْ١۪ وَ لَهُمْ عَذَابٌ اَلِيْمٌ(اٰل عمران:۷۷۔۷۸)یوں نہیں جو تم کہتے ہو بلکہ بات یوں ہے کہ جواپنے عہد کوپوراکرے اورتقویٰ سے کام لے تو(اس کاانجام اچھا ہوگا کیونکہ)اللہ متقیوں سے پیارکرتاہے۔جولوگ اللہ تعالیٰ

کے عہد اوراپنی قسموں کے بدلہ میں دنیوی فوائد اٹھاتے ہیں یقیناًان کے لئے آخرت میں کوئی حصہ نہ ہوگااور اللہ تعالیٰ ایسے لوگوں سے کلام نہ کرے گااورنہ قیامت کے دن ان کی طرف(محبت سے)دیکھے گا۔اورنہ انہیں پاک قرار دے گااورانہیں دردناک عذا ب ملے گا۔ان آیات سے بھی ظاہر ہے کہ ’’عہداللہ‘‘سے مراداسلام قبول کرناہے۔(۳)پھر فرمایا ہے وَ لَقَدْ كَانُوْا عَاهَدُوا اللّٰهَ مِنْ قَبْلُ لَا يُوَلُّوْنَ الْاَدْبَارَ١ؕ وَ كَانَ عَهْدُ اللّٰهِ مَسْـُٔوْلًا (الاحزاب: ۱۶)۔فرمایا کہ ان لوگوں نے لَا يُوَلُّوْنَ الْاَدْبَارَ کاعہد کیا تھا مگراسے پورانہ کیا۔اوراللہ تعالیٰ سے جوعہد کئے جاتے ہیں ان کے توڑنے پرضرورپرسش ہوتی ہے۔لیکن جب ہم قرآن کریم میں دیکھتے کہ ان کا یہ عہد کہا ں مذکور ہے تومنافقوں کی طرف سے اس کا ذکر قرآ ن کریم میں کہیں نہیں ملتا۔ہاں اللہ تعالیٰ کاحکم ملتاہے۔چنانچہ سورۃ انفال میں ہےيٰۤاَيُّهَا الَّذِيْنَ اٰمَنُوْۤا اِذَا لَقِيْتُمُ الَّذِيْنَ كَفَرُوْا زَحْفًا فَلَا تُوَلُّوْهُمُ الْاَدْبَارَ(الانفال :۱۶)کہ اے مومنو! جب کفار سے تمہارامقابلہ ایسی حالت میں ہو کہ تم مل کر حملہ کرنے لگے ہوتوکبھی پیٹھ نہ پھیراکرو۔یہ اللہ تعالیٰ کااپنا حکم ہے منافقوں کاکوئی ایساعہد قرآن وحدیث میں مذکورنہیں۔آنحضرت ؐ کے زمانہ میں عہد اللہ سے مراد بیعت والا عہد تھا پس معلو م ہواکہ ’’عہداللہ‘‘سے مراد وہی بیعت والاعہد تھا جس میں سب نیک باتوں کے ماننے کاعہد کیا گیا تھا۔اورسب احکام الٰہی اس میں شامل تھے۔چنانچہ سور ۃ توبہ میں ا س عہد کی تشریح یوں کی گئی ہے اِنَّ اللّٰهَ اشْتَرٰى مِنَ الْمُؤْمِنِيْنَ اَنْفُسَهُمْ وَ اَمْوَالَهُمْ بِاَنَّ لَهُمُ الْجَنَّةَ١ؕ يُقَاتِلُوْنَ فِيْ سَبِيْلِ اللّٰهِ فَيَقْتُلُوْنَ وَ يُقْتَلُوْنَ١۫ وَعْدًا عَلَيْهِ حَقًّا فِي التَّوْرٰىةِ وَ الْاِنْجِيْلِ وَ الْقُرْاٰنِ١ؕ وَ مَنْ اَوْفٰى بِعَهْدِهٖ مِنَ اللّٰهِ فَاسْتَبْشِرُوْا۠ بِبَيْعِكُمُ الَّذِيْ بَايَعْتُمْ بِهٖ١ؕ وَ ذٰلِكَ هُوَ الْفَوْزُ الْعَظِيْمُ۔(التوبۃ :۱۱۱)کہ اللہ تعالیٰ نے مومنوں کی جانیں اوران کے اموال اس وعد ہ کے مقابل کہ انہیں جنت ملے گی خرید لئے ہیں۔