سُوْرَۃُ بَنِیْٓ اِسْرَآءِیْلَ

تفسیر کبیر (جلد ۶), حصہ 7

اِنَّ الْمُبَذِّرِيْنَ۠ كَانُوْۤا اِخْوَانَ الشَّيٰطِيْنِ١ؕ وَ كَانَ الشَّيْطٰنُ اسراف کرنے والے لوگ یقیناً شیطانوں کے بھا ئی ہوتے ہیںاور شیطان لِرَبِّهٖ كَفُوْرًا۰۰۲۸ اپنے رب کا بہت ہی ناشکر گذار ہے۔تفسیر۔فرمایاکہ اگر تم ایساکروگے توناشکری ہوگی۔ہم نے تمہیں یہ مال اسی لئے دیاہے کہ تم اس کو برمحل خرچ کرو اب جو تم اس کو یوں پھینکو گے توا س کے یہ معنے ہوں گے کہ مال کے ساتھ جوذمہ واریاں اللہ تعالیٰ عائد فرماتا ہے ان سے بچناچاہتے ہو اوریہ ایک گنا ہ ہے۔رہبانیت کا ردّ اس آیت میں کس لطیف طریق سے رہبانیت وغیر ہ کارد کیا ہے۔رہبانیت کیا ہے ذمہ واریوں سے بچنے کاایک ذریعہ ہے اوریہ فعل نیکی نہیں کہلا سکتا بلکہ ایک کھلی بدی ہے اورشیطانی فعل ہے۔اللہ تعالیٰ کے احسان کی ناقد ری ہے۔وَ اِمَّا تُعْرِضَنَّ عَنْهُمُ ابْتِغَآءَ رَحْمَةٍ مِّنْ رَّبِّكَ تَرْجُوْهَا اوراگر تواپنے رب کی طرف سے کسی رحمت کی جستجومیں جس کی توامید رکھتا ہوان سے اعراض کرے تو(پھر بھی فَقُلْ لَّهُمْ قَوْلًا مَّيْسُوْرًا۰۰۲۹ انہیں سختی سے رد نہ کر بلکہ)انہیں کوئی نرم بات کہہ دو۔حلّ لُغَات۔مَیْسُوْرًا مَیْسُوْرًاکے معنے ہیں مَایُسِّرُ خِلَافُ الْمَعْسُوْرِوَھُوَ مَصْدَرٌ عَلٰی مَفْعُولٍ بِمَعْنَی الْیُسْرِ۔مَیْسُوْرٌ اسم مفعول بھی ہے اورمصدر بھی اوراس کے معنی ہیں و ہ چیز جوآسان کی گئی ہویاآسانی۔السَّہْلُ۔سہولت۔وَمِنْہُ فَقُلْ لَہُمْ قَوْلًا مَّیْسُوْرًا اورفَقُلْ لَہُمْ قَوْلًامَّیْسُوْرًا میں قَوْلٌ مَیْسُوْرٌکے معنی نرم بات کے ہیں۔(اقرب) تفسیر۔اس آیت کے دومعنے ہیں (۱)جب تم اقرباء مساکین وغیر ہ سے اعراض کرویعنی ان کی مدد نہ

کرسکو۔توا س بات کی ضرور نیت کرلو کہ جب اللہ تعالیٰ دے گاتوضرور دوں گا۔اورساتھ ہی تم ان کویہ بات نرمی سے سمجھا دوکہ توفیق ملنے پر تمہاری ضرورمدد کروں گا۔(۲)دوسرے معنی یہ ہیں کہ اگراللہ تعالیٰ کے فضل کی امید میں یعنی یہ خیال کرتے ہوئے کہ میرادینا ان کی دینی یااخلاقی حالت بگاڑ دے گاغرباء کی مددسے اعراض کرے توتُوان کو نرمی سے سمجھا دے گویا اعراض ابْتِغَآءَ رَحْمَةٍ ہوناچاہیے نہ کہ بخل کی وجہ سے۔مثلاً کوئی ہٹاکٹاآد می سوال کرے اورجس سے سوال کیا جائے وہ اس نیت سے اس کے سوال کو پورانہ کرے کہ قوم میں سوال کی عادت نہ پیداہوجائے تویہ جائز ہے۔مگر اس انکار کاباعث بخل اورکنجوسی نہ ہو۔سائل سے حسن سلوک کی تاکید اسی طرح مثلاً سائل مسر ف ہویا نشہ شراب افیون کی بد عادت میں مبتلاہواس کی مالی مدد سے اگریہ اس وجہ سے باز رہتا ہے کہ میں نے اس کی امداد کی تو اس کی صحت خراب ہوگی ملک میں بدی ترقی کرے گی اورنہ دینے سے اس کی نشہ کی عادت چھوٹے گی اورملک کو بھی فائدہ پہنچے گاتویہ شخص گناہ گار نہ ہوگا۔بلکہ نیکی کامرتکب۔حدیث میں آتاہے بعض ایسے سائلوںکے آنے پر آنحضرت صلی اللہ علیہ وسلم خاموش رہتے یا انہیں سمجھادیتے تھے۔(نسائی کتاب الزکوٰۃ باب مسئلۃ القوی المکتسب) وَ لَا تَجْعَلْ يَدَكَ مَغْلُوْلَةً اِلٰى عُنُقِكَ وَ لَا تَبْسُطْهَا كُلَّ اورتونہ (توبخل سے )اپنے ہاتھ کو باند ھ کراپنی گردن میں ڈال لے۔اورنہ(اسراف میں پڑ کر)اسے بالکل کھول الْبَسْطِ فَتَقْعُدَ مَلُوْمًا مَّحْسُوْرًا۰۰۳۰ دے۔ورنہ (یاتو)توملامت کا نشانہ بن کر (اوریاپھر )تھک کربیٹھ جائے گا۔حلّ لُغَات۔مَغْلُوْلَۃً۔مَغْلُوْلَۃً غَلَّ سے اسم مفعول مؤنث کاصیغہ ہے۔اورغَلَّ فُلَانًا کے معنے ہیں : وَضَعَ فِی یَدِہٖ اَوْعُنُقِہٖ الْغُلَّ۔اس کے ہاتھوں یاگردن میں طوق ڈالا (اقرب)پس لَاتَجْعَلْ یَدَکَ مَغْلُوْلَۃً کے معنے ہوں گےتو اپنے ہاتھو ں کو باندھ کر اپنی گردن میں نہ ڈال لے۔مَحْسُوْرًا۔مَحْسُوْرًا حَسَرَ سے اسم مفعول ہے اورحَسَرَالشَّیْءَ کے معنے ہیں۔کَشَفَہُ۔کسی چیز سے پردہ کو ہٹایا۔حَسَرَالْغُصْنَ :قَشَرَہُ۔ٹہنی کے چھلکے کو اتارا۔حَسَرَ الْبَعِیْرَ: سَاقَہُ حَتّٰی اَعْیَاہُ۔اونٹ کو اتنا چلا یاکہ وہ تھک گیا۔حَسَرَ الْبَیْتَ کَـنَسَہُ۔گھر میں جھاڑودیا۔(اقرب) مَحْسُوْرٌ کے معنے ہوں گے۔جھاڑو دیا ہوا۔

