تذکرہ یعنی وحی مقدّس و روٴیا و کشوف حضرت مسیح موعود علیہ الصلوٰة و السلام

حصہ 42

Urdu text of the edition of the Ahmadiyya Muslim Jamaat.

سیاہ کپڑے ظاہر کرتے ہیں کہ اَب کوئی ڈرانے والا نشان ظاہر ہونے والا ہے اور یہ جو کہا کہ یہ میرا بیٹا ہے اِس سے یہ مراد ہے کہ یہ ہماری دعاؤں کا نتیجہ ہے کیونکہ نتیجہ بچے کو بھی کہتے ہیں۔‘‘ (بدر جلد ۱ نمبر ۱ مورخہ ۶ ؍اپریل ۱۹۰۵ء صفحہ ۳۔الحکم جلد ۹ نمبر ۱۲ مورخہ ۱۰؍ اپریل ۱۹۰۵ء صفحہ۱۲) ۵؍ اپریل۱۹۰۵ء ’’ کَفَفْتُ عَنْ بَنِیْٓ اِسْـرَآءِیْلَ۔؎۱ فرمایا۔بنی اسرائیل سے مراد وہ قوم ہے جس پر اس قسم کے واقعاتِ تکلیف وارد ہوئے ہوں جیسے کہ بنی اسرائیل پر فرعون کے زمانہ میں ہوئے تھے۔اس سے معلوم ہوتا ہے کہ ہماری جماعت بنی اسرائیل سے مشابہ ہے۔وہ لوگ جو اُن پر بے جا ظالمانہ حملہ کرتے ہیں اُن کو خدا تعالیٰ نے فرعون سے مشابہت دی ہے اور پیشگوئی کا حاصل مطلب یہ ہے کہ ایسے بے جا حملہ کرنے والے روک دیئے جائیں گے اور ایسے نشان ظاہر ہوں گے کہ اُن کی باتوں کا لوگوں کے دلوں پر کچھ اثر نہیں ہوگا۔‘‘ (بدر جلد ۱ نمبر ۱ مورخہ ۶؍اپریل ۱۹۰۵ء صفحہ۳۔الحکم جلد ۹ نمبر ۱۲ مورخہ ۱۰؍ اپریل ۱۹۰۵ء صفحہ۲ ۱) ۶؍ اپریل۱۹۰۵ء ’’کوئی رُوح کہتی ہے ہم نے وہ جہان؎۲ چھوڑ دیا ہے اس سے معلوم ہوتا ہے کہ کوئی آدمی ہم سے تعلقِ دوستی یا دشمنی رکھنے والا اِس جہان سے گزر جائے گا۔‘‘ (بدر جلد ۱ نمبر ۱ مورخہ ۶؍اپریل ۱۹۰۵ء صفحہ ۳۔الحکم جلد ۹ نمبر ۱۲ مورخہ ۱۰؍ اپریل ۱۹۰۵ء صفحہ۲ ۱) ۷؍ اپریل۱۹۰۵ء ’’۴؍ اپریل ۱۹۰۵ء کو جب زلزلہ آیا تھا اس دن لاہور سے کئی دوستوں کے خط آئے… کہ ہم کو خداوند تعالیٰ نے اس آفت سے بچالیا مگر میر محمد اسمٰعیل صاحب کا ایک خط بھی نہ آیا… پھر دوسرے روز بھی کوئی خط نہ آیا… پھر تیسرے روز بھی کوئی خط نہ آیا اور کسی دوست نے بھی نہ لکھا کہ میر محمد اسمٰعیل صاحب خیروعافیت سے ہیں۔تب اُن دونوں؎۳ کی حالت مارے غم کے قریب موت کے ہوگئی اور حضرت کو دعا کے واسطے ۱ (ترجمہ از مرتّب) مَیں نے بنی اسرائیل سے (دشمن کا حملہ ) روک دیا۔۲ حضرت مسیح موعود علیہ السلام نے فرمایا۔’’ یہ میرے ساتھ عادت اللہ ہے کہ کشف میں اس دنیا کو ’’وہ جہان‘‘ کے نام سے پکارا جاتا ہے۔‘‘ (ریویو آف ریلیجنز جلد ۴ نمبر ۴ بابت ماہِ اپریل ۱۹۰۵ء ٹائٹل صفحہ آخر) ۳ یعنی حضرت اُمّ المؤمنینؓ ووالدہ صا حبہ حضرت اُمّ المؤمنینؓ۔(شمس)

