کتاب 78: كتاب الأدب
صحیح بخاری, حصہ 7
صحیح بخاری 6090
میں نے آپؐ سے شکایت کی کہ میں گھوڑے پر جم کر نہیں بیٹھتا تو آپؐ نے میرے سینہ میں اپنا ہاتھ مارا اور فرمایا: اے اللہ! اس کو مضبوطی سے بیٹھنے کی توفیق دے اور اسے راہبر بنا، راہ راست پر چلا۔
Urdu translation: Hazrat Syed Zain-ul-Abidin Waliullah Shah
صحیح بخاری 6091
محمد بن مثنیٰ نے ہم سے بیان کیا کہ یحيٰ (قطان) نے ہمیں بتایا۔ انہوں نے ہشام (بن عروہ) سے روایت کی۔ انہوں نے کہا: میرے باپ نے مجھے خبر دی۔ انہوں نے حضرت زینب بنت اُم سلمہؓ سے، حضرت زینبؓ نے حضرت اُم سلمہؓ سے روایت کی کہ حضرت اُم سُلیمؓ نے کہا: یا رسول اللہ! اللہ حق سے نہیں شرماتا۔ کیا عورت کے لئے بھی نہانا ضروری ہے جب اسے احتلام ہو؟ آپؐ نے فرمایا: ہاں۔ جب وہ پانی دیکھے۔ یہ سن کر حضرت اُم سلمہؓ ہنس پڑیں اور کہنے لگیں: کیا عورت کو بھی احتلام ہوتا ہے؟ نبی ﷺ نے فرمایا: پھر بچے کی مشابہت اس سے کس لئے ہوتی ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6092
یحيٰ بن سلیمان نے ہم سے بیان کیا۔ کہا: (عبداللہ) ابن وہب نے مجھے بتایا۔ عمرو (بن حارث) نے ہمیں خبر دی کہ ابوالنضر (سالم بن ابی امیہ) نے ان کو بتایا۔ انہوں نے سلیمان بن یسار سے، سلیمان نے حضرت عائشہ رضی اللہ عنہا سے روایت کی۔ وہ بیان کرتی تھیں: میں نے نبی ﷺ کو پورا ہنستے کبھی نہیں دیکھا ایسا کہ میں آپؐ کا کوا دیکھتی۔ صرف مسکرایا ہی کرتے تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 6093
محمد بن محبوب نے ہم سے بیان کیا کہ ابوعوانہ نے ہمیں بتایا۔ انہوں نے قتادہ سے، قتادہ نے حضرت انسؓ سے روایت کی۔ اور خلیفہ (بن خیاط) نے مجھ سے بیان کیا کہ یزید بن زُرَیع نے ہمیں بتایا۔ سعید نے ہم سے بیان کیا۔ انہوں نے قتادہ سے، قتادہ نے حضرت انس رضی اللہ عنہ سے روایت کی کہ ایک شخص جمعہ کے دن مدینہ میں نبی ﷺ کے پاس آیا اور آپؐ خطبہ دے رہے تھے۔ اس نے کہا: بارش نہیں ہوتی جس سے قحط پڑ گیا ہے اس لئے اپنے ربّ سے بارش کے لئے دعا مانگیں۔ آپؐ نے آسمان کی طرف دیکھا اور ہم اس وقت کوئی بادل نہیں دیکھتے تھے۔ آپؐ نے بارش کے لئے دعا کی۔ تو ایک کے بعد ایک بادل اٹھنے لگے۔ پھر اُن پر اتنی بارش برسی کہ مدینہ کے نالے بہنے لگے اور آئندہ جمعہ تک بارش ہوتی رہی، ہٹتی نہ تھی۔ پھر وہی شخص یا اس کے علاوہ کوئی اور اُٹھا اور نبی ﷺ لوگوں سے مخاطب تھے۔ اس نے کہا: ہم تو ڈوب گئے اس لئے اپنے ربّ سے دعا مانگیں کہ وہ ہم سے اس بارش کو روک دے۔ (یہ سن کر) آپؐ ہنس پڑے۔ پھر دعا کی: اے اللہ! (بارش) ہمارے ارد گرد برسے اور ہم پر نہ برسے، دو دفعہ یا تین دفعہ کہا۔ اتنے میں وہ بادل پھٹ کر مدینہ سے دائیں بائیں ہمارے آس پاس برسنے لگے اور مدینہ میں مطلق نہ برستے۔ اللہ ان کو اپنے نبی ﷺ کی عزت اور آپؐ کی دعا کی قبولیت دکھلا رہا تھا۔
