سُوْرَۃُ الْکَھْفِ
تفسیر کبیر (جلد ۶), حصہ 8
حضرت خلیفہ اولؓ کے نزدیک عبد سے مراد آنحضرت ؐ تھے وہ شخص جس سے حضرت موسیٰ ؑ اسراء میں سبق لینے گئے تھے۔اس کے متعلق استاذی المکر م حضرت مولوی نورالدین صاحب ؓ کی رائے تھی کہ وہ آنحضرت صلی اللہ علیہ وسلم کاوجود متمثل ہواتھا۔میں نے جب اس پرغورکیا۔تومیں بھی اس یقین پر پہنچا ہوں کہ آنحضرت صلی اللہ علیہ وسلم ہی حضرت موسیٰ ؑ کو متمثل ہوکر نظر آئے تھے۔اوریہی وجہ تھی کہ آنحضرت صلی اللہ علیہ وسلم نے خواہش کی کہ کاش موسیٰ خامو ش رہتے۔توہمیں اورحالات بھی معلوم ہوجاتے۔یعنی ہمیں پتہ لگ جاتاکہ ہمارے ساتھ کیا واقعات پیش آنے ہیں۔آنحضرت ؐ کے زمانہ کے حالات حضرت موسیٰ ؑ پر کشفی طور پر ظاہر ہوئے میرااپنا یہ خیال ہے۔گویہ خیال ایک ذوقی نظریہ ہے کہ جس وقت کوہ سیناء پر آنحضرت صلی اللہ علیہ وسلم کے متعلق حضرت موسیٰ ؑ کو بشارت دی گئی (دیکھو استثناء باب ۱۸آیت ۱۸)اورانہیں معلوم ہواکہ ایک عظیم الشان نبی میرے بعد پیدا ہونے والا ہے۔توان کے دل میں یہ معلوم کرنے کی خواہش پیداہو ئی۔کہ وہ کونسی تجلّی ہوگی جواس نبی پر ظاہر کی جائےگی۔جس پرانہوں نے عرض کیا۔’’رَبِّ اَرِنِيْۤ اَنْظُرْ اِلَيْكَ۔‘‘ذرامجھ پر بھی وہ محمدی تجلّی ظاہر فرما۔تاکہ میں بھی تودیکھو ں۔کہ اس پر توکس شان سے ظاہر ہوگا۔اس کاانہیں یہ جواب دیاگیا۔کہ ایسانہیں ہوسکتا۔ہرشخص اپنے مناسب حال ہی تجلی دیکھ سکتاہے۔میرے اس بیان کی تائیداس سے بھی ہوجاتی ہے کہ حضرت موسیٰ ؑ اس سے پیشتر روحانی تجلی دیکھ چکے تھے۔جیساکہ انہیں اللہ تعالیٰ نے فرمایا ’’اِنِّيْۤ اَنَا رَبُّكَ فَاخْلَعْ نَعْلَيْكَ١ۚ اِنَّكَ بِالْوَادِ الْمُقَدَّسِ طُوًى ‘‘(طہ:۱۳)۔پھر جبکہ و ہ اللہ تعالیٰ کی تجلی دیکھ چکے تھے توان کے اس قول کے کیامعنے ہوئے کہ اے اللہ مجھے اپناآپ دکھا۔اگراس کے یہ معنے کئے جائیں کہ پہلے روحا نی تجلی دیکھی تھی اب وہ اللہ تعالیٰ کواس کی اصل صورت میں دیکھناچاہتے تھے۔تواس کے یہ معنے ہوتے ہیں کہ حضرت موسیٰ علیہ السلام جیسے برگزیدہ نبی کوبیوقوف قرار دیاجائے۔نعوذ باللہ من ذالک۔کیونکہ کسی کایہ کہنا کہ اے خداتومجھے مجسم ہوکرنظرآ۔نادانی کی بات ہے۔اوریہ بات حضرت موسیٰ کی طرف ہر گز منسوب نہیں ہوسکتی۔پس یہ رؤیت کی درخواست روحانی ہی قرار دی جاسکتی ہے۔اور چونکہ موسوی تجلی پہلے ان پر ہوچکی تھی۔اس سے معلوم ہوتاہے کہ اب جو خواہش انہوں نے کی توو ہ کسی اوررؤیت کے لئے تھی۔اور چونکہ اس درخواست سے معاً پہلے انہیں محمدرسول اللہ صلعم کی بشار ت دی گئی تھی۔حضرت موسیٰ ؑ خدا تعالیٰ کی اس تجلی کو دیکھنے کی تاب نہ لاسکے جو آنحضرت ؐ پر ہوئی تھی مَیں یہی قیاس کرتاہوں۔کہ یہ درخواست ان کی محمدی تجلی کے دیکھنے کے بارہ میں تھی۔جس کا جواب اللہ تعالیٰ نے یہ دیا کہ
’’لَنْ تَرَانِیْ‘‘کہ تومجھے اس صورت میں نہیں دیکھ سکتا۔جس صورت میں کہ محمدرسول اللہ صلی اللہ علیہ وسلم نے دیکھنا ہے۔کیونکہ اس کے دیکھنے کے لئے محمدی مرتبہ کی ضرورت ہے۔جوتجھے حاصل نہیں۔یہی وجہ تھی کہ ’’لَنْ تَرَانِیْ ‘‘کہہ کر پھر اللہ تعالیٰ نے جلوہ دکھایا۔چنانچہ موسیٰ نے دیکھ لیا کہ واقعہ میں وہ اس جلوہ کے مطابق ظرف نہ رکھتے تھے۔اس وجہ سے وہ اس جلوہ کودیکھتے ہی بےہوش ہوگئے۔میں سمجھتاہوں کہ حضر ت موسیٰ علیہ السلام کو رسول کریم صلعم کی شان اعلیٰ کے دکھانے کے لئے اللہ تعالیٰ نے یہ کشف دکھایا اوراس کشف کاخضر میرامحمدؐہی ہے جس کے ساتھ چلنے کی موسیٰ علیہ السلام کوطاقت نہ تھی۔اَللّٰھُمَّ صَلِّ عَلیٰ مُحَمَّدٍ وَعَلیٰ اٰلِ مُحَمَّدٍ وَبَارِکْ وَسَلِّمْ اِنَّکَ حَمِیْدٌ مُجِیْدٌ۔حضرت موسیٰ ؑ کے ساتھ کا جو ان حضرت عیسیٰ ؑ تھے وَ اِذْ قَالَ مُوْسٰى لِفَتٰىهُ۔