سُوْرَۃُ بَنِیْٓ اِسْرَآءِیْلَ

تفسیر کبیر (جلد ۶), حصہ 3

کشف اور رؤیا کی تعریف میں فرق اس جگہ یہ امر یاد رکھنے کے قابل ہے کہ گوقرآن کریم میں اس کے متعلق رؤیاکالفظ آیا ہے مگرا س لفظ سے دھوکا کھا کر اسے عام خوابوں کی طرح نہیں سمجھنا چاہیے۔کیونکہ عربی میں رؤیا کامفہوم اَورہے اوراردومیں اَور۔اردومیں تورؤیا اس نظارہ کو کہتے ہیں جو انسان سوتے ہوئے دیکھتا ہے۔لیکن عربی میں کشف اورعام خواب دونو ںکے لئے رؤیاکالفظ بولاجاتاہے۔اورکشف عام رؤیا سے مختلف ہوتاہے۔وہ سوتے میں نہیں دیکھاجاتا بلکہ بیَن النَّوم والیقظہ کی حالت میں دیکھاجاتاہے۔یعنی جبکہ ایک ربودگی کی سی حالت توانسان پر طاری ہوتی ہے مگر وہ سونہیں رہاہوتا۔بلکہ اس کے ظاہری حواس بھی اس وقت اپناکام کررہے ہوتے ہیں۔بلکہ بعض دفعہ دوسرے سے باتیں کرتے کرتے ایک نظارہ نظرآجا تا ہے۔انبیاء کاکشف دوسرے لوگوں کے کشوف سے زیادہ لطیف ہوتاہے اوروہ کشفی نگاہ سے دوردور کے مادی امورکو بعینہٖ معائنہ کرلیتے ہیں۔کشف کی تین اقسام کشف کی بھی تین قسمیں ہوتی ہیں۔(۱)ایسا کشف جس میں دکھائے جانے والے نظارے اسی شکل میں دکھائے جاتے ہیں۔جس شکل میں کہ وہ مادی دنیا میں موجود ہوتے ہیں اوروہ کشف بالکل ایساہوتا ہے جیسے دوربین سے دورکی چیز دیکھ لی جاتی ہے۔(۲)ایساکشف جس کا کچھ حصہ توایساہوتاہے جواوپر بیان ہواہے اور کچھ حصہ تعبیر طلب ہوتاہے۔(۳)ایسا کشف جو ساراکاساراتعبیر طلب ہوتا ہے۔آنحضرت صلی اللہ علیہ وسلم کایہ کشف دوسری قسم کاتھا یعنی بعض حصے تو اسی طرح دکھائے گئے تھے جس طرح کہ مادی دنیا میں واقع ہورہاتھا۔اوربعض حصے تعبیر طلب تھے۔تعبیر طلب حصوںکا ذکرتو میں اوپر کرآیا ہوں۔ظاہری شکل میں دکھائے جانے والے حصہ کے بارہ میں احادیث میں آتا ہے کہ واپسی کے وقت آنحضرت صلی اللہ علیہ وسلم نے دیکھا کہ ایک قافلہ مکہ کی طرف آرہاہے۔اوراس قافلہ والوں کاایک اونٹ گم ہوگیا ہے جس کی وہ تلاش کررہے ہیں۔اورچند دن بعد معلوم ہواکہ بعینہٖ یہ واقعہ مکہ کے ایک قافلہ سے پیش آیا تھا۔چنانچہ جب وہ قافلہ مکہ پہنچا توانہوں نے اس امرکوتسلیم کیا۔(الخصائص الکبریٰ حدیث شداد بن اوس جلد او ل ص ۱۵۸و۱۵۹) کشف کے متعلق ذاتی تجربہ اللہ تعالیٰ کے فضل سے میں کشوف کے متعلق خود صاحب تجربہ ہو ںاوریہ امور اپنے مشاہد ہ کی تصدیق سے لکھ رہاہوں۔اسراء کے کشف سے غرض ہجرت تھی اب میں یہ بتاتاہوں کہ اس کشف کا مقصد کیا تھا ؟میرے نزدیک اس کشف میں ہجرت مدینہ کی خبر دی گئی تھی۔اوربیت المقدس جو آپ کو دکھا یاگیا اس سے مراد مسجد نبویؐ کی تعمیر تھی۔