کہا حضرت نے ان کا سخت قلق اور رنج دیکھ کر بہت توجہ سے دعا کی تو جواب میں یہ الہام ہوا۔اسسٹنٹ سرجن‘‘ ؎۱ (بدر جلد ۱ نمبر۶ ۱ مورخہ ۲۰؍ جولائی ۱۹۰۵ء صفحہ ۷) ۸ ؍اپریل۱۹۰۵ء ’’آج رات تین بجے کے قریب خدائے تعالیٰ کی پاک وحی مجھ پر نازل ہوئی جو ذیل میں لکھی جاتی ہے۔تازہ نشان۔تازہ نشان کا دھکہ۔زَلْزَلَۃُ السَّاعَۃِ۔قُوْا اَنْفُسَکُمْ۔اِنَّ اللّٰہَ مَعَ الْاَ بْـرَارِ۔دَنٰی مِنْکَ الْفَضْلُ۔جَآءَ الْـحَقُّ وَزَھَقَ الْبَاطِلُ۔(ترجمہ مع شرح) یعنی خدا ایک تازہ نشان دکھائے گا۔مخلوق کو اس نشان کا ایک دھکہ لگے گا۔وہ قیامت کا زلزلہ ہوگا۔مجھے علم نہیں دیا گیا کہ زلزلہ سے مراد زلزلہ ہے یا کوئی اَور شدید آفت ہے جو دنیا پر آئے گی جس کو قیامت کہہ سکیں گے اور مجھے علم نہیں دیا گیا کہ ایسا حادثہ کب آئے گا اور مجھے علم نہیں کہ وہ چند دن یا چند ہفتوں تک ظاہر ہوگا یا خدائے تعالیٰ اس کو چند مہینوں یا چند سال کے بعد ظاہر فرمائے گا۔بہرحال وہ حادثہ زلزلہ ہو یا کچھ اَور ہو۔قریب ہو یا بعید ہو۔پہلے سے بہت خطرناک ہے۔سخت خطرناک ہے۔اگر ہمدردی ٔ مخلوق مجھے مجبور نہ کرتی تو مَیں بیان نہ کرتا… بقیہ ترجمہ عربی وحی کا یہ ہے کہ خدائے تعالیٰ فرماتا ہے کہ نیکی کرکے اپنے تئیں بچالو قبل اس کے جو وہ ہولناک دن آوے جو ایک دَم میں تباہ کردے گا۔اور فرماتا ہے کہ خدا اُن کے ساتھ ہے جو نیکی کرتے ہیں اور بدی سے بچتے ہیں اور پھر اُس نے مجھے مخاطب کرکے فرمایا کہ میرا فضل تیرے نزدیک آگیا۔یعنی وہ وقت آگیا کہ تُو کامل طور پر شناخت کیا جاوے۔حق آگیا اور باطل بھاگ گیا … دیکھو! آج مَیں نے بتلادیا۔زمین بھی سنتی ہے اور آسمان بھی کہ ہرایک جو راستی کو چھوڑ کر شرارتوں پر آمادہ ہوگا اور ہرایک جو زمین کو اپنی بدیوں سے ناپاک کرے گا وہ پکڑا جائے گا۔خدا فرماتا ہے کہ قریب ہے جو میرا قہر زمین پر اُترے کیونکہ زمین پاپ اور گناہ سے بھر گئی۔پس اُٹھو اور ہوشیار ہوجاؤ کہ وہ آخری وقت ۱ (نوٹ از حضرت مرزا بشیر احمدؓ) چنانچہ ڈاکٹر میر محمد اسمٰعیل صاحب اسی سال میڈیکل کالج لاہور کے آخری امتحان میں تمام پنجاب میں اوّل نمبر پر پاس ہوکر اسسٹنٹ سرجن مقرر ہوئے اور ۱۹۲۸ء میں سول سرجن لگ کر ۱۹۳۶ء میں ریٹائر ہوئے۔

قریب ہے جس کی پہلے نبیوں نے بھی خبر دی تھی۔مجھے اُس ذات کی قسم ہے جس نے مجھے بھیجا کہ یہ سب باتیں اُس کی طرف سے ہیں میری طرف سے نہیں ہیں۔کاش یہ باتیں نیک ظنی سے دیکھی جاویں۔کاش مَیں اُن کی نظر میں کاذب نہ ٹھیرتا تا دنیا ہلاکت سے بچ جاتی… ورنہ وہ دِن آتا ہے کہ انسانوں کو دیوانہ کردے گا۔نادان بدقسمت کہے گا کہ یہ باتیں جھوٹ ہیں۔ہائے وہ کیوں اس قدر سوتا ہے۔آفتاب تو نکلنے کو ہے۔جب خدائے تعالیٰ اس وحی کے الفاظ میرے پر نازل کرچکا تو ایک رُوح کی آواز میرے کان میں پڑی جو کوئی ناپاک رُوح تھی اور مَیں نے اس کو یہ کہتے سنا کہ مَیں سوتے سوتے جہنّم میں پڑ گیا انسان کا کیا حَرج ہے اگر وہ فسق و فجور کو چھوڑ دے۔کون سا اس میں اس کا نقصان ہے اگر وہ مخلوق پرستی نہ کرے۔آگ لگ چکی ہے۔اُٹھو اور اس آگ کو اپنے آنسوؤں سے بجھاؤ۔‘‘ (اشتہار الانذار ۸؍اپریل ۱۹۰۵ء۔مجموعہ اشتہارات جلد ۳ صفحہ ۳۵۲ تا ۳۵۴ مطبوعہ ۲۰۱۸ء) ۹؍ اپریل۱۹۰۵ء ’’۹؍اپریل ۱۹۰۵ء کو پھر خدا تعالیٰ نے مجھے ایک سخت زلزلہ کی خبر دی ہے جو نمونہ قیامت اور ہوش رُبا ہوگا۔چونکہ ۲دو مرتبہ مکرر طور پر اس علیم مطلق نے اس آئندہ واقعہ پر مجھے مطّلع فرمایا ہے اِس لئے مَیں یقین رکھتا ہوں کہ یہ عظیم الشان حادثہ جو محشر کے حادثہ کو یاد دلادے گا۔دُور؎۱ نہیں ہے۔مجھے خدائے عزوجل نے یہ بھی فرمایا ہے کہ یہ دونوں زلزلے تیری سچائی ظاہر کرنے کے لئے ۲دو نشان ہیں اُنہیں نشانوں کی طرح جو موسٰی نے فرعون کے سامنے دکھلائے تھے اور اُس نشان کی طرح جو نوح ؑنے اپنی قوم کو دکھلایا تھا۔اور یاد رہے کہ ان نشانوں کے بعد ابھی بس نہیں ہے بلکہ کئی نشان ایک دوسرے کے بعد ظاہر ہوتے رہیں گے یہاں تک کہ انسان کی آنکھ کھلے گی اور حیرت زدہ ہوکر کہے گا کہ یہ کیا ہوا چاہتا ہے۔ہر ایک دن سخت اور پہلے سے بد تر آئے گا۔خدا فرماتا ہے کہ مَیں حیرت ناک کام دکھلاؤں گا اور بس نہیں کروں گا جب تک کہ لوگ اپنے دلوں کی اصلاح نہ کرلیں اور جس طرح یوسف ؑ نبی کے وقت میں ہوا کہ سخت کال پڑا یہاں تک کہ کھانے کے لئے درختوں کے پتے بھی نہ رہے۔اسی طرح ایک آفت کا سامنا موجود ہوگا اور جیسا کہ یوسف ؑ نے اناج کے ذخیرے سے لوگوں کی جان بچائی اسی طرح جان بچانے کے لئے خدا نے اِس جگہ بھی مجھے ایک روحانی ۱ حضرت مسیح موعود علیہ السلام تحریر فرماتے ہیں۔’’اگر خدا تعالیٰ نے اُس آفت ِ شدیدہ کے ظہور میں بہت ہی تاخیر ڈال دی تو زیادہ سے زیادہ سولہ سال ہیں اِس سے زیادہ نہیں۔‘‘ (ضمیمہ براہین احمدیہ حصّہ پنجم۔روحانی خزائن جلد ۲۱ صفحہ ۲۵۸)

