سُوْرَۃُ الْکَھْفِ
تفسیر کبیر (جلد ۶), حصہ 7
کی کریں گے۔لیکن کوئی صورت بھی ا س جنگ سے محفوظ رہنے کی نہ پیداہوسکے گی۔ظَنُّوْا بمعنی یقین اس آیت میں ظنُّوْا کالفظ استعمال ہواہے۔ا س کے معنی یقین کے ہیں خیال یاشک کے نہیں۔ظنّ کا لفظ عربی میں اضداد میں سے ہے۔یعنی اس کے معنی گما ن کے بھی ہوتے ہیں اوریقین کے بھی ہیں۔وَ لَقَدْ صَرَّفْنَا فِيْ هٰذَا الْقُرْاٰنِ لِلنَّاسِ مِنْ كُلِّ مَثَلٍ١ؕ وَ اورہم نے اس قرآن میں یقیناً ہرایک(ضروری)بات کو مختلف پیرائیوں میں بیان کیا ہے اور(ایساکیوں نہ کرتے كَانَ الْاِنْسَانُ اَكْثَرَ شَيْءٍ جَدَلًا۰۰۵۵ کہ)انسان سب سے بڑھ کر بحث کرنے والا ہے۔حلّ لُغَات۔الجدل۔اَلْجَدَلُ شِدَّۃُ الْخُصُوْمَۃِ سختی سے جھگڑنا (اقرب) تفسیر۔اَكْثَرَ شَيْءٍ جَدَلًا کے دومعنی ہیں (۱)اَکْثَرَ شَیْءٍ یَتَأَتّٰی مِنْہُ الْجَدَ لُ یعنی سمجھانے کی جوتدبیر بھی کی جائے اس کے نتیجہ میں اس کی طرف سے جھگڑے کاپہلو ہی پیداکرلیا جاتاہے۔اطمینان حاصل کرنے کی وہ کوشش نہیں کرتا۔(۲) جَدَلُ الْاِنْسَانِ اَکْثَرُ مِنْ کُلِّ مَجَادِلٍ(روح المعانی زیر آیت ھذا)۔یعنی انسان سب مخلوق کی نسبت زیادہ جھگڑا کرتاہے مطلب یہ کہ اسے توہم نے عقل اس لئے دی تھی۔کہ روحانی ترقیات کرے۔اور خدا تعالیٰ کاعرفان حاصل کرے۔مگر وہ اس قوت کوجواسے دوسرے حیوانوں سے ممتاز کرتی ہے۔ایک بڑے امتیاز کاذریعہ بنالیتا ہے اوربجائے اس کے کہ اس کے ذریعہ سے دوسرے حیوانوں سے افضل بنے۔وہ ان سے بھی ادنیٰ حالت میں چلاجاتاہے۔اس آیت میں الناس تما م انسانوں کے متعلق ہے۔اورالانسان ان انسانوں کے متعلق جن کااوپر ذکرآچکا ہے اورمطلب یہ ہے کہ ہم نے قرآن کریم میں تمام مسائل کو اچھی طرح سے اورمختلف پیرائوں میں بیان کیا ہے کہ بنی نوع انسان اس سے فائدہ اٹھائیں۔مگروہ قسم انسانوں کی جن کا ذکر اوپر گذراہے۔اسے جھگڑنے کاذریعہ بنالیتی ہے۔اوران ہی تفصیلات کو جو ان کے فائدہ کے لئے ہیں۔اعتراض کاموجب سمجھ لیتی ہے۔اس میں اس طر ف اشارہ ہے کہ مسیحی لوگ شریعت کی تفصیلات کو لعنت قرار دے کر ان سے آزاد ہوناچاہتے ہیں۔حالانکہ وہ تفصیلات انسان کو ہلاکت سے بچانے کے لئے بیان کی گئی ہیں۔
وَ مَا مَنَعَ النَّاسَ اَنْ يُّؤْمِنُوْا اِذْ جَآءَهُمُ الْهُدٰى وَ اوران لوگوںکو جب ان کے پاس ہدایت آئی تو(اس پر)ایما ن لانے اوراپنے رب سے يَسْتَغْفِرُوْا رَبَّهُمْ اِلَّاۤ اَنْ تَاْتِيَهُمْ سُنَّةُ الْاَوَّلِيْنَ اَوْ بخشش چاہنے سے صرف اس بات نے روکاکہ پہلے لوگوں کی سی حالت ان پر (بھی)آئے۔يَاْتِيَهُمُ الْعَذَابُ قُبُلًا۰۰۵۶ یاپھر عذاب ان کے سامنے آکھڑاہو۔حلّ لُغَات۔السُّنَّۃُ اَلسُّنَّۃُکے لئے دیکھو حجر آیت نمبر ۱۴۔اَلسُّنَّۃُ۔اَلسِّیْرَۃُ سنت کے معنی ہیں دستور۔اَلطَّرِیْقَۃُ۔طریقہ۔اَلطَّبِیْعَۃُ۔طبیعت عادت۔(اقرب) قُبُلاً۔اَلْقُبُلُ: نَقِیْضُ الدُّبْرِ۔سامنے کاحصہ(اقرب) تفسیر۔یعنی قرآن کریم میں ہدایت کاایساسامان موجود ہے کہ اس کے بعد ہدایت میں کوئی روک نہیں ہونی چاہیے تھی۔اورچاہیے تھا کہ اس کے مضامین کو سن کریہ لوگ اپنے غلط عقائدسے تائب ہوتے لیکن یہ اس سے فائدہ نہیں اٹھاتے۔گویا یہ فیصلہ کرچکے ہیں کہ ہم توضرور عذاب ہی لیں گے۔سُنَّةُ الْاَوَّلِيْنَ اس سے مراد آخری ہلاکت ہے اور اَوْ يَاْتِيَهُمُ الْعَذَابُ قُبُلًا سے مراد درمیانی عذا ب ہیں یعنی دونوں قسم کے عذابوںکو یہ بلارہاہے۔وَ مَا نُرْسِلُ الْمُرْسَلِيْنَ اِلَّا مُبَشِّرِيْنَ وَ مُنْذِرِيْنَ١ۚ وَ اورہم رسولوں کوصرف بشارت دینے والا اور(عذاب کی آمد سے )آگا ہ کرنے والابناکربھیجتے ہیں۔اورجن لوگوں يُجَادِلُ الَّذِيْنَ كَفَرُوْا بِالْبَاطِلِ لِيُدْحِضُوْا بِهِ الْحَقَّ وَ نے انکار کیا ہے۔و ہ جھوٹ کے ذریعہ سے اس لئے جھگڑتے ہیں۔کہ اس کے ذریعہ سے حق کومٹادیں۔اورانہوں
