سُوْرَۃُ بَنِیْٓ اِسْرَآءِیْلَ
تفسیر کبیر (جلد ۶), حصہ 5
اسی مضمو ن کی تشریح کی گئی ہے قیامت کا ذکر نہیں کیاگیا۔بلکہ اگلی آیتوں میں بھی وہی مضمون بیان ہواہے۔یَدْعُ الْاِنْسَانُ کا مطلب اور دَعَا ہُ کے مختلف معنی اس سے پہلے کہ میں ا س آیت کامفہوم بتائوں۔میںاس آیت کاترجمہ سمجھادیتاہوں۔دَعَاہُ کے معنے اسے پکارنے اس کی طرف توجہ کرنے اوراس سے مدد مانگنے کے ہوتے ہیں لیکن دَعَابِہِ کے معنے اسے اپنے پاس آنے کی دعوت دینے کے ہوتے ہیں۔پس اس آیت کامفہوم یہ نکلتاہے کہ جبکہ انسان ظاہری طور پر خیر کوبلارہاہوتاہے وہ حقیقت میں شرکوبلارہاہوتاہے یایہ نکلتاہے کہ خیر کو بلانے کاجو حق ہے اس کی مانند و ہ شرکو بلاتا ہے۔قوموں کو ترقی دینے سے اللہ تعالیٰ کی غرض ان دونوں معنوں کے روسے آیت کامطلب یہ ہے کہ جب قوموں کوترقی ملتی ہے و ہ اس امر کو بھول جاتی ہیں کہ یہ ترقی انہیں اس لئے ملی ہے کہ تاوہ دین و دیانت کو قائم کریں اوربنی نوع انسان کے لئے امن اورترقی کے سامان پیداکرکے خداکے فضلوں کو حاصل کریں۔اور وہ دنیاوی نعمتوںکوجمع کرنے میں مشغول ہوجاتی ہیں۔اورلوگوں کے حقوق کو نظرانداز کردیتی ہیں۔اوردنیوی عیش و آرام کے سامان جمع کرکے یہ سمجھتی ہیں کہ وہ اپنے لئے اوراپنی اولادوں کے لئے خیر کے سامان جمع کررہی ہیں۔حالانکہ حقیقت میں وہ اس ذمہ واری کوبھول کرجوان کے کندھوں پررکھی جاتی ہے اپنی تباہی کے سامان پیداکررہی ہوتی ہیں اورآخر تباہ ہوجاتی ہیں۔قوم کی ترقی کا وقت ہی زیادہ نازک ہوتا ہے پس کسی قوم کوترقی ملنے کا وقت اس کے لئے بہت نازک ہوتا ہے کیونکہ اس کے بعد اصل خیر اس کی نظرسے پوشیدہ ہوجاتی ہے اورشرّکو خیرسمجھ کر وہ اپنے راستہ سے بھٹک جاتی ہے۔وَ كَانَ الْاِنْسَانُ عَجُوْلًا کہہ کر اس طرف اشار ہ کیاہے کہ مومن کو جو خیر ملتی ہے وہ تومرنے کے بعد ملتی ہے۔اس دنیا کی فتوحات اس خیر کے حصہ کے لئے مواقع بہم پہنچانے کے لئے د ی جا تی ہیں لیکن بعض لوگ جلدی کرتے ہیں اوراس دنیا کی ترقی کو اصل خیر سمجھ کر اس کے سمیٹنے میں لگ جاتے ہیں۔اورخود اپنے اعمال سے اپنی تباہی کے سامان جمع کرلیتے ہیں۔غرض ا س آیت میں اس طرف توجہ دلائی گئی ہے کہ اگر کسی قوم کو ترقی ملے مثلاًحکومت ملے۔جاہ وثروت ملے تواسے ایسے کام کرنے چاہئیں کہ وہ نعمت قائم رہے۔اوراس کے ذریعہ سے اُخروی خیر کاذخیر ہ جمع ہوتا رہے۔نہ کہ ایسے کام جس سے و ہ جلدی زائل ہوجائے اوراُخروی انعامات کے حصول کے مواقع ہاتھ سے نکل جائیں۔دُعَائَ ہٗ بِالْخَیْرِ کے ایک معنی تواوپر بتائے گئے ہیں۔دوسرے معنے یہ بھی ہوسکتے ہیں کہ انسان شرّکو اسی طرح بلاتاہے جس
طرح وہ خیر کو بلارہاہوتاہے۔یعنی انسان بھی عجیب ہے کہ منہ سے توخیر مانگ رہاہوتاہے۔یعنی خواہش تویہی رکھتاہے کہ اسے ہرقسم کی خیر مل جائے۔مگرعمل کے لحاظ سے وہ شرّکوبلارہاہوتاہے۔گویا اپنی نادانی سے ایک ہی وقت میں دومتضاد باتیں طلب کرتاہے منہ سے خیر اورعمل سے شر۔ان معنوں کے روسے اس آیت کامطلب یہ ہوگاکہ اصل کامیابی تب ہوتی ہے جب انسان کادل اوراس کاعمل متفق ہوں۔یعنی اگردل سے خیر مانگتاہے تواعمال سے بھی خیر ہی مانگے۔(۳)تیسری صورت یہ بھی ہوسکتی ہے کہ ہٗ کی ضمیر کو انسان کی طرف پھیراجائے۔اوراسے مفعول کی ضمیر قرار دیاجائے۔اوردعا کافاعل خدا تعالیٰ کوقرار دیاجائے۔اس صورت میں معنے یہ ہوں گے کہ انسان شرکواسی جوش سے بلاتا ہے جس جوش سے اللہ تعالیٰ اس کو یعنی بندہ کو خیر کی طرف بلارہاہوتاہے۔یعنی ہم توکہتے ہیں کہ اے انسان تُو بھلائی کی طرف آ۔مگر وہ کہتاہے اے بلاتُو میر ی طرف آ۔ان معنوں کے روسے اس آیت کایہ مطلب ہوگاکہ ہم توانسانوں کے لئے خیر کے سامان مہیاکررہے ہیں۔