سُوْرَۃُ الْحِجْرِ
تفسیر کبیر (جلد ۵), حصہ 13
لوگ ان مردوں سے بدکاری کرنے کی نیت سے نہیں آئے تھے۔اگر وہ اجنبیوں سے ایسے فعل کیاکرتے تھے تووہ یہ نہ کہتے کہ جب ہم نے منع کیا ہواہے کہ اجنبی آدمی نہ لایا کرو۔پھرتُوکیوں اجنبیوں کولایا؟تب تو انہیں حضرت لوط کے مہمان بلانے پر خوش ہوناچاہیے تھا۔نیز یہ کیسی عقل کے خلا ف بات ہے کہ پہلے توکبھی انہوں نے مہمانوں سے ایسافعل نہ کیا۔بلکہ صرف مہمان لانے سے روکتے رہے لیکن اس دن بدکاری پر تیار ہوگئے اصل با ت یہ ہے کہ یہ خیال بالکل خلاف عقل ہے۔کہ وہ بدکاری کرنا چاہتے تھے اوربائبل سے لے کر بعض مفسرین نے نقل کردیا ہے جس میں یہ لکھا ہے کہ شہر کے لوگ ان فرشتوں سے بدکاری کرنا چاہتے تھے (پیدائش باب۱۹ آیت ۵) حالانکہ بائبل میں ایسی رطب و یابس باتیں بہت سی درج ہیں او راس کے بہت سے مضامین متضاد ہیں۔اس کے بیان کی جب تک قرآن کریم یاصحیح تعریف یا عقل سے تائید نہ ہوتی ہو۔اعتبار کرناسخت خطرناک ہے۔قَالَ هٰؤُلَآءِ بَنٰتِيْۤ اِنْ كُنْتُمْ فٰعِلِيْنَؕ۰۰۷۲ اس نے کہا (کہ )اگرتم نے (میرے خلاف )کچھ کرنا (ہی)ہوتو یہ میری بیٹیاں(تم میں موجود ہی)ہیں۔تفسیر۔اس آیت کو اوپر کے لغو خیا ل کی تائید میں دلیل سمجھاجاتاہے لیکن یہ دلیل دعویٰ سے بھی لُچر ہے۔ایک طرف تو ان لوگوں کو مردوں سے بدکاری کا شائق قرار دیاجاتاہے۔اورکہاجاتاہے کہ وہ ان مردوں سے بدکاری کرنے کے شوق میں آئے تھے اوردوسری طرف یہ کہاجاتاہے کہ حضرت لو ط نے کہا کہ اگر بدکاری کاشوق ہے تومیری بیٹیاں حاضر ہیں۔اگر ان لوگو ں کو عورتوں سے مباشرت کا شوق ہوتا۔توکیاان کے گھر میں بیویاں نہ تھیں وہ اس طرح ان کے پاس کیوں دوڑے آتے اوراگر وہ مردوں سے بدکاری کی نیت سے آئے تھے توپھر حضرت لوط ؑ کے اس قول کے کیامعنے ہوئے کہ کچھ کرنا ہی ہے تولڑکیوں سے بدکاری کرلو۔کیاایسے موقع پر کوئی معقول آدمی یہ بات کہہ سکتاہے؟حضرت لوط ؑ کانبی کا مقام نظرانداز کردو۔مگرایک معقول آدمی کے مقام سے تو ایک کافر بھی انہیں نہیں گرائے گا۔پھر یہ کیسے تعجب کی بات ہے کہ حضرت لوط ؑجوخداکے نبی تھے خودان لوگوں کو ایک اوربدکاری کی جو پہلی سے کم نہیں تعلیم دیتے ہیں کیاکوئی عقل مندآدمی بھی اس بات کوباورکرسکتاہے کہ عین اس وقت جب بدکاریوں کی وجہ سے اس قوم پر عذاب آنے لگاتھا حضرت لوط ؑ ان کو ایک اوربدکاری کا مشورہ دیتے ہیں اوریہ بھول جاتے ہیں کہ
ایسے ہی کاموں کی وجہ سے عذاب آرہاہے۔آیت هٰؤُلَآءِبَنٰتِيْۤ کے متعلق عام لوگوں کے خیال کا رد حقیقت یہ ہے کہ اس آیت کے فقط یہ معنے ہیں کہ میری بیٹیاں تم میں بیاہی ہوئی ہیں اگر تم سمجھتے ہو کہ میں باہرسے آدمی تم کو نقصان پہنچانے کے لئے لایاہوں توتم میں میری بیٹیا ںموجود ہیں اگر میں کوئی شرارت کرو ں اور تم کو نقصان پہنچاکر یہاں سے بھاگ جائو ں توتم انہیں دکھ دے سکے ہو۔آخر میں باپ ہوں ا س صورت کے ہوتے ہوئے میں تمہارے خلاف کس طرح کوئی قدم اٹھا سکتا ہوں؟ (دیکھو اس آیت کی مزید تشریح کے لئے سورۃ ہود ع ۷زیر آیت ۸۰)بعض کہتے ہیں کہ بَنٰتِیْ سے مراد حضرت لوط کے قول میں ان لوگوں کی بیویاں تھیں جو بوجہ نبی ہونے کے اوربڑی عمر والاہونے کے وہ ان کی بیویوں کو بیٹیاں کہتے ہیں (تفسیر کبیر امام رازی سورۃ حجر زیر آیت ھذا)اورکہتے ہیں اگر کچھ کرنا ہے تواپنی بیویوں سے جو چاہو کرو۔یہ معنے اس غلط خیال سے اچھے ہیں مگران معنوں سے اس طرف ضرور اشارہ نکلتاہے کہ وہ لوگ ان مردوں سے بدکاری کرناچاہتے تھے اورمیں جیساکہ ثابت کرچکاہوں یہ قرآن کریم سے اورعقل سے ہرگز ثابت نہیں۔پس یہ معنے گو نسبتاً اچھے ہیں لیکن قرآن کریم کے کامل مفہوم کوظاہرنہیں کرتے۔اس جگہ ایک لطیفہ یاد رکھنے کے قابل ہے۔