چنانچہ اس سودے کی وجہ سے وہ اللہ تعالیٰ کے دین کے لئے جنگ کرتے ہیں جس کے نتیجہ میں کبھی تو وہ دشمن کو قتل کردیتے ہیں کبھی خود مارے جاتے ہیں۔یہ جنت دینے کاوعدہ اللہ تعالیٰ کی طرف سے ایک پکا وعد ہ ہے جوتورات وانجیل اورقرآن سب میں بیان ہواہے۔اورجو اللہ تعالیٰ سے عہد کرکے اسے پوراکرتے ہوں ہم انہیں کہتے ہیں کہ اس نفع مند بیع پر جو تم نے کی ہے خوش ہوجائو اوریہ بیع ایک بہت بڑی کامیابی ہے۔غرض قرآن مجید سے یہی ثابت ہوتا ہے کہ ’’عہداللہ ‘‘سے مراد اسلام ہی ہے اوراِذَاعَاھَدْ تُّمْ کے معنے یہی ہیں کہ جب تم مسلمان ہوئے ہو تواسلام کی تعلیم پرپورے طورسے عمل کرو۔چونکہ اسلام کی تعلیم کاخلاصہ اِنَّ اللّٰہَ

یَاْمُرُ والی آیت میں بتایاگیاتھا اس لئے اس کے بیان کرنے کے بعد اس آیت میں یہ تاکید کی گئی ہے کہ اب تم لوگ اس تعلیم کے مطابق عملدرآمد کرو۔اس آیت کے پہلے حصہ میں یہ بتایا ہے کہ خدا تعالیٰ کے ساتھ تم جو عہد کرتے ہو اس کو بھی پوراکرو۔اورجوتمہارے آپس میں معاہدات ہوتے ہیں ان کو بھی مت توڑو۔یعنی جب تم خدا تعالیٰ کوضامن کرکے کسی انسان سے معاہد ہ کروتوا س کو ضرو ر پوراکرو۔کیونکہ تم خدا تعالیٰ کو ضامن مقررکرچکے ہو۔پس خدا کانام لے کر کئے ہوئے معاہد ہ کو اگر تم توڑوگے توگویا خدا تعالیٰ کو بدنام کرنے والے بنوگے۔اورخدا تعالیٰ کوغیرت آئے گی اوراسے تمہیں سزادینی پڑے گی۔اس آیت میں پھر اسی مضمون کوقائم رکھا گیا ہے جو پہلی آیت میں بیان ہواتھا۔یعنی حقوق اللہ اورحقوق العباد دونوں کوپوراکرنے کا حکم دیاگیاہے۔گویااسلام اورعہدالٰہی اللہ تعالیٰ اوربندوں کے صحیح تعلق پیداکرنے کے دونام ہیں۔حقوق اللہ اور حقوق العباد کو پورا کرنے کا حکم یہاں جویہ فرمایا کہ اس عہد کو پوراکرو جس میں تم نے اللہ تعالیٰ کو ضامن مقرر کیاہو اس کا یہ مطلب نہیں کہ دوسرے عہد پورے نہ کرو توکوئی حرج نہیں۔کیونکہ خدائی عہد میں سچ بولنا شامل ہے۔بلکہ ان الفاظ سے اس مضمون کی طرف اشارہ کیاہے کہ انہی عہدوں کی پابندی انسان پر فرض ہے کہ جن کاضامن اللہ تعالیٰ ہو۔جن عہدوں کاضامن اللہ تعالیٰ نہ ہو ان کاپوراکرنا غیرضروری ہی نہیں بلکہ گناہ ہے۔مطلب یہ کہ ہروہ عہدجو انصاف اورسچائی پر مبنی ہو اس کا اللہ تعالیٰ ضامن ہوتاہے۔کیونکہ وہ ہرمومن سے سچائی کاعہد لے چکا ہے اورجو شخص اس عہد کے بعد کسی انسان سے کسی جائزامرکااقرار کرتا ہے وہ اس عہد کے ساتھ گویا خدا تعالیٰ سے بھی ایک عہد باندھتاہے اورخدا تعالیٰ ا س عہد کاضامن ہو جاتا ہے۔