فتی کے متعلق روایات میں لکھا کے کہ وہ یوشع بن نون تھے (کشاف زیر آیت ھذا)۔کوئی تعجب نہیں کہ کشف میںحضرت موسیٰ علیہ السلام نے ان کوہی ساتھ دیکھا ہو۔لیکن میری اپنی رائے یہ ہے کہ یہ دوسراشخص حضرت عیسیٰ علیہ السلام تھے۔جنہوں نے موسوی سلسلہ کے سفرکے آخری دور میں قوم کی راہنمائی کرنی تھی۔اورگویا موسوی سفر کااختتام ان کی معیت میں ہونا تھا۔اس کاثبوت میرے نزدیک اس آیت سے بھی ملتاہے کیونکہ اس آیت میں یہ ذکر نہیں کہ موسیٰ علیہ السلام گھر سے ایک نوجون کو لے کرچلے۔بلکہ خود ان کے چلنے کابھی ذکر نہیں۔ذکر ہے تویہ کہ موسیٰ نے اپنے آپ کوسفر کی حالت میں دیکھا اوراس وقت ان کے ساتھ ایک نوجوان تھا۔انہو ں نے اس نوجوان سے کہا کہ جب تک میں مجمع البحرین تک نہ پہونچ جائو ں میں اپناسفرختم نہ کروں گا۔خواہ مجھے صدیوں تک ہی کیوں نہ سفرکرنا پڑے۔زمانہ کے لئے جولفظ اس آیت میں استعمال ہواہے۔وہ حُقُب کاہے۔اوریہ لفظ حُقْبٌ کی جمع ہے۔حُقْب کے معنے اسّی سال یااس سے زیادہ سالوں کے ہوتے ہیں۔درحقیقت یہ لفظ عربی میں صدی کاقائمقام ہے۔پس حُقُبٌ جو جمع ہے۔اس کے معنے ہوئے صدیاں۔مگر بعض دفعہ اس لفظ کو ایک سال یاکئی سال کے لئے بھی استعمال کرلیتے ہیں۔اگر یہی معنے لئے جائیں توبھی آیت کے معنے یہ ہوں گے کہ سالوں چلتاجائوں گا۔یایہ کہ دسیوں سال چلتاچلاجائوں گا۔ظاہر ہے کہ ایک نبی کاامت سے سالہا سال تک جدارہنا عقل کے خلاف ہے۔بلکہ خود نبوت کی ضرورت کو مشتبہ کر دیتاہے۔رسول کریم صلی اللہ علیہ وسلم کو مدینہ ہجرت کرنی پڑی۔توآپؐ نے مکہ سے صحابہ کووہاں بھجوادیا اورپھر خود مدینہ میں بھی آپؐ پر ایمان لانے والے موجود تھے۔پس حضرت موسیٰ علیہ السلام نے اگر سالہاسال کہا ہے۔تب بھی یہ ثبوت ہے کہ یہ کشف تھا۔اوراگرصدیوں کہا ہے اور میرے نزدیک یہی کہا ہے۔توپھر تویہ قطعی طور پر ثابت ہے۔کہ ان
الفاظ کوموسیٰ کے منہ سے نکلواکر اللہ تعالیٰ نے یہ بتایا ہے کہ موسیٰ کاروحانی سفر یعنی ان کی امت کا زمانہ صدیوں تک ممتدّچلاجائے گا۔مجمع البحرین سے مراد زمانہ اختتام موسیٰ میرے نزدیک اس فقر ہ کے اس جگہ بیان کرنے کی بھی ایک حکمت ہے اورو ہ یہ کہ موسوی سفر کی اس منزل میں جہاں کہ فتٰی آپ کے ساتھ شامل ہونا مقدر تھا۔ایک حصئہ قوم میں یہ خیال پیدا ہونے والاتھا کہ اب موسیٰ کاسفر ختم ہوگیا۔اب اس نوجوان یعنی حضرت عیسیٰ کاسفر شروع ہوگا۔یعنی بعض لوگوں میں یہ شبہ پیدا ہونے والاتھا۔کہ حضر ت عیسیٰ کے آنے سے موسوی شریعت ختم ہوگئی۔اور حضرت عیسیٰ علیہ السلام نے نیادین جار ی کیا ہے۔ان الفاظ میں اس شبہ کاازالہ کیاہے اورموسیٰ ؑ کے منہ سے یہ کہلوایاہے کہ ا س نوجوان کے ملنے سے حضرت موسیٰ علیہ السلام کاسفرختم نہیں ہوتا۔بلکہ مجمع البحرین پر یعنی ظہورمحمد صلعم کے زمانہ پر جاکر ختم ہوگا۔گویاعیسیٰ علیہ السلام کے ظہور پر کسی نئے دین کااجراء نہیں ہوگا۔بلکہ وہ موسوی دین کی تائید کریں گے اورموسیٰ کے سفرکوختم کرنے والے نہ ہوںگے۔بلکہ موسیٰ کی نیابت میں ان کے سفرکو پوراکریں گے۔خود حضرت مسیح نے بھی اس امر کی تصدیق کی ہے۔فرماتے ہیں۔’’یہ نہ سمجھو کہ میں توریت یانبیوں کی کتابوںکو منسوخ کرنے آیا ہوں منسوخ کرنے نہیں بلکہ پوراکرنے آیاہوں ‘‘۔(متی باب ۵ آیت ۱۷) اس کشف سے معلو م ہو تاہے کہ یاتوحضرت موسیٰ نے جب یہ کشف دیکھا تواس کاشروع ہی یہ تھا کہ گویا وہ ایک راستہ پر ایک نوجوا ن کے ساتھ چل رہے ہیں۔اورمنزل مقصود نہ ملنے پر حیران ہیں یایہ کہ اس سے پہلے بھی حصہ کشف کاتھا۔جس میں لمبے سفر کا ذکر تھا مگراس کو بے ضرورت سمجھ کر قرآن کریم نے چھوڑ دیاہے۔