جو یہ ہے کہ اردو دان لوگ ا س آیت سے بہت دھوکہ کھاتے ہیں کیونکہ اوباشوں کی زبان میں فاعل کالفظ مباشر ت کرنے والے کے معنوں میں استعمال ہوتاہے۔اورفاعلین کے لفظ سے وہ یہ سمجھتے ہیں کہ یہ مطلب تو واضح ہے حالانکہ قرآن کریم عربی میں ہے نہ کہ اردو میں۔عربی میں ایساکوئی محاورہ نہیں۔دوسرے حضرت لوط ؑ تونبی تھے وہ اوباشوں کی زبان کیوں بولنے لگے۔یہ مضمون کسی قدر رکیک ہے۔مگرچونکہ مجھے اردودان طبقہ کو اس آیت کامضمون سمجھا نے میں مشکلات پیش آئی ہیں اوراس محاورہ کو انہیں پیش کرتے ہوئے دیکھاہے اس لئے میں نے باوجود حیاء کے اس کابھی رد کردیا ہے۔آیت هٰؤُلَآءِ بَنٰتِيْۤ کا مطلب غرض اس آیت کے معنے صرف اتنے ہیں کہ حضر ت لوط نے اپنی بیاہی ہوئی بیٹیوں کی طرف اشارہ کرتے ہوئے یہ فرمایا ہے کہ یہ تمہارے قبضہ میں ہیں پھر تم کو کیوں شک ہے۔کہ میں تم سے غداری کروں گا۔پس اگر تم آ ج ضرور میرے خلاف کسی اقدام پر تُلے ہوئے ہوتومیں تم کو ایک ایسی بات بتاتاہوں جو تمہاری تجویز سے (یعنے حضرت لوط ؑ کے مہمانوں کو ذلیل کرکے وہاں سے نکال دینے سے)بہت بہتر ہے اوراس میں مہمانوں کی تذلیل کا گناہ بھی نہیں ہوتا۔اوروہ یہ کہ میری بیٹیو ں کی نگرانی رکھو اور اگر میں تم کو نقصان پہنچائو ں توان کوتکلیف دے کر تم مجھے دکھ دے سکتے ہو۔اگریہ کہا جائے کہ لڑکیوں کو دکھ دینے کی تجویز ایک نبی کس طرح
کرسکتاہے تواس کا جواب یہ ہے کہ یہ تو ان لوگوں کی تسلی کے لئے تھا۔ورنہ حضرت لوط جانتے تھے کہ نہ میں ان سے غداری کروں گا اورنہ لڑکیوںکو دکھ دینے کاسوال پیدا ہوگا۔لَعَمْرُكَ اِنَّهُمْ لَفِيْ سَكْرَتِهِمْ يَعْمَهُوْنَ۰۰۷۳ (اے ہمارے نبی )تیری زندگی کی قسم (کہ)یہ (تیرے مخالفین بھی)یقیناً(انہی کی طرح )اپنی بدمستی میں بہک رہے ہیں۔حلّ لُغَات۔لَعَمْرُکَ۔لَعَمْرُکَ اَلْعَمْرُ کے معنے ہیں۔الحیاۃ ،زندگی۔وَقِیْلَ الْعَمْرُدُوْنَ الْبَقَاءِ لِاَنَّہٗ اِسْمٌ لِمُدَّۃِ عِمارَۃِ الْبَدَنِ بِالْحَیَاۃِ وَالْبَقَاءُ ضِدُّ الْفَنَاءِ وَلِھٰذَا یُوْصَفُ الْبَارِیْ بِالْبَقَاءِ وَقَلَّمَا یُوْصَفُ بِالْعَمْرِ۔بعض نے کہا ہے کہ عَمْرٌ کالفظ بَقَاءُکی نسبت کم زمانے کے لئے بولاجاتاہے کیونکہ عَمْرٌ اس عرصے کو کہتے ہیں جب تک کہ انسانی جسم میںز ندگی رہے اور بقاء کالفظ فناءکے مقابل پر استعمال ہوتاہے اسی اختلاف کی بناء پر خدا تعالیٰ کے لئے لفظ بقاء تواستعمال کیا جاتا ہے لیکن عمرٌ کااستعمال اللہ تعالیٰ کے لئے شاذ ہی ہوتاہے اَلْعَمْرُ اَیْضًا الدِّیْنُ۔دین۔وَمِنْہُ لَعَمْرِیْ فِی الْقَسَمِ اَیْ لَدِیْـنِیْ اور لَعَمْرِیْ کالفظ جو قسم کے طورپر استعمال ہوتاہے وہ انہی معنوں میں ہے یعنی مجھے اپنے دین کی قسم (اقرب)پس لَعَمْرُکَ کے معنی ہوں گے (۱) تیری زندگی کی قسم (۲)تیرے دین کی قسم۔تفسیر۔اللہ تعالیٰ کا مختلف اشیاء کی قسم کھانے کا مطلب بعض نے کہا ہے کہ زندگی کی قسم کھانادرست نہیں پھر اللہ تعالیٰ نے یہاں کیوں قسم کھائی؟ (قرطبی زیر آیت ھذا)۔اس کاجوا ب یہ ہے کہ بے شک انسانوں کے لئے اللہ تعالیٰ کے سواکسی کی بھی قسم کھانادرست نہیں۔لیکن یہ تواللہ تعالیٰ کاقول ہے اوراللہ تعالیٰ نے تودن کی اور رات کی اورصبح کی اوردوپہر کی اورہوائوں کی بھی قسم قرآن میںکھا ئی ہے۔پھر زندگی کی قسم اس کے لئے کس طرح معیوب ہوگئی ؟اصل بات یہ ہے کہ بند ہ جس کی قسم کھاتاہے اس کی عظمت کا اظہار کرتاہے اوراللہ تعالیٰ جہاں قسم کھاتاہے اس سے اس وجود کو جس کی قسم کھائی ہو بطور شہادت پیش کرنا مطلوب ہوتاہے۔پس اللہ تعالیٰ کے لئے کسی شے کی قسم کھا نامعیو ب نہیں۔اس قسم کا صرف یہ مطلب ہوتاہے کہ میں اس شے کو بطو ردلیل پیش کرتاہوں اوریہ قسم شہادت کی قسم ہوتی ہے جو صرف اللہ تعالیٰ کی طرف سے پیش کی جاسکتی ہے کیونکہ اسی کو طاقت حاصل ہے کہ