غذا کا مہتمم بنایا ہے۔جو شخص اس غذا کو سچّے دل سے پورے وزن کے ساتھ کھائے گا مَیں یقین رکھتا ہوں کہ ضرور اس پر رحم کیا جائے گا… ہاں خدا نے مجھے یہ خبر دے رکھی ہے کہ طاعون اِس جماعت کی تعداد کو بڑھائے گی اور دوسرے مسلمانوں کی تعداد کو گھٹائے گی… مَیں سچ سچ کہتا ہوں کہ اس آنے والے نشان کے بعد جو مجھ کو قبول کرے گا اس کا ایمان قابلِ عزت نہیں۔جس کے کان ہیں سنے۔خدا تعالیٰ فرماتا ہے کہ میرا غضب زمین پر بھڑکا ہے کیونکہ زمین والوں نے میری طرف سے منہ پھیر لیا ہے۔پس جب ایک انسانی سلطنت عدول حکمی سے ناراض ہوجاتی ہے اور ہولناک سزادیتی ہے پھر خدا کا غضب کیسا ہوگا۔پس توبہ کرو کہ دن نزدیک ہیں۔اور اس بارے میں جو عربی میں مجھے وحیِ الٰہی ہوئی اِس جگہ مَیں اُس کو معہ ترجمہ لکھ کر اس اشتہار کو ختم کرتا ہوں اور وہ یہ ہے۔بخور آنچہ ترابخور انم۔لَکَ دَرَجَۃٌ فِی السَّمَآءِ وَ فِی الَّذِ یْنَ ھُمْ یُبْصِـرُوْنَ۔نَـزَلْتُ لَکَ۔لَکَ نُرِیْ اٰیَـاتٍ وَّ نَـھْدِ۔مُ مَا یَعْمُرُوْنَ۔قُلْ عِنْدِیْ شَھَادَۃٌ مِّنَ اللّٰہِ فَھَلْ اَنْتُمْ مُّـؤْمِنُوْنَ۔کَـفَفْتُ عَنْ بَنِیْٓ اِسْـرَآءِیْلَ۔اِنَّ فِرْعَـوْنَ وَھَامَانَ وَجُنُوْدَھُمَا کَانُوْا خَاطِئِیْنَ۔اِنِّیْ مَعَ الْاَفْوَاجِ اٰتِیْکَ بَغْتَۃً۔یعنی جو کچھ مَیں تجھے کھلاتا ہوں وہ کھا۔تیرا آسمان پر ایک درجہ ہے اور نیز ان میں درجہ ہے جو آنکھیں رکھتے ہیں اور دیکھتے ہیں اور مَیں تیرے لئے زمین پر اُتروں گا تا اپنے نشان دکھلاؤں۔ہم تیرے لئے زلزلہ کا نشان دکھلائیں گے اور وہ عمارتیں جن کو غافل انسان بناتے ہیں یا آئندہ بنائیں؎۱ گے گرادیں گے۔اِس سے معلوم ہوتا ہے کہ ایک زلزلہ نہیں بلکہ کئی زلزلے ہوں گے جو عمارتوں کو وقتاً وفوقتاً گرائیں؎۲ گے۔اور پھر فرمایا کہ مَیں تیری جماعت کے لوگوں کو جو مخلص ہیں اور بیٹوں کا حکم رکھتے ہیں، بچاؤں گا۔اِس وحی ۱ (نوٹ از حضرت مرزا بشیر احمدؓ) یہ پیشگوئی ۲۰؍ مئی ۱۹۰۵ء کو پوری ہوگئی۔یعنی دھرم سالہ میں مورخہ ۲۰؍ مئی ۱۹۰۵ء کو پھر سخت زلزلہ آیا اور کئی نئے مکانات جو رہائش کے لئے بنائے گئے تھے گِر گئے۔(دیکھیے سول اینڈ ملٹری گزٹ مورخہ ۲۴؍ مئی ۱۹۰۵ء ) ۲ حضرت مسیح موعود علیہ السلام فرماتے ہیں۔’’یہ فقرہ روحانی اور ظاہری دونوں معنی رکھتا ہے۔اس کے یہ بھی معنے ہیں کہ بد اَندیشیوں اور منصوبوں کی جو جو عمارتیں وہ بنائیں گے اُنہیں اللہ تعالیٰ مُنہدم کرتا رہے گا۔‘‘ (الحکم مورخہ ۲۴؍اپریل ۱۹۰۵ء صفحہ ۶ )