Urdu translation: Hazrat Syed Zain-ul-Abidin Waliullah Shah
صحیح بخاری 6094
عثمان بن ابی شیبہ نے ہم سے بیان کیا کہ جریر نے ہمیں بتایا۔ انہوں نے منصور سے، منصور نے ابووائل سے، ابووائل نے حضرت عبداللہ (بن مسعود) رضی اللہ عنہ سے، حضرت عبداللہؓ نے نبی ﷺ سے روایت کی۔ آپؐ نے فرمایا: سچائی نیکی کی طرف رہنمائی کرتی ہے اور نیکی جنت کی رہنمائی کرتی ہے اور آدمی سچ بولتے بولتے صدیق ہو جاتا ہے اور جھوٹ بدکاری کی راہ دکھاتا ہے اور بدکاری دوزخ کی طرف لے جاتی ہے اور آدمی جھوٹ بولتے بولتے آخر اللہ کے نزدیک بڑا جھوٹا لکھ دیا جاتا ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6095
(محمد) ابن سلام نے ہم سے بیان کیا کہ اسماعیل بن جعفر نے ہمیں بتایا۔ انہوں نے ابو سہیل نافع بن مالک بن ابی عامر سے، ابو سہیل نے اپنے باپ سے، ان کے باپ نے حضرت ابوہریرہؓ سے روایت کی کہ رسول اللہ ﷺ نے فرمایا: منافق کی نشانی تین باتیں ہیں۔ جب وہ بات کرے جھوٹ بولے، جب وعدہ کرے تو خلاف ورزی کرے، جب اس کے پاس امانت رکھی جائے تو خیانت کرے۔
Urdu translation: Hazrat Syed Zain-ul-Abidin Waliullah Shah
صحیح بخاری 6096
موسیٰ بن اسماعیل نے ہم سے بیان کیا کہ جریر نے ہمیں بتایا۔ ابورجاء (عمران) نے ہم سے بیان کیا۔ انہوں نے حضرت سمرہ بن جندب رضی اللہ عنہ سے روایت کی۔ انہوں نے کہا: نبی ﷺ نے فرمایا: میں نے دو شخص دیکھے کہ وہ میرے پاس آئے ہیں۔ انہوں نے کہا: وہ شخص جس کو تم نے دیکھا کہ اس کے جبڑے چیرے جاتے ہیں تو وہ کذاب ہے جو کہ جھوٹی بات کہتا تھا جو اس سے نقل کی جاتی۔ یہاں تک کہ چاروں طرف پہنچ جاتی۔ اب اس کے ساتھ روز قیامت تک ایسا ہی کیا جاتا رہے گا۔
Urdu translation: Hazrat Syed Zain-ul-Abidin Waliullah Shah
صحیح بخاری 6097
اسحاق بن ابراہیم نے ہم سے بیان کیا۔ انہوں نے کہا: میں نے ابو اسامہ سے پوچھا: کیا اعمش نے تم سے بیان کیا؟ میں نے شقیق سے سنا کہ انہوں نے کہا: میں نے حضرت حذیفہؓ (بن یمان) سے سنا۔ وہ کہتے تھے: لوگوں میں سے وضع قطع اور سیرت اور چال ڈھال میں جو شخص رسول اللہ ﷺ سے زیادہ مشابہ ہے وہ ابن اُم عبد (یعنی حضرت عبداللہ بن مسعودؓ) ہی ہیں اس وقت سے کہ جب وہ اپنے گھر سے نکلتے ہیں اس وقت کہ وہ اپنے گھر کو لوٹتے ہیں۔ ہم نہیں جانتے کہ وہ اپنے گھر والوں میں جب تنہا ہوتے ہیں تو کیا کرتے ہیں۔
Urdu translation: Hazrat Syed Zain-ul-Abidin Waliullah Shah
صحیح بخاری 6098