کیونکہ وہی آدمی یہ کہہ سکتاہے کہ جب تک مجمع البحرین تک نہ جاپہنچوں چلتاچلاجائوں گاخوا ہ صدیاں چلنا پڑے جو ایک عر صہ تک راستہ تلاش کرکے حیران ہورہاہو کہ منزل مقصود کہاں گئی۔میرے نزدیک یہ اس امر کی دلیل ہے کہ وہ نوجوان حضرت مسیح تھے۔جوموسوی سفرکے اختتام کے قریب آکر حضرت موسیٰ علیہ السلام کو ملے اورپھر اس روحانی سفر میں ان کے ہمرکاب ہوگئے۔مجمع البحرین کے ظاہراً کسی مقام پر چسپاں ہونے کی تردید ا س آیت میں جو لفظ مَجْمَعَ الْبَحْرَيْنِ آیاہے یہ بھی اس پر روشنی ڈالتاہے کہ یہ کشفی واقعہ ہے۔کیونکہ مجمع البحرین کسی معروف جگہ کانام نہیں۔اورسوائے اس کے کہ اس کے معنے دوسمندروں کے ملنے کی جگہ کے لئے جائیں اورکوئی معنے ظاہر میں نہیں کئے جاسکتے۔اور
موسیٰ علیہ السلام کی ہجر ت کے بعد کی رہائش میں قریب ترین علاقے جہاںدوسمندر ملتے تھے یہ تین تھے۔باب المندب۔جہاںبحیرہ احمر اوربحرالہندملتے ہیں۔دردانیال۔جہاں بحیرہ روم اوربحیر ہ مارمور ہ ملتے ہیں یاپھر البحرین جہاں خلیج فارس کاسمندر بحرالہند سے ملتاہے۔یہ تینوں علاقے قریباً ہزارہزار میل دور ان کے وطن سے تھے۔اوراس زمانہ کے حالات کو مدنظر رکھ کر کوئی سال بھر کاسفربنتاتھا۔لیکن چونکہ کشف سے معلوم ہوتاہے کہ سمندر کے کنارے کنارے آپ سفرکررہے تھے۔اس لئے دردانیال کادرہ ہی ظاہری سمندر بنتاہے۔کیونکہ تینوں جگہوں میں سے صرف وہی جگہ ہے۔جس تک موسیٰ ؑ کی جائے رہا ئش ہے۔سمندر کے کنارے کنارے راستہ جاتاہے۔مگر یہی وہ راستہ ہے جس میں کنعان پڑتا ہے۔اورجس کے متعلق بائیبل شاہد ہے کہ موسیٰ علیہ السلام اپنی زند گی میں وہاںنہیں جاسکے (استثناء باب ۳۴ آیت ۴،۵)۔پس یہ واقعہ بھی اس امر کاثبوت ہے کہ یہ ایک کشف تھا۔مجمع البحرین کی تعبیر اورمجمع البحرین کسی جگہ کانا م نہیں بلکہ ایک تعبیر طلب نام ہے چنانچہ تعطیرالانام میں لکھا ہے۔’’بَحْرٌ فی الْمَنَامِ یَدُلُّ عَلٰی مَلَکٍ قَوِیٍّ مَھَابٍ عَادِلٍ شَفِیْقٍ یَحْتَاجُ اِلَیْہِ الْخَلَائِقُ۔اورپھر لکھاہے رُبَّمَا دَلَّ الْبَحْرُعَلَی التَّسْبِیْحِ وَالتَّھْلِیْلِ (تعطیر الانام کلمة البحر) سمندرسے مراد زبردست بادشاہ جوعاد ل ہو ، شفیق ہو ،اوردنیا اس کی محتاج ہو۔اورایسا ہی سمندر کے معنے تسبیح و تہلیل کے بھی ہوتے ہیں۔اوراس میں گویا ’’سُبْحٰنَ الَّذِيْۤ اَسْرٰى بِعَبْدِهٖ ‘‘کی طر ف اشارہ ہے۔پس مَجْمَعَ الْبَحْرَیْنِ سے مراد درحقیقت و ہ زمانہ تھا۔جہاں حضر ت موسیٰ علیہ السلام کا زمانہ ختم ہوا۔اورمحمد رسول اللہ صلی اللہ علیہ وسلم کا زمانہ شروع ہوا۔یعنی وہ گھڑی جب محمد رسول اللہ صلی اللہ علیہ وسلم کو پہلاالہام نبوت ہوا۔مجمع البحرین تھی۔وہاں موسیٰ جو ایک روحانی عادل،شفیق اوردنیاکے لئے ضروری بادشاہ تھے ان کاعلاقہ ختم ہوتاتھا اورمحمد رسول اللہ صلی اللہ علیہ وسلم جو اور بھی بڑے روحانی سمند ر تھے ان کا زمانہ شروع ہوتا تھا۔حضرت موسیٰ علیہ السلام کو کشف میں دوبڑے سمندروں کے ملنے کا مقام دکھا کر گویایہ بتایاگیا کہ اس زمانہ تک آپ کی امت کا زمانہ ہے۔آگے ایک اورسمندر شروع ہوتاہے۔آپ کا زمانہ ختم ہوکر اس نئے نبی کاکام شروع ہوگا۔اور وہی شخص روحانی زندگی کاسامان حاصل کرسکے گا جواس سمندر میں غوطہ لگائے گا۔ا س رؤیا میں اس طرف بھی اشارہ کیا گیاہے کہ موسوی سلسلہ محمدی سلسلہ کے لئے بطور ارہاص ہے۔اورآخر یہ سمندراس سمندرمیں جاکرمل جائے گا۔اسی وجہ سے محمد رسول اللہ صلی اللہ علیہ وسلم کوجوکشف دکھایاگیاتھااس میں تویہ نظارہ دکھایاگیا تھا کہ جبریل خود رسول کریم صلی اللہ علیہ وسلم کے پاس آئے۔مگرحضرت موسیٰ علیہ السلام کو یہ
