کتاب 78: كتاب الأدب
صحیح بخاری, حصہ 12
صحیح بخاری 6190
اسحاق بن نصر نے ہم سے بیان کیا کہ عبدالرزاق نے ہمیں بتایا۔ معمر نے ہمیں خبر دی۔ معمر نے زُہری سے، زہری نے ابن مسیب سے، ابن مسیب نے اپنے باپ سے روایت کی کہ ان کا باپ نبیﷺ کے پاس آیا۔ آپؐ نے پوچھا: تمہارا نام کیا ہے؟ اُس نے کہا: حَزن۔ آپؐ نے فرمایا: تم سہل ہو۔ اُس نے کہا: میں وہ نام نہیں بدلتا جو میرا نام میرے باپ نے رکھا۔ (سعید) ابن مسیب کہتے تھے: تو پھر اس کے بعد ہم میں سختی اور مصیبت ہمیشہ رہی۔ علی بن عبداللہ اور محمود نے ہم سے بیان کیا اور وہ غیلان کے بیٹے تھے۔ ان دونوں نے کہا: عبدالرزاق نے ہم سے بیان کیا۔ معمر نے ہمیں خبر دی۔ معمر نے زُہری سے، زہری نے ابن مسیب سے، انہوں نے اپنے باپ سے، ان کے باپ نے ان کے دادا سے روایت کرتے ہوئے یہی بتایا۔
Urdu translation: Hazrat Syed Zain-ul-Abidin Waliullah Shah
صحیح بخاری 6191
سعید ابن ابی مریم نے ہم سے بیان کیا کہ ابوغسان نے ہمیں بتایا۔ انہوں نے کہا: ابوحازم نے مجھ سے بیان کیا۔ ابوحازم نے حضرت سہلؓ سے روایت کی۔ وہ کہتے تھے کہ منذر بن ابی اسیدؓ کو جب وہ پیدا ہوا نبی ﷺ کے پاس لایا گیا۔ آپؐ نے اُس کو اپنی ران پر بٹھایا۔ اس وقت حضرت ابواسیدؓ بیٹھے ہوئے تھے۔ اتنے میں نبی ﷺ کسی کام میں مشغول ہوئے جو آپؐ کر رہے تھے۔ یہ دیکھ کر حضرت ابواسیدؓ نے اپنے بیٹے کے متعلق کہا (کہ اسے اُٹھا لیا جائے۔) تو اسے نبی ﷺ کی ران سے اُٹھا لیا گیا۔ پھر جب نبی ﷺ فارغ ہوئے آپؐ نے فرمایا: بچہ کہاں ہے؟ حضرت ابواسیدؓ کہنے لگے: یا رسول اللہ! ہم نے اس کو واپس بھیج دیا ہے۔ آپؐ نے فرمایا: اس کا نام کیا ہے؟ انہوں نے کہا: فلاں۔ آپؐ نے فرمایا: نہیں، بلکہ اس کا نام منذر رکھو تو انہوں نے اسی دن اس کا نام منذر رکھا۔
Urdu translation: Hazrat Syed Zain-ul-Abidin Waliullah Shah
صحیح بخاری 6192
صدقہ بن فضل نے ہم سے بیان کیا کہ محمد بن جعفر نے ہمیں خبر دی۔ انہوں نے شعبہ سے، شعبہ نے عطاء بن ابی میمونہ سے، عطاء نے ابورافع سے، ابورافع نے حضرت ابوہریرہؓ سے روایت کی کہ حضرت زینب (بنت ابی سلمہؓ) کا نام بَرّہ تھا۔ (ان سے) کسی نے کہا: اپنے آپ کو پاک سمجھتی ہیں۔ یہ سن کر رسول اللہ ﷺ نے ان کا نام زینب رکھ دیا۔
Urdu translation: Hazrat Syed Zain-ul-Abidin Waliullah Shah
صحیح بخاری 6193