مگر ان میں سے بعض اپنے اعمال سے شرکو بلانے میں لگے ہوئے ہیں اوراپنی تباہی کاساما ن پیداکررہے ہیں۔عَجُوْلًا کے لفظ میں اس حقیقت کو ظاہر کیاکہ انسان غوروفکر سے کام نہیں لیتا۔اگروہ غوراورفکر سے کام لے توضرور اسے معلوم ہوجائے کہ میں غلطی کررہاہوں۔نبی کریم صلی اللہ علیہ وسلم نے فرمایا کہ غصے والا انسان اگرذراٹھہر جائے تواس کاغصہ ضرور کم ہوجائے۔اوراسے سوچنے کاموقعہ ملے۔(مسند احمد مسند ابو ذر غفاری) تمام بدیوں کی وجہ جلد بازی ہوتی ہے تمام بدیوں کی وجہ جلد بازی ہی ہوتی ہے۔اگرایک انسان بدی کے وقت ذراتأنّی سے کام لے اورپہلے سوچ لے کہ یہ کام میرے لئے مفیدہے یامضر۔تویقیناًوہ اس بدی سے بچ جائے۔وَ جَعَلْنَا الَّيْلَ وَ النَّهَارَ اٰيَتَيْنِ فَمَحَوْنَاۤ اٰيَةَ الَّيْلِ وَ جَعَلْنَاۤ اورہم نے رات اوردن (کے)دونشان بنائے ہیں اس طرح پر کہ رات والے نشان کے اثر کوتوہم نے مٹادیا اور اٰيَةَ النَّهَارِ مُبْصِرَةً لِّتَبْتَغُوْا فَضْلًا مِّنْ رَّبِّكُمْ وَ لِتَعْلَمُوْا دن والے نشان کو ہم نے بینائی بخشنے والابنادیا۔تاکہ تم (آسانی سے )سالوں کی گنتی اورحساب معلوم کرسکو اورہم
عَدَدَ السِّنِيْنَ وَ الْحِسَابَ١ؕ وَ كُلَّ شَيْءٍ فَصَّلْنٰهُ تَفْصِيْلًا۰۰۱۳ نے ہرایک چیز کو خوب کھول کربیان کردیاہے۔حلّ لُغَات۔مُبْصِرَۃٌ مُبْصِرَۃٌ اَبْصَرَسے اسم فاعل مؤنث کاصیغہ ہے اوراَبْصَرَہُ (متعدی)کے معنے ہیں جَعَلَہٗ بَصِیْرًا۔اس کو دیکھنے والابنادیا(یعنے دکھایا)اَبْصَرہٗ :رَاہُ۔اس کودیکھا۔اَخْبَرَہُ بِمَاوَقَعَتْ عَیْنُہُ عَلَیْہِ۔اس کو وہ بات بتائی جس پر اس کی نظرپڑی تھی۔اَبْصَرَ الطَّرِیْقُ(لازم)اِسْتَبَانَ وَوَضَحَ۔راستہ واضح ہوگیا۔(اقرب)پس مُبْصِرَۃً کے معنے ہوئے بینائی بخشنے والی۔مَـحَوْنَا:مَـحَوْنَا مَحٰی سے جمع متکلم کاصیغہ ہے اورمَـحَاالشَّیْءَ (یَمْحُوْ)کے معنے ہیں۔اَزَالَہٗ وَاَذْھَبَ اَثَرَہُ۔کسی چیز کو مٹادیا اوراس کے اثر کودورکردیا (اقرب) وَالْمَحْوُ: اَلسَّوَادُ فِی الْقَمَرِ۔اورمحوچاند کے بے نور حصہ کو بھی کہتے ہیں (تاج )پس مَـحَوْنَااٰیَۃَ اللّیْلِ کے معنے ہوں گے کہ رات والے نشان کو ہم نے مٹادیا (۲)بے نورکردیا۔فَضْلًا: اَلفَضْلُ(فَضَلَ الشَّیْءُ یَفْضُلُ)کامصدرہے۔اوراس کے معنے ہیں۔ضِدُّالنَّقْصِ۔خوبی۔فضیلت۔اَلْبَقِیَّۃُ۔بقیہ (حاصل تفریق کوبھی انہی معنوں میں فضل کہتے ہیں )اَلزِّیَادَۃُ۔زیادتی۔اَ لْاِحْسَانُ۔احسان۔وَالْفَضْلُ فِی الْخَیْرِوَ یُسْتَعْمَلُ لِمُطْلَقِ النَّفْعِ۔نفع(اقرب) العدد:اَلْعَدَدُ اِسْمٌ مِنْ عَدَّبِمَعْنَی الْاِحْصَاءِ یہ عدّکااسم ہے۔اوراس کے معنے ہیں۔شمار۔گنتی۔الْمَعْدُوْدُ۔شمار کیاہوا۔اس کی جمع اعداد آتی ہے (اقرب)پس لِتَعْلَمُوْا عَدَدَ السِّنِيْنَ کے معنے ہوں گے کہ تم سالوں کی گنتی کو معلوم کرسکو۔تفسیر۔فَمَحَوْنَاۤ اٰيَةَ الَّيْلِ میں فاء تعقیب کی نہیں۔یعنی یہ مطلب نہیں کہ خدا تعالیٰ نے پہلے رات اوردن بنائے پھران میں سے ایک کو مٹادیا۔بلکہ یہ فاء تفسیر ی ہے۔اورمطلب یہ ہے کہ ہم نے رات اوردن کو اس صورت میں بنایاہے کہ رات تو ایک مٹاہوانشان ہے۔اوردن ایک روشن نشان ہے۔یعنی رات سے مخفی فائدہ پہنچتاہے اوردن سے ظاہر۔اوریہ دونوں اپنی اپنی جگہ نفع بخش ہیں۔چنانچہ دونوں کے ذریعہ تم نفع حاصل کرتے ہو۔اور تاریخوں کاعلم ان کے ذریعہ سے حاصل کرتے ہو۔نیزحساب کافائدہ بھی حاصل کرتے ہو۔تاریخ کافائدہ توظاہر ہی ہے۔حسا ب کاعلم اس طرح کہ لمبی تاریخ کویاد رکھنے سے ہی حساب پیدا ہوتا ہے۔نیز اس طرح کہ سال کا وقت تجویز کرنے کاتعلق چاند اورسورج سے ہے اورصحیح جنتری سو رج کی رفتار کے علم کے بغیر نہیں بن سکتی۔