ننگا کیاہوا۔تھکایا ہوا۔تفسیر۔اس آیت میں بتایا ہے کہ خرچ کے متعلق اس اصل کو مدنظر رکھو کہ نہ توہاتھ گردن سے بندھا رہے۔یعنی ضرورت کے وقت بھی خرچ کرنے سے دریغ ہو اورنہ ہاتھ ہروقت مال لٹانے کےلئے دراز رہے بلکہ چاہیے کہ تم ضرورت کے مطابق خرچ کروتابے ضرورت خرچ تم کو اس وقت کی نیکی سے محروم نہ کردے جبکہ خرچ کرنے کی کوئی صحیح ضرورت پیداہوگئی ہو۔بے ضرورت خرچ کر نے کے نقصان بے ضرورت خرچ کرنے کے دونقصان بتائے ہیں ایک تویہ کہ جوشخص بے ضرورت خرچ کرتاہے ضرورت کے وقت جبکہ اس کے دوسرے ساتھی خرچ کررہے ہوتے ہیں۔یہ منہ دیکھتا رہ جاتا ہے اورقوم اسے ملامت کرتی ہے کہ آج ملک یاقوم کوضرورت تھی اورآج تم خاموش بیٹھے ہو اوردوسرانقصان یہ کہ اس طرح انسان محسوریعنی ننگاہو جاتا ہے یعنی جب ضرورت کے وقت یہ کام نہیں آسکتا توقوم پر اس کاعیب ظاہرہوجاتا ہے اوروہ سمجھ لیتے ہیں کہ یہ بیوقوف ہے اپنے مال کی حفاظت نہیں کرسکااوریہ بھی کہ یہ دوسروں کا محتاج ہوجاتا ہے۔حَسَرَ الْبَیْتَ کے معنے گھر میںجھاڑو دے کراسے صا ف کردیا کے بھی ہیں۔پس محسور کے معنے یہ بھی ہوسکتے ہیں کہ تواس حالت میں ہو جائے کہ گویا کہ تیرے گھر میں جھاڑ و مل گیا۔اِنَّ رَبَّكَ يَبْسُطُ الرِّزْقَ لِمَنْ يَّشَآءُ وَ يَقْدِرُ١ؕ اِنَّهٗ كَانَ تیرارب یقیناً جس کے لئے چاہتا ہے رزق کو وسیع کردیتا ہے اور(جس کے لئے چاہتا ہے )تنگ کرتا ہے وہ یقیناً بِعِبَادِهٖ خَبِيْرًۢا بَصِيْرًاؒ۰۰۳۱ اپنے بندوں (کے حالات )کوجاننے والا (اور)دیکھنے والا ہے۔تفسیر۔اس میں یہ بتایا کہ خدا تعالیٰ کسی کو فراخی دیتا ہے اور کسی کے رزق میں تنگی کرتا ہے تایہ دیکھے کہ جومالدارہیں وہ غرباء کی کس طرح مددکرتے ہیں۔پس اگرتم دنیاکے اموال کی اس نیت سے حفاظت کرو کہ ان کے ذریعہ سے خدا تعالیٰ کے بندوں کی زیادہ سے زیادہ خدمت کرسکو تویہ ایک بہت بڑی نیکی ہو گی۔

