سُوْرَۃُ بَنِیْٓ اِسْرَآءِیْلَ
تفسیر کبیر (جلد ۶), حصہ 2
سے ثابت ہے۔واقعاتی شواہد کہ معراج اور اسراء الگ الگ واقعات ہیں تاریخی شہادت کے درج کرنے کے بعد اب میں واقعاتی شواہدسےثابت کرتا ہوں کہ یہ دونو واقعات الگ الگ ہیں۔(۱)پہلی گواہی ا س بارہ میں خود قرآن کریم کی ہے۔قرآن کریم میں سورئہ نجم میں معراج کے واقعہ کو بیان کیاگیا ہے اوراس میں کوئی ذکر بیت المقدس کی طر ف جانے کانہیں۔اس کے مقابل پر سورئہ اسرائیل میں بیت المقدس تک جانے کا ذکر ہے۔اورآسمان پر جانے کاکوئی اشارہ تک نہیں۔اس سے صاف معلوم ہوتاہے کہ دونو واقعات الگ الگ ہیں۔اس لئے ان کے اکٹھابیان کرنے کی کوئی ضرورت نہیں سمجھی گئی۔ورنہ یہ نہایت قابل تعجب امر ہے کہ ایک ہی واقعہ کا آخری حصہ توچھ سال پہلے قرآن کریم میں بیان کیاگیا۔اوراس کا پہلاحصہ چھ سال بعد بیان کیا گیا۔شب اسراء آنحضرت ؐ امّ ہانی کے گھر تھے (۲)دوسراگواہ واقعات میں سے ان دونوں امورکے الگ الگ ہونے کا یہ ہے کہ اس واقعہ کاموقعہ کاگواہ صرف ایک ہے اوروہ امّ ہانی ہیں۔آپ اس رات جب یہ واقعہ پیش آیا ہے امّ ہانی کے ہاں ہی سوئے تھے۔وہ فرماتی ہیں کہ سب سے پہلے مجھے رسول کریم صلی اللہ علیہ وسلم نے اسراء الی بیت المقدس کا واقعہ سنایاتھا اورصبح کے وقت دوسرے لوگوں سے ذکرکرنے سے پہلے سنایاتھا۔اورمیں نے اس خیا ل سے کہ لوگ اس واقعہ کے عجیب ہونے کے سبب ا س کاانکار کریں گے اورمخالفت میں ترقی کرجائیں گے آپ کو لوگوں کے سامنے اس کے بیان کرنے سے باز رکھنے کی بھی کوشش کی تھی مگر آپ نے میری یہ بات نہ مانی (خصائص الکبریٰ جلد ۱ )۔یہ گواہ جو موقعہ کاگواہ ہے اورجس سے آنحضرت صلی اللہ علیہ وآلہ وسلم نے سب سے پہلے یہ واقعہ بیان کیا ہے اس سے کم سے کم سات محدثین نے اپنی اپنی کتب میں اس واقعہ کے متعلق روایت کی ہے۔اورچار مختلف راویوں کے ذریعہ روایت نقل کی ہے۔مگران چاروں روایتوں میں صرف اتنابیان ہے کہ رسول کریم صلی اللہ علیہ وسلم نے فرمایا کہ میں بیت المقدس تک جاکر راتوں رات واپس آگیاہوں۔اگرآپ آسمان پر جانے کا ذکر بھی اس وقت فرماتے تو ام ہانی جو سب سے پہلی گواہ ہیں۔وہ کسی نہ کسی موقعہ پر توبیت المقدس سے آسمان پر جانے کا ذکر کرتیں۔مگر وہ جب ذکرکرتی ہیں اورجس کے پاس ذکر کرتی ہیں یہی کہتی ہیں کہ رسول کریم صلی اللہ علیہ وسلم نے فرمایا کہ میں بیت المقدس تک جاکر واپس آیا ہوں۔اس سے بھی صاف ظاہر ہے کہ بیت المقدس تک جانے کاواقعہ اَورہے اور معراج الی السماء کاواقعہ اورہے۔
(۳)تیسری شہادت واقعات سے یہ ہے کہ وہ راوی جنہوں نے اس واقعہ کو بیان کیا ہے ان میں سے بعض تو وہ ہیں کہ جنہوںنے سیدھاآسمان پر جانے کا ذکر کیا ہے۔بیت المقدس تک جانے کا ذکرنہیں کیا۔اوربعض وہ ہیں۔کہ جنہوں نے بیت المقدس تک جاکر پھر آسمان پر جانے کا ذکرکیا ہے۔بعض ایسے ہیں کہ جنہوں نے بیت المقدس تک جانے کا ذکر کیا ہے آگے آسمان تک جانے کاکوئی ذکر نہیں کیا۔لیکن ایک خاصی تعداد ایسے لوگوں کی ہے جنہوںنے صاف کہا ہے کہ آپ بیت المقدس سے فارغ ہو کر مکہ واپس تشریف لے آئے۔یہ ظاہر ہے کہ جنہوں نے سیدھا آسمان پر جانے کا ذکرکیا ہے ان کی شہادت بھی یہی ہے کہ معراج کاواقعہ ایک الگ واقعہ ہے۔کیونکہ اگر آپ گھر سے سیدھے آسمان کی طرف لے جائے گئے تھے توبیت المقد س راستہ میں پڑہی نہیں سکتا۔یہ راوی انس۔مالک بن صعصہ اورابوذر ہیں۔ابوذران صحابہ میں سے ہیں جوابتدائی ایام میں اسلام لائے تھے اوراس واقعہ کے شرو ع کے سننے والوں میں سے تھے۔شب اسراء میں آنحضرت ؐ صرف بیت المقدس تک گئے اسی طرح جنہوں نے بیت المقدس تک ہی جانے کا ذکر کیا ہے آگے آسمان پر جانے کا ذکر نہیں کیا۔ان کی شہادت سے بھی یہی ثابت ہوتا ہے کہ بیت المقدس کی طرف جب اسراء ہواہے اس وقت آنحضرت صلعم آسمان پر تشریف نہیں لے گئے ورنہ یہ کس طرح ممکن ہے کہ اسراء کاواقعہ تووہ لوگ بیان کرتے لیکن اس کے اہم ترین جزو کو یعنے آسمان پر جانے اور اللہ تعالیٰ سے ہم کلام ہونے اور اس کا دیدار کرنےکے حصہ کو چھوڑ دیتے۔