لیکن جو عہد کسی ناپاک امریاظلم کے متعلق ہو ا س کاپوراکرناضرور ی نہیں بلکہ گناہ ہے اللہ تعالیٰ اس عہد کا ضامن نہیں کیونکہ وہ گناہ اورناپاکی کے لئے ضامن نہیں ہوتا۔غرض اللہ تعالیٰ کے ضامن ہونے سے اس طرف اشارہ نہیں کیا کہ جن عہدوں پرقسم کھائو صرف انہیں پوراکرو۔بلکہ اس مضمون کی طرف اشار ہ کیا ہے کہ سب وہ عہد جو عدل ،احسان اورایتاء ذی القربیٰ کے مطابق ہوں انہیں پوراکرو اوروہ عہد جن میں فحشاء ،منکر اوربغی کارنگ پایا جاتاہوانہیں پورانہ کرو۔ان کے بارہ میں تم سے کوئی سوال نہ ہوگا۔کیونکہ اللہ تعالیٰ ان کاضامن نہیں۔بلکہ اُن سے منع کرتا ہے۔مذکورہ بالا حکم میں ان لوگوں کے لئے ہدایت ہے جو اگر کسی ناجائز امر پرقسم کھا لیتے ہیں توعہد کی پابندی کے نام سے اس پر مصر رہتے ہیں۔

وَ لَا تَكُوْنُوْا كَالَّتِيْ نَقَضَتْ غَزْلَهَا مِنْۢ بَعْدِ قُوَّةٍ اَنْكَاثًا١ؕ اور تم اس ڈر سے کہ کوئی قوم ایسی(نہ)ہوجائے جو (کسی)دوسری قوم سے زیادہ طاقتورہو اپنی قسموں کو آپس میں تَتَّخِذُوْنَ اَيْمَانَكُمْ دَخَلًۢا بَيْنَكُمْ اَنْ تَكُوْنَ اُمَّةٌ هِيَ دھوکا کرنے کا ذریعہ بناتے ہوئے اس عورت کی طرح مت بنو جس نے اپنا(محنت سے کاتاہوا)سوت (اس کے) اَرْبٰى مِنْ اُمَّةٍ١ؕ اِنَّمَا يَبْلُوْكُمُ اللّٰهُ بِهٖ١ؕ وَ لَيُبَيِّنَنَّ لَكُمْ مضبوط ہوچکنے کے بعد توڑ کر پارہ پارہ کردیاتھا اس (ذریعہ )سے اللہ (تعالیٰ عنقریب)تمہاراامتحان لے يَوْمَ الْقِيٰمَةِ مَا كُنْتُمْ فِيْهِ تَخْتَلِفُوْنَ۰۰۹۳ گااورجس با ت کے متعلق تم آپس میں اختلاف کرتے رہے ہوگے اس (کی حقیقت )کووہ قیامت کے دن ضرور تمہارے سامنے کھول(کر رکھ )دے گا۔حلّ لُغَات۔نَقَضَتْ نَقَضَتْ نَقَضَ سے مؤنث کاصیغہ ہے۔اورنَقَضَ الْبِنَاءَ کے معنے ہیں۔ھَدَمَہٗ۔عمارت کو گرادیا۔نَقَضَ الْعَظْمَ:کَسَرَہُ۔ہڈی کو توڑ دیا۔نَقَضَ الْحَبْلَ:حَلَّہُ۔رسہ کے بل کو کھول دیا۔(اقرب) غَزْلَھَا: غَزَلَتِ الْمَرْأَۃُ الْقُطْنَ وَالصُّوْفَ: مدَّتْہُ وَفَتَلَتْہُ خِیْطَانًا۔عورت نے سُوت کاتا۔اَلْغَزْلُ مصدر ہے۔اورغزل سُوت کوبھی کہتے ہیں۔(اقرب) انکاث اَنْکَاثٌ نِکْثٌ کی جمع ہے۔اَلنِّکْثُکے معنے ہیں مَانُقِضَ مِنَ الْاَکْسِیَۃِ وَالْاَخْبِیَۃِ لِیُغْزَلَ ثَانِیَۃً کچے تاگے۔اس کی جمع اَنْکَاثٌ آتی ہے۔(اقرب) دَخَلًا الدَّخَلُ کے معنے ہیں مَادَاخِلُکَ مِنْ فَسَادٍ فِی الْعَقْلِ اَوْ فِی الْجِسْمِ۔جسم اورعقل میںخرابی۔اَلْـخَدِیْعَۃُ وَالْمَکْرُ۔دھوکااورفریب اورآیتلَا تَتَّخِذُوْۤا اَيْمَانَكُمْ دَخَلًۢا بَيْنَكُمْ میں انہی معنوں میں آیاہے اوروہاں پر مفعول لہٗ ہے۔(اقرب) اَرْبٰی اَرْبٰی رَبَی سے اسم تفضیل ہے اوررَبَا(یَرْبُو)الْمَالَ کے معنے ہیں زَادَوَنَمَا۔مال زیادہ ہوگیااوربڑھ