جس کو اللہ تعالیٰ کے فضل سے بیت المقدس سے بھی زیادہ عزت دی جا نے والی تھی۔اوریہ جو دکھا یا گیا کہ آپ نے سب انبیاء کی امامت کرائی اس میں یہ بتایاگیا تھا کہ آپ کا سلسلہ عربوں سے نکل کر دوسری اقوام میں بھی پھیلنے والا ہے اورسب انبیاء کی امتیں اسلام میں داخل ہوں گی۔اوریہ اشاعت مدینہ میں جانے کے بعد ہوگی۔اوراس میں اس طرف بھی اشار ہ تھا کہ رسول کریم صلی اللہ علیہ وسلم کو بیت المقدس کے علاقہ کی حکو مت دی جائے گی۔مسجد کو دیکھنے کی تعبیر چنانچہ تعبیر الرؤیا کی کتب میں لکھا ہے کہ تَدُلُّ رُؤْیَۃُ کُلِّ مَسْجِدٍ علٰی جِھَتِہٖ وَالتَّوَجُّہِ اِلَیْھَا کَالْمَسْجِدِ الْاَقْصٰی وَالْمَسْجِدِ الْـحَرَامِ وَمَسْجِدِ دِمشْقَ وَمَسْجِدِ مِصْرَ وَمَاشَاکَلَ ذٰلِکَ وَرَبُّمَا دَلَّتْ عَلیٰ عُلَمَاءِ جِھَاتِھِمْ اَوْ مُلُوکِھِمْ اَوْ نُوَّابِ مُلُوْکِھِمْ(تعطیر الانام زیر لفظ مسجد۔جلد دوم )یعنی رؤیا میں مسجد دیکھنے سے مراد کبھی و ہ جہت ہوتی ہے اوراس طرف جانامراد ہوتاہے۔جیسے مسجد اقصیٰ کو دیکھنا یامسجد حرام کو دیکھنا یامسجد دمشق یامسجد مصر کو دیکھنا۔اورایسے ہی اورمساجد کودیکھنا اور کبھی مسجد سے مراد وہاں کے علما ء یابادشاہ یاگورنر ہوتے ہیں۔آنحضرت ؐ کے حق میں تعبیر کس طرح پوری ہوئی اب میں ایک ایک کرکے ان معنو ں کولیتاہوں کہ وہ کس طرح اورکس دلیل سے رسول کریم صلی اللہ علیہ وسلم کے حق میں پورے ہوئے۔پہلی تعبیر میں نے یہ کی تھی کہ مسجد اقصیٰ سے مراد اس جگہ مسجد نبوی ؐ ہے۔اوریروشلم سے مراد مدینہ ہےاور ادہر جانے سے مراد آپ کی ہجرت ہے۔اوراللہ تعالیٰ نے سُبْحٰن کہہ کر اس رؤیا کا ذکرکیا ہے جس سے اس طرف اشارہ کیا ہے کہ یہ ہجرت اللہ تعالیٰ کی سُبوحیت کااظہارکرنے والی ہوگی۔یہ سبحان کالفظ بھی بتاتا ہے کہ اس نظارہ میں ایک پیشگوئی تھی کیونکہ ظاہر میں بیت المقدس کودیکھنے سے سبوحیت ثابت نہیں ہوتی۔لیکن مدینہ میں جاکر اسلامی حکومت کاقیام چونکہ بہت سی ان پیشگوئیوں کوپوراکرنے والاتھا جوقرآن کریم میں بیان ہوچکی تھیں۔اس واقعہ سے بے شک اللہ تعالیٰ کی سبوحیت ظاہر ہوئی تھی اوراب تک ہورہی ہے۔غرض سُبْحٰنَ الَّذِيْۤ اَسْرٰى کہہ کرفرمایاکہ پا ک ہے وہ جولے جائے گا اپنے بندہ کو راتوں رات مسجداقصیٰ یعنی اسی کے مشابہ ایک مسجد کی طرف تاکہ وہ پیشگوئیاں پوری ہوں جن کے لئے ہجرت کرنی ضروری ہے۔اوراللہ تعالیٰ دنیا کو دکھادے کہ کس طرح اس کی بات پوری ہواکرتی ہے۔مثلاً جنگ و جہاد وغیرہ کی خبریںجوہجرت کے ساتھ تعلق رکھتی تھیں۔پھرا سلامی حکومت کی خبر وغیرہ وغیرہ۔لِنُرِیَہٗ مِنْ اٰیٰتِنَا میں بھی ہجرت کی طرف اشارہ ہے لِنُرِیَہٗ مِنْ اٰیٰتِنَا بھی اسی امر پردلالت کرتا ہے کہ

یہ کوئی ایساسفر ہے جس میں اللہ تعالیٰ کے خاص نشان ظاہر ہوں گے۔اوروہ ہجرت ہی کاسفر تھا جس نے اسلام کامستقبل جودنیاکی نگاہ سے پوشیدہ تھا ایسے شاندار طورپر ظاہرکردیا۔اِنَّهٗ هُوَ السَّمِيْعُ الْبَصِيْرُ میں بھی اسی مضمون کی تائید ہوتی ہے۔کیونکہ بیت المقدس کو محض کشف میں دیکھ لینا خدا تعالیٰ کے سمیع و بصیر ہونے کاثبوت پیش نہیں کرتا لیکن مدینہ کی ہجرت ان دونوں صفات کا ثبوت پیش کرتی ہے۔سَمِیْعٌ اس طرح کہ اللہ تعالیٰ کس طرح اپنے بندوں کی دعائیں سننے والا ہے۔بَصِیْرٌ اس طرح کہ جن کامیابیوں کی ہجرت کے نتیجہ میں اللہ تعالیٰ کی طرف سے خبر دی گئی تھی وہ بعینہٖ پوری ہوگئیں۔نیز ا س طرح کہ وہاں پر اللہ تعالیٰ نے مومنوں کی جس طرح نگہداشت کی وہ ایک بصیر خداکے وجود کی بیّن شہادت تھی۔اوریہ جو مسجد نبویؐ کو مسجد اقصیٰ کہاگیا اورمدینہ کو یروشلم کی شکل پر دکھایاگیا۔اس کی وجہ یہ تھی کہ جوبرکات اس شہر کو اوراس مسجد کو ملی تھیں۔وہی مسجد نبوی ؐ اورمدینہ منورہ کو ملنے والی تھیں۔اگرکہا جائے کہ کیوں مسجد نبویؐ کو مسجد حرام سے تشبیہ نہ دی گئی اورمسجد اقصیٰ سے دی گئی ؟تواس کا جواب یہ ہے کہ اول تومسجد حرام کو بعض زائد خصوصیات حاصل ہیں جوارکان حج سے تعلق رکھتی ہیں۔اوریہ خصوصیات بیت المقدس یامسجد نبوی کو حاصل نہیں۔دوسرے بیت المقدس کو کشف میں دکھانے سے یہ بھی بتانا مقصود تھا کہ آپ کی امت ان علاقوں پرقابض ہوجائے گی۔اوریہ مضمون مسجد حرام کے دکھانے سے ظاہر نہ ہوتا تھا۔پس چونکہ ابھی بعض سیاسی وجوہ کی بناء پر وہ وقت نہ آیاتھا کہ اصل نام ظاہر کیا جاتا۔اس لئے تشبیہاً مسجد نبوی کانام مسجد اقصیٰ رکھ دیا۔اورمدینہ کو یروشلم کی شکل میں دکھایا۔یہ پیشگوئی جس رنگ میں پوری کی گئی وہ ذیل کی روایت سے ظاہر ہے۔عَنْ اَبِی ھُرِیْرَۃَ عَنِ النَّبِیِّ صَلَّی اللہُ عَلَیْہِ وَسَلَّمَ قَالَ لَاتَشُدُّوْا الرِّحَالَ اِلَّا اِلٰی ثَلٰثَۃِ مَسَاجِدَ اَلْمَسْجِدِ الْـحَرَامِ وَمَسْجِدِ الرَّسُوْلِ صَلَّی اللہُ عَلَیْہِ وَسَلَّمَ وَالْمَسْجِدِ الْاَقْصٰی۔آنحضرت صلعم نے فرمایا کہ سواری پرچڑھ کر کسی مسجد کی طرف نہ جانا چاہیے۔سوائے تین مساجد کے ایک مسجد حرام۔دوسری مسجد اقصیٰ اورتیسری مسجد نبوی ؐ(بخاری کتاب الجمعة باب فضلِ الصلوٰۃ فی مسجد مکۃ والمدینۃ) مسجد نبوی اور مسجد اقصیٰ میں مشابہت اس جگہ مسجد نبوی اورمسجد اقصی کو آپس میں مشابہت دی ہے۔پس مسجد نبوی کی بنیادسے مسجد اقصیٰ میں نماز پڑھنے کی پیشگوئی پوری ہوگئی۔اس مسجد کی طرف جانے کے علاوہ اس آیت میں ایک اور بات بھی بتائی گئی تھی۔اوروہ یہ کہ مسجد اقصیٰ وہ جگہ ہے جس کے اردگرد کوبھی برکت دی گئی ہے۔یعنی جس شہر میں وہ ہے اسے بھی معززاور مکرم بنادیاگیا ہے۔اس خبر کے مطابق نہ صرف مسجد نبوی کو برکت دی گئی بلکہ اس کے