میں خدا تعالیٰ نے مجھے اسرائیل قرار دیا اور مخلص لوگوں کو میرے بیٹے۔اِس طرح پر وہ بنی اسرائیل ٹھہرے۔اور پھر فرمایا کہ مَیں آخر کو ظاہر کروں گا کہ فرعون یعنی وہ لوگ جو فرعون کی خصلت پر ہیں اور ہامان یعنی وہ لوگ جو ہامان کی خصلت پر ہیں اور ان کے ساتھ کے لوگ جو اُن کا لشکر ہیں۔یہ سب خطا پر تھے اور پھر فرمایا کہ مَیں اپنی تمام فوجوں کے ساتھ یعنی فرشتوں کے ساتھ نشانوں کے دکھلانے کے لئے ناگہانی طور پر تیرے پاس آؤں گا۔یعنی اُس وقت جب اکثر لوگ باور نہیں کریں گے اور ٹھٹھے اور ہنسی میں مشغول ہوں گے اور بالکل میرے کام سے بے خبر ہوں گے۔تب مَیں اُس نشان کو ظاہر کردوں گا کہ جس سے زمین کانپ اُٹھے گی۔تب وہ روز دُنیا کے لئے ایک ماتم کا دن ہوگا۔مبارک وہ جوڈریں اور قبل اس کے جو خدا کے غضب کا دن آوے توبہ سے اس کو راضی کرلیں کیونکہ وہ حلیم اور کریم اور غفور اور تَوَّاب ہے جیسا کہ وہ شَدِیْدُ الْعِقَاب بھی ہے۔‘‘ (اشتہار ۱۸ ؍اپریل ۱۹۰۵ء۔مجموعہ اشتہارات جلد ۳ صفحہ ۳۵۵ تا ۳۶۲ مطبوعہ ۲۰۱۸ء) ۹؍اپر۱؎یل۱۹۰۵ء ’’خدا نے مجھ پر ظاہر فرمایا ہے کہ آخری حصّہ زندگی کا یہی ہے جو اَب گزر رہا ہے جیسا کہ عربی میں وحیِ الٰہی یہ ہے۔قَـرُبَ اَجَلُکَ الْمُقَّدَّ رُ۔وَ لَا نُبْقِیْ لَکَ مِنَ الْمُخْزِیَـاتِ ذِکْـرًا۔یعنی تیری اجلِ مقدر اَب قریب ہے اور ہم تیری نسبت ایک بات بھی ایسی باقی نہیں چھوڑیں گے جو موجب ِ رسوائی اور طعن و تشنیع ہو۔اسی بناء پر اس نے مجھے توفیق دی کہ پنجم حصّہ براہین ِ احمدیہ شائع کیاجائے۔‘‘ (براہین احمدیہ حصّہ پنجم۔روحانی خزائن جلد ۲۱ صفحہ ۹۰ حاشیہ) ۱۴؍ اپریل۱۹۰۵ء ’’رؤیا میں دیکھا کہ مَیں قادیان کے بازار میں ہوں اور ایک گاڑی پر سوار ہوں جیسے کہ ریل گاڑی ہوتی ہے۔آگے ایک مکان نظر آیا۔اس وقت زلزلہ آیا مگر ہم کو کوئی نقصان اس زلزلہ سے نہیں ہوا۔‘‘ (بدر۲؎ جلد ۱ نمبر ۳ مورخہ ۲۰ ؍اپریل ۱۹۰۵ء صفحہ۱) ۱۹۰۵ء ’’مَیں دیکھتا ہوں کہ ابھی تک ظاہری بیعت کرنے والے بہت ایسے ہیں کہ نیک ظنّی کا مادہ بھی ہنوز ان میں کامل نہیں اور ایک کمزور بچہ کی طرح ہر ایک ابتلاء کے وقت ٹھوکر کھاتے ہیں اور بعض بدقسمت ایسے ہیں کہ شریر لوگوں کی باتوں سے جلد متاثر ہوجاتے ہیں اور بَد گمانی کی طرف ایسے دوڑتے ہیں جیسے کتا مُردار کی طرف۔۱ (نوٹ از ناشر) یہ تاریخ کاپی الہامات حضرت مسیح موعود علیہ السلام صفحہ ۴۲ سے لی گئی ہے جہاں صرف الہام درج ہے۔۲ (نوٹ از ناشر) الحکم مورخہ ۱۷ ؍اپریل ۱۹۰۵ء صفحہ ۱۲ میں یہ رؤیا باختلافِ الفاظ درج ہے۔

پس مَیں کیوں کر کہوں کہ وہ حقیقی طور پر بیعت میں داخل ہیں۔مجھے وقتاً فوقتاً ایسے آدمیوں کا علم بھی دیا جاتا ہے مگر اِذن نہیں دیا جاتا کہ اُن کو مطلع کروں۔کئی چھوٹے ہیں جو بڑے کئے جائیں گے اور کئی بڑے ہیں جو چھوٹے کئے جائیں گے۔پس مقامِ خوف ہے۔‘‘ (براہین احمدیہ حصّہ پنجم۔روحانی خزائن جلد ۲۱ صفحہ ۱۱۴) ۱۹۰۵ء ’’خدا تعالیٰ نے قرآن شریف کی ان آیتوں کی نسبت جو سورۃ کہف میں ذوالقرنین کے قصہ کے بارے میں ہیں میرے پر پیشگوئی کے رنگ میں معنے کھولے؎۱ ہیں۔‘‘ (براہین احمدیہ حصّہ پنجم۔روحانی خزائن جلد ۲۱ صفحہ۱۱۹) ۱۹۰۵ء ’’خدا نے مجھے فرمایا کہ وہ تو تجھے رَدّ کرتے ہیں مگر مَیں تجھے خاتم الخلفاء بناؤں گا۔‘‘ (ضمیمہ براہین احمدیہ حصّہ پنجم۔روحانی خزائن جلد ۲۱ صفحہ۲۶۷ حاشیہ) ۱۵؍ اپریل۱۹۰۵ء ’’قبل ظہر تھوڑی سی ربودگی اور غنودگی ہوکر یہ الہام ہوا۔اِنِّیْ مَعَ الْاَفْوَاجِ اٰتِیْکَ بَغْتَۃً۔‘‘ ؎۲ (الحکم جلد ۹ نمبر ۱۳ مورخہ ۱۷ ؍اپریل ۱۹۰۵ء صفحہ ۱۲) ۱۵؍ اپریل۱۹۰۵ء (الف)’’آج رات خواب میں دیکھا کہ سخت زلزلہ آیا ہے جو پہلے سے زیادہ معلوم ہوتا تھا۔‘‘ (بدر جلد ۱ نمبر ۳ مورخہ ۲۰؍ اپریل ۱۹۰۵ء صفحہ۱) (ب) ’’ اک نشاں ہے آنیوالا آج سے کچھ دن کے بعد تاریخ امروزہ ۱۵؍اپریل ۱۹۰۵ء جس سے گردش کھائیں گے دیہات و شہر اور مرغزار آئے گا قہرِ خدا سے خلق پر اِک انقلاب اِک برہنہ سے نہ یہ ہوگا کہ تا باندھے ازار یک بیک اِک زلزلہ سے سخت جُنبش کھائیں گے کیا بشر اور کیا شجر اور کیا حجر اور کیا بحار اِک جھپک میں یہ زمیں ہوجائے گی زیرو زبر نالیاں خوں کی چلیں گی جیسے آبِ رودبار رات جو رکھتے تھے پوشاکیں برنگِ یاسمن صبح کردے گی انہیں مثلِ درختانِ چنار ۱ (نوٹ از مولانا جلال الدین شمسؓ) یہ معنے حضرت مسیح موعود علیہ السلام نے براہین احمدیہ حصّہ پنجم۔روحانی خزائن جلد ۲۱ صفحہ ۱۱۹ تا ۱۲۶ پر بیان فرمائے ہیں۔۲ (ترجمہ) مَیں فوجیں لے کر اچانک تیرے پاس آؤں گا۔(بدر مورخہ ۲۰؍اپریل ۱۹۰۵ء صفحہ ۱)