ابراہیم بن موسیٰ نے ہم سے بیان کیا۔ ہشام (بن یوسف) نے ہمیں بتایا کہ ابن جریج نے انہیں خبر دی۔ کہا: عبدالحمید بن جبیر بن شیبہ نے مجھے بتایا۔ کہا: میں سعید بن مسیب کے پاس بیٹھا۔ انہوں نے مجھ سے بیان کیا کہ اُن کا دادا حزن نبی ﷺ کے پاس آیا۔ آپؐ نے پوچھا: تمہارا نام کیا ہے؟ انہوں نے کہا: میرا نام حزن ہے۔ آپؐ نے فرمایا: نہیں، تم سہل ہو۔ کہنے لگا: میں تو نام بدلنے کا نہیں جو نام میرے باپ نے میرا رکھا۔ ابن مسیب کہتے تھے: پھر اس کے بعد ہم میں ہمیشہ ہی مصیبت اور سختی رہی۔
Urdu translation: Hazrat Syed Zain-ul-Abidin Waliullah Shah
صحیح بخاری 6194
(محمد بن عبداللہ) ابن نمیر نے ہم سے بیان کیا کہ محمد بن بشر نے ہمیں بتایا۔ اسماعیل (بن ابی خالد بجلی) نے ہم سے بیان کیا۔ (وہ کہتے تھے:) میں نے حضرت ابن ابی اوفیٰؓ سے پوچھا: کیا آپؓ نے نبی ﷺ کے بیٹے ابراہیمؓ کو دیکھا ؟ انہوں نے کہا: وہ چھوٹے ہی فوت ہوگئے تھے۔ اور اگر یہ مقدر ہوتا کہ حضرت محمد ﷺ کے بعد کوئی نبی ہو تو آپؐ کا بیٹا زندہ رہتا۔ مگر آپؐ کے بعد کوئی نبی نہیں۔
Urdu translation: Hazrat Syed Zain-ul-Abidin Waliullah Shah
صحیح بخاری 6195
سلیمان بن حرب نے ہم سے بیان کیا کہ شعبہ نے ہمیں بتایا۔ انہوں نے عدی بن ثابت سے روایت کی۔ انہوں نے کہا: میں نے حضرت براءؓ سے سنا۔ وہ کہتے تھے: جب (صاحبزادہ) ابراہیم علیہ السلام فوت ہوئے تو رسول اللہ ﷺ نے فرمایا: جنت میں اس کی ایک دودھ پلانے والی بھی ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6196
آدم (بن ابی ایاس) نے ہم سے بیان کیا کہ شعبہ نے ہمیں بتایا۔ انہوں نے حصین بن عبدالرحمٰن سے، حصین نے سالم بن ابی الجعد سے، سالم نے حضرت جابر بن عبداللہ انصاریؓ سے روایت کی۔ انہوں نے کہا: رسول اللہ ﷺ نے فرمایا: میرے نام پر نام رکھو اور میری کنیت پر اپنی کنیت نہ رکھو کیونکہ میں ہی قاسم ہوں جو تم میں تقسیم کرتا ہوں۔ حضرت انسؓ نے بھی نبی ﷺ سے اس حدیث کو روایت کیا۔
Urdu translation: Hazrat Syed Zain-ul-Abidin Waliullah Shah
صحیح بخاری 6197
موسیٰ بن اسماعیل نے ہم سے بیان کیا کہ ابوعوانہ نے ہمیں بتایا۔ ابوحصین نے ہم سے بیان کیا۔ ابوحصین نے ابوصالح سے، ابوصالح نے حضرت ابو ہریرہ رضی اللہ عنہ سے، حضرت ابو ہریرہؓ نے نبی ﷺ سے روایت کی۔ آپؐ نے فرمایا: میرے نام پر نام رکھو اور میری کنیت پر تم اپنی کنیت نہ رکھو اور جس نے خواب میں مجھے دیکھا تو اُس نے مجھے دیکھا کیونکہ شیطان میری صورت پر متمثل نہیں ہوتا۔ اور جس نے مجھ پر عمداً جھوٹ بولا تو پھر وہ آگ ہی میں اپنا ٹھکانہ بنائے۔
Urdu translation: Hazrat Syed Zain-ul-Abidin Waliullah Shah