سورج اور چاند کی گردش کا تعلق حساب سے اسی طرح سورج اورچاند کی گردش کاتعلق بھی حساب سے ہے۔اس پر غور کرتے ہوئے انسان کو باریک در باریک حساب سے واسطہ پڑتا ہے۔چنانچہ آج تک شمسی حساب کوانسان مکمل نہیں کرسکا۔اورشمسی سال کی تعیین میں غلطیاں کرتاچلاآیاہے جسے علم حساب کی ترقی کے ساتھ ساتھ دورکیاجارہا ہے۔رات کی تاریکی اور دن کی روشنی انسان کی جسمانی ترقی کا ذریعہ ہیں اس آیت میں یہ بتلایاگیاہے کہ نشان دو قسم کے ہوتے ہیں۔ایک ترقی کا نشان ہوتاہے۔اورایک مٹنے کا نشان ہے۔پس تم ایسے نشان طلب کرو جن کے ذریعہ سے ترقی ہو۔ایسانشان نہ مانگو جس سے تم مٹ جائو۔اورترقی اورتنزل دونوں حالتوں کو روحانی کمالات کے حصو ل کاذریعہ بنائو۔جس طرح رات جو تاریکی کا نشان ہے۔اوردن جوروشنی کا نشان ہے۔دونوں کو اللہ تعالیٰ نے تمہاری جسمانی ترقی کاذریعہ بنادیا ہے نہ تکلیف کے وقتوں میں خدا کوبھولو نہ کامیابی کے وقتوں میں اس کو چھوڑو۔وَ كُلَّ اِنْسَانٍ اَلْزَمْنٰهُ طٰٓىِٕرَهٗ فِيْ عُنُقِهٖ١ؕ وَ نُخْرِجُ لَهٗ اور(ہم نےذمہ وار بنایا ہے )ہرانسان کو (اس طرح کہ )ہم نے اس کی گردن میں اس کے عمل کوباندھ دیا ہے يَوْمَ الْقِيٰمَةِ كِتٰبًا يَّلْقٰىهُ مَنْشُوْرًا۰۰۱۴ اورہمقیامت کے دن اس (کے اعمال )کی ایک کتاب نکال کراس کے سامنے رکھ دیں گے جسے وہ (بالکل)کھلی ہوئی پائےگا۔حلّ لُغَات۔اَلْزَمْنٰہُ اَلْزَمْنٰہُ اَلْزَمَ سے جمع متکلم کاصیغہ ہے۔اوراَلْزَمَ الشَّیْءَ کے معنے ہیں۔اَثْبَتَہُ وَاَدَامَہُ۔کسی چیز کو ہمیشہ رکھا۔اَلْزَمَ فُلَانًا الْمَالَ والعَمَلَ اَوْجَبَہ عَلَیْہ۔اس پر کسی کام کو کرنا یاکسی مال کو اداکرنا واجب کردیا۔(اقرب) طَائِرٌ اَلطَّائِرُ کُلُّ ذِیْ جَنَاحٍ مِنَ الْـحَیَوَانِ۔پرندہ۔نیز اس کے معنے ہیں۔اَلْحَظُّ۔نصیب۔رِزْقُ الْاِنْسَانِ۔انسان کی روزی۔عَمَلُہُ الَّذِی قُلِّدَ ہُ وَطَارَعَنْہُ مِنْ خَیْرٍ اَوْشَرٍّ۔انسانی اعمال خواہ اچھے ہوں یا برے۔کہتے ہیں ھُوَمَیْمُوْنُ الطَّائرِ:اَیْ مُبارَکُ الطَّلْعَۃِ۔وہ مبارک چہرے والا ہے۔نیز مسافر کو رخصت
کرتے وقت دعا کے طور پر کہتے ہیں۔سِرْ عَلَی الطَّائِرِالْمَیْمُوْنِ۔کہ مبارک شگون پر چل۔اورجب ھُوَ سَاکِنُ الطَّائِرِکہیں تواس کے معنے ہوتے ہیں۔حَلِیْمٌ ھَادِیٌ کہ و ہ بردبار متحمل اورسنجیدہ ہے(اقرب)پس اَلْزَمْنٰہُ طَائِرَہٗ فِی عُنُقِہٖ کے معنے ہوں گے کہ ہم نے ا س کے عمل کو اس کی گردن میں باندھ دیا ہے۔منْشُوْر مَنْشُوْرٌنَشَرَسے اسم مفعول ہے اور نَشَرَ الْکِتَابَ کے معنے ہیں۔بَسَطَہُ۔اس کو کھولا (اقرب) پس مَنْشُوْرٌ کے معنے ہوں گے کھولاہوا۔تفسیر۔اس آیت میں فرماتا ہے کہ ہم نے انسان کاعمل اس کی گردن میں باندھ دیا ہے۔یاگردن کے ساتھ چسپاں کردیاہے اورقیامت کے دن اسے اس کے سامنے ایک کتاب کی صورت میںنکالیں گے جسے وہ کھلی ہوئی پائے گایعنی اس کے مطابق اس سے سلوک ہوگا۔کیونکہ کھاتہ کارجسٹر یاحساب لکھنے کے لئے کھولاجاتاہے یاحساب چکانے کے لئے۔انسان کا کوئی فعل ضائع نہیں ہوتا اس آیت میں یہ بتایا گیا ہے کہ ہرانسان کو سمجھ لیناچاہیے کہ اس کاکوئی فعل ضائع نہیں ہوتا۔کیونکہ ہم نے اس کے ساتھ اس کاعمل گردن میں چسپاں کردیاہے۔گردن میں چسپاں کرنے کے الفاظ یہ بتانے کے لئے استعمال کئے ہیں۔کہ اس کے ساتھ اس کاتعلق دائمی ہے۔جب تک وہ رہے گا اس کے اعمال کااثربھی رہے گا۔عمل کے لئے جو طائر کالفظ استعمال کیاگیا ہے اس سے اس طرف اشارہ کیا ہے کہ جیسے طائراڑجاتاہے اورنظر نہیں آتا۔ویسے ہی انسان اپنے عمل کو بھو ل جاتا ہے بلکہ دوسرے لوگ بھی بھول جاتے ہیں۔لیکن یہ طائروہ ہے جو ایک رسی سے انسان کی گردن سے بندھاہواہے۔