کائنات میں سے کسی جزوکو بطور شہادت کے پیش کرسکے کہ ہرشے اس کے اختیارمیں ہے۔انسان میں کہاں طاقت ہے کہ وہ ایسا دعویٰ کرسکے۔لَعَمْرُكَ میں آنحضرت ؐ کی عمر کی قسم کھائی گئی ہے دوسراسوال اس آیت کے بارہ میں یہ ہے کہ یہ قسم کس کی عمر کی کھائی گئی ہے۔آیاحضرت لوط کی عمر کی یارسول اللہ صلی اللہ علیہ وسلم کی عمر کی۔بعض مفسرین نے لکھا ہے کہ حضرت لوط ؑ کی عمرکی قسم کھائی گئی ہے۔اورملائکہ نے کھائی ہے (کشاف زیر آیت ھذا) اور حضرت ابن عباس کاقول ابن جریر نے نقل کیا ہے کہ یہ قسم رسول کریم صلی اللہ علیہ وسلم کی عمر کی کھائی گئی ہے اوریہ فضیلت سوائے رسول کریم صلی اللہ علیہ وسلم کے اور کسی کوحاصل نہیں (ابن کثیر زیر آیت ھذا) اسی آیت کی تفسیر کے نیچے۔میرے نزدیک قرآن کریم کی عبارت سے حضرت ابن عباس کے معنے زیادہ درست معلوم ہوتے ہیں کیونکہ کشاف کے معنوں کے رو سے ایک قالوا محذوف مانناپڑتا ہے اورمحذوف اسی جگہ نکالاجاتاہے جہاں سیاق وسباق دلالت کرتے ہوں اور دوسرے معنے نہ ہوسکتے ہوں۔لیکن نہ تویہاں سیاق و سباق مجبور کرتے ہیں کہ اس قسم کو حضرت لوط کی نسبت مانا جائے اورنہ یہ ہی درست ہے کہ اس جگہ دوسرے معنے نہیں ہوسکتے۔آنحضرت صلی اللہ علیہ وسلم کو خطاب واضح ہے اوراس پر کوئی اعتراض معناً یالفظاً نہیں ہوسکتا۔پس یہی درست ہے کہ ا س جگہ رسول کریم صلی اللہ علیہ وسلم کی عمرکی قسم کھائی گئی ہے یادوسرے لفظوں میں یہ کہ آپؐ کی عمر کے واقعات کواوپر کے واقعہ کے لئے بطور شہادت پیش کیاگیا۔حضرت لوط ؑ کے ذکر کے بعد آنحضرت ؐ کی عمر کی قسم کھانے کا مطلب اصل بات یہ ہے کہ جب حضرت لوط علیہ السلام کا یہ قول بیان کیا گیا کہ دیکھو یہ میری لڑکیاں تم میں موجود ہیں اگر میں تم سے کوئی دھوکہ کروں توتم ا ن کے ذریعہ سے مجھے سزادے سکتے ہو۔تو اس میں رسول کریم صلی اللہ علیہ وسلم کی ان سے ایک مشابہت بیا ن کی گئی تھی اوروہ یہ کہ رسول کریم صلی اللہ علیہ وسلم کی بھی تین بیٹیا ںکفار میں بیاہی ہوئی تھیں۔آپ کے دعویٰ کی وجہ سے انہیں تکلیف دی گئی (السیرۃ النبویۃ لابن ہشام سعی قریش فی تطلیق بنات الرسول من ازواجھن)۔آنحضرت ؐ کی صاحبزادیوں کو حضرت لوط کی بیٹیوں سے مشابہت اللہ تعالیٰ نے اس مشابہت کی طرف اس واقعہ کو بیان کر کے اشار ہ کیا ہے اور بتایاہے کہ جس طرح حضرت لوط ؑ کی دوبیٹیاں کفار میں بیاہی ہوئی تھیں۔وہی حال محمد رسول اللہ صلی اللہ علیہ وسلم کاہے۔اور چونکہ اس مشابہت کے ذکر سے رسول کریم صلی اللہ علیہ وسلم کے دل کوصدمہ پہنچنا لازمی تھا۔اللہ تعالیٰ نے اپنی اس بے انتہا محبت کی وجہ سے جو اسے اپنے رسول سے تھی۔آپؐ کے دل کو تسلی دی اورآپ سے ہمدردی کااظہار کیا۔اورفرمایا کہ اے محمد!(صلی اللہ علیہ وسلم)اس واقعہ کومعلوم کرکے
جو تیرے د ل کو صدمہ پہنچا ہے اسے ہم جانتے ہیں اوراس میں تجھ سے ہمدردی رکھتے ہیں۔خصوصاًاس لئے کہ لوط کے مخالف باوجود اس قدر گند اہونے کے ان کی بیٹیوں کے ذریعے سے انہیں دکھ نہ دیتے تھے۔جیساکہ سورئہ ہود میں ہے کہ جب حضرت لوط ؑ نے کہا کہ میری بیٹیا ںتم میں موجود ہیں اگر میں غداری کروں توتم ان کے ذریعہ سے مجھے دکھ دے سکتے ہو۔اور چونکہ کوئی باپ اپنی بیٹیوں کادکھ برداشت نہیں کرسکتا۔اس لئے سمجھ لوکہ کم سے کم ان کے خیال سے ہی میں تم کو دھوکہ نہ دوں گا۔تواس پر ان لوگوں نے یہ جواب دیاکہلَقَدْ عَلِمْتَ مَالَنَا فِی بَنَاتِکَ مِنْ حَقِّ (ہود :۸۰) تجھ کو معلوم ہے کہ تیری لڑکیوں کو دکھ دینے کا ہمیں حق حاصل نہیں ہمارے لئے خطرہ توپیداکرے اوردکھ ہم تیری لڑکیوں کو دیں۔