کتاب 81: كتاب الرقاق
صحیح بخاری, حصہ 9
صحیح بخاری 6572
مسدد نے ہم سے بیان کیا کہ ابوعوانہ نے ہمیں بتایا۔ اُنہوں نے عبدالملک بن عمیر سے، اُنہوں نے عبداللہ بن حارث بن نوفل سے، عبداللہ نے حضرت عباس رضی اللہ عنہ سے روایت کی کہ اُنہوں نے نبی ﷺ سے پوچھا: کیا آپؐ نے ابوطالب کو کچھ فائدہ پہنچایا۔
Urdu translation: Hazrat Syed Zain-ul-Abidin Waliullah Shah
صحیح بخاری 6573
ابوالیمان نے ہم سے بیان کیا کہ شعیب نے ہمیں بتایا اُنہوں نے زہری سے روایت کی کہ سعید اور عطاء بن یزید نے مجھے خبر دی، کہ حضرت ابوہریرہؓ نے ان دونوں کو نبی ﷺ سے روایت کرتے ہوئے بتایا۔ نیز محمود (بن غیلان) نے مجھ سے بیان کیا کہ عبدالرزاق (بن ہمام) نے ہمیں بتایا۔ معمر نے ہمیں خبر دی، معمر نے زہری سے، زہری نے عطاء بن یزید لیثی سے، عطاء نے حضرت ابوہریرہؓ سے روایت کی۔ وہ کہتے تھے: لوگوں نے کہا: یا رسول اللہ ! کیا قیامت کے دن ہم اپنے ربّ کو دیکھیں گے؟ آپؐ نے فرمایا: کیا تمہیں سورج کے دیکھنے میں تکلیف ہوتی ہے کہ جس کے سامنے کوئی بادل نہ ہو؟ اُنہوں نے کہا: یا رسول اللہ ! نہیں۔ آپؐ نے فرمایا: کیا چودھویں رات کو چاند کے دیکھنے میں تمہیں کچھ تکلیف ہوتی ہے جس کے سامنے کچھ بادل نہ ہو؟ انہوں نے کہا: نہیں یا رسول اللہ۔ آپ نے فرمایا: تم قیامت کے دن اس کو اسی طرح دیکھو گے۔ اللہ (آگ میں) لوگوں کو اکٹھا کرتا جائے گا اور فرمائے گا جو جس چیز کو پوجتا تھا اب اس کے پیچھے ہو لے۔ یہ سن کر جو سورج کی پوجا کرتا تھا وہ سورج کے پیچھے ہو لے گا اور جو چاند کو پوجتا تھا وہ چاند کے پیچھے ہو لے گا اور جو طاغوت کی پوجا کرتا تھا وہ طاغوت کے پیچھے ہو جائے گا اور یہ اُمت باقی رہ جائے گی جن میں منافق بھی ہوں گے۔ تو اللہ ان کے پاس جس صورت میں وہ اس کو پہچانتے تھے اس کے سوا کسی اور صورت میں آئے گا اور فرمائے گا: میں تمہارا رب ہوں۔ وہ کہیں گے: ہم تجھ سے اللہ کی پناہ مانگتے ہیں۔ ہم یہیں رہیں گے جب تک کہ ہمارا ربّ نہ آجائے۔ جب ہمارا ربّ آئے گا تو ہم اس کو پہچان لیں گے۔ پھر اللہ اُن کے پاس اس صورت میں آئے گا جس کو وہ پہچانتے ہوں گے اور وہ کہے گا: میں تمہارا ربّ ہوں وہ کہیں گے تُو ہی ہمارا ربّ ہے اور وہ اس کے ساتھ ہو لیں گے اور جہنم کا پل رکھ دیا جائے گا۔ رسول اللہ ﷺ نے فرمایا: تو میں پہلا ہوں گا جو پار کرے گا۔ اس دن رسولوں کی بھی یہی پکار ہوگی۔ یا اللہ بچانا، یا اللہ بچانا اور اس پل پر ایسے آنکڑے ہوں گے جیسے اونٹ کٹارہ کے کانٹے ہوتے ہیں۔ کیا تم نے اونٹ کٹارہ کے کانٹے نہیں دیکھے؟ اُنہوں نے کہا: یا رسول اللہ ! کیوں نہیں۔ ضرور دیکھے ہیں۔ آپؐ نے فرمایا: تو وہ اونٹ کٹارہ کے کانٹوں کی طرح ہوں گے مگر اتنی بات ہے کہ وہ اس قدر بڑے ہوں گے کہ اللہ ہی جانتا ہے اور وہ آنکڑے لوگوں کو ان کے اعمال کے لحاظ سے اُچکتے جائیں گے۔ اُن میں سے ایسا بھی ہوگا جو اپنے عمل کی وجہ سے ہلاک ہو رہا ہوگا اور اُن میں سے وہ بھی ہو گا جو چھل چھلا کر گرتے گرتے بچ جائے گا۔ جب اللہ اپنے بندوں کے درمیان فیصلہ کرنے سے فارغ ہو جائے گا اور جس کو آگ سے نکالنے کا ارادہ کرے گا یعنی ان لوگوں میں سے جو یہ گواہی دیتے تھے کہ اللہ کے سوا کوئی معبود نہیں تو وہ ملائکہ کو حکم دے گا کہ ان کو نکالیں اور وہ ان کو سجدوں کے نشانوں سے پہچان لیں گے اور اللہ نے آگ پر یہ حرام کر دیا ہے کہ وہ ابن آدم میں سجدے کے نشان کو جلائے۔ فرشتے اُن کو نکالیں گے، وہ جل کر کوئلہ ہو چکے ہوں گے اس لئے ان پر وہ پانی ڈالا جائے گا جسے آب حیات کہتے ہیں اور وہ اس طرح نشوونما پائیں گے جیسے دانہ سیلاب کے کوڑا کرکٹ میں نشوونما پاتا ہے اور ایک شخص باقی رہ جائے گا جو آگ کی طرف اپنا منہ کئے ہوئے ہوگا وہ کہے گا: اے میرے ربّ! اس کی بدبو نے مجھے پریشان کر دیا ہے اور اس کی لپٹ نے مجھے جلا دیا ہے میرے منہ کو آگ سے پھیر دے اور وہ اللہ سے یہی دعا کرتا رہے گا اور وہ فرمائے گا: شاید اگر تمہاری مان لوں تو تم مجھ سے اس کے سوا اور کچھ مانگو۔ وہ کہے گا: نہیں۔ تیری ہی عزت کی قسم میں اس کے سوا تجھ سے کچھ نہیں مانگوں گا اور وہ آگ سے اس کے منہ کو پھیر دے گا۔ پھر وہ اس کے بعد کہے گا: اے میرے ربّ! مجھے جنت کے دروازے کے قریب کر دے۔ ربّ کہے گا: کیا تم نے یہ نہیں کہا تھا کہ اس کے سوا تم مجھ سے کچھ نہیں مانگو گے؟ افسوس تجھ پر ابن آدم، کتنے دغا باز ہو تم اور وہ اللہ سے یہی مانگتا رہے گا۔ اور اللہ فرمائے گا: شاید اگر میں تمہاری یہ مان لوں تو تم اس کے سوا کچھ اور مجھ سے مانگو گے۔ وہ کہے گا: تجھے تیری ہی عزت کی قسم اس کے سوا کچھ اور میں تجھ سے نہیں مانگوں گا اور وہ اللہ سے بڑے بڑے عہد اور اقرار کرے گا کہ وہ اس سے اس کے سوا کچھ اور نہیں مانگے گا اور وہ اس کو جنت کے دروازے کے قریب کر دے گا۔ جو کچھ کہ اس میں ہوگا، جب وہ دیکھے گا تو جب تک اللہ چاہے گا کہ وہ خاموش رہے وہ خاموش رہے گا۔ پھر اس کے بعد وہ کہے گا: اے میرے ربّ! مجھے جنت میں داخل کر دے۔ پھر اللہ فرمائے گا: کیا تم نے یہ نہیں کہا تھا کہ تم مجھ سے اس کے سوا کچھ اور نہیں مانگو گے؟ افسوس تم پر ابن آدم کتنے ہی دغا باز ہو تم اور وہ کہے گا: اے میرے ربّ! اپنی مخلوقات میں سے مجھے سب سے بدنصیب نہ بنا اور وہ بار بار یہی دعا کرتا رہے گا یہاں تک کہ اللہ ہنس پڑے گا اور جب وہ اس کی حالت کو دیکھ کر ہنس پڑے گا تو جنت میں جانے کی اس کو اجازت دے دے گا اور جب وہ اس کے اندر جائے گا تو اسے کہا جائے گا یہ یہ آرزو کر اور وہ آرزو کرے گا۔ پھر اس سے کہا جائے گا یہ بھی آرزو کر اور وہ آرزو کرے گا۔ یہاں تک کہ اس کی تمام آرزوئیں ختم ہو جائیں گی تو اللہ اس سے کہے گا: یہ سب آرزوئیں تمہارے لئے پوری کی گئی ہیں اور اتنی ہی اور۔ حضرت ابوہریرہؓ نے کہا اور یہ وہ شخص ہے جو جنتیوں میں سے سب سے آخر میں داخل ہوگا۔
Urdu translation: Hazrat Syed Zain-ul-Abidin Waliullah Shah
صحیح بخاری 6574
عطاء )بن یزید( کہتے تھے (کہ جب حضرت ابوہریرہؓ نے یہ حدیث بیان کی تو) حضرت ابوسعید خدریؓ حضرت ابوہریرہؓ کے ساتھ بیٹھے ہوئے تھے۔ وہ اُن کے اس بیان میں اُن کے خلاف کوئی اور بات نہیں کہتے تھے یہاں تک کہ جب وہ اپنی اس بات پر پہنچے کہ یہ سب تمہارے لئے پوری کی گئیں اور اُن کے ساتھ اتنی ہی اور بھی۔ تو حضرت ابوسعیدؓ نے کہا: میں نے رسول اللہ ﷺ کو یوں فرماتے سنا۔ یہ سب تمہارے لئے پوری کی گئیں اور ویسی ہی دس گنا اور حضرت ابوہریرہؓ نے کہا: میں نے تو یہ یاد رکھا ہے اُن کے ساتھ اتنی ہی اور۔
Urdu translation: Hazrat Syed Zain-ul-Abidin Waliullah Shah
صحیح بخاری 6575
یحيٰ بن حماد نے مجھ سے بیان کیا کہ ابو عوانہ نے ہمیں بتایا۔ اُنہوں نے سلیمان (اعمش) سے، سلیمان نے شقیق سے، شقیق نے حضرت عبد اللہ (بن مسعودؓ) سے، اُنہوں نے نبی ﷺ سے روایت کی کہ میں حوض پر تمہارا پیش رَو ہوں گا۔
Urdu translation: Hazrat Syed Zain-ul-Abidin Waliullah Shah
صحیح بخاری 6576
نیز مجھ سے عمرو بن علی نے بیان کیا کہ ہمیں محمد بن جعفر نے بتایا کہ شعبہ نے ہم سے بیان کیا کہ مغیرہ سے مروی ہے۔ اُنہوں نے کہا: میں نے ابووائل سے سنا۔ اُنہوں نے حضرت عبداللہ (بن مسعود) رضی اللہ عنہ سے، حضرت عبداللہؓ نے نبی ﷺ سے روایت کی آپؐ نے فرمایا: میں حوض پر تمہارا پیش رَو ہوں گا اور تم میں سے کچھ لوگ وہاں لائے جائیں گے۔ پھر اُنہیں (میری مرضی کے بغیر) مجھ سے پرے ہٹا دیا جائے گا۔ میں کہوں گا: اے میرے ربّ! یہ میرے ساتھی ہیں۔ تو وہ فرمائے گا: تم نہیں جانتے اِنہوں نے تیرے بعد کیا کچھ نئی نئی بدعات کیں۔ اس حدیث کو (اعمش کی طرح) عاصم نے بھی ابووائل سے روایت کیا اور حصین (بن عبدالرحمٰن) نے بھی ابووائل سے نقل کیا۔ ابووائل نے حضرت حذیفہؓ سے، حضرت حذیفہؓ نے نبی ﷺ سے روایت کیا۔