اس لئے گو وہ اُڑجائے اورنظر نہ آئے مگراس سے تعلق انسان کانہیں ٹوٹتا۔ایک نہ ایک دن اس کے نتائج ظاہر ہوکرہی رہتے ہیں۔دوسرے یہ بتایاہے کہ جیسے پرند ے کے پائوں میںلمبی رسی باندھ کر اسے چھوڑ دیاجاتاہے تووہ رسی کی حد تک اڑ کر چلا جاتا ہے۔اسی طرح انسانی اعمال کاحال ہے کہ بعض دفعہ وہ معمولی نظر آتے ہیں لیکن ان کااثر دورتک جاتا ہے۔انسانی اعمال کی بندھے ہوئے پرندے سے مشابہت اس آیت میں انسان کو بتایا ہے کہ انسان کو اپنے اعمال میں بہت ہوشیار اور محتاط رہنا چاہیے۔کیونکہ جب کیاہواعمل اسکے اختیار میں نہیں رہتا۔اوراس کااثر بھی بہت وسیع ہے۔نظروں سے بھی غا ئب ہے اورساتھ بھی لگاہواہے۔توان سب باتوں سے معلوم ہوا۔کہ اس کامٹانابہت
مشکل امر ہے۔پس بڑی احتیاط کی ضرورت ہے۔اس کے عمل کانتیجہ خوا ہ جلدی نکلے خواہ دیر سے۔مگر نکلے گاضرور۔کیونکہ گو بعض دفعہ یوں معلوم ہوتاہے کہ وہ پرندہ کی طرح اُڑ گیاہے مگرچونکہ یہ پرندہ گردن سے بندھا ہواہے آخر ایک دن واپس آئے گا۔اورانسان کواپنے کئے کامزہ چکھناپڑے گا۔دوسری جگہ قرآن کریم میں فرمایا کہ فَمَنْ یَّعْمَلْ مِثْقَالَ ذَرَّۃٍ خَیْرًایَّرَہٗ۔وَمَنْ یَّعْمَلْ مِثْقَالَ ذَرَّةٍ شَرًّا يَّرَهٗ (الزلزال:۸،۹)کہ کوئی شخص اگر سرخ چیونٹی کے برابر بھی نیک یابدعمل کرے گایاہواکے ذرّہ کے برابر بھی نیک یابد عمل کر ے تووہ اس کاانجام ضروردیکھ لے گا۔اس آیت کایہ مطلب نہیں کہ توبہ قبول نہ ہوگی توبہ توضرو رقبول ہو گی۔مگر گناہ کرنے والاپیچھے ضروررہ جائے گا مثلا ً فرض کرلو کہ دوانسان ہیں جو نیکی میں برابرہیں ان میں سے ایک نے ایک بدی کی۔اورپھر توبہ کی۔اس کے گنا ہ کو تواللہ تعالیٰ ضرو رمعاف کردے گا۔مگر جب اس نے بدی کی۔دوسرے شخص نے اس کے مقابل نیکی کی۔تویہ توبہ کرنے والاتواسی پہلے درجہ پر رہا۔مگر دوسرااس سے آگے نکل گیا۔پس اس غلطی کرنے والے شخص کو خدا تعالیٰ معاف تو کردے گا۔لیکن یہ نہ ہوگاکہ اس کو اس دوسرے شخص کے ساتھ ملادے جس نے بدی نہیں کی تھی۔وہ توبہرحال اس سے ایک درجہ بڑھاہی رہے گا۔پس ہرعمل کاایک اثر ہے جو باقی رہتاہے۔وائر لیس سے ایک سبق اب تواللہ تعالیٰ نے اس مضمون کو سمجھانے کے لئے انسان کو وائرلیس ٹیلیگرافی یا ٹیلیفون کاعلم بھی بخش دیا ہے۔جس سے ثابت ہوتاہے۔کہ باریک سے باریک حرکت بھی جوّمیں دورتک مرتعش ہوتی چلی جاتی ہے۔ہر عمل بیج کی طرح بڑھتا رہتاہے پس انسان کو اپنے اعما ل میں بہت محتاط ہوناچاہیے۔کیونکہ ہرعمل ایک بیج کی طرح ایک نیا پودا پیدا کرتاہے۔جوبغیر اس کے علم کے بڑھتا رہتاہے۔حدیث میں آتاہے کہ ہرعمل کااثر انسان کے قلب پر ہوتاہے۔اگر نیکی کرے تواس کے قلب پر نورکاایک نشان پیداہو جاتا ہے۔اوربدی کرے تو ایک سیاہ نشان پڑ جاتاہے۔اسی طرح نیکی کرنے والے شخص کے دل پرنیکیوں کانوربڑھتارہتاہے۔حتیٰ کہ اس کاسارادل روشن ہو جاتا ہے اوروہ نجات پاجاتاہے اوربدی کرنے والے کے دل پر سیاہ دھبے بڑھتے جاتے ہیں یہاں تک کہ ایک دن سارادل سیاہ ہو جاتا ہے اوروہ شخص ہلاک ہو جاتا ہے۔(ابن ماجہ کتاب الزھد باب ذکر الذنوب)بعض لوگوں نے طائر کے معنے قسمت کے کئے ہیں(تفسیر قرطبی زیر آیت ھذا) مگریہ معنے اس کے نہیں ہوسکتے کیونکہ طٰٓىِٕرَهٗ کہہ کر یہ بتایاگیاہے کہ اپنے عمل کاپیداکرنے والا خود انسان ہی ہے خدا تعالیٰ نے جومقررکردیا۔وہ توپتھر کہلائے گا یاطوق طائرہ نہیں کہلاسکتا۔