اس قسم کی روایت کر نے والے انس ؓ اورعبداللہ بن مسعودؓ ہیں اور عبداللہ بن مسعودؓ بھی ان صحابہ میں سے ہیں جو شروع میں اسلام لائے اورہروقت آپ کے ساتھ رہے۔وہ روایات جن سے ثابت ہے کہ آپ ؐ صرف بیت المقدس گئے تیسری قسم کی روایتیں جن سے صاف معلو م ہوتا ہے کہ آپ صرف بیت المقدس تک گئے اورپھر واپس تشریف لے آئے۔وہ توظاہرہی ہے کہ اس امر کی بیّن دلیل ہیں کہ بیت المقدس کے اسراء کے ساتھ آسمان کامعراج نہیں ہوا۔بلکہ ا س با رآپ صرف بیت المقدس تک لے جائے گئے تھے۔ان احادیث کے راوی عبداللہ بن مسعودؓ۔ابن عباس ؓ۔شداد بن اوسؓ۔امّ ہانیؓ۔حضرت عائشہؓ اور حضرت امّ سلمہؓ ہیں۔ان میں سے عبداللہ بن مسعود کا ذکر میں نے اوپر کردیا ہے۔عبداللہ بن عباسؓ۔حضرت عباس کے لڑکے ہیں جوآنحضرت صلعم کے چچا تھے۔اوربوجہ اس کے کہ یہ واقعہ گھر میں پیش آیا تھا ان کو اس کے صحیح حالات جاننے کاسب سے بہتر موقعہ تھا۔حضرت عائشہ ؓ اورامّ سلمہ ؓ آنحضرت صلعم کی ازواج مطہرات میں سے ہیں اوراس واقعہ کی بہترین شاہد ہوسکتی ہیں۔پھرامّ ہانیؓ ہیں جن کے گھرمیں یہ واقعہ
گذرا۔اورجن کے سامنے سب سے پہلے رسول کریم صلی اللہ علیہ وسلم نے اس واقعہ کا ذکرکیا (بخاری کتاب الصلوٰۃ ، مسلم کتاب الایمان باب اسراء برسول اللہ،الخصائص الکبریٰ جلد ۱ صفحہ ۱۵۴ تا ۱۵۹ و ۱۷۶ تا ۱۷۹، العصابۃ باب الکنی حرف الذال والعین)۔اس بار ہ میں سب راویو ںکی روایات درج کر نا تومشکل ہے۔بعض روایات بیان کر دیتا ہوں۔حضرت امّ ہانیؓ کہتی ہیں کہ اسرا ء کی صبح رسول کریم صلی اللہ علیہ وسلم نے مجھ سے فرمایا۔امّ ہانی میں نے عشاء کی نما زتم لوگوں کے ساتھ پڑھی۔پھر میں بیت المقدس گیا اوروہاں نماز پڑہی۔اورپھر اب تم لوگوں کے ساتھ صبح کی نماز پڑھ رہاہوں(الخصائص الکبریٰ جلد ۱ صفحہ ۱۷۷)۔حضرت عائشہ ؓ کی روایت یہ ہے کہ جب اسراء کاواقعہ ہو ا۔لوگ دوڑے دوڑے حضر ت ابو بکرؓ کے پا س آئے اوران سے کہا کہ آپ کو معلوم ہے آپ کادوست کیاکہتا ہے۔انہوں نے کہا کیاکہتا ہے۔انہوں نے جواب دیا کہ وہ کہتاہے کہ میں رات بیت المقدس تک ہوکر آیا ہوں اگر معراج کا ذکر ساتھ ہی آپؐ نے کیا ہوتا توکفار اس حصہ پر زیادہ شور کرتے۔مگرانہوں نے صرف یہ کہا کہ آنحضرت صلعم فرماتے ہیں کہ میں رات کو بیت المقدس تک گیاتھا۔پھر جب حضرت ابوبکرؓنے آنحضرت صلعم کی تصدیق کی۔تولوگوں نے کہا۔کیا آپ اس خلاف عقل بات کو بھی مان لیں گے۔توحضرت ابوبکرؓ نے کہا میں تواس کی یہ بات بھی مان لیتاہوں کہ صبح و شام اس پر آسمان سے کلام اترتا ہے (الخصائص الکبریٰ جلد ۱ صفحہ ۱۷۶)۔اس جواب سے بھی صاف ظاہر ہے کہ اس واقعہ کے ساتھ آسمان پر جانے کاکوئی ذکر نہ تھا۔ورنہ آسمان پر خود آنے جانے سے کلام کاآناجانا کسی صورت میں بھی زیادہ عجیب نہیں کہلاسکتا۔اوراس صورت میں حضرت ابوبکرؓکبھی بھی وہ دلیل نہ دے سکتے تھے جو انہوں نے دی۔اورنہ اس جواب کو سن کر معترض چاموش ہوسکتے تھے۔وہ ضرور جواب دیتے کہ تمہارے آقاتوخود آسمان پر جانے کادعویٰ کررہے ہیں اور تم آسمان سے الہام آنے کا اس خبرسے مقابلہ کررہے ہو۔مگرانہوں نے بھی آگے سے ایسا نہیں کہا۔جس سے معلوم ہوتاہے کہ اس وقت آنحضرت صلی اللہ علیہ وسلم نے صرف بیت المقد س تک جانے کا ذکرکیاتھا۔آسمان پرجانے کا اس واقعہ کےساتھ کوئی ذکر نہیں کیا تھا۔عبداللہ بن مسعو دؓ کی روایت میں بیت المقدس میں انبیاء کو نماز پڑھانے کے ذکرکے بعد یہ الفاظ ہیں ثُمَّ انْصَرَفْنَا فَاَقْبَلْنَا۔پھر ہم وہاں سے آگئے اورمکہ کی طرف چل پڑے۔(خصائص ص ۱۶۲ جلد اول) چوتھاشاہد واقعا ت سے اس امر کاکہ واقعہ اسراء الگ واقعہ ہے یہ ہے کہ بعض روایتوں میں جن میں بیت المقدس جانے کے بعد آسمان پر جانے کا ذکر کیا گیاہے وہاں سے واپسی کے وقت بھی بیت المقدس میں اترنے