گیا۔اَرْبَی عَلَیْہِ کَذَا۔یعنی کسی سے آگے بڑھ گیا(اقرب)پس اَنْ تَكُوْنَ اُمَّةٌ هِيَ اَرْبٰى مِنْ اُمَّةٍ کے معنے ہوں گے کہ ایک قوم دوسری سے زیاد ہ طاقتورہے۔یَبْلُوْکُمْ۔یَبْلُوْ بَلَی سے مضارع واحد مذکر غائب کاصیغہ ہے اوربَلَاہُ یَبْلُوْہُ بَلَاءً کے معنے ہیں۔جَرَّبَہُ وَاخْتَبَرَہُ۔اس کاامتحان لیا (اقرب)پس یَبْلُوْکُمْ کے معنے ہوں گے کہ وہ تمہاراامتحان کرتا ہے۔تفسیر۔اس آیت کا مطلب پہلی آیت سے متعلق ہونے کی صورت میں اس آیت کو ایک نیامضمون بھی قرار دیاجاسکتاہے اورپچھلی آیت کے مضمون کا تسلسل بھی قراردیاجاسکتاہے۔اگر پہلی آیت کے مضمون کوہی جاری سمجھا جائے تواس کے معنے یہ ہوں گے کہ آپس کے معاہدات کوپوری طر ح سے نبھائو۔اگر تم ان عہدوں کوتوڑو گے تو خدا تعالیٰ نے جوتمہاری مضبو ط جماعت بنادی ہے وہ تباہ ہوجائے گی اورآپس کااعتبار جاتا رہے گا۔معاہدات کی پابندی قومی اتحاد کے قیام کے لئے اشد ضروری ہوتی ہے۔کیونکہ جماعت کاقیام ایک دوسرے سے حسن سلوک پر مبنی ہوتاہے۔اورحسن سلوک اس وقت تک رہتا ہے جب تک لوگ معاہدات کی پابند ی کریں۔جب لو گ معاہدات پو رے نہ کریں۔توپہلے بددلی اوراس کے بعد بد ظنی پیداہوجاتی ہے اورایک شخص کے برے عمل کے نتیجہ میں دوسرے سینکڑوں آدمی قومی نظام کے فوائد سے محروم رہ جاتے ہیں۔پس چاہیے کہ انسان جس طر ح بھی ہوسکے اپنے وعدوں کو پوراکرے تاکہ اعتبارقائم ہو اورلوگ برضاورغبت ایک دوسرے کی امداد کے لئے تیار ہوں اورقوم ترقی کرسکے۔قومی عہد کی تشریح انفرادی عہدکے علاوہ ایک قومی عہد بھی ہوتاہے یعنی افراد ایک شخص کے ہاتھ پر قومی ترقی کے لئے عہد کرتے ہیں جس کانام خلافت ہے۔وہ عہد بھی اس کے اندر شامل ہے اوراس آیت میں اس کی طرف بھی اشارہ پایا جاتا ہے۔فرماتا ہے کہ خدا تعالیٰ نے تمہاری ایک جماعت بنادی ہے اورایک نظام قائم کردیا ہے۔اور تم نے ا س نظام کی پابندی کی قسمیں کھائی ہیں۔اب اس کی پابندی کرتے رہنا۔ورنہ نتیجہ یہ ہوگاکہ تمہاری قربانیوں سے جورعب اسلام کاقائم ہواہے وہ جاتارہے گا۔اورپھر نئے سرے سے محنت کرنی پڑے گی۔یہ ایک بہت بڑاسیاسی نکتہ بتایاہے چند آدمیوں کے تفرقہ سے سب نظام برباد ہو جاتا ہے اورقوم کی محنت اکارت جاتی ہے اورنئے سرے سے محنت اورقربانی کی ضرورت پیش آتی ہے۔مگر اُدھڑی ہو ئی چیزپھر اس طرح نہیں جڑتی جیسے کہ نئی اورپھٹے ہوئے دل پھر ا س طرح نہیں ملتے جس طرح کہ وہ جوہمیشہ متصل رہے۔اس لئے اس عہد کے قیام کے لئے نہایت سخت کوشش کی ضرورت ہوتی ہے۔