یہ نہیں ہوسکتالیکن جہاں لوط کے دشمنوں کایہ حال تھا تیرے دشمن اپنی شرارت کے جوش میں اس قدر بڑھے ہوئے ہیں کہ تجھ کو تیری لڑکیوں کے ذریعہ سے دکھ دیتے ہیں۔یہ واقعہ اس طرح ہے کہ آنحضرت صلی اللہ علیہ وسلم کی دوصاحبزادیا ںحضرت رقیہ اور حضرت ام کلثوم ابولہب کے دوبیٹوں عتبہ اورعتیبہ سے بیاہی ہوئی تھیں (الاصابۃ فی تمییز الصحابۃ واسدالغابۃ ام کلثوم ) جب رسول کریم صلی اللہ علیہ وسلم نے نبوت کادعوی کیاتواس ظالم نے اپنے لڑکوں کو عاق کرنے کی دھمکی دےکر انہیں طلاق دلوادی۔آنحضرتؐ کی صاحبزادی حضرت زینب کو تکلیف دیئے جانے کا واقعہ اس طرح آپؐ کی بڑی صاحبزادی حضرت زینب ابوالعاص سے بیاہی ہوئی تھیں۔جب وہ مکہ سے ہجرت کرکے مدینہ جانے لگیں توظالموں نے ان کی سواری کو پیٹا اورانہیں سواری سے گرادیا۔جس کے نتیجہ میں ان کاحمل ضائع ہوگیا۔اوردیر تک بیمار رہیں (الاستیعاب فی معرفة الاصحاب کتاب النساء باب الزای ) سواللہ تعالیٰ فرماتا ہے کہ یہ لوگ تجھے تیری لڑکیوں کے ذریعہ سے دکھ دے چکے ہیں۔اورپھر بھی دیں گے۔(حضرت زینبؓ کاواقعہ بعد میں ہوا)ان لوگوں نے لوط ؑ کے دشمنوں جتنی بھی شرافت نہیں دکھا ئی مگر ہمیں تیری جان ہی کی قسم یہ اپنی شرارت میں اندھے ہورہے ہیں اوراس دعویٰ کی تائید میں ہم تیری زندگی کو بطورشہادت پیش کرتے ہیں۔یعنے تونے ان کو کوئی دکھ نہیں دیا۔بلکہ ہمیشہ ان کی خیر خواہی کی۔مگریہ بلاوجہ اوربغیر قصور کے تجھے دکھ دیتے ہیں۔پس یہی ثبوت ہے کہ یہ جوش مخالفت سے اندھے ہو رہے ہیں۔اورہرگز خدا تعالیٰ کاتقویٰ ان کو حاصل نہیں۔پس جب ان کی یہ حالت ہے کہ تجھ پر بلاوجہ اس قدر ظلم کررہے ہیں۔توہم نے لوط کے دشمنوں کو جب اس سے کم جرم پر تباہ کیا۔توکیا اس سے بڑے ظلم پر انہیں سزانہ دیں گے؟اس آیت کا تعلق سورۃ کے اصل مضمون سے یہ ہے۔کہ یہ لوگ تجھ پرنازل ہونے والے کلام کومشتبہ کرنے کے لئے ایسی گندی حرکات کرتے ہیں۔گویا اپنے خیا ل میں یہ سمجھتے ہیں۔کہ تیری لڑکیوں کو دکھ دیاتوتیراجھوٹاہوناثابت
ہوگیا۔حالانکہ اصل میں انجا م دیکھا جاتاہے۔ہم اپنے کلام کی عظمت دکھانے کے لئے اوراسے اعتراضوں سے محفوظ رکھنے کے لئے ایک دن ان کو تباہ و برباد کردیں گے اورتیرابدلہ لے کر تیری عزت کوقائم کردیں گے۔اَللّٰھُمَّ صَلِّ عَلیٰ مُحَمَّدٍ وَعَلَی آلِ مُحَمَّدٍ وَبَارِکْ وَسَلّم اِنَّکَ حَمِیْدٌ مَجِیْدٌ۔فَدَتْ نَفْسِیْ وَرُوْحِیْ عَلَیْکَ یَامُحَمَّدُ قَدْاُوْذِیْتَ کَثِیْرًا فِی اَعْلَاءِ کَلِمَۃِ اللہِ رَفَعَ اللہُ شَأنَکَ وَاَحْیَا ذِکْرَ کِ اِلیٰ اَبَدِالْاَبادِ۔فَاَخَذَتْهُمُ الصَّيْحَةُ مُشْرِقِيْنَۙ۰۰۷۴ اس پر اس( موعود) عذاب نے دن چڑھتے (ہی)انہیں پکڑلیا۔حلّ لُغَات۔الصَّیْحَۃُ۔الصَّیْحَۃُ اَلْعَذَابُ صیحۃٌ کے معنی عذاب کے ہیں۔الْغَارَۃُ اِذَا فُوْجی ءَ الحیُّ بھَا(اقرب)۔ایسی غارت جو قبیلہ پر اچانک آجا ئے۔مُشْرِقِیْنَ:مُشْرِقِیْنَ اَشْرَقَ سے اسم فاعل کاصیغہ مُشرِقٌ آتاہے اور مُشْرِقُوْنَ اس کی جمع ہے اور اَشْرَقَتِ الشَّمْسُ کے معنے ہیں طَلَعَتْ۔سورج نکل آیا۔اَضَاءَتْ سورج کی روشنی پھیل گئی۔وَقِیْلَ شَرَقَتِ الشَّمْسُ طَلَعَتْ وَاَشْرَقَتِ الشَّمْسُ اَضَاءَتْ وَصَفَا شُعَاعُہَا۔اورجب سورج کے لئے شَرقَتْ (ثلاثی مجرد)کہیں۔تو اس کے معنے ہوں گے کہ سورج نکل آیا۔اورجب اَشْرَقَتْ (ثلاثی مزید)استعمال کریں۔تواس کے معنی ہوں گے کہ سورج کی روشنی خوب پھیل گئی۔اَشْرَقَتِ الْاَرْضُ۔اَنَارَتْ بِاِشْرَاقِ الشَّمْسِ۔سورج کے طلوع ہونے سے زمین پر روشنی پھیل گئی۔اَشْرَقَ الرَّجُلُ۔دَخَلَ فِیْ شُرُوْقِ الشَّمْسِ۔اس پرطلو ع آفتاب کا وقت آگیا۔(اقرب) تفسیر۔پہلے مُصْبِحِیْنَ فرمایا اور اس آیت میں مُشْرِقِیْنَ پہلے مُصْبِحِیْنَ فرمایاتھا۔