کا ذکر آتاہے اوروہاں سے پھر مکہ واپس آنے کا ذکر ہے۔(اَخْرَجَہٗ ابْنُ اَبِی حَاتَمٍ عَنْ اَنَسٍ منقول ازخصائص الکبریٰ جلد اول صفحہ ۱۵۴) آسمان سے واپسی پر بیت المقدس سے ہوکر آناخلاف عقل ہے اب ہر عقلمند سمجھ سکتاہے کہ بیت المقدس ہوتے ہوئے آسمان پرجاناتوعقل میں آبھی سکتا تھا۔کیونکہ اس میں یہ مفید غرض تھی کہ آپ اس مقام پر نماز پڑھ لیں جہاںنبیوں کی ایک بڑی جماعت نے خدا تعالیٰ کا پیغام پہنچایاتھا۔مگرجب آپ اس سے فارغ ہوگئے اورآسمان پرتشریف لے گئے توپھر وہاں سے واپسی کیوں بیت المقدس کوہوئی اورکیوں بیت المقدس لاکر آپ کو واپس مکہ پہنچایاگیا۔اگرواپسی کے وقت بھی کوئی ایساکام بتایاجاتا جو آپ نے بیت المقدس میں کیا تب تو بات سمجھ میں آسکتی تھی کہ وہ کام رہ گیا تھا۔اس لئے آپ کو پھر بیت المقد س لایا گیا۔لیکن کسی ایک روایت میں بھی آسمان سے واپسی پر بیت المقدس میں آپ کے کسی کام کے کرنے کا ذکر موجود نہیں۔پھر اس تکلیف دہی کی غرض کیاتھی۔اگرتویہ تسلیم کیا جائے کہ آسمان کوراستہ ہی بیت المقدس سے جاتا ہے اوروہاں کوئی سیڑھی لگی ہوئی ہے تب تو یہ سمجھ میں آسکتاتھاکہ مجبوراً آپ کو وہاں اتارنا پڑا۔لیکن اگریہ بات نہیں ہے اورہر مسلما ن کاعقیدہ یہی ہے کہ ایسانہیں ہے کیونکہ آسمان کی طرف صعود سیڑھیوں کا محتاج نہیں ہے توپھر واپسی کے وقت بغیرکام کے بیت المقدس میں آپ کو اتار نا اورپھر مکہ کی طرف لا نا بالکل خلاف عقل ہے۔میرے نزدیک اس کی ایک ہی تاویل ہوسکتی ہے کہ حضرت انس ؓ نے معراج کا اوراسراء الیٰ بیت المقدس کاواقعہ سنایا ہے راویوں میں سے کسی راوی کے ذہن میں دونوں مضمونوں کا خلط ہوکر ایک واقعہ بن گیا۔ادھر اسے اچھی طرح یا دتھاکہ اسراء کی روایت میں حضرتؐ نے بیت المقدس جانے کابھی اوروہاںسے آنے کابھی ذکرکیا تھا۔اس وجہ سے اس نے مجبوراً یہ سمجھا کہ معراج میں آسمان سے واپسی کے وقت آپ بیت المقدس ہی میں اترے تھے اوروہاں سے پھر مکہ تشریف لے گئے تھے۔اسراء اور معراج کے واقعات میں خلط اورا س کی وجہ اس جگہ یہ سوال پیدا ہوتا ہے کہ اس قدر خلط ہواکیونکر ؟اس کا جواب یہ ہے کہ عربی زبان میں خواہ آسمان پر جانے کا ذکر ہو یا زمین پر سفرکرنے کا اگر رات کو کوئی سفر ہوتو اسے اسراء کہیں گے(اقرب)۔اس وجہ سے معراج کے متعلق بھی اسراء کالفظ بولاجاتاتھا اوربیت المقد س کی طرف جانے کے واقعہ کے متعلق بھی اسراء کالفظ استعمال کیاجاتا تھا کیونکہ یہ دونوں واقعات رات کے وقت ہوئے تھے۔اب ادہر دونوں کے لئے اسراء کالفظ بولاجاتا تھااورادہر ان دونوں نظاروں کی کئی باتیں آپس میں ملتی جلتی تھیں۔مثلاً یہی کہ اس میں بھی براق کا ذکر آتا ہے اوراس میں بھی۔اسرا ء بیت المقدس میں بھی انبیاء سے ملنے
کا ذکرآتاہے اورمعراج میں بھی۔اسراء بیت المقدس میں بھی نماز پڑہانے کا ذکر آتا ہے اورمعراج میں بھی۔اسراء کی بعض روایتو ں میں بھی دوزخ جنت کے بعض نظارے دیکھنے کا ذکر آتاہے اورمعراج کے واقعہ میں بھی۔غرض نام اورکام کی تفصیلات میں ایک حد تک اشتراک پایاجاتاتھا اور روحانی عالم کے عجیب وغریب نظاروں کا ذکر تھا۔اس لئے بعض راویوںکے ذہنوں میں خلط ہوگیا اورانہوں نے دونوں واقعات کوایک ہی سمجھ کر ملاکربیان کرناشروع کردیا۔لیکن جن کاحافظہ زیادہ مضبوط تھا انہوںنے اگرمعراج کاواقعہ صحابی سے سناتھا توروایت شرو ع ہی اس طر ح کی کہ پھر رسول کریم صلی اللہ علیہ وسلم کو گھر سے اٹھاکر آسمان کی طرف لے جایاگیا۔اوراگرانہوں نے صحابی سے اسراء بیت المقدس کاواقعہ سناتھا توانہوں نے بیت المقدس تک کاواقعہ بیان کیا۔آگے آسمان پر جانے کا ذکرنہیں کیا۔معراج اور اسراء دونوں کو صحابہ اسراء کے نام سے پکارتے تھے اس کاثبوت کہ دونوں واقعات کوصحابہ میں اسراء کے نام سے پکاراجاتاتھا۔احادیث سے مل جاتا ہے۔مسند احمد بن حنبل۔بخاری۔مسلم اورابن جریر میں مالک بن صعصہ سے روایت ہے کہ انہوں نے فرمایا۔اَنَّ نَبِیَ اللہِ صَلَّی اللہ عَلَیْہِ وَسَلَّمَ حَدَّثَھُمْ عَنْ لَیْلَۃٍ اُسْرِیَ بِہٖ۔قَالَ بَیْنَـمَااَنَا فِی الْحَطِیْمِ وَرُبَّـمَا قَالَ قَتَادَۃُ فِی الْحِجْرِ مُضْطَجِعٌ اِذَااَ تَانِی آتٍ فَجَعَلَ یَقُوْلُ لِصَاحِبِہِ الْاَوْسَطِ بَیْنَ الثَّلَاثَۃِ فَاَتَانِی فَشَقَّ مَابَیْنَ ھٰذِہٖ اِلٰی وَھٰذِہٖ یَعْنِیْ مِنْ ثُغْرَۃِ نَحْرِہٖ اِلَی شِعْرَتِہٖ فَاسْتُخْرِجَ قَلْبِیْ فَاُتِیْتُ بِطَسْتٍ مِنْ ذَھَبٍ مَمْلُوْءَ ۃٍ اِیْمَانًا وَحِکْمَۃً فَغُسِلَ قَلْبِی ثُمَّ حُشِیَ ثُمّ اُعِیْدَ ثُمَّ اُتِیْتُ بِدَآبَّۃٍ دُوْنَ الْبَغْلِ وَفَوْقَ الْحِمَارِ یَقعُ خَطْوُہٗ عِنْدَ اَقْصٰی طَرْفِہٖ فَـحُمِلْتُ عَلَیْہِ فَانْطَلَقَ بِیْ جِبْرِیْلُ حَتّٰی اَتَی بِیَ السَّمَآءِ الدُّنْیَا۔