ابوالولید نے ہم سے بیان کیا کہ شعبہ نے ہمیں بتایا۔ انہوں نے مخارق (بن خلیفہ) سے روایت کی۔ انہوں نے کہا: میں نے حضرت طارق (بن شہابؓ) سے سنا۔ انہوں نے کہا: حضرت عبداللہ (بن مسعودؓ) کہتے تھے: سب سے اچھا کلام اللہ کی کتاب ہے اور بہترین روِش محمد ﷺ کی روِش ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6099
مسدد نے ہم سے بیان کیا کہ یحيٰ بن سعید نے ہمیں بتایا۔ انہوں نے سفیان (ثوری) سے روایت کی، کہا: اعمش نے مجھ سے بیان کیا۔ انہوں نے سعید بن جبیر سے، سعید نے ابوعبدالرحمٰن سلمی سے، ابوعبدالرحمٰن نے حضرت ابوموسیٰ رضی اللہ عنہ سے، انہوں نے نبی ﷺ سے روایت کی۔ آپؐ نے فرمایا: اللہ سے بڑھ کر کوئی بُری بات پر جسے اس نے سنا ہو صبر کرنے والا نہیں۔ یہ (بُری بات) کہ وہ کہتے ہیں کہ اس کا ایک بیٹا ہے پھر بھی اس کے باوجود وہ ان کو تندرستی دیتا ہے اور ان کو رزق بھی دیتا ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6100
عمر بن حفص نے ہم سے بیان کیا کہ میرے باپ نے ہمیں بتایا۔ اعمش نے ہم سے بیان کیا، کہا: میں نے شقیق سے سنا۔ وہ کہتے تھے: حضرت عبداللہ (بن مسعودؓ) نے کہا: نبی ﷺ نے کچھ مال تقسیم کیا ویسے ہی جیسا کہ آپؐ تقسیم کیا کرتے تھے تو انصار میں سے ایک شخص نے کہا: اللہ کی قسم یہ تو ایسی تقسیم ہے کہ اس سے اللہ کی رضا مندی نہیں چاہی گئی۔ میں نے کہا: میں تو یہ بات نبی ﷺ سے ضرور کہوں گا۔ چنانچہ میں آپؐ کے پاس آیا اور آپؐ اپنے صحابہ میں بیٹھے تھے۔ میں نے آپؐ سے چپکے سے یہ بات کہی۔ نبی ﷺ کو یہ بات بہت شاق گزری اور آپؐ کا چہرہ متغیر ہو گیا اور رنجیدہ ہوئے۔ آپؐ کو ایسا رنج پہنچا کہ میں نے آرزو کی کاش کہ میں نے آپؐ کو نہ بتایا ہوتا۔ پھر آپؐ نے فرمایا: موسیٰؑ کو بھی اس سے زیادہ ستایا گیا اور انہوں نے صبر کیا۔
Urdu translation: Hazrat Syed Zain-ul-Abidin Waliullah Shah
صحیح بخاری 6101
عمر بن حفص نے ہم سے بیان کیا کہ میرے باپ نے ہمیں بتایا۔ اعمش نے ہم سے بیان کیا کہ مسلم نے ہمیں بتایا۔ انہوں نے مسروق سے روایت کی کہ حضرت عائشہؓ فرماتی تھیں: نبی ﷺ نے ایک کام کیا، لوگوں کو بھی اس کے کرنے کی اجازت دی۔ بعض لوگوں نے اس سے پرہیز کیا۔ یہ بات نبی ﷺ کو پہنچی۔ آپؐ نے ان کو مخاطب کیا، اللہ کی تعریف کی پھر فرمایا: بعض لوگوں کو کیا ہوگیا ہے کہ وہ اپنے آپ کو اس کام کے کرنے سے بالا سمجھتے ہیں کہ جس کو میں کرتا ہوں۔ اللہ کی قسم! میں ان سے بڑھ کر اللہ کو جانتا ہوں اور ان سے زیادہ اس سے خشیت کرتا ہوں۔
Urdu translation: Hazrat Syed Zain-ul-Abidin Waliullah Shah
صحیح بخاری 6102
