صحیح بخاری 6084: باب التَّبَسُّمِ وَالضَّحِكِ
حبان بن موسیٰ نے ہم سے بیان کیا کہ عبداللہ (بن مبارک) نے ہمیں بتایا۔ معمر نے ہمیں خبر دی۔ انہوں نے زُہری سے، زہری نے عروہ سے، عروہ نے حضرت عائشہ رضی اللہ عنہا سے روایت کی کہ رفاعہ قرظیؓ نے اپنی بیوی کو طلاق دے دی اور اس کو قطعی طلاق دی۔ تو اس کے بعد عبدالرحمٰن بن زبیرؓ نے اس سے نکاح کر لیا پھر وہ نبی ﷺ کے پاس آئی اور کہنے لگی: یا رسول اللہ! وہ رفاعہؓ کے پاس تھی اور اس نے اس کو تین طلاقوں میں سے آخری طلاق بھی دے دی اور اس کے بعد عبدالرحمٰن بن زبیرؓ نے اس سے نکاح کر لیا اور بات یہ ہے کہ اللہ کی قسم یا رسول اللہ! اس کے ساتھ تو ایسا ہی ہے۔ اپنی اوڑھنی کے کنارے کو لے کر کہا: اس کنارے کی طرح ہی ہے۔ عروہ کہتے تھے: اور اس وقت حضرت ابوبکرؓ نبی ﷺ کے پاس بیٹھے تھے اور سعید بن عاص کے بیٹے (خالدؓ ) حجرے کے دروازے پر بیٹھے تھے تا انہیں اندر آنے کی اجازت دی جائے۔ یہ سن کر خالدؓ پکارنے لگے: ابوبکرؓ ابوبکرؓ ! کیا آپؓ اس کو اس بات سے ڈانتے نہیں جو وہ رسول اللہ ﷺ کے پاس کھول کر بیان کر رہی ہے؟ اور رسول اللہ ﷺ صرف مسکرائے اس سے زیادہ کچھ نہیں۔ پھر آپؐ نے فرمایا: شاید تم چاہتی ہو کہ رفاعہؓ کے پاس پھر چلی جاؤ۔ اس وقت تک نہیں جب تک کہ تم اس سے مزہ نہ اٹھاؤ اور وہ تم سے مزہ نہ اٹھائے۔
Urdu translation: Hazrat Syed Zain-ul-Abidin Waliullah Shah