الخ۔(مسند احمد بن حنبل مسند الشامیین حدیث مالک بن صعصعۃ ) یعنی رسول کریم صلی اللہ علیہ وسلم نے اسراء کاواقعہ ایک دفعہ ہمیں سنایا۔آپ نے فرمایا ایک دفعہ میں حطیم میں سورہاتھا (خانہ کعبہ کاوہ حصہ جوعمارت سے باہرچھوڑاہواہے۔مگر طواف کے وقت اسے بھی طواف میں شامل رکھا جاتاہے)قتادہ جو تیسرے راوی ہیں ان سے اگلاراوی کہتا ہے کہ اب مجھے یہ یاد نہیں کہ قتاد ہ نے حطیم کالفظ بولاتھا یا حجر کا(یہ بھی اسی کانام ہے)خیرتورسول کریم صلی اللہ علیہ وسلم فرماتے ہیں کہ میں وہاں دوآدمیوں کے ساتھ سورہاتھا کہ میرے پاس ایک شخص آیا اوراپنے ایک ساتھی سے کہنے لگا کہ ان تین سونے والوں میں سے جودرمیان میں سورہاہے وہ ہے۔اس پر وہ آگے بڑھا اور میرے اس حصہء بدن سے اس حصہ بدن تک اس نے ایک شگا ف دیا۔آپ نے اس کے ساتھ جگہ بتانے کے لئے دونوں ہنسلیوں کے درمیان کی نرم جگہ سے لے کر ناف کے نیچے تک
ہاتھ سے اشارہ کیا کہ اس حد تک انہوں نے شگاف دیا۔پھر فرمایا کہ شگاف دے کر اس نے میرے دل کو باہر نکا لا۔پھر ایک سونے کی سینی لائی گئی جس میں ایمان اورحکمت بھرے ہوئے تھے۔پھر اس شخص نے پہلے میرادل دھویا پھر میرے اندر وہ نور بھردیاگیا۔پھر ہرچیز اپنی اپنی جگہ پر رکھ دی گئی۔پھر ایک چوپایہ لایاگیا جوگدھے سے اونچا اورخچر سے چھوٹاتھا۔اس کے قد م اس کی حد نظرتک جاکر پڑتے تھے۔مجھے اس جانور پر سوار کردیاگیا اورجبرائیل مجھے لے کر چلے۔یہاں تک کہ ہم پہلے آسمان پر پہنچ گئے۔اسی قسم کی روایت بخاری اورابن جریر میں بھی انسؓ سے بیان کی گئی ہے۔اس میں بھی کہا گیا ہے کہ اسراء کی رات کو رسول کریم صلی اللہ علیہ وسلم کعبہ سے سیدھے آسمان کی طرف لے جائے گئے۔(خصائص جلد اول ص ۱۵۳) اس روایت میں صرف یہ الفا ظ استعمال ہوئے ہیں کہ رسول کریم صلی اللہ علیہ وسلم نے واقعہ اسراء ہم سے بیان کیا۔لیکن آگے بیت المقدس کاکوئی ذکر نہیں بلکہ سیدھا آسمان تک جانے کا ذکر ہے اورساری حدیث میں معراجِ آسمانی ہی کا ذکر ہے جس سے معلو م ہوتاہے کہ صحابہ کبھی اسراء کالفظ بولتے تھے اوران کی مراد صرف معراج ہوتی تھی اس کے برخلاف اس کابھی ثبوت ملتا ہے کہ اسراء کالفظ وہ صرف بیت المقدس کی طرف جانے کے لئے بولتے تھے۔چنانچہ حدیثِ جابرؓمیں جوبخاری اورمسلم میں مروی ہے اسراء کالفظ صرف بیت المقدس تک جانے کے لئے استعمال ہواہے۔(خصائص جلد او ل ص ۱۵۷) اسی طرح شدا د بن اوس کی روایت میں جوطبرانی۔بیہقی اور کئی کتب حدیث نے بیان کی ہے یہ لفظ صرف بیت المقدس تک جانے اوروہاں سے مکہ واپس آنے کے متعلق بولاگیا ہے۔(خصائص جلد او ل ص ۱۵۸و۱۵۹) ان دونوں قسم کی روایات سے ثابت ہوتا ہے کہ صحابہ میں اسراء کالفظ دونوں واقعات کی نسبت مستعمل تھا۔پس اس لفظ کے استعمال اوربعض تفصیلات کے اشتراک کی وجہ سے بعض راویوں کو یہ دھوکا آسانی سے لگ سکتا تھا کہ یہ دونوں واقعات ایک ہی ہیں اوراس کی وجہ سے انہوں نے دونوں قسم کی روایا ت کوملاکربیان کردیا اوراس سے بعد میں آنے والے لوگوں کو یہ دھوکالگ گیا کہ شاید یہ ایک ہی واقعہ کی تفاصیل ہیں۔روایات میں خلط علاوہ ازیں روایات پر تنقیدی نگاہ ڈالنے سے بھی یہ معلوم ہوسکتا ہے کہ ان میں خلط ہوگیا ہے۔کیونکہ جن روایات میں پہلے بیت المقدس جانے اوروہاںسے آسمان پر جانے کا ذکر ہے انہی میں یہ بات بھی بیان ہوئی ہے کہ بیت المقدس میں آپ کو دوسرے انبیاء سے ملایا گیا ان میں آدم بھی تھے اور حضرت موسیٰ بھی اور حضرت عیسیٰ بھی اور حضرت ابراہیم بھی۔لیکن آسمان پرجانے کے بعد پھر بیان ہواہے کہ مختلف آسمانو ں پر آپ