عبدان نے ہم سے بیان کیا کہ عبداللہ (بن مبارک) نے ہمیں بتایا۔ شعبہ نے ہمیں خبر دی۔ شعبہ نے قتادہ سے روایت کی کہ میں نے عبداللہ سے جو کہ حضرت انسؓ کے غلام ابوعتبہ کے بیٹے تھے سنا۔ عبداللہ نے حضرت ابوسعید خدریؓ سے روایت کی۔ انہوں نے کہا: نبی ﷺ اس کنواری لڑکی سے بھی زیادہ شرم کیا کرتے تھے جو اپنے پردے میں رہتی ہے۔ جب آپؐ کسی ایسی چیز کو دیکھتے کہ آپؐ اس سے نفرت کرتے تو ہم یہ (نفرت) آپؐ کے چہرے سے پہچان لیتے۔
Urdu translation: Hazrat Syed Zain-ul-Abidin Waliullah Shah
صحیح بخاری 6103
محمد (بن یحيٰ ذہلی) اور احمد بن سعید (دارمی) نے ہم سے بیان کیا کہ ان دونوں نے کہا: عثمان بن عمر نے ہم سے بیان کیا کہ علی بن مبارک نے ہمیں خبر دی۔ انہوں نے یحيٰ بن ابی کثیر سے، یحيٰ نے ابوسلمہ سے، ابوسلمہ نے حضرت ابوہریرہ رضی اللہ عنہ سے روایت کی کہ رسول اللہ ﷺ نے فرمایا: اگر کوئی شخص اپنے بھائی سے یوں کہے: اے کافر۔ تو پھر اُن میں سے ایک نے اپنے کفر کا اقرار کر لیا۔ اور عکرمہ بن عمار نے یحيٰ سے نقل کیا۔ یحيٰ نے عبداللہ بن یزید سے روایت کی کہ انہوں نے ابوسلمہ سے سنا۔ ابوسلمہ نے حضرت ابوہریرہؓ سے سنا کہ انہوں نے نبی ﷺ سے یہی روایت کی۔
Urdu translation: Hazrat Syed Zain-ul-Abidin Waliullah Shah
صحیح بخاری 6104
اسماعیل (بن ابی اویس) نے ہم سے بیان کیا، کہا: مالک نے مجھے بتایا۔ انہوں نے عبداللہ بن دینار سے، عبداللہ نے حضرت عبداللہ بن عمر رضی اللہ عنہما سے روایت کی کہ رسول اللہ ﷺ نے فرمایا: جس شخص نے بھی اپنے بھائی سے کہا: اے کافر۔ تو اُن میں سے ایک نے یقیناً اس کفر کا اقرار کر لیا۔
Urdu translation: Hazrat Syed Zain-ul-Abidin Waliullah Shah
صحیح بخاری 6105
موسیٰ بن اسماعیل نے ہم سے بیان کیا کہ وہیب نے ہمیں بتایا۔ ایوب (سختیانی) نے ہم سے بیان کیا۔ ایوب نے ابوقلابہ سے، ابوقلابہ نے حضرت ثابت بن ضحاکؓ سے، حضرت ثابتؓ نے نبی ﷺ سے روایت کی۔ آپؐ نے فرمایا: جس نے اسلام کے سوا کسی اور مذہب کی جھوٹی قسم کھائی۔ پھر وہ ایسا ہی ہے جیسا اس نے کہا۔ اور جس نے اپنے تئیں کسی چیز سے مار ڈالا تو اس کو جہنم کی آگ میں اس چیز سے سزا دی جائے گی۔ اور مؤمن پر لعنت کرنا ایسا ہی ہے جیسا اس کو مار ڈالنا۔ اور جس نے مؤمن پہ کفر کا الزام لگایا۔ یہ بھی ایسا ہی ہے جیسا اس نے اُسے قتل کیا۔
Urdu translation: Hazrat Syed Zain-ul-Abidin Waliullah Shah
صحیح بخاری 6106