Urdu translation: Hazrat Syed Zain-ul-Abidin Waliullah Shah
صحیح بخاری 6577
مسدد نے ہم سے بیان کیا کہ یحيٰ (بن سعید) نے ہمیں بتایا۔ اُنہوں نے عبیداللہ سے روایت کی کہ نافع نے مجھ سے بیان کیا۔ نافع نے حضرت ابن عمر رضی اللہ عنہما سے، حضرت ابن عمرؓ نے نبی ﷺ سے روایت کی آپؐ نے فرمایا: تمہارے آگے ایک حوض ہے اتنا ہی بڑا کہ جتنا جَرْبَاء اور اذْرُح کے درمیان ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6578
عمرو بن محمد نے مجھ سے بیان کیا کہ ہشیم نے ہمیں بتایا۔ ابوبشر اور عطاء بن سائب نے ہمیں خبر دی۔ اُن دونوں نے سعید بن جبیر سے، سعید نے حضرت ابن عباس رضی اللہ عنہما سے روایت کی۔ اُنہوں نے کہا: کوثر سے مراد وہ خیر کثیر ہے جو اللہ نے آپؐ کو عطاء کیا۔ ابوبشر کہتے تھے: میں نے سعید سے کہا کہ کچھ لوگ خیال کرتے ہیں کہ وہ ایک دریا ہے جو جنّت میں ہوگا۔ سعید نے کہا: وہ دریا جو جنت میں ہوگا وہ اُسی خیر کثیر میں سے ہے جو اللہ نے آپؐ کو عطا کیا۔
Urdu translation: Hazrat Syed Zain-ul-Abidin Waliullah Shah
صحیح بخاری 6579
سعید بن ابی مریم نے ہم سے بیان کیا کہ نافع بن عمر نے ہمیں بتایا۔ اُنہوں نے ابن ابی ملیکہ سے روایت کی۔ اُنہوں نے کہا: حضرت عبداللہ بن عمروؓ کہتے تھے: نبی ﷺ نے فرمایا: میرا حوض ایک مہینہ کی مسافت ہے اس کا پانی دودھ سے بھی زیادہ سفید ہے اور اس کی خوشبو مشک سے بھی زیادہ عمدہ ہے اور اس کے آبخورے آسمان کے ستاروں کی طرح ہیں۔ جس نے اُن سے پیا وہ کبھی پیاسا نہ ہوگا۔
Urdu translation: Hazrat Syed Zain-ul-Abidin Waliullah Shah
صحیح بخاری 6580
سعید بن عفیر نے ہم سے بیان کیا۔ اُنہوں نے کہا: ابن وہب نے مجھے بتایا۔ اُنہوں نے یونس سے روایت کی۔ ابن شہاب نے کہا: حضرت انس بن مالک رضی اللہ عنہ نے مجھے بتایا کہ رسول اللہ ﷺ نے فرمایا: میرا حوض اس قدر بڑا ہے کہ جتنا ایلہ اور صنعاء کے درمیان فاصلہ ہے جو یمن میں ہے اور اس میں اتنے آبخورے ہیں جتنے آسمان کے ستاروں کی گنتی۔
Urdu translation: Hazrat Syed Zain-ul-Abidin Waliullah Shah
