سُوْرَۃُ الْاَ نۡۢبِیَآءِ

تفسیر کبیر (جلد ۸), حصہ 6

آپ نے ہجرت کی اور یہ زمین آئندہ ان کی اولاد کے لئے مقرر کردی گئی۔ان آیات میںاللہ تعالیٰ فرماتا ہے کہ خدا تعالیٰ نے ابراہیم ؑ اور لوط ؑدونوں کو نجات دی اور کامیاب کرکے فلسطین میںلے گیا۔بعینہٖ اسی طرح اللہ تعالیٰ نے محمد رسول اللہ صلی اللہ علیہ وسلم کو بھی دشمنوں سے نجات دی اور ان کے غلام عمر ؓ کو ایک فاتح کی شکل میںبیت المقدس میںلے گیا۔وَ وَهَبْنَا لَهٗۤ اِسْحٰقَ١ؕ وَ يَعْقُوْبَ نَافِلَةً١ؕ وَ كُلًّا جَعَلْنَا اور ہم نے اسے اسحٰق ؑ بھی بخشا اور یعقوب بھی بطور پوتے کے( دیا)۔صٰلِحِيْنَ۰۰۷۳ اور ہم نے سب کو نیک بنایا۔حلّ لُغَات۔نَافِلَۃً۔اَلنَّفْلُ کے معنے ہوتے ہیںاَلزِّیَادَۃُ عَلَی الْوَاجِبِ جوکسی کو دینا واجب اور ضروری تھا اس سے زیادہ دیا اور نَافِلَۃٌ: وَلَدُ الْوَلَدِ کو بھی کہتے ہیںیعنی پوتے کو (مفردات ) تفسیر۔پھر فرماتا ہے ہم نے ابراہیم کو اسحاق ؑ او ریعقوب ؑ انعام کے طور پربخشے۔ایسا ہی محمد رسول اللہ صلی اللہ علیہ وسلم کے لئے بھی وعدہ ہے چنانچہ مسلمانوں کو دعا سکھائی گئی ہے کہ۔اَللّٰھُمَّ صَلِّ عَلیٰ مُحَمَّدٍ وَ عَلیٰ اٰلِ مُحَمَّدٍ کَمَا صَلَّیْتَ عَلیٰ اِبْرَاہِیْمَ وَ عَلیٰ اٰلِ اِبْرَاہِیْمَ اِنَّکَّ حَمِیْدٌ مَجِیْدٌ یعنی اے اللہ محمد رسول اللہ صلی اللہ علیہ وسلم پر اور آپ کی آنے والی روحانی اولاد پر اسی طرح فضل نازل فرما جس طرح تو نے ابراہیم ؑ اورا س کی اولاد پر فضل نازل فرمائے تھے۔بعض لوگ اپنی نادانی سے یہ اعتراض کیا کرتے ہیںکہ محمد رسول اللہ صلی اللہ علیہ وسلم کا درجہ تو حضرت ابراہیم ؑ سے بہت بڑاہے پھر ایک بڑے درجہ والے کے لئے یہ دعاکرنا کہ اسے وہ کچھ ملے جو ان سے چھوٹے درجے والے کوملاتھا اور نہ صرف ایک دفعہ یہ دعاکرنا بلکہ قیامت تک کرتے چلے جانا ایک مضحکہ خیز امر ہے اور یہ ایسی ہی دعاہے جیسے کسی ای۔اے۔سی کو کہا جائے کہ خداتمہیںتھانیدار بنادے اس کے متعلق یہ امر یاد رکھانا چاہے کہ قرآن کریم نے حضرت ابراہیم علیہ السلام کی دو قسم کی خوبیوں کا ذکر کیا ہے ایک خوبیاں تو وہ ہیں جو ان کی ذاتی ہیں مثلاً یہ کہ ابراہیم ؑ حلیم تھا۔اواہ تھا۔منیب تھا۔صدیق تھا۔خدا کامقرب تھا۔ان خوبیوں اور مدارج کے لحاظ سے محمدؐ رسول اللہ

صلی اللہ علیہ وسلم یقیناً حضرت ابراہیم علیہ السلام سے افضل ہیں۔اگر آپ افضل نہ ہوتے تو آپ خاتم النبیین اور سید ولد آدم کس طرح ہوسکتے ہیں پس جہاں تک محمدی مقام کاسوال ہے وہ ابراہیمی مقام سے یقیناً افضل ہے مگر حضرت ابراہیم علیہ السلام کی ان ذاتی خوبیوں کے علاوہ قرآن کریم سے ہمیںان کی ایک اور خوبی بھی معلوم ہوتی ہے۔جو قومی انعام کے رنگ میں ظاہر ہوئی اور وہ یہ کہ انہوں نے اللہ تعالیٰ سے یہ دعامانگی تھی کہ رَبَّنَا وَ اجْعَلْنَا مُسْلِمَيْنِ لَكَ وَ مِنْ ذُرِّيَّتِنَاۤ اُمَّةً مُّسْلِمَةً لَّكَ (البقرۃ:۱۲۹)یعنی اے ہمارے رب ہمیںاپناسچا فرمانبردار بنائیواور ہماری ذریت میںسے بھی ایک ایسی امت پیداکیجئو جوتیری رضا کوحاصل کرنے والی اور تیری راہوں پر چلنے والی ہو اللہ تعالیٰ نے اس دعاکو اس رنگ میں قبول فرمایا کہ وہ فرماتا ہے وَ جَعَلْنَا فِيْ ذُرِّيَّتِهِ النُّبُوَّةَ وَ الْكِتٰبَ (العنکبوت:۲۸) ہم نے ابراہیم ؑکی ذریت میںنبوت رکھ دی گویا حضرت ابراہیم علیہ السلام نے خدا تعالیٰ سے جو کچھ مانگا تھا اللہ تعالیٰ نے اس سے بڑھ کر آپ کوانعام دیا اس نقطہ نگاہ سے جب ہم درود میںیہ کہتے ہیں کہ اے اللہ تو محمد صلی اللہ علیہ وسلم پربھی اسی طرح فضل نازل فرما جس طرح تو نے ابراہیم پر فضل نازل فرمایا۔تو اس کے یہ معنے ہوتے ہیں کہ خدا یا جومعاملہ تو نے ابراہیم علیہ السلام سے کیا تھا وہی سلوک محمد رسول اللہ صلی اللہ علیہ وسلم سے بھی کرنا جس طرح حضر ت ابراہیم علیہ السلام نے جو کچھ مانگا تھا تونے اس سے بڑھ کر ان کو انعام دیا۔اسی طرح محمدرسول اللہ صلی اللہ علیہ وسلم نے جو کچھ مانگا ہے اس سے بڑھ کر آپ کو انعام دیجیئو اب یہ امر ظاہر ہے کہ حضرت ابراہیم علیہ السلام نے اپنے عرفان کے مطابق دعائیںکیں اور محمد رسول اللہ صلی اللہ علیہ وسلم نے اپنے عرفان کے مطابق کیں۔بلکہ محمد رسول اللہ صلی اللہ علیہ وسلم نے خدا تعالیٰ سے اتنی دعائیں کی ہیںکہ مجموعی طورپر تمام انبیاء نے بھی اتنی دعائیںنہیںکی ہوںگی۔پھر جب یہ مسلمہ امر ہے کہ محمد رسول اللہ صلی اللہ علیہ وسلم کا عرفان ابراہیمی عرفان سے بہت بالا تھا تو پھریہ بھی یقینی امر ہے کہ آپ کی دعائیں بھی حضرت ابراہیم علیہ السلام کی دعائوں سے بڑھی ہوئی تھیں۔او ر اللہ تعالیٰ کی طرف سے آپ کو جوکچھ ملنا ہے وہ بھی ابراہیمی انعام سے بہت زیادہ ہے پس درود میں محمد رسول اللہ صلی اللہ علیہ وسلم کے مدارج کی بلندی اور آپ کی امت کی ترقی کے لئے اتنی جامع دعا سیکھائی گئی ہے کہ اس سے بڑھ کر کوئی دعا تصور میںبھی نہیںآسکتی۔کیونکہ اس میںیہ سکھایا گیا ہے کہ الٰہی وہ رحمتیں جو حضرت ابراہیم علیہ السلام کے ذریعہ ان کی ذریت پر نازل ہوئیں ان سے بڑھ کر رسول کریم صلی اللہ علیہ وسلم کے ذریعہ نازل کی جائیں یعنی جس طرح ابراہیم علیہ السلام کو ان کے مانگنے سے بڑھ کر ملا اسی طر ح محمد رسول اللہ صلی اللہ علیہ وسلم نے جو کچھ مانگاہے آپ کو بھی اس سے بڑھ کر انعام دیا جائے۔اور چونکہ وسعت فیض کے لحاظ سے رسول کریم صلی اللہ علیہ وسلم کی دعائیں بہت بڑھی ہوئی ہیںاس لئے آپ