نظارہ دکھایا کہ وہ مجمع البحرین کی طرف اپنے ساتھی کو لے کر گئے اوروہاں جاکران کاسفر ختم ہوگیا (درمنثور زیر آیت بنی اسرائیل ۱ تا ۸)۔فَلَمَّا بَلَغَا مَجْمَعَ بَيْنِهِمَا نَسِيَا حُوْتَهُمَا فَاتَّخَذَ پس جب وہ(دونوں) ان(دونوں سمندروں کے)باہر ملنے کی جگہ پرپہنچے تووہ اپنی مچھلی (وہاں)بھول گئے۔جس سَبِيْلَهٗ فِي الْبَحْرِ سَرَبًا۰۰۶۲ پراس نے تیزی سےبھاگتے ہوئے سمندر میں اپنی راہ لی۔حلّ لُغَات۔اَلْحُوْتُ اَلْحُوْتُکے معنے ہیں اَلسَّمَکُ وَقَدْ غَلَبَ فِی الْکَبِیْرِ۔مچھلی او رزیاد ہ تربڑی مچھلی پر بولاجاتاہے۔(اقرب) اَلسَّرَبُ۔اَلسَّرَبُ:حُجْرُالْوَحْشِیِ۔وحشی جانور کے رہنے کی جگہ۔اَلْحَفِیْرُ تَحْتَ الْاَرْضِ۔زمین کے اندرگڑھا۔القَنَاۃُ۔یَدْخُلُ مِنْھَا الْمَاءُ۔پانی کی نالی۔نیز سَرَبٌ مصد ربھی ہے جس کے معنی تیزی سے چلنے کے ہیں (اقرب) تفسیر۔حوت کی تعبیر نَسِيَا حُوْتَهُمَا۔حوت کے معنے علم التعبیر میں یہ لکھتے ہیں’’رُبَّمَا دَلَّتْ رُؤْیَتُہُ عَلٰی مَعْبَدِ الصَّالِحِیْنَ وَمَسْجِدِ الْمُتَعَبِّدِیْنَ۔‘‘(تعطیر الانام کلمۃ حوت) حوت یعنی مچھلی کادیکھنا بہت نیک لوگوں کی عبادت کی جگہ اورعبادت گزاروں کی مسجد پر دلالت کرتاہے۔جیسا کہ اس آیت سے او راگلی آیت کے بعد کی آیت سے معلوم ہوتاہے۔حضرت موسیٰ علیہ السلام کو مجمع البحرین کے مقام کی شناخت یہ بتائی گئی تھی کہ وہاںمچھلی غائب ہوجائے گی۔پس نَسِيَا حُوْتَهُمَاکے معنے یہ ہوئے۔کہ جس مقام پر ان لوگوں کے ہاتھوںسے نیک لوگوں کی عبادت گاہیں اورعبادت گزاروں کی مساجد نکل جائیں گی۔وہی مقام مجمع البحرین ہوگا۔یعنی جہاں موسوی سلسلہ ختم ہوجائے گااورمحمدی سلسلہ شروع ہوگا۔نَسِيَا حُوْتَهُمَا سے اشارہ ہے کہ موسیٰ اور ان کے فتی کی قوم سے عبادت کی قبولیت اٹھ جائے گی یہ مضمون کس قد واضح ہے۔ایک نئے نبی کے آنے سے نیکی اورعبادت پہلی قوم سے چھین لی جاتی ہے۔اوراس نبی کی قوم کی طرف منتقل ہوجاتی ہے۔اسی کی طرف اس کشف میں اشارہ کیا گیا ہے اوربتایا ہے کہ سلسلہ محمدیہ کے اجراء پر
بنی اسرائیل یعنی موسوی سلسلہ کے لوگوں کی عبادات خدا تعالیٰ کے حضو ر میں مقبول نہ رہیں گی۔اورمحمد رسو ل اللہ کی امت کی عبادتیں ہی مقبول ہوں گی اورعبادت اورصلاحیت کے جوآثار ہیں موسوی سلسلہ کے لوگوں سے غائب ہوجائیں گے اورنَسِيَا حُوْتَهُمَا کہہ کر یہ بتایا ہے کہ خالص اسرائیلی قوم توا س وقت سے پہلے ہی صحیح عبادت اورتقویٰ کوکھوچکی ہوگی۔صرف وہی قوم عبادت اورصلاحیت اپنے اندررکھتی ہوگی جوصرف موسی کی قوم نہیں کہلاسکتی۔بلکہ موسیٰ اور اس کے فتی کی قوم کہلاسکے گی یعنی حضرت مسیح کے آنے کے بعد مسیحیوں میں عبادت رہ جائے گی۔بنی اسرائیل اس سے محروم ہوجائیں گے۔لیکن چونکہ حضرت مسیح حضرت موسیٰ کے سلسلہ ہی کے نبی ہوںگے۔اس لئے ان کی حوت بھی ایک رنگ میں موسیٰ کی حوت ہوگی۔اس لئے وہ دونوں کی طرف منسوب ہو گی۔مگر مجمع البحرین کا مقام آئے گا تواس قوم کے ہاتھ سے بھی جن کے موسیٰ اورعیسیٰ علیھم السلام مشترک طورپر معلم ہوںگے۔عبادت اورصلاحیت جاتی رہے گی۔اس آیت سے بھی معلوم ہوتاہے کہ یہ کشف تھا۔کیونکہ ظاہر مجمع البحرین توایسی جگہ ہوتی ہے کہ اسے کوئی بھول ہی نہیں سکتا اوراس کے لئے کسی حوت کی علامت کی ضرورت نہیں۔پس یہ روحانی مجمع البحرین ہے جو علامتوںسے سمجھا جاسکتاہے۔کیونکہ ظاہر میں اس کی کوئی علامت نہیںہوتی۔بلکہ لوگ دوسرے بحر کے زمانے میں اس کی مخالفت کرتے اور اسے جھوٹاکہتے ہیں۔اوریہ ماننے کے لئے تیار نہیں ہوتے کہ مجمع البحرین آگیا ہے۔یعنی پہلے نبی کا زمانہ ختم ہوگیا ہے اور دوسرے نبی کا زمانہ شرو ع ہوگیاہے۔اس کی علامت یہی ہوتی ہے کہ پہلے نبی کی قوم کی عبادات اورصلاحیت جاتی رہتی ہے۔