اتَّخَذُوْۤا اٰيٰتِيْ وَ مَاۤ اُنْذِرُوْا هُزُوًا۰۰۵۷ نے میرے نشانوں کو اور(میرے )انذارکو ہنسی کا نشانہ بنالیاہے۔حلّ لُغَات۔اَلْبَاطِلُ اَلْبَاطِلُ کے لئے دیکھو نحل آیت نمبر۷۳۔لِیُدْحِضُوْابہِ لِیُدْحِضُوا بِہِ أَدْحَضَ سے مضارع جمع مذکر غائب کاصیغہ ہے اوراَدْحَضَ الْقَدَمَ کے معنی ہیں اَزْلَقَہَا پائوں کو پھسلا دیا۔اَدْحَضَ الْحُجَّۃُ: اَبْطَلَھَاوَاَزَالَھَا وَدَفَعَھَا دلیل کو پوری طرح رد کیا دورکیا مٹایا (اقرب)پس لِيُدْحِضُوْا بِهِ الْحَقَّ کے معنی ہوں گے۔کہ وہ حق کومٹادیں۔دورکردیں۔تفسیر۔لِيُدْحِضُوْا بِهِ الْحَقَّ کے معنی یہ ہوئے کہ کافرلوگ باطل کو لے کر جھگڑااوربحث کرتے ہیں۔تاکہ اس کے ساتھ حق کو دنیاسے نکال دیں ،باطل کردیں۔وَ اتَّخَذُوْۤا اٰيٰتِيْ وَ مَاۤ اُنْذِرُوْا هُزُوًا۔یعنی ہم نشانات تودکھاتے ہیں لیکن یہ ہنسی کرتے ہیں۔اس وقت یورپ والوں کی یہی حالت ہے۔نشانات کی طرف ان کی بالکل توجہ نہیں۔بلکہ ان امور کو بیوقوفوں کے توہما ت سمجھتے ہیں۔اورعقلی ڈھکونسلوں کی طرف توجاتے ہیں۔مگرخدائی نشانوں کو حقیر سمجھتے ہیں۔وَ مَنْ اَظْلَمُ مِمَّنْ ذُكِّرَ بِاٰيٰتِ رَبِّهٖ فَاَعْرَضَ عَنْهَا وَ اوراس شخص سے زیاد ہ ظالم کون (ہوسکتا)ہے۔جسے اس کے رب کے نشانوں کے ذریعہ سے سمجھایاگیا۔(لیکن ) نَسِيَ مَا قَدَّمَتْ يَدٰهُ١ؕ اِنَّا جَعَلْنَا عَلٰى قُلُوْبِهِمْ اَكِنَّةً اَنْ پھر( بھی) وہ ان سے روگردان ہوگیا۔اورجوکچھ اس کے ہاتھوں نے (کماکر )آگے بھیجا تھا۔اسے اس نے بھلادیا يَّفْقَهُوْهُ وَ فِيْۤ اٰذَانِهِمْ وَقْرًا١ؕ وَ اِنْ تَدْعُهُمْ اِلَى الْهُدٰى ان(لوگوں )کے دلوں پر ہم نے یقیناً کئی پردے ڈال دیئے ہیں کہ وہ اسے سمجھیں اوران کے کانوں میں گرانی
فَلَنْ يَّهْتَدُوْۤا اِذًا اَبَدًا۰۰۵۸ (پیداکردی ہے)اوراگرتوانہیں ہدایت کی طرف بلائے تو(وہ تجھ سے اس قدر حسد رکھتے ہیں کہ)اس صورت میں وہ ہدایت کو(بھی)کبھی قبول نہیں کریں گے۔تفسیر۔فرماتا ہے اس سے زیادہ ظالم اورکون ہو سکتا ہے جسے ا س کے رب کی باتیں سنائی جائیں تووہ ان کوحقیر سمجھے اوران سے اعراض کرے اوراس بات کونہ سوچے کہ میں نے خود اپنی عقل سے جوکام کئے ہیں۔وہ کس طرح فساد فتنہ اورجنگ کے موجبات بن رہے ہیں۔پس باوجود اس تجربہ کے کہ وہ اپنی عقل سے امن پیدا نہیں کرسکا۔پھر بھی خدائی امداد اورہدایت کی طرف اس کاتوجہ نہ کرناگویااپنے تجربہ کوٹھکرادینے کے مترادف ہے پھر وہ قوم جوتجربوں پر اپنے کاموں کی بنیا د رکھنے کی مدعی ہے وہ کس قدرمجرم اورغافل ہوتی ہے کہ جزئی تجربوںکوتوا س قدر قیمت دیتی ہے۔مگرساری قوم کے تجربہ اوراس کے نتیجہ سے فائدہ نہیں اٹھاتی۔فرماتا ہے اس کانتیجہ اس کے سوااور کیا نکل سکتاتھا۔کہ جب انہوں نے سمجھ سے کام لینے سے انکار کردیا ہے توہم بھی ان کوسمجھ سے محروم کردیں۔اورانہیں ان کے حال پر چھو ڑدیں کہ خواہ کوئی کتنی ہی انہیں نصیحت کرے یہ فائدہ نہ اٹھاسکیں۔وَ رَبُّكَ الْغَفُوْرُ ذُو الرَّحْمَةِ١ؕ لَوْ يُؤَاخِذُهُمْ بِمَا اورتیرارب بہت ہی بخشنے والا (اوربہت ہی )رحمت کرنے والا ہے۔