کے انعامات بھی ابراہیمی انعا مات سے بہت بڑھ کر ہیں۔لوگوں کو غلطی صرف کَمَا کے لفظ سے لگی ہے۔حالانکہ اس جگہ مَا مصدر یہ ہے اور کَمَاصَلَّیْتَ کے صرف اتنے معنے ہیں کہ کَصَلٰوتِکَ عَلٰی اِبْرَاہِیْمَ یعنی جس طرح تونے ابراہیم پراپنی برکات نازل کیں اسی قسم کی برکات محمدرسول اللہ صلی اللہ علیہ وسلم پر بھی نازل فرما اگر کَمَا صلَّیْتَ کی بجائے اَلیٰ قَدْرِ مَاصَلَّیْتَ کہاجاتا تو بے شک اس کے یہ معنے ہوسکتے کہ تو محمد رسول اللہ صلی اللہ علیہ وسلم پر اس درجہ کا درود بھیج جس درجہ کا درود تم نے ابراہیم علیہ السلام پر بھیجا تھا مگر یہاں درجہ کا ذکر نہیں بلکہ قسم کا ذکر ہے اور مراد یہ ہے کہ جس قسم کی برکت حضرت ابراہیم علیہ السلام اور آپ کی اولاد کو دی گئی تھی وہی قسم محمد رسول اللہ صلی اللہ علیہ وسلم اور آپ کی اولاد کو بھی ملے۔اور وہ یہی برکت ہے کہ جو کچھ ابراہیم ؑ نے مانگا تھا خدا نے اس سے بڑھ کر اسے انعام دیا اسی طرح ہمیںیہ دعا سیکھائی گئی ہے کہ جو کچھ محمد رسول اللہ صلی اللہ علیہ وسلم نے مانگاہے اے خدا تو اس سے بڑھ کر محمد رسول اللہ صلی اللہ علیہ وسلم اور آپ کی امت پر انعام واکرام کی بارش نازل فرما۔آج کل اسلام کے خلاف سب سے بڑا فتنہ عیسائیت کاہے۔اور عیسائیت اس بات کی مدعی ہے کہ حضرت عیسیٰ علیہ السلام حضرت ابراہیم علیہ السلام کی اولاد میںسے تھے(متی باب ۱۱ ٓیت ۱۷)۔پس درود میںیہ دعا سیکھائی گئی ہے کہ اے خدا یہ جتنی ترقیاں عیسائیت کو مل رہی ہیںیہ حضر ت ابراہیم علیہ السلام کے ان وعدوں کی وجہ سے ہیں جو تو نے ان سے کیے تھے۔ہم تجھ سے درخواست کرتے ہیںکہ ابراہیمی وعدوںکی وجہ سے اس کی ایک شاخ جو اسحاق ؑ سے تعلق رکھتی تھی اس پر جو تو نے فضل نازل کئے ہیں اس سے بڑھ کر اسماعیل ؑکی نسل یعنی محمد رسول اللہ صلی اللہ علیہ وسلم اور آپ سے تعلق رکھنے والوںپرفضل نازل فرما۔اگر اللہ تعالیٰ ادھر سے اپنی برکتیں ہٹالے اور ان کا رخ اسماعیل ؑ کی نسل کی طرف پھیردے تو عیسائیت ایک دن میںختم ہوجاتی ہے پس یہ ایک عظیم الشان دعاہے جو اسلام اور مسلمانوں کی ترقی کے لئے سیکھائی گئی ہے اور پھر یہ ایک ایسی دعا ہے جس میںدنیا کے ہر ملک اور ہر علاقہ کا مسلمان شامل ہے گویا یہ ایسی کامل دعا ہے کہ نہ آقا اس سے باہر رہتاہے اور نہ امت محمدیہ کاکوئی فرد باہر رہتاہے آج کل یوروپین اقوام کو جو طاقت حاصل ہے یہ صرف ان وعدوں کی وجہ سے ہےجو اسحاق ؑکی نسل سے کئے گئے تھے اگر اب اسماعیل ؑ کی نسل سے اس کے وعدے پورے ہونے شروع ہوجائیںتو عیسائیت اس طرح ختم ہوجائے گی جس طرح محمد رسول اللہ صلی اللہ علیہ وسلم کے آنے پر حزقیل ؑیرمیاہؑ یسعیا ہؑ اور یحیٰ ؑوغیرہ ختم ہوگئے ہیں اور اسلام کو وہ شوکت حاصل ہوجائے گی جو مسلمانوں کے وہم وگمان میںبھی نہیں ہے۔