اورعقلمند لوگ اللہ تعالیٰ کے سلوک میں اس فرق کو دیکھ کر کہ اب وہ پہلی قوم کی عبادات کی کوئی قد رنہیں کرتا اوردوسری قوم کی عبادتوںکو قبول کرتا اوراس کی دعائوں کوسنتاہے سمجھ جاتے ہی کہ مجمع البحرین آگیا ہے۔اس مضمون کی طر ف قرآن کریم کی ایک اورآیت میں کھلے لفظوں میں بھی اشارہ کیاگیاہے فرماتا ہے۔مُحَمَّدٌ رَّسُوْلُ اللّٰهِ١ؕ وَ الَّذِيْنَ مَعَهٗۤ اَشِدَّآءُ عَلَى الْكُفَّارِ رُحَمَآءُ بَيْنَهُمْ تَرٰىهُمْ رُكَّعًا سُجَّدًا يَّبْتَغُوْنَ فَضْلًا مِّنَ اللّٰهِ وَ رِضْوَانًا١ٞ سِيْمَاهُمْ فِيْ وُجُوْهِهِمْ مِّنْ اَثَرِ السُّجُوْدِ١ؕ ذٰلِكَ مَثَلُهُمْ فِي التَّوْرٰىةِ(الفتح :۲۹) یعنی محمد ؐ اللہ کے رسول ہیں۔اوروہ لوگ جو ان کے ساتھ ہی کفار کے مقابل پر بہت سخت ہیں۔اورآپس میں بہت رحم کرنے والے ہیں۔توان کودیکھے گاکہ رکوعوںاور سجدوںمیں لگے رہتے ہیں۔اوراللہ تعالیٰ کے فضل اورا س کی رضاکے متلاشی ہیں۔ان کے مونہوں سے ان کے سجدوں کی قبولیت کے آثار ظاہر ہیں۔یہ ان کی مثال تورات میں بیان ہوچکی ہے۔اس آیت میں صاف
بتایا ہے کہ حضرت موسیٰ علیہ السلام کے ذریعہ سے بتایاگیاتھا کہ محمد رسو ل اللہؐ اوران کی جماعت کی سچائی کاثبوت یہ ہوگاکہ ان کے چہروں سے یہ معلوم ہوگاکہ خداتعالی ٰ نے ان کے سجدوں کوقبول کرلیا ہے۔جبکہ ان کے مخالفوں کی عبادتیں رد کردی جائیں گی۔اوراللہ تعالیٰ کے فضلوں کے آثا ر ان کے چہروں سے ظاہر نہ ہو ں گے۔اس کشف کو تورات سے تحریف کر کے یہود نے نکال دیا ہے میں اس آیت کو دیکھتے ہوئے سمجھتاہوں کہ تورات میں اس کشف کا ذکر تھا۔مگریہود میں سے بعض نے جہا ں اورتحریفیں تورات میں کیں وہاں اسے بھی نکال دیا۔کیونکہ اس سے ان کی قوم پر ایک زد پڑتی تھی۔لیکن ان کی زبانی روایات میں ا س کشف کا ذکر باقی رہ گیاہے۔جیساکہ یہود کے دوسرے لٹریچر میں اس کشف کابگڑی ہوئی صورت میں وجود پایا جاتا ہے۔ا س آیت سے یہ بھی ثابت ہوتاہے کہ موسوی سلسلہ محمدی سلسلہ کی ایک کڑی تھا۔کیونکہ مجمع البحرین کاظاہر میں کوئی نشان نہ ہونابتاتاہے کہ یہ دونوں سمندر اس طرح آپس میں ملے تھے۔کہ دوسمندر نہ معلوم ہوتے تھے بلکہ اگلا سمندر پہلے کا تسلسل ہی معلوم ہوتاتھا۔گویا پہلے سمندر کاپانی دوسرے میں آملاتھا۔ایک دوسرے کے مقابل کے سمندر نہ تھےکہ ان کے ملنے کی جگہ کاالگ نشان نظر آتا۔فَلَمَّا جَاوَزَا قَالَ لِفَتٰىهُ اٰتِنَا غَدَآءَنَا١ٞ لَقَدْ لَقِيْنَا مِنْ پھر جب وہ(اس جگہ سے )آگے نکل گئے تواس نے اپنے نوجوان (رفیق ) سے کہا (کہ)ہماراصبح کاکھانا ہمیں سَفَرِنَا هٰذَا نَصَبًا۰۰۶۳ دے ہمیں یقیناً اپنے اس سفر کی وجہ سے تکان ہوگئی ہے۔حلّ لُغَات۔غَدَاءَ نا۔اَلْغَدَاءُ کے معنے ہیں طَعَامُ الْغُدْوَۃِ۔صبح کاکھانا(اقرب) نصبًا۔نَصَبٌ کے معنے تھکان کے ہیں۔مزید تشریح کے لئے دیکھو حجر آیت نمبر ۴۹۔نَصَبٌ نَصِبَ(یَنْصَبُ) کا مصدر ہے۔اورنَصِبَ الرَّجُلُ کے معنی ہیں اَعْیَا۔تھک گیا (لازم)نَصِبَ فِی الْاَمْرِ:جَدَّ وَاجْتَہَدَ۔کسی کام میں کوشش اورمحنت کی (اقرب)پس النَّصَبُ کے معنے ہوں گے تکان۔تفسیر۔یہ ضروری نہیں کہ ان تمام واقعات کی تعبیر ہی کی جائے۔کیونکہ بعض دفعہ کشف کی صورت میں بعض ایسے واقعات بھی ہوتے ہیں جوصرف رؤیا کوایک مکمل نظار ہ کی صورت دینے کے لئے شامل کئے جاتے ہیں۔