اب یہاں مُشْرِقِیْنَ فرمایا ہے۔بظاہر یہ اختلاف معلوم ہوتاہے۔کیونکہ مُشْرِقٌ کے معنے ہیں جس پر سورج نکل آئے اورمُصْبِحٌ کے معنے بظاہر طلوع آفتاب کے وقت میں داخل ہونے والے کے ہیں۔مُصْبِحِیْنَ اور مُشْرِقِیْنَ میں کوئی اختلاف نہیں لیکن حقیقتاً کوئی اختلاف نہیں کیونکہ صبح پوپھٹنے سے لے کر طلوع آفتا ب تک کوبھی کہتے ہیں۔اوراول النہار یعنے دن کے پہلے حصہ کو بھی کہتے ہیں۔پس دونوں لفظ درست ہیں۔چونکہ سورج نکلتے وقت یہ واقعہ ہواتھا(پیدائش باب۱۹ آیت ۲۳) اس لئے مُصْبِحِیْنَ کہنا بھی درست ہے
اورمشرقین کہنا بھی۔فَجَعَلْنَا عَالِيَهَا سَافِلَهَا وَ اَمْطَرْنَا عَلَيْهِمْ حِجَارَةً مِّنْ جس پر ہم نے اس (بستی )کی اوپر والی سطح کو اس کی نچلی سطح کردیااوران پر سنگریزوں سے بنے ہوئے پتھروں کی سِجِّيْلٍؕ۰۰۷۵ بار ش برسائی۔حلّ لُغَات۔اَمْطَرَ۔اَمْطَرَ مَطَرَ سے ثلاثی مزید ہے۔اور اَمْطَرَتِ السَّمَآءُ کے معنے ہیں۔مَطَرَتْ أَیْ اَصَابَتْھُمْ بِالْمَطَرِ مینہ برسا وَ قِیْلَ مَطَر فِی الْخَیْرِ وَالرَّحْمۃِ وَاَمْطَرَفِی الشَّرِّ وَالْعَذَابِ اوربعض کہتے ہیں کہ مَطَرَ (ثلاثی مجرد)خیر اورحمت میں استعمال ہوتاہے اوراَمْطَرَ(ثلاثی مزید)شرّاورعذاب میں (اقرب) سِجِّیْل: سِجِّیْلٌ سَجَلَ سے ہے۔اورسَجَل بِہٖ سَجْلًا کے معنے ہیں رَمیٰ بِہٖ مِنْ فَوْقَ۔اس کو اوپر سے پھینکا۔سَجَلَ الْمَآءَ:صَبَّہٗ پانی کو گرایا۔اور السِّجِّیْلُ کے معنی ہیں حِجَارَۃٌ کَالْمَدَرِ سنگریزے۔وَقِیْلَ مُعَرَّبَۃٌ اوربعض لوگ کہتے ہیں کہ یہ لفظ معرّب ہے(اقرب)(یعنی غیر زبان کا ہے۔لیکن جیساکہ رعد حل لغات آیت نمبر ۱۹ زیر لفظ جہنم اورابراہیم آیت نمبر۳۶ ز یرلفظ صنم بتایاگیاہے کہ جن الفاظ کا مادہ عربی میں استعمال ہوتاہے ان کو معرّب کہنا درست نہیں۔پس یہ بھی معرّب نہیں) تفسیر۔لوط ؑ کی قوم پر سخت عذاب آنے کی وجہ لوط ؑکی قوم نے چونکہ اعلیٰ اخلاق چھوڑکر ادنیٰ اخلاق اختیار کئے تھے۔اس لئے خدا تعالیٰ نے بھی ان کے شہر کے اوپر کے حصہ کو نیچے کردیا اورکہاکہ جائو۔پھر نیچے ہی رہو۔بعض لوگ کہتے ہیں۔پتھر کیونکر گرے۔اس کا جواب یہ ہے۔کہ شدید زلزلہ سے بعض دفعہ زمین کا ٹکڑا اوپر اٹھ کر پھر نیچے گرتاہے۔ایسا ہی اس وقت ہوا۔زمین جو پتھریلی تھی۔اوپر اُٹھی اورپھر دھنس گئی اوراس طرح وہ پتھروں کے نیچے آگئے۔یہ بھی مراد ہوسکتی ہے کہ ان کے گھروں کی دیواریں ان پر آپڑیں۔معلوم ہوتاہے وہ لوگ پتھروں سے مکان بنایاکرتے تھے۔سجیل کہتے بھی ہیں اس پتھر کو جوگارہ سے ملا ہواہو۔پس یہ ایسی دیواروں پر خوب چسپاں ہوتا ہے جن میں پتھرگارہ سے لگائے گئے ہوں۔
اِنَّ فِيْ ذٰلِكَ لَاٰيٰتٍ لِّلْمُتَوَسِّمِيْنَ۰۰۷۶ اس (ذکر) میں فراست سے کام لینے والوں کے لئے یقیناً کئی نشان (موجود )ہیں۔حلّ لُغَات۔متوسمین۔مُتَوَسِّمِیْنَ تَوَسَّمَ سے اسم فاعل کاصیغہ مُتَوَسّمٌ آتاہے اورمُتَوَسِّمُوْنَ اس کی جمع ہے اورتَوَسَّمَ الشَّیْءَ کے معنے ہیں تَخَیَّلَہٗ وَ تَفَرَّسَہٗ۔اس پر غور کیا سوچ کر اس کی حقیقت کو معلوم کیا۔طَلَبَ وَسْمَہُ۔اَیْ عَلَامَتَہٗ۔کسی چیز کی علامت دریافت کی۔تَعَرَّ فَہٗ۔کسی چیزکوپہچاننے کی کوشش کی۔یُقَالُ تَوَسَّمْتُ فِیْہِ الْخَیْرَ۔اَیْ تَبَیَّنْتُ فِیْہِ اَثْرَہٗ۔جب تَوَسَّمْتُ فِیْہِ الْخَیْرَ۔کامحاورہ استعمال کریں تومعنے یہ ہوں گے کہ میں نے خیر کے نشان اس میں پائے (اقرب)پس اِنَّ فِيْ ذٰلِكَ لَاٰيٰتٍ لِّلْمُتَوَسِّمِيْنَ کے معنے ہوں گے کہ اس میں غورکرنے والوں کے لئے کئی نشان ہیں۔تفسیر۔حضرت لوط ؑ کے واقعہ سے آنحضرت ؐ کے منکرین کو انتباہ یعنی جولوگ فراست سے کام لیتے ہیں ان کے لئے اس واقعہ میں نشانات ہیں۔