وَ جَعَلْنٰهُمْ اَىِٕمَّةً يَّهْدُوْنَ بِاَمْرِنَا وَ اَوْحَيْنَاۤ اِلَيْهِمْ اور ہم نے ان کو( لوگوں کا) امام بنایا۔وہ ہمارے حکم سے ان کو ہدایت دیتے تھے۔اورہم نے ان کی طرف فِعْلَ الْخَيْرٰتِ وَ اِقَامَ الصَّلٰوةِ وَ اِيْتَآءَ الزَّكٰوةِ١ۚ وَ كَانُوْا نیک کام کرنے اور نماز قائم کرنے اور زکوٰۃ دینے کی وحی کی اور وہ سب ہمارے عبادت گذار بندے تھے لَنَا عٰبِدِيْنَۚۙ۰۰۷۴وَ لُوْطًا اٰتَيْنٰهُ حُكْمًا وَّ عِلْمًا وَّ نَجَّيْنٰهُ اور( ہم نے اسے) لوط ؑ( بھی بخشا) جسے ہم نے حکم بھی عطا کیا اورعلم بھی اور اس کو اس بستی سے نجات دی۔مِنَ الْقَرْيَةِ الَّتِيْ كَانَتْ تَّعْمَلُ الْخَبٰٓىِٕثَ١ؕ اِنَّهُمْ كَانُوْا جوکہ نہایت گندے کام کرتی تھی۔وہ( یعنی لوط کے شہر کے رہنے والے )ایک بہت بری قوم قَوْمَ سَوْءٍ فٰسِقِيْنَۙ۰۰۷۵وَ اَدْخَلْنٰهُ فِيْ رَحْمَتِنَا١ؕ اِنَّهٗ مِنَ یعنی نافرمان تھے۔اور ہم نے اس (یعنی لوط) کو اپنی رحمت میں داخل کیا۔الصّٰلِحِيْنَؒ۰۰۷۶ وہ ہمارے نیک بندوںمیںسے تھا۔تفسیر۔فرماتا ہے یہ سب لوگ اپنے زمانہ کے امام تھے اور خدا تعالیٰ کے حکم کو دنیامیںپھیلاتے تھے بعینہٖ اسی طرح رسول کریم صلی اللہ علیہ وسلمبھی فرماتے ہیںکہ اِنَّ اللہَ یَبْعَثُ لِھٰذِہٖ الْاُمَّۃِ عَلٰی رَأْسِ کُلِّ مِائَۃِ سَنَۃٍ مَنْ یُجَدِّدُ لَھَا دِیْنَھَا (ابو داؤد کتاب الملاحم باب ما یذکر فی قرن المائۃ) یعنی اللہ تعالیٰ میری امت میںبھی ہرصدی کے سرپر ایسے انسان مبعوث فرماتارہےگاجو دین اسلام کی تجدید کریں گے اور انسانوں کی داخل کی ہوئی خرابیوں کو دور کرکے اسلام کو پھرنئے سرے سے قائم کردیںگے۔یہ حدیث درحقیقت وہی مضمون بیان کررہی ہے جو قرآن کریم نےاِنَّا نَحْنُ نَزَّلْنَا الذِّكْرَ وَ اِنَّا لَهٗ لَحٰفِظُوْنَ (الحجر:۱۰) میں بیان فرمایا ہے۔یعنی ہم نے ہی اس قرآن کو نازل کیاہے اورہم ہی قیامت تک اس کی حفاظت کرتے رہیںگے۔گویاوہی مضمون جو قرآن کریم میں

بیان کیاگیا تھا۔رسول کریم صلی اللہ علیہ وسلم نے ایک دوسرے پیرایا میں لوگوں کو سمجھانے کے لئے بیان فرما دیا تاکہ ظاہرپرست لوگ اس آیت سے قرآن کریم کی صرف ظاہر ی حفاظت ہی مرادنہ لے لیں بلکہ وہ سمجھیں کہ اس میں قرآن کریم کی معنوی حفاظت کابھی وعدہ کیا گیا ہے جس کے لئے مجددین اور مامورین کا ا ٓناضروری ہے اور اگر غور سے کام لیا جائے تو درحقیقت یہی وہ فوقیت ہے جو اسلام کو دوسرے مذاہب پر حاصل ہے۔ورنہ اگر صرف قصے اور روایات ہی کسی مذہب کی افضلیت ثابت کرنے کے لئے کافی ہوں تو ہندوؤں اور عیسائیوں کے ہاں بھی کچھ کم قصے نہیں اسلام کا فخر صرف اس بات میںہے کہ اللہ تعالیٰ ہر زمانہ میں اسلام کی صداقت کے ثبوت کے لئے ایسے مقدس انسان کھڑے کرتاہے جو خود اپنے وجود کو اسلام کی صداقت کے ثبوت کے طورپرپیش کرتے ہیں۔اور کہتے ہیںکہ اسلام کا خدا ہمارے ساتھ اب بھی کلام کرتا اور ہمیںاپنے غیب سے اطلاع دیتاہے۔اگر تمہارے اندر بھی سچائی پائی جاتی ہے تو آئو اور ہمارا مقابلہ کرلو مگر دنیا کے کسی مذہب کا پیرو اس مقابلہ میں کھڑانہیں ہوسکتا کیونکہ وہ جانتاہے کہ وہ صرف ایک مردہ مذہب کاپیرو ہے جواپنی زندگی کاکوئی تازہ ثبو ت پیش نہیںکرسکتا۔گویاان کی مثال اس درخت کی سی ہے جو جس کے پتے خزاںکی وجہ سے جھڑ گئے اب نہ وہ اپنے میووں سے کسی کا پیٹ بھر سکتاہے اور نہ اپنی چھاؤں میںکسی کو بٹھا سکتاہے۔لیکن اسلام ایک ثمرور درخت ہے۔جس کے شیریں پھلوں سے کوئی زمانہ بھی محروم نہیں رہتا۔اور اس طرح اسلام اور محمد رسول اللہ صلی اللہ علیہ وسلم کی صداقت ہر زمانہ میںلوگوں پرروشن ہوتی رہتی ہے۔وَ لُوْطًا اٰتَيْنٰهُ حُكْمًا وَّ عِلْمًا یہ امر بھی یاد رکھنا چاہیے کہ نبیوں کی بعثت کی بڑی غرض یہ ہوتی ہے کہ وہ لوگوں کو اس چشمہ فیض تک پہنچائیں جس سے سیراب ہوئے بغیر ان کی روحانی زندگی قائم نہیںرہ سکتی یعنی اللہ تعالیٰ سے ان کو وابستہ کردیںاوراس سے اس کامضبوط پیوند کردیں۔اوریہ بات علوم روحانیہ کے حصول کے بغیر کبھی سرانجام نہیںدی جاسکتی۔وہی شخص روحانی امور میںلوگوں کو ہدایت دے سکتاہے جسے خدا تعالیٰ کی معرفت تامہ حاصل ہو اور اس کے قرب کے ذرائع اسے معلوم ہوں اور اس کی صفات کا باریک در باریک علم اسے حاصل ہو پس مدعی ماموریت کے لئے ضروری ہے کہ خدا تعالیٰ خود اس کی علمی غور وپر داخت کرے اور اسے ایسے روحانی علوم عطا فرمائے جو اس زمانہ کے لحاظ سے بے نظیر ہوں یہی وجہ ہے کہ اللہ تعالیٰ نے حضرت لوط علیہ السلام کے متعلق بیان فرمایا کہ اٰتَيْنٰهُ حُكْمًا وَّ عِلْمًا اور اسی طرح اور کئی انبیا ءکے متعلق فرمایا کہ ہم نے انہیں اپنے علم سے نوازا تھادرحقیقت علمی معجزات ایک مامور کی صداقت معلوم کرنے کا بڑا زبردست ذریعہ ہوتے ہیں جن کے مقابلہ میں مخالفین بالکل گنگ ہوکر رہ جاتے ہیں۔یہ علمی معجزات اگرچہ دنیامیں ہر نبی کو ملتے چلے آئے ہیں مگر عظمت اور شان کے ساتھ محمدرسول اللہ صلی اللہ علیہ وسلم کو یہ