اردگرد کے علاقہ یعنی مدینہ کو بھی برکت دی گئی۔اس کے مندر جہ ذیل ثبوت ہیں۔آنحضرتؐ کی مدینہ میں ترقی کے لئے دعا (۱)بخاری میں روایت ہے کہ عَنْ اَنَسٍ قَالَ قَالَ رَسُوْ لُ اللہِ صَلَّی اللہُ عَلَیْہِ وَسَلَّمَ اَللّٰھُمَّ اجْعَلْ بِالْمَدِیْنَۃِ ضِعْفَیْ مَاجَعَلْتَ بِمَکَّۃَ مِنَ الْبَرَکَـۃِ(بخاری کتاب فضائل المدینۃ باب المدینۃ تنفع الخبث )یعنی حضرت انس فرماتے ہیںکہ رسول اللہ صلی اللہ علیہ وسلم نے دعاکی کہ اے اللہ مکہ میں جو تو نے برکت رکھی ہے اس سے بڑ ھ کر مدینہ میں برکت رکھ دے۔(۲) اَللّٰھُمَّ حَبِّبْ اِلَیْنَا الْمَدِیْنَۃَ کَحُبِّنَا مَکَّۃَ اَوْاَشَدَّ اَللّٰھُمَّ بَارِکَ لَنَا فِی صَاعِنَا وَفِیْ مُدِّنَا۔(بخاری کتاب فضائل المدینۃ باب المدینۃ تنفع الخبث) یعنی حضرت عائشہ ؓ فرماتی ہیں۔رسول اللہ صلی اللہ علیہ وسلم نے دعاکی کہ الٰہی تومدینہ بھی ہمیں ایسا ہی پیارابنادے جس طرح ہمیں مکہ پیاراہے بلکہ اس سے بھی زیادہ۔اے اللہ اس کے صاع اورمُدّمیں برکت ڈال دے۔یعنی اہل مدینہ کے گذارے کے لئے ان کی زراعت اورتجارت میں برکت دے۔(۳)عَنْ زَیْدِ بْنِ عَاصِمٍ اَنَّ اِبْرَاھِیْمَ حَرَّمَ مَکَّۃَ وَدَعَالِاَھْلِھَاوَاِنِّیْ حَرَّمْتُ الْمَدِیْنَۃَ کَمَاحَرَّمَ اِبْرَاھِیْمُ مَکَّۃَ وَاِنِّیْ دَعَوْتُ فِیْ صَاعِھَا وَمُدِّھَا بِمِثْلَیْ مَادَعَابِہِ اِبْراھِیْمُ لِأَھْلِ مَکَّۃَ( مسلم کتاب الحج باب فضل المدینۃ)۔یعنی زید بن عاصم کہتے ہیں کہ رسول کریم صلعم نے فرمایا کہ ابراہیمؑ نے مکہ کو محفوظ مقام قرار دیاتھا اوراس کے باشندوں کے لئے دعاکی تھی۔اورمیں نے مدینہ کو محفوظ مقام قرار دیا ہے اورمیں نے دعاکی ہے کہ مدینہ کے صاع اورمُدمیں اس سے دگنی برکت رکھ دے جتنی کہ ابراہیم نے مکہ کے لئے طلب کی تھی۔(اس سے معلوم ہوتاہے کہ مدینہ کی فضیلت کے لئے جو دعاہے وہ دنیوی ترقی کے لئے ہے ورنہ آسمانی برکت کے لحاظ سے مکہ ہی سب دنیا کے شہروں سے افضل ہے ) ان روایات سے ظا ہر ہے کہ مسجد اقصیٰ جس کے ارد گرد کاعلاقہ بھی بابرکت کیا گیا۔اس سے مراد رؤیا میں درحقیقت مسجد نبوی تھی۔اورہر عقلمند سوچ سکتاہے کہ مدینہ کوجو برکت ملی ہے کیا اس کا دسواں حصہ بھی یروشلم کو نصیب ہوئی ہے؟ اسریٰ کے لفظ میں بھی مجبوری سے سفر کا ثبوت ملتا ہے یہ امر بھی قابل توجہ ہے کہ اَسْرٰى بِعَبْدِهٖ سے ظاہر ہوتاہے کہ چلانے والا کوئی دوسرا تھا۔اوراس میں چلنے والے کااپنا اختیا ر نہ تھا۔ہجرت کاواقعہ بھی اسی طرح ہواکہ آپ رات ہی کونکلے۔اوریہ نکلنا اپنی مرضی سے نہ تھا بلکہ اس وقت مجبور ہوکر آپ نکلے جبکہ کفار نے آپ کے قتل

