کتاب 81: كتاب الرقاق
صحیح بخاری, حصہ 8
صحیح بخاری 6552
(امام بخاریؒ نے کہا: اور اسحاق بن ابراہیم نے کہا: ہمیں مغیرہ بن سلمہ نے بتایا کہ ہم سے وہیب (بن خالد) نے بیان کیا۔ اُنہوں نے ابوحازم سے، ابوحازم نے حضرت سہل بن سعدؓ سے، حضرت سہل نے رسول اللہ ﷺ سے روایت کی۔ آپؐ نے فرمایا: جنت میں ایک ایسا درخت ہے کہ سوار اس کے سایہ میں سو برس تک بھی چلتا رہے وہ اس کو طے نہیں کرے گا۔
Urdu translation: Hazrat Syed Zain-ul-Abidin Waliullah Shah
صحیح بخاری 6553
ابو حازم نے (اسی سند سے) کہا: میں نے نعمان بن ابی عیاش سے یہ بیان کیا تو اُنہوں نے کہا: مجھے حضرت ابو سعیدؓ نے نبی ﷺ سے روایت کرتے ہوئے بتایا۔ آپؐ نے فرمایا: جنت میں ایک ایسا درخت ہے کہ گھوڑ دوڑ کے لئے تیار کئے ہوئے اعلیٰ قسم کے نہایت ہی تیز گھوڑے کا سوار سو سال تک بھی چلتا رہے تو اس کو طے نہیں کرے گا۔
Urdu translation: Hazrat Syed Zain-ul-Abidin Waliullah Shah
صحیح بخاری 6554
قتیبہ (بن سعید) نے ہم سے بیان کیا کہ عبدالعزیز (بن ابی حازم) نے ہمیں بتایا۔ اُنہوں نے ابوحازم سے، ابوحازم نے حضرت سہل بن سعدؓ سے روایت کی کہ رسول اللہ ﷺ نے فرمایا: میری اُمت میں سے ستر ہزار یا فرمایا: سات لاکھ جنت میں داخل ہوں گے۔ ابوحازم نہیں جانتے کہ حضرت سہلؓ نے کونسا لفظ کہا۔ وہ سنبھل کر ایک دوسرے کو پکڑتے ہوئے داخل ہوں گے۔ ان میں سے اگلا شخص اس وقت تک داخل نہیں ہوگا جب تک کہ ان میں سے سب سے پچھلا داخل نہ ہوجائے۔ ان کے چہرے چودھویں رات کے چاند کی طرح ہوں گے۔
Urdu translation: Hazrat Syed Zain-ul-Abidin Waliullah Shah
صحیح بخاری 6555
عبداللہ بن مسلمہ نے ہم سے بیان کیا کہ عبدالعزیز (بن ابی حازم) نے ہمیں بتایا۔ اُنہوں نے اپنے باپ سے، اُن کے باپ نے حضرت سہلؓ سے، حضرت سہلؓ نے نبی ﷺ سے روایت کی۔ آپؐ نے فرمایا: جنت والے جنت میں اپنے بالا خانوں کو اس طرح دیکھیں گے۔ جیسے تم آسمان میں ستاروں کو دیکھتے ہو۔
Urdu translation: Hazrat Syed Zain-ul-Abidin Waliullah Shah
صحیح بخاری 6556
میرے باپ نے کہا: میں نے نعمان بن ابی عیاش سے یہ بیان کیا۔ اُنہوں نے کہا: میں بھی گواہی دیتا ہوں کہ میں نے حضرت ابوسعیدؓ کو بھی اِسی طرح بیان کرتے ہوئے سنا اور وہ اس میں اتنا بڑھاتے تھے جیسا کہ تم آسمان کے شرقی اور غربی کنارے میں ڈوبتے ہوئے ستارے کو دیکھتے ہو۔
Urdu translation: Hazrat Syed Zain-ul-Abidin Waliullah Shah
صحیح بخاری 6557
محمد بن بشار نے مجھ سے بیان کیا کہ غندر نے ہمیں بتایا۔ شعبہ نے ہم سے بیان کیا۔ اُنہوں نے ابوعمران (جونی) سے روایت کی۔ اُنہوں نے کہا: میں نے حضرت انس بن مالک رضی اللہ عنہ سے سنا۔ حضرت انسؓ نے نبی ﷺ سے روایت کی۔ آپؐ نے فرمایا: اللہ تعالیٰ فرمائے گا دوزخیوں میں سے جس کو قیامت کے روز بہت ہلکی سزا ہوگی (اس سے پوچھا جائے گا) جو کچھ بھی زمین میں ہے اگر تمہارے لئے ہو تو کیا تم اس کو دے کر اپنے آپ کو چھڑواؤ گے؟ وہ کہے گا: ہاں۔ اللہ تعالیٰ فرمائے گا: میں نے تجھ سے اس سے بھی آسان بات چاہی تھی جبکہ تو آدم کی پشت میں تھا اور وہ یہ کہ کسی چیز کو بھی میرا شریک نہ ٹھہراؤ مگر تم نے نہ مانا میرے شریک ہی ٹھہرائے۔