اگروہ اس کی وجہ سے جوانہوں نے (اپنی جانوں كَسَبُوْا لَعَجَّلَ لَهُمُ الْعَذَابَ١ؕ بَلْ لَّهُمْ مَّوْعِدٌ کے لئے )کمایا ہے۔انہیں ہلاک کرناچاہتاتووہ ان پر فوراً عذاب نازل کردیتا۔(مگر وہ ایسانہیں کرتا )بلکہ ا ن کے لَّنْ يَّجِدُوْا مِنْ دُوْنِهٖ مَوْىِٕلًا۰۰۵۹ لئے ایک میعاد (مقرر)ہے جس سے ورے (یعنی پیشتراس کے کہ عذاب کوبھگتیں)ہرگز کوئی جائے پناہ نہ پائیں گے تفسیر۔لَوْ يُؤَاخِذُهُمْ بِمَا كَسَبُوْا لَعَجَّلَ لَهُمُ الْعَذَابَ۔اگران کو خدا تعالیٰ ان کے اعما ل کی وجہ سے
سزادینے لگتا توکبھی کاہلاک کردیتا۔مگرخدا تعالیٰ ہوشیار کئے بغیر کسی قوم کوہلاک نہیں کرتا۔اس لئے وہ پہلے ان کوہوشیار کرے گا۔اورزمانہ کے مامورکے ذریعہ سے حجت پوری کرکے پھر پکڑے گا۔بَلْ لَّهُمْ مَّوْعِدٌ لَّنْ يَّجِدُوْا مِنْ دُوْنِهٖ مَوْىِٕلًا۔ان کے لئے وعدہ مقرر ہے۔و ہ ہرگز اس سے ہٹ کرکوئی پنا ہ کی جگہ نہ پائیں گے یعنی خدا تعالیٰ کو چھو ڑ کر اورکوئی بھی نجا ت کی جگہ ان کو نہ مل سکے گی۔وَ تِلْكَ الْقُرٰۤى اَهْلَكْنٰهُمْ لَمَّا ظَلَمُوْا وَ جَعَلْنَا لِمَهْلِكِهِمْ اوروہ (گزشتہ نبیوں کے مخالفوںکی)بستیاں جوہیں تو(ان کاواقعہ یوں ہے کہ)ہم نے اس وقت انہیں ہلاک کیا جب مَّوْعِدًاؒ۰۰۶۰ انہوں نے ظلم کیا۔اوران کی ہلاکت کے لئے (بھی )ہم نے ایک معیاد مقرر کردی تھی۔(تاو ہ چاہیں توتوبہ کرلیں ) تفسیر۔یعنی ہزاروں قومیں گذرچکی ہیں جب انہوں نے ظلم کیا۔یعنی اللہ تعالیٰ کے انذار کی قدرنہ کی توہم نے ان کو ہلاک کردیا۔اوران کی ہلاکت کی پہلے سے خبر دے دی جس کے مطابق وہ ہلاک ہوگئے۔پس اس قوم کو بھی سوچنا چاہیے کہ ان کو خواہ کس قدر ترقیا ت ہی کیوں نہ ملی ہوں۔پھر بھی وہ انسان ہیں۔پس کوئی وجہ نہیں کہ جب پہلے انسان خدا تعالیٰ سے منہ پھیر کرہلاک ہوئے تویہ ہلاک نہ ہو ں۔آجکل قریباً ۹۹فیصدی لوگوں کاخیال ہے کہ اب یورپ تبا ہ نہیں ہوسکتا۔اللہ تعالیٰ فرماتا ہے کہ یہ بیوقوفی کی بات ہے پہلی بادشاہتوں کے زمانوں میں کو ن کہتاتھا کہ وہ تبا ہ ہوں گی۔مسلمانوں کے متعلق کون کہتاتھا کہ ان کی حکومت تبا ہ ہوگی۔اسی طرح رومیوں کی حکومت او رایرانیوں کی حکومت کے متعلق بھی کوئی اس وقت گمان نہ کرتاتھا۔لیکن ساری تباہ ہوگئیں۔اسی طرح ان کی بادشاہت کے تباہ ہونے کے متعلق بھی حیرانی اورتعجب خلاف عقل ہے۔وَ اِذْ قَالَ مُوْسٰى لِفَتٰىهُ لَاۤ اَبْرَحُ اور(تم اس وقت کو بھی یاد کرو)جب موسیٰ نے اپنے نوجوان (رفیق)سے کہا تھا (کہ )میں(جس راستے پرجارہا حَتّٰۤى اَبْلُغَ مَجْمَعَ الْبَحْرَيْنِ اَوْ ہوں اس پر قائم رہنے سے )نہیں ٹلوں گایہاں تک کہ ان دونوں سمندروں کے اکٹھے ہونے کے مقام پر پہنچ جائو ں
اَمْضِيَ حُقُبًا۰۰۶۱ یاصدیوں تک (آگے ہی آگے) چلتاچلاجائوں۔حلّ لُغَات۔الفَتٰی اَلْفَتٰیکے معنے نوجوان کے ہیں۔اس کی جمع فِتْیَانٌ آتی ہے۔مزید تشریح کے لئے دیکھو یوسف آیت نمبر ۶۳۔فِتْیَانٌ جَمْعُ فَتٰی کی ہے اس کے معنے جوان کے ہیں لیکن جب کسی کی طرف مضاف ہو تو ا س کے معنے بیٹے یا نوکر کے ہوتے ہیں جیسے فَتٰی زَیْدٍ زید کا بیٹا یا نوکر۔لَاابرحلَااَبْرِحُکے لئے دیکھویوسف آیت نمبر ۸۱۔مَابَرِحَ فُلَانٌ کَرِیْمًا اَیْ بَقِیَ عَلٰی کَرَمِہِ۔اَبْرَحُ بَرِحَ سے مضارع متکلم کا صیغہ ہے اور مَا بَرِحَ فُلَانٌ کَرِیْمًا کے معنے ہیں اپنی سخاوت پر قائم رہا۔