نے انہی انبیاء کو دیکھا اورپہچانانہیں۔اگرایک ہی وقت میں یہ دونوں واقعات ہوئے تھے تواول توآسمان پر یہ انبیاء رسول کریم صلی اللہ علیہ وسلم سے پہلے کس طرح پہنچے۔اور دوسرے ان کو تھوڑی دیر پہلے دیکھنے کے بعد آپ نے کیوںنہ پہچانا۔دو مختلف وقتوں کی رؤیتوں میں تویہ امر سمجھ میں آسکتاہے کہ ایک نظارہ دوسرے سے مختلف ہو۔لیکن ایک ہی وقت میں دونوں نظاروں کی صورت میں یہ بات بعید از قیاس ہے۔پس یہ اندرونی شہادت بھی اس بات کی دلیل ہے کہ دوالگ الگ واقعات کے بارہ میں راویوں کے ذہن میں خلط ہوگیا ہے۔میرے اس خیال کی تائید بعض پرانے علماء کی آراء سے بھی ہوتی ہے۔چنانچہ خصائص الکبریٰ جلد اول کے ص ۱۸۰پرلکھا ہے کہ ابونصر قشیری ابن العربی اوراَوربہت سے علماء کاخیال ہے کہ اسرا ء دودفعہ ہواہے۔اس کی وجہ سے احادیث میں اختلاف ہوگیا۔اس وقت تک میں یہ ثابت کرچکاہوں کہ تاریخی شہادت سے جس سے دونوں واقعات مختلف زمانوںکے ثابت ہوتے ہیں۔اورقرآ ن کریم کی شہادت سے کہ اس میں معراج کاواقعہ الگ اور خالی بیت المقدس تک جانے کاواقعہ الگ بیان کیاگیاہے۔اوراحادیث کی اندرونی شہادتو ں سے یہ امر ثابت ہے کہ یہ دونوں واقعات الگ الگ ہیں۔اورنام اورتفاصیل کے اشتراک کی وجہ سے دھوکاکھاکر بعض راویان حدیث نے ان کو ایک واقعہ سمجھ لیا ہے اب میں اس اسراء کاکسی قدر تفصیل سے ذکرکرتاہوں جس کا اس سورۃ میں ذکر کیا گیا ہے۔واقعہ اسراء کی تفصیل میرے نزدیک اسرا ء بیت المقدس کاواقعہ اپنی تفاصیل کے ساتھ حدیث انس ؓ میں جو ابن جریر نے اپنی تفسیر میں نقل کی ہے نہایت صحیح طور پر بیان ہواہے اس حدیث کے الفاظ یہ ہیں۔عَنْ اَنَسٍ ابْنِ مَالِکٍ قَالَ لَمَّا جَاءَ جِبْرَائِيْلُ عَلَيْهِ السَّلَامُ بِالْبُرَاقِ إِلَى رَسُوْلِ اللهِ صَلَّى اللهُ عَلَيْهِ وَسَلَّمَ، فَكَأَنَّهَا ضَرَبَتْ بِذَنَبِهَا، فَقَالَ لَهَا جِبْرَائِيْلُ مَهْ يَا بُرَاقُ، فَوَاللهِ إِنْ رَكِبَكَ مِثْلُهُ، فَسَارَ رَسُولُ اللهِ صَلَی اللہُ عَلَیْہِ وَسَلَّمَ ، فَإِذَا هُوَ بِعَجُوزٍ نَاءَ عَنِ الطَّرِيْقِ أَيْ عَلٰى جَنْبِ الطَّرِيْقِ فَقَالَ:مَا هٰذِهِ يَا جَبْرَائِيلُ؟ قَالَ سِرْ يَا مُحَمَّدُ، فَسَارَ مَا شَاءَ اللهُ أَنْ يَسِيْرَ، فَإِذَا شَيْءٌ يَدْعُوْهُ مُتَنَحِّيًا عَنِ الطَّرِيْقِ يَقُوْلُ هَلُمَّ يَا مُحَمَّدُ، قَالَ جِبْرَائِيْلُ سِرْ يَا مُحَمَّدُ، فَسَارَ مَا شَاءَ اللهُ أَنْ يَسِيْرَ، قَالَ ثُمَّ لَقِيَهُ خَلْقٌ مِنَ الْخَلَائِقِ، فَقَالَ أَحَدُهُمُ السَّلَامُ عَلَيْكَ يَا أَوَّلُ، وَالسَّلَامُ عَلَيْكَ يَا آخِرُ، وَالسَّلَامُ عَلَيْكَ يَا حَاشِرُ، فَقَالَ لَهُ جِبْرَائِيْلُ ارْدُدِ السَّلَامَ يَا مُحَمَّدُ، قَالَ فَرَدَّ السَّلَامَ، ثُمَّ لَقِيَهُ الثَّانِيْ، فَقَالَ لَهُ مِثْلَ مَقَالَةِ الْأَوَّلَيْنَ حَتَّى انْتَهٰى إِلٰى بَيْتِ الْمَقْدِسِ فَعُرِضَ عَلَيْهِ الْمَاءُ وَاللَّبَنُ وَالْخَمْرُ فَتَنَاوَلَ رَسُوْلُ اللهِ صَلَّى اللهُ عَلَيْهِ وَسَلَّمَ اللَّبَنَ، فَقَالَ لَهُ جِبْرَائِيْلُ أَصَبْتَ يَا مُحَمَّدُ الْفِطْرَةَ، وَلَوْ شَرِبْتَ الْمَاءَ لَغَرِقْتَ وَغَرِقَتْ
أُمَّتُكَ، وَلَوْ شَرِبْتَ الْخَمْرَ لَغَوَيْتَ وَغَوَتْ أُمَّتُكَ۔ثُمَّ بُعِثَ لَهُ آدَمُ فَمَنْ دُوْنَهُ مِنَ الْأَنْبِيَاءِ، فَأَمَّهُمْ رَسُوْلُ اللهِ صَلَّى اللهُ عَلَيْهِ وَسَلَّمَ تِلْكَ اللَّيْلَةَ، ثُمَّ قَالَ لَهُ جِبْرَائِيْلُ أَمَّا الْعَجُوْزُ الَّتِي رَأَيْتَ عَلٰى جَانِبِ الطَّرِيْقِ، فَلَمْ يَبْقَ مِنَ الدُّنْيَا إِلَّا بِقَدْرِ مَا بَقِيَ مِنْ عُمُرِ تِلْكَ الْعَجُوْزِ، وَأَمَّا الَّذِي أَرَادَ أَنْ تَمِيلَ إِلَيْهِ، فَذَاكَ عَدُوُّ اللهِ إِبْلِيْسُ، أَرَادَ أَنْ تَمِيْلَ إِلَيْهِ وَأَمَّا الَّذِيْنَ سَلَّمُوْا عَلَيْكَ، فَذَاكَ إِبْرَاهِيْمُ وَمُوْسَى وَعِيْسَى۔(ابن جریر زیر آیت ھذا) ابن کثیر نے اپنی تفسیر میں اس روایت کو نقل کرکے لکھا ہے کہ وَ ھٰکَذَارَوَاہ الْحَافِظُ الْبَیْہَقِیُّ فِی دَلَائِلِ النُّبُوَّۃِ مِنْ حَدِیْثِ ابْنِ وَھْبٍ وَفِیْ بَعْضِ اَلْفَاظِہٖ نَکَارَۃٌ وَ غَرَابَۃٌ۔طَرِیْقُ اُخْرٰی عَنْ اَنَسٍ ابْنِ مَالِکٍ وَفِیْھَا غَرَابَۃٌوَنَکَارَۃٌ جِدًّاوَھِی فِی سُنَنِ النَّسَائِی الْمُجْتَنیٰ وَلَمْ اَرَھَافِی الْکَبِیْرِ (ابن کثیرزیر آیت ھذا) یعنی ابن جریر انس بن مالک سے روایت کرتے ہیں کہ انہوں نے کہا۔