خود وہ تعبیر کے قابل امورکاحصہ نہیں ہوتے۔مثلاً ایک شخص خواب میں ایک موت کا نظارہ دیکھتاہے تواس کے ساتھ کوئی مکان وغیرہ بھی دیکھ لیتا ہے۔وہ مکان تعبیر طلب نہیں ہوتا۔بلکہ صرف وہ نظارہ جس سے کسی کی موت پر دلالت کی جاتی ہے۔تعبیر طلب ہوتاہے۔لیکن اگر اس واقعہ کی بھی تعبیر ک جائے تومضمون میں وسعت ہی پیداہوتی ہے۔اس لئے میں اس کی بھی علم تعبیر کے مطابق تشریح کردیتاہوں۔غداء کے معنے علم التعبیر میں یہ لکھے ہیں کہ جو اپنا غداء طلب کرے۔اس کے یہ معنے ہیں کہ وہ تھک جائے گا۔(تعطیر الانام زیر لفظ غداء ) ان معنوں کے روسے یہ مراد ہوگی کہ جب مجمع البحرین یعنی رسول کریم صلعم کا زمانہ آجائے گا توحضرت موسیٰ اورعیسیٰ کی قوم ا س سے فائدہ نہ اٹھائے گی (کیونکہ یقیناً ا س کشف میں موسیٰ اورعیسیٰ علیھما السلام سے مراد ان کی قومیں ہیں نہ کہ وہ خود۔کیونکہ انہوں نے محمد رسول اللہ کا زمانہ نہیں پایا۔بلکہ ان کی قوم نے یہ زمانہ پایا )بلکہ ان کاانکار کرکے اپنے سفر کوجاری رکھے گی اوراپنے مذہب کے زمانہ کے ختم ہونے کو تسلیم نہ کرے گی۔تب ایک لمبے سفر کے بعد وہ اپنے اند رتکان محسوس کرے گی حیران ہوگی کہ ہمیں جو کہاگیاتھا کہ ایک رسول کامل آنے والا ہے وہ کیوں نہیں آیا۔اس وقت تھک کروہ سوچ میں پڑ جائے گی کہ کہیں ہم سے غلطی تونہیں ہوئی۔کہیں وہ آتو نہیں چکا۔اورہم ا س کے ماننے سے محرو م تونہیں رہ گئے۔قَالَ اَرَءَيْتَ اِذْ اَوَيْنَاۤ اِلَى الصَّخْرَةِ فَاِنِّيْ نَسِيْتُ اس نے کہا (کہ )بتائیے (اب کیا ہوگا) جب ہم (آرام کے لئے )اس چٹان پر ٹھیرےتومیں مچھلی(کاخیال )بھول الْحُوْتَ١ٞ وَ مَاۤ اَنْسٰىنِيْهُ اِلَّا الشَّيْطٰنُ اَنْ اَذْكُرَهٗ١ۚ وَ اتَّخَذَ گیا۔اورمجھے یہ (بات )شیطان کے سواکسی نے نہیں بھلائی۔اوراس نے سمندر میں عجیب طرح سَبِيْلَهٗ فِي الْبَحْرِ١ۖۗ عَجَبًا۰۰۶۴ سے اپنی راہ لے لی۔حلّ لُغَات۔عجبًا۔اَلْعَجَبُ کے لئے دیکھو یونس آیت نمبر۳۔
الْعَجَبُ۔اِنْکَارُمَا یَرِدُ عَلَیْکَ یعنے جب کوئی ایسا امر پیش آئے کہ اس کے ماننے میں طبیعت کو انقباض اور انکار ہو تو اس حالت انکار کو عجب کہتے ہیں۔اِسْتِطْرَافُہُ۔پیش آمدہ امر کو پسند کرنے کو بھی عجب کہتے ہیں۔رَوْعَۃٌ تَعْتَرِی الْاِنْسَانَ عِنْدَ اسْتِعْظَامِ الشَّیْءِ۔یعنی اس حالت رعب کو بھی عجب کہتے ہیں جو انسان پر کسی چیز کو بہت ہی بڑا سمجھنے کے وقت طاری ہوتی ہے۔وَمِنَ اللہِ : الرَّضٰی اور جب اللہ کی طرف اس لفظ کو منسوب کیا جاوے تو اس کے معنی پسندیدگی کے ہوتے ہیں۔(اقرب) تفسیر۔الصخرة کی تعبیر اور موسوی قوم کا فسق و فجور میں مبتلا ہونا الصَّخْرَۃُ:الْحَجَرُ الْعَظِیْمُ الصَّلْبُ(اقرب)یعنی عربی زبان میں بڑے اور سخت پتھرکوکہتے ہیں اورعلم تعبیر میں صخر ہ کے معنے لکھے ہیں۔وَتَدُلُّ عَلٰی الْقِحَۃِ و الْفُجُوْرِ (تعطیر الانام المنام زیر لفظ صخرہ)یعنی خواب میں کوئی صخرہ دیکھے تو اس کے معنے یہ ہوتے ہیں کہ وہ نہایت گندے فسق و فجور میں مبتلاہوگیا ہے۔اس تعبیر کی روسے اِذْ اَوَيْنَاۤ اِلَى الصَّخْرَةِ کے معنے یہ ہوں گے کہ جب ہم فسق وفجو رمیں مبتلاہوگئے اورمیں بتاآیا ہو ں کہ اس کشف میں موسیٰ علیہ السلام اور حضرت عیسیٰ ؑ سے مراد ان کی اقوام ہیں۔کیونکہ محمد رسول اللہ صلعم کا زمانہ انہوں نے پایا تھا نہ کہ خود حضرت موسیٰ اورحضر ت عیسیٰ ؑ نے۔پس یہ تعبیر ہمیں دھوکے میں نہیں ڈال سکتی۔مراد یہ ہے کہ جب و ہ قوم جو حضرت موسیٰ ؑ اور حضرت عیسیٰ کی مشترکہ تھی۔فسق وفجور میں مبتلاہوجائے گی۔وہی زمانہ مجمع البحرین کا ہوگایعنی اس وقت محمد رسو ل اللہ صلی اللہ علیہ وسلم ظاہر ہوںگے اور یہ ظاہر ہے کہ نبی تبھی دنیا میںآتے ہیں جبکہ اس وقت کے لوگ فسق و فجور میں مبتلاہوجاتے ہیں۔پس ا س نظارہ کی تعبیر یہ ہوگی۔کہ جب مسیحی قو م فسق وفجور میں مبتلاہوگئی تھی وہی وقت محمد رسول اللہ ؐ کے ظہور کاتھا۔اوریہ خیا ل مسیحیوں کو ایک لمبے عرصہ کے بعد اپنے سفرمیں تھک جانے اوراپنی کوششوں میں ناکا م رہنے کے بعد پیدا ہوگا اوروہ افسوس کریں گے کہ ہم نے اس زمانہ کوکیوں کھودیا۔