یعنے وہ دیکھ سکتے ہیں کہ لوط کے واقعہ کو محمد رسو ل اللہ صلی اللہ علیہ وسلم کے واقعات سے مشابہت ہے۔پس آپ کے دشمنوں کو بھی اسی طرح تباہ کیاجائے گا۔جس طرح حضرت لوط کے دشمنوں کو تباہ کیاگیا۔محمد رسول اللہ صلی اللہ علیہ وسلم کے دشمنوں کوزلزلہ کا نشانہ تونہ بننا پڑا۔مگر بدر کی جنگ میں ان پر پتھر پڑے یعنی آندھی چلی اورکنکر اُڑ اُڑ کرکفار کی آنکھو ں میں گھُس گئے۔جن کی وجہ سے وہ نشانہ درست نہ لگاسکتے تھے۔(دلائل النبوۃ للبیہقی باب التقاء الجمعین و نزول الملائکۃ وما ظھر فی رمی النبی بالقبضة) نیز معنوی طور پر بھی یہ سلوک ان سے ہوا۔کہ بڑے چھوٹے کردیئے گئے اورچھوٹے بڑے۔گویااوپر کاطبقہ نیچے آگیا اورنیچے کااوپر چنانچہ ابوجہل۔عتبہ۔شیبہ وغیر ہ اور ان کے خاندان تباہ ہوگئے۔اورابوبکر ؓعمرؓ وغیرہ جوان سے چھوٹے سمجھے جاتے تھے بادشاہ بن گئے۔حضرت عمرؓ کی خلافت میں اس قسم کا عجیب نظارہ نظرآتاہے۔آپ حج کے لئے تشریف لے گئے۔توعمائدین مکہ ملنے آئے۔آپؓ نے غلام صحابہؓ کو صدر کے قریب جگہ دی اوران کو پیچھے بٹھایا۔انہوں نے باہر نکل کر شکایت کی کہ آج ہمیں ذلیل کیا گیاہے۔توخود ان میں سے بعض نے کہا کہ یہ ہمارے اعمال کا نتیجہ ہے۔جب ہمارے باپ دادے محمد رسول اللہ کی مخالفت کررہے تھے تویہ لو گ آپؐ پر ایمان لاکر قربانیاں کر ر ہے تھے۔اب تویہی عز ت کے مستحق ہیں۔(مناقب امیر المومنین عمر بن الخطاب ؓ از ابی الفرج
عبد الرحمن بن علی بن محمد ابن الجوزی باب الثامن و الثلاثون فی ذکر عدلہ فی رعیتہ) وَ اِنَّهَا لَبِسَبِيْلٍ مُّقِيْمٍ۰۰۷۷ اوروہ (کوئی گمنام جگہ نہیں بلکہ)ایک بڑے مستقل راستے پر (واقع )ہے۔حلّ لُغَات۔سبیل مقیم۔سَبِیْلٌ مُقِیْمٌ اَیْ بَیِّنٌ وَاضِحٌ (تاج)یعنی واضح بیّن راستہ۔تفسیر۔یعنی ان کی بستیاں ایک ایسے راستہ پر واقع ہیں جو اب تک چلتاہے مٹانہیں۔اس وجہ سے اے کفار! تمہارے قافلے شام کو آتے جاتے عین اس کے پاس سے گذرتے ہیں۔پھر تم عبرت نہیں حاصل کرتے۔حضرت لوط ؑ کی بستیاں عین اس راستہ پر واقع ہیں جو عرب سے شام کو جاتاہے۔اِنَّ فِيْ ذٰلِكَ لَاٰيَةً لِّلْمُؤْمِنِيْنَ۰۰۷۸ اس (واقعہ )میں مومنوں (کے فائدہ)کے لئے یقیناً ایک نشان(موجود )ہے۔تفسیر۔آنحضرت ؐ کے زمانہ کے عذاب کو لوط ؑکے زمانہ کے عذاب سے مشابہت اس آیت میں مومنوں کے لئے اسے نشان قراردیاہے۔جب کہ پہلی آیت کو متوسّمین کے لئے نشان قرار دیاتھا۔یہ فرق اس لئے ہے کہ پہلی آیت میں یہ ذکر تھا۔کہ اس واقعہ کو محمد رسول اللہ صلی اللہ علیہ وسلم کے واقعہ سے مشابہت ہے چونکہ اس مشابہت کو ہرشخص نہیں معلوم کرسکتا۔بلکہ خاص فراست والے معلو م کرسکتے ہیں۔کیونکہ باریک مضمون ہے اس لئے متوسّمین کالفظ استعمال کیا۔لیکن اس آیت میں یہ ذکر ہے کہ و ہ بستیاں ایک چلتے ہوئے راستہ پر ہیں۔اورایک تباہ شدہ بستی سے عبرت حاصل کرنا کوئی باریک مضمو ن نہیں بلکہ صرف دل کی خشیت سے تعلق رکھتاہے۔یہ اس لئے فرمایا کہ اس سےمومن فائدہ اٹھاسکے۔وَ اِنْ كَانَ اَصْحٰبُ الْاَيْكَةِ لَظٰلِمِيْنَۙ۰۰۷۹ اوراَیکہ والے (بھی)یقیناً ظالم تھے۔حلّ لُغات۔اَلْاَیْکَۃُ:اَلاَیْکَۃُ اَلاَیْکُ الشَّجَرُ الْکَثِیْرُ الْمُلْتَفُّ وَقِیْلَ الْغَیْضَۃُ تُنْبِتُ