محمد بن عبادہ نے ہم سے بیان کیا کہ یزید نے ہمیں بتایا۔ سلیم (بن حیان) نے ہمیں خبر دی۔ عمرو بن دینار نے ہمیں بتایا۔ حضرت جابر بن عبداللہؓ نے ہم سے بیان کیا کہ حضرت معاذ بن جبل رضی اللہ عنہ نبی ﷺ کے ساتھ نماز پڑھا کرتے تھے۔ پھر اپنی قوم میں آ کر ان کو نماز پڑھاتے۔ ایک دفعہ (ان کو نماز پڑھاتے ہوئے) سورۂ بقرہ پڑھی۔ (حضرت جابرؓ) کہتے تھے: ایک شخص نے جماعت سے الگ ہو کر مختصر سی نماز پڑھ لی۔ حضرت معاذؓ کو یہ علم ہوا تو انہوں نے کہا کہ وہ منافق ہے۔ اس شخص کو یہ خبر پہنچی تو وہ نبی ﷺ کے پاس آیا اور کہنے لگا: یا رسول اللہ! ہم ایسے لوگ ہیں کہ جو اپنے ہاتھوں سے محنت کرتے ہیں اور اپنے اونٹوں پر پانی لاتے ہیں۔ اور حضرت معاذؓ نے ہمیں گزشتہ رات نماز پڑھائی تو انہوں نے سورۂ بقرہ پڑھی۔ میں نے الگ (مختصر سی نماز) پڑھی اور حضرت معاذؓ نے کہا: میں منافق ہوں۔ نبی ﷺ نے تین بار فرمایا: معاذ! کیا تم ابتلاء میں ڈالنے والے ہو؟ وَالشَّمْسِ وَضُحٰىهَا اور سَبِّحِ اسْمَ رَبِّكَ الْاَعْلَى اور ایسی سورتیں پڑھا کرو۔
Urdu translation: Hazrat Syed Zain-ul-Abidin Waliullah Shah
صحیح بخاری 6107
اسحاق (بن راہویہ) نے مجھ سے بیان کیا کہ ابوالمغیرہ (عبدالقدوس بن حجاج) نے ہمیں بتایا۔ اوزاعی نے ہم سے بیان کیا کہ زُہری نے ہمیں بتایا۔ انہوں نے حُمَید سے، حُمَید نے حضرت ابوہریرہؓ سے روایت کی۔ انہوں نے کہا: رسول اللہ ﷺ نے فرمایا: جس نے تم میں سے قسم کھائی اور اپنی قسم میں لات اور عزیٰ کا نام لیا۔ پھر چاہیئے کہ وہ لَا إِلَهَ إِلَّا اللهُ کا اقرار کرے اور جس نے اپنے ساتھی سے کہا: آؤ میں تم سے جؤا کھیلوں تو وہ صدقہ دے۔
Urdu translation: Hazrat Syed Zain-ul-Abidin Waliullah Shah
صحیح بخاری 6108
قتیبہ (بن سعید) نے ہم سے بیان کیا کہ لیث نے ہمیں بتایا۔ انہوں نے نافع سے، نافع نے حضرت ابن عمر رضی اللہ عنہما سے روایت کی کہ وہ حضرت عمر بن خطاب ؓ سے ایک قافلے میں جاتے ہوئے ملے اور وہ اپنے باپ کی قسم کھا رہے تھے۔ رسول اللہ ﷺ نے پکار کر فرمایا: دیکھو اللہ نے تمہیں اپنے باپ دادا کی قسمیں کھانے سے منع فرمایا ہے۔ جس نے قسم کھانی ہو تو چاہیئے کہ وہ اللہ کی قسم کھائے ورنہ خاموش رہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6109
یسرہ بن صفوان نے ہم سے بیان کیا کہ ابراہیم (بن سعد) نے ہمیں بتایا۔ انہوں نے زُہری سے، زہری نے قاسم (بن محمد) سے، قاسم نے حضرت عائشہ رضی اللہ عنہا سے روایت کی۔ آپؓ فرماتی تھیں: میرے پاس رسول اللہ ﷺ تشریف لائے اور گھر میں ایک پردہ تھا جس میں کچھ صورتیں تھیں۔ انہیں دیکھ کر آپؐ کا چہرہ متغیر ہوگیا۔ پھر آپؐ نے پردہ کو لیا اور اس کو پھاڑ ڈالا۔ وہ بیان کرتی تھیں: نبی ﷺ نے فرمایا: قیامت کے روز جن لوگوں کو سخت سزا دی جائے گی اُن میں سے وہ بھی ہیں جو یہ صورتیں بناتے ہیں۔
Urdu translation: Hazrat Syed Zain-ul-Abidin Waliullah Shah