وَ مَاۤ اَنْسٰىنِيْهُ اِلَّا الشَّيْطٰنُ نے اس مضمون کواوربھی واضح کردیا ہے یعنی محمد رسول اللہ کی پہچان سے ہم شیطانی وساوس کی وجہ سے محروم رہے۔ورنہ جبکہ ہمار ی قو م کے ہاتھ سے عبادت کے ثمرات جاتے رہے تھے۔اورہم فسق وفجور میں مبتلاہوگئے تھے۔توکیوں ہم نے یہ نہ سمجھ لیا کہ اب مجمع البحرین کا مقام آگیاہے۔اورہمار ی قوم سے خدا تعالیٰ نے اپنی مدد ہٹالی ہے۔اورموعود نبی کا زمانہ آچکا ہے۔اوروَ اتَّخَذَ سَبِيْلَهٗ فِي الْبَحْرِعَجَبًا۔جو فرمایا اس میں وہ اپنی اس غلطی پر تعجب کرتے ہیں کہ حوت ہمارے ہاتھ سے نکل کر کس طرح دوسرے سمندر میں چلی گئی۔یعنی عبادت کے ثمرات مسلمانوں کی طرف منتقل ہوگئے اور ہم خالی ہاتھ رہ گئے۔
یہ نظار ہ بھی کشف پر دلالت کرتاہے۔ورنہ مجمع البحرین کے سمجھانے کے لئے کسی ظاہر ی مچھلی کے نشان کی کوئی ضرورت نہ تھی۔اوراگر ظاہری طور پر مچھلی کو دیکھ کر و ہ ونوں چل رہے تھے۔توپھر بھولنے کے معنے ہی کوئی نہیں۔کیا کبھی ا س دنیا میں ایسا ہواہے کہ مثلاً کوئی شخص موٹر میں سفر کررہاہو۔پھر ایک لمباسفر طے کرنے کے بعد وہ بھول جائے کہ میں موٹر میں سفر کررہاتھا۔اورپید ل سفرکرنے لگ جائے۔اور کچھ دورجاکر اسے یہ بات یاد آئے۔غرض جب مچھلی کے نشان پر و ہ چل پڑے تھے تو وہ ایک قدم بھی مچھلی کے بغیر نہ چل نہیںسکتے تھے۔اس میں بھولنےکاکوئی امکان ہی نہ تھا۔قَالَ ذٰلِكَ مَا كُنَّا نَبْغِ١ۖۗ فَارْتَدَّا عَلٰۤى اٰثَارِهِمَا قَصَصًاۙ۰۰۶۵ اس نے کہا (کہ )یہی وہ (مقام )ہے جس کی ہمیں تلاش تھی۔پھر وہ اپنے پائوں کے نشان دیکھتے ہوئے واپس لوٹے۔حلّ لُغَات۔نَبْغ۔نَبْغِ بَغَاہُ کے معنے ہیں طَلَبَہُ اسے چاہا (اقرب)نَبْغِ جمع متکلم کاصیغہ ہے اس کے معنے ہوں گے کہ ہم چاہتے ہیں۔تفسیر۔یعنی اس موقعہ پر وہ سمجھ جائیں گے کہ انہوں نے غلطی سے اپنا الگ سفر جاری رکھا۔مجمع البحرین کو تووہ پیچھے چھو ڑآئے ہیں۔فَوَجَدَا عَبْدًا مِّنْ عِبَادِنَاۤ اٰتَيْنٰهُ رَحْمَةً مِّنْ عِنْدِنَا وَ توانہوں نے ہمار ے(برگزید ہ)بندوں میں سے ایک ایسابندہ (وہاں)پایا جسے ہم نے اپنے حضور سے رحمت (کی عَلَّمْنٰهُ مِنْ لَّدُنَّا عِلْمًا۰۰۶۶ سیرت)بخشی تھی۔اوراسے ہم نے اپنی جناب سے (خاص )علم (بھی)عطا کیاتھا۔تفسیر۔عَبْدًا سے مرادآنحضرت ؐ ہیں عَبْدًا مِّنْ عِبَادِنَاۤقرآن مجید میں آنحضرت صلی اللہ علیہ وسلم کوعبدٌ کے لفظ سے یاد کیاگیا ہے۔سورۃ الجن میں اللہ تعالیٰ فرماتا ہےوَاَنَّہٗ لَمَّا قَامَ عَبْدُ اللّٰہِ یَدْعُوْہُ کَادُوْا یَکُوْنُوْنَ عَلَیْہِ لِبَدًا۔(الجن :۲۰)کہ آپ جب نماز کے لئے کھڑے ہوتے ہیں۔تولوگ آپ ہجوم
کرکے امڈ آتے ہیں۔صوفیاء نے تویہاں تک بحث کی ہے کہ عبدکا مقام سب درجات سے بڑادرجہ اوربلند مقام ہے اورسوائے آنحضرت صلی اللہ علیہ وسلم کے کوئی کامل عبد نہیں ہے۔اٰتَيْنٰهُ رَحْمَةً مِّنْ عِنْدِنَا میں بھی آپ کے وجود کی طرف اشار ہ فرمایا ہے۔جیساکہ فرماتا ہے وَ مَاۤ اَرْسَلْنٰكَ اِلَّا رَحْمَةً لِّلْعٰلَمِيْنَ (الانبیاء :۱۰۸)یعنی ہم نے تجھے جہان کے لئے رحمت ہی رحمت بناکربھیجاہے۔عَلَّمْنٰهُ مِنْ لَّدُنَّا عِلْمًا۔یعنی اس کو خاص علم دیاگیاہے جوپہلو ں کو نہ ملا۔سورۃ نساء میں اللہ تعالیٰ فرماتا ہے وَ عَلَّمَكَ مَا لَمْ تَكُنْ تَعْلَمُ وَ كَانَ فَضْلُ اللّٰهِ عَلَيْكَ عَظِيْمًا(النساء :۱۱۴)کہ اے رسول ہم نے تجھے وہ کچھ سکھایاہے جوتوپہلے نہ جانتاتھا۔اورتجھ پر اس ذریعہ سے بڑافضل کیاہے۔اسی طرح فرماتا ہے۔وَ عُلِّمْتُمْ مَّا لَمْ تَعْلَمُوْۤا اَنْتُمْ وَ لَاۤ اٰبَآؤُكُمْ(الانعام :۹۲) یعنی اس نبی کے ذریعہ سے تم کو وہ علم عطا کیاگیاہے جواس سے پہلے کسی کو نہیں دیا گیا۔اور پہلوں میں موسیٰ و عیسیٰ بھی شامل ہیں۔