جب جبرائیل ؑ رسول اللہ صلی اللہ علیہ وسلم کے پاس براق لائے تو اس نے اپنی دم ہلائی یعنی کچھ انکار کیا۔تواسے جبرائیلؑ نے کہا آرام سے کھڑارہ۔اے براق خدا کی قسم تجھ پرا یساسوار کبھی نہیں بیٹھا۔تب رسول اللہ صلی اللہ علیہ وسلم اس پر چڑھ کرروانہ ہوئے۔توراستے میں کیادیکھتے ہیں کہ ایک بڑھیا راستہ کی ایک جانب کھڑی ہے۔توآپ نے کہا اے جبرائیل یہ کون ہے۔توجبرائیل نے کہا۔چلئے چلئے اے محمد ؐ!(یعنی موسیٰ کی طر ح سوال کرنے سے منع کیا )راوی کہتاہے پھر آپ چلے جتنا کہ اللہ تعالیٰ کامنشاء تھا۔توکیا دیکھتے ہیں کہ کوئی شخص راستہ کی ایک جانب سے آپ کو بلارہا ہے اورکہتاہے کہ ادہر آئیے اے محمدؐ! اس پر جبرائیل نے پھر آپ کو بولنے سے منع کیا اورکہا کہ اے محمد ؐ چلئے چلئے اور کچھ جواب نہ دیجئے۔پھر آپ آگے چلے جتنا کہ خدا کی مرضی تھی۔راوی کہتاہے کہ پھر آپ کو اللہ تعالیٰ کی مخلو ق میں سے کچھ لوگ ملے۔توانہوں نے کہا اَلسَّلَامُ عَلَیْکَ یَااَوَّلُ۔اَلسَّلَامُ عَلَیْکَ یَا اٰخِرُ۔السَّلَامُ عَلَیْکَ یَاحَاشرُ۔اس پرجبرائیل نے کہا۔اے محمد ؐ ان کو سلام کا جواب دیجئے۔توآپ نے ان کو سلام کا جواب دیا۔پھر آپ کو ایسی ہی ایک اَور جماعت ملی۔اس نے بھی پہلی جماعت کے الفاظ میں آپ کوسلام کہا۔(پھرآپ آگے چلے)یہاں تک کہ آپ بیت المقدس تک پہنچے۔توآپ کے سامنے حضرت جبرائیل نے تین پیالے پیش کئے ایک پانی کا۔ایک دودھ کا اورایک شراب کا۔اسراء میں دودھ سے مراد فطرت آپ نے دودھ لے کر پی لیا۔توآپ کو جبرائیل نے کہا آپ نے فطرت صحیحہ کوپالیا۔اگرآپ پانی پی لیتے توآپ بھی غرق ہوتے اورآ پ کی امت بھی غرق ہوتی۔اوراگرآپ شراب پی لیتے توآپ بھی گمراہ ہوتے اورآپ کی امت بھی گمراہ ہوجاتی۔پھر آپ کےسامنے آدم اوردیگر انبیاء لائے گئے اوراس
رات ان کو رسول اللہ صلی اللہ علیہ وسلم نے نماز پڑھائی۔اسراء میں بڑھیا دیکھنے سے مراد دنیا پھر آپ کو جبرائیل نے کہا کہ جو بڑھیا آپ نے رستہ کے ایک جانب دیکھی تھی وہ دنیا تھی۔اوراس کی عمر سے اسی قد رباقی ہے جوکہ اس بڑھیا کی عمر باقی ہے۔اورجو شخص رستہ سے ہٹ کر آپ کو بلاتاتھا۔تاآپ اس کی طرف مائل ہوں وہ خدا کادشمن ابلیس تھا۔اوروہ لوگ جنہوں نے آپ کو السَّلَامُ عَلَیْکَ کہا وہ ابراہیم موسیٰ عیسیٰ وغیر ہ تھے۔یہاں تک ابن جریر کی روایت ختم ہوئی۔اس کے بعد ابن کثیر کے حوالے سے جو عبارت لکھی گئی ہے اس کایہ ترجمہ ہے کہ حافظ بیہقی نے بھی دلائل النبوت میں ابن وہب سے یہی روایت بیان کی ہے مگراس میں بعض الفاظ قابل اعتراض ہیں اور دوسرے اسناد سے ان کی تصدیق نہیں ہوتی اورایک اَورسند کے ساتھ انہوں نے انس بن مالک سے یہی روایت کی ہے مگر اس میں بعض ایسی باتیں بیان کی ہیں جن کی دوسری احادیث سے تصدیق نہیں ہوتی۔اوریہ روایت سنن نسائی کی ایک خلاصہ میں بھی میں نے دیکھی ہے۔مگربڑی سنن نسائی میں وہ حدیث نہیں ملی۔حدیث اسراء بروایت انس بطور معیار یہ وہ حدیث ہے جوہمارے لئے معیار کے طور پر ہے کیونکہ میرے نزدیک یہ سب سے زیادہ صحیح اور سچی ہے۔اوراس میں صرف ایک غلطی ہے۔اوروہ یہ کہ جہاں پیالے پیش کرنے کا ذکر ہے وہاں پانی کے بعد دودھ اورپھر شراب کا ذکرکیا ہے مگرابن کثیر نے اس روایت کواپنی کتاب کی جلد ششم ص۸، ۹پر جس طرح نقل کیا ہے اس میں پانی کے بعد شراب اورپھر دو دھ کا ذکرکیا ہے۔جس سے معلوم ہوتا ہے کہ بعض نسخوں میں اسی ترتیب سے پیالوں کا ذکرکیا گیا ہے۔میں آگے چل کربتائوں گاکہ اس معمولی تغیر کی اصلاح کیوں ضروری ہے اس وقت صرف یہ بتاناچاہتاہوں کہ بعض دوسری روایات میں زورسے اس امر کو بیان کیاگیاہے کہ پہلے پانی کاپیالہ اورپھر شراب کاپیالہ اورپھر دودھ کاپیالہ پیش کیاگیا تھا۔چنانچہ الطبرانی اورابن مردویہ نے صہیب بن سنان سے روایت کی ہے جس کے یہ الفاظ ہیں۔قَالَ لَمَّاعُرِضَ عَلٰی رَسُولِ اللہ صَلَی اللہُ عَلَیْہِ وَسَلَّمَ لَیْلَۃَ اُسْرِیَ بِہِ الْمَاءُ ثُمَّ الْـخَمْرُ ثُمَّ اللَّبَنُ اَخَذَ اللَّبَنَ (خصائص الکبریٰ باب خصوصیَّتُہ صلی اللہ علیہ سلم حدیث صہیب صفحہ ۱۵۹) یعنی صہیب روایت کرتے ہیں کہ جس رات رسول کریم صلی اللہ علیہ وسلم کو اسرا ء ہواتھا۔آپ کے سامنے تین پیالے پیش کئے گئے تھے۔پہلے پانی کا اس کے بعد شرا ب کااوراس کے بعد دودھ کا۔اس حدیث میں پانی کے بعد شراب اوراس کے بعد دودھ کے پیش ہونے کو بالجزم بیان کیاگیا ہے۔پس اس