یہ معنے بھی اس کے ہوسکتے ہیں کہ ہرانسان کی نیک فالی اوربدفالی تواس کی گردن میں بندھی ہوئی ہے اوروہ دوسری چیزوں میں جاکر فالیں تلاش کرتا پھرتاہے۔گردن کالفظ اس لئے استعمال کیا۔کہ انسان جب نیکی کرے توسراونچاکرلیتا ہے۔اورجب بدی کرے تو ذلت کی وجہ سے گردن نیچی کرلیتا ہے۔پس اس لفظ کے استعمال سے اس طرف توجہ دلائی کہ انسان اپنے اعمال کاجائزہ اپنی گردن سے کرلیا کرے(ابن ماجہ کتاب الزھد باب ذکر الذنوب) یعنے دیکھے کہ وہ اپنے ہمرازوں اورہم جلسیوں میں گردن اونچی کرسکتا ہے یانہیں۔اگر اس کا دل اوراس کے ہمراز اسے بے عیب قراردیتے ہوں توسمجھ لے کہ اس کاقد م نیکی پر ہے۔لیکن اگراس کااپنادل اوراس کے ہمراز اس میں سوسوگند پاتے ہوں تولوگوں میں فخر کرنے سے اسے کیانفع ہو سکتا ہے۔وَ نُخْرِجُ لَهٗ يَوْمَ الْقِيٰمَةِ كِتٰبًا۔یہاں کتاب سے مراد جزاء ہے کیونکہ عربی میں کَتَبَ عَلَیْہِ کَذَاکے معنے قَضٰی عَلَیْہِ کَذَاکے ہوتے ہیں۔اور يَلْقٰىهُ مَنْشُوْرًا سے اس طرف اشارہ کیا ہے کہ وہاں اس کے اعمال کی جزاظاہر ہونے لگ جائے گی۔وہ بیج کی طرح نہ رہے گی۔بلکہ درخت کی طرح پھیل جائے گی اورپھل پیداکرنے لگے گی۔اِقْرَاْ كِتٰبَكَ١ؕ كَفٰى بِنَفْسِكَ الْيَوْمَ عَلَيْكَ حَسِيْبًاؕ۰۰۱۵ (اوراسے کہا جائے گاکہ)اپنی کتاب (آپ ہی)پڑھ۔آج تیرانفس ہی تیراحساب لینے کے لئے کافی ہے۔حلّ لُغَات۔اَلْحَسِیْبُ اَلْحَسِیْبُ وَالْمُحَاسِبُ : مَنْ یُحَاسِبُکَ۔اَلْحَسِیْبُ کے معنے ہیں حساب لینے والا۔(مفردات) تفسیر۔قیامت میں سب اشیاء اعمال سے متمثل ہوں گی ’’اپنی کتاب کو پڑھ‘‘کے الفاظ کایہ مطلب ہے کہ اب اپنی سزاکوبھگتو۔اوریہی سبق دُہراتے رہو۔كَفٰى بِنَفْسِكَ الْيَوْمَ عَلَيْكَ حَسِيْبًا۔تیرانفس ہی آج تجھ پر کافی حساب لینے والا ہے۔اس سے معلو م ہوتاہے کہ سزاباہر سے نہ آئے گی۔بلکہ انسان کے اندرسے ہی پیداہوگی۔دوزخ میں جتنی چیزیں ہوںگی وہ انسان کے اعمال سے ہی متمثل ہوں گی۔اورجنت کی چیزیں بھی اسی طرح نیکیوں سے ہی متمثل ہوں گی۔پس گویا کوئی دوسراانسان کسی کوسزایاجزاء نہ دے گا۔بلکہ انسان خود ہی اپنے آپ کو جزادینے والا اورخود ہی سزادینے والاہوگا۔
مَنِ اهْتَدٰى فَاِنَّمَا يَهْتَدِيْ لِنَفْسِهٖ١ۚ وَ مَنْ ضَلَّ فَاِنَّمَا (پس یاد رکھوکہ)جوہدایت کوقبول کرے گا۔تواس کاہدایت پانا اسی کی ذات کے لئے ہے اورجو (اسے ردّ يَضِلُّ عَلَيْهَا١ؕ وَ لَا تَزِرُ وَازِرَةٌ وِّزْرَ اُخْرٰى١ؕ وَ مَا كُنَّا کرکے)گمرا ہ ہوگا۔اس کاگمراہ ہونا اسی کے خلاف پڑے گا۔اورکوئی بوجھ اٹھانے والی جان کسی دوسری (جان ) مُعَذِّبِيْنَ حَتّٰى نَبْعَثَ رَسُوْلًا۰۰۱۶ کابوجھ نہیں اٹھائے گی اورہم (کسی قوم پر)ہرگزعذاب نہیں بھیجتے جب تک (ان کی طرف)کوئی رسول نہ بھیج لیں۔حلّ لُغَات۔اِھْتَدٰی اِھْتَدٰی ھَدَی سے باب افتعال ہے۔اورھَدَی کے لئے دیکھو رعد آیت نمبر۲۸۔(بنی اسرائیل آیت ۳) ضَلَّ کے لئے دیکھو یونس ۳۰(النحل آیت نمبر۸۸) تَزِرُ وَزَرَ سے مضارع مؤنث غائب کاصیغہ ہے۔اور وَزَرَہٗ کے معنے ہیں حَـمَلَہُ۔اس کو اٹھایا۔وَفِی اللِّسَانِ حَـمَلَ مَا یُثْقَلُ ظَھْرُہٗ مِنَ الْاَشْیَاءِ الْمُثْقَلَۃِاس نے بھاری بوجھ اٹھایا (اقرب) وَلَا تَزِرُ وازِرَۃٌ وِزْرَ اُخرٰی کے معنے ہوں گے۔کوئی بوجھ اٹھا نے والی جان دوسری جان کابوجھ نہیں اٹھائے گی۔اَلْوِزْرُ کی تشریح کے لئے دیکھو نحل آیت نمبر۲۶۔تفسیر۔اس آیت میںپہلی آیت کے مضمون کی وضاحت کی گئی ہے۔اوربتایا گیا ہے کہ انسان کے نیک اعمال اس کے فائدہ کاموجب ہوتے ہیں۔اوربداس کے نقصان کا۔پس جو کچھ انسان کرتا ہے دوسرے کے لئے نہیں کرتا اپنے لئے کرتا ہے۔قاتل دوسرے کونہیں اپنے آپ کو قتل کرتا ہے۔ظالم دوسرے پر نہیں اپنے آپ پر ظلم کرتا ہے۔چور دوسر ے کا نہیں اپنا مال چراتا ہے۔اسی طرح صدقہ کرنےوالا دوسرے کو نہیں دیتااپنے آپ کودیتاہے۔دوسرے کوتعلیم دینے والا یاہدایت دینے والا اسے تعلیم نہیں دیتایاہدایت نہیں دیتا بلکہ اپنے آپ کو تعلیم دیتاہے اوراپنے آپ کو ہدایت دیتا ہے۔اس کے آگے فرماتا ہے کہ لَا تَزِرُ وَازِرَةٌ وِّزْرَ اُخْرٰى۔کوئی بوجھ اٹھانے والی جا ن کسی اورجان کا بوجھ نہیں اٹھا