ہوش اُڑ جائیں گے انساں کے پرندوں کے حواس بھولیں گے نغموں کو اپنے سب کبوتر اور ہزار ہر مسافر پر وہ ساعت سخت ہے اور وہ گھڑی راہ کو بھولیں گے ہوکر مَست و بیخود راہوار (بلبل) خون سے مُردوں کے کوہستان کے آبِ رواں سُرخ ہوجائیں گے جیسے ہو شرابِ انجبار مضمحل ہوجائیں گے اس خوف سے سب جن و اِنس زار بھی ہوگا تو ہوگا اُس گھڑی باحالِ زار اِک نمونہ قہر کا ہوگا وہ ربّانی نشاں آسماں حملے کرے گا کھینچ کر اپنی کٹار ہاں نہ کر جلدی سے انکار اے سفیہِ ناشناس اِس پہ ہے میری سچائی کا سبھی دارومدار وحیِ حق کی بات ہے ہوکر رہے گی بے خطا کچھ دنوں کر صبر ہوکر متّقی اور بُردبار‘‘ (براہین احمدیہ حصّہ پنجم۔روحانی خزائن جلد ۲۱ صفحہ ۱۵۱، ۱۵۲) (نوٹ) ’’خدا تعالیٰ کی وحی میں زلزلہ کا بار بار لفظ ہے اور فرمایا کہ ایسا زلزلہ ہوگا جو نمونہ قیامت ہوگا۔بلکہ قیامت کا زلزلہ اس کو کہنا چاہیےجس کی طرف سورۃ اِذَا زُلْزِلَتِ الْاَرْضُ زِلْزَالَھَا اشارہ کرتی ہے لیکن مَیں ابھی تک اِس زلزلہ کے لفظ کو قطعی یقین کے ساتھ ظاہر پر جما نہیں سکتا۔ممکن ہے کہ یہ معمولی زلزلہ نہ ہو بلکہ کوئی اَور شدید آفت۱؎ ہو جو قیامت کا نمونہ دکھاوے جس کی نظیر کبھی اس زمانہ نے نہ دیکھی ہو اور جانوں اور عمارتوں پر سخت تباہی آوے۔ہاں اگر ایسا فوق العادت نشان ظاہر نہ ہو اور لوگ کھلے طور پر اپنی اصلاح بھی نہ کریں تو اُس صورت میں مَیں کاذب ٹھہروں گا۔‘‘ (براہین احمدیہ حصّہ پنجم۔روحانی خزائن جلد ۲۱ صفحہ ۱۵۱ حاشیہ) ۱۸؍ اپریل۱۹۰۵ء (الف)’’دیکھا کہ زور سے اللہ اکبر اللہ اکبر (ساری اذان) کہہ رہا ہوں۔ایک اُونچے درخت پر ایک آدمی بیٹھا ہے۔وہ بھی یہی کلمات بول رہا ہے۔اس کے بعد مَیں نے بآوازِ بلند درُود شریف پڑھنا شروع کیا اور اس کے بعد وہ آدمی نیچے اُتر آیا اور اُس نے کہا کہ سید محمد علی شاہ آگئے ہیں۔اس کے بعد کیا دیکھتا ہوں کہ بڑے زور سے زلزلہ آیا ہے ا ور زمین اس طرح اُڑ رہی ہے جس طرح رُوئی دُھنی جاتی ہے۔اس کے بعد یہ وحی نازل ہوئی۔ہے سرِ راہ پر تمہارے وہ جو ہے مولا کریم۔‘‘ (بدر جلد ۱ نمبر ۳ مورخہ ۲۰ ؍اپریل ۱۹۰۵ء صفحہ۱۔الحکم جلد ۹ نمبر ۱۴ مورخہ ۲۴ ؍اپریل ۱۹۰۵ء صفحہ۱) ۱ حضرت مسیح موعود علیہ السلام تحریر فرماتے ہیں۔’’اگر خدا تعالیٰ نے اس آفت ِ شدیدہ کے ظہور میں بہت ہی تاخیر ڈال دی تو زیادہ سے زیادہ سولہ سال ہیں اس سے زیادہ نہیں۔‘‘ (ضمیمہ براہین احمدیہ حصہ پنجم۔روحانی خزائن جلد ۲۱ صفحہ ۲۵۸)

’’سونے والو جلد جاگو یہ نہ وقت ِ خواب ہے جو خبر دی وحیِ حق نے اس سے دِل بیتاب ہے زلزلہ سے دیکھتا ہوں مَیں زمیں زیرو زبر وقت اَب نزدیک ہے آیا کھڑا سیلاب ہے ہے سرِ راہ پر کھڑا نیکوں کی وہ مَولیٰ کریم نیک کو کچھ غم نہیں ہے گو بڑا گرداب ہے کوئی کشتی اَب بچا سکتی نہیں اس سَیل سے حیلے سب جاتے رہے اِک حضرتِ تــوّاب ہے‘‘ (اشتہار النّداء من وحی السّماء۔مجموعہ اشتہارات جلد ۳ صفحہ ۳۵۵ مطبوعہ ۲۰۱۸ء) (ج) ’’اِک ضیافت ہے بڑی اے غافلو کچھ دن کے بعد جس کی دیتا ہے خبر فرقاں میں رحماں بار بار فاسقوں اور فاجروں پر وہ گھڑی دُشوار ہے جس سے قیمہ بن کے پھر دیکھیں گے قیمہ کا بگھار خوب کُھل جائے گا لوگوں پر کہ دِیں کس کا ہے دیں پاک کر دینے کا تیرتھ کعبہ ہے یا ہردوار وحیِ حق کے ظاہری لفظوں میں ہے وہ زلزلہ لیک ممکن ہے کہ ہو کچھ اَور ہی قسموں کی مار وہ تباہی آئے گی شہروں پہ اور دیہات پر جس کی دُنیا میں نہیں ہے مثل کوئی زینہار ایک دَم میں غمکدے ہوجائیں گے عشرت کدے شادیاں کرتے تھے جو پیٹیں گے ہوکر سوگوار وہ جو تھے اُونچے محل اور وہ جو تھے قصربریں پَست ہوجائیں گے جیسے پَست ہو اِک جائے غار ایک ہی گردش سے گھر ہوجائیں گے مٹی کا ڈھیر جس قدر جانیں تلف ہوں گی نہیں اُن کا شمار کب یہ ہوگا یہ خدا کو علم ہے پر اس قدر دی خبر مجھ کو کہ وہ دِن ہوں گے ایامِ بہار پھر بہار آئی خدا کی بات پھر پوری ہوئی یہ خدا کی وحی ہے اب سوچ لو اے ہوشیار (منقول اَز نوٹ بُک حضرت مسیح موعود علیہ السلام بحوالہ دُرّثمین شائع کردہ مکرم محمد یامین صاحب مرحوم ۲۱؍ اپریل۱۹۰۵ء (الف) ’’ اَمن اَست دَر مکان محبّت سرائے ما‘‘ ؎۱ (بدر جلد ۱ نمبر ۳ مورخہ ۲۰؍اپریل ۱۹۰۵ء صفحہ ۱۔الحکم جلد ۹ نمبر ۱۴ مورخہ ۲۴؍ اپریل ۱۹۰۵ء صفحہ ۱) (ب) ’’ ۴؍ اپریل ۱۹۰۵ء کے زلزلہ کے وقت ہم مع اپنے تمام اہل و عیال کے باغ میں چلے گئے تھے اور ایک میدان ہماری زمین کا جس میں پانچ ہزار آدمی کی گنجائش ہوسکتی تھی ہم نے سونے کے لئے ۱ (ترجمہ از مرتّب) ہمارے مکان محبّت سرائے میں امن ہے۔