کرنے کے لئے آپ کے گھر کامحاصرہ کرلیاتھا۔پس اس سفر میں آپ کی مرضی کادخل نہ تھا۔بلکہ خدا تعالیٰ کی مشیت نے آپ کو مجبورکیا۔پھر جس طرح رؤیا میں جبریل بیت المقدس کے سفر میں آپ کے ساتھ تھے۔ہجرت میں ابوبکرؓ آپ کے ساتھ تھے۔جوگویا اسی طرح آپ کے تابع تھے جس طرح جبریل خدا تعالیٰ کے تابع کام کرتا ہے۔اور جبریل کے معنے خدا تعالیٰ کے پہلوان کے ہوتے ہیں۔حضرت ابو بکر بھی اللہ تعالیٰ کے خاص بند ے تھے اوردین کے لئے ایک نڈ رپہلوان کی حیثیت رکھتے تھے۔مدینہ کے پہلے نام یثرب کی وجہ تسمیہ مدینہ کو جو برکت دی گئی اس کی ایک ظاہری صورت بھی تھی۔اس کی حقیقت حضرت عائشہؓ کی ایک روایت سے ظاہر ہوتی ہے۔آپ فرماتی ہیں کہ مدینہ میں آپ کی آمد سے پہلے بخار کی وباء سخت پھیلاکرتی تھی جب آپ وہاں تشریف لے گئے توآپ کی دعا کے طفیل سے وہ وباء دور ہوگئی۔اسی وباء کی وجہ سے پہلے مدینہ کانام یثرب تھا۔کیونکہ یثرب کے معنے رونا پیٹنا ہے۔مگرآنحضرت صلی اللہ علیہ وسلم کی دعاکی وجہ سے وہ وباء دورہوگئی اورآئندہ یثرب کی بجائے آپ نے اس کانام مدینہ رکھا۔(بخاری کتاب فضائل المدینۃ باب المدینۃ تنفی الخبث)۔اسلامی حکومت کی ترقی کا راز مدینہ کو مرکز قرار دینا تھا پھر کشف میں جو یہ دکھایاگیاتھا کہ مسجد اقصیٰ میں جاکر آپ نے تما م انبیاء کو نماز پڑھائی۔یہ خبر بھی مدینہ میں جاکر پوری ہوئی اوراس مقام سے ہی اسلام کی اشاعت ساری دنیا میں ہوئی۔بلکہ اس امر کو دیکھ کرحیرت آتی ہے کہ جب مدینہ سے اسلامی دارالخلافہ کو بدل دیا گیا ،اسی وقت سے اسلام کی ترقی رک گئی۔تیس سال کے عرصہ میں جس میں مدینہ اسلامی دارالخلافہ تھا اس قدر اسلام کوترقی ہوئی اوراس قدر اس کی اشاعت ہوئی کہ اس کے بعد تیرہ سوسال میں اس قدرنہیں ہوئی۔اگرکہو کہ یہ برکات توخود رسول کریم صلعم نے دی تھیں۔تواس کا جواب یہ ہے کہ اس قسم کی برکات کوئی انسان نہیں دے سکتا انسان میں کہاں طاقت ہے کہ ایسی پیشگوئی کرے اوراس کو پوراکردکھائے۔آپ نے جودعاکی وہ اللہ تعالیٰ کی اس پیشگوئی کی تائید میں تھی۔اسراء میں مسلمانوں کے ملک شام پر قبضہ کرنے کی پیشگوئی (۲)دوسری صورت میں نے یہ بتائی تھی کہ مسجد اقصیٰ سے مراد بنی اسرائیل والی مسجد اقصیٰ بھی ہے اس صورت میں یہ تعبیر ہوگی کہ آپ کو اس ملک پر قبضہ دیا جائے گا۔چنانچہ یہ تعبیر بھی پوری ہوئی اور رسول کریم صلی اللہ علیہ وآلہ وسلم کے دوسرے خلیفہ کے وقت میں اس جگہ پر مسلمانوں کاقبضہ ہوگیا اورتیرہ صدیوں تک قبضہ رہا۔اب عارضی طورپر یہ علاقہ عیسائیوں کے قبضہ میں چلا گیاہے۔

مگریہ بھی ایک پیشگوئی کے ماتحت ہے۔اس کا زمانہ ختم ہونے پر پھر یہ ملک واپس رسول کریم صلی اللہ علیہ وسلم کے اتباع کے ہاتھ میں آجائے گا۔خواہ بہت جلد خواہ کچھ وقفہ کے بعد اس صورت میں راتوں رات وہاں جانے کے یہ معنے لئے جائیں گے کہ بیت المقدس کی فتح ظاہری جنگوں کے سبب سے نہ ہوگی بلکہ اس رات کے دیکھے ہوئے نظارہ کی وجہ سے ہوگی۔چنانچہ واقعہ بھی یہی ہے ورنہ عربوں کا ایک چھوٹاسالشکر قیصر جیسے بڑے بادشاہ کامقابلہ کب کرسکتا تھا۔یہ توالٰہی کلام جو سورۃ اسراء والی رات میں ناز ل ہواتھا اسی کااثر تھا کہ بے سروسامان عربوںکے سامنے قیصر کاباسامان اورفنون حرب کی تعلیم پایا ہوالشکر اس طرح بھاگتاجاتاتھا جیسے شیر کے سامنے ہوں۔اگر کوئی اعتراض کرے کہ یہ ملک توحضرت عمرؓ کے زمانہ میں فتح ہواتھا۔تواس کا جواب یہ ہے کہ نبی کے اتباع پیشگوئیوں میں اسی کے وجود میں شامل سمجھے جاتے ہیں اوراس کی مثالیں کثرت سے اسلام اورپہلے انبیاء کے لٹریچر میں پائی جاتی ہیں۔مسجد اقصیٰ کو دیکھنے سے عیسائیت اور یہودیت پر اقتدار کی طرف اشارہ (۴)چوتھی بات تعبیر الرؤیاء کے مطابق میں نے یہ بتائی تھی کہ علاقہ کے علماء بھی مسجد کی شکل میں دکھائے جاتے ہیں اس تعبیر کے مطابق ہم دیکھتے ہیں کہ اس ملک پر نہ صرف سیاسی قبضہ مسلمانوں کوحاصل ہوا بلکہ مذہباً بھی اکثر حصہ ملک کامسلمان ہوگیا او ر تیر ہ سوسال میں یروشلم اسلامی علماء کا مرکز بنارہاہے۔یہ تغیرپیداکرنا بھی کسی انسان کی طاقت میں نہ تھا اللہ تعالیٰ ہی ایساکرسکتاتھا۔آنحضرت ؐ کے واقعہ اسراء اور موسیٰ کے سفر میں فرق یہ عجیب بات ہے کہ موسیٰ کو بھی ایک نظارہ دکھایا گیا تھا اوراس کے متعلق جو الفاظ آتے ہیں وہ بھی اس واقعہ کے الفاظ سے ملتے جلتے ہیں۔حضرت موسیٰ ایک سفر پر تھے کہ انہوں نے ایک جگہ آگ دیکھی تواللہ تعالیٰ نے فرمایا بُوْرِكَ مَنْ فِي النَّارِ وَ مَنْ حَوْلَهَا١ؕ وَ سُبْحٰنَ اللّٰهِ رَبِّ الْعٰلَمِيْنَ (النمل :۹)کہ جو اس آگ میں پڑے گا وہ بھی بابرکت اورجو اس کے گرد آکر بیٹھے گاوہ بھی بابرکت ہوگا اور وہ آگ محبت الٰہی کی آگ تھی اورپھر جس طرح وہاں سبحان کالفظ آیا تھااسی طرح اس جگہ سبحان بھی آیا ہے۔اورجس طرح وہاں حَوْلَہُ آیا ہے اسی طرح یہاں بھی بَارَکْنَا حَوْلَہُ فرمایا ہے بعض نے اس آیت کی تفسیر کرتے ہوئے لکھا ہے کہ آگ سے مراد اللہ تعالیٰ ہے (قرطبی زیر آیت بورک من فی النار)مگر یہ غلط ہے۔کیونکہ آیت کے الفاظ یہ ہیں کہ جو آگ میں ہے اسے برکت دی گئی ہے۔پس آگ سے مراد اللہ تعالیٰ نہیں بلکہ محبت الٰہی ہے اوریہ بتایاہے کہ جو محبت الٰہی کی آگ میں اپنے آپ کو ڈا ل دے اُسے برکت دی جاتی ہے محبت کو دنیا کی کل زبانوں میں آگ سے تشبیہ دی جاتی ہے۔بات یہ ہے کہ جس جگہ اللہ تعالیٰ اپناجلال دکھاتا ہے اس کو برکت دیتا ہے اوروہاں سے اس کی