سکتی۔عیسائی اس آیت سے بڑے خوش ہوتے ہیں کہ لوکفارہ ثابت ہوگیا۔کیونکہ ہم بھی یہی کہتے ہیں۔کہ گناہ گار گناہ گار کابوجھ نہیںاٹھاسکتا۔مگر جو نیک ہے و ہ دوسرے کا بوجھ اٹھاسکتا ہے۔پس مسیح جونیک تھا۔اس نے دوسروں کے بوجھ اٹھالئے اوردوسراکو ئی نیک نہیں۔پس اورکوئی بوجھ نہیں اٹھاسکا۔کفار ہ کا ردّ میں اس جگہ اس سوال میں نہیں پڑتاکہ مسیحی عقیدہ کے رُو سے مسیح نیک تھا یانہیں۔نہ اس سوال میں پڑناچاہتاہوںکہ اسلامی عقید ہ کے روسے مسیح کے سوابھی کوئی نیک ہے یانہیں۔اس کی تفصیل کایہ موقعہ نہیں۔اس وقت ان کے جواب میں یہ کہنا چاہتاہوں کہ اس آیت میں توصرف یہ بتایا گیا ہے کہ خواہ انسانی اعمال برے ہوں یا اچھے۔خود اس کے لئے ہوتے ہیں انہیںکوئی دوسر انہیں اٹھاسکتا۔مطلب یہ کہ سزاجزاء کوئی بیرونی شے نہیں بلکہ ثمرئہ عمل کانام ہے۔اوریہ ظاہر ہے کہ جس جگہ بیج بویا گیا ہے وہیں وہ پھل دے گا۔دوسری جگہ وہ پھل نہیں دے سکتا ایک آم جو لاہور میں لگا ہو امرتسر میں پھل نہیں دے سکتا۔پس جب سزاجزاء خود عمل کرنے والے کے نفس سے پیداہوتی ہے تواسے کوئی دوسرانہیں بانٹ سکتا یااپنے ذمہ نہیں لے سکتا۔پس اس مضمون میں کفار ہ کا رد ہے نہ کہ اس کی تائید۔کفار ہ کی بنیاد تواس خیا ل پر ہے کہ سزاایک بیرونی بوجھ کی طرح ہے۔پس دوسراشخص بھی اسے اٹھا سکتاہے۔مگر ا س آیت میں ا س عقیدہ کورد کیا گیا ہے۔عیسائیوں کا دوزخ کو مادی قرار دینا حماقت ہے اسی اعتراض سے بچنے کے لئے مسیحیو ں نے دوزخ کو مادی قرار دیا ہے(Catechism of Christian Doctrine vol:2 p۔599)۔حالانکہ یہ حماقت کی بات ہے کہ جنت توروحانی ہو۔اوردوزخ مادی ہو۔یادونوں روحانی ہوںگی یا دونوں مادی۔اگرروحانی ہوں گی توپھر کو ئی شخص کسی دوسرے کی سزانہیں اٹھاسکتا۔کیاکوئی شخص دوسرے کی ندامت ،حرص، رنج ،غضب وغیر ہ کو بانٹ سکتا ہے ؟ اسی لئے نہیں بانٹ سکتاکہ یہ چیز یں انسان کے اندر سے پیداہوتی ہیں۔اوران کے پیداکر نے میں خود اس کے نفس کادخل ہوتا ہے اس قسم کی سزااسی صورت میں مٹ سکتی ہے جب نفس حقیقتاً فناہوجائے یامعنوی طور پر فنا ہو جائے۔یعنی ندامت کے احسا س کے ساتھ اس میں پاکیز گی پیداہوجائے۔اس قسم کی فنا میں کوئی دوسراشخص کسی طرح بھی شریک نہیں ہوسکتا۔کوئی معقول آ دمی کسی دوسرے کو یہ نہیں کہہ سکتا۔کہ میا ں بہت شرمندہ نہ ہو میں تمہاری جگہ شرمندہ ہولیتا ہوں۔ایک فاترالعقل ہی ایسا کہہ سکتا ہے۔پھر کیوں مسیحی خداکے برگزیدہ مسیح کے منہ سے یہ الفاظ کہلا کر اس کی ہتک کرتے ہیں۔وَ مَا كُنَّا مُعَذِّبِيْنَ حَتّٰى نَبْعَثَ رَسُوْلًا۔اورہم سزانہیں دیاکرتے۔یہاں تک کہ ہم ایک رسول بھیج لیں۔
اس کے متعلق قرآن کریم میں دوسری جگہ آتاہے۔كُلَّمَاۤ اُلْقِيَ فِيْهَا فَوْجٌ سَاَلَهُمْ خَزَنَتُهَاۤ اَلَمْ يَاْتِكُمْ نَذِيْرٌ۔قَالُوْا بَلٰى قَدْ جَآءَنَا نَذِيْرٌ(الملک:۹،۱۰)کہ جب کبھی کوئی گروہ اورقوم جہنم میں ڈالی جائے گی۔توان سے دریافت کیاجائے گاکہ تمہار ے پاس کوئی ڈرانے والاآیا۔تووہ کہیں گے کہ ہاں۔ہمارے پاس نبی آیا۔اس سے پتہ لگتا ہے کہ ہرقوم میں نبی آئے۔اسی طرح ایک اورجگہ فرمایا ہے۔اَلَمْ يَاْتِكُمْ رُسُلٌ مِّنْكُمْ يَتْلُوْنَ عَلَيْكُمْ اٰيٰتِ رَبِّكُمْ وَ يُنْذِرُوْنَكُمْ۠ لِقَآءَ يَوْمِكُمْ هٰذَا(الزمر:۷۲)کہ کیا تمہارے پاس رسول نہ آتے رہے جو تم کو اس دن کی ملاقات سے ڈراتے تھے۔ایک اورجگہ فرماتا ہے۔