پسند کیا اور اس میں دو خیمے لگائے اور اِردگرد قناتوں سے پَردہ کرادیا مگر پھر بھی چوروں کا خطرہ تھا کیونکہ جنگل تھا۔اس کے قریب ہی بعض دیہات میں نامی چور رہتے ہیں جو کئی مرتبہ سزا پاچکے ہیں۔ایک مرتبہ رات کو مَیں نے خواب میں دیکھا کہ مَیں پہرہ کے لئے پھرتا ہوں۔جب مَیں چند قدم گیا تو ایک شخص مجھے ملا اور اُس نے کہا کہ آگے فرشتوں کا پہرہ ہے یعنی تمہارے پہرہ کی کچھ ضرورت نہیں تمہاری فرودگاہ کے اِرد گرد فرشتے پہرہ دے رہے ہیں۔پھر بعد اس کے الہام ہوا۔اَمن اَست دَر مقامِ محبّت سرائے ما پھر چند روز کے بعد ایسا اتفاق ہوا کہ اِرد گرد کے دیہات میں سے ایک گاؤں کا باشندہ جو نامی چور تھا چوری کے ارادہ سے ہمارے باغ میں آیا اور اس کا نام بشن سِنگھ تھا۔رات کا پچھلا حصّہ تھا جب وہ اِس ارادہ سے باغ میں داخل ہوا مگر موقعہ نہ ملنے سے ایک پیاز کے کھیت میں بیٹھ گیا اور بہت سی پیاز اس نے توڑی اور ایک ڈھیر لگادیا اور پھر کسی نے دیکھ لیا تب وہاں سے دوڑا اور وہ اِس قدر قوی ہیکل تھا کہ اس کو دس آدمی بھی پکڑ نہ سکتے اگر خدا کی پیشگوئی نے پہلے سے اُس کو پکڑا ہوا نہ ہوتا۔دَوڑنے کے وقت ایک گڑھے میں پَیر اس کا جاپڑا۔پھر بھی وہ سنبھل کر اُٹھا۔مگر آگے پیچھے سے لوگ پہنچ گئے اور اس طرح پر سردار بشن سِنگھ باوجود اپنی سخت کوشش کے پکڑے گئے اور عدالت میں جاتے ہی سزا یاب ہوگئے۔بعد اس کے ہمارے سکونتی مکان میں سے جو باغ میں ہے جس میں ہم دن کے وقت رہتے تھے ایک بڑا سانپ نکلا جو ایک زہریلا سانپ تھا اور بڑا لمبا تھا وہ بھی اس چور کی طرح اپنی سزا کو پہنچا اور اِس طرح پر فرشتوں کی حفاظت کا ثبوت ہمیں دست بدست مِل گیا۔‘‘ (حقیقۃ الوحی۔روحانی خزائن جلد ۲۲ صفحہ ۳۱۵، ۳۱۶) ۲۲؍ اپریل۱۹۰۵ء ’’جَآءَ کَ الْفَتْحُ ‘‘ ؎۲ (بدر جلد ۱ نمبر ۴ مورخہ ۲۷ ؍اپریل ۱۹۰۵ء صفحہ۱۔الحکم جلد ۹ نمبر ۱۴ مورخہ ۲۴ ؍اپریل ۱۹۰۵ء صفحہ۱) ۲۴؍ اپریل۱۹۰۵ء ۱۔’’تما م حوادِث اور عجائباتِ قدرت دِکھلانے کے بعد تیرا ۴؎حادثہ ہوگا۔‘‘ (براہین احمدیہ حصہ پنجم روحانی خزائن جلد ۲۱ صفحہ ۹۰ حاشیہ ) ۱ (ترجمہ) تیرے پاس فتح آئی۔(بدر مورخہ ۲۷؍اپریل ۱۹۰۵ء صفحہ ۱) ۲ (نوٹ از ناشر) کاپی الہامات حضرت مسیح موعود علیہ السلام صفحہ ۴۲ میں اس الہام کے الفاظ یوں مندرج ہیں۔’’تمام حوادث اور عجائباتِ قدرت دکھلانے کے بعد تمہارا حادثہ آئے گا۔‘‘