حدیث کی بناء پر اورابن کثیر نے انس کی روایت کو جن الفاظ میں نقل کیا ہے۔اس کی بنا ء پر یقین سے کہاجاسکتا ہے کہ اس روایت میں بھی پہلے پانی۔پھر شراب پھردودھ کا ذکر ہے مگر بعض نسخوں میں الٹ لکھا گیاہے۔پس میں اس روایت کے جومعانی بیان کروں گا۔ان میں اس امر کومدنظررکھوں گا کہ اس روایت میں بھی پہلے پانی پھر شراب اورپھر دودھ کا ذکر ہے اوراس کے الٹ جولکھا گیاہے وہ کسی نسخہ میں کتابت کی غلطی کی وجہ سے سہواً لکھا گیا ہے۔ابن کثیر کی تصدیق دُرّمنثورسے بھی ہوتی ہے۔اس میں بھی اس روایت کو بیان کرتے ہوئے پہلے پانی پھر شراب پھر دودھ کے پیش کئے جانے کا ذکر ہے۔جیساکہ میں نے اوپر بیان کیا ہے یہ روایت نہایت صحیح ہے اوراس کے صحیح ہونے کی اندرونی شہادت موجود ہے۔اوروہ شہادت یہ ہے کہ ا س میں ذکر ہے کہ پہلے آپ نے ایک بڑھیا دیکھی پھر شیطان دیکھا پھرانبیاء کی جماعتوں کو دیکھا اس کے بعد بیت المقدس پہنچے۔پھرپانی اورشراب اوردودھ تین چیزیں آپ کے سامنے پیش کی گئیں۔رسول ا للہؐ نے پانی اورشراب کے قبول کرنے سے انکار کردیااوردودھ کولے لیا۔اس پر جبرائیل نے کہا آ پ نے صحیح فطرت کوپالیا۔اگرآپ پانی پیتے توغرق ہوجاتے اورآپ کی امت بھی غرق ہوجاتی۔اگرشراب پیتے توآپ گمراہ ہوجاتے اورآپ کی امت بھی گمراہ ہوجاتی۔اورآپ نے جودودھ لیا ہے گویاآپ فطرت صحیحہ کے راستہ پر چل پڑے۔پھر وہ ان نظاروں کی تعبیر کرتے ہیں جوپہلے دیکھے تھے اورکہتے ہیں کہ وہ عورت دنیا تھی۔جس نے آپ کوبلایا۔اس کے بعدراستہ سے ہٹ کر کھڑاہواشخص جس نے آپ کو بلایا ابلیس تھا۔اس کے بعد جنہوں نے سلام کیا وہ خدا تعالیٰ کے نبی تھے۔اسراء میں پانی ،دودھ اور شراب پیش کئے جانےکی تعبیر ان تعبیروں کو دیکھو کہ کیسی صحیح ہیں اورقرآن کریم کے مطابق ہیں۔پانی دنیا کاقائم مقام ہے کیونکہ پانی سے حیات ہوتی ہے۔جیسے فرمایا وَ جَعَلْنَا مِنَ الْمَآءِ كُلَّ شَيْءٍ حَيٍّ۔(الانبیاء :۳۱) پانی جب لَبن کے مقابل میں آئے تواس سے مراد دنیا کی مال و دولت ہوتی ہے۔اور شراب شیطانی کاموں پر دلالت کرتی ہے جیسے فرمایا۔اِنَّمَا الْخَمْرُ وَ الْمَيْسِرُ وَ الْاَنْصَابُ وَ الْاَزْلَامُ رِجْسٌ مِّنْ عَمَلِ الشَّيْطٰنِ۔(المائدہ :۹۱)۔دودھ ماں کی چھا تی سے بنتاہے اس میںکسی غیر چیز کی ملونی نہیں ہوتی اس لئے وہ فطرت صحیحہ پردلالت کرتا ہے۔اس روایت کے واقعات میں طبعی ترتیب ہے اب دیکھو اس میں کیسی ترتیب نظرآتی ہے۔پھر تعبیر نہایت صاف اورصحیح ہے۔پہلے آپ نے عورت کودیکھا تھا۔اوراس کی تعبیر جبرائیل علیہ السلام نے دنیا بتائی تھی۔اس کے مقابل پر پہلے پانی کا پیالہ پیش کیا گیا۔اوراس کی تعبیر بھی دنیا ہی کی گئی۔قرآ ن کریم میں بھی پانی کو دنیا سے تشبیہ
کہ قرآن کریم نے بھی اس کا نام رؤیا ہی رکھا ہے۔جیسے اسی سور ۃ کے چھٹے رکوع میں فرمایا وَ مَا جَعَلْنَا الرُّءْيَا الَّتِيْۤ اَرَيْنٰكَ اِلَّا فِتْنَةً لِّلنَّاسِ(بنی اسرائیل:۶۱)۔کہ یہ رؤیا لوگوں کے فتنے کے لئے تھی۔چنانچہ ا س آیت کی وجہ سے کئی صحابہ اورسابق علماء نے بھی اسے رؤیاہی قرار دیا ہے۔چنانچہ ابن اسحاق اورابن جریر نے حضرت معاویہؓ سے روایت کی ہے کہ اِذَاسُئِلَ عَنْ مَسْرٰی رسول اللہ ِصَلَّی اللہُ عَلَیْہِ وَسَلَّمَ قال کانَتْ رُؤْ یَا منَ اللہِ صَادِقَةً۔(درمنثورزیر آیت ھذا)یعنی جب حضر ت معاویہ ؓ سے اسراء کے متعلق پوچھاگیا توآپ نے فرمایاکہ وہ اللہ تعالیٰ کی طرف سے ایک رؤیاتھی جو پوری ہوگئی۔حضرت عائشہؓ کا بھی یہی مذہب بتایاجاتاہے۔(السیرۃ النبویۃ لابن ہشام ذکرالاسراء حدیث عائشۃ عن مسراہ صلی اللہ علیہ وسلم وزاد المعادجلد ۳ فصل فی الاسراء والمعراج) (۳)تیسراثبوت اس کایہ ہے کہ آنحضرت صلی اللہ علیہ وسلم فرماتے ہیں کہ جب میں نے یہ بات لوگوں کو سنائی۔تولوگوں نے کہا کہ اگرآپ بیت المقدس سے ہوآئے ہیں تواس کانقشہ بتائیں۔