معجزہ ملا ہے۔اس کی دنیاکے اور کسی نبی میںنظیر نہیں مل سکتی باقی انبیا ء کے معجزات تو اب ایک قصہ ءماضی کی شکل اختیار کرچکے ہیں جن کا کوئی ثبوت دنیا کے سامنے پیش نہیںکیا جاسکتا۔مگر محمد رسول اللہ صلی اللہ علیہ وسلم کو وہ علمی نشان بخشا گیا ہے جو قیامت تک زندہ رہنے والا اور ہر زمانہ میںدشمنوںپر حجت تمام کرنے والا ہے۔چنانچہ اللہ تعالیٰ نے آپ کو ایک ایسی پاک کتاب عطا فرمائی جس کے متعلق رہتی دنیاتک یہ ایک کھلاچیلنج موجود ہے کہ اگر تم میں ہمت ہے تو آئو اور اس کتاب کی نظیر تیار کردو اگر اور نہیں تو اس کی ایک سورت میںہی جس قدر علوم اور معارف اور پیش گوئیاں اور تزکیہ نفس کے ذرائع بیان کئے گئے ہیں اسی قدر حقائق اور معارف جیسی ایک سورت ہی بنا کر دکھا دو مگر تیرہ سو سال سے زیادہ عرصہ گذر گیا دنیااس چیلنج کو قبول نہیں کرسکی اور قیامت تک وہ اسی طرح اس چیلنج کو قبول کرنے سے گریز کرتی رہے گی اور اس طرح پر عقلمند انسان یہ ماننے پر مجبور ہوگا کہ محمد رسول اللہ صلی اللہ علیہ وسلم کے علوم کامقابلہ کرنا ناممکن امر ہے۔وَ نُوْحًا اِذْ نَادٰى مِنْ قَبْلُ فَاسْتَجَبْنَا لَهٗ فَنَجَّيْنٰهُ وَ اَهْلَهٗ اور( یاد کر) نوح کو جب اس نے اس (یعنی ابراہیم کے واقعہ ) سے پہلے (ہم کو )پکارا او ر ہم نے اس کی دعاسنی پس ہم مِنَ الْكَرْبِ الْعَظِيْمِۚ۰۰۷۷وَ نَصَرْنٰهُ مِنَ الْقَوْمِ الَّذِيْنَ نے اس کو بھی اور اس کے اہل کو بھی ایک بڑی گھبراہٹ سے نجات دی۔اور ہم نے اس کی اس قوم کے مقابلہ میں مدد کی كَذَّبُوْا بِاٰيٰتِنَا١ؕ اِنَّهُمْ كَانُوْا قَوْمَ سَوْءٍ فَاَغْرَقْنٰهُمْ۠ اَجْمَعِيْنَ۰۰۷۸ جس نے ہماری نشانیوں کو جھٹلایا تھا۔وہ بہت بری قوم تھی۔پس ہم نے ان سب کو غرق کردیا۔حلّ لُغَات۔اَلْکَرْبُ۔اَلْکَرْبُ کے معنے ہیں اَ لْحُزْنُ وَالْغَمُّ یَأْخُذُ بِالنَّفْسِ۔غم واندوہ جو انسان کو لاحق ہو جاتا ہے۔(اقرب) تفسیر۔اس جگہ حضرت نوح علیہ السلام کا ذکر کیا گیا ہے جنہوںنے خدا تعالیٰ سے دعا کی اور خدا نے اسے قبول کر لیا اس ذکر سے محمد رسول اللہ (صلی اللہ علیہ وسلم) کے ذکر کو آدم ؑ تک پہنچا دیا گیا ہے کیونکہ نوح ؑآدم ؑکا پوتا تھا اور وہ پہلا نبی تھا جس پر شریعت کا نزول ہوا چنانچہ رسو ل کریم صلی اللہ علیہ وسلم نے حضرت نوح ؑ کے متعلق فرمایا ہے کہ اَوَّلُ نَبِیٍّ شُرِعَتْ عَلٰی لِسَانِہٖ الشَّرَائِعُ کہ نوح ؑ پہلانبی تھا جس پر اللہ تعالیٰ کی طرف سے شریعت نازل