قرآن کریم کی کیا ہی معجزانہ شان ہے کہ ابھی مسلمان مکہ میں تکلیف اٹھارہے تھے کہ اس نے مسلمانوں کے لئے وہ احکام بیان کرنے شروع کردئے جو ان کے لئے ترقی کے زمانہ میں ضروری تھے۔کیااس کے سواجواپنی بات کے پوراکرنے پر کامل طورپر قادر ہو کوئی دوسرااس طریق کو اختیار کرسکتا ہے۔اگر یہ کلام انسان کاہوتا تو مکہ میں اوران حالات میں جن میں سے مسلمان گذر رہے تھے۔یہ الفاظ نکالتے وقت اس کاحلق خشک ہوجاتا اورالفاظ حلق میں ہی اٹک کر رہ جاتے۔وَ لَا تَقْتُلُوْۤا اَوْلَادَكُمْ خَشْيَةَ اِمْلَاقٍ١ؕ نَحْنُ نَرْزُقُهُمْ وَ اور تم مفلسی کے خوف سے اپنی اولاد کوقتل مت کرو۔انہیں (بھی)ہم ہی رزق دیتے ہیں اور تمہیں بھی (ہم ہی دیتے اِيَّاكُمْ١ؕ اِنَّ قَتْلَهُمْ كَانَ خِطْاً كَبِيْرًا۰۰۳۲ ہیں)انہیں قتل کرنا یقیناً(بہت) بڑی خطاہے۔حلّ لُغَات۔اِمْلَاقٌ : اِمْلَاقٌ اَمْلَقَسے مصدر ہے اوراَمْلَقَ الرَّجُلُ کے معنے ہیں اَنْفَقَ مَالَہٗ حَتّٰی اِفْتَقَرَ۔اتنا مال خرچ کیا کہ پھر محتاج و مفلس ہوگیا (اقرب)پس اِمْلَاقٍ کے معنے ہوں گے مال ضائع ہوکر محتاج و مفلس ہوجا نا۔اَلْخِطْأَ۔اَلذَّنْبُ۔قصور۔مَاتَعَمَّدَ مِنْہُ۔جان بوجھ کر کی ہوئی غلطی (اقرب) تفسیر۔پہلے رکوع میں اللہ تعالیٰ نے فرمایاتھا کہ احسان تولوگوں پر کرو لیکن یہ خیال رکھ لو کہ تمہارااحسان کرنااس رنگ پر نہ ہو کہ اس کے نتیجہ میں لوگ بدیوں میں بڑھ جائیں یاتم خود بدی میں پڑ جائو۔آیت لَا تَقْتُلُوْۤا اَوْلَادَكُمْ الخ کا مطلب اب فرماتا ہے کہ لَا تَقْتُلُوْۤا اَوْلَادَكُمْ خَشْيَةَ اِمْلَاقٍ یعنی اس خوف سے کہ اولادپر روپیہ خرچ ہوگاان کو ہلا ک نہ کرو یہ حکم لڑکیوں کے قتل کرنے کے متعلق نہیں ہے کیونکہ قرآن کریم میں لڑکیوں کے قتل کی کسی جگہ بھی یہ وجہ بیان نہیں فرمائی کہ لوگ خرچ کے ڈر سے ان کو قتل کردیتے ہیں۔بلکہ یہ وجہ بتائی ہے کہ ان کی پیدائش کو اپنے لئے ذلت کاموجب سمجھتے ہیں اس لئے ان کو مار ڈالتے ہیں اسی طرح اس آیت کے یہ معنے بھی نہیں ہوسکتے ہیں کہ بوجہ غربت اورتنگی کے اولا دکو قتل نہ کرو۔کیونکہ املاق کے معنی غربت اورتنگی کے

نہیں ہیں۔بلکہ اس کے معنے مال کے خرچ ہونے کے ہیں۔اورآیت کے یہ معنے ہیں کہ ا س ڈرسے نہ ماروکہ روپیہ خرچ ہوگا۔اس جگہ یہ سوال پیدا ہوتا ہے کہ کیا ا س ڈر سے کہ روپیہ خرچ نہ ہو کوئی اولاد کو قتل کرتابھی ہے ؟سوجہاںتک دنیا کا تجربہ ہے اس قسم کے واقعات صحیح الدما غ لوگوں میں توملتے نہیں۔بلکہ ہم دیکھتے ہیں کہ وہ لوگ جن کے پاس روپیہ نہیں ہوتا وہ بھی اولا دکو نہیں مارتے۔پس معلوم ہواکہ ا س قتل کاکوئی اورمفہوم ہے۔اورہمیں انسانوں میں اس جرم کی تلاش کرنی چاہیے۔سوجب ہم مختلف انسانوں کی حالتوں کو دیکھتے ہیں توہمیں معلو م ہوتا ہے کہ بعض لوگ بخل کی وجہ سے اولاد کی صحیح تربیت نہیں کرتے۔پوری غذا نہیں دیتے یاایسی غذانہیں دیتے جو نشوونما کے لئے ضروری ہو ایسے بخیل توبے شک فاترالعقلو ں میں ہی ملتے ہیں جوزہر سے یاگلا گھونٹ کراپنی اولاد کو اس خوف سے مارتے ہوں کہ ان پرہمار ی دولت خرچ ہوگی۔مگرایسے بخیل عام صحیح الدماغ لوگوں میں کثرت سے ملتے ہیں کہ پاس روپیہ ہے لیکن بچوں کو بخل کی و جہ سے اچھی غذا نہیں دیتے۔لباس مناسب نہیں دیتے حتیٰ کہ بعض دفعہ وہ خوراک کی کمی کی وجہ سے بیمار ہوجاتے ہیں۔بعض دفعہ لباس کی کمی کی وجہ سے نمونیہ وغیر ہ کاشکار ہوجاتے ہیں۔اس قسم کے لوگ دنیا میں ہزاروں لاکھوں کی تعداد میں ملتے ہیں اورہرملک میں ملتے ہیں۔اسی طرح قتل سے مراد اخلاقی اور روحانی قتل بھی ہوسکتا ہے کہ روپیہ کے خرچ کے ڈرسے اچھی تعلیم نہیں دلاتے اورگویا بچہ کی اخلاقی یاروحانی موت کاموجب ہوجاتے ہیں۔ا س آیت میں اللہ تعالیٰ مومنوں کو نصیحت کرتاہے کہ اس فعل سے اجتناب کریںا ورو ہ اخراجات جو بچوں کی صحت اوراخلاق کی درستی کے لئے ضروری ہیں۔ان سے کبھی دریغ نہ کیا کریں۔اورقتل کالفظ اس لئے استعمال کیا ہے کہ اولاد کو قتل کرنے سے انسان فطرتاً تنفر کرتا ہے پس اس لفظ کے استعمال سے اس کی توجہ اس طرف پھیرائی ہے۔کہ تم کسی صورت میں بھی اولاد کو اپنے ہاتھ سے قتل کرنے پر تیار نہیں ہوتے لیکن یہ نہیں سوچتے کہ ایک اور قسم کے قتل کے تم مرتکب ہورہے ہو۔یعنی اولادکی خوراک اورلباس کاخیال نہیں رکھتے اوران کی صحتوں کو برباد کردیتے ہو۔یاان کی تربیت کاخیال نہیں رکھتے اوران کے اخلاق کو برباد کردیتے ہو۔لَا تَقْتُلُوْۤا اَوْلَادَكُمْ میں قتل کے لفظ کے استعمال کی وجہ قتل کالفظ استعمال کرنے کی میرے نزدیک یہ بھی وجہ ہے کہ اگر صرف یوں کہاجاتا کہ اولاد پر ضرو رخرچ کیا کرو۔توان الفاظ میں ان بالواسطہ اثرات کی طرف اشارہ نہ ہوتا جو اولاد کی زندگی پر پڑتے ہیں۔لیکن ان الفاظ کے استعمال نے تمام بالواسطہ تاثیرات کوبھی اپنے اندر شامل کرلیا ہے۔مثلاً بیوی کی خوراک اورمناسب لباس کاخیال نہ رکھنا۔یادودھ پلانے یاایام حمل میں اس پر کام