اَوَ لَمْ نُعَمِّرْكُمْ مَّا يَتَذَكَّرُ فِيْهِ مَنْ تَذَكَّرَ وَ جَآءَكُمُ النَّذِيْرُ (الفاطر :۳۸)کیاتم کو ہم نے اس قدر عمر نہیں دی کہ جس کی سمجھنے کی نیت ہوتی۔اس میں سمجھ سکتاتھا اورپھر اسی پر بس نہیں کی۔بلکہ تمہارے پاس ہوشیار کرنے کے لئے رسول بھی بھیجے۔اسی طرح قصص رکوع ۶ میں فرماتا ہے وَمَاکَانَ رَبُّکَ مُھْلِکَ الْقُرٰی حَتّٰی یَبْعَثُ فِیْ اُمِّھَا رَسُوْلًا(آیت :۶۰)۔تیرے خدا کی شان کے خلا ف ہے کہ وہ اس کے مرکزی مقام میں نبی بھیجے بغیر کسی بستی کو ہلاک کردے۔اورپھر سورہ قصص ع ۵ میں فرمایا وَلَوْلَٓااَنْ تُصِیْبَہُمْ مُّصِیْبَۃٌ بِمَاقَدَّمَتْ اَیْدِیْھِمْ فَیَقُوْلُوْارَبَّنَا لَوْلَٓااَرْسَلْتَ اِلَیْنَارَسُوْلًا فَنَتَّبِعَ اٰیٰتِکَ وَ نَکُوْنَ مِنَ الْمُؤْمِنِیْنَ (آیت :۴۸) یعنی اگر یہ خیال نہ ہوتا کہ ان لوگوں کو اپنے اعمال کی وجہ سے کوئی عذاب پہنچا۔تویہ کہہ دیں گے کہ اے ہمارے رب کیوں نہ آپ نے ہماری طرف رسول بھیجاکہ ہم ذلیل وخوار ہونے سے پہلے آپ کے احکام کی تعمیل کرتے۔توہم ان کو بغیر رسول بھیجے کے ہی عذاب دے دیتے مگرچونکہ یہ عذر ا ن کامعقو ل ہوتا۔ہم نے اس عذر کوتوڑ دیا ہے۔اورہمیشہ پہلے رسول بھیجتے ہیں۔پھر اس کے انکا ر کے بعد عذاب لاتے ہیں۔ان تمام آیات سے معلوم ہوتا ہے کہ سنت الٰہی یہی ہے کہ اللہ تعالیٰ بغیر رسول بھیجنے کے کسی قوم پر عذاب نازل نہیں کرتا۔یعنی اتنے وسیع علاقہ پر جونبیءِ وقت کا مخاطب ہو اس وقت تک عذاب نہیں آتا۔جب تک پہلے ایک اورنبی خواہ وہ پہلے نبی کاتابع ہی کیوںنہ ہو ظاہر ہو کر لوگوں کو ہوشیار نہ کردے۔دنیا میں جن پر حجت تمام نہیںہوتی ان کے لئے قیامت میں بعثت رسول یہاں سوال ہوسکتا ہے کہ وہ لو گ جن پر حجت تمام نہیں ہو ئی ان کا کیا حا ل ہوگا۔تواس کا جواب مسند احمد بن حنبل کی روایت میں ہے جو ابوہریرہؓ نے بیان کی ہے اِنَّ النَّبِیَ صَلَّے اللہُ تَعَالیٰ عَلَیْہ وَسَلَّمَ قَالَ اَرْبَعَۃٌ یَحْتَجُّوْنَ یَوْمَ الْقَیَامَۃِ رَجُلٌ اَصَمُّ لَایَسْمَعُ شَیْئًاوَرَجُلٌ اَحْمَقُ وَرَجُلٌ ھَرَمٌ وَرَجُلٌ مَاتَ فِی فَتْرَۃٍ فَاَمَّا الْاَصَمُّ فَیَقُولُ رَبِّ لَقَدْ جَآءَ الْاِسْلَامُ وَمَااَسْمَعُ شَیْئًا وَاَمَّاالْاَحْمَقُ فَیَقُوْلُ جَآءَ الاِسْلَامُ وَالصِّبْیَانُ یَخْذِفُوْنَنِیْ بِالْبَعْرِ وَاَمَّا
الْھَرَمُ فَیَقُوْلُ رَبِّ لَقَدْ جَاءَ الْاِسْلَامُ وَمَا اَعْقِلُ شَیْئًاوَاَمَّاالَّذِیْ مَاتَ فِی الْفَتْرَۃِ فَیَقُوْلُ رَبِّ مَااَتَانِیْ لَکَ رَسُوْلٌ فَیَاخُذُ سُبْحَانَہُ مَوَاثِیْقَہُمْ لَیُطِیْعُنَّہُ فَیُرْسِلَ اِلَیْھِمْ رَسُوْلًااَنِ ادْخُلُواالنَّارَ فَمَنْ دَخَلَہَا کَانَتْ عَلَیْہِ بَرْدًاوَسَلَامًا وَمَنْ لَمْ یَدْخُلْہَا سُحِبَ اِلَیْہَا(روح المعانی زیر آیت ھذا) یعنی اللہ تعالیٰ قیامت کے دن ان کے پاس رسول بھیجے گا پھر اس کی اطاعت کرنے والوں اوراس کو نہ ماننے والوں کی فطرت ظاہر ہوجائے گی۔اوراس کے مطابق ان کو بدلہ ملے گا۔وَ اِذَاۤ اَرَدْنَاۤ اَنْ نُّهْلِكَ قَرْيَةً اَمَرْنَا مُتْرَفِيْهَا اورجب ہم کسی بستی کو ہلاک کرنے کاارادہ کریں تو(پہلے)ہم اس کے خود سر لوگوں کو (کچھ )حکم دیتے ہیں جس پر وہ فَفَسَقُوْا فِيْهَا فَحَقَّ عَلَيْهَا الْقَوْلُ اس (بستی )میں نافرمانی (کی راہ اختیار)کرتے ہیں۔تب اس (بستی)کے متعلق ہماراکلام پوراہو جاتا ہے۔فَدَمَّرْنٰهَا تَدْمِيْرًا۰۰۱۷ اورہم اسے پوری طرح تباہ کردیتے ہیں۔حلّ لُغَات۔مُتْرَفِیْھَا۔اَلْمُتْرَفُ کے معنے ہیں۔اَلْمُتَنَعِّمُ لَایَمْنَع مِنْ تَنَعُّمِّہِ۔عیاش۔اَلْمَتْرُوْکُ یَصْنَعُ مَایَشَاءُ۔شریعت سے آزاد شخص۔اَلْجَبَّارُ۔خودسر(تاج) مُتْرَفُوْنَ اس کی جمع ہے۔