دوسری اقوام سے بھی معا ہدات کی پابندی لازمی ہے ا س آیت کے الفاظ سے یہ بھی معلوم ہوتاہے کہ اس میں غیر قوموں کے ساتھ معاہدات کا بھی ذکر ہے۔اس مضمون کے لحاظ سے اس آیت کو ایک مستقل مضمون قراردینا ہوگا۔یعنی لَاتَکُوْنُوْاسے نیامضمون شروع سمجھا جائے گا۔اورمطلب یہ ہو گا کہ جس طر ح اللہ تعالیٰ کے عہد اوراپنے اندرونی عہد کی پابند ی لازمی ہے۔اسی طرح دوسری اقوام کے ساتھ جو عہدکئے گئے ہوں ان کی پابند ی بھی ضروری ہے۔ان معاہدات کی نگہداشت رکھو ورنہ دنیا کاامن برباد ہوجائے گا۔چنانچہ دَخَلًا کا لفظ بھی اسی بات کو ظاہر کرتا ہے اور کَالَّتِیْ نَقَضَتْ غَزْلَهَا مِنْۢ بَعْدِ قُوَّةٍ ٍ سے بھی یہی مراد ہے کہ امن کے قائم ہونے کے بعد فساد کی صورت پیدانہ کرو۔اس صورت میں اس آیت کے تین معنے ہوسکتے ہیں۔دوسری قوم سے معاہدہ کرتے وقت صفائی نیت ضروری ہے (۱)یہ جائز نہیں کہ تم کسی دوسری قوم سے اس لئے صلح کرلو کہ ابھی وہ طاقتور ہے تم اس کامقابلہ نہیں کرسکتے۔معاہدہ کے بعد جب وہ تمہاری طرف سے غافل ہوجائے گی توتم اند رہی اندر تیاری کرکے ایک د ن اس پر حملہ کرکے اسے تباہ کردوگے۔سیاسی دنیا ا س قسم کی حرکات ہمیشہ سے کرتی آئی ہے۔اسلام کی بنیاد چونکہ عدل،احسان اورایتاء ذی القربیٰ پرہے وہ اس فعل کو خواہ وہ دشمن اسلام کے مقابل پر کیا جائے ناپسند کرتااوراس سے منع فرماتا ہے۔ایسے معاہدے ناجائز ہیں جو کسی قوم کو کمزور کر کے اس کے ملک پر قبضہ کرنے کی نیت سے ہوں (۲)دوسرے معنے اس کے یہ ہیں کہ ایسے معاہدات نہیں کرنے چاہئیں کہ جن کی غرض یہ ہو کہ کسی کمزورقوم کے ساتھ بظاہر تومعاہدہ کیا جائے اوردراصل غرض اس کے ملک پر قبضہ کرنے کی ہو۔جیسا کہ یورپین قومیں آج کل کررہی ہیں۔(۳)تیسرے معنے اس کے یہ ہیں کہ ایسے معاہدات ہرگز جائز نہیں جن کی غرض معاہد قوم کو کمزورکرناہو۔چاہیے کہ جس سے صلح کرو اس سے پوری صلح کرو۔اس آیت میں کس قدر زبردست اخلاقی تعلیم دی ہے اوربتایا ہے کہ قومی برتری بے شک اچھی چیز ہے لیکن دھوکے اورفریب سے اس کاحصو ل ہرگز جائز نہیں۔معاہدات کی غرض قیام امن ہوناچاہیےنہ کہ دوسرے کا نقصان یا فریب دہی۔آج کل یورپ کی تباہ شدہ حالت معاہدہ کی اسلامی تعلیم کو چھوڑنے کی وجہ سے اس کے مقابل