۲۔’’بھونچال آیا اور بڑی شدت سے آیا۔‘‘ (کاپی الہامات حضرت مسیح موعود علیہ السلام صفحہ ۴۲ بدر جلد ۱ نمبر ۴ مورخہ ۲۷؍اپریل ۱۹۰۵ء صفحہ ۱۔الحکم جلد ۹نمبر۱۴ مورخہ ۲۴؍اپریل ۱۹۰۵ء صفحہ۱) ۲۵؍ اپریل۱۹۰۵ء ’’قُلْ مَا لَکَ حِیْلَۃٌ ‘‘ ؎۱ (بدر جلد ۱ نمبر ۴ مورخہ ۲۷ ؍اپریل ۱۹۰۵ء صفحہ۱۔الحکم جلد ۹ نمبر ۱۴ مورخہ ۲۴ ؍اپریل ۱۹۰۵ء صفحہ۱) ۲۸؍ اپریل۱۹۰۵ء ’’رؤیا میں دیکھا کہ ایک سفید کپڑا ہے اس پر کسی نے ایک انگشتری رکھ دی ہے۔اس کے بعد الہاماتِ ذیل ہوئے۔۱۔فتح نمایاں۔ہماری فتح۔۲۔صَدَّ قْتَ الرُّؤْیَـا۔۳۔اِنِّیْ مَعَ الْاَفْوَاجِ اٰتِیْکَ بَغْتَۃً۔‘‘۲؎ ( الحکم۳؎ جلد ۹ نمبر ۱۵ مورخہ ۳۰ ؍اپریل ۱۹۰۵ء صفحہ۱) ۲۹؍ اپریل۱۹۰۵ء ’’رات دو بجنے میں سات منٹ باقی تھے کہ مَیں نے دیکھا کہ یکایک زمین ہلنی شروع ہوئی۔پھر ایک زور کا دھکا لگا۔مَیں نےرؤیاہی میں گھر والوں کو کہا کہ اُٹھو زلزلہ آیا ہے اور یہ بھی کہا ۱ (ترجمہ از مرتّب) کہو اَب تمہارا حیلہ کارگر نہیں ہوسکتا۔۲ (ترجمہ) سچا کیا تو نے خواب کو۔میں اپنے فرشتوں کی فوجوں کے ساتھ اس وقت آؤں گا کہ کسی کو گمان بھی نہ ہوگا کہ ایسا حادثہ ہونے والا ہے۔(بدر مورخہ ۲۷؍اپریل ۱۹۰۵ء صفحہ ۱) ۳ (نوٹ از ناشر) بدر مورخہ ۲۷ ؍اپریل ۱۹۰۵ء صفحہ۱ میں یہ رؤیا و الہامات مع تفصیل یوں درج ہیں۔’’رؤیا میں دیکھا کہ ایک سفید سا کپڑا بچھا ہوا ہے اس پر کسی نے ایک انگشتری رکھ دی ہے۔اس کے بعد یہ وحی نازل ہوئی۔فتح نمایاں۔ہماری فتح۔یعنی واقعات آئندہ کے واسطے جو پیش گوئیاں کی ہوئی ہیں اور جن پر دشمن ہنسی کرتا ہے ان کو خدا تعالیٰ پورا کرکے ہماری صداقت دنیا پر ظاہر کردے گا اور لوگ نیک چلنی اختیار کریں گے اور خدا پر ایمان لائیں گے۔صَدَّ قْتَ الرُّؤْیَـا۔اِنِّیْ مَعَ الْاَفْوَاجِ اٰتِیْکَ بَغْتَۃً۔خدا تعالیٰ ہمیشہ انبیاء کی امداد فرشتوں کے ذریعہ سے کرتا ہے جو لوگوں کے دلوں میں نیکی کی ترغیب پیدا کرتے ہیں اور حق کی طرف راہ د کھاتے ہیں۔اسی شب صاحبزادہ میاں محمود احمد صاحب نے خواب میں دیکھا تھا کہ حضرت کو اِنِّیْ مَعَ الْاَفْوَاجِ اٰتِیْکَ بَغْتَۃً۴؎ الہام ہوا ہے۔صبح اُٹھ کر ذکر کیا تو معلوم ہوا کہ بے شک یہ الہام ہوا ہے۔‘‘ ۴ (نوٹ از مولانا عبد اللطیف بہاولپوری) حضرت امیر المؤمنین خلیفۃ المسیح الثانیؓ کو خواب میں یہ الہام بتائے جانے میں غالباً ایک بڑی حکمت یہ تھی کہ اس الہام کا آپ کے زمانہ خلافت میں ایک خاص ظہور مقدر تھا جیسا کہ مارچ ۱۹۵۳ء میں ہوا۔