کابہت بوجھ ڈال دینا۔یہ سب امورہیں جن سے اولاد پربرااثر پڑتا ہے۔اوریاتوبچے ضائع ہوجاتے ہیں یاان کی صحتیں کمزورہوجاتی ہیں۔لَا تَقْتُلُوْۤا کے الفاظ میں ان سب امو ر کی مناہی آجاتی ہے اوریہ غرض دوسرے الفاظ سے پوری نہ ہوسکتی تھی۔اس آیت کے یہ معنے بھی ہوسکتے ہیں جوبعض صوفیاء کرتے ہیں۔کہ اولاد کی پیدائش کو صرف ا س خطرہ سے روکنا منع ہے کہ اگراولاد زیادہ ہوجائے گی توپھر کھائے گی کہاں سے۔اس بات کو مدنظر رکھتے ہوئے اولاد کی پیدائش بند کرنا قتل اولاد کے حکم میں ہے۔اورقتل اولاد ہرحال میں منع ہے اوربراہے۔تومعنے یہ ہوئے کہ املاق کی وجہ سے قتل اولاد (یعنی اس کی پیدائش کو روکنا )منعہے۔البتہ بعض اورصورتوں میں جائز بھی ہوسکتا ہے مثلاً عورت بیمار ہو اس وقت جائز ہوگاکہ اولادپیداکرنابند کردے۔کیونکہ جس چیز کی وجہ سے قتل اولاد کوروکا گیا ہے۔وہ غیر محسوس ہے ایسی وجہ کی بناء پر اولاد کی پیدائش کوروکنا ناجائز ہے لیکن کسی محسوس اورمشاہد نقصا ن کی وجہ سے اولاد کی پیدائش کو روکنا منع نہیں۔علاوہ پیدائش میں روک ڈالنے کے جو بچہ بن چکاہو بعض حالات میں اس کامارنابھی جائز ہوتاہے مثلاً کسی حاملہ عورت کے متعلق زچگی کے وقت یہ شبہ ہو کہ اگر بچہ کو طبعی طور پر پیدا ہونے دیاگیا تووالد ہ فوت ہوجائے گی اس صورت میں بچہ کوضائع کردیناجائزہے کیونکہ بچہ کے متعلق نہیں کہہ سکتے کہ وہ مردہ پیدا ہوگایا زندہ۔یازندہ رہے گایا نہیں۔مگر ماں سوسائٹی کا ایک مفید وجود ہے اس لئے وہمی نقصان سے حقیقی نقصا ن کو زیادہ اہمیت دی جائے گی اوربچہ کو تلف کردیاجائے گا۔لَا تَقْتُلُوْۤا کے بعد خَشْيَةَ اِمْلَاقٍلگانے کی وجہ غرض لَا تَقْتُلُوْۤا کے الفاظ استعمال کرنے کے بعد خَشْيَةَ اِمْلَاقٍ کی شر ط لگاکر قرآن کریم نے اولاد کی تربیت ،اس کی پرورش ،ماں کی پرورش اوراس کی زندگی کی قیمت کے متعلق ایک وسیع مضمون بیان کیا ہے اورایسے مختصرالفاظ میں کہ اس کی مثال دوسری کتاب میں نہیں مل سکتی بلکہ حق یہ ہے کہ یہ مضمون ایسااچھوتاہے کہ دوسری کسی مذہبی کتاب نے اسے چھواتک نہیں۔خِطْاً کے معنے اس آیت میں جو خِطْأً کا لفظ استعمال کیا گیاہے گواس کا مادہ اورخَطَأً کاماد ہ ایک ہی ہے لیکن خِطْأً جو خ کی زیر کے ساتھ ہے اس کے معنوں اورخَطَأً جس میں خ پر زبر ہے اس کے معنوں میں فرق کیا جاتا ہے۔خِطْأًکے معنے اَلْاِثْمُ مَاتُعَمِّدَ مِنْہُ کے ہیں۔اور خَطَأً کے معنے مَالَمْ یَتَعَمَّدْ مِنْہُ اَوْ تَعَمَّدَ کے ہیں۔یعنی اگر خ پر فتح یعنی زبر ہوتو دیدہ دانستہ گناہ اورنادانستہ قصور دونوں معنوں میں مستعمل ہوگا۔اوراگر خ کے نیچے کسرہ