صحیح بخاری 6198
محمد بن علاء نے ہم سے بیان کیا کہ ابواسامہ نے ہمیں بتایا۔ انہوں نے برید بن عبداللہ بن ابی بُردہ سے، برید نے ابوبردہ سے، ابوبردہ نے حضرت ابوموسیٰؓ سے روایت کی۔ انہوں نے کہا: میرے ہاں ایک لڑکا پیدا ہوا۔ میں اس کو نبی ﷺ کے پاس لایا اور آپؐ نے اس کا نام ابراہیم رکھا اور ایک کھجور سے گھٹی دی اور اس کے لئے برکت کی دعا کی اور پھر مجھے دیا۔ اور وہ حضرت ابوموسیٰؓ کے بیٹوں میں سے سب سے بڑا تھا۔
Urdu translation: Hazrat Syed Zain-ul-Abidin Waliullah Shah
صحیح بخاری 6199
ابوالولید نے ہم سے بیان کیا کہ زائدہ نے ہمیں بتایا۔ زیاد بن علاقہ نے ہم سے بیان کیا۔ (انہوں نے کہا:) میں نے حضرت مغیرہ بن شعبہؓ سے سنا۔ وہ کہتے تھے: جس دن (صاحبزادہ) ابراہیمؓ فوت ہوئے سورج گرہن ہوا۔ اس حدیث کو حضرت ابوبکرہؓ نے نبیؐ سے روایت کیا۔
Urdu translation: Hazrat Syed Zain-ul-Abidin Waliullah Shah
صحیح بخاری 6200
ابونعیم فضل بن دُکین نے ہمیں بتایا کہ ابن عیینہ نے ہم سے بیان کیا۔ انہوں نے زُہری سے، زہری نے سعید سے، سعید نے حضرت ابوہریرہؓ سے روایت کی۔ انہوں نے کہا: جب نبیﷺ نے اپنا سر رکوع سے اُٹھایا تو دعا کی: اے اللہ! ولید بن ولید اور سلمہ بن ہشام اور عیاش بن ابی ربیعہ اور وہ مؤمنین جنہیں مکہ میں کمزور سمجھا جاتا ہے نجات دے۔ اے اللہ! مضر کو سختی سے روند دے۔ اے اللہ! اُن کے لئے اُن کے سالوں کو ایسے سال بنا دے جو یوسفؑ کے سال جیسے ہوں۔
Urdu translation: Hazrat Syed Zain-ul-Abidin Waliullah Shah
صحیح بخاری 6201
ابوالیمان نے ہم سے بیان کیا کہ شعیب نے ہمیں بتایا۔ انہوں نے زُہری سے روایت کی، کہا: ابوسلمہ بن عبدالرحمٰن نے مجھ سے بیان کیا کہ نبی ﷺ کی زوجہ حضرت عائشہ رضی اللہ عنہا بیان کرتی تھیں کہ رسول اللہ ﷺ نے فرمایا: عائش! یہ جبریلؑ ہیں۔ تمہیں سلام کہتے ہیں۔ میں نے کہا: وَعَلَيْهِ السَّلَامُ وَرَحْمَةُ اللهِ۔ فرماتی تھیں: اور آپؐ وہ کچھ دیکھتے تھے جو ہم نہیں دیکھتے تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 6202
موسیٰ بن اسماعیل نے ہم سے بیان کیا کہ وہیب نے ہمیں بتایا۔ ایوب نے ہم سے بیان کیا۔ ایوب نے ابوقلابہ سے، ابوقلابہ نے حضرت انس رضی اللہ عنہ سے روایت کی۔ انہوں نے کہا: حضرت اُم سُلیمؓ بھی اُن عورتوں میں تھیں جو اُونٹوں پر جا رہی تھیں اور انجشہ نبی ﷺ کا غلام ان اونٹوں کو چلا رہا تھا۔ نبی ﷺ نے فرمایا: انجش! آہستہ آہستہ۔ تم شیشوں کو لے جا رہے ہو۔