سبوحیت کاظہور ہوتاہے۔اوران دونوں نظاروں میں یعنی اس میں جو موسیٰ نے دیکھا اور اس میں جو آنحضرت صلعم نے دیکھا ان دونوں باتوں کی طرف اشارہ ہے۔حضرت موسیٰ کاایک اورواقعہ بھی اس واقعہ سے ملتاہے اوروہ وہ واقعہ ہے جو اگلی سور ۃ کہف میںبیان ہواہے اس کی اس واقعہ سے جو مشابہت ہے اس جگہ پر بیان کی جائے گی۔اسراء میں آنحضرت ؐ کی بعثت ثانی کی پیشگوئی میرے نزدیک اس کشف میں رسول کریم صلی اللہ علیہ وسلم کے ایک روحانی سفر کی طرف بھی اشار ہ ہے اوریہ بتایا ہے کہ جب اسلام پرتاریکی کا زمانہ آئے گا اس وقت اللہ تعالیٰ محمد رسول اللہ صلی اللہ علیہ وسلم کو آپؐ کے تابع وجود کے واسطہ سے پھر دنیا کی ہدایت کے لئے مقرر کرے گا۔اوراس تابع کے واسطہ سے وہی برکات مسلمانوں کوپھر ملیں گی جوانبیاء بنی اسرائیل کو اور ان کے اتباع کو ملی تھیں اسی کی طرف سورئہ جمعہ میں بھی اشارہ ہے جہاں اللہ تعالیٰ فرماتا ہے هُوَ الَّذِيْ بَعَثَ فِي الْاُمِّيّٖنَ رَسُوْلًا مِّنْهُمْ يَتْلُوْا عَلَيْهِمْ اٰيٰتِهٖ وَ يُزَكِّيْهِمْ وَ يُعَلِّمُهُمُ الْكِتٰبَ وَ الْحِكْمَةَ١ۗ وَ اِنْ كَانُوْا مِنْ قَبْلُ لَفِيْ ضَلٰلٍ مُّبِيْنٍ۔وَّ اٰخَرِيْنَ مِنْهُمْ لَمَّا يَلْحَقُوْا بِهِمْ١ؕ وَ هُوَ الْعَزِيْزُ الْحَكِيْمُ(الجمعة :۳،۴)یعنی خداہی ہے جس نے امیوں میں ان میں سے ہی رسول بھیجا ہے جو ان سے اللہ تعالیٰ کے نشانات بیان کرتاہے اورکتاب اورحکمت سکھاتا ہے اورانہیں پاک کرتا ہے حالانکہ اس سے پہلے وہ کھلی کھلی گمراہی میں مبتلاتھے۔اسی طرح آنحضر ت صلی اللہ علیہ وسلم ایک اورجماعت کوبھی دین سکھائیں گے جو اب تک ان مسلمانوں سے نہیں ملی بلکہ آیندہ زمانہ میں ظاہر ہوگی اوریہ با ت اللہ تعالیٰ سے بعید نہیں کیونکہ خدا تعالیٰ غالب ہے اوروہ حکمت والا ہے یعنے یہ نہیں برداشت کرسکتا کہ رسول کریم صلی اللہ علیہ وسلم کی امت تباہ ہو اور و ہ رسول کریم صلی اللہ علیہ وسلم کی روحانی بعثت کرکے اس کی اصلاح نہ کرے۔وَ اٰتَيْنَا مُوْسَى الْكِتٰبَ وَ جَعَلْنٰهُ هُدًى لِّبَنِيْۤ اِسْرَآءِيْلَ اورہم نے موسیٰ کو(بھی)کتاب دی تھی اوراس (کتاب )کوہم نے بنی اسرائیل کے لئے ہدایت (کاذریعہ ) اَلَّا تَتَّخِذُوْا مِنْ دُوْنِيْ وَكِيْلًاؕ۰۰۳ بنایاتھا(اوراس میں انہیں حکم دیاتھا)کہ تم میرے سواکسی کو (اپنا )کارساز نہ ٹھہرائو۔حلّ لُغَات۔ھُدًی:ھُدًی ھدٰی کامصدر ہے اورھَدَی کے لئے دیکھو رعد آیت نمبر ۲۸۔یَھْدِی ھَدَی سے ہے اور ھَدَاہٗ الطَّرِیْقَ وَاِلَیْہِ وَلَہٗ کے معنے ہیں بَیَّنَہٗ لَہٗ وَعَرَّفَہٗ بِہٖ۔راستہ دکھایا ، بتایا