ہوئی۔اس مضمون کی طرف قرآن کریم کی اس آیت میں بھی اشارہ کیاگیا ہے کہ اِنَّاۤ اَوْحَيْنَاۤ اِلَيْكَ كَمَاۤ اَوْحَيْنَاۤ اِلٰى نُوْحٍ وَّ النَّبِيّٖنَ مِنْۢ بَعْدِهٖ (النساء:۱۶۴) یعنی اے محمد ؐرسول اللہ !ہم نے تیری طرف اسی طرح وحی نازل کی ہے جس طرح ہم نے نوح اور اس کے بعد آنے والے انبیاء کی طرف وحی کی تھی گویا قرا ٓن کریم کے رو سے عقائد کے متعلق پہلی وحی حضر ت نوح علیہ السلام کو ہوئی کیونکہ ا س زمانہ میںایک طرف تو انسانی دماغ کا ارتقاء اس حد تک پہنچ چکا تھا کہ اس نے صفات الٰہیہ کا ادراک کرنا شروع کردیا تھااور دوسری طرف انسانوں میں وہ گنا ہ پید اہونے لگ گئے تھے جو تمدن کا ایک لازمی نتیجہ ہوتے ہیں پس خرابیوں کی اصلاح اور مزید روحانی ترقیات کادروازہ کھو لنے کے لئے حضرت نوح علیہ السلام کو پہلا شارع نبی بنا کر بھیجا گیا۔حضرت ابراہیم علیہ السلام بھی حضرت نوح علیہ السلام کی شریعت کے پیرؤں میںسے ہی تھے۔چنانچہ قرآن کریم میںاللہ تعالیٰ فرماتا ہے کہ وَ اِنَّ مِنْ شِيْعَتِهٖ لَاِبْرٰهِيْمَ (الصافات:۸۴)یعنی ابراہیم ؑ بھی نوح ؑ کے گروہ میں سے تھا اور چونکہ رسول کریم صلی اللہ علیہ وسلم بھی اپنے زمانہ کے نوح تھے اور نوح ؑوالا پیغام آپ کی وحی میں بھی شامل تھا اس لئے اللہ تعالیٰ نے یہاں نوح ؑ کا ذکر کرکے اس طرف توجہ دلائی ہے کہ اگر شریعت لعنت ہے تو پھر نوح ؑ کابھی انکار کرو جس کے ذریعہ نسل انسانی کے لئے شریعت کاآغاز ہو ا۔اور جس کے پیرؤں میںابراہیم جیسا جلیل القدر نبی بھی شامل تھااور اگر شریعت لعنت نہیں بلکہ ہمیشہ شریعت کاانکار کرنے والے سزا یاب ہوتے رہے ہیں جس طرح نوح ؑ کے زمانہ میں وہی لوگ تباہ ہوئے جنہوں نے نوح ؑکی بات ماننے سے انکار کردیاتھا۔اور وہی لوگ کامیاب ہوئے جو آپ کی ہدایت پرچلے تو اب بھی یاد رکھو کہ کامیابی انہی کو حاصل ہوگی جو محمد رسول اللہ صلی اللہ علیہ وسلم پر ایمان لارہے ہیں اور آپ کے مخالفوں کو سوائے ناکامی و نامرادی کے اور کچھ حاصل نہیں ہوگا۔وَ دَاوٗدَ وَ سُلَيْمٰنَ اِذْ يَحْكُمٰنِ فِي الْحَرْثِ اِذْ نَفَشَتْ اور( یاد کر )دائود کو بھی اور سلیمان کو بھی جبکہ وہ دونوں ایک کھیتی کے جھگڑے میںفیصلہ کررہے تھے فِيْهِ غَنَمُ الْقَوْمِ١ۚ وَ كُنَّا لِحُكْمِهِمْ شٰهِدِيْنَۗۙ۰۰۷۹ اس وقت جبکہ ایک قوم کے عامی لوگ اس کو کھا گئے تھے (یعنی تباہ کر گئے تھے) اور ہم ان کے فیصلہ کے گواہ تھے۔

فَفَهَّمْنٰهَا سُلَيْمٰنَ١ۚ وَ كُلًّا اٰتَيْنَا حُكْمًا وَّ عِلْمًا١ٞ وَّ سَخَّرْنَا ہم نے اصل معاملہ سلیمان کو سمجھادیا اور سب کو ہی ہم نے حکم اور علم عطافرمایاتھا۔مَعَ دَاوٗدَ الْجِبَالَ يُسَبِّحْنَ وَ الطَّيْرَ١ؕ وَ كُنَّا فٰعِلِيْنَ۰۰۸۰ اور ہم نے دائود کے ساتھ اہل جبال کو بھی اور پرندوں کو بھی کام پرلگادیا تھا وَ عَلَّمْنٰهُ صَنْعَةَ لَبُوْسٍ لَّكُمْ لِتُحْصِنَكُمْ مِّنْۢ بَاْسِكُمْ١ۚ وہ سب خدا کی تسبیح کرتے تھے اورہم یہ سب کچھ کرنے پرقادر تھے۔فَهَلْ اَنْتُمْ شٰكِرُوْنَ۰۰۸۱وَ لِسُلَيْمٰنَ الرِّيْحَ عَاصِفَةً اور ہم نے اس کو ایک لباس کا بنانا سکھایا تھا۔تاکہ وہ تمہاری جان لڑائی میںبچائے۔تَجْرِيْ بِاَمْرِهٖۤ اِلَى الْاَرْضِ الَّتِيْ بٰرَكْنَا فِيْهَا١ؕ وَ كُنَّا بِكُلِّ پس کیا تم شکر گذار بنوگے ؟اور ہم نے سلیمان کے لئے تیز ہوا کو بھی مسخر کر چھوڑاتھا جو اس کے حکم شَيْءٍ عٰلِمِيْنَ۰۰۸۲ کے مطابق چلتی تھی اس زمین کی طرف جس میں ہم نے برکت رکھی تھی اور ہم سب کچھ جانتے ہیں۔حلّ لُغَات۔نَفَشَتْ۔نَفَشَتْ نَفَشَ سے مؤنث کاصیغہ ہے اور نَفَشَتِ الْاِبِلُ وَ الْغَنَمُ کے معنے ہیں رَعَتْ لَیْلًا بِلَارَاعٍ رات کے وقت اونٹ یابکریاں کھیتی کو چرگئیں جبکہ کوئی گڈریا یانگہبان شخص ان کو روکنے والا نہ تھا۔(اقرب) اَلْجِبَالُ۔اَلْجِبَالُ اَلْجَبَلُکی جمع ہے اور اَلْجَبَلُ کے معنے ہیںپہاڑ۔نیز اس کے معنے ہیں سَیِّدُ الْقَوْمِ وَعَالِمُھُمْقوم کاسردار اورعالم۔(اقرب) عَاصِفَۃً۔عَاصِفَۃً عَصَفَ سے اسم فاعل مؤنث کاصیغہ ہے اور عَصَفَ الرِّیْحُ عَصْفًاکے معنے ہیں اِشْتَدَّتْ ہوا سخت تیز چلی (اقرب) پس عَاصِفَۃً کے معنے ہوںگے تیز چلنے والی۔