Urdu translation: Hazrat Syed Zain-ul-Abidin Waliullah Shah
صحیح بخاری 6203
مسدد نے ہم سے بیان کیا کہ عبدالوارث نے ہمیں بتایا۔ انہوں نے ابوالتیاح سے، ابوالتیاح نے حضرت انسؓ سے روایت کی۔ انہوں نے کہا: نبی ﷺ سب لوگوں سے اخلاق میں اچھے تھے۔ اور میرا ایک بھائی تھا جسے ابوعمیر کہتے تھے۔ (حضرت انسؓ) کہتے تھے: میں سمجھتا ہوں کہ جس نے ابھی دودھ چھوڑا تھا۔ جب وہ آتا آپؐ فرماتے: ابوعمیر! وہ چڑیا نغیر کیسی ہے؟ نُغر ایک چڑیا تھی جس سے وہ کھیلا کرتا تھا۔ کبھی نماز کا وقت آجاتا اور اس وقت آپؐ ہمارے گھر میں ہی ہوتے تو آپؐ اس چٹائی کے متعلق جو آپؐ کے نیچے ہوتی حکم دیتے جسے جھاڑ کر دھو دیا جاتا۔ پھر آپؐ کھڑے ہوتے اور ہم بھی آپؐ کے پیچھے کھڑے ہوتے اور ہمیں نماز پڑھاتے تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 6204
خالد بن مخلد نے ہم سے بیان کیا کہ سلیمان نے ہمیں بتایا، کہا: ابوحازم نے مجھ سے بیان کیا۔ ابوحازم نے حضرت سہل بن سعدؓ سے روایت کی۔ وہ کہتے تھے: حضرت علی رضی اللہ عنہ کے ناموں میں سے سب سے پیارا نام ان کو ابوتراب تھا اور وہ بہت ہی خوش ہوا کرتے تھے جو اُنہیں اس نام سے پکارا جاتا۔ اور نبی ﷺ نے ہی اُن کا نام ابوتراب رکھا۔ ایک دن وہ حضرت فاطمہؓ سے ناراض ہو کر باہر چلے آئے اور مسجد میں دیوار کے ساتھ لگ کر لیٹ گئے۔ اتنے میں نبی ﷺ آئے اور ان کے پیچھے گئے۔ کسی نے کہا: وہ یہ دیوار کے ساتھ لیٹے ہوئے ہیں۔ نبی ﷺ اُن کے پاس آئے اور ان کی پیٹھ مٹی سے بھر گئی تھی تو نبی ﷺ اُن کی پیٹھ سے مٹی پونچھنے لگے اور فرماتے جاتے تھے: ابوتراب! اُٹھ بیٹھو۔
Urdu translation: Hazrat Syed Zain-ul-Abidin Waliullah Shah
صحیح بخاری 6205
ابوالیمان نے ہم سے بیان کیا کہ شعیب نے ہمیں بتایا۔ ابوالزناد نے ہم سے بیان کیا۔ ابوالزناد نے اعرج سے، اعرج نے حضرت ابوہریرہؓ سے روایت کی۔ انہوں نے کہا: رسول اللہ ﷺ نے فرمایا: قیامت کے دن اللہ کے نزدیک نہایت گھنَونا نام اُس شخص کا ہے جو اپنا نام شہنشاہ رکھواتا ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6206
علی بن عبداللہ نے ہم سے بیان کیا کہ سفیان نے ہمیں بتایا۔ انہوں نے ابوالزناد سے، ابوالزناد نے اعرج سے، اعرج نے حضرت ابوہریرہ ؓ سے روایت کی۔ انہوں نے (یوں) کہا: نہایت ہی ذلیل نام اللہ کے نزدیک۔ اور سفیان نے کئی بار (یوں) کہا: نہایت ہی ذلیل نام اللہ کے نزدیک اس شخص کا ہے جو مَلِک الْأَمْلَاک کہلاتا ہے۔ سفیان نے کہا کہ دوسرے راوی کہتے ہیں: اس کے معنی ہیں شہنشاہ۔