اور واضح کیا۔ھَدٰی فُلَانًا: تَقَدَّمَہٗ اس کے آگے آگے چل کر منزل مقصود تک لے گیا۔ھَدَاہٗ اللہُ اِلَی الْاِیْمَانِ: اَرْشَدَہٗ إِلَیْہِ۔ایمان کی طرف رہنمائی کی۔(اقرب) بنی اسرائِیْل اِسْرَائِیْلُ حضر ت یعقوب کالقب ہے (پیدائش باب۳۲۔آیت ۲۸) اور بنواسرائیل حضرت یعقوب کی اولاد کو کہتے ہیں۔دُوْن دُوْنَ کے معنی ہیں۔سِوَا۔مزید تشریح کے لئے دیکھو نحل آیت نمبر ۸۷۔وَکِیْلًا وَکِیْلًا کے معنی کے لئے دیکھو یونس آیت نمبر ۱۰۹۔اَلْوَکِیْلُ۔المَوْکُوْلُ اِلَیْہِ جس کے سپرد کوئی بات کر دی جائے۔وَقَدْ یَکُوْنُ لِلْجَمْعِ وَالْاُنْثٰی۔یہ لفظ واحد و جمع ہر دو کے لئے اور اسی طرح مذکر و مؤنث ہر دو کے لئے بھی استعمال ہوتا ہے۔وَیَکُوْنُ بِمَعْنٰی فَاعِلٍ اِذَا کَانَ بِمَعْنَی الْحَافِظِ اور جب اس کے معنی حافظ یعنی نگہبان کے ہوں توا س وقت اسم مفعول کے معنی میں نہیں بلکہ اسم فاعل کے معنی میں ہوتا ہے۔وُصِفَ بِہِ اللہُ تَعَالٰی اور انہی معنوں میں یہ لفظ اللہ تعالیٰ کی صفات میں سے ہے۔وَقِیْلَ الْکَافِی الرَّازِقُ اور بعض کہتے ہیں کہ جب یہ اللہ تعالیٰ کے لئے استعمال ہو تو اس کے معنی تمام ضرورتوں کو پورا کرنے والے اور رازق کے ہوتے ہیں۔(اقرب) تفسیر۔اٰتَيْنَا سے حضرت موسیٰ اور ان کی قوم کا ذکر اس آیت سے حضرت موسیٰ اوران کی قوم کا ذکرشروع کیا ہے ان آیات کاگذشتہ آیت اورپہلی سورۃ سے کئی طرح تعلق ہے (۱)پہلی آیت میں رسول کریم صلعم اورآپؐ کے اتباع کو بیت المقدس دینے کاوعدہ کیاگیاتھا۔یہ شہر اوراس کے گرد کاملک پہلے الٰہی وعدہ کے مطابق حضرت موسیٰ اوران کی قوم کو ملا تھا۔مگر انہوں نے اللہ تعالیٰ کے احکام کی پرواہ نہ کرکے اسے کھودیا۔پس ان کے واقعہ کو یاد کراکے مسلمانوں کوتوجہ دلائی گئی ہے کہ موسوی قوم کی اچھی میرا ث تم کودی جارہی ہے مگرہوشیار رہنا۔ایسانہ ہو۔بُری میراث بھی لے لواورتباہ ہوجائو۔یہود کے عذاب سے بچنے کا ذریعہ اسلام سے وابستگی ہے (۲)سورئہ نحل کے آخر میں یہود سے تعلق پیدا ہونے کی پیشگوئی کی گئی تھی۔اورہدایت کی تھی کہ ان سے عمدہ رنگ میں بحث کرنا۔یعنی وہ ایک اہل کتاب قوم ہے ان سے مسلمّہ اصول کے مطابق اوران دلائل کے مطابق جوان کی کتب میں مذکور ہیں بحث کرنا۔اب اس طریق بحث کی مثال پیش کرتا ہے یعنی ان کی کتاب سے ہی وہ پیشگوئیا ں پیش کرتاہے جن سے ان کے بگڑ جانے کی خبر اورعذاب الٰہی میں مبتلاہونے کی خبر ملتی ہے۔اوربتاتاہے کہ ان حالات میں یہود کے لئے بہترین راستہ یہ ہے کہ وہ

اس نئے عہد کو قبول کرکے اس عذاب کودور کریں جو خدا تعالیٰ کی طرف سے نازل ہواہے اوراگر ارض مقدس بحیثیت یہود ان کے ہاتھ سے نکل گئی ہے توبحیثیت مسلمان وہ اس میں پھر سے داخل ہوجائیں اس کے سوا ان کے لئے اورکوئی ترقی کی راہ کھلی نہیں ہے۔ذُرِّيَّةَ مَنْ حَمَلْنَا مَعَ نُوْحٍ١ؕ اِنَّهٗ كَانَ (اوریہ بھی کہا تھا کہ اے )ان لوگوںکی نسل جنہیں ہم نے نوح کے ساتھ (کشتی پر )سوار کیا تھا و ہ عَبْدًا شَكُوْرًا۰۰۴ یقیناً(ہمارا)نہایت شکر گذا ربندہ تھا۔حلّ لُغَات۔ذُرِّیّۃ۔ذُرِّیَّۃٌکے لئے دیکھو یونس آیت نمبر۸۴۔الذُّرِیَّۃُ: اَلصِّغَارُ مِنَ الْاَوْلَادِ وَاِنْ کَانَ قَدْ یَقَعُ عَلَی الصِّغَارِ وَالْکِبَارِ مَعًا فِی التَّعَارُفِ۔یعنی ذریۃ کے معنی چھوٹی عمر کے بچوں کے ہوتے ہیں۔لیکن کبھی عرف عام میں چھوٹے اور بڑے سب بچوں کے لئے مشترک طور پر بھی یہ لفظ بولا جاتا ہے۔وَیُسْتَعْمَلُ لِلوَاحِدِ والْجَمْعِ وَاَصْلُہُ الْـجَمْعُ۔اور یہ لفظ ایک بچہ کے لئے بھی اور زیادہ کے لئے بھی بولا جاتا ہے۔گو اصل میں جمع کے لئے ہی یہ لفظ بنا ہے۔(مفردات) شکور: شَکُوْرٌ شَکَرَ سے مبالغہ کاصیغہ ہے۔اورشکر کے معنی کے لئے دیکھو ابراہیم آیت نمبر ۶۔شَکُوْرٌ شَکَرَ سے مبالغہ کا صیغہ ہے اور شَکَرَ کبھی بغیر صلہ اور کبھی’’ ل‘‘ کے صلہ کے ساتھ استعمال ہوتا ہے۔یعنی شَکَرَہٗ وشَکَرَلَہٗ اور اگر شَکَرَ کا’’ ل‘‘ صلہ آئے تو یہ زیادہ فصیح سمجھا جاتا ہے اور شَکَرَہٗ وَشَکَرَلَہٗ کے معنے یہ ہوتے ہیں اَثْنٰی عَلَیْہِ بِمَا اَوْلَاہُ مِنَ الْمَعْرُوْفِ۔کہ کسی کے احسان کے باعث اس کی تعریف کی۔گویا اقرارِ احسان اظہارِ قدر کے ساتھ شکر کہلاتا ہے اور کثرت کے ساتھ اقرارِ احسان کرنے والے کو شکور کہتے ہیں۔تفسیر۔یعنی اس کتاب کے نزول کے بعد ہم نے ان سے کہا کہ اے نو ح کے ساتھیو ں کی ذرّیت تمہارادادانو ح توبڑاشکر گذار بند ہ تھا یعنی تم بھی اپنے با پ کے سپو ت بننااورشکر گذار بننے کی کوشش کرنا۔بعض نے اس قو ل کو آنحضرت صلی اللہ علیہ وسلم کے زمانہ پر محمول کیا ہے(فتح البیان زیر آیت ھذا)۔مگر میرے نزدیک یہ موسیٰ کی قوم ہی کے متعلق ہے۔کیونکہ اس آیت کے بعد بھی پھر موسیٰ کی قوم کا ذکر شرو ع ہو جاتا ہے۔ان