السِدْرَ وَالْاَرَاکَ وَنَحْوَھُمَا۔اَلْوَاحِدُ اَیْکۃٌ۔ایکۃ ایک کی مفرد ہے اوراس کے معنے گھنے درخت کے ہوتے ہیں اورنیز ایسے جنگل کے جس میں بیر ی اورپیلو کے درخت بکثرت ہوں۔(اقرب) تفسیر۔اصحاب الایکہ حضرت شعیبؑ کی قوم کا نام ہے اصحاب الایکہ حضرت شعیب کی قوم کادوسرانام ہے۔ایکہ گھنے درخت کو بھی کہتے ہیں۔اورایسے جنگل کو بھی جس میں بیری اورپیلو کے درخت بکثرت ہوں معلوم ہوتا ہے کہ مدین کے پاس کوئی گھنا جنگل تھا۔جس میں ان دونوں قسموں کے درخت بکثرت پائے جاتے تھے۔مدین کے باشندوں کو اصحاب الایکہ کہے جانے کی وجہ اس وجہ سے مدین کے باشندے اصحاب الایکہ کہلاتے تھے اورغالباً یہ نام عربوں نے رکھاتھا۔جن کے قافلے مصر اورشام کو جاتے ہوئے مدین کے پاس سے گذرتے تھے اوراسی جنگل میں سے ان کا راستہ گزرتاتھا۔اس لئے عربوں پر اتمام حجت کے لئے اسی نا م کو جو ان میں زیادہ معروف تھا استعمال کیا۔حضرت شعیب کی قوم کے اصحاب الایکہ ہونے کا قرآن مجید سے ثبوت قرآن کریم سے ثابت ہے کہ اصحاب ایکہ حضرت شعیب کی قوم تھی چنانچہ سورئہ شعراء میں فرماتا ہے کَذَّبَ اَصْحَابُ الْاَیْکَۃِ الْمُرْسَلِیْنَ اِذْقَالَ لَھُمْ شُعَیْبٌ اَلَا تَتَّقُوْن اِنِّیْ لَکُمْ رَسُوْلٌ اَمِیْنٌ (الشعراء :۱۷۷۔۱۷۹) یعنے اصحاب ایکہ نے بھی رسولوں کاانکار کیا جبکہ ان سے شعیب نے کہا کہ کیا تم تقویٰ نہیں کرتے۔میں تمہاری طر ف رسول ہوکر آیاہوں۔اس آیت سے ثابت ہوتاہے کہ اصحاب الایکہ حضرت شعیب کی قوم تھی۔لیکن دوسری جگہ حضرت شعیب کو مدین کی طرف رسول بتایا گیاہے۔جیسا کہ فرمایا وَاِلیٰ مَدْیَنَ اَخَاھُمْ شُعَیْبًا (ہود :۸۵نیز الاعراف ۸۶و العنکبوت ۳۷) ہم نے مدین قوم کی طر ف ان کے بھائی شعیب کو رسول بنا کر بھیجا تھا۔اب سوال یہ ہے کہ کیا شعیب نام کے دونبی تھے یاحضرت شعیب دوقوموں کی طرف مبعوث ہوئے تھے مدین والوں کی طرف بھی اوراصحاب ایکہ کی طرف بھی ؟ مدین والے اور اصحاب الایکہ ایک ہی نسل کے دو حصے تھے میری تحقیق یہ ہے کہ ایک ہی نسل کے دوحصے تھے کچھ لوگوں کا گذارہ شہر ی تجارت پر تھا۔اور کچھ لوگوں کادودھ گھی اون فروخت کرنے پر گذارہ تھا۔اورایسے شہروں میں جو جنگل کے سروں پرہوتے ہیں یہ بات کثرت سے دیکھی جاتی ہے۔مدین کے پاس جنگل کے ہونے کا ثبوت جغرافیہ سے یہ سوال کیا جاسکتا ہے کہ کیاواقع میں مدین کے پاس کوئی ایسا جنگل تھاجس میں بیری اورپیلو کے درخت پائے جاتے تھے۔کیونکہ ایسی بات قیاس سے نہیں بتائی
جاسکتی۔اس کا جواب یہ ہے کہ ہاں! جغرافیوں سے اس کا پتہ ملتا ہے۔چنانچہ مولوی سلیمان صاحب ندوی اپنی کتاب ارض القرآن میںبرٹن کی کتاب بولڈمائنز آف مدین کے حوالہ سے لکھتے ہیں۔کہ ایک یونانی جغرافیہ نویس لکھتاہے ’’خلیج عیلانہ(عقبہ)کے پیچھے جس کے چاروں طرف نبطی عرب رہتے ہیں۔(ارض مدین یہ ہے)یوتیمانوس (بنوتیمن)کاملک ہے جو وسیع اورمسطح ہے۔اورسیراب اورعمیق ہے۔وہاں نباتات اوراشجار کے سوا کچھ نہیں ہوتا۔جوتابقد آدم ہوتے ہیں۔اورجن کی وجہ سے جنگلی اونٹ ہرنوں کے گلے اور بارہ سنگے رہتے ہیں۔اورنیز مویشی اوربھیڑ کے گلے۔مگر ان مواہب قسمت کے ساتھ شیر اوربھیڑیوں کاوجود بھی ہے۔جن سے یہاں کے باشندوں کی خوش قسمتی مبدل بہ بدقسمتی ہے ‘‘(جلد ۲ صفحہ ۲۴)۔اس حوالہ سے ظاہر ہے کہ مدین کے پاس (مدین خلیج عقبہ کے سر پر واقع ہے)ایک جنگل تھا جس میں (۱)قد آدم درخت تھے اورپیلو اورجنگلی بیر قدآدم ہی ہوتے ہیں۔(۲)وہاں جنگلی اونٹ رہتے تھے۔یہ بھی پیلو اوربیر کے درختوں کی تصدیق کرتاہے کیونکہ اونٹ اسی قسم کے درختوں پر گذران کرتے ہیں (۳)اس میں مواشی اوربھیڑوں کے گلے رہتے تھے۔اس سے معلوم ہوتاہے کہ مدین کی قوم جانوربھی پالتی تھی اوراسی جنگل میں انہیں چرایاکرتے تھے۔مدین قوم کا نام بھی تھا اور شہر بھی مدین نام اس شہر کا جو ایکہ کے سر پر تھا مدین قوم کی وجہ سے پڑاتھا۔پس شہر کانام بھی مدین تھا اورقوم کانام بھی مدین تھا۔چنانچہ قرآن کریم نے دونوں معنوں میں اس لفظ کو استعمال فرمایا ہے۔قوم کے معنے میں سورئہ ہودمیں ہے۔