تفسیر۔پھر فرماتا ہے کہ دائودؑ اور سلیمان ؑ کو یاد کرو جبکہ وہ ایک کھیتی کے بارہ میں فیصلہ کر رہے تھے جبکہ اس کھیتی میں قوم کی بکریاں داخل ہوکر کھیتی کھا گئی تھیں۔مفسرین کہتے ہیں کہ کسی کی کھیتی بکریاں چرگئی تھیں۔حضرت دائود ؑ نے بکریاں کھیتی والے کو دلا دیں۔حضرت سلیمان ؑ نے کہاکہ نہیںبکریوں والاپانی دے اور کھیتی ہری کرے اور جب کھیتی پہلے جیسی ہو جائے تو اپنی بکریاں واپس لے لے(درمنثور زیر آیت ھذا)۔اس فیصلہ میںاگر یہ واقعہ اسی طرح ہوا ہو تو کوئی خاص بات نہیںکہ جسے قرآن کریم میں اس جگہ بیان کیاجائے۔میرے نزدیک اس آیت میںیہ بتایا گیا ہے کہ جب بھی نبی کی قوم عزت پاتی ہے تو دائود ؑ اور سلیمان ؑ کے زمانہ کی طرح ان کی قوم کے حریص لوگ نظام میںتفرقہ ڈالنے کی کوشش کرتے ہیں اور چارپایہ مزاج لوگ دین کی کھیتی کو چرنے لگ جاتے ہیں۔فرماتا ہے اس کا علاج ہم نے سلیمان ؑ کو سکھا دیا تھا۔جس کے نتیجہ میں بنی اسرائیل کی ہمسایہ قومیںجو چھاپے مار کر ان کی حکومت کو برباد کرنا چاہتی تھیں ان کے حملوں سے اس نے اپنی مملکت کو بچالیا اور نظام کی حفاظت کی۔بے شک سلیمان ؑاور دائود ؑدونوں کو بادشاہت بھی ملی تھی اور علم بھی ملاتھا مگر اس بارہ میں سلیمان ؑ کا طریق ٹھیک تھا اصل بات یہ ہے کہ حضرت دائود ؑ جنگی آدمی تھے اور انہوں نے ظالموں اور مفسدوں کو بڑی سخت سزائیں دی تھیں۔بلکہ بعض جگہ ان کے دوتہائی مرد قتل کردیئے تھے۔حضر ت سلیمانؑ کو اللہ تعالیٰ نے یہ فہم عطافرمایا کہ اب ہمسایوں سے نرمی کرو تو ان کی عداوت کم ہو جائےگی۔چنانچہ حضرت سلیمانؑ نے زیادہ تر معاہدات سے کام لیا اور اس طرح تمام ہمسایوں سے اپنی مملکت کو بچالیا مگر اس کے علاوہ فَفَهَّمْنٰهَا سُلَيْمٰنَ میںایک اور حکمت بھی مدنظر رکھی گئی ہے۔اور وہ یہ کہ اسرائیلی مصنفوںبلکہ یورپ کے مصنفوں کا بھی خیال ہے کہ حضرت دائود ؑ کی پالیسی اعلیٰ تھی اور حضرت سلیمان ؑکاطریق عمل ناقص تھا۔اللہ تعالیٰ اس کی تردید کرتے ہوئے فرماتا ہے کہ ہم نے سلیمان ؑ کو اس جھگڑے کا فیصلہ کرنا خوب سکھایا تھا(The Dictionary of Bible p۔829)۔اور چونکہ اس سے شبہ پیدا ہوتا تھا کہ پھرکیا دائود ؑکو نہیںسکھایا تھا؟ اس لئے اگلے حصہ میں وَ كُلًّا اٰتَيْنَا حُكْمًا وَّ عِلْمًا کہہ کر اس کا بھی ازالہ کردیا اور بتادیاکہ حضرت سلیمان ؑکو سکھانے سے یہ مراد نہیں کہ حضرت دائود ؑ کا طریق عمل غلط تھا بلکہ اس سے سلیمانؑ پرعائد کردہ ایک الزام کاازالہ مقصود ہے۔اس کے بعد فرماتا ہے کہ دائود ؑ کے ساتھ بھی بڑے بڑے لوگ شامل تھے جو اس کے ساتھ مل کر خدا تعالیٰ کی تسبیح کرتے تھے اور پرندے بھی اس کے ساتھ تسبیح کرتے تھے یعنی روحانی لوگ بھی اس کے گرد جمع ہو گئے تھے جن