(اقرب) بَرِحَ وَزَالَ اِقْتَضَیَا مَعْنَی النَّفِیْ وَلَا لِلنَّفِی وَالنَّفْیَانِ یَحْصُلُ مِنْ اِجْتِمَاعِھِمَا اِثْبَاتٌ۔بَرِحَاور زَالَ کے اندر نفی کے معنے پائے جاتے ہیں کیونکہ کسی جگہ سے چلے جانے کے مفہوم میں نہ موجود رہنا بھی داخل ہے جو نفی پر مشتمل ہے۔پس جب ان پر مَا یا لَا وغیرہ کوئی کلمہ داخل ہوگا تو نفی پر نفی داخل ہونے کی وجہ سے ان میں اثبات کے معنے یعنی کسی جگہ پر موجود رہنے کے معنے پیدا ہوجاتے ہیں۔(مفردات) اَمْضِیْ اَمْضِیْ مَضَی سے مضارع متکلم کاصیغہ ہے اورمَضَی الشَّیْءُ(یَمْضِیْ وَیَمْضُوْ) کے معنے ہیں ذَھَبَ وَخَلَا۔کوئی چیز گزر گئی اورچلی گئی (اقرب)پس اَمْضِیْ کے معنے ہوں گے کہ میں چلتاچلاجائوں۔حُقبًا۔حُقُبٌ حُقْبٌ کی جمع ہے۔اوراس کے معنے ہیں ثَمَانُوْنَ سَنَۃً۔اسّی سال کاعر صہ۔وَیُقَالُ اَکْثَرُ مِنْ ذَالِکَاوربعض کہتے ہیں اس سے بھی زائد عرصہ کوحُقُبٌ کہتے ہیں۔اَلدَّھْرُ۔زمانہ۔اَلسَّنَۃُ وَقِیْلَ السُّنُوْنَ مطلق ایک سال کے عرصہ کے لئے بھی یہ لفظ استعمال کرتے ہیں اوربعض کہتے ہیں کہ کئی سال کاعرصہ حقب کہلاتاہے۔(اقرب) تفسیر۔پہلے توتمثیلوں سے اس امر کوبتایاکہ عیسائیت اوراسلام کامقابلہ گوکمزوراورطاقتورکامقابلہ ہے لیکن غورکیا جائے توطاقتوروہ ہے جوخدا تعالیٰ کی طر ف توجہ کرتاہے ،وہ نہیں جو دنیا کے کاموں میں مشغول ہے۔اوراشارۃً یہ بھی بتایا کہ مسیحیت کی ترقی اس رنگ میں مقد رتھی کہ پہلے ایک دفعہ یہ قوم ترقی کرے۔پھررسول کریم
صلی اللہ علیہ وسلم کاظہورہو۔اور کچھ عرصہ اسلام ترقی کرے۔پھر دوبارہ انہیں ترقی ملے۔اب اس مضمون کوآسمانی کتب کے حوالہ سے ثابت فرماتا ہے۔یادرکھنا چاہیے کہ جیساکہ میں پہلے بتاآیا ہوں اسلام کے دشمنوں کایہ اعتراض ہے کہ اس سورۃ میں بغیر تعلق کے واقعات جمع کردیئے گئے ہیںاورخود مسلمانوں کے لئے بھی ان واقعات کا اجتماع حیرانی پیداکرنے کاموجب بنا رہاہے۔اورانہوں نے یہ کہہ کر اپنے آپ کوتسلی دی ہے کہ یہود نے کچھ سوالات کئے تھے ان کا جواب اللہ تعالیٰ نے اکٹھاکرکے دےدیاہے۔لیکن جیساکہ ظاہر ہے یہ بات نہیں۔کیونکہ اصحاب کہف اور ذوالقرنین کے متعلق اگر کوئی سوال تھا بھی تو ان دونوں واقعات کے درمیان میں اوپر کی تمثیلات اورپھر حضرت موسیٰ کے اس واقعہ کو جواس رکوع میں بیان ہواہے کیوں رکھ دیاگیاہے۔کم سے کم ان دونوں سوالوں کے جواب اکٹھے رکھے جاتے۔اصل بات یہ ہے کہ یہ سب مضامین ترتیب سے بیان ہوئے ہیں۔اورہرواقعہ اور تمثیل کو خاص ضرورت سے اپنے اپنے مقام پر رکھا گیا ہے۔چنانچہ اصحاب کہف کے ذکر کے بعد ان تمثیلات کے رکھنے کی حکمت تومیں بتاآیاہوں۔اب میں حضرت موسیٰ کے اس واقعہ کو اس جگہ رکھنے کی وجہ بتاتاہوں۔میں ذکر کرچکاہوں کہ عیسائیوں کی قومی زندگی میں ایک عجیب بات پائی جاتی ہے جس کی کوئی اورمثال کم سے کم مجھے معلوم نہیں۔اور وہ یہ کہ انہیں حضرت مسیح علیہ السلام کے بعد ایک ترقی کادور ملا۔درمیان میں ا یک اورنبی پیداہوااوراس کی قوم کو ترقی کاایک دورملا۔اس کے بعد پھر مسیحی قوم کی ترقی شروع ہوگئی۔ا س واقعہ کی طرف پہلے تمثیل میں نہر کے لفظ سے اشار ہ کیاگیاتھا۔اب حضرت موسیٰ کے واقعہ کو اس جگہ رکھ کر اس مضمون کوواضح کیاگیاہے اوروہ اس طرح کہ رسول کریم صلی اللہ علیہ وسلم مثیل موسیٰ ؑ تھے۔جیساکہ استثناء باب ۱۸آیت ۱۸ میں پیشگوئی کی گئی تھی۔کہ’’میں ان کے لئے ان ہی کے بھائیوں میں سے تیری مانند ایک نبی برپاکروں گا۔