اسی طرح اللہ تعالیٰ فرماتا ہے۔اِنَّكَ لَتُلَقَّى الْقُرْاٰنَ مِنْ لَّدُنْ حَكِيْمٍ عَلِيْمٍ (النمل :۷) یعنی تجھ کو قرآن حکیم اورعلیم خدا کی طرف سے سکھایاجاتاہے۔اسی طرح رسول کریم صلی اللہ علیہ وسلم کو دعاسکھائی گئی ہے کہقُلْ رَّبِّ زِدْنِيْ عِلْمًا(طٰہٰ :۱۱۵)یعنی اے محمد (صلی اللہ علیہ وسلم)تواللہ تعالیٰ سے دعا کرتا رہا کر کہ الٰہی میراعلم اوربڑھا۔میراعلم اوربڑھا۔قَالَ لَهٗ مُوْسٰى هَلْ اَتَّبِعُكَ عَلٰۤى اَنْ تُعَلِّمَنِ مِمَّا موسیٰ نے اس سے کہا(کہ )کیامیں اس (مقصد کے )لئے آپ کے ساتھ چل سکتاہوں۔کہ جوعلم آپ کو عطاہواہے عُلِّمْتَ رُشْدًا۰۰۶۷ اس میں سے کچھ رشد (کی باتیں)مجھے بھی سکھائیں۔حل لغات۔رُشْدٌ۔رُشْدٌ حق کے راستے پراستقامت اختیار کرنارشد کہلاتاہے (اقرب) تفسیر۔اس آیت سے موسوی مقام اورمحمدی مقام کامقابلہ کرکے دکھایاگیاہے اوربتایا ہے کہ موسوی مقام محمدی مقام کے تابع ہے اورجن امور کی تہ تک محمدی علوم پہنچے ہیں۔ان تک موسوی علوم نہیں پہنچے۔اور کشف میں ا س لطیف مقابلہ کو ایک مکالمہ اورمصاحبت کی صورت میں دکھایاگیاہے۔
قَالَ اِنَّكَ لَنْ تَسْتَطِيْعَ مَعِيَ صَبْرًا۰۰۶۸ اس نے کہا (کہ)تومیرے ساتھ رہ کر ہرگزصبرنہیں کرسکے گا۔تفسیر۔محمدی کمالات کی بلندی اس آیت میں گویا لن ترانی والے مضمون کو بیان کیاگیاہے کہ محمدی کمالات کی بلندی کو موسوی کمالات نہیں پہنچ سکتے۔اوربتایا ہے کہ محمدی قوم کاصبر اورمرتبہ رکھتاہے اورموسوی قوم کاصبراور مرتبہ رکھتاہے۔جن ابتلائوںاورمشکلا ت کامسلمانوں نے مقابلہ کیا موسوی سلسلہ کے لوگ وہاں آکر رہ گئے۔ا س میں اس طرف بھی اشارہ کیا ہے۔کہ گومسیحی سلسلہ کےلوگوںنے ایک لمبے عرصہ تک مشکلات برداشت کیں مگروہ مشکلات جسمانی تھیں۔علمی آزمائیشیں نہ تھیں۔علمی مشکلات کاوہ مقابلہ نہیں کرسکے۔چنانچہ خود حضرت مسیح ؑ شاکی رہے کہ میرے مقام کوکوئی نہیں سمجھا۔حتیٰ کہ انجیل میں تویہاں تک لکھا ہے۔کہ مسیح ؑنے اپنی فلسطینی زندگی کے آخری سال میں جبکہ صلیب کاواقعہ قریب تھا۔اپنے سب سے مقرب شاگرد پطرس سے پوچھا کہ لوگ مجھے کیا سمجھتے ہیں۔اورجب انہوں نے بتایاکہ مَیں توآپ کومسیح سمجھتاہوں تووہ بہت خو ش ہوئے (متی باب ۱۶ آیت ۱۳۔۱۹) جس سے معلوم ہوتاہے کہ اورتواورحواری بھی ان کومسیح ماننے کے لئے تیار نہ تھے۔صرف ایک معمولی نبی سمجھتے تھے۔پس پطرس کے ایمان کودیکھ کر ان کوخوشی ہوئی۔آنحضرت ؐ کے صبر نفس کا مقابلہ موسوی قوم سے اس آیت میں محمد رسول اللہ صلی اللہ علیہ وسلم اور حضرت موسیٰ ؑ کی طبیعتوںکابھی مقابلہ ہے۔حضرت موسیٰ ؑ جلد سوال کرنے لگ جاتے۔اور رسول کریم صلی اللہ علیہ وسلم خاموش رہتے۔یہاں تک کہ اللہ تعالیٰ ہی آپ پر ہربات ظاہرکرتا۔اوریہی فرق دونوں کی امتوں میں تھا۔تورات پر نظر ڈالو۔کہ بنی اسرائیل سوال پر سوال کررہے ہیں۔مگرآنحضرت صلی اللہ علیہ وآلہ وسلم کی قوم کا یہ حال ہے کہ صحابہؓ کہتے ہیں کہ ہم انتظار کیاکرتے تھے کہ کوئی اعرابی آوے۔اورآنحضرت صلی اللہ علیہ وآلہٖ وسلم سے کوئی سوال پوچھے۔تاہم بھی سن لیں۔گویا اس قدر وقار اورصبر نفس حاصل تھا۔کہ خود نہ پوچھا کرتے تھے۔اسی کی طرف اشارہ کرتے ہوئے خدا تعالیٰ فرماتا ہے۔اَمْ تُرِيْدُوْنَ اَنْ تَسْـَٔلُوْا رَسُوْلَكُمْ كَمَا سُىِٕلَ مُوْسٰى مِنْ قَبْلُ(البقرة :۱۰۹) کہ کیاتم سے بعض موسیٰ کی قوم کی طرح سوال کرناچاہتے ہیں۔ایسانہ کرنا۔وہ لوگ انہیں بار بار خدا تعالیٰ کی طرف توجہ کرنے پر اور ہر بات کے متعلق سوال کرنے کے لئے مجبورکیاکرتے تھے۔چنانچہ اس حکم پر عمل کرتے ہوئے صحابہؓ نے ادب کے طریق کومضبوطی سے پکڑ لیا(بخاری کتاب العلم )۔خود آنحضرت صلی اللہ علیہ وآلہٖ وسلم کایہ حال