Urdu translation: Hazrat Syed Zain-ul-Abidin Waliullah Shah
صحیح بخاری 6558
ابونعمان نے ہم سے بیان کیا کہ حماد (بن زید) نے ہمیں بتایا۔ اُنہوں نے عمرو (بن دینار) سے، عمرو نے حضرت جابر رضی اللہ عنہ سے روایت کی کہ نبی ﷺ نے فرمایا: شفاعت سے جو آگ سے نکلیں گے وہ ایسے ہوں گے جیسے ثعاریر۔ (حماد کہتے تھے) میں نے پوچھا: یہ ثعاریر کیا چیز ہے؟ اُںہوں نے کہا: چھوٹی ککڑیاں۔ اور اُن کے دانت گر گئے تھے۔ میں نے عمرو بن دینار ابو محمد سے پوچھا: کیا آپ نے حضرت جابر بن عبداللہؓ سے سنا کہ وہ یہ کہتے تھے کہ میں نے نبی ﷺ سے سنا۔ آپؐ فرماتے تھے: شفاعت پر آگ سے نکلیں گے؟ اُنہوں نے کہا ہاں۔
Urdu translation: Hazrat Syed Zain-ul-Abidin Waliullah Shah
صحیح بخاری 6559
ہدبہ بن خالد نے ہم سے بیان کیا کہ ہمام نے ہمیں بتایا کہ قتادہ سے مروی ہے کہ حضرت انس بن مالکؓ نے ہم سے بیان کیا، حضرت انسؓ نے نبی ﷺ سے روایت کی۔ آپؐ نے فرمایا: آگ سے کچھ لوگ جبکہ وہ اس سے جل کر کالے پیلے ہو جائیں گے نکلیں گے اور جنت میں داخل ہوں گے تو جنتی اُن کے نام جہنمی رکھیں گے۔
Urdu translation: Hazrat Syed Zain-ul-Abidin Waliullah Shah
صحیح بخاری 6560
موسیٰ نے ہم سے بیان کیا کہ وہیب نے ہمیں بتایا۔ عمرو بن یحيٰ نے ہم سے بیان کیا، عمر و نے اپنے باپ سے، ان کے باپ نے حضرت ابو سعید خدری رضی اللہ عنہ سے روایت کی کہ نبی ﷺ نے فرمایا: جب جنتی جنت میں اور دوزخی آگ میں داخل ہو جائیں گے تو اللہ فرمائے گا۔ جو شخص ایسا ہو کہ اس کے دل میں ایک رائی کے دانے برابر بھی ایمان ہو اس کو نکال لو اور وہ نکلیں گے جل کر کوئلہ ہو چکے ہوں گے اور اُنہیں آب حیات میں ڈالا جائے گا پھر وہ اُسی طرح نشوونما پائیں گے جیسے دانہ سیلاب کے کوڑا کرکٹ میں اُ گتا ہے یا کہا سیلاب کے کچرے میں اور نبی ﷺ نے فرمایا: کیا تم نے دیکھا نہیں کہ وہ زرد لپٹا ہوا اُگتا ہے؟
Urdu translation: Hazrat Syed Zain-ul-Abidin Waliullah Shah
صحیح بخاری 6561
محمد بن بشار نے مجھ سے بیان کیا کہ غندر نے ہمیں بتایا۔ شعبہ نے ہم سے بیان کیا، شعبہ نے کہا: میں نے ابواسحاق (سبیعی) سے سنا۔ اُنہوں نے کہا: میں نے حضرت نعمان (بن بشیرؓ) سے سنا۔ (حضرت نعمانؓ نے کہا) میں نے نبی ﷺ سے سنا۔ آپؐ فرماتے تھے: دوزخیوں میں سے جسے قیامت کے دن سب سے ہلکا عذاب ہو گا وہ وہ شخص ہوگا جس کے تلوں میں انگارہ رکھا جائے گا جس سے اس کا دماغ اُبلے گا۔
Urdu translation: Hazrat Syed Zain-ul-Abidin Waliullah Shah
صحیح بخاری 6562