یعنی زیر ہو تو اس سے مراد صر ف وہ گنا ہو گا۔جس میں اراد ہ پایاجائے اس لفظ سے اس طرف اشارہ کیا ہے کہ اولاد کاقتل ایک ایسا جرم ہے کہ جس کوفطرت بھی رد کرتی ہے یعنی جس کے احساسات طبعی مرچکے ہوں وہی ایسافعل کرسکتا ہے۔دوسرانہیں کرسکتا۔اِنَّہُ کَانَ خِطْأً کَبِیْرًا کے الفاظ بھی بتاتے ہیں کہ یہاں وہ قتل مراد نہیں جو زہر یاآلہ سے کیا جاتا ہے کیونکہ یہ الفاظ بتاتے ہیں کہ یہ قتل کثر ت سے پایا جاتا ہے مگر اپنے ہاتھوں بچوں کاقتل ہرگز کسی ملک میں بھی ایسے رنگ میں نہیں پایاجاتا کہ اسے قومی جرم قراردیا جائے اس امر کاثبوت کہ یہ عام قتل سے جداقسم کاقتل ہے یہ بھی ہے کہ قتل کے خلاف حکم آگے چل کر بیان کیا گیا ہے۔اس میں بچوں کاقتل بھی شامل ہے پس ظاہر ہے کہ اس جگہ قتل سے مراد کچھ اورہے۔اس آیت میں نَحْنُ نَرْزُقُهُمْ وَ اِيَّاكُمْ فرماکر اس امر پر زور دیا ہے کہ انسان کے رزق میں اس کی اولاد کا رزق شامل ہے پس اس سے محروم نہیں کرنا چاہیے اسی وجہ سے نَرْزُقُھُمْ کو پہلے رکھا اورباپ کے رزق کوبعد میں بیا ن کیا ہے۔وَ لَا تَقْرَبُوا الزِّنٰۤى اِنَّهٗ كَانَ فَاحِشَةً١ؕ وَ سَآءَ سَبِيْلًا۰۰۳۳ اورزناکے قریب (بھی )نہ جائو وہ یقیناً ایک کھلی بے حیائی اوربہت براراستہ ہے۔حلّ لُغَات۔فَاحِشَۃ۔فَاحِشَۃٌکے معنے ہیں مَایَشْتَدُّ قُبْحُہٗ مِنَ الذَّنُوْبِ۔ہروہ غلطی جو بہت بُری ہو۔وَقِیْلَ کُلُّ مَانَھَی اللہُ عَنْہٗ۔ہروہ بات جس سے اللہ نے روکاہے۔(اقرب) تفسیر۔اس آیت میں زناسے بچنے کاحکم قتل اولاد کے ذکر کے بعد دیا ہے۔اس میں یہ لطیف اشارہ ہے کہ زناسے بھی اولاد کاقتل ہوتا ہے۔کیونکہ اول تو حرام کی اولادکو عام طورپر ضائع کرنے کی کوشش کی جاتی ہے۔دوسرے اگر ضائع نہ بھی ہو تب بھی اس کی تربیت اورپرورش میں مرد کھل کرحصہ نہیں لے سکتا۔اوروہ اولاد بالعموم بغیر والی وارث کے رہ کرتباہ ہوجاتی ہے۔وَ لَا تَقْرَبُوا الزِّنٰۤى میں لفظ قرب کے استعمال میں حکمت لَا تَقْرَبُوا الزِّنٰۤى کے الفاظ استعمال کرکے اس طرف اشارہ کیا ہے کہ مواقع زناپیداہی نہ ہونے دو۔یعنی نامحرم عورتوں سے الگ نہ ملو۔ان سے زیادہ خَلاملا نہ رکھو وغیرہ وغیرہ۔قرآن کریم کی یہ بہت بڑی فضیلت ہے کہ وہ نہ صرف گناہ سے روکتاہے بلکہ گناہ سے بچنے کے ذرائع

بھی بتاتاہے اورایسی ہی تعلیم بنی نوع انسان کی حفاظت کرسکتی ہے۔جوکتاب گناہ سے بچنے کے ذرائع نہیں بتاتی وہ انسان کو ایک پریشانی میں مبتلاکردیتی ہے۔اطمینان وہی کتاب پیداکرسکتی ہے جوکسی بات سے منع کرنے کے ساتھ ہی اس سے بچنے کے ذرائع بھی بتادے تاانسان کو تسلی ہو کہ میں اس حکم پرعمل کرسکوں گا۔انجیل کہتی ہے کہ توکسی عورت کو بد نظری سے نہ دیکھ۔لیکن قرآن کہتاہے کہ توکسی نامحرم عورت کی طرف نظر اٹھا کرہی نہ دیکھ۔کیونکہ وہ کشش جو انسان کے دل میں لغزش پیداکرتی ہے۔جب اس کے لئے راستہ کھول دیاجائے توحفاظت ناممکن نہیں تونہایت مشکل ضرور ہوجاتی ہے۔اس حکمت کے ماتحت اس جگہ فرمایا ہے کہ تم گناہ کے مقام سے اتنی دور کھڑے رہو۔کہ جہاں سے تم بدی کامقابلہ کرسکو۔بعض نے کہا ہے کہ یہ توبزدلی ہے۔مگریہ بزدلی نہیں یہ تواحتیاط ہے اوراحتیاط کو کوئی عقلمند بزدلی نہیں کہتا۔ظاہر ہے کہ انسان دوہی قسم کے ہوسکتے ہیں۔اول وہ جو گناہ کے پاس جاکربھی بچ سکتاہے۔ایسے شخص کو گناہ کے مقام سے دور رہنے کی اس لئے تاکید کی۔کہ گویہ توبچ سکتا ہے مگرممکن ہے۔کہ اس کی طرف دیکھ کر دوسرے لوگ بھی ا س مقام تک چلے جائیں۔اوراپنی کمزوری کی وجہ سے گناہ میں مبتلاہوجائیں۔پس ایسے شخص کولوگوں کے لئے ٹھوکر کاموجب نہ بننا چاہیے۔دوسری قسم کے وہ لو گ ہیں جوگناہ کے مواقع پیدا ہونے کی صورت میں اس سے بچ ہی نہیں سکتے۔ان کواس سے قریب بھی نہ جانے دینے کی حکمت تو ظاہرہی ہے۔پس خواہ انسان گناہ کے قریب ہو کر بچ سکتاہو۔خو اہ نہ بچ سکتاہو۔دونوں صورتوں میں اس کو گناہ کے قریب تک بھی نہیں جاناچاہیے۔یہ بھی یاد رکھنا چاہیے کہ جس مقا م کی طرف جانے میں کوئی خاص فائدہ مدنظر ہواس کی طرف نہ جانابزدلی کہلاسکتاہے۔مگر جس جگہ کی طرف جانا یانہ جاناکوئی خاص فائدہ نہ رکھتاہو اس سے الگ رہناہرگزبزدلی نہیں کہلاسکتا۔سَآءَ سَبِيْلًا کے الفاظ میں زنا کے نقصانات کی طرف اشارہ سَآءَ سَبِيْلًا ان الفاظ سے اس طرف اشارہ کیا ہے کہ علاوہ اخلاقی گناہ ہونے کے زنامیں اوربھی بہت سے نقصانات ہیں۔جوانسان شادی کرتا ہے وہ ضرور احتیاط کرلیتا ہے کہ ایسی لڑکی سے شادی کرے جس کی صحت اچھی ہو۔اسے کوئی متعدی مرض نہ ہو۔عادات و اخلاق اچھے ہوں۔اسی طرح لڑکی کے رشتہ دار لڑکے کے متعلق سوچ سمجھ لیتے ہیں۔مگرزنا میں یہ احتیاط نہیں ہوسکتی۔کیونکہ زناہوتاہی شہوانی جذبات کے جوش میں آجانے کی صورت میں ہے اوراس وقت انسان کسی قسم کی احتیاط نہیں کرسکتا جس کانتیجہ کئی قسم کی امراض یامالی تباہی کی صورت میں نکلتاہے پس فرمایا شہوانی تقاضوں کے پوراکرنے کایہ