اوراپناکلام اس کے منہ میں ڈالوں گا۔اورجو کچھ میں اُسے حکم دو ںگاوہی وہ ان سے کہے گا‘‘۔آنحضرت ؐ کی مشابہت حضرت موسیٰ ؑسے قرآن کریم میں بھی اس پیشگوئی کی طرف ان الفاظ میں اشارہ کیاگیاہے کہ اِنَّاۤ اَرْسَلْنَاۤ اِلَيْكُمْ رَسُوْلًا شَاهِدًا عَلَيْكُمْ كَمَاۤ اَرْسَلْنَاۤ اِلٰى فِرْعَوْنَ رَسُوْلًا (المزمل :۱۶)سوحضرت موسیٰ کے واقعہ کو مسیحیوں کی ترقی کے دونوں دوروں کے درمیان میں بیان کرکے اس طرف اشارہ کیا گیاہے کہ مثیل موسیٰ ان دونوں دوروں کے درمیان میں پیداہوناضروری تھا۔تااس شبہ کاازالہ کیاجائے کہ اگرمسیحی ترقی کے پہلے دور کے بعد ایک سچانبی آیا تھا توکیوں مسیحی ترقی کادور ختم نہیں ہوگیا۔پس اس دور کاپھر پہلے سے بھی زیادہ زورسے شرو ع
ہوجانابتاتاہے کہ درمیانی نبی سچانہ تھا۔ورنہ وہ ان کی ترقیات کوروک دیتا۔یہ بات ذوقی نہیں بلکہ حضرت موسیٰ کاجوواقعہ آگے بیان ہواہے۔اس کامضمون بھی ا سی کی تصدیق کرتاہے۔جس کی تشریح اگلی آیات میں کی جائے گی۔سردست میں نے اس طرف اشارہ کردیاہے کہ چونکہ مسیحی ترقی کے پہلے دور اور دوسرے دور کے درمیان محمد رسول اللہ صلی اللہ علیہ وسلم کاظہور مقد رتھا۔اس لئے مسیحی ترقی کے دونوں دوروں میں فاصلہ رکھا گیاہے۔اوردرمیان میںحضرت موسیٰ علیہ السلام کا ذکر کردیاگیاہے۔جن کے مثیل آنحضرت صلی اللہ علیہ وسلم تھے۔تاجس طرح واقعات نے ظاہر ہوناتھا اسی طرح ان کا ذکر کیاجائے۔یہ واقعہ جو اس رکوع میں بیان ہواہے۔اس کے بارہ میں مفسرین میں اختلاف ہے مفسرین اکثر اس طرف گئے ہیں اوربعض احادیث میں بھی ا س کا ذکر آتاہے کہ خضرنامی ایک شخص سے ملاقات کے لئے حضرت موسیٰ ؑ تشریف لے گئے تھے۔ان آیات میں ا س سفرکے حالات بیان کئے گئے ہیں۔یہ سفرانہوں نے کیوں کیاتھا اس کے متعلق بھی اختلاف ہے۔بعض نے لکھا ہے کہ حضرت موسیٰ نے خدا تعالیٰ سے پوچھاکہ کیامجھ سے زیاد ہ علم والابھی کوئی شخص ہے۔تواللہ تعالیٰ نے فرمایا کہ ہاں ایک شخص ہے۔اورپھر اس شخص کاپتہ بتایا۔جس پرحضرت موسیٰ علیہ السلام اس شخص کو ملنے کے لئے گئے۔ایک روایت میں یہ آتاہے کہ بعض لوگوں نے حضرت موسیٰ علیہ السلام سے سوال کیا کہ کیا آپ سے بڑھ کر بھی کوئی اورعالم ہے۔توانہوں نے کہا کہ مجھے معلوم نہیں۔اس پر اللہ تعالیٰ نے ان کی طرف وحی کی اوراس شخص کاپتہ دیا ، جوان سے بڑھ کرعالم تھا۔اورا س پروہ اس سے ملنے کے لئے گئے (بخاری کتاب التفسیر سورۃ الکہف،کشاف ، قرطبی ابن جریر زیر آیت ھذا)۔ان پیشگوئیوں کی تفصیل جو سورہ کہف کے واقعات میں مضمر ہیں درحقیقت اس واقعہ کے سمجھنے میں لوگوں کو غلطی لگی ہے۔بات یہ ہے کہ آنحضرت صلی اللہ علیہ وسلم کی ہجرت کاواقعہ سورئہ بنی اسرائیل میں بیان کیاگیاتھا اوراس اسراء کے نتائج بیان کئے گئے تھے کہ آئندہ کیاکیا واقعات ظاہر ہوں گے اورمسلمانوںکو کس طرح ترقیات ملیں گی۔پھر اسراء کی بیان کر دہ کامیابیوں میں مسلمانوں کے لئے جوخطرات پیش آنے والے تھے ان کا ذکرکیاتھا۔یعنی یہود اورنصاریٰ کی مخالفتوں کا ذکر کیاگیاتھا۔ان عظیم الشان خطرات میں سے ایک بڑاخطرہ یہ تھا کہ حضرت موسیٰ کی امت کاایک گروہ جوعیسائی کہلاتے ہیں (اگرچہ وہ اپنے آپ کو حضرت موسیٰ کی امت نہ کہیں مگر خداکے نزدیک وہ حضر ت موسیٰ ہی کی امت میں شامل ہیں )مسلمانوں کوآخری زمانہ میں سخت صدمہ پہنچانے والاتھا۔اس لئے اللہ تعالیٰ