کی پرواز اور نظریں آسمان پر ہوتی ہیں۔ان آیات میںاللہ تعالیٰ نے جو یہ فرمایا ہے کہ وَ سَخَّرْنَا مَعَ دَاوٗدَ الْجِبَالَ يُسَبِّحْنَ وَ الطَّيْرَ١ؕ وَ كُنَّا فٰعِلِيْنَ یعنی ہم نے داود ؑ کے لئے پہاڑ وں کو مسخر کر دیا تھا جو ہر وقت تسبیح کرتے تھے اور پرندے بھی مسخر کردیئے تھے اور ہم یہ سب کچھ کرنے پر قادر تھے اسی مضمون سے ملتاجلتا مضمون بعض دوسری سورتوں میںبھی بیان ہوا ہے۔چنانچہ سورہ سبا رکوع ۲ میں بھی آتاہے۔وَ لَقَدْ اٰتَيْنَا دَاوٗدَ مِنَّا فَضْلًا١ؕ يٰجِبَالُ اَوِّبِيْ مَعَهٗ وَ الطَّيْرَ١ۚ وَ اَلَنَّا لَهُ الْحَدِيْدَ۔اَنِ اعْمَلْ سٰبِغٰتٍ وَّ قَدِّرْ فِي السَّرْدِ وَ اعْمَلُوْا صَالِحًا١ؕ اِنِّيْ بِمَا تَعْمَلُوْنَ بَصِيْرٌ (سبا :۱۱۔۱۲)یعنی ہم نے دائود پر بڑافضل کیا اور ہم نے پہاڑوں سے کہا کہ اے پہاڑو اس کے ساتھ چلو اور پرندوں کو بھی حکم دے دیا کہ اس کے ساتھ رہیں اس کے لئے ہم نے لوہا نرم کردیا اور اسے کہا کہ اس لوہے سے زرہیں بنائو اور نیک اعمال کرو۔میںتمہارے کاموں سے خوب واقف ہوں۔اسی طرح سورئہ نمل میں آتاہے وَ لَقَدْ اٰتَيْنَا دَاوٗدَ وَ سُلَيْمٰنَ عِلْمًا١ۚ وَ قَالَا الْحَمْدُ لِلّٰهِ الَّذِيْ فَضَّلَنَا عَلٰى كَثِيْرٍ مِّنْ عِبَادِهِ الْمُؤْمِنِيْنَ۔وَ وَرِثَ سُلَيْمٰنُ دَاوٗدَ وَ قَالَ يٰۤاَيُّهَا النَّاسُ عُلِّمْنَا مَنْطِقَ الطَّيْرِ وَ اُوْتِيْنَا مِنْ كُلِّ شَيْءٍ١ؕ اِنَّ هٰذَا لَهُوَ الْفَضْلُ الْمُبِيْنُ۔وَ حُشِرَ لِسُلَيْمٰنَ جُنُوْدُهٗ مِنَ الْجِنِّ وَ الْاِنْسِ وَ الطَّيْرِ فَهُمْ يُوْزَعُوْنَ (النمل:۱۶ تا ۱۸)یعنی حضرت سلیمان ؑ دائودؑ کے وارث بنے اور انہوں نے کہااے لوگو مجھے اور میرے باپ کو پرندوں کی بولی سکھائی گئی ہے اور ہم کو ہر چیز دی گئی ہے اور ہم پر یہ خدا تعالیٰ کا بہت بڑافضل ہے اور سلیمان کے لئے لشکر جمع کئے گئے۔وہ لشکر انسانوں کے بھی تھے اور جنوں کے بھی تھے اور پرندوں کے بھی تھے۔پھر سورئہ ص رکوع ۲ میںآتاہے وَ اذْكُرْ عَبْدَنَا دَاوٗدَ ذَا الْاَيْدِ١ۚ اِنَّهٗۤ اَوَّابٌ۔اِنَّا سَخَّرْنَا الْجِبَالَ مَعَهٗ يُسَبِّحْنَ بِالْعَشِيِّ وَ الْاِشْرَاقِ۔وَ الطَّيْرَ مَحْشُوْرَةً١ؕ كُلٌّ لَّهٗۤ اَوَّابٌ (ص:۱۸ تا ۲۰)یعنی ہمارے بندے دائودؑ کو بھی یادکرو۔جو بڑی طاقت والا تھا۔وہ ہماری درگاہ میںبات بات پر جھکتا تھا ہم نے اس کے لئے پہاڑ مسخر کردیئے تھے جو صبح وشام تسبیح کرتے تھے۔اسی طرح پرندے بھی اس کی خاطر اکٹھے کردیئے تھے اور یہ سب کے سب اس کے کامل مطیع اور فرمانبردار تھے۔ان آیا ت کی بنا پر مفسرین لکھتے ہیںکہ حضرت دائود علیہ السلام اور حضرت سلیمان علیہ السلام کے قبضہ میںپہاڑ بھی تھے جنّ بھی تھے۔پرندے بھی تھے اوروہ سب مل کر حضر ت دائودعلیہ السلام کے ساتھ ذکر الٰہی کرتے تھے جب وہ کہتے سبحان اللہ تو پہاڑ بھی اور پرندے بھی اور جن بھی اور حیوانات بھی سب سبحان اللہ کہنے لگ جاتے۔جیسے کشمیری

واعظوں کادستور ہے کہ لیکچر دیتے ہوئے تھوڑی تھوڑی دیر کے بعد خود سستانے کے لئے کہہ دیتے ہیں ’’پڑھو درود ‘‘ وہ بھی گویااسی طرح کرتے تھے جب خود ذکر الٰہی کرتے کرتے تھک جاتے تو کہتے ہمالیہ کرتسبیح اوروہ تسبیح کرنے لگ جاتا۔پھر جب انہیںآرام آجاتا تو کہتے چپ کرجائو اب میںتسبیح کرتاہوں بعض کہتے ہیں پہاڑوں وغیرہ کاسبحان اللہ کہناکون سی بڑی بات تھی وہ باقاعدہ رکوع و سجود بھی کرتے تھے جب حضر ت دائود ؑ سجدہ میںجاتے تو سارے پہاڑ اور پرند چرند بھی سجد ہ میںچلے جاتے۔اور جب وہ رکوع کرتے تو سب رکوع کرنے لگ جاتے۔بعض کہتے ہیں اس تاویل سے بھی مزہ نہیں آیا۔اصل بات یہ ہے کہ حضرت دائود ؑ جہاں بھی جاتے پہاڑ آپ کے ساتھ چل پڑتے۔حضرت دائود ؑ تھے شام میں اور یہ ہمالیہ۔شوالک اور ایلپس سب آپ کے ساتھ ساتھ پھرا کرتے تھے اسی طرح پرندے بھی مل کر تسبیح کرتے تھے۔ان دنوں چڑیاں چوں چوں نہیں کرتی تھیں۔بکریاں میں میں نہیں کرتی تھیں بلکہ سب سبحان اللہ سبحان للہ کہا کرتے تھے کوئی یہ نہ پوچھے کہ بکری کس طرح پرندہ ہوگیا۔کیونکہ تفسیروں میںاسی طرح لکھا ہے غرض وہ عجیب زمانہ تھا اسی طرح سلیمان ؑ پرخدا تعالیٰ نے ایک اور مہربانی کی اور وہ یہ کہ جنّ ان کے حوالے کردئیے جو ان کے اشارے پر کام کرتے تھے جب وہ چلتے تو پرندے ان کے سر پر اپنے پر پھیلا کر سایہ کردیتے۔وہ یہ بھی کہتے ہیںکہ نعوذ باللہ حضرت دائود ؑ بڑے شکی طبیعت کے آدمی تھے جب کہیں باہر جاتے تو اپنی بیویوں کوگھر میں بند کرجاتے۔ایک دفعہ گھر میںآئے تو دیکھا ایک جوان مضبوط آدمی اندر پھر رہا ہے۔وہ اسے دیکھ کر سخت خفاء ہوئے اور کہنے لگے تجھے شرم نہیںآتی کہ اندر آگیا ہے پھر اس سے پوچھا کہ جب مکان کے تمام دروازے بند تھے تو تو اندر کس طرح آگیا۔وہ کہنے لگا میں وہ ہوں جسے دروازوں کی ضرورت نہیں آپ نے پوچھا کیا تو ملک الموت ہے اس نے کہا ہاں اور اس نے آپ کی جان نکال لی۔حضرت دائود علیہ السلام کو جب دفن کرنے لگے تو تمام پرندے اکٹھے ہوگئے اور انہوںنے آپ پر پروں سے سایہ کیا۔کہتے ہیں حضرت سلیمان ؑ تمام پرندوں کی بولی جانتے تھے۔کسی نے کہا کہ جانوروںکی بولیاں جانتے تھے یانہیں تو مفسرین نے اس کا یہ جواب دیا ہے کہ جانتے تو تھے مگر اختصار کے لحاظ سے صرف پرندوں کا ذکر کیا گیا ہے۔کہتے ہیں ایک دفعہ بارش نہ ہوئی تو لوگوں نے حضرت سلیمان ؑ سے کہا کہ چلیں استسقاء کی نماز پڑھائیں حضرت سلیمان ؑ نے کہا گھبراؤ نہیں بارش ہوجائے گی۔کیونکہ ایک کیڑی پیٹھ کے بل کھڑے ہوکر کہہ رہی تھی کہ خدایا اگر بارش نہ ہوئی تو ہم مر جائیں گی۔(تفسیرابن کثیر برحاشیہ فتح البیان جلد ۷ صفحہ ۲۰۴تا ۲۱۰و قرطبی زیر آیت ھذا) یہ وہ واقعات ہیںجو استعارے اور تشبیہ کو نہ سمجھنے کی وجہ سے مفسرین کو گھڑنے پڑے ہیں حالانکہ بات بالکل