توآپ فرماتے ہیں کہ میں بالکل بیت المقدس کو نہ جانتاتھا۔اگرآنحضرت صلی اللہ علیہ سلم فی الحقیقت ظاہری طورپر بیت المقدس میں گئے تھے توآپ کو چاہیے تھا کہ آپ نقشہ بتادیتے۔یہ تونہ فرماتے کہ میں نہ جانتا تھا۔پھر آنحضرت صلعم فرماتے ہیں کہ ان کے سوال کرنے کے بعد پھرمجھ پر کشف کی حالت طاری ہوئی۔اورکشف میں بیت المقدس کا نقشہ سامنے کر دیا گیا۔تومیں اس کو دیکھتاجاتاتھا اورپھر لوگوں کو بتاتاجاتاتھا۔چنانچہ جابربن عبداللہ کی راویت ہے۔آپ نے فرمایا۔فَـجَلَّی اللہُ لِیَ الْبَیْتَ المَقْدِسِ فَطَفِقْتُ اُخْبِرُھُمْ واَنااَنْظُرُ اِلَیْہِ۔کہ اللہ تعالیٰ نے بیت المقدس کومیرے سامنے کردیا۔میں اس کو دیکھتا اورلوگوںکوبتاتاجاتا تھا۔(ابن کثیر زیر آیت ھذا) اس حدیث سے ظاہر ہے کہ چونکہ وہ کشف تھا آ پ سمجھتے تھے کہ ممکن ہے جومیں نے دیکھا ہے اس طر ح ظاہری طورپر نہ ہو۔پس آپ نے اس کے بیان کرنے سے ہچکچاہٹ کی۔مگرچونکہ اس واقعہ کے بیان کرنے سے لوگوں میں مخالفت اوراستہزاکاہیجان پیداہوگیاتھا۔اللہ تعالیٰ نے فرمایا کہ لو اب ہم تم کواصل صورت میں بیت المقدس دکھادیتے ہیں۔چنانچہ دوبارہ کشف ہو ااورآپ نے اس کے مطابق لوگوںکو بیت المقدس کانقشہ بتادیا۔جس کی کفار میں سے واقف کار لوگوں نے تصدیق کی۔متعصب عیسا ئی مصنف اس موقعہ پرلکھتے ہیں کہ بیت المقدس کے نقشے اس وقت بن چکے تھے(تفسیر قرآن از ویری جلد ۳ صفحہ ۵۶)۔ممکن ہے یہ درست ہو۔مگرذرایہ مصنف کسی ایسے شہر کے متعلق نقشہ دیکھ کر جوان پر سوال کئے جائیں ان کا جواب تودے کر دیکھیں۔
کشف اور رؤیا کی تعریف میں فرق اس جگہ یہ امر یاد رکھنے کے قابل ہے کہ گوقرآن کریم میں اس کے متعلق رؤیاکالفظ آیا ہے مگرا س لفظ سے دھوکا کھا کر اسے عام خوابوں کی طرح نہیں سمجھنا چاہیے۔کیونکہ عربی میں رؤیا کامفہوم اَورہے اوراردومیں اَور۔اردومیں تورؤیا اس نظارہ کو کہتے ہیں جو انسان سوتے ہوئے دیکھتا ہے۔لیکن عربی میں کشف اورعام خواب دونو ںکے لئے رؤیاکالفظ بولاجاتاہے۔اورکشف عام رؤیا سے مختلف ہوتاہے۔وہ سوتے میں نہیں دیکھاجاتا بلکہ بیَن النَّوم والیقظہ کی حالت میں دیکھاجاتاہے۔یعنی جبکہ ایک ربودگی کی سی حالت توانسان پر طاری ہوتی ہے مگر وہ سونہیں رہاہوتا۔بلکہ اس کے ظاہری حواس بھی اس وقت اپناکام کررہے ہوتے ہیں۔بلکہ بعض دفعہ دوسرے سے باتیں کرتے کرتے ایک نظارہ نظرآجا تا ہے۔انبیاء کاکشف دوسرے لوگوں کے کشوف سے زیادہ لطیف ہوتاہے اوروہ کشفی نگاہ سے دوردور کے مادی امورکو بعینہٖ معائنہ کرلیتے ہیں۔کشف کی تین اقسام کشف کی بھی تین قسمیں ہوتی ہیں۔(۱)ایسا کشف جس میں دکھائے جانے والے نظارے اسی شکل میں دکھائے جاتے ہیں۔جس شکل میں کہ وہ مادی دنیا میں موجود ہوتے ہیں اوروہ کشف بالکل ایساہوتا ہے جیسے دوربین سے دورکی چیز دیکھ لی جاتی ہے۔(۲)ایساکشف جس کا کچھ حصہ توایساہوتاہے جواوپر بیان ہواہے اور کچھ حصہ تعبیر طلب ہوتاہے۔(۳)ایسا کشف جو ساراکاساراتعبیر طلب ہوتا ہے۔آنحضرت صلی اللہ علیہ وسلم کایہ کشف دوسری قسم کاتھا یعنی بعض حصے تو اسی طرح دکھائے گئے تھے جس طرح کہ مادی دنیا میں واقع ہورہاتھا۔اوربعض حصے تعبیر طلب تھے۔تعبیر طلب حصوںکا ذکرتو میں اوپر کرآیا ہوں۔ظاہری شکل میں دکھائے جانے والے حصہ کے بارہ میں احادیث میں آتا ہے کہ واپسی کے وقت آنحضرت صلی اللہ علیہ وسلم نے دیکھا کہ ایک قافلہ مکہ کی طرف آرہاہے۔اوراس قافلہ والوں کاایک اونٹ گم ہوگیا ہے جس کی وہ تلاش کررہے ہیں۔اورچند دن بعد معلوم ہواکہ بعینہٖ یہ واقعہ مکہ کے ایک قافلہ سے پیش آیا تھا۔چنانچہ جب وہ قافلہ مکہ پہنچا توانہوں نے اس امرکوتسلیم کیا۔(الخصائص الکبریٰ حدیث شداد بن اوس جلد او ل ص ۱۵۸و۱۵۹) کشف کے متعلق ذاتی تجربہ اللہ تعالیٰ کے فضل سے میں کشوف کے متعلق خود صاحب تجربہ ہو ںاوریہ امور اپنے مشاہد ہ کی تصدیق سے لکھ رہاہوں۔اسراء کے کشف سے غرض ہجرت تھی اب میں یہ بتاتاہوں کہ اس کشف کا مقصد کیا تھا ؟میرے نزدیک اس کشف میں ہجرت مدینہ کی خبر دی گئی تھی۔اوربیت المقدس جو آپ کو دکھا یاگیا اس سے مراد مسجد نبویؐ کی تعمیر تھی۔