صحیح بخاری 6581
ابوالولید نے ہم سے بیان کیا کہ ہمام نے ہمیں بتایا۔ اُنہوں نے قتادہ سے، قتادہ نے حضرت انسؓ سے، حضرت انسؓ نے نبی ﷺ سے روایت کی۔ نیز ہدبہ بن خالد نے ہم سے بیان کیا کہ ہمام نے ہمیں بتایا۔ قتادہ نے ہم سے بیان کیا، حضرت انس بن مالکؓ نے ہمیں بتایا۔ حضرت انسؓ نے نبی ﷺ سے روایت کی۔ آپؐ نے فرمایا: میں جنّت میں چلا جا رہا تھا اتنے میں میں اپنے آپ کو دریا کے کنارے پر دیکھتا ہوں اس کے دونوں کناروں پر خولدار موتیوں کے گنبد تھے۔ میں نے پوچھا: جبریلؑ! یہ کیا ہے؟ اُنہوں نے کہا: یہی وہ کوثر ہے جو تمہارے ربّ نے تمہیں دیا۔ کیا دیکھتا ہوں کہ اس کی مٹی یا کہا اس کی خوشبو تیز مشک کی ہے۔ ہدبہ نے شک کیا کہ مٹی کہا یا خوشبو۔
Urdu translation: Hazrat Syed Zain-ul-Abidin Waliullah Shah
صحیح بخاری 6582
مسلم بن ابراہیم نے ہم سے بیان کیا کہ وہیب نے ہمیں بتایا۔ عبدالعزیز نے ہم سے بیان کیا۔ عبدالعزیز نے حضرت انسؓ سے، حضرت انسؓ نے نبی ﷺ سے روایت کی۔ آپؐ نے فرمایا: میرے ساتھیوں میں سے کچھ لوگ میرے پاس حوض پر پانی پینے کے لئے آئیں گے اور جب میں اُن کو پہچان لوں گا تو اسی وقت انہیں باوجود میرے نہ چاہنے کے ہٹا دیا جائے گا۔ میں کہوں گا میرے ساتھی ہیں تو اللہ تعالیٰ فرمائے گا: تو نہیں جانتا اِنہوں نے تیرے بعد کیا کچھ نئی نئی بدعتیں کیں۔
Urdu translation: Hazrat Syed Zain-ul-Abidin Waliullah Shah
صحیح بخاری 6583
سعید بن ابی مریم نے ہم سے بیان کیا کہ محمد بن مطرف نے ہمیں بتایا۔ ابو حازم نے مجھ سے بیان کیا۔ اُنہوں نے حضرت سہل بن سعدؓ سے روایت کی۔ اُنہوں نے کہا: نبی ﷺ نے فرمایا: میں حوض (کوثر) پر تمہارا پیش رَو ہوں گا جو میرے پاس آیا اس نے اس سے پیا اور جس نے اس سے پیا اس کے بعد وہ کبھی بھی پیاسا نہ ہوا۔ کچھ لوگ ایسے ہی میرے پاس پینے کے لئے آئیں گے جنہیں میں پہچان لوں گا اور وہ مجھے پہچانتے ہوں گے۔ پھر میرے اور ان کے درمیان روک ڈال دی جائے گی۔
Urdu translation: Hazrat Syed Zain-ul-Abidin Waliullah Shah
صحیح بخاری 6584
ابو حازم نے کہا: نعمان بن ابی عیاش نے مجھ سے سنا اور پوچھا، کیا اس طرح تم نے حضرت سہلؓ سے سنا؟ میں نے کہا: ہاں۔ نعمان نے کہا اور میں حضرت ابو سعید خدریؓ کے متعلق شہادت دیتا ہوں کہ میں نے ان سے (یہ حدیث) سنی وہ اس میں اتنا بڑھاتے تھے کہ میں کہوں گا یہ لوگ مجھ سے تعلق رکھتے ہیں۔ تو کہا جائے گا: تو نہیں جانتا اِنہوں نے تیرے بعد کیا کچھ نئی نئی بدعات کیں۔ میں کہوں گا: وہ شخص مجھ سے دور ہو جائے دور ہو جائے، جس نے میرے بعد ہی (دین کو) بدل دیا۔ حضرت ابنِ عباسؓ نے کہا سُحْقًا کے معنے ہیں دوری۔ سَحِيقٌ جو کہا جاتا ہے اس سے مراد ہے بَعِيدٌ یعنی دوری۔ سَحَقَهُ اور أَسْحَقَهُ کا مطلب ہے اُسے دور کیا۔