نے اس کی تشریح کے طور پر آنحضرت صلی اللہ علیہ وسلم کے اسراء کے علاوہ خود حضرت موسیٰ کے اسراء کوبھی اس جگہ بیان فرمایا ہے۔جس سے ا س امر کی تصدیق مطلوب ہے کہ آخر آنحضرت صلی اللہ علیہ وسلم غالب آئیں گے اورآپ ؐ کی امت کو غلبہ دیاجائے گا۔اورموسوی امت کابقیہ حصہ (عیسائی لوگ )غالب نہ ہوسکے گا۔یہ واقعہ حضر ت موسیٰ ؑ کاایک کشف ہے میرے نزدیک ظاہرجسم کے ساتھ ایساکوئی واقعہ انہیں پیش نہیں آیا۔استاذی المکرم حضرت مولوی نورالدین صاحبؓ کی یہی رائے تھی(حقائق الفرقان سورۃ الکہف زیر آیت واما الغلام۔۔۔)۔اورمیں اس بارے میں غور کرکے اسی نتیجہ پر پہنچاہوں کہ ان کی یہ رائے درست تھی۔اور میرے نزدیک بھی یہ کشف ہی ہے جس کے ثبوت مَیں ذیل میں بیان کرتاہوں۔حضرت موسیٰ کے سفر کے کشف ہونے کے ثبوت (۱)پہلاثبوت ا س کایہ ہے کہ اس قسم کے کسی سفرکے واقعہ کا ذکر بائیبل میں موجودنہیں۔جس سے معلوم ہوتاہے کہ یہ واقعہ ظاہر ی طورپر ظہور میں نہیں آیا۔یہ تو ہوسکتا ہے کہ اس کے طرز بیان میں کچھ اختلاف ہوجائے مگرسرے سے ہی اس واقعہ کانہ پایاجاناایک عجیب بات معلوم ہوتی ہے۔بنی اسرائیل کی روایات سے معلوم ہوتاہے کہ حضرت موسیٰ کوبھی معرا ج ہواتھا(جیوش انسائیکلوپیڈیا زیر لفظ Ascesion) (چنانچہ مجھے معلوم ہواہے کہ عزیزم مولوی جلال الدین شمس صاحب نے یہودی روایات لندن میوزیم کی کتب دیکھ کرنکالی ہیں جن میں اس واقعہ کا ذکرہے۔اوریہودی کتب میں اس سفرکو جسمانی سفرقرار دیاہے۔مگر ان کا یہ لکھنا ہم پر حجت نہیں۔مسلمانوں سے بعض نے بھی تواسراء کو بلکہ معراج کو جسمانی قرا دےدیاہے ) (۲)بنی اسرائیل کی طرف مبعوث ہونے سے پہلے حضر ت موسیٰ کاایک ہی سفرثابت ہے جومدین کی طرف ہوا۔قرآن کریم میں بھی متعد د بار اس کا ذکر آیاہے۔اورقرآن اوربائیبل دونوں اس با ت پرمتفق ہیں کہ اس سفر میں وہ اکیلے تھے۔لیکن زیربحث واقعہ میں ان کے ساتھ ایک ساتھی کابھی ذکر ہے۔جوان کے ماتحت معلوم ہوتاہے کیونکہ فَتٰی کے لفظ کو جب مضاف بناکراستعمال کیاجائے۔اس کے معنی بیٹے کے یاماتحت کے ہوتے ہیں۔پس سفر مدین پر یہ الفاظ چسپاں نہیں ہوسکتے۔اوراس کے سوااورکوئی سفر ان کابائیبل سے ثابت نہیں۔لہٰذااسے کشف ہی مانناپڑے گا۔(۳)بعثت کے بعد بھی حضرت موسیٰ کاکوئی ایساسفر ثابت نہیں جو انہوں نے اپنی قوم سے علیحدہ ہوکر کیاہو۔بائیبل میں شروع سے لے کر آخیر تک ان کے واقعات ترتیب کے ساتھ موجود ہیں۔لیکن اس سفرکاکہیں ذکر نہیں
جس سے معلوم ہوتاہے کہ یہ سفرکوئی مادی واقعہ نہ تھا۔(۴ )حضرت موسیٰ بنی اسرائیل سے چالیس دن کےلئے چند میل دورپہاڑ پر خدا کاکلام سننے کے لئے گئے تواتنے ہی دنوں میں بنی اسرائیل نے بچھڑے کو معبود بنالیا۔جب چالیس دن کی غیرحاضری نے یہ تباہی مچادی تھی تواتنے لمبے سفر کی صورت میںکیانتیجہ ہواہوگا۔مگراس موقعہ پر بنی اسرائیل کے اندر کوئی فساد نہیں ہوا۔کیونکہ بائیبل میں اس فساد کے علاوہ اور کسی فساد کا ذکرنہیں۔نیز اس فساد کے بعد یہ دانشمندی کے خلاف ہوتاکہ آپ اتنالمباسفر کرتے۔(۵)چالیس دن کے سفر پرجاتے ہوئے حضرت موسیٰ ؑ اپنے بعد حضر ت ہارون کو خلیفہ مقررکرکے جاتے ہیںمگراس ایک دفعہ کے واقعہ کے بعد کہیں بھی ثابت نہیں کہ حضرت موسیٰ ؑ نے حضرت ہارون یاکسی اورکو اپناخلیفہ مقرر کیاہو۔اگر سفر کا ذکر نہیں تھا توکم از کم اس نیابت کا ذکرتوضرور تورات میں ہوناچاہیے تھا۔مگرچونکہ ایساکوئی ذکر بائیبل میں نہیں ہے۔تویہی مانناپڑتا ہےکہ ایساکوئی جسمانی سفرواقعہ نہیں ہوا۔