الفاظ میں بنی اسرائیل کو اس طرف بھی توجہ دلائی گئی ہے کہ جس طرح نو ح کو ہم نے طوفان سے بچایا تھا تم کو سمند ر سے نجات دی ہے۔پس نو ح اوران کے ساتھیو ںکی طرح تم بھی شکر گذار بنو۔مسلمانوں کو مخالفت کے طوفان سے نجات دینے کی پیشگوئی اس آیت میں مسلمانوں کو بھی توجہ دلائی گئی ہے کہ ایک مخالفت کے طوفان سے ہم تم کو نجات دینے والے ہیں۔تم بھی ا س کی قدرکرنا۔امت محمدیہؐ اورموسوی میں یہ فرق ہے کہ موسیٰ کی امّت نے شکر گذاری سے کام نہ لیا۔لیکن رسول کریم صلی اللہ علیہ وسلم کے اتباع نے شکر گذاری کا بے نظیر نمو نہ دکھایا۔گوکچھ عرصہ بعد میںمسلمانوں نے بھی ناشکری کانمونہ دکھایااوراسی کی طرف درحقیقت ان آیات میں توجہ دلائی گئی ہے۔وَ قَضَيْنَاۤ اِلٰى بَنِيْۤ اِسْرَآءِيْلَ فِي الْكِتٰبِ لَتُفْسِدُنَّ فِي اورہم نے اس کتاب میں بنی اسرائیل کویہ بات (کھول کر )پہنچادی تھی کہ تم یقیناًاس ملک میں دوبار فساد کروگے۔الْاَرْضِ مَرَّتَيْنِ وَ لَتَعْلُنَّ عُلُوًّا كَبِيْرًا۰۰۵ اوریقیناً تم بہت بڑی سرکشی (اختیار )کروگے۔حلّ لُغَات۔قَضَیْنَا۔قَضَیْنَا قَضٰی(یَقْضِیْ)سے جمع متکلم کاصیغہ ہے۔اورقَضَی الشَّیْءَ کے معنی ہیں اَعْلَمَہٗ وبَیَّنَہٗ۔کسی چیز کو خوب کھو ل کر بتایا(اقرب)پس قَضَیْنَا کے معنے ہوں گے۔اَعْلَمَنَا وَاَخْبَرْنَا۔ہم نے یہ بات کھول کر بتادی۔قَضَی کی مزید تشریح کے لئے دیکھو حجر آیت نمبر۶۷۔قَضَیْنَا قَضٰی سے جمع متکلم کاصیغہ ہے اورقَضٰی بَیْنَ الْخَصَمَیْنِ کے معنی ہیں حَکَمَ وَفَصَلَ۔مدعی اورمدعاعلیہ کے درمیان جھگڑے کافیصلہ کردیا۔قَضَی الشَّیْءَ قَضَاءً:صَنَعَہٗ بِاِحْکَامٍ وَقَدَّرَہٗ۔کسی چیز کو عمدہ طورپر بنایا۔اورا س کاصحیح اندازہ لگایا۔قَضَی الْاَمْرَ عَلَیْہِ :خَتَمَہٗ وَاَوْجَبَہٗ وَاَلْزَمہٗ بِہٖ۔اس کے خلاف بات کو ختم کردیا اوراس پر اس کوواجب کر دیا اوراس کاپوراکرنا ا س کا فرض قرار دیا۔الشَّیءَ:اَعْلَمَہٗ وَ بَیَّنَہُ کسی معاملہ کا اعلان کیا اور اس کو کھول کر بیان کیا۔قَضٰی لَکَ الاَمْرَاَیْ حَکَمَ لَکَ کسی معاملہ کاتیرے حق میں فیصلہ کردیا (اقرب) وَلَتَعْلُنَّ۔وَلَتَعْلُنَّ عَلَا (یَعْلُوْ)سے مضارع کاصیغہ ہے۔اورعَلَاالشَّیْءُ کے معنے ہیں اِرْتَفَعَ۔کوئی چیز بلند ہوئی۔علَافُلَانٌ فِی الْاَرْضِ۔تَکَبّرَوَتَجَبَّرَ۔اس نے تکبر اورسرکشی کی۔عَلَا فُلَانًا :غَلَبَہُ وَ قَھَرَہُ کسی پر