راستہ نہایت خطرناک ہے۔یہ امر روزانہ تجربہ میں آرہا ہے کہ گوبیوی سے جو تعلق خاوند پیداکرتاہے اسی قسم کاتعلق زانی ،زانیہ سے کرتاہے۔لیکن باوجوداس کے زناکے نتیجہ میں جس قسم کی بیماریاں پیداہوتی ہیں وہ بیوی کی صورت میں نہیں پیداہوتیں یابہت کم پیداہوتی ہیں۔دنیا میں جس قدر لوگ آتشک یاسوزاک کی مرضوں میں مبتلاہوتے ہیں ان میں سے کس قدربیویوں سے اس مرض کوقبول کرتے ہیں ؟ شاید سو میں سے ایک بھی نہیں۔بقیہ ننانوے فی صدی یااس سے زیادہ حصہ ان مریضوں کازناسے مرض کوحاصل کرتا ہے۔اورجو مرض میاں یا بیوی کوایک دوسرے سے لگتی ہے وہ بھی درحقیقت کسی پہلے زناکے نتیجہ میں ہوتی ہے پس سَآءَ سَبِيْلًا کہہ کر ایک زبردست سچائی کی طرف انسان کو توجہ دلائی ہے جو ہے توہر اک کے سامنے لیکن اس کی طرف توجہ بہت کم لوگوں کو ہوتی ہے۔وَ لَا تَقْتُلُوا النَّفْسَ الَّتِيْ حَرَّمَ اللّٰهُ اِلَّا بِالْحَقِّ١ؕ وَ مَنْ اورجس جان کو (مارنا)اللہ (تعالیٰ)نے حرام ٹھہرایا ہے اسے (شرعی )حق کے سواقتل نہ کرو اورجوشخص مظلوم ماراجائے قُتِلَ مَظْلُوْمًا فَقَدْ جَعَلْنَا لِوَلِيِّهٖ سُلْطٰنًا فَلَا يُسْرِفْ فِّي اس کے وارث کو ہم نے (قصاص کا)اختیار دیا ہے۔پس (اس کے لئے یہ ہدایت ہے کہ)وہ (قاتل کو)قتل کرنے الْقَتْلِ١ؕ اِنَّهٗ كَانَ مَنْصُوْرًا۰۰۳۴ میں (ہماری مقررکردہ)حدسے آگے نہ بڑھے (اگروہ حد کے اندررہے گا تو)یقیناً(ہماری)مدداس کے شامل حال ہوگی حلّ لُغَات۔سُلْطَان :سُلْطَانٌکے لئے دیکھو ابراہیم آیت نمبر۱۲۔السُّلْطانُ:اَلْـحُجَّۃُ۔سلطان کے معنے ہیں دلیل۔اَلتَّسَلُّطُ۔قبضہ وَقُدْرَۃُ الْمَلِکِ۔بادشاہ کی طاقت۔(اقرب) لَایُسْرِفُ لَا یُسْرِفْ اَسْرَف سے نہی غائب کاصیغہ ہے اوراَسْرَفَ فِیْ کَذَاکے معنے ہیں۔جَاوَزَ الْحَدَّفِیْہِ وَ اَفْرَطَ۔حدسے تجاوز کرگیا۔(اقرب)پس فَلَایُسْرِفْ فِّی الْقَتْلِ کے معنے ہوں گے کہ وہ قتل کرنے میں مقررہ حد سے آگے نہ بڑھے۔