کیونکہ یہ توہرگزتسلیم نہیں کیا جاسکتا کہ حضر ت موسیٰ ؑ سفر پرگئے ہوں اوراپنا جانشین مقررنہ کرگئے ہو ں۔(۶)یہ امر انبیاء کی سنت کے خلاف معلوم ہوتاہے کہ نبوت کے بعد وہ اپنی قوم سے ایک لمبے عرصہ کے لئے الگ ہوئے ہو ں۔جن انبیاء کاتاریخ سے ہمیں پتہ چلتاہے ان میں سے ایک کی سوانح میں بھی اس امر کاپتہ نہیں چلتا۔بے شک ہمارے عقیدہ کی روسے حضرت مسیح اپنی قوم سے الگ ہوئے۔مگروہ درحقیقت ایک حصہءِ قوم سے جداہوکر دوسرے حصہ کی طرف گئے تھے۔اوراس کی مثالیں بکثر ت انبیاء میں پائی جاتی ہیں۔کہ انہوں نے اپنی قوم کے اند رتبلیغی سفرکئے ہیں۔مگرحضرت موسیٰ کایہ سفرتبلیغی نہیں۔نہ اپنی قوم کے علاقہ میں ہے۔بلکہ وہ صرف یہ معلوم کرنے کے لئے اپنی امت کوچھوڑ کرچلے جاتے ہیں کہ ایک شخص مجھ سے بھی زیادہ عالم ہے۔(۷)حضرت ابن عباسؓ نے اسی واقعہ کے اند ر جوکنز کا ذکر ہے اس کی تعبیر میںفرمایا ہے۔مَاکَانَ الْکَنْزُ اِلَّاعِلْمًا(ابن کثیر سورۃ الکہف قولہ تعالیٰ ذالک تأویل ما لم تستطع علیہ صبرا)یعنی اس واقعہ میں جو کنز کا ذکر ہے۔اس سے علم کے سوااور کچھ مراد نہیں۔ظاہر ہے کہ یہ تعبیر ہے اورتعبیرکشف ہی کی ہوسکتی ہے۔اگروہ کنز علم تھا تویہ بھی ظاہر ہے کہ وہ دیوار جو حضرت موسیٰ اور ان کے ساتھی نے بنائی وہ بھی ماد ی دیوار نہ تھی۔اورکھا ناطلب کر نے کاواقعہ بھی مادی نہ تھا۔اورجب یہ حصہ کشف تھا توظاہر ہے کہ ساراواقعہ ہی کشف تھا۔اس واقعہ کے کشف ہونے کاثبوت اندرونی شہادتوں سے (۸) واقعہ کی اندرونی شہادت بھی یہی
ثابت کرتی ہے کہ یہ کوئی جسمانی واقعہ نہیں۔مثلاً خرق سفینہ کے واقعہ کو لے لو۔اس میں جولکھا ہے کہ انہوں نے کشتی میں بڑاسوراخ کردیا۔تاکہ بادشاہ اس کوچھین نہ لے۔اس پر سوا ل یہ ہے کہ کیااس شگاف سے وہ کشتی بے کار ہوگئی تھی ؟اگرکہا جائے کہ نہیں۔توا س پر سوال پیدا ہوتاہے کہ پھر بادشاہ نے اس کوکیوں نہ چھینا جبکہ وہ ابھی کارآمد تھی۔اوراگرکہو کہ بالکل نکمی ہوگئی تھی۔توپھر سوال ہوتاہے کہ اس سوراخ کی وجہ سے و ہ دریامیں غرق کیوں نہ ہوگئی۔ظاہر ی طورپر کوئی ایسی کشتی جس کاتختہ نکال کر اس کو بالکل بیکا رکردیاگیاہو غرق ہونے سے بچ نہیں سکتی تھی۔ہاں کشف میں یہ نظارہ دیکھنا خلاف عقل نہیں ہوتا کہ کوئی تختہ بھی نکال دیاجائے اورکشتی غرق بھی نہ ہو۔پھرقتل نفس کاواقعہ ہے۔یہ بھی ظاہری واقعہ نہیں ماناجاسکتا۔کیونکہ حضرت موسیٰ کو سبق سکھانے والایاکوئی نبی ہوگا یاکوئی بڑابزرگ۔لیکن قتل نفس بغیر نفس توکوئی ادنیٰ مومن بھی نہیں کرسکتا۔کجایہ کہ ایک عظیم الشان نبی ایسے فعل کاارتکاب کرے۔اس کے جواب میں بعض لوگ کہتے ہیں کہ اس نوجوان نے چونکہ آئند ہ قتل کرنے تھے۔اس لئے اس کوقتل کردیا۔مگر ہم کہتے ہیں کہ یہ بھی ظلم ہے اورخلاف شریعت۔اگر ارتکاب جرم سے پہلے محض علم کی بناء پر سزادیناجائز ہے توپھر خدا تعالیٰ کو سب لوگوں کے گناہوں کا قبل از وقت علم ہے وہ کیوں سب کوسزانہیں دیتا۔شریعت کااصولی قانون یہی ہے کہ جب تک کوئی کسی گناہ کامرتکب نہ ہوجائے ،اس کوسزانہیں دی جاسکتی۔اس اصل پر شرائع کااختلاف اثرانداز نہیںہوسکتا۔یعنی بعض کہتے ہیں کہ وہ عملاً قتل کیا کرتا تھا۔مگراس کاپتہ نہ لگتاتھا (تفسیر مظہری سورۃ الکہف زیر آیت حتی اذا لقیا۔۔۔)۔یہ جواب بھی نہایت بوداہے۔اگریہ بات صحیح ہے۔توقرآن مجید کوچاہیے تھا کہ یہ وجہ بتاتا۔تاکہ لوگوں کی تسلی ہوجاتی۔