وہاں فرماتا ہےوَ اِلٰى مَدْيَنَ اَخَاهُمْ شُعَيْبًا (ہود:۸۵نیز الاعراف :۸۶و العنکبوت :۳۷)اورشہر کے معنوں میں توبہ میں فرماتا ہے وَ اَصْحٰبِ مَدْيَنَ وَ الْمُؤْتَفِكٰتِ (التوبۃ : ۷۰)یعنی کیا ان کو مدین شہرکے رہنے والوں اوران بستیوں کی خبر نہیں پہنچی جن کو اُلٹادیاگیاتھا (یعنی قوم لوط کی بستیاں) مدین قوم حضرت ابراہیم ؑ کی نسل سے تھی یہ مدین قوم حضرت ابراہیم علیہ السلام کی نسل سے تھی بائبل میں لکھاہے۔’’اورابراہیم نے ایک اورجوروکی۔جس کانام قتورہ تھا۔اوراس سے زمران اوریقسان اورمدان اورمدیان اوراسباق اورسوخ پیداہوئے۔اوریقسا ن سے صباء اوردوان پیداہوئے۔اوردوان کے فرزندا سوری اورلطوسی اور لومی تھے۔اورمدیان کے فرزند عیفہ اورغفر اورحنو ک اورابیداع اور الدوعاتھے۔اوریہ سب بنو قتورہ تھے۔(پیدائش باب ۲۵ آیت اتا۴) اس حوالہ سے معلو م ہوتاہے کہ مدین حضرت ابراہیم علیہ السلام کے بیٹے تھے۔اوران کی بیوی قتورہ کے پیٹ سے پیداہوئے تھے۔چونکہ اس جگہ صرف یقسان اورمدیان کی اولاد گنائی گئی ہے۔معلوم ہوتا ہے کہ دوسرے لڑکوں
کی اولاد نہیں ہو ئی یا ان کی اولاد زیاد ہ نہیں پھیلی اور بھائیوں کی اولاد کے ساتھ مل جل گئی۔یقسان جو بڑے لڑکے تھے ان کی نسل میں سے ان کے لڑکے دوان کی نسل بھی ایک قبیلہ کی صورت میں مشہو رہے۔اوریہ لوگ مدین یعنی چچا کی اولاد کے ساتھ ساتھ رہاکرتے تھے۔چنانچہ مصنف ارض القرآن کاخیال ہے۔کہ اصحاب الایکہ دوان قو م ہی کے لوگ تھے جو مدین کے ساتھ ہی ایکہ میں رہتے تھے (جلد ۲ صفحہ ۲۱،۲۲)۔اورگویا بمنزلہ ایک ہی قوم کے تھے میرے نزدیک یہ رائے معقو ل ہے۔بشرطیکہ یہ سمجھا جائے کہ دونوں قومیں مل کررہتی تھیں۔اوران کا ایک ہی قسم کاتمدن تھا۔تجارت پیشہ بھی تھے اورجانوروں کے گلے بھی پالتے تھے۔یہ نہیں کہ ایک حصہ تجارت پیشہ تھا۔جومدین تھے اورایک حصہ جانو ر پالنے والا تھا۔جو دوان تھے اورجنگل میں رہتے تھے۔کیونکہ یہ قرآن کریم کے بیان کے خلاف ہے۔بہرحال اصل قوم بنو قتورہ تھی۔جوایک ماں اورباپ سے تھے۔باقی تواندرونی تقسیمیں تھیں۔بائبل سے معلوم ہوتا ہے کہ آخر یہ قوم بنو اسماعیل کے اندر جذب ہوگئی تھی کیونکہ پیدائش باب ۳۷۔آیت ۳۶ میں پہلے تو لکھا ہے کہ حضرت یو سف کو مدیانیوں نے فوطیمار کے پا س مصر میں فروخت کردیا۔اورپھر باب ۳۹ میں لکھا ہے کہ فوطیفار مصری نے یوسف کو اسماعیلیوں کے ہاتھ سے خریدا (آیت ۱)۔اس سے معلو م ہوتا ہے کہ حضرت موسیٰ علیہ السلام کے زمانہ سے پہلے یہ قوم بنو اسماعیل میں جذب ہوگئی تھی۔اور وہی قوم کبھی مدیانی کہلاتی تھی۔اور کبھی اسماعیلی۔مدین قوم کا زمانہ باقی رہے یہ سوال کہ یہ قوم کب ہوئی۔اورشعیب کون تھے؟ان سوالات کے جواب مفسرین اورمؤرخین نے مختلف دیئے ہیں ان کے لئے دیکھو سورہ اعراف ع ۱۸؍۱۱۔اصحاب مدین اور اصحاب الایکہ کے ایک ہونے کا ثبوت قرآن سے یہ امر کہ اصحاب مدین اور اصحاب ایکہ ایک ہی جماعت یاقوم تھے۔اس امر سے بھی ثابت ہوتاہے کہ قرآن کریم نے ان دونوں کے عیوب ایک ہی قسم کے گنائے ہیں۔سورئہ اعراف میں مدین قوم کی نسبت آتاہے۔فَاَوْفُوا الْكَيْلَ وَ الْمِيْزَانَ وَ لَا تَبْخَسُوا النَّاسَ اَشْيَآءَهُمْ وَ لَا تُفْسِدُوْا فِي الْاَرْضِ بَعْدَ اِصْلَاحِهَا(الاعراف :۸۶)ماپ اورتول پورے دیاکرو اورلوگوں کو چیزیں تول کر دیتے وقت کمی نہ کیا کرو۔اورزمین میں اصلاح کے بعد فساد نہ کرو۔بعینہٖ یہی الفاظ اصحاب ایکہ کی نسبت ہیں۔جن کا ذکر سورہ شعراء میں آتاہے انہیں مخاطب کرکے بھی حضرت شعیب فرماتے ہیںاَوْفُوا الْكَيْلَ وَ لَا تَكُوْنُوْا مِنَ الْمُخْسِرِيْنَ۔وَزِنُوْا بِالْقِسْطَاسِ الْمُسْتَقِيْمِ۔وَ لَا تَبْخَسُوا النَّاسَ اَشْيَآءَهُمْ وَ لَا تَعْثَوْا فِي الْاَرْضِ مُفْسِدِيْنَ (الشعراء :۱۸۲۔۱۸۴) یعنی وزن پورادیا کرو۔اورلوگوں کو گھاٹانہ دیا کرو۔اورسیدھی ڈنڈی سے تولا کر واورلوگوں کی