Urdu translation: Hazrat Syed Zain-ul-Abidin Waliullah Shah
صحیح بخاری 6585
احمد بن شبیب بن سعید حبطی نے کہا، میرے باپ نے ہمیں بتایا۔ اُنہوں نے یونس سے، یونس نے ابنِ شہاب سے، ابنِ شہاب نے سعید بن مسیب سے، سعید نے حضرت ابو ہریرہؓ سے روایت کی کہ وہ بیان کرتے تھے نبی ﷺ نے فرمایا قیامت کے دن میرے صحابہ میں سے ایک جماعت میرے پاس آئے گی۔ پھر وہ حوض سے دور کر دیئے جائیں گے۔ میں عرض کروں گا اے میرے رب یہ تو میرے صحابہ ہیں اللہ تعالیٰ فرمائے گا کہ تمہیں معلوم نہیں کہ انہوں نے تمہارے بعد کیا کیا نئی چیزیں گھڑ لی تھیں۔ یہ لوگ (دین سے) اُلٹے قدموں واپس لوٹ گئے تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 6586
ہم سے احمد بن صالح نے بیان کیا (انہوں نے کہا) ہم سے ابن وہب نے بیان کیا انہوں نے کہا کہ مجھے یونس نے خبر دی انہیں ابن شہاب نے انہیں ابن مسیب نے وہ نبی ﷺ کے صحابہ سے روایت کرتے تھے کہ آنحضرت ﷺ نے فرمایا حوض پر میرے صحابہ کی ایک جماعت میرے پاس آئے گی۔ پھر انہیں اس سے دور کر دیا جائے گا میں عرض کروں گا میرے ربّ! یہ تو میرے صحابہ ہیں اللہ تعالیٰ فرمائے گا کہ تمہیں معلوم نہیں کہ انہوں نے تمہارے بعد کیا کیا نئی چیزیں ایجاد کر لی تھیں۔ یہ الٹے پاؤں (اسلام سے) واپس لوٹ گئے تھے۔ اور شعیب نے زُہری سے روایت کرتے ہوئے کہا کہ حضرت ابو ہریرہؓ نبی ﷺ سے روایت کرتے ہوئے بیان کرتے تھے کہ اُنہیں الگ کر دیا جائے گا۔ اور عُقَیل نے کہا فَيُحَلَّئُونَ یعنی اُنہیں روک دیا جائے گا۔ اور زبیدی نے کہا: زُہری سے مروی ہے۔ زُہری نے محمد بن علی سے، محمد نے عبید اللہ بن ابی رافع سے، اُنہوں نے حضرت ابو ہریرہؓ سے، اُنہوں نے نبی ﷺ سے روایت کی۔
وَقَالَ شُعَيْبٌ عَنِ الزُّهْرِيِّ كَانَ أَبُو هُرَيْرَةَ يُحَدِّثُ عَنِ النَّبِيِّ صلى الله عليه وسلم فَيُجْلَوْنَ. وَقَالَ عُقَيْلٌ فَيُحَلَّئُونَ. وَقَالَ الزُّبَيْدِيُّ عَنِ الزُّهْرِيِّ عَنْ مُحَمَّدِ بْنِ عَلِيٍّ عَنْ عُبَيْدِ اللَّهِ بْنِ أَبِي رَافِعٍ عَنْ أَبِي هُرَيْرَةَ عَنِ النَّبِيِّ صلى الله عليه وسلم.