عبداللہ بن رجاء نے ہم سے بیان کیا کہ اسرائیل نے ہمیں بتایا۔ اُنہوں نے ابواسحاق سے، ابواسحاق نے حضرت نعمان بن بشیرؓ سے روایت کی۔ اُنہوں نے کہا: میں نے نبی ﷺ سے سنا۔ آپؐ فرماتے تھے: دوزخیوں میں سے جسے قیامت کے دن سب سے ہلکا عذاب ہوگا وہ وہ شخص ہوگا جس کے تلووں پر دو انگارے رکھے جائیں گے جن سے اس کا دماغ اُبلے گا جیسے ہنڈیا اُبلتی ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6563
سلیمان بن حرب نے ہم سے بیان کیا کہ شعبہ نے ہمیں بتایا۔ اُنہوں نے عمرو (بن مُرّہ) سے، عمرو نے خیثمہ (بن عبدالرحمٰن جعفی) سے، خیثمہ نے حضرت عدی بن حاتمؓ سے روایت کی کہ نبیﷺ نے آگ کا ذکر کیا اور اپنا منہ ایک طرف پھیر لیا اور اس سے پناہ مانگی۔ پھر آپؐ نے آگ کا ذکر کیا اور اپنا منہ ایک طرف پھیر لیا اور اُس سے پناہ مانگی۔ پھر آپؐ نے فرمایا: آگ سے بچو گو کھجور کے ایک ٹکڑے سے ہی، اور جو یہ بھی نہ پائے تو اچھی بات ہی سے۔
Urdu translation: Hazrat Syed Zain-ul-Abidin Waliullah Shah
صحیح بخاری 6564
ابراہیم بن حمزہ نے ہم سے بیان کیا کہ ابن ابی حازم اور دراوردی نے ہمیں بتایا۔ ان دونوں نے یزید سے، اُنہوں نے عبداللہ بن خباب سے، عبداللہ نے حضرت ابو سعید خدری رضی اللہ عنہ سے روایت کی کہ اُنہوں نے رسول اللہ ﷺ سے سنا اور آپؐ کے پاس آپؐ کے چچا ابو طالب کا ذکر کیا گیا۔ آپؐ نے فرمایا: قیامت کے دن شاید اُن کو میری سفارش فائدہ دے اور اُنہیں دوزخ کے ایک پایاب مقام میں رکھا جائے جہاں آگ اُن کے ٹخنوں تک ہی پہنچے جس سے اُن کے دماغ کا بھیجا اُبلتا رہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6565
مسدد نے ہم سے بیان کیا کہ ابوعوانہ نے ہمیں بتایا۔ اُنہوں نے قتادہ سے، قتادہ نے حضرت انس رضی اللہ عنہ سے روایت کی۔ اُنہوں نے کہا: رسول اللہ ﷺ نے فرمایا: قیامت کے دن اللہ لوگوں کو اکٹھا کرے گا اور وہ مشورہ کریں گے اگر ہم اپنے ربّ کے حضور کسی کی سفارش کرائیں کہ وہ ہمیں اپنی اس حالت سے چھٹکارا دے تو وہ آدمؑ کے پاس آئیں گے اور کہیں گے: آپؑ وہ ہیں جن کو اللہ نے اپنے ہاتھ سے بنایا اور آپؑ میں اپنی روح پھونکی اور ملائکہ کو حکم دیا تو اُنہوں نے آپؑ کو سجدہ کیا اس لئے آپ ہمارے لئے ربّ کے حضور سفارش کریں۔ وہ کہیں گے: میں اس مقام پر نہیں ہوں اور وہ اپنی خطا یاد کریں گے اور کہیں گے نوحؑ کے پاس جاؤ جو پہلے رسول ہیں جن کو اللہ نے بھیجا اور وہ اُن کے پاس آئیں گے (اور سفارش کے لئے کہیں گے:) تو وہ جواب دیں گے۔ میں اس مقام پر نہیں ہوں اور وہ اپنی خطا یاد کریں گے۔ کہیں گے ابراہیمؑ کے پاس جاؤ جن کو اللہ نے اپنا خلیل بنایا۔ یہ سن کر وہ اُن کے پاس آئیں گے اور وہ جواب دیں گے۔ میں اس مقام پر نہیں اور اپنی خطا یاد کریں گے۔ (کہیں گے) موسیٰؑ کے پاس جاؤ جن سے اللہ نے کلام کیا اور وہ اُن کے پاس آئیں گے۔ تو وہ کہیں گے: میں اس مقام پر نہیں اور وہ اپنی خطا یاد کریں گے۔ کہیں گے: عیسیٰؑ کے پاس جاؤ اور وہ اُن کے پاس آئیں گے اور وہ کہیں گے: میں اس مقام پر نہیں۔ محمد ﷺ کے پاس جاؤ کیونکہ اُن کے پہلے پچھلے قصور بخش دئیے گئے ہیں۔ پھر وہ میرے پاس آئیں گے اور میں اپنے ربّ کے پاس جانے کی اجازت مانگوں گا۔ جب میں دیکھوں گا تو سجدے میں گر جاؤں گا اور جب تک اللہ چاہے گا مجھے سجدے میں پڑا رہنے دے گا پھر کہا جائے گا: اپنا سر اُٹھا، مانگ تجھے دیا جائے گا اور کہو تمہاری سنی جائے گی، سفارش کرو تمہاری سفارش قبول ہو گی۔ تب میں اپنا سر اُٹھاؤں گا اور اپنے ربّ کی وہ ستائش کروں گا جو وہ مجھے سکھائے گا۔ پھر میں سفارش کروں گا اور وہ میرے لئے ایک حد مقرر کرے گا اور اس کے بعد میں اُن کو آگ سے نکالوں گا اور جنت میں داخل کروں گا۔ پھر میں دوبارہ جاؤں گا۔ اسی طرح سجدے میں گر جاؤں گا۔ اسی طرح تیسری بار یا چوتھی بار سفارش کروں گا یہاں تک کہ سفارش کر کے اُن کو آگ سے نجات دلاؤں گا۔ یہاں تک کہ آگ میں صرف وہی رہ جائیں گے جنہیں قرآن نے وہاں روکے رکھا اور قتادہ یہ بیان کر کے کہا کرتے تھے یعنی جس کے لئے ہمیشہ رہنا ضروری ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6566
مسدد نے ہم سے بیان کیا کہ یحيٰ (قطان) نے ہمیں بتایا۔ اُنہوں نے حسن بن ذکوان سے، ابورجاء نے ہم سے بیان کیا کہ حضرت عمران بن حصین رضی اللہ عنہما نے ہمیں بتایا۔ اُنہوں نے نبی ﷺ سے روایت کی کہ آپؐ نے فرمایا: محمد ﷺ کی سفارش سے کچھ لوگ آگ سے نکلیں گے اور جنت میں داخل ہوں گے۔ اُنہیں جہنمی کے نام سے یاد کیا جائے گا۔
Urdu translation: Hazrat Syed Zain-ul-Abidin Waliullah Shah
صحیح بخاری 6567
قتیبہ (بن سعید) نے ہم سے بیان کیا کہ اسماعیل بن جعفر نے ہمیں بتایا۔ اُنہوں نے حمید سے، حمید نے حضرت انسؓ سے روایت کی کہ حارثہؓ بدر کے دن شہید ہو گئے تھے اُنہیں ایک ناگہانی تیر لگا تھا۔ حضرت اُم حارثہؓ رسول اللہؐ کے پاس آئیں اور وہ کہنے لگیں: یا رسول اللہ! آپؐ خوب جانتے ہیں جو حارثہؓ کی محبت میرے دل میں تھی اگر تو وہ جنت میں ہے تو میں اُس پر نہیں روؤں گی ورنہ آپؐ عنقریب دیکھ لیں گے کہ میں کیا کچھ کروں گی۔ آپؐ نے فرمایا: بھولی بھالی! کیا جنت ایک ہی ہے؟ جنتیں تو بہت ہیں اور وہ تو فردوس بریں میں ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6568
اور فرمایا: اللہ کی راہ میں تھوڑا سا صبح کو نکلنا یا تھوڑا سا شام کو نکلنا دنیا و ما فیہا سے بہتر ہے اور جنت میں تم میں سے ایک کی کمان برابر یا پاؤں رکھنے کی جگہ دنیا و ما فیہا سے بہتر ہے اور اگر جنتیوں کی عورتوں میں سے کوئی عورت زمین پر جھانک پائے تو وہ زمین و آسمان میں جو کچھ ہے سب کو روشن کر دے اور اس ساری فضا کو جو زمین و آسمان کے درمیان ہے خوشبو سے بھر دے اور اس کا دوپٹہ یعنی اوڑھنی دنیا و ما فیہا سے بہتر ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6569