غالب آیا۔عَلَا فُلَانًابِالسَّیْفِ ِ:ضَرَبَہُ۔اسے تلوارماری۔عَلَاالْمَکَانَ۔صَعِدَہُ۔کسی جگہ پر چڑھا۔عَلَا فِی الْمَکَارِمِ۔شرف خوبیوں میں ممتازہوا (اقرب) پس وَلَتَعْلُنََّّ کے معنے ہوں گے۔کہ تم سرکشی کروگے۔تفسیر۔مسلمانوں کے لئے یہود سے عبرت حاصل کرنے کا موقعہ فرمایا کہ تمہارا نبی مثیل موسیٰ قراردیاگیا ہے اوراس مشابہت کو پوراکرنے کے لئے اسے بیت المقدس اوراس کے گرد کا علاقہ دیاجانے والا ہے۔پس تم کو اس امر میں احتیاط کرنی چاہیے کہ جو کچھ بنی اسرائیل سے بعدمیں معاملہ ہواوہ تم سے نہ ہو اورو ہ واقعہ یہ بیان فرماتا ہے کہ بنی اسرائیل کے متعلق ہم نے خبر دی تھی کہ دودفعہ تم دنیا میں عظیم الشان فساد کے مرتکب ہوگے۔اورسخت مظالم کرو گے اور تم کو اس کی سزا میں تباہ کردیاجائے گا۔گوسزادینے کا یہاں لفظاً ذکر نہیں کیا گیا۔لیکن اگلی آیت سے یہ مضمو ن ظاہر ہے۔اس آیت سے دو امور کا ثبوت اس آیت سے مندرجہ ذیل امور نکلتے ہیں(۱)اس میں قَضَیْنَا فی الْکِتٰبِ کے الفاظ ہیں۔جن سے مراد حضرت موسیٰ کی کتاب ہے (۲)اس آیت میں یہ بتایا گیا ہے کہ بنی اسرائیل کے دودفعہ باغی ہو کر الٰہی عذاب میں مبتلاہونے کی خبر اس کتاب میں پہلے سے دےدی گئی تھی۔نئے اورپرانے مفسرین نے اس آیت کی تفسیر میں دوغلطیاں کی ہیں۔اول تویہ کہ بنی اسرائیل کی تباہی کے بعض واقعا ت تودرج کردئے ہیں۔لیکن قرآنی الفاظ کی صداقت کے اظہارکے لئے وہ پیشگوئی درج نہیں کی۔جس کا ذکر قرآن کریم نے کیا ہے۔دوم جنہوں نے پیشگوئی بیا ن کرنے کی طرف توجہ کی ہے انہوں نے یہ نہیں سوچا کہ اس آیت میں یہ بتایا گیا ہے کہ پیشگوئی موسیٰ علیہ السلام کی کتاب میں بیان کی گئی تھی۔میں نے ان دونوں امور کو مدنظر رکھا ہے اورموسیٰ کی کتب سے پیشگوئیاں بیا ن کی ہیں اورواقعات تاریخی جمع کرکے لکھے ہیں۔عَلَا کے معنی عَلَا بمعنے ظلم ہے یعنی تم لوگوں کے اوپر ظلم کروگے جبر کرنے لگ جائو گے اورتکبرکرو گے اور ظلم سے کام لو گے۔کیونکہ عَلَا (یَعْلُوْ۔عَلُوًّا) فُلَانٌ کے معنی ہوتے ہیں۔تَکَبَّرَ وَتَجَبَّر یعنی تکبر کیا اورظلم سے کام لیا۔وَعَلَا فُلَانًا بِالسَّیْفِ :ضَرَبَہٗ۔اس کو تلوار سے مارا۔یہود کی تباہی کا ذکر بائیبل میں فِی الْکِتٰبِ۔کہہ کر یہ بتایا ہے کہ اس کا ذکر موسیٰ کی کتاب میں ہے۔چنانچہ موسیٰ کی کتاب میں بھی اس کا ثبوت ملتا ہے استثناء باب ۲۸۔آیت ۱۵میں لکھا ہے ’’لیکن اگر تُو خداوند اپنے خدا کی آواز کاشنوانہ ہو گا کہ اس کے سارے شرعوں اورحکموں پر جو آج کے دن مَیں تجھے بتاتاہوںدھیان رکھ کے عمل

کرے توایسا ہوگا کہ یہ ساری لعنتیں تجھ پر اتریں گی اورتجھ تک پہنچیں گی۔‘‘اس کے بعد ان لعنتوں کا ذکر کیا ہے جونافرمانی کی وجہ سے ان پر اتریں گی۔چنانچہ فرماتا ہے ’’خداوند تجھ کواور تیرے بادشاہ کو جسے تواپنے اوپر قائم کرےگا ایک گروہ کے درمیان جس سے تُو اورتیرے باپ دادے واقف نہ تھے لے جائے گا۔‘‘آیت ۳۶۔پھر لکھا ہے۔’’خداوند ایک گروہ دور سے زمین کی انتہاسے ایساجلد بلکہ جیسا عقاب اُڑتا ہے تجھ پر چڑھالائے گا و ہ ایک گروہ ہوگی جس کی زبان تونہ سمجھے گا وہ ترشرو گروہ ہو گی جونہ بوڑھے کاادب نہ جوان پر کرم کرے گی اورو ہ تیر ی مواشی کاپھل اورتیری زمین کاپھل کھاجائےگی یہاںتک کہ توہلاک ہو جائے گا۔اس لئے کہ غلّے اورمَے اور تیل اورتیری گائے بیل کی بڑھتی اوربھیڑ بکری کے گلّوں سے تیرے لئے کچھ نہ چھوڑے گی یہاں تک کہ وہ تجھے فناکردے گی اوروہ تجھے تیرے سب پھا ٹکوں میں آ گھیرے گی یہاں تک کہ تیری اونچی اورمحکم دیواریں جن کا تجھے اپنے سارے ملک میں بھروساتھا گرجائیں گی اوروہ تجھے اس ساری زمین میں جسے خداوند تیرے خدا نے تجھے دیا ہے ہرایک شہر کے سب پھاٹکوں میں آگھیر ے گی۔اورتواپنے ہی بدن کا پھل ہاں اپنے بیٹوں اوراپنی بیٹیوں کاگوشت جنہیں خداوند تیرے خدا نے بخشا تھا اس محاصرہ کے وقت اوراس تنگی میں جو تیرے بیریوں کے سبب سے تجھ پر ہوگی کھائے گاوہ شخص جو تم میں نرم دل اوربہت ناز پروردہ ہو گا اس کی بھی نظر اپنے بھائی کی طرف اور اپنی ہمکنار جو روکی طرف اوراپنے باقی لڑکوں کی طرف جنہیں اس نے چھوڑ دیاہو گا بری ہو گی یہاں تک کہ وہ اپنے بچوں کے گوشت میں سے جسے وہ کھائے گاانہیں ان میں سے کسی کو کچھ نہ دے گا کیونکہ اس محاصرے اورتنگی میں جوتیرے دشمنو ں کے باعث سے تیرے سارے پھاٹکوں میں تجھ پر ہوگی اس کے لئے کچھ نہ باقی رہے گااوروہ عورت بھی جو تمہارے درمیان نرم دل اورنہایت نازنین ہو گی ایسی کہ نزاکت اورنرمی سے اپنے پائوں کاتلو ازمین پر لگانے کی جرأت نہیں رکھتی اس کی نظر اپنے ہمکنارشوہر کی طرف اوراپنے بیٹے کی طرف اوراپنی بیٹی کی طرف بُری ہوگی۔‘‘ آیت ۴۹تا۵۶۔پھرلکھا ہے :۔’’اوریوں ہو گا کہ جس طرح خداوند نے تم سے خوش ہو کر تمہارے ساتھ نیکی کی اور تمہیں بہت کردیا اسی طرح خداوند تمہاری بابت خوش ہوگا کہ تمہیں ہلاک کرے اورنیست و نابود کرڈالے اورتواس سرزمین سے جس کاتومالک ہونے جاتا ہے جڑھ سے اکھا ڑ ڈالا جائے گا۔اورخداوند تجھ کو سب قوموں کے درمیان زمین کے اس سرے سے اس سرے تک تِتّربتّرکرے گا اوروہاں تُو غیر معبودوں کی جو لکڑیا ںاورپتھر ہیں جس سے نہ تُونہ تیرے باپ دادے واقف تھے پر ستش کرے گا۔‘‘آیت ۶۳و۶۴۔

·

آج 10 میں سے 10 باقی