مبارک کو لے لو۔اسی حالت ِرؤیامیں یہ بھی خیال آیا کہ شاستری کی پیشگوئی غلط نکلی۔‘‘ ( الحکم۱؎ جلد ۹ نمبر ۱۵ مورخہ ۳۰ ؍اپریل ۱۹۰۵ء صفحہ۱) ۲۹؍ اپریل۱۹۰۵ء ’’آج ۲۹؍ اپریل ۱۹۰۵ء کو پھر خدا تعالیٰ نے مجھے دوسری مرتبہ کے زلزلہ شدیدہ کی نسبت اطلاع دی ہے۔سو مَیں محض ہمدردی ٔ مخلوق کے لئے عام طور پر تمام دُنیا کو اطلاع دیتا ہوں کہ یہ بات آسمان پر قرار پاچکی ہے کہ ایک شدید آفت سخت تباہی ڈالنے والی دُنیا؎۲پر آوے گی جس کا نام خدا تعالیٰ ۱ (نوٹ از ناشر) بدر مورخہ ۲۷؍اپریل ۱۹۰۵ء صفحہ ۱ پر یہ رؤیا یوں درج ہے۔’’گزشتہ رات کو ۲ بجنے میں سات منٹ باقی تھے جب کہ ہم نے یہ رؤیا دیکھا کہ زمین ہلتی ہے۔پہلے ہم نے خیال کیا کہ شاید ویسے ہی کچھ حرکت ہوئی ہے مگر پھر زور سے ایک دھکا لگا۔تب یقین ہوا کہ زلزلہ ہے اور میں گھر کے آدمیوں کو جگاتا ہوں اور کہتا ہوں کہ اُٹھو۔زلزلہ آیا۔مبارک کو بھی اُٹھالو اور یہ بھی رؤیا میں کہتا ہوں کہ جوتشی کس قدر جھوٹے ہیں۔پنڈت نے تو اخبار میں چھپوایا تھا کہ اب زلزلہ نہیں آئے گا اس کے بعد بیداری ہوئی۔‘‘ ۲ حضرت مسیح موعود علیہ السلام تحریر فرماتے ہیں۔’’مجھے خدا تعالیٰ خبر دیتا ہے کہ وہ آفت جس کا نام اُس نے زلزلہ رکھا ہے نمونۂ قیامت ہوگا اور پہلے سے بڑھ کر اس کا ظہور ہوگا… اگر چہ بظاہر لفظ زلزلہ کا آیا ہے مگر ممکن ہے کہ وہ کوئی اَور آفت ہو جو زلزلہ کا رنگ اپنے اندر رکھتی ہو مگر نہایت شدید آفت ہو جو پہلے سے بھی زیادہ تباہی ڈالنے والی ہو جس کا سخت اثر مکانات پر بھی پڑے… جیسا کہ اللہ تعالیٰ فرماتا ہے کہ وہ زلزلہ تیری ہی زندگی میں آئے گا اور اس زلزلہ کے آنے سے تیرے لئے فتح نمایاں ہوگی اور ایک مخلوقِ کثیر تیری جماعت میں داخل ہوجائے گی اور تیرے لئے وہ آسمانی نشان ہوگا۔تیری تائید کے لئے خدا خود اُترے گا اور اپنے عجائب کام دکھلائے گا جو کبھی دُنیا نے نہیں دیکھے اور دُور دُور سے لوگ آئیں گے اور تیری جماعت میں داخل ہوں گے اور وہ زلزلہ پہلے زلزلہ سے بڑھ کر ہوگا اور اس میں قیامت کے آثار ظاہر ہوں گے اور دُنیا میں ایک انقلاب پیدا کرے گا اور خدا فرماتا ہے کہ مَیں اُس وقت آؤں گا کہ جب دل سخت ہوجائیں گے اور زلزلہ آنے کے خیال سے لوگ اطمینان حاصل کرلیں گے اور خدا فرماتا ہے کہ مَیں مخفی طور پر آؤں گا اور مَیں ایسے وقت میں آؤں گا کہ کسی کو بھی اطلاع نہیں ہوگی۔یعنی لوگ اپنے دُنیا کے کاروبار میں سرگرمی اور اطمینان سے مشغول ہوں گے کہ یک دفعہ وہ آفت نازل ہوجائے گی اور اس سے پہلے لوگ تسلّی کر بیٹھے ہوں گے کہ زلزلہ نہیں آئے گا اور اپنے تئیں بے خطر اور امن میں سمجھ لیا ہوگا تب یک دفعہ یہ آفت ان کے سروں پر ٹوٹے گی مگر خدا فرماتا ہے کہ وہ بہار کے دن ہوں گے۔آفتاب بہار کی صبح میں نمودار ہوگا اور خزاں کی شام میں غروب کرے گا تب کئی گھروں میں ماتم پڑے گا کیونکہ انہوں نے وقت کو شناخت نہ کیا۔‘‘ (ضمیمہ براہین احمدیہ حصّہ پنجم۔روحانی خزائن جلد ۲۱ صفحہ ۲۵۳ تا ۲۵۵)

نے بار بار زلزلہ رکھا ہے۔مَیں نہیں جانتا کہ وہ قریب ہے یا کچھ دنوں کے بعد خدا تعالیٰ اُس کو ظاہر فرمادے گا۔مگر بار بار خبر دینے سے یہی سمجھاجاتا ہے کہ بہت دُور نہیں ہے۔یہ خدا تعالیٰ کی خبر اور اُس کی خاص وحی ہے جو عالم الاسـرار ہے… خدا فرماتا ہے کہ مَیں چُھپ کر آؤں گا۔مَیں اپنی فوجوں کے ساتھ اس وقت آؤں گا کہ کسی کو گمان بھی نہ ہوگا کہ ایسا حادثہ ہونے والا ہے۔غالباً وہ صبح کا وقت ہوگا یا کچھ حصّہ رات میں سے، یا ایسا وقت ہوگا جو اس سے قریب ہے… اور خدا تعالیٰ فرماتا ہے کہ اُس روز مَیں اُن پر رحم کروں گا جن کے دل مجھ سے ترساں اور ہراساں ہیں جو نہ بدی کرتے ہیں اور نہ بدی کی مجلسوں میں بیٹھتے ہیں۔اور خدا نے یہ بھی فرمایا کہ اس روز تیرے لئے فتحِ نمایاں ظاہر ہوگی۔کیونکہ خدا اس روز وہ سب کچھ دکھلائے گا جو قبل از وقت دنیا کو سنایا گیا۔خوش قسمت وہ جو اَب بھی سمجھ جائے… مجھے خدا تعالیٰ نے اطلاع دی ہے تا وہ جو خدا تعالیٰ کو شناخت نہیں کرتے اور نہ مجھ کو، اُن کو پتہ لگ جائے۔مَیں محض ہمدردی کی راہ سے یہ بھی کہتا ہوں کہ اگر بڑے بڑے مکانوں سے جو دو منزلے سہ منزلے ہیں اجتناب کریں تو اس میں رعایت ظاہر ہے آئندہ ان کا اختیار۔‘‘ ( اشتہار ۲۹؍ اپریل ۱۹۰۵ء بروز شنبہ مجموعہ اشتہارات جلد ۳ صفحہ ۳۶۵،۳۶۶ مطبوعہ ۲۰۱۸ء) اپریل۱۹۰۵ء ’’جب ہم بہار کے موسم میں ۱۹۰۵ء میں باغ میں تھے تو مجھے اپنی جماعت کے لوگوں میں سے جو باغ میں تھے کسی ایک کی نسبت یہ الہام ہوا تھا کہ خدا کا ارادہ ہی نہ تھا کہ اُس کو اچھا کرے مگر فضل سے اپنے ارادہ کو بدل دیا اِس الہام کے بعد ایسا اتفاق ہوا کہ سید مہدی حسین صاحب جو ہمارے باغ میں تھے اور ہماری جماعت میں داخل ہیں اُن کی بیوی سخت بیمار ہوگئی۔وہ پہلے بھی تپ اور ورم سے جو منہ اور دونوں پَیروں اور تمام بدن پر تھی، بیمار تھی اور بہت کمزور تھی اور حاملہ تھی۔پھر بعد وضع حمل جو باغ میں ہوا اُس کی حالت بہت نازک ہوگئی اور آثار نومیدی ظاہر ہوگئے اور مَیں اس کے لئے دعا کرتا رہا۔آخر خدا تعالیٰ کے فضل سے اس کو دوبارہ زندگی حاصل ہوئی …دوسرے روز سید مہدی حسین کی اہلیہ کی زبان پر یہ الہام مِن جانب اللہ جاری ہوا۔تُو اچھی تو

·

آج 10 میں سے 10 باقی