فسقوا فَسَقُوْا فَسَقَ سے جمع مذکر غائب کاصیغہ ہے۔تشریح کے لئے دیکھو یونس آیت نمبر ۳۴۔فَسَقَ الرَّجُلُ فِسْقًا: تَرَکَ اَمْرَاللہِ۔اللہ کی نافرمانی کی۔عَصَی نافرمان ہو گیا۔جَارَعَنْ قَصْدِ السَّبِیْل۔درست راہ سے روگردان ہو گیا۔فَجِرَ۔بدکردار ہو گیا۔خَرَجَ عَنْ طَرِیْقِ الْحَقّ۔حق کی راہ سے الگ ہو گیا۔اَلرُّطْبَۃُ عَنْ قِشْرِھَا خَرَجَتْ گابھا چھلکے سے باہر آگیا۔(اقرب) دمَّرنا:دَمَّرْنَا دَمَّرَ سے جمع متکلم کاصیغہ ہے اوردَمَّرَھُمْ (وَعَلَیْھِمْ )کے معنے ہیں اَھْلَکَہُمْ یعنے دَمَّرَ جب بغیر صلہ یاعلیٰ کے صلہ کے ساتھ استعما ل ہو۔تواس کے معنے ہوتے ہیںکہ اس کو ہلاک کردیا (اقرب)پس دَمَّرْنَا کے معنی ہوں گے ہم نے ہلا ک کردیا۔
تفسیر۔خدا کا عذاب قوموں کے خراب ہونے پر آتا ہے اس آیت میں بتایاگیاہے کہ جب قومیں خراب ہوجاتی ہیں اوران کے عذاب کافیصلہ ہو جاتا ہے توان کی طرف ایک رسول بھیجا جاتاہے جوان کو ہوشیار کرتاہے لیکن لوگ اس کی بات کو نہیں مانتے اور رسول سے ٹھٹھاہنسی کرتے ہیں۔اوراس کی نافرمانی کرتے ہیں۔تب خدا تعالیٰ کاعذاب انہیں آپکڑتاہے۔اَمَرْنَا مُتْرَفِیْہَا فَفَسَقُوْافِیْہَا۔بعض مخالفین اسلام نے ا س آیت کے یہ معنے کئے ہیں کہ خدا تعالیٰ بڑے بڑے لوگوںکو یہ حکم دیتاہے کہ بدکار ہوجائو۔اوریہ غلط معنے کرکے ا س پر اعتراض کیا ہے کہ آپ ہی پہلے گمراہ کیاپھر عذاب میں مبتلاکردیا یہ توانصا ف کے خلاف ہے۔حالانکہ فسق کے معنے حکم نہ ماننے کے ہیں اوران معنوں کو مدنظر رکھتے ہوئے جومعنے انہوں نے کئے ہیں ان کی بناء پر آیت کاترجمہ یو ں بنتاہے کہ خدا تعالیٰ ان کو حکم دیتا ہے کہ تم بدکاری کرو۔فَفَسَقُوْافِیْہَا تووہ ا س حکم کی نافرمانی کرنے لگ جاتے ہیں۔ظاہر ہے کہ اگر آیت کا مطلب یہ ہو تو اس میں تو ان لوگوں کی تعریف نکلتی ہے کہ باوجود خدا تعالیٰ کے کہنے کے کہ بدکار بن جائو وہ بدکار نہیں بنتے۔بلکہ نیک ہو جاتے ہیں۔اوریہ معنی بالبداہت غلط ہیں اوراگر یہ معنے کئے جائیں کہ خداکے بدکار بنانے پر وہ بدکار ہوجاتے ہیں تو فَسَقُوْاکا لفظ در ست نہیں رہتا کیونکہ اس صورت میں تووہ فرمانبرداربن جاتے ہیںان کو نافرمان نہیں کہاجاسکتا غرض یہ معنے بالبداہت غلط ہیں اور عربی زبان سے ناواقفیت کی وجہ سے کئے گئے ہیں۔اوراعتراض قرآن کریم پر نہیں پڑتا۔بلکہ ان لوگوںکے علم پر پڑتا ہے۔اصل مطلب اس آیت کا یہ ہے کہ ہم ان کو حکم دیتے ہیں یعنی بعض خاص امور پر چلنے کاحکم دیتے ہیں جوحکم خدا تعالیٰ کی طرف سے ہونے کے سبب سے بہرحال نیکی کاحکم ہوتا ہے۔مگر وہ نافرمان ہو جاتے ہیں یعنے اس حکم کو نہیں مانتے۔غرض اس جگہ اَمَرْنَا کامفعول ثانی محذوف ہے کیونکہ وہ ایک ظاہر بات ہے اورایسے مواقع پر عربی زبان میں ایک یادونوں مفعولوں کومحذوف کردیناجائزہوتاہے۔مفعول ثانی کا مضمون ظاہر اس طرح ہے کہ قرآن کریم نے بار بار اس امر کو بیان کیا ہے کہ خدا تعالیٰ جب حکم دیتا ہے نیکی کاحکم دیتا ہے۔چنانچہ سورئہ نحل رکوع ۱۳میں ہی فرماچکا ہے کہ اِنَّ اللّٰہَ یَاْمُرُ بِالْعَدْلِ وَالْاِحْسَانِ وَاِیْتَآئِ ذِیْ الْقُرْبٰی وَیَنْہٰی عَنِ الْفَحْشَآئِ وَالْمُنْکَرِ وَالْبَغْیِ (النحل:۹۱)یعنے اللہ تعالیٰ عدل اور احسان اوراس نیکی کاجس میں بدلہ کاخیال تک بھی دل میں نہیں ہو تاحکم دیتاہے اورباطنی بدی اورظاہری بدی اورظلم سے روکتاہے۔اسی طرح سورئہ اعراف میں ہے۔قُلْ اِنَّ اللّٰہَ لَایَاْمُرُ بِالْفَحْشَآئِ (الاعراف :۲۹)تُو کہہ دے اللہ تعالیٰ ہرگز بدی کاحکم نہیں دیتا۔پس چونکہ یہ امر واضح ہوچکاہے کہ اللہ تعالیٰ نیکی کا ہی حکم دیتاہے۔مفعول ثانی کومحذوف کردیاگیاہے اورمطلب آیت کا یہ ہے کہ جب