ابوالیمان نے ہم سے بیان کیا کہ شعیب نے ہم سے بتایا۔ ابوزناد نے ہم سے بیان کیا، ابوزناد نے اعرج سے، اعرج نے حضرت ابو ہریرہؓ سے روایت کی، اُنہوں نے کہا: نبی ﷺ نے فرمایا: جنّت میں جو کوئی بھی داخل ہوگا تو ضرور اُسے اس کا ٹھکانا جو آگ میں ہوتا اگر وہ برے کام کرتا دکھایا جائے گا تاکہ وہ زیادہ شکر گزار ہو اور جو کوئی بھی آگ میں داخل ہو گا تو ضرور اسے اس کا ٹھکانا دکھایا جاتا ہے جو جنت میں ہوتا اگر وہ اچھے کام کرتا تا کہ یہ اسے حسرت رہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6570
قتیبہ بن سعید نے ہم سے بیان کیا کہ اسماعیل بن جعفر نے ہمیں بتایا۔ اُنہوں نے عمرو (بن ابی عمرو) سے، عمرو نے سعید بن ابی سعید مقبری سے، سعید نے حضرت ابوہریرہؓ سے روایت کی۔ اُنہوں نے کہا: میں نے پوچھا: یا رسول اللہ! لوگوں میں سے کون زیادہ خوش قسمت ہوگا جو آپؐ کی سفارش (سے قیامت کے دن نجات) پائے گا؟ آپؐ نے فرمایا: ابوہریرہؓ! میں خوب سمجھتا تھا کہ اس بات کے متعلق تم سے پہلے کوئی مجھ سے نہیں پوچھے گا۔ کیونکہ میں نے دیکھا ہے کہ تم ایسی باتوں کا بہت شوق رکھتے ہو۔ قیامت کے دن میری سفارش کے ذریعہ لوگوں میں سے وہ شخص زیادہ خوش قسمت ہو گا جس نے خالصًا اپنے دل سے لَا إِلَهَ إِلَّا اللهُ کا اقرار کیا۔
Urdu translation: Hazrat Syed Zain-ul-Abidin Waliullah Shah
صحیح بخاری 6571
عثمان بن ابی شیبہ نے ہمیں بتایا کہ جریر نے ہم سے بیان کیا۔ اُنہوں نے منصور سے، منصور نے ابراہیم (نخعی) سے، ابراہیم نے عبیدہ (سلمانی) سے، عبیدہ نے حضرت عبداللہ (بن مسعود) رضی اللہ عنہ سے روایت کی کہ نبی ﷺ نے فرمایا: میں خوب جانتا ہوں جو دوزخیوں میں سے سب سے آخر آگ سے نکلے گا اور جنتیوں میں سب سے آخر جو داخل ہوگا ایک شخص آگ سے گھٹنوں کے بل گھسٹتے ہوئے نکلے گا اور اللہ تعالیٰ فرمائے گا: جاؤ جنّت میں داخل ہوجاؤ اور وہ وہاں آئے گا اسے دکھائی دے گا کہ وہ بھری ہوئی ہو گی۔ یہ دیکھ کر وہ لوٹ جائے گا اور کہے گا: میرے ربّ! میں نے اس کو بھرا ہوا پایا ہے۔ اور وہ فرمائے گا: جاؤ جنّت میں داخل ہو جاؤ۔ پھر وہ آئے گا اور اسے دکھائی دے گا کہ وہ بھری ہوئی ہے۔ یہ دیکھ کر وہ لوٹ جائے گا اور کہے گا: میرے ربّ! میں نے اس کو بھرا ہوا پایا ہے۔ وہ کہے گا کہ جاؤ جنت میں داخل ہو۔ تمہارے لئے اتنا ہے جتنی دنیا اور اس سے دس گنا یا کہا کہ تمہارے لئے اتنا ہے جتنی دس دنیا اور وہ کہے گا: کیا تو مجھ سے ٹھٹھا کرتا ہے یا کہے گا تو مجھ سے ہنسی کرتا ہے حالانکہ تو بادشاہ ہے؟ میں نے رسول اللہ ﷺ کو دیکھا کہ آپؐ اتنا ہنسے کہ آپؐ کے دانت ظاہر ہوگئے اور لوگ کہا کرتے تھے کہ یہ جنتیوں کا ادنیٰ سے ادنیٰ درجہ ہے۔
Urdu translation: Hazrat Syed Zain-ul-Abidin Waliullah Shah