اورانہیں معلوم ہوجاتاکہ بلاوجہ اس نوجوان کو قتل نہیں کیا گیا۔آخری واقعہ دیوار کاہے۔اس کوبھی ظاہری حالت میں تسلیم نہیں کیاجاسکتا۔بھلایہ کیسے ممکن ہو سکتا ہے کہ اپنے ساتھی کے دیوار بنادینے پر حضرت موسیٰ ؑ جیسا وسیع الحوصلہ او رعظیم الشان نبی اس لئے اعتراض کرے کہ شہر کے لوگوں نے ہمیں کھانا نہیں کھلایا۔شہر والوں کے کھانانہ کھلانے کاالزام ان پر تھا نہ کہ ان دو بیکس یتیموں پر جن کی وہ دیوار تھی۔اوریو ں بھی یہ بات حضرت موسیٰ ؑ کی شرافت نفس سے بہت بعید ہے کہ و ہ دویتیموں کی دیوار پر اجر نہ لینے پر اعتراض کریں۔غرض واقعہ کی اندرونی شہاد ت بھی ثابت کرتی ہے کہ یہ ایک کشف ہے نہ کوئی ظاہر ی واقعہ۔(۱۰)یہ ساراواقعہ بحیثیت مجموعی بھی ثابت کرتاہے کہ یہ ایک کشف تھا۔کیونکہ جو تین باتیں اس سفرمیں بتائی
گئی ہیں۔اگرو ہ ظاہر ی لی جائیں تووہ ایسی نہیں ہیں کہ ان کے لئے کوئی معمولی مومن بھی سفرکرے کجا یہ کہ حضرت موسیٰ ؑ کو ان باتوں کے سیکھنے کے لئے بھیجاجائے۔کیاحضرت موسیٰ ؑ یہ سیکھنے گئے تھے۔کہ کشتی کاتختہ کیسے توڑا جاتاہے یاقتل کیونکر کیا جاتاہے یادیوار کےبنانے کی کیاترکیب ہے یااس پر اجر لیناچاہیے یانہیں۔ان باتوں کے سیکھنے کے لئے تو ایک جاہل گنواربھی سفر نہیں کرے گا۔غرض ان باتوںمیں سے کوئی بھی تو ایسی بات نہیں کہ جس کو ظاہرصورت میں مان کر حضرت موسیٰ ؑ جیسے اولوالعز م اورذی شان نبی کاسفرجائزاورمعقول قرار دیاجاسکے۔(۱۱)ماوردی نے روایت کی ہے کہ جس شخص کے پاس حضرت موسیٰ ؑ گئے تھے وہ ایک فرشتہ تھا (ابن کثیر) پس یہ واقعہ کشف ہی ماننا پڑے گاورنہ ظاہر ی سفر کرکے فرشتے کے پاس جانے کے کیا معنے ہوں گے۔فرشتہ توپل مارنے میں خود ان کے پاس آسکتاتھا۔(۱۲)آنحضر ت صلی اللہ علیہ وسلم فرماتے ہیں ’’وَدَدْنَا اَنَّ مُوْسٰی کَانَ صَبَرَ حَتّٰی یَقُصَّ اللہُ عَلَیْنَا مِنْ خَبَرِھِمَا (بخاری کتاب التفسیر باب قولہ تعالیٰ و اذ قال موسیٰ لفتہ)کاش موسیٰ ؑ صبرکرتے اورخاموش رہتے تاکہ خدا تعالیٰ ہمیں ان کی اورخبریں بھی بتادیتا۔اگرا س واقعہ کو ظاہر ی واقعہ سمجھاجائے توآنحضرت صلی اللہ علیہ وسلم کی شان توبہت ارفع ہے میں بھی اپنے ذہن میں ان امورکے معلوم کرنے کاکوئی شوق نہیں پاتااورنہ ہی میرے نزدیک کوئی سمجھدار انسان ایسی سطحی باتوں کے متعلق زیادتی علم کی خواہش کرسکتاہے۔پس معلوم ہواکہ یہ آئندہ کی اخبار تھیں جوکشفی رنگ میں آنحضرت صلی اللہ علیہ وسلم کے زمانہ کے متعلق حضرت موسیٰ علیہ السلام پرظاہر ہوئیں اور چونکہ وہ غیب پرمشتمل تھیں اورآئندہ امت محمدیہؐ کے حالات کوظاہرکرتی تھیں اس لئے آنحضرت صلی اللہ علیہ وسلم کو خواہش تھی کہ کاش موسیٰ ؑ خاموش رہتے اوراوربھی باتیں کھل جاتیں۔ان دلائل سے ثابت ہے کہ یہ واقعہ کشف کاواقعہ ہے۔اگرچہ مصدقہ بائیبل کاکوئی حوالہ ہمیں نہیں ملتا جس میں اس واقعہ کاکسی رنگ میں بھی ذکر ہو۔مگر یہود کی روایات کی کتب میں ایسی رویات موجود ہیں اورمسلمانوں کی روایات سے بھی معلوم ہوتا ہے کہ اسلام کے ابتدائی ایام میں بھی یہود میں ضروراس قسم کی روایات پائی جاتی تھیں ورنہ مسلمان انہیں کہاں سے لے سکتے تھے۔مگر یہود کی روایات کاہمار ی تحقیق پر کوئی اثر نہیں ہوسکتا۔جب تک قرآن کریم عقل اورمشاہد ہ ان کی تصدیق نہ کرے۔ہم ان کوماننے پر مجبور نہیں۔بلکہ بغیر ان قیود کے ان کاماننا خطرہ سے خالی نہیں۔خلاصہ یہ کہ عقل ونقل اس واقعہ کو ایک کشف قرار دیتے ہیں۔