صاف تھی۔اللہ تعالیٰ فرماتا ہے کہ ہم نے دائود ؑ کے لئے پہاڑوں کو مسخر کردیا جو تسبیح کرتے تھے اب ہم دیکھتے ہیںکہ کیاایسے قصوں کی ضرورت ہے۔حضرت دائود علیہ السلام کے متعلق اگر خدا نے یہ کہا ہے کہ ہم نے اس کے لئے پہاڑ مسخر کردیئے تو اللہ تعالیٰ ہمارے متعلق بھی قرآن کریم میں فرماتا ہے کہ اَللّٰهُ الَّذِيْ سَخَّرَ لَكُمُ الْبَحْرَ لِتَجْرِيَ الْفُلْكُ فِيْهِ بِاَمْرِهٖ وَ لِتَبْتَغُوْا مِنْ فَضْلِهٖ وَ لَعَلَّكُمْ تَشْكُرُوْنَ۔وَ سَخَّرَ لَكُمْ مَّا فِي السَّمٰوٰتِ وَ مَا فِي الْاَرْضِ جَمِيْعًا مِّنْهُ١ؕ اِنَّ فِيْ ذٰلِكَ لَاٰيٰتٍ لِّقَوْمٍ يَّتَفَكَّرُوْنَ۠(الجاثیۃ:۱۳،۱۴) فرماتا ہے اے محمد صلی اللہ علیہ وسلم پر ایمان لانے والے مومنو اور اے کافرو اور اے منافقو !ہم نے تم میںسے ہرایک کے لئے سمندر مسخر کردئیے ہیں جس میں کشتیاں اس کے حکم سے چلتی ہیں تاکہ تم خدا کا فضل تلاش کرو اور صرف سمندر ہی نہیں آسمان اور زمین میںجو کچھ ہے وہ بھی ہم نے تمہارے لئے مسخر کردیا ہے او راس میں غور وفکر کرنے والوں کے لئے بڑے بڑے نشانات ہیںاب اس آیت سے حضرت دائود علیہ السلام والی آیت بالکل حل ہوجاتی ہے۔کیونکہ اس آیت میںاللہ تعالیٰ نے یہ بتایا ہے کہ زمین وآسمان میںجس قدر چیزیں ہیںخواہ دریاہیں یاپہاڑ سب انسان کے لئے مسخر ہیں اب یہ عجیب بات ہے کہ پہاڑ میرے لئے بھی مسخر ہو ںمگر میرے ساتھ ہمالیہ کی ایک اینٹ بھی نہ چلے اور دائودؑ کے ساتھ پہاڑ کاپہاڑ چلنے لگ جائے اگر دائودؑ کے ساتھ واقعات ہوئے ہیںتو ہمارے ساتھ بھی ہونے چاہئیں اور اگر ہمارے ساتھ نہیں ہوتے تو صاف پتہ لگ گیاکہ حضرت دائود ؑ کے ساتھ بھی ایسانہیں ہوتا تھا۔اب رہا سوال تسبیح کا کوئی کہہ سکتاہے کہ قرآن میںتولکھاہے پہاڑ اور پرندے حضرت دائود ؑ کے ساتھ تسبیح کیا کرتے تھے۔کیا اب بھی یہ چیزیں تسبیح کرتی ہیں ؟ سو اس کا جواب اللہ تعالیٰ نے سورئہ جمعہ میںدے دیا ہے۔فرماتا ہے يُسَبِّحُ لِلّٰهِ مَا فِي السَّمٰوٰتِ وَ مَا فِي الْاَرْضِ الْمَلِكِ الْقُدُّوْسِ الْعَزِيْزِ الْحَكِيْمِ(الجمعۃ:۲)یعنی سورج بھی تسبیح کررہا ہے چاند بھی تسبیح کررہا ہے ستارے بھی تسبیح کررہے ہیں اسی طرح مَا فِي السَّمٰوٰتِ وَ مَا فِي الْاَرْضِ جو کچھ آسمانوں اور زمین میںہے سب تسبیح کررہے ہیں۔درخت بھی تسبیح کررہے ہیں اس کے پتے بھی تسبیح کررہے ہیں۔آم بھی تسبیح کررہا ہے۔کیلا بھی تسبیح کر رہاہے۔بلکہ کیلے کاچھلکا جو ہم اتار کر پھینک دیتے ہیں وہ بھی تسبیح کررہا ہے۔روٹی بھی تسبیح کررہی ہے تھالی بھی تسبیح کررہی ہے۔جب تم چائے پیتے ہو تمہارے ہونٹ بھی تسبیح کررہے ہوتے ہیں۔چائے بھی تسبیح کررہی ہوتی ہے۔مصری یا کھانڈبھی تسبیح کررہی ہوتی ہے۔پیالی بھی تسبیح کررہی ہوتی ہے پرچ بھی تسبیح کررہی ہوتی ہے۔اسی طرح مکان بھی اور چھت بھی اور دیواریں بھی اور دروازے بھی اسی طرح وہ بستر جس پر تم لیٹتے ہو وہ بھی بستر کی چادر اور توشک اور رضائی بھی سب سبحان اللہ سبحان اللہ کہہ رہی ہوتی ہیں اور جب ہرچیز سبحان اللہ کہہ رہی

·

آج 10 میں سے 10 باقی