Urdu translation: Hazrat Syed Zain-ul-Abidin Waliullah Shah
صحیح بخاری 6587
ابراہیم بن منذر حِزامی نے مجھ سے بیان کیا کہ محمد بن فلیح نے ہمیں بتایا۔ میرے باپ نے ہمیں بتایا۔ اُنہوں نے کہا: ہلال (بن ابی میمونہ) نے مجھے بتایا۔ ہلال نے عطاء بن یسار سے، عطاء نے حضرت ابوہریرہؓ سے، حضرت ابوہریرہؓ نے نبی ﷺ سے روایت کی۔ آپؐ نے فرمایا: میں کھڑا ہی تھا کہ اتنے میں ایک گروہ میرے سامنے آیا۔ جب میں نے اُن کو پہچان لیا تو ایک شخص میرے اور اُن کے درمیان سے نکلا۔ کہنے لگا: ادھر آؤ۔ میں نے کہا: کہاں؟ اُس نے کہا: آگ کی طرف۔ میں نے کہا: بخدا اُنہوں نے کیا کیا ؟ اُس نے کہا: وہ تو تمہارے بعد پیٹھ پھیرتے اُلٹے پاؤں مرتد ہو گئے۔ پھر ایک گروہ میرے سامنے آیا۔ جب میں نے اُن کو پہچان لیا تو ایک شخص میرے اور اُن کے درمیان سے نکلا۔ کہنے لگا: ادھر آؤ۔ میں نے کہا: کہاں؟ اُس نے کہا: آگ کی طرف۔ میں نے کہا: بخدا اُنہوں نے کیا کیا ؟ اُس نے کہا: وہ تو تمہارے بعد پیٹھ پھیرتے اُلٹے پاؤں مرتد ہو گئے۔ میں نہیں سمجھتا کہ ان میں سے کوئی بچے گا مگر ایسے ہی جیسے کوئی شتر بے مہار بچ نکلے۔
Urdu translation: Hazrat Syed Zain-ul-Abidin Waliullah Shah
صحیح بخاری 6588
ابراہیم بن منذر نے مجھ سے بیان کیا کہ انس بن عیاض نے ہمیں بتایا۔ اُنہوں نے عبیداللہ (عمری) سے، عبیداللہ نے خبیب (بن عبدالرحمٰن) سے، خبیب نے حفص بن عاصم سے، حفص نے حضرت ابوہریرہ رضی اللہ عنہ سے روایت کی کہ رسول اللہ ﷺ نے فرمایا: میرے گھر اور میرے منبر کے درمیان جنت کے باغات میں سے ایک باغ ہے اور میرا منبر میرے حوض پر ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 6589
عبدان نے ہم سے بیان کیا کہ میرے باپ نے مجھے بتایا۔ اُنہوں نے شعبہ سے، شعبہ نے عبدالملک (بن عمیر) سے روایت کی۔ اُنہوں نے کہا: میں نے حضرت جندبؓ سے سنا۔ وہ کہتے تھے: میں نے نبی ﷺ سے سنا آپؐ فرماتے تھے: میں حوض پر تمہارا پیش رَو ہوں گا۔
Urdu translation: Hazrat Syed Zain-ul-Abidin Waliullah Shah
صحیح بخاری 6590
عمرو بن خالد نے ہم سے بیان کیا کہ لیث نے ہمیں بتایا۔ اُنہوں نے یزید (بن ابی حبیب) سے، یزید نے ابوالخیر سے، ابوالخیر نے حضرت عُقبہ رضی اللہ عنہ سے روایت کی کہ نبی صلی اللہ علیہ وسلم ایک دن باہر آئے اور اُحد والوں کا جنازہ اُسی طرح پڑھا جس طرح کہ آپؐ میت کا جنازہ پڑھا کرتے تھے۔ پھر فارغ ہو کر منبر کی طرف لوٹے اور فرمایا: میں تمہارا پیش رو ہوں اور میں تمہارا گواہ ہوں اور بخدا میں اَب بھی اپنے حوض کو دیکھ رہا ہوں اور مجھے زمین کے خزانوں کی چابیاں یا فرمایا: زمین کی چابیاں دی گئی ہیں اور مجھے بخدا تمہارے متعلق یہ ڈر نہیں کہ تم میرے بعد مشرک ہو جاؤ گے مگر تمہارے متعلق یہ ڈر ہے کہ کہیں ایک دوسرے سے بڑھ کر دنیا کی لالچ میں نہ پڑ جاؤ۔
Urdu translation: Hazrat Syed Zain-ul-Abidin Waliullah Shah
صحیح بخاری 6591
علی بن عبداللہ نے ہم سے بیان کیا کہ حرمی بن عُمارہ نے ہمیں بتایا۔ شعبہ نے ہم سے بیان کیا۔ شعبہ نے معبد بن خالد سے روایت کی۔ انہوں نے حضرت حارثہ بن وہبؓ سے سنا۔ وہ کہتے تھے: میں نے نبی ﷺ سے سنا آپؐ نے حوض کا ذکر کیا فرمایا۔ اتنا ہی ہے جتنا مدینہ اور صنعاء کے درمیان فاصلہ ہے۔
Urdu translation: Hazrat Syed Zain-ul-Abidin Waliullah Shah