میں دیکھو یورپ آج کیا کررہا ہے۔معاہدات کرکے کمزورقوموں کو تباہ کیا جاتا ہے۔جیسے چین میں ہوا۔مصر میں ہوا۔ترکی میں ہوااورایران میں ہوا۔اورایک زمانہ میں ہندوستان میں بھی ہوچکا ہے۔اورآج کل پھر پولینڈ۔فرانس۔فن لینڈ۔ناروے۔رومانیہ۔چیکوسلواکیہ وغیرہ ممالک سے ایسے ہی واقعات پیش آرہے ہیں۔معاہد ہ کے متعلق مسلمانوں کو اللہ تعالیٰ کے احکام غرض اللہ تعالیٰ نے قرآن کریم میں مسلمانوںکو حکم دیا ہے کہ :۔(۱)کوئی معاہد ہ اس نیت سے نہ کیا جائے جس کامقصد کسی دوسری طاقت کودھوکا دے کرکمزورکرنا ہو۔(۲)کسی کمزورقوم سے کو ئی ایسا معاہدہ نہ کیاجائے جس کامقصد یہ ہو کہ اس قوم کو اس معاہدہ کے پیچ میں لاکر اپنے ماتحت کرلیا جائے۔(۳)کوئی معاہد ہ اس نیت سے نہ کیاجائے جس کامقصد کسی دوسری طاقت کو ترقی سے روکنا ہو۔قیام امن کے لئے کیا ہی لطیف تعلیم دی ہے۔اگر اس کی پابندی کی جائے توتما م فسادات یکدم مٹ سکتے ہیں۔اتحادیوں اور ائتلافیوںکی سابق عالمگیراورموجودہ لڑائی ایسے ہی معاہدات کے نتیجہ میں پیداہوئی اورہورہی ہے۔معاہدہ وارسائی نہ ہوتا تویہ نئی جنگ بھی نہ ہوتی قرآن کریم فرماتا ہے کہ ایسے معاہدات جائز ہی نہیں۔معاہد ہ نیک نیتی پر مبنی ہوناچاہیے اوراس کاواحد مقصد قیام امن ہوناچاہیے۔اِنَّمَا يَبْلُوْكُمُ اللّٰهُ بِهٖ میں اللہ تعالیٰ نے بتایاہے کہ اے مسلمانو!یہ مواقع بطورامتحان آتے ہیں اللہ تعالیٰ دیکھے گاکہ تم طاقت پا کر اسلام کی اخلاقی تعلیم پر کس طرح کاربند رہتے ہو اوردنیا کی ترقیات تمہیں کہیں دوسری اقوام کے نقش قدم پر تونہیں چلادیتیں۔کس مپرسی کی حالت میں اسلام کی یہ اعلیٰ تعلیم اس کی صداقت کی دلیل ہے یہ مضمون قرآن مجید کی سچائی کاکتنا بڑاثبوت ہے اوراسلام کی برتری کی کیسی عظیم الشان دلیل ہے۔ابھی آنحضرت صلی اللہ علیہ وآلہ وسلم مکہ ہی میں تشریف رکھتے ہیں اورمسلمان ایک چپہ بھر زمین کے بھی مالک نہیں۔مگر اس شان اورعظمت کے ساتھ ایک زبردست حکومت کے احکا م بیان ہورہے ہیں۔اورپھر ایسے رنگ میں کہ ہرعقلمند اورشریف انسان انہیں سن کر اس تعلیم کی برتری کو تسلیم کئے بغیر نہیں رہ سکتا۔کیایہ سچ نہیں کہ آ ج بھی جبکہ تیرہ سوسال گذر چکے ہیں اس کلام کی سچائی ظاہرہورہی ہے۔آج کل کے فسادات اورقوموں کی بے چینیا ں صرف ان احکام کو نظر انداز کردینے کی وجہ سے ہی پیداہورہی ہیں۔

·

آج 10 میں سے 10 باقی