تفسیر۔بغیر حق کسی کو قتل کرنا منع ہے اوپرکی دوآیتوں میں قتل کے دونوں مخفی ذرائع بیان کئے تھے۔اب کھلے قتل کے بارہ میں حکم بیان فرمایاگیاہے۔چنانچہ فرماتا ہے کہ کسی جان کو جس کے قتل کو خدا تعالیٰ نے حرام کیا ہے قتل نہ کرنا چاہیے۔بِالْحَقِّ اس لئے فرمایا کہ نفس ہراس چیز کو کہتے ہیں جوسانس لیتی ہو اوراس لئے سب جاندار اس میں شامل ہیں۔بلکہ آج کل کی سائنس کی تحقیق کے روسے تونباتات کے بارہ میں بھی سانس کالیناثابت ہے (انسائیکلو پیڈیا برٹینیکا زیر لفظ Plant)۔پس نفس کے ساتھ مَاحَرَّمَ اللّٰہُ اِلَّا بِالْحَقِّ رکھ دیا۔کیونکہ دوسری چیزوں کاقتل اپنی ذات میں حرام نہیں گوبعض وجوہات سے حرا م ہو جاتا ہے مثلاً حرم شریف میں کسی جانورکو قتل نہ کرنا چاہیے۔اسی طرح اگر کوئی جانور کسی دوسرے کی ملکیت میں ہو تواس کوبھی قتل کرنا حرام ہے۔اسی طرح ذبح کے طریق کے سواجو حلال جانوروں کے لئے جائز ہے اَوربعض طریقوں سے جانوروںکاقتل بھی ناجائزہے۔پس اِلَّا بِالحقِّ کہہ کر ایک توانسا ن کو اس حکم کے لئے مخصوص کردیا۔دوسرے انسانوں میں سے ان کو حکم سے باہر نکال دیا۔جن کابعض اسبا ب کے ماتحت مارناجائزہومثلاً قاتل یا جولوگ دوسرے کو قتل کرنے کے لئے حملہ آورہوں وغیرہ وغیر ہ۔حق کی تشریح بِالْحَقِّ کے لفظ سے اس طرف بھی اشار ہ کیا ہے کہ جس وقت اللہ تعالیٰ کی طرف سے حق ملے اس وقت قتل جائز ہے۔گویا نہی بھی اللہ تعالیٰ کی طرف سے تھی اوراجازت بھی اسی کی طرف سےہونی چاہیے۔ا س شرط سے مواقع جنگ کو محدود کردیاگیاہے۔اسی طرح حکومت کے اختیارات جان لینے کے متعلق محدود کردئے گئے ہیں۔اس شرط کی وجہ سے اگر کوئی دایہ یہ کہے کہ چونکہ بچہ کی والدہ نے کہا تھا کہ بچہ کو مارڈال اس لئے میں نے مار ڈالا یاکوئی حاکم کسی کو جبراً مروادے تووہ جرم سے بری نہیں سمجھے جائیں گے۔کیونکہ قتل اسی صورت میں جائز ہے جبکہ اس جان کو پیداکرنے والے کی طرف سے قتل کرنے کا حق کسی کو عطا ہوا۔وَ مَنْ قُتِلَ مَظْلُوْمًا فَقَدْ جَعَلْنَا لِوَلِيِّهٖ سُلْطٰنًا فَلَا يُسْرِفْ فِّي الْقَتْلِ۔اورجومظلوم قتل کیا جاوے ہم نے اس کے ولی کوغلبہ یاحجت دی ہے۔ولی کے معنی ولی ہروہ شخص ہے جوکسی کی وراثت کا حقدار ہو۔اورایسے شخص کو بھی ولی کہتے ہیں کہ جس کو وہ خود مقررکردے۔جیسے کہ مروی ہے کہ جب دشمن حضرت عثمانؓ کے خلاف منصوبے کررہے تھے۔حضرت معاویہ ؓ نے ان سے درخواست کی کہ آ پ مجھے اپنا ولی بنادیں تاکہ ان لوگوں پر رعب ہواور وہ سمجھیں کہ عثمان کے قتل کابدلہ لینے والا ایک شخص موجود ہے۔تواس کے جواب میں حضر ت عثمانؓ نے فرمایا کہ تمہارے متعلق احتمال ہے کہ تم مسلمانوں پرسختی کروگے میں تم کوولی نہیں مقررکرتا۔اس سے یہ مستنبط ہوتاہے کہ ایساولی بناناجائز ہے۔

ًسلطان سے مراد سُلْطَان سے مراد غلبہ یا حجت ہے یعنی تم نے اس کے ولی کو اختیار دیا ہے کہ وہ گورنمنٹ کے پاس شکایت کرے اوراپنا حق لے لیو ے اورپھر حاکم کے فیصلہ کرچکنے کے بعد خواہ قاتل کوقتل کرے خواہ معاف کرے۔لیکن اگر گورنمنٹ سمجھے کہ مقتول کاولی شرارت سے معافی دے رہا ہے توپھراسے بھی حق ہے کہ وہ قتل کی سزاجاری کردے۔کیونکہ اپنے حقوق کو جائزطور پر ادانہ کرنے کی صورت میں یابوجہ خوف ادانہ کراسکنے کی صورت میں ولایت حکومت کی طر ف منتقل ہوجاتی ہے۔قصاص میں ذاتی حق کے علاوہ قومی حق بھی ہوتا ہے تمام قصاص کے مسائل میں یہ حکم جاری ہے اوراس کی ایک عمدہ مثال حضرت علیؓ کے عمل سے ملتی ہے آپ نے ایک دفعہ دیکھا کہ ایک شخص نے دوسرے کو پِیٹاہے۔حضرت علی ؓنے اس کوروکا اورمضروب کو کہا کہ اب تم اس کو مارو۔مگرمضروب نے کہا کہ میں اس کومعاف کرتا ہوں۔حضرت علیؓ نے سمجھ لیا کہ ڈر کے مارے اس نے اسے مارنے سے انکار کیا ہے کیونکہ وہ مارنے والا بڑاجبار شخص تھا۔اس لئے آپ نے فرمایا تم نے اپنا ذاتی حق معاف کردیا ہے مگر میں اب قو می حق کو استعمال کرتاہوں۔اور اُسے اسی قدر پِٹوادیا جس قدرکہ اس نے دوسرے کمزو رشخص کو پیٹاتھا۔قاتل کے حقوق کی حفاظت یہ جوفرمایا کہ فَلَا يُسْرِفْ فِّي الْقَتْلِ اس میں قاتل کے حقوق کی حفاظت کی ہے۔قصاص میں کئی قسم کی زیادتیاں ہوسکتی ہیں (۱) تکلیف سے قتل کیاجاوے مثلاً کسی کو جلاد مقرر کیا جائے اوروہ کُند آلہ سے قتل کرے (۲) موقعہ معافی کاہو مگروہ زوردے کہ نہیں میں ضرورہی قتل کروں گا۔اسی طرح اور کئی طریقے اسراف کے ہوسکتے ہیں۔مقتول کے ورثاء کو معاف کرنے کی تلقین لَایُسْرِفْ کے الفاظ سے اس طرف بھی اشارہ کیا ہے کہ گوجان کے بدلہ میں جان کاعام قانون ہے۔مگروارثانِ مقتول کوہمیشہ قتل کے بعد قتل پرعمل نہیں کرناچاہیے اورقتل کے فعل کو بڑھانانہیں چاہیے۔یعنی جہاںتک ہوسکے قاتل کو اگرکسی طرح بھی اس کی اصلاح کی امید کی جاسکتی ہو۔معاف کردینا چاہیے۔اس حکم سے اسلام نے ملک کے امن کی بنیاد قائم کردی ہے۔دنیا کاامن دوغلطیوں میں سے ایک کی وجہ سے بربادہوتاہے۔یاتوجب قاتلوں کو ان کے کئے کی سزانہیں ملتی یاجب اندھادھند سزادی جاتی ہے۔بعض دفعہ معاف کردینا ہی آئندہ امن پیداکرنے کاموجب ہوسکتا ہے۔مگرموجودہ قانون وارثان مقتول کو ایساکوئی اختیار نہیں دیتا اورہرقتل کے بدلہ میں قتل ہی کرتا ہے۔اس سے ملک کا امن برباد ہوتاہے اوردشمنیاںبڑھتی جاتی ہیں۔اگراسلامی تعلیم پر عمل ہوتا توقتل بہت کم ہوجا تااوربُغض کم ہوجاتے۔

شرعاً کسی کو آپ ہی مجرم قرار دے دینا منع ہے یہ بھی یا درہے کہ شرعًا یہ بھی منع ہے کہ کوئی شخص آپ ہی کسی کو مجرم قرار دے کر اُسے سزادےدے۔اگر کوئی ایساکرے تویہ بھی اسراف فی القتل سمجھا جائے گا۔ایک حدیث میں آتاہے کہ قَالَ یَارَسُوْلَ اللہِ اِنْ وَجَدْتُ مَعَ اِمْرَ أَتِیْ رَجُلًا أُمْھِلُہُ حَتّٰی آتِیَ بِاَرْبَعَۃِ شُھَدَاءَ قَالَ نَعَمْ (مسند احمد بن حنبل مسند ابو ہریرۃؓ)ایک شخص نے رسول کریم صلی اللہ علیہ وسلم سے پوچھا کہ یارسول اللہ اگر میں کسی شخص کو اپنی بیوی کے پاس دیکھو ں تواسے قتل کروں یاانتظار کروں اورچارگواہ لاکر ثبوت بہم پہنچائوں۔آپؐ نے فرمایا۔چارگواہ لائو۔ایک اورحدیث میں یہ الفاظ ہیں کہ اگر تم خود ہی قتل کروگے توقتل کے مرتکب سمجھے جائو گے۔اِنَّهٗ كَانَ مَنْصُوْرًا۔میں اسی طرف اشارہ کیا ہے۔کیونکہ اس کے معنے ہیں کہ مقتول کے ولی کو حکومت کی طرف سے مدد دی جائے گی اس لئے خود ہی فیصلہ اورخود ہی اجراء نہ کرے بلکہ حکومت کے ذریعہ فیصلہ کرائے۔اِنَّهٗ كَانَ مَنْصُوْرًاکے الفاظ میں لَایُسْرِفْ فِّی الْقَتْلِ کی دلیل بھی بیان کی گئی ہے۔یعنی وارث کو یاد رکھنا چاہیے کہ دنیا میں امن قائم رکھنے کافرض اس کے ذمہ بھی ہے۔پس چاہیے کہ وہ بھی ظلم نہ کرے اوریاد رکھے کہ اللہ تعالیٰ نے ا س کے حقوق کی حفاظت کی ہے۔پس اسے بھی دوسروں کے حقوق کاخیال رکھنا چاہیے اورجس حکومت نے اس کے حقوق کی حفاظت کی ہے ظلم کرکے اس کے نظام میں خلل نہیں ڈالناچاہیے۔وَ لَا تَقْرَبُوْا مَالَ الْيَتِيْمِ اِلَّا بِالَّتِيْ هِيَ اَحْسَنُ حَتّٰى اور تم اس طریق کے سواجو(یتیم کے حق میں )زیادہ اچھا ہو(کسی اورطورپر)یتیم کے مال کے پاس (تک بھی)نہ يَبْلُغَ اَشُدَّهٗ١۪ وَ اَوْفُوْا بِالْعَهْدِ١ۚ اِنَّ الْعَهْدَ كَانَ پھٹکو یہاں تک کہ وہ اپنی مضبوطی کی عمر کوپہنچ جائے۔اور(اپنے )عہد کو پوراکرو (کیونکہ)ہرعہد کی نسبت یقیناً مَسْـُٔوْلًا۰۰۳۵ (ایک نہ ایک دن )باز پُرس ہوگی۔حلّ لُغَات۔اَلْعَھْدُ اَلْعَھْدُکے لئے دیکھو رعدآیت نمبر۲۱۔

·

آج 10 میں سے 10 باقی