Urdu translation: Hazrat Syed Zain-ul-Abidin Waliullah Shah
صحیح بخاری 6207
ابو الیمان نے ہم سے بیان کیا کہ شعیب نے ہمیں بتایا۔ انہوں نے زُہری سے روایت کی۔ اور اسماعیل (بن ابی اویس) نے ہم سے بیان کیا، کہا: میرے بھائی نے مجھے بتایا۔ انہوں نے سلیمان سے، سلیمان نے محمد بن ابی عتیق سے، محمد نے ابن شہاب سے، ابن شہاب نے عروہ بن زبیر سے روایت کی کہ حضرت اُسامہ بن زید رضی اللہ عنہما نے اُنہیں خبر دی کہ رسول اللہ ﷺ ایک گدھے پر سوار ہوئے جس پر فدک کی چادر پڑی تھی اور حضرت اُسامہؓ آپؐ کے پیچھے بیٹھے تھے۔ آپؐ بنی حارث بن خزرج کے محلے میں حضرت سعد بن عبادہؓ کی عیادت کو جا رہے تھے۔ یہ واقعہ جنگ بدر سے پہلے کا ہے۔ وہ دونوں چلے گئے۔ اتنے میں وہ ایک مجلس کے پاس سے گزرے جس میں عبداللہ بن اُبیّ ابن سلول بھی تھا اور یہ پیشتر اس کے ہے کہ عبداللہ بن ابی مسلمان ہوا۔ تو کیا دیکھا اس مجلس میں مسلمان اور مشرک بت پرست اور یہود ملے جلے لوگ تھے۔ اور مسلمانوں میں حضرت عبداللہ بن رواحہؓ بھی تھے۔ جب جانور کی گرد مجلس پر پڑنے لگی تو ابن اُبیّ نے اپنی چادر سے اپنی ناک ڈھانک لی اور کہا: ہم پر گرد مت اُڑاؤ۔ رسول اللہ ﷺ نے اُن کو السلام علیکم کہا۔ پھر ٹھہر گئے اور نیچے اُتر آئے۔ آپؐ نے انہیں اللہ کی طرف بلایا اور ان کے سامنے قرآن پڑھا۔ عبداللہ بن اُبیّ ابن سلول سن کر کہنے لگا: آدمی جو تم کہتے ہو اُس سے بہتر اور کوئی بات نہیں۔ اگر یہ حق ہے تو پھر ہماری مجلسوں میں آکر ہمیں اس سے نہ ستایا کرو۔ جو تمہارے پاس آئے اُنہی کو یہ قصے سنایا کرو۔ حضرت عبداللہ بن رواحہؓ نے کہا: نہیں یا رسول اللہ! بلکہ آپؐ ہماری مجلسوں میں آیا کریں کیونکہ ہم یہ باتیں پسند کرتے ہیں۔ اس پر مسلمان، اور مشرک اور یہود نے ایک دوسرے کو گالیاں دینی شروع کیں یہاں تک کہ قریب تھا کہ وہ ایک دوسرے پر حملہ کرتے۔ رسول اللہ ﷺ اُن کے جوش کو دھیما کرتے رہے یہاں تک کہ وہ خاموش ہوگئے۔ اس کے بعد رسول اللہ ﷺ اپنے جانور پر سوار ہو کر چلے گئے اور حضرت سعد بن عبادہؓ کے پاس پہنچے۔ رسول اللہ ﷺ نے فرمایا: سعد! تم نے نہیں سنا جو ابوحباب نے کہا؟ یعنی عبداللہ بن اُبیّ نے۔ اُس نے ایسا ایسا کہا ہے۔ حضرت سعد بن عبادہؓ نے (سن کر) کہا: یا رسول اللہ میرے باپ آپؐ پر قربان۔ اسے معاف فرمائیں اور اس سے درگزر کریں۔ اُس ذات کی قسم جس نے آپؐ پر کتاب نازل کی۔ اللہ اس حق کو لے آیا ہے جو اُس نے آپؐ پر نازل کیا۔ اس بستی کے لوگوں نے یہ ٹھہرا لیا تھا کہ اس کو (یعنی عبداللہ بن اُبیّ کو) تاج پہنائیں اور اس کے سر پر سرداری کا عمامہ باندھیں۔ جب اللہ نے اسے اُس حق کی وجہ سے جو اُس نے آپؐ کو دیا منظور نہ کیا تو اس سے اس کا گلا گھٹ گیا۔ یہی وجہ ہے جو اُس نے کیا ہے جو آپؐ نے دیکھا۔ رسول اللہ ﷺ نے اس سے درگزر کیا اور رسول اللہ ﷺ اور آپؐ کے صحابہ مشرکوں اور اہل کتاب سے درگزر کیا کرتے تھے جیسا کہ اللہ نے انہیں حکم دیا۔ اور اُن کی ایذا دہی پر صبر کیا کرتے تھے۔ اللہ تعالیٰ نے فرمایا: اور تم ضرور ان لوگوں سے جنہیں (تم سے پہلے) کتاب دی گئی تھی (بہت دکھ دینے والا کلام) سنو گے۔ اور فرمایا: اہل کتاب میں سے بہت سے لوگ چاہتے ہیں (کہ تمہیں پھر کافر بنا دیں) تو رسول اللہ ﷺ ان احکام کے مطابق جو اللہ نے آپؐ کو دئیے تھے ان سے عفو فرمایا کرتے تھے یہاں تک کہ اللہ نے آپؐ کو ان کے متعلق اجازت دی۔ جب رسول اللہ ﷺ بدر میں جنگ کے لئے گئے اور اللہ نے کفار کے جن سرکردہ لوگوں اور قریش کے سرداروں کو وہاں قتل کیا۔ تو رسول اللہ ﷺ اور آپؐ کے صحابہ غالب ہو کر اپنے ساتھ کفار کے سرکردہ اور قریش کے سرداروں کو قید میں کئے ہوئے واپس لوٹے تو ابن اُبیّ ابن سلول اور جو اُس کے ساتھ مشرک بت پرست تھے کہنے لگے: یہ کام تو اَب بہت بڑا ہو گیا ہے۔ یہ دیکھ کر انہوں نے رسول اللہ ﷺ کی اسلام پر بیعت کرلی اور وہ مسلمان ہوگئے۔
Urdu translation: Hazrat Syed Zain-ul-Abidin Waliullah Shah
صحیح بخاری 6208
موسیٰ بن اسماعیل نے ہم سے بیان کیا کہ ابوعوانہ نے ہمیں بتایا۔ عبدالملک نے ہم سے بیان کیا۔ انہوں نے عبداللہ بن حارث بن نوفل سے، عبداللہ نے حضرت عباس بن عبدالمطلبؓ سے روایت کی کہ انہوں نے کہا: یا رسول اللہ! کیا آپؐ نے ابوطالب کو کچھ فائدہ پہنچایا؟ کیونکہ وہ آپؐ کی حفاظت کیا کرتے تھے اور آپؐ کی خاطر ناراض ہوا کرتے تھے۔ آپؐ نے فرمایا: ہاں۔ وہ ٹخنوں تک آگ میں ہیں۔ میں اگر نہ ہوتا تو وہ آگ کے سب سے نچلے طبقے میں ہوتے۔
Urdu translation: Hazrat Syed Zain-ul-Abidin Waliullah Shah
صحیح بخاری 6209
آدم (بن ابی ایاس) نے ہم سے بیان کیا کہ شعبہ نے ہمیں بتایا۔ انہوں نے ثابت بنانی سے، ثابت نے حضرت انس بن مالکؓ سے روایت کی۔ انہوں نے کہا: نبی ﷺ اپنے ایک سفر میں جا رہے تھے تو اُونٹ کے چلانے والے نے حداء اونٹ کے چلانے کے گیت پڑھے اور رسول اللہ ﷺ نے فرمایا: انجشہ افسوس! ان شیشوں پر رحم کرو۔